ଭୁବନେଶ୍ବର : ତୁରନ୍ତ ଡାକ ବିଧାନସଭା ସ୍ବତନ୍ତ୍ର ଅଧିବେଶନ। ରାଜ୍ଯର ରାଜନୈତିକ ଅଧିକାର କ୍ଷୁର୍ଣ୍ଣ ନ ହେବା ନେଇ ପାରିତ କର ସଂକଳ୍ପ। ସୀମାପୁନଃନିର୍ଦ୍ଧାରଣ ବିଲ ନେଇ ମୁଖ୍ଯମନ୍ତ୍ରୀ ମୋହନ ଚରଣ ମାଝୀଙ୍କୁ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ଚିଠି। ସଂସଦରେ ପାରିତ ହେବାକୁ ଯାଉଛି ମହିଳା ସଂରକ୍ଷଣ ବିଲ। ଏହାକୁ ସର୍ବାନ୍ତକରଣରେ ସ୍ବାଗତ କରୁଛି ବିଜୁ ଜନତା ଦଳ। ସେହିପରି ରାଜ୍ଯର ରାଜନୈତିକ ସ୍ବାର୍ଥ ହାନି ହେଉ ନଥିଲେ ସୀମାପୁନଃନିର୍ଦ୍ଧାରଣକୁ ସ୍ବାଗତ କରିବ ବିଜେଡି। ସ୍ବତନ୍ତ୍ର ଅଧିବେଶନରେ ସଂସଦରେ ଆଗତ ସୀମାପୁନଃନିର୍ଦ୍ଧାରଣ ବିଲ ୨୦୨୬ ଉପରେ ବିଧାନସଭା ଗୃହରେ ଆଲୋଚନା କରିବାକୁ ଆହ୍ବାନ ଦେଇଛନ୍ତି। ଗୃହରେ ଆଲୋଚନା ମାଧ୍ଯମରେ ଓଡ଼ିଶାର ରାଜନୈତିକ ଅଧିକାର ଯେପରି ଆଉ କେଉଁ ରାଜ୍ଯ ଛଡ଼ାଇ ନ ନିଏ। ସେଥିପାଇଁ ସର୍ବସମ୍ମତିକ୍ରମେ ସଂକଳ୍ପ ପାରିତ କରିବା ଉପରେ ନବୀନ ଗୁରୁତ୍ବ ଦେଇଛନ୍ତି। ନବୀନ ମୋହନଙ୍କୁ ଲେଖିୃଥିବା ଚିଠିରେ ଉଲ୍ଲେଖ କରିଛନ୍ତି, ବିଜୁ ଜନତା ଦଳ ସୀମାପୁନଃନିର୍ଦ୍ଧାରଣ ବିଲକୁ ସ୍ବାଗତ କରୁଛି। କିନ୍ତୁ ଏହା କେବଳ ସଂଖ୍ଯାର ପ୍ରସଙ୍ଗ ନୁହେଁ। ଏହି ବିଲ ସିଧାସଳଖ ସହଭାଗୀତା ଭିତ୍ତିକ ସଂଘୀୟ ବ୍ଯବସ୍ଥାକୁ କୁଠାରଘାତ କରୁଛି। ରାଜ୍ଯର ରାଜନୈତିକ ଅଧିକାର କୌଣସି ମତେ ଗୌଣ ହେଲେ ଏହା ପ୍ରତ୍ଯକ୍ଷ ଭାବେ ଓଡ଼ିଶାବାସୀଙ୍କ ଆକାଂକ୍ଷାକୁ ଧୂଳିସାତ କରିବ।
ସଂସଦର ତିନି ଦିନିଆ ସ୍ବତନ୍ତ୍ର ଅଧିବେଶନରେ ୧୩୧ତମ ସମ୍ବିଧାନ ସଂଶୋଧନ ବିଲ ୨୦୨୬ ଓ ଏଥିସହିତ ଜଡ଼ିତ ସୀମାପୁନଃନିର୍ଦ୍ଧାରଣ ବିଲ ମାଧ୍ଯମରେ ଲୋକସଭା ଓ ବିଧାନସଭାଗୁଡ଼ିକର ରୂପରେଖ ବଦଳାଇବ। ଏହି ପରିପ୍ରେକ୍ଷୀରେ ଲୋକସଭାର ଆସନସଂଖ୍ଯା ୫୪୩ରୁ ୮୫୦କୁ ବୃଦ୍ଧି ପାଇବ। ବର୍ତ୍ତମାନ ଲୋକସଭାରେ ଓଡ଼ିଶାର ୨୧ ଜଣ ସାଂସଦ ଅଛନ୍ତି। ଏହା ବୃଦ୍ଧି ପାଇ ୨୯ରେ ପହଞ୍ଚିବ। ଯାହାକି ଅନୁପାତିକ ଭିତ୍ତିରେ ୩.୪ ପ୍ରତିଶତ କମ। ଅନ୍ଯପକ୍ଷରେ ଓଡ଼ିଶା ଜନସଂଖ୍ଯା ନିୟନ୍ତ୍ରଣରେ ଦେଶର ଏକ ଅଗ୍ରଣୀ ରାଜ୍ଯ। ଏହି ପରିସଂଖ୍ଯାନ ଅନୁଯାୟୀ ଜାତୀୟ ରାଜନୈତିକ ଭିତ୍ତିରେ ୧୫ ପ୍ରତିଶତ ପ୍ରତିନିଧିତ୍ବ କମିବ। ସେହି ଅନୁଯାୟୀ ରାଜ୍ଯର ରାଜନୈତିକ ସ୍ବର ଓ ପ୍ରଭାବ ଜାତୀୟସ୍ତରରେ ପ୍ରଭାବିତ ହେବା ଆଶଙ୍କା ରହିଛି। ମହିଳା ସଂରକ୍ଷଣକୁ ବିଲକୁ ବିଜେଡି ସମର୍ଥନ କରୁଛି। ବିଜୁ ବାବୁ ନାରୀ ସଶକ୍ତିକରଣର ଜଣେ ବଳିଷ୍ଠ ସମର୍ଥକ ଥିଲେ। ସେ ମଧ୍ଯ ପଞ୍ଚାୟତିରାଜ ବ୍ଯବସ୍ଥାରେ ମହିଳା ସଂରକ୍ଷଣ ଲାଗୁ କରିବାରେ ଅଗ୍ରଣୀ ଭୂମିକା ନେଇଥିଲେ। ଅନୁରୂପ ଭାବେ ବିଜେଡି ମଧ୍ଯ ସର୍ବଦା ମହିଳା ପ୍ରତିନିଧିତ୍ବକୁ ଅଗ୍ରାଧିକାର ଦେଇଆସିଛି। ପଞ୍ଚାୟତିରାଜ, ପୌରପାଳିକା ବ୍ଯବସ୍ଥାରେ ମହିଳାମାନଙ୍କ ପାଇଁ ୫୦ ପ୍ରତିଶତ ସଂରକ୍ଷଣ ବ୍ଯବସ୍ଥା ଲାଗୁ କରିବାରେ ବିଜେଡି ଦେଶରେ ପ୍ରଥମ ଉଦାହରଣ ସୃଷ୍ଟି କରିଥିଲା। ଏଣୁ ଜାତୀୟ ସ୍ତରରେ ମହିଳା ସଶକ୍ତିକରଣ ପାଇଁ ଅଣାଯାଇଥିବା ବିଲକୁ ଦଳ ସମର୍ଥନ କରୁଛି।
