ନନ୍ଦିଘୋଷ ବ୍ୟୁରୋ: ଆଗାମୀ ପଞ୍ଚାୟତ ନିର୍ବାଚନରେ ପ୍ରାର୍ଥୀ ଦେବ ଓଡ଼ିଶା ଜନତା କଂଗ୍ରେସ । ଏନେଇ ସୂଚନା ଦେଇଛନ୍ତି ଦଳର ପ୍ରତିଷ୍ଠାତା ତଥା ସଭାପତି ମହମ୍ମଦ ମୋକିମ୍ । ମୋକିମ୍ କହିଛନ୍ତି ଯେ, ପଞ୍ଚାୟତ ଆମ ପାଇଁ ମାପକାଠି । ଆମେ ଏଥିପାଇଁ ପୂର୍ଣ୍ଣ ମାତ୍ରାରେ ପ୍ରସ୍ତୁତ ଅଛୁ। ସମସ୍ତ ମହାନଗର ନିଗମ, ପୌରାଞ୍ଚଳ ଓ ଜିଲ୍ଲା ସ୍ତରରେ ପ୍ରସ୍ତୁତି ଚାଲିଛି । ପୌର ନିର୍ବାଚନରେ ସମ୍ପୂର୍ଣ୍ଣ ପ୍ରାର୍ଥୀ ଦେବାପାଇଁ କହିଛନ୍ତି ମୋକିମ୍ । ଏହାସହ ପଞ୍ଚାୟତ ନିର୍ବାଚନକୁ ନେଇ କହିଛନ୍ତି ଯେ, ପଞ୍ଚାୟତ ବିନା ରାଜନୀତି ହୋଇ ପାରିବନି । ତେଣୁ ସରପଞ୍ଚ, ସମିତି ସଭ୍ୟ ଓ ଜିଲ୍ଲା ପରିଷଦ ପଦବୀ ପାଇଁ ପ୍ରାର୍ଥୀ ଦେବ ଓଡ଼ିଶା ଜନତା କଂଗ୍ରେସ । ଏଥିସହ ଦଳ ଯୁବକଙ୍କୁ ପ୍ରାଧାନ୍ୟ ଦେଇ ୯୦ ପ୍ରତିଶତ ଯୁବକଙ୍କୁ ଟିକେଟ ଦିଆଯିବ । ପଞ୍ଚାୟତ ଓ ପୌର ନିର୍ବାଚନ ପରେ ୨୦୨୯ ସାଧାରଣ ନିର୍ବାଚନ ପାଇଁ ଛାପ ଛାଡ଼ିବୁ ବୋଲି କହିଛନ୍ତି ମୋକିମ୍ ।
