ନନ୍ଦିଘୋଷ ବ୍ୟୁରୋ : ଆସନ୍ତା ୨୨ରୁ ଦୁଇ ଦିନିଆ ଭାରତ ଗସ୍ତରେ ଆସିବେ ନେପାଳ ପ୍ରଧାନମନ୍ତ୍ରୀ ବାଲେନ୍ଦ୍ର ଶାହ। ଭାରତ-ନେପାଳ ଦ୍ବିପାକ୍ଷିକ ସମ୍ପର୍କ ବୃଦ୍ଧି ଲାଗି ଏହି ଗସ୍ତ ଉଦ୍ଦିଷ୍ଟ। ବଡ଼ କଥା ହେଉଛି ବାଲେନ୍ଦ୍ର ଚୀନ ଗସ୍ତ ନ କରି ପ୍ରଥମେ ଭାରତକୁ ଆସିବା ନିଷ୍ପତ୍ତି ଭୂରାଜନୈିତିକ ଦୃଷ୍ଟିରୁ ଗୁରୁତ୍ବପୂର୍ଣ୍ଣ ହୋଇଛି। ଦୁଇ ଦେଶ ମଧ୍ୟରେ ଆଞ୍ଚଳିକ ସହଯୋଗ ଓ ଅନ୍ତର୍ଜାତୀୟ ପ୍ରସଙ୍ଗ ଆଲୋଚନା କରିବାର କାର୍ଯ୍ଯକ୍ରମ ରହିଛି। ଗତ ମାର୍ଚ୍ଚରେ ନେପାଳର ପ୍ରଧାନମନ୍ତ୍ରୀ ହେବା ପରେ ଏହା ହେବ ବାଲେନ୍ଦ୍ରଙ୍କ ପ୍ରଥମ ଭାରତ ଗସ୍ତ। ସୋମବାର ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ସାକ୍ଷାତ କରିବାର କାର୍ଯ୍ୟକ୍ରମ ରହିଛି। ପ୍ରଧାନମନ୍ତ୍ରୀ ମୋଦିଙ୍କ ଅନୁରୋଧ କ୍ରମେ ସେ ଭାରତ ଆସୁଥିବା କୁହାଯାଇଛି। ପଡୋଶୀ ରାଷ୍ଟ୍ରକୁ ପ୍ରଥମେ ଗୁରୁତ୍ବ ନୀତି ଅନୁସାରେ ନେପାଳ ସହ କଥାବାର୍ତ୍ତା କରିବାକୁ ଭାରତ ଆଗ୍ରହୀ ବୋଲି କହିଛି ବୈଦେଶିକ ମନ୍ତ୍ରାଳୟ। ଦୁଇ ଦେଶ ମଧ୍ୟରେ ଶାନ୍ତି ଓ ସୌହାର୍ଦ୍ଦ୍ୟ ପ୍ରତିଷ୍ଠା ଲାଗି କଥାବାର୍ତ୍ତାକୁ ପ୍ରାଧାନ୍ୟ ଦିଆଯାଇଆସୁଛି। ବାଲେନ୍ଦ୍ରଙ୍କ ଗସ୍ତ ଭାରତ ଓ ନେପାଳ ମଧ୍ୟରେ ସୁସମ୍ପର୍କ ପ୍ରତିଷ୍ଠା କରିବ। ଦୁଇ ଦେଶ ମଧ୍ୟରେ ଦୀର୍ଘ କାଳ ଧରି ସୁସମ୍ପର୍କ ରହିଆସିଛି। କୌଶଳଗତ ଦୃଷ୍ଟିରୁ ବି ଏହି ସମ୍ପର୍କ ଗୁରୁତ୍ବପୂର୍ଣ୍ଣ। ସାମଗ୍ରୀ ଓ ସେବା କ୍ଷେତ୍ରରେ ନେପାଳ ଭାରତ ଉପରେ ନିର୍ଭରଶୀଳ। ଭାରତରୁ ନେପାଳ ବିପୁଳ ସାମଗ୍ରୀ ବି ଆମଦାନୀ କରୁଛି। ତେବେ ଲିପୁଲେଖ, ଲିମ୍ପିୟାଧୁରା ଓ କଳାପାଣିକୁ ନେଇ ଦୁଇ ଦେଶ ମଧ୍ୟରେ ବିବାଦ ରହିଛି। ଏହି ୩ ଅଞ୍ଚଳ ଉତ୍ତରାଖଣ୍ଡର ବୋଲି ଭାରତ ଦାବି କରି ଆସୁଛି।
ବନ୍ୟା ଓ ଭୂସ୍ଖଳନରେ ଧ୍ସସ୍ତବିଧ୍ବସ୍ତ ନେପାଳର ପୁନର୍ଗଠନ ଲାଗି ୪୦ ହଜାର କୋଟି ଭାରତୀୟ ଟଙ୍କାର ଆର୍ଥିକ ପ୍ୟାକେଜ ଚାହୁଁଛନ୍ତି ବାଲେନ୍ଦ୍ର। ଏଥିରେ ରହିଛି ସହାୟତା, ରିହାତି ହାରରେ ଋଣ ଓ ଅନୁଦାନ। ମହାକାଲି ନଦୀ ଉପରେ ପଞ୍ଚେଶ୍ବର ବହୁମୁଖୀ ଜଳବିଦ୍ୟୁତ ଯୋଜନାର ଚୂଡ଼ାନ୍ତ ରୂପରେଖ, ଦୁଇ ଦେଶ ମଧ୍ୟରେ ବାଣିଜ୍ୟ ଓ ଟ୍ରାଞ୍ଜିଟ ରୁଟ୍, ଅନ୍ତର୍ଜାତୀୟ ବିମାନ ଉଡ଼ାଣ, ଭାରତୀୟ ସେନାରେ ଗୋର୍ଖାଙ୍କ ନିଯୁକ୍ତି ଆଦି ପ୍ରସଙ୍ଗ ସ୍ଥାନ ପାଇବ।….

