ନନ୍ଦିଘୋଷବ୍ୟୁର: ବଜାରକୁ ଆସିଲା ବରିଷ୍ଠ କଂଗ୍ରେସ ନେତ୍ରୀ ସୋନିଆ ଗାନ୍ଧିଙ୍କ ବହୁ ଚର୍ଚ୍ଚିତ ପୁସ୍ତକ ‘Belonging: A Journey Of Love’। ଦିଲ୍ଲୀ ସମେତ ଦେଶର ଅନ୍ୟାନ୍ୟ ସହରରେ ଏହି ପୁସ୍ତକ ଉପଲବ୍ଧ ହୋଇଛି। ଗାନ୍ଧି ପରିବାରର ସଂଘର୍ଷ, ତ୍ୟାଗ, ମାନବିକ ଦୃଷ୍ଟିକୋଣ ଓ ପ୍ରେରଣାଦାୟୀ ଘଟଣାକୁ ପୁସ୍ତକରେ ସ୍ଥାନ ଦିଆଯାଇଛି।
ସୋନିଆ ଗାନ୍ଧିଙ୍କ କହିବା ଅନୁଯାୟୀ, ଏହା କୌଣସି ରାଜନୈତିକ ପୁସ୍ତକ ନୁହେଁ। ବରଂ ଏହା ତାଙ୍କର ବ୍ୟକ୍ତିଗତ ଅନୁଭୂତି ଓ ଆଭିମୁଖ୍ୟକୁ ନେଇ ରଚିତ ଏକ ପୁସ୍ତକ। ଏଥିରେ ପରିବାରର ସମସ୍ତ ସଦସ୍ୟଙ୍କ ସମ୍ପର୍କରେ ନିରପେକ୍ଷତା ଓ ସାଧୁତାର ସହ ବର୍ଣ୍ଣନା କରାଯାଇଛି। ଗାନ୍ଧି ପରିବାରର ସଚ୍ଚୋଟତା, ଗୁଣବତ୍ତା, ଦେଶପ୍ରେମ ଓ ବିଭିନ୍ନ ଆଭିମୁଖ୍ୟ ସମ୍ପର୍କରେ ମଧ୍ୟ ଏଥିରେ ଉଲ୍ଲେଖ କରାଯାଇଛି। ଏହି ପୁସ୍ତକଟି ରାଜନୈତିକ ନୁହେଁ ବୋଲି ସୋନିଆ ସ୍ପଷ୍ଟ କରିଥିଲେ ମଧ୍ୟ ଏହାକୁ ନେଇ ରାଜନୈତିକ ବିବାଦ ଆରମ୍ଭ ହୋଇଛି। ମୋଦି ସରକାରଙ୍କୁ ବିଭିନ୍ନ ପ୍ରସଙ୍ଗରେ ଟାର୍ଗେଟ କରିବା ସହ କଂଗ୍ରେସର ଅତୀତକୁ ସୁରକ୍ଷା ଦେବା ପାଇଁ ଏହି ପୁସ୍ତକକୁ ବ୍ୟବହାର କରାଯାଇଛି ବୋଲି ବିଜେପି ଅଭିଯୋଗ କରିଛି।
ଗଣତାନ୍ତ୍ରିକ ପ୍ରତିଷ୍ଠାନଗୁଡ଼ିକୁ ମୋଦି ସରକାର ଦୁର୍ବଳ କରୁଥିବା ନେଇ ସୋନିଆ ଗାନ୍ଧି ଅଭିଯୋଗ କରିଥିବାବେଳେ ଜରୁରୀକାଳୀନ ପରିସ୍ଥିତି ସମୟରେ କଂଗ୍ରେସର ଭୂମିକାକୁ ନେଇ ବିଜେପି ପ୍ରଶ୍ନ ଉଠାଇଛି। ଏହାସହ ଜରୁରୀକାଳୀନ ପରିସ୍ଥିତିକୁ ସୋନିଆ ସମର୍ଥନ କରୁଥିବା ଦର୍ଶାଇ ବିଜେପି ପାଲଟା ଆକ୍ରମଣ କରିଛି। ତେବେ ସୋନିଆ ଗାନ୍ଧି କହିଛନ୍ତି ଯେ, ବିଜେପି ସରକାର ଗତ ୧୨ ବର୍ଷର ଶାସନ କାଳରେ ଦେଶ, ଗଣତନ୍ତ୍ର ଓ ବିଭିନ୍ନ ଗଣତାନ୍ତ୍ରିକ ଅନୁଷ୍ଠାନର ବ୍ୟାପକ କ୍ଷତି ହୋଇଛି। ଏହି କ୍ଷତିର ଭରଣା କରିବା ପାଇଁ ଆହୁରି ଅନେକ ସମୟ ଲାଗିବ। ତେବେ ଦେଶର ପରିସ୍ଥିତିରେ ପରିବର୍ତ୍ତନ ଆସିବା ନେଇ ସେ ଆଶାବାଦୀ ଥିବା କହିଛନ୍ତି।
ଏହାସହ ଦେଶରେ ବର୍ତ୍ତମାନ ଅବାଧ, ମୁକ୍ତ ଓ ନିରପେକ୍ଷ ନିର୍ବାଚନ ହେଉନଥିବା ସୋନିଆ ଅଭିଯୋଗ କରିଛନ୍ତି। କଂଗ୍ରେସ ସମେତ ଅନ୍ୟ ବିରୋଧୀ ଦଳଗୁଡ଼ିକୁ ସମାନ ସୁଯୋଗ ମିଳୁନଥିବା ମଧ୍ୟ ସେ କହିଛନ୍ତି। ଏହି ମନ୍ତବ୍ୟ ମାଧ୍ୟମରେ ସେ ପରୋକ୍ଷରେ ନିର୍ବାଚନ କମିଶନଙ୍କ କାର୍ଯ୍ୟପ୍ରଣାଳୀକୁ ମଧ୍ୟ ଟାର୍ଗେଟ କରିଛନ୍ତି।
