ନନ୍ଦିଘୋଷବ୍ୟୁରୋ: ଶୀତ ଋତୁ ପାଇଁ ବନ୍ଦ ହେଲା ପ୍ରସିଦ୍ଧ କେଦାରନାଥ ଧାମର ଦ୍ୱାର । ଆଜି ସକାଳ ୮ଟା ୩୦ ମିନିଟ୍ରେ ବୈଦିକ ମନ୍ତ୍ରୋଚ୍ଚାରଣ ଓ ପାରମ୍ପରିକ ରୀତିନୀତି ଅନୁଯାୟୀ ମନ୍ଦିରର ମୁଖ୍ୟ କବାଟ ବନ୍ଦ କରାଯାଇଛି । ତେବେ ମନ୍ଦିରର ଦ୍ୱାର ବନ୍ଦ ହେବା ପରେ ମଧ୍ୟ ଭକ୍ତମାନେ ବାବା କେଦାରଙ୍କ ଦର୍ଶନରୁ ବଞ୍ଚିତ ହେବେ ନାହିଁ । ଆଗାମୀ ୬ ମାସ ଧରି ଉଖୀମଠର ଓଁକାରେଶ୍ୱର ମନ୍ଦିରରେ ଶ୍ରଦ୍ଧାଳୁମାନେ ବାବାଙ୍କ ଦର୍ଶନ କରିପାରିବେ ।
ଶୀତ ଋତୁରେ କେଦାରନାଥ ଅଞ୍ଚଳରେ ପ୍ରବଳ ତୁଷାରପାତ ଏବଂ ଅସହ୍ୟ ଥଣ୍ଡା ଯୋଗୁଁ ମନ୍ଦିରରେ ନିୟମିତ ପୂଜାର୍ଚ୍ଚନା କରିବା ସମ୍ଭବ ହୋଇନଥାଏ । ଏଥିପାଇଁ ପ୍ରତିବର୍ଷ ଶୀତ ଋତୁ ଆରମ୍ଭରେ ମନ୍ଦିରର ଦ୍ୱାର ବନ୍ଦ କରାଯାଏ । ଏହି ସମୟରେ ବାବା କେଦାରନାଥଙ୍କ ଚଳନ୍ତି ବିଗ୍ରହକୁ ସ୍ୱତନ୍ତ୍ର ପାଲିଙ୍କିରେ ଉଖୀମଠକୁ ନିଆଯାଇଥାଏ । ସେଠାରେ ଥିବା ପ୍ରସିଦ୍ଧ ଓଁକାରେଶ୍ୱର ମନ୍ଦିରକୁ ବାବା କେଦାରଙ୍କ ଶୀତକାଳୀନ ପୂଜାସ୍ଥଳୀ ଭାବେ ମାନ୍ୟତା ମିଳିଛି ।
ଉତ୍ତରାଖଣ୍ଡର ରୁଦ୍ରପ୍ରୟାଗ ଜିଲ୍ଲାରେ ଅବସ୍ଥିତ ଉଖୀମଠରେ ରହିଛି ପ୍ରସିଦ୍ଧ ଓଁକାରେଶ୍ୱର ମନ୍ଦିର । ସମୁଦ୍ର ପତ୍ତନଠାରୁ ପ୍ରାୟ ୧,୩୧୧ ମିଟର ଉଚ୍ଚତାରେ ଥିବା ଏହି ମନ୍ଦିରରେ ଆଗାମୀ ୬ ମାସ ଧରି ବାବା କେଦାରଙ୍କ ପୂଜା ଓ ସମସ୍ତ ଧାର୍ମିକ ରୀତିନୀତି ସମ୍ପନ୍ନ ହେବ । ରୁଦ୍ରପ୍ରୟାଗଠାରୁ ପ୍ରାୟ ୪୧ କିଲୋମିଟର ଏବଂ ଗୁପ୍ତକାଶୀଠାରୁ ପ୍ରାୟ ୧୩ କିଲୋମିଟର ଦୂରରେ ରହିଛି ଏହି ପବିତ୍ର ସ୍ଥାନ । ତେଣୁ ଶୀତଦିନେ କେଦାରନାଥ ଯାତ୍ରା ସମ୍ଭବ ନହେଲେ ମଧ୍ୟ ଭକ୍ତମାନେ ଉଖୀମଠ ଯାଇ ବାବାଙ୍କ ଦର୍ଶନ କରିପାରିବେ ।
ତେବେ କେଦାରନାଥ ମନ୍ଦିରର ମୁଖ୍ୟ ଦ୍ୱାର ବନ୍ଦ ହେବା ପରେ ବାବାଙ୍କ ଚଳନ୍ତି ବିଗ୍ରହକୁ ନେଇ ସ୍ୱତନ୍ତ୍ର ପାଲିଙ୍କି ଯାତ୍ରା ଆରମ୍ଭ ହୋଇଥାଏ । ନଭେମ୍ବର ୧୧ରେ ପାଲିଙ୍କି ରାମପୁରରେ ପହଞ୍ଚିବ । ଏହାପରେ ନଭେମ୍ବର ୧୨ରେ ଗୁପ୍ତକାଶୀର ବିଶ୍ୱନାଥ ମନ୍ଦିରରେ ରାତ୍ରି ବିଶ୍ରାମ କରିବ । ଶେଷରେ ନଭେମ୍ବର ୧୩ରେ ଉଖୀମଠର ଓଁକାରେଶ୍ୱର ମନ୍ଦିରରେ ପହଞ୍ଚିବ । ସେଠାରେ ବିଧିବିଧାନ ଅନୁଯାୟୀ ବାବାଙ୍କ ବିଗ୍ରହ ସ୍ଥାପନା କରାଯିବା ସହ ପୂଜାର୍ଚ୍ଚନା ଆରମ୍ଭ ହେବ । ଏହି ପାଲିଙ୍କି ଯାତ୍ରାକୁ ଦେଖିବା ପାଇଁ ପ୍ରତିବର୍ଷ ବହୁ ସଂଖ୍ୟାରେ ଶ୍ରଦ୍ଧାଳୁଙ୍କ ସମାଗମ ହୋଇଥାଏ ।
କେବେ ଖୋଲିବ କେଦାରନାଥ ଧାମ?
ଶୀତ ଋତୁରେ ବନ୍ଦ ରହିବା ପରେ ପ୍ରତିବର୍ଷ ଗ୍ରୀଷ୍ମ ଋତୁରେ ପୁଣି ଖୋଲିଥାଏ କେଦାରନାଥ ଧାମର ଦ୍ୱାର । ସାଧାରଣତଃ ଅକ୍ଷୟ ତୃତୀୟା ଅବସରରେ ଚାରିଧାମ ଯାତ୍ରା ଆରମ୍ଭ ହେବା ସହ କେଦାରନାଥ ମନ୍ଦିର ଖୋଲିବାର ଶୁଭ ତାରିଖ ଘୋଷଣା କରାଯାଇଥାଏ । ତେବେ ୨୦୨୭ରେ କେଦାରନାଥ ଧାମର କବାଟ କେବେ ଖୋଲିବ, ସେନେଇ ତାରିଖ ଓ ଶୁଭ ମୁହୂର୍ତ୍ତ ଏଯାଏଁ ଘୋଷଣା ହୋଇନାହିଁ । ଏହାର ଅଧିକାରିକ ଘୋଷଣା ପରବର୍ତ୍ତୀ ସମୟରେ କରାଯିବ ।
