ନନ୍ଦିଘୋଷ ବ୍ୟୁରୋ: ଜବତ ହେଲା ବିପୁଳ ପରିମାଣର ଗଞ୍ଜେଇ। ମାଷ୍ଟରମାଇଣ୍ଡ ସମେତ ୬ ଅଭିଯୁକ୍ତଙ୍କୁ ଗିରଫ କଲା ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ ବା NCB । କଟକ ଷ୍ଟକୟାର୍ଡରୁ ୩୫୭ କେଜି ଗଞ୍ଜେଇ ଜବତ ଘଟଣାରେ ଏନ୍ସିବି ପକ୍ଷରୁ ଚାଲିଥିବା ତଦନ୍ତରେ ଆଉ ୩ ଜଣଙ୍କୁ ଗିରଫ କରାଯାଇଛି।
ଗିରଫ ଅଭିଯୁକ୍ତମାନେ ହେଲେ ଅନୁଗୁଳ ଜିଲ୍ଲାର ଆଦିତ୍ୟ ଚନ୍ଦା, ବୌଦ୍ଧ ଜିଲ୍ଲାର ରାମକାନ୍ତ କର୍ଣ୍ଣ ଏବଂ କନ୍ଧମାଳ ଜିଲ୍ଲାର ମଳୟ ବିଶୋଇ। ସେମାନଙ୍କ ନିକଟରୁ ମୋଟ ୪୧୭ କେଜି ଗଞ୍ଜେଇ ଜବତ କରାଯାଇଛି। ଏଥିସହ ଗଞ୍ଜେଇ ଚାଲାଣରେ ବ୍ୟବହୃତ ଗୋଟିଏ ବ୍ରିଜା କାର୍ ଓ ଗୋଟିଏ ଟେମ୍ପୋ ଟ୍ରାଭେଲରକୁ ମଧ୍ୟ ଜବତ କରିଛି ଏନ୍ସିବି।
ସନ୍ଦେହ ଏଡ଼ାଇବା ପାଇଁ ଟେମ୍ପୋ ଟ୍ରାଭେଲର ଜରିଆରେ ଗଞ୍ଜେଇ ଚାଲାଣ କରାଯାଉଥିଲା। ନିରନ୍ତର ନଜର ଓ ଗୁଇନ୍ଦା ତଥ୍ୟ ଆଧାରରେ ଆଉ ଏକ ବଡ଼ ଗଞ୍ଜେଇ ଚାଲାଣ ସମୟରେ ଏହି ରାକେଟ୍ର ମାଷ୍ଟରମାଇଣ୍ଡକୁ ଧରିବାରେ ସଫଳ ହୋଇଛି ତଦନ୍ତକାରୀ ଟିମ୍। ଏହି ଘଟଣାରେ ଏଯାବତ୍ ମୋଟ ୭୭୫ କେଜି ଗଞ୍ଜେଇ ଜବତ ହୋଇଥିବା ବେଳେ ୬ ଜଣ ଅଭିଯୁକ୍ତ ଗିରଫ ହୋଇଛନ୍ତି। ନିଶାଦ୍ରବ୍ୟ ଗ୍ରହଣ କରୁଥିବା ବ୍ୟକ୍ତି, ଏହି ରାକେଟ୍ରେ ସମ୍ପୃକ୍ତ ଅନ୍ୟ ଜଣେ ଯୋଗାଣକାରୀ ଏବଂ ନିଶା କାରବାରରୁ ଅର୍ଜିତ ସମ୍ପତ୍ତିର ତଥ୍ୟ ଜାଣିବା ପାଇଁ ତଦନ୍ତ ଜାରି ରହିଛି।
