ନନ୍ଦିଘୋଷ ବ୍ୟୁରୋ: ଚୀନ୍ରୁ ଭାରତକୁ ଆସୁଥିବା ସାମଗ୍ରୀ ଉପରେ ଏବେ ଭାରତ ସରକାରଙ୍କ କଡ଼ା ନଜର। ଚୀନ୍ର ସାମଗ୍ରୀ ଉପରେ ଟିକସ ଲାଗିଥିବାରୁ କିଛି ସାମଗ୍ରୀ ସିଧାସଳଖ ଭାରତକୁ ନଆସି ମାଲେସିଆ ଦେଇ ଆସୁଥିବା ସନ୍ଦେହ କରାଯାଉଥିବାବେଳେ ଏହାଦ୍ୱାରା ଟିକସ ଫାଙ୍କିବାକୁ ଉଦ୍ୟମ ହେଉଥିବା ଅଭିଯୋଗ ରହିଛି ।
ଚୀନ୍ ସାମଗ୍ରୀ ଉପରେ ଭାରତ ସରକାର ଲଗାଇଥିବା ଆଣ୍ଟି-ଡମ୍ପିଂ ଡ୍ୟୁଟି ରୁ ବଞ୍ଚିବା ପାଇଁ ଚୀନ୍ ମାଲେସିଆ ଦେଇ ନିଜ ସାମଗ୍ରୀ ଭାରତକୁ ପଠାଉଥିଲା। ଏହି ବେଆଇନ କାରବାର ଉପରେ ଡାଇରେକ୍ଟୋରେଟ୍ ଜେନେରାଲ୍ ଅଫ୍ ଟ୍ରେଡ୍ ରେମେଡିଜ୍ (DGTR) ଏକ ବଡ଼ ତଦନ୍ତ ଆରମ୍ଭ କରି କଟକଣା କଡ଼ାକଡ଼ି କରିଛି।
ମାଲେସିଆ ରୁଟ୍’ ଦେଇ ଟ୍ୟାକ୍ସ ଚୋରି
ଚୀନ୍ର ବହୁ କମ୍ପାନୀ ନିଜ ସାମଗ୍ରୀ ଉପରେ ଭାରତୀୟ ଶୁଳ୍କରୁ ବଞ୍ଚିବା ପାଇଁ ପ୍ରଥମେ ତାହାକୁ ମାଲେସିଆ ପଠାଉଥିଲେ। ସେଠାରେ ସାମାନ୍ୟ ପ୍ୟାକେଜିଂ କିମ୍ବା ଲେବଲ୍ ବଦଳାଇ ‘Made in Malaysia’ ଟ୍ୟାଗ୍ ଲଗାଇ ଭାରତକୁ ରପ୍ତାନି କରୁଥିଲେ।
DGTR ର କଡ଼ା ତଦନ୍ତ ଓ କଟକଣା
ବାଣିଜ୍ୟ ମନ୍ତ୍ରଣାଳୟ(ଡିଜିଟିଆର୍) ଚୀନର ଏଭଳି ଟ୍ୟାକ୍ସ ଚୋରା କାରବାରର ପର୍ଦ୍ଦାଫାଶ କରିବା ପାଇଁ ତଦନ୍ତ ଆରମ୍ଭ କରିଛି। ଯାହାଦ୍ୱାରା ଆଲୁମିନିୟମ୍ ଏବଂ ଅନ୍ୟାନ୍ୟ କ୍ରାଫ୍ଟ ସାମଗ୍ରୀର ବେଆଇନ ଆମଦାନୀ ଉପରେ ରୋକ୍ ଲଗାଯିବ। ଏବେ ମାଲେସିଆରୁ ଆସୁଥିବା ଏହି ସାମଗ୍ରୀ ଉପରେ କଷ୍ଟମ୍ସ ବିଭାଗ ହିସାବ କରିବ। ଆମଦାନୀକାରୀଙ୍କୁ ଉପଯୁକ୍ତ ଟ୍ୟାକ୍ସ ପାଇଁ ଗ୍ୟାରେଣ୍ଟି ମଧ୍ୟ ଦେବାକୁ ପଡ଼ିବ। ଅନ୍ୟପଟେ ସରକାର ଏପର୍ଯ୍ୟନ୍ତ ମାଲେସିଆରୁ ଆସୁଥିବା ଏହି ସାମଗ୍ରୀ ଉପରେ ନୂଆ ଟ୍ୟାକ୍ସ ଲଗାଇନାହାନ୍ତି। ତଦନ୍ତ ଶେଷ ହେବା ପରେ ହିଁ ପରବର୍ତ୍ତୀ ଆକ୍ସନ ନିଆଯିବ। ଏବଂ ମାଲେସିଆରୁ ଆସୁଥିବା ସାମଗ୍ରୀ ପ୍ରକୃତରେ ସେଠାରେ ତିଆରି ହୋଇଛି କି ନାହିଁ, ତାହାର କଠୋର ପ୍ରମାଣ ଦେବାକୁ ପଡ଼ିବ।
ଭାରତୀୟ ଉଦ୍ୟୋଗୀଙ୍କ ସୁରକ୍ଷା
ଚୀନର ଶସ୍ତା ମାଲ ସବୁ ଚୋରା ବାଟ ଦେଇ ଭାରତ ଆସିବା ଦ୍ବାରା ଭାରତୀୟ ବ୍ୟବସାୟୀ ଏବଂ କମ୍ପାନୀଗୁଡ଼ିକ ପ୍ରଭାବିତ ହେଉଥିଲେ। ସରକାରଙ୍କ ଏଭଳି ପଦକ୍ଷେପ ଦ୍ୱାରା ଦେଶର ସ୍ୱଦେଶୀ ଶିଳ୍ପ ମାନ ଉପରେ କୌଣସି ପ୍ରଭାବ ପଡିବ ନାହିଁ। ଯାହା ଦ୍ବାରା ଭାରତୀୟ କମ୍ପାନୀଗୁଡ଼ିକୁ ବିଦେଶୀ ସାମଗ୍ରୀର ଅନୁଚିତ ପ୍ରତିଯୋଗିତାରୁ ସୁରକ୍ଷା ମିଳିବ ଏବଂ ଟ୍ୟାକ୍ସ ଫାଙ୍କିବା ଉଦ୍ୟମକୁ ରୋକିବାରେ ସଫଳତା ମିଳିବ
