ନନ୍ଦିଘୋଷ ବ୍ୟୁରୋ: ଆଜିକାଲି ଘରେ ଘରେ ମଧୁମେୟ ରୋଗୀଙ୍କୁ ଦେଖିବାକୁ ମିଳୁଛି ।ଏହା ହେଉଛି ଏକ ଦୀର୍ଘକାଳୀନ ରୋଗ, ଯେଉଁଥିରେ ଶରୀରର ରକ୍ତରେ ଶର୍କରାର ମାତ୍ରା ଅତ୍ୟଧିକ ବଢ଼ିଯାଏ। ଅଗ୍ନ୍ୟାଶୟ ଯଥେଷ୍ଟ ପରିମାଣର ଇନସୁଲିନ୍ ତିଆରି କରିନପାରିଲେ କିମ୍ବା ଶରୀର ଉତ୍ପାଦିତ ଇନସୁଲିନକୁ ସଠିକ୍ ଭାବରେ ବ୍ୟବହାର କରିନପାରିଲେ ଏହି ରୋଗ ହୋଇଥାଏ। ତେବେ ଉପଯୁକ୍ତ ଖାଦ୍ୟ ପାନୀୟ ଓ ଜୀବନଶୈଳୀ ଫଳରେ ଏହାକୁ ନିୟନ୍ତ୍ରଣ କରାଯାଇପାରିବ ।
କ’ଣ ଖାଇବା ମଧୁମେୟ ରୋଗୀଙ୍କ ପାଇଁ ଉପକାରୀ
ଏପରି ଅନେକ ଖାଦ୍ୟ ଅଛି ଯାହାକୁ ମଧୁମେୟ ରୋଗୀଙ୍କୁ ଖାଇବା ଲାଗି ବାରଣ କରାଯାଇଥାଏ । ମଧୁମେୟ ରୋଗୀ ପିଆଜ ଖାଇବା ଉଚିତ୍ କି ନୁହେଁ ଏହାକୁ ନେଇ ଅନେକଙ୍କ ମନରେ ଦ୍ବନ୍ଦ ରହିଛି । ପିଆଜରେ ଭରପୂର ମାତ୍ରାରେ ଆଣ୍ଟିଅକ୍ସିଡ଼ାଣ୍ଟ, ଫାଇବର ଓ ଭିଟାମିନ୍ (ସି) ରହିଛି । ଯାହା ମଣିଷ ଶରୀର ପାଇଁ ବେଶ ଲାଭଦାୟୀ ଅଟେ । ଏହା ସହ ଏଥିରେ ପର୍ଯ୍ୟାପ୍ତ ପରିମାଣର ସୋଡ଼ିୟମ୍, ଫାଇବର, କ୍ୟାଲସିୟମ୍, ଆଇରନ୍, ମ୍ୟାଗନେସିୟମ୍, ଫସଫରସ, ପୋଟାସିୟମ୍ ଓ ଭିଟାମିନ୍ (ଏ) ରହିଛି ।
ମଧୁମେୟ ରୋଗୀ କଞ୍ଚା ପିଆଜ ଖାଇବା ବେଶ ଲାଭଦାୟୀ ହୋଇଥାଏ । ଏଥିରେ ଥିବା ଫାଇବର ହଜମ ପ୍ରକ୍ରିୟାକୁ ଉନ୍ନତ କରିଥାଏ । ଫଳରେ ଖାଦ୍ୟ ଶୀଘ୍ର ହଜମ ହୋଇଥାଏ । ଏହା ଓଜନ ହ୍ରାସ କରିବାରେ ମଧ୍ୟ ସହାୟକ ହୋଇଥାଏ । ପିଆଜରେ ଥିବା ଫ୍ଲାଭୋନାଏଡ଼୍ ଶରୀରରେ ବ୍ଲଡ଼ ସୁଗାରକୁ ନିୟନ୍ତ୍ରଣ କରିବାରେ ସହାୟକ ହୋଇଥାଏ । ପର୍ଯ୍ୟାପ୍ତ ପରିମାଣର ପିଆଜ ଖାଇବା ଦ୍ବାରା ଶରୀରରେ ରୋଗ ପ୍ରତିରୋଧକ ଶକ୍ତି ବଢିଥାଏ । ଏହା ଆମ ଶରୀରକୁ ଶକ୍ତି ଯୋଗାଇବା ସହ ହୃଦୟ ଜନିତ ସମସ୍ୟାକୁ ଦୂର କରିଥାଏ ।
ସାଧାରଣତଃ କାଶ କିମ୍ବା ଥଣ୍ଡା ହେଲେ ଆଣ୍ଟିବ୍ୟାକ୍ଟେରିଆଲ୍ ଗୁଣରେ ଭରପୂର ଜିନିଷ ଖାଇବା ଓ ପିଇବାକୁ ପରାମର୍ଶ ଦିଆଯାଏ, ଯାହା ଦ୍ୱାରା ଶରୀରକୁ କ୍ଷତି ପହଞ୍ଚାଉଥିବା ଜୀବାଣୁ ନଷ୍ଟ ହୋଇଥାଆନ୍ତି । କଞ୍ଚା ପିଆଜରେ ପ୍ରଚୁର ଆଣ୍ଟିବ୍ୟାକ୍ଟେରିଆଲ୍ ଗୁଣ ରହିଛି। ତେଣୁ ଏହାର ବ୍ୟବହାର ଦ୍ୱାରା ଛୋଟ ସଂକ୍ରମଣ ଦୂରରେ ରହିଥାଏ।
