ନନ୍ଦିଘୋଷ ବ୍ୟୁରୋ: ପୁଣି ଆସୁଛି କି କୋଭିଡ଼ ବିପତ୍ତି? ବିଭିନ୍ନ ଦେଶରେ କାୟା ମେଲାଇଲାଣି ନୂଆ କୋଭିଡ ଭୂତାଣୁ PJ.2.1। ଏହାକୁ ନେଇ ସାରା ବିଶ୍ବରେ ପୁଣି ଚିନ୍ତା ବଢିଛି । ଗତ ମେ ୨ରେ ପ୍ରଥମେ କାନାଡା ଓଣ୍ଟାରିଓରେ ଦେଖାଦେଇଥିଲା ଏହି ଭାରିଆଣ୍ଟ। ପରେ ଏହା ଆମେରିକା, ସ୍ପେନ, ଫ୍ରାନ୍ସ, ସିଙ୍ଗାପୁର, ଅଷ୍ଟ୍ରେଲିଆ, ନ୍ୟୁଜିଲାଣ୍ଡ ଓ ଇସ୍ରାଏଲରେ ଦେଖାଯାଇଛି।
ସୂଚନା ଅନୁଯାୟୀ, କରୋନାର ଭୟ ସମ୍ପୂର୍ଣ୍ଣ ଭାବେ ଯାଇନଥିବା ବେଳେ ଏବେ ସାମ୍ନାକୁ ଆସିଛି ଏହି ନୂଆ ଭାରିଆଣ୍ଟ । ଏହା SARS-CoV-2 ଭାଇରସ୍ର JN.1 ବଂଶରୁ ସୃଷ୍ଟି ହୋଇଥିବା ଏକ ନୂଆ ‘ସଲ୍ଟେସନ୍ ଭାରିଆଣ୍ଟ’, ଯେଉଁଥିରେ ଏକା ସାଙ୍ଗରେ ଅନେକ ଜେନେଟିକ୍ ପରିବର୍ତ୍ତନ ଦେଖାଯାଇଛି। ୨୦୨୬ ମଇ ମାସରେ କାନାଡାର ଓଣ୍ଟାରିଓରେ ପ୍ରଥମେ ଚିହ୍ନଟ ହୋଇଥିବା ଏହି ଭାରିଆଣ୍ଟ ଏବେ ୮ଟି ଦେଶକୁ ବ୍ୟାପିସାରିଛି। ଆମେରିକା, କାନାଡା, ସ୍ପେନ୍, ଫ୍ରାନ୍ସ, ସିଙ୍ଗାପୁର, ଇସ୍ରାଏଲ, ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡରେ ଏହି ଭାରିଆଣ୍ଟ ଚିହ୍ନଟ ହୋଇସାରିଲାଣି। ତେବେ ଆଶ୍ବସ୍ତିର ବିଷୟ ହେଉଛି, ଭାରତରେ ଏପର୍ଯ୍ୟନ୍ତ ଏହି ଭାରିଆଣ୍ଟ ଚିହ୍ନଟ ହୋଇନାହିଁ। ଅନ୍ୟ ଭାରିଆଣ୍ଟ ତୁଳନାରେ ଏହାର ଅଧିକ ମ୍ୟୁଟେସନ୍ କ୍ଷମତା ଥିବା ଜଣାଯାଇଛି। ସେପଟେ ଏହି ଭାରିଆଣ୍ଟ ଉପରେ ସତର୍କ ନଜର ରଖିଛନ୍ତି ବିଶ୍ବ ସ୍ବାସ୍ଥ୍ୟ ସଂଗଠନ-WHO ଓ ଅନ୍ୟାନ୍ୟ ଅନ୍ତର୍ଜାତୀୟ ସଂସ୍ଥା। PJ.2.1 ସଂକ୍ରମଣର କୌଣସି ସ୍ପଷ୍ଟ ଲକ୍ଷଣ ବର୍ତ୍ତମାନ ସୁଦ୍ଧା ମିଳିପାରିନାହିଁ। ତଥାପି ଏହା ବିଭିନ୍ନ ଦେଶକୁ ବ୍ୟାପିବାରେ ଲାଗିଛି। ତେବେ ଏହି ଭାରିଆଣ୍ଟ ଯୋଗୁ ଜ୍ବର, କଫ, ଗଳା ସଂକ୍ରମଣ, ନାକ ଚୁଣ୍ଟି ହେବା, ମୁଣ୍ଡବ୍ୟଥା, ମାଂସପେଶୀ ଯନ୍ତ୍ରଣା ଆଦି ପରିଲକ୍ଷିତ ହେଉଥିବା କୁହାଯାଉଛି।
ପ୍ରକାଶ ଥାଉ କି, ଭାରତରେ INSACOG ଦ୍ୱାରା ଜିନୋମ୍ ସିକ୍ୱେନ୍ସିଂ ମାଧ୍ୟମରେ ନଜର ରଖାଯାଇଛି, କିନ୍ତୁ ଏପର୍ଯ୍ୟନ୍ତ କୌଣସି ମାମଲା ନିଶ୍ଚିତ ହୋଇନାହିଁ। ଯଦି ଥଣ୍ଡା, କାଶ କିମ୍ବା ଜ୍ୱର ଅଧିକ ଦିନ ଲାଗି ରହେ, ତେବେ ଡାକ୍ତରଙ୍କ ପରାମର୍ଶ ନେଇ କୋଭିଡ୍ ପରୀକ୍ଷା (RT-PCR) କରାନ୍ତୁ। ଜନଗହଳିପୂର୍ଣ୍ଣ ସ୍ଥାନକୁ ଗଲେ ମାସ୍କ ପିନ୍ଧନ୍ତୁ ଓ ନିୟମିତ ହାତ ଧୁଅନ୍ତୁ। ବୟସ୍କ ବ୍ୟକ୍ତି, ଗର୍ଭବତୀ ମହିଳା ଓ ମଧୁମେହ, ହୃଦ୍ରୋଗ କିମ୍ବା ଶ୍ୱାସକ୍ରିୟା ଜନିତ ରୋଗରେ ପୀଡ଼ିତ ବ୍ୟକ୍ତିମାନେ ବିଶେଷ ସତର୍କ ରହିବା ଆବଶ୍ୟକ।
