ନନ୍ଦିଘୋଷ ବ୍ୟୁରୋ: ଯଦି ଆପଣ ଜଣେ EPFO ଧାରୀ ଓ ଆପଣ ଭବିଷ୍ୟତରେ ପେନସନକୁ ନେଇ ଚିନ୍ତିତ ତେବେ ଏହି ଖବର ଆପଣଙ୍କୁ ଆଶ୍ୱସ୍ତି ଦେଇପାରେ। ଆଗକୁ ହେବାକୁ ଥିବା କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନର ୨୪୦ତମ କେନ୍ଦ୍ରୀୟ ଟ୍ରଷ୍ଟି ବୋର୍ଡ ବୈଠକକୁ ନେଇ ଉତ୍ସାହ ଦେଖାଦେଇଛି । ଏହି ବୈଠକର ସ୍ଥାନ ଗୁଜୁରାଟର ଗିରରୁ ନୂଆଦିଲ୍ଲୀକୁ ପରିବର୍ତ୍ତନ କରାଯାଇଛି। ନଭେମ୍ବର ୧୯ ତାରିଖରେ ନୂଆଦିଲ୍ଲୀସ୍ଥିତ EPFO ମୁଖ୍ୟ କାର୍ଯ୍ୟାଳୟରେ ଏହା ଅନୁଷ୍ଠିତ ହେବ।
ଇପିଏଫ୍ଓ ପକ୍ଷରୁ ସର୍ବନିମ୍ନ ପେନସନ୍ ୧୦୦୦ରୁ ୩୦୦୦ ଟଙ୍କାକୁ ବୃଦ୍ଧି କରାଯିବା ନେଇ କେତେକ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି। ସିବିଟି ବୈଠକରେ ଏ ନେଇ ଆଲୋଚନା ହେବ ବୋଲି କୁହାଯାଉଛି। ଅର୍ଥ ମନ୍ତ୍ରଣାଳୟ ସହିତ ଶ୍ରମ ମନ୍ତ୍ରଣାଳୟ ପରାମର୍ଶ କରିବା ପରେ ପ୍ରସ୍ତାବ ଉପରେ ନିଷ୍ପତ୍ତି ନେଇଥିବା ରିପୋର୍ଟରେ ଦାବି କରାଯାଇଛି। କିନ୍ତୁ ଏ ସଂପର୍କରେ ଦୁଇ ମନ୍ତ୍ରାଳୟ ପକ୍ଷରୁ କିଛି କୁହାଯାଇ ନାହିଁ।
ପ୍ରକାଶ ଥାଉ କି, ୨୦୧୪ ମସିହାରେ ଶେଷ ଥର ପାଇଁ ସର୍ବନିମ୍ନ ଇପିଏଫ ପେନସନ ବୃଦ୍ଧି କରାଯାଇ ହଜାର ଟଙ୍କା କରାଯାଇଥିଲା । ସେହି ବର୍ଷ EPFOର ସର୍ବୋଚ୍ଚ ବେତନ ସୀମା ମଧ୍ୟ ୬୫୦୦ ଟଙ୍କାରୁ ୧୫ ହଜାର ଟଙ୍କାକୁ ବୃଦ୍ଧି କରାଯାଇଥିଲା। ଦରଦାମ ବୃଦ୍ଧି ପରେ ଏତେ କମ୍ ପେନସନ୍ରେ ଜୀବିକା ନିର୍ବାହ କରିବା କଷ୍ଟକର ହୋଇଥିବାରୁ ଦୀର୍ଘଦିନ ହେଲା ସର୍ବନିମ୍ନ ପେନସନ୍ ୭୫୦୦ ଟଙ୍କା କରିବାକୁ ବିଭିନ୍ନ ସଂଗଠନ ପକ୍ଷରୁ ଦାବି କରାଯାଉଛି। ନିକଟରେ କେନ୍ଦ୍ର ସରକାର ଇପିଏଫ୍ ପାଇଁ ରହିଥିବା ସର୍ବାଧିକ ମାସିକ ବେତନ ସୀମା ୧୫ ହଜାର ଟଙ୍କାରୁ ୨୫ ହଜାର ଟଙ୍କାକୁ ବୃଦ୍ଧି କରିଛନ୍ତି। ତେଣୁ ସର୍ବନିମ୍ନ ପେନସନ୍ ରାଶି ମଧ୍ୟ ବୃଦ୍ଧି ପାଇବ ବୋଲି ଆଶା ଦେଖାଦେଇଛି।
