ଭୁବନେଶ୍ୱର: ନଜଗହିଳ ସହର ଗୁଡ଼ିକରେ କରୋନା ସଂକ୍ରମଣ ଆଶଙ୍କା ଗ୍ରାମାଞ୍ଚଳଠାରୁ ଅଧିକ ରହିଛି । ନ୍ୟୁୟର୍କ ସହର ଓ ପୁରୀ ସହର ଲୋକସଂଖ୍ୟା ସହିତ ସମାନ । ରାଜ୍ୟରେ ମାର୍ଚ୍ଚ ୧୫ରେ ପ୍ରଥମ ପଜିଟିଭ ଜଣାପଡ଼ିଥିଲା । ମାର୍ଚ୍ଚ ୧୯ରେ ଦ୍ୱିତୀୟ ପଜିଟିଭ ଓ ମାର୍ଚ୍ଚ ୨୬ରେ ତୃତୀୟ ପଜିଟିଭ ଜଣାପଡ଼ିଥିଲା । ଆପଣଙ୍କ ସଚେତନତା ଯୋଗୁଁ ଆମେ ତୃତୀୟ ପଜିଟିଭରେ ସୀମିତ ଅଛନ୍ତି । ଲକଡାଉନ୍ରେ ଓଡ଼ିଶାବାସୀଙ୍କ ସହଯୋଗ ପ୍ରଶଂସାଯୋଗ୍ୟ । ଆଜି ସରକାରଙ୍କ କରୋନା ମୁଖପାତ୍ର ସୁବ୍ରତ ବାଗଚୀଙ୍କ ଜରିଆରେ ରାଜ୍ୟବାସୀଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ବାର୍ତ୍ତା ଦେଇଛନ୍ତି ।
ଓଡ଼ିଶାର ଜନସାଧାରଣଙ୍କ ସହଯୋଗ ମିଳିଛି । ପ୍ରତି ପରିବାରର ପୁଅଝିଅ ଘରେ ରହି ଏହାକୁ ସଫଳ କରିଛନ୍ତି । ୩ ପଜିଟିଭରୁ ୩୦, ୩୦ରୁ ୩୦୦ ପର୍ଯ୍ୟନ୍ତ ଯିବା ଆପଣଙ୍କ ହାତରେ । ଘରେ ରହୁନ୍ତୁ, ଘରୁ ବାହାରିବାର ସମୟ ଏପର୍ଯ୍ୟନ୍ତ ଆସି ନାହିଁ । କରୋନା ହିଷ୍ଟୋଗ୍ରାମକୁ ନିଜର କରନ୍ତୁ ଜାଣିପାରିବେ ଏହାର ସ୍ଥିତି । ଜାନୁଆରୀ ୨୨ରୁ ମାର୍ଚ୍ଚ ମାସ ୨୭ ପର୍ଯ୍ୟନ୍ତ କରୋନାର ଗତି ମନ୍ଥର ଥିଲା । ତାପରେ ଖୁବ କମ୍ ଦିନରେ ସଂକ୍ରମଣ ବିସ୍ଫୋଟକ ସ୍ଥିତିରେ ପହଞ୍ଚିଛି ।
ଚୀନର ଅବସ୍ଥା ସଙ୍କଟାପନ୍ନ ଥିଲା, କରୋନା ଦୈନିକ ପ୍ରାଣ ନେଉଥିଲା । ଲକଡାଉନ୍ ଉପରେ ଗୁରୁତ୍ୱ ଦେଲେ ଚୀନ ସରକାର । ଲୋକେ ଚୀନ ସରକାରଙ୍କ ନିର୍ଦ୍ଦେଶ ଅକ୍ଷରେ ଅକ୍ଷରେ ପାଳିଲେ । ଏବେ ଚୀନରେ କରୋନା ନିୟନ୍ତ୍ରଣାଧୀନ ରହିଛି । ଚୀନ ଭଳି ଇଟାଲୀ ସଚେତନ ନଥିଲା, ଲକଡାଉନ ହୋଇ ନଥିଲା ଫଳରେ କରୋନା ବ୍ୟାପିଗଲା । ଆପଣ ସରକାରଙ୍କ ନିର୍ଦ୍ଦେଶକୁ ମାନ ନିୟମ ପାଳନ କରୁଥିବାରୁ ସ୍ଥିତି ଗମ୍ଭୀର ହୋଇନାହିଁ ।
