ଭୁବନେଶ୍ୱର: ଅତ୍ୟାବଶ୍ୟକ ସାମଗ୍ରୀ ଅଧିନିୟମ ଅଧୀନରେ ଆସୁଥିବାରୁ ଗୋପାଳପୁର ପୋର୍ଟସ୍ ଲିମିଟେଡ୍‌ (ଜିପିଏଲ୍‌)ରେ କାର୍ଯ୍ୟ ସ୍ୱାଭାବିକ ରହିଛି । ବର୍ଥରେ ମାଲ ପରିଚାଳନା ଜାର ରହିଛି । କରୋନା-୧୯ ବ୍ୟାପିବାକୁ ରୋକିବା ଲାଗି ବନ୍ଦର ତରଫରୁ ସମସ୍ତ ପ୍ରକାର ପ୍ରତିଷେଧକମୂଳକ ପଦକ୍ଷେପ ଗ୍ରହଣ କରାଯାଉଛି ।

ଭାରତ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ଏବଂ ଜାହାଜ ମହାନିର୍ଦ୍ଦେଶାଳୟଠାରୁ ଏହା ହାସଲ କରିଥିବା ନିୟମ ଓ ନିର୍ଦ୍ଦେଶାବଳୀକୁ କଡ଼ାକଡ଼ି ଭାବେ ପାଳନ କରୁଛି । ବନ୍ଦର ଭିତରକୁ ଆସୁଥିବା ଜାହଜଗୁଡ଼ିକର ପରିଚାଳନା କରିବା ବେଳେ ନିୟମିତ ବ୍ୟବଧାନରେ ବନ୍ଦର ମନ୍ତ୍ରାଳୟ ତରଫରୁ ଜାରି କରାଯାଉଥିବା ଏସ୍‌ଓପିଗୁଡ଼ିକୁ ବନ୍ଦର ପାଳନ କରୁଛି । କର୍ମକ୍ଷେତ୍ରରେ ସୁରକ୍ଷିତ ପରିବେଶ ଲାଗି ବନ୍ଦର ପରିସରରେ ୨୪ ଘଣ୍ଟା ନିଜସ୍ୱ ଷ୍ଟାଣ୍ଡାର୍ଡ ଅପରେଟିଂ ପ୍ରସିଜ୍ୟୁର (ଏସ୍‌ଓପି)କୁ ବନ୍ଦର ପାଳନ କରୁଛି । ପରିଚାଳନାରେ କାର୍ଯ୍ୟ କରୁଥିବା କର୍ମଚାରୀମାନଙ୍କ ଏମ୍ୱର୍କମେଣ୍ଟ ଡିଏମ୍ୱର୍କମେଣ୍ଟ ପାଇଁ ଜାହାଜ ମାଲ ବୋଝେଇ ଅଞ୍ଚଳରେ ଅ-ସଂକ୍ରମଣ ତରଳ (ସୋଡିୟମ୍‌ ହାଇପୋକ୍ଳୋରାଇଟ୍ ) ବ୍ୟବହାର କରାଯାଉଛି । କରୋନା ଭୂତାଣୁ ବ୍ୟାପିବାକୁ ରୋକିବ ଲାଗି କର୍ମଚାରୀ ଏବଂ ଶ୍ରମିକମାନଙ୍କୁ ବିଭିନ୍ନ ପ୍ରକାର ପଦକ୍ଷେପ ଗ୍ରହଣ କରିବା ଉପରେ ଜିପିଏଲ୍‌ ସଚେତନ କରୁଛି ।

ନୋଭେଲ୍‌ କରୋନା ଭୂତାଣୁ ବ୍ୟାପିବା ପରଠାରୁ ବନ୍ଦର ତରଫରୁ ସବୁ ପ୍ରକାର ପ୍ରତିଷେଧକମୂଳକ  ପଦକ୍ଷେପ ଗ୍ରହଣ କରାଯାଇଛି । ଜାହାଜରେ ରହି କରାଯାଉଥିବା ସବୁ ପ୍ରକାର କାର୍ଯ୍ୟ ଲାଗି ଶରୀରକୁ ସମ୍ପୂର୍ଣ୍ଣ ରୂପେ ସର୍ଜିକାଲ ପ୍ରୋଟେକ୍ସନ ସୁଟ୍‌ ଘୋଡ଼େଇ କରାଯାଉଥିବା ବେଳେ ବର୍ଥ ଅଞ୍ଚଳର, ରେଲଓ୍ୱେ ସାଇଡିଂ, ପାର୍କିଂ ୟାର୍ଡ, ମୁଖ୍ୟ ଫାଟକ ଏବଂ ଅନ୍ୟାନ୍ୟ ଅଞ୍ଚଳରେ କାର୍ଯ୍ୟ କରୁଥିବା ବନ୍ଦରର କର୍ମଚାରୀମାନଙ୍କୁ କାମ ଆରମ୍ଭ କରିବା ପୂର୍ବରୁ ଓ ପରେ ଫ୍ରେସ୍‌ ମାସ୍କ ଓ ହ୍ୟାଣ୍ଡ ସାନିଟାଇଜର ପ୍ରଦାନ କରାଯାଉଛି ।

ଶିଳ୍ପ ସଂସ୍ଥାରେ ବ୍ୟବହୃତ ଇଣ୍ଡଷ୍ଟ୍ରିଆଲ୍‌ ଗ୍ୟାସ୍‌, ଅକ୍ସିଜେନ ଓ ପେଟ୍ରୋଲିୟମ୍ ବିସ୍ଫୋରକ ଯୋଗାଣକୁ ସ୍ୱାଭାବିକ ତଥା ସୁସଂହତ କରିବା ପାଇଁ ପେଟ୍ରୋଲିୟମ୍ ଓ ଏକ୍ସଗ୍ଳୋସିଭ ସେଫ୍ଟି ପ୍ରତିଷ୍ଠାନ (ପେସୋ) ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଇଛି । ଦେଶର ହସ୍ପିଟାଲଗୁଡ଼ିକ ନିରବିଚ୍ଛିନ୍ନଭାବେ ଅକ୍ସିଜେନ୍‌ ଯୋଗାଣ ସହିତ ଶିଳ୍ପୋଦ୍ୟାଗରେ ବ୍ୟବହୃତ  ଗ୍ୟାସ୍‌ ଓ ଏକ୍ସଗ୍ଳୋସିଭ (ବିସ୍ଫୋରକ ଯୋଗାଣକୁ) ସୁବ୍ୟବସ୍ଥିତ ଏବଂ ସ୍ୱାଭାବିକ କରିବାକୁ ପେସୋ ଉଦ୍ୟମ ଚଳାଇଛି । ଏହିସବୁ ଗୁରୁତ୍ୱପୂର୍ଣ୍ଣ ଗ୍ୟାସ୍ ଯୋଗାଣରେ ଯେପରି କୌଣସି ପ୍ରତିବନ୍ଧକ ନରହେ ତାହା ନିଶ୍ଚିତ କରିବାକୁ କୁହାଯାଇଛି । କରୋନା ଭୂତାଣୁର ମୁକାବିଲା ପାଇଁ ଦେଶବ୍ୟାପୀ ଲକ୍‌ଡାଉନ୍ ଘୋଷଣା ହେବା ପରେ ପରିବହନ ବ୍ୟବସ୍ଥା ପ୍ରଭାବିତ  ହେବା କାରଣରୁ ଏସବୁ ଗ୍ୟାସର ଅଭାବ ଦେଖା ଦେବାର ସମ୍ଭାବନା ରହିଛି । ତେଣୁ ଆଗୁଆ ପଦକ୍ଷେପ ଗ୍ରହଣ କରି ଏହି ଗ୍ୟାସ ଯୋଗାଣ ବ୍ୟବସ୍ଥାକୁ ନିରନ୍ତର ମେସୋକୁ ବାଣିଜ୍ୟ ଓ ଉଦ୍ୟୋଗ ମନ୍ତ୍ରାଳୟ ପକ୍ଷରୁ ନିର୍ଦ୍ଦେଶ ଦିଆଯାଇଛି ।

ଭୁବନେଶ୍ୱର: କରୋନା ସଂକ୍ରମଣ ଭୟରେ ଜେଲରେ ଥିବା କଏଦୀଙ୍କ ଭିଡ଼ କମାଯିବ । ଓଡିଶା ହାଇକୋର୍ଟର କାର୍ଯ୍ୟକାରୀ ମୁଖ୍ୟ ବିଚାରପତି ଜଷ୍ଟିସ ସଞ୍ଜୁ ପଣ୍ଡାଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟ ଆଇନ ସେବା ପ୍ରାଧିକରଣ ବୈଠକରେ ଏହି ନିଷ୍ପତ୍ତି ହୋଇଛି । ଜେଲ କଏଦୀଙ୍କ ସ୍ୱାସ୍ଥ୍ୟ ଏବଂ କରୋନା ସଂକ୍ରମଣକୁ ପ୍ରତିହତ କରିବାକୁ କଏଦୀଙ୍କ ପାରୋଲ୍‌ ଅବଧି ବୃଦ୍ଧି କରାଯିବା ସହ କିଛି ବିଚାରଧୀନ କଏଦୀଙ୍କୁ ଜାମିନ ପ୍ରଦାନ କରାଯିବ।

ସ୍ୱତନ୍ତ୍ର ପାରୋଲ୍‌ରେ ପଠାଯିବ ୬୫ ବର୍ଷରୁ ଊର୍ଦ୍ଧ୍ୱ ସମସ୍ତ କଏଦୀଙ୍କୁ। ଏହି କ୍ରମରେ ମାମଲା ଅପେକ୍ଷାରେ ନଥିବା ଏବଂ ୭ ବର୍ଷ ଦଣ୍ଡ ଭୋଗି ସାରିଥିବା କଏଦୀଙ୍କୁ ପାରୋଲରେ ପଠାଯିବ । ଦୋଷୀ ସାବ୍ୟସ୍ତ ହୋଇ ପାରୋଲରେ ଯାଇଥିବା କଏଦୀଙ୍କ ଅବଧି ବୃଦ୍ଧି କରାଯିବ। କଏଦୀଙ୍କୁ ଚିହ୍ନଟ କରି କମିଟିକୁ ଅବଗତ କରିବେ ଜେଲ୍‌ ଡିଜି । ଏଥିସହିତ ପ୍ରଥମ ପାରୋଲ୍‌ରୁ ନିର୍ଦ୍ଧାରିତ ସମୟରେ ଫେରିଥିବା କଏଦୀଙ୍କୁ ସ୍ୱତନ୍ତ୍ର ପରୋଲ ପ୍ରଦାନ କରାଯିବ। ୬୫ ବର୍ଷରୁ ଊର୍ଦ୍ଧ୍ୱ ସମସ୍ତ କଏଦୀଙ୍କୁ ସ୍ୱତନ୍ତ୍ର ପାରୋଲ୍‌ ପ୍ରଦାନ କରାଯିବ । ତେବେ ଧର୍ଷଣ, ଏସିଡ୍‌ ଆକ୍ରମଣ, ଜାଲ ନୋଟ କାରବାର, ପସ୍କୋ ଆଇନରେ ଗିରଫ ଅଭିଯ଼ୁକ୍ତଙ୍କୁ ମିଳିବନି ଜାମିନ କି ପାରୋଲ୍‌ । ତେବେ ଏସବୁ ମାମଲାରେ ସମ୍ପୃକ୍ତ ଅପରାଧୀ ଯଦି ୭୦ ବର୍ଷରୁ ଅଧିକ ବୟସର ହୋଇଥିବେ ତେବେ ତାଙ୍କୁ ସ୍ୱତନ୍ତ୍ର ପାରୋଲ ଦେବା ନେଇ କର୍ତ୍ତୃପକ୍ଷ ବିଚାର କରିପାରନ୍ତି ।

ରାଜ୍ୟର ୮୭ଟି ଜେଲରେ ୧୭୨୭ ଜଣ ବିଚାରଧିନ କଏଦୀ ଅଛନ୍ତି । ଯେଉଁମାନେ ୭ ବର୍ଷ ଜେଲ ଦଣ୍ଡ ଭୋଗି ସାରିଲେଣି । ସେମାନଙ୍କୁ ସ୍ୱତନ୍ତ୍ର ପାରୋଲ୍‌ କିମ୍ବା ଜାମିନ ଦେବା ନେଇ କମିଟି ବିଚାର କରିବ। ଜିଲ୍ଲା ଲିଗାଲ୍‌ ସେଲ ପ୍ରାଧିକରଣକୁ ଓକିଲ ପ୍ୟାନେଲ ଏବଂ ଜେଲ ଲିଗାଲ୍‌ କ୍ଲିନିକ ଏ ଦିଗରେ ସହଯୋଗ ପ୍ରଦାନ କରିବେ । ଏଥିସହିତ ବିଚାରଧିନ କଏଦୀଙ୍କ ପାଇଁ ରିମାଣ୍ଡ ଓକିଲଙ୍କ ଜରିଆରେ ମଧ୍ୟବର୍ତ୍ତିକାଳିନ ଜାମିନ ଆବେଦନ ଦାଖଲ କରିବାକୁ ପରାମର୍ଶ ଦିଆଯାଇଛି । ଏଥିସହିତ ଅସୁସ୍ଥ ଥିବା ବିଚାରଧିନ କଏଦୀଙ୍କ ତାଲିକା ପ୍ରସ୍ତୁତ କରାଯାଉଛି।

ସେହିଭଳି ଜେଲରେ ଥିବା କଏଦୀଙ୍କୁ ନିଜ ପରିବାର ସହ ଭିଡିଓ କନଫରେନସିଂ ବା ଇ-ମୁଲାକାତ ଜରିଆରେ କଥା ହେବାର ସୁଯ଼ୋଗ ମଧ୍ୟ ଦିଆଯିବ