ଭୁବନେଶ୍ୱର: ଭୁବନେଶ୍ୱର ବିମାନବନ୍ଦରରେ ଛାତ ଭୁଶୁଡ଼ିବା ଘଟଣାରେ ପ୍ରତିକ୍ରିୟା ରଖିଛି ବିଜେଡି । ଦଳୀୟ ମୁଖପାତ୍ର ତଥା ରାଜ୍ୟସଭା ସାଂସଦ ସସ୍ମିତ ପାତ୍ର ଏନେଇ ପ୍ରତିକ୍ରିୟା ରଖିଛନ୍ତି । କହିଛନ୍ତି, ହ୍ୟୁମାନ୍ ଟ୍ରାଜେଡିରେ ବିଜେପି ଭଳି ରାଜନିତୀ କରିବାକୁ ଚାହେଁ ନାହିଁ ବିଜେଡି । ଗତକାଲି ରାତିରେ ଯାହା ଘଟିଲା ତାହାକୁ ନେଇ ଦୁଃଖ ପ୍ରକାଶ କରିବା ସହ ମୃତକଙ୍କ ପରିବାରକୁ ସମବେଦନା ଜଣାଇଛନ୍ତି ସସ୍ମିତ । ଏହାସହ ମୃତକଙ୍କ ପରିବାରକୁ କ୍ଷତିପୂରଣ ଦେବାକୁ ଦାବି କରିଛି ଦଳ ।

ଦୁର୍ଘଟଣାର ନିରପେକ୍ଷ ତଦନ୍ତ ଦାବି ସହିତ ଆହତ ବ୍ୟକ୍ତିଙ୍କୁ ସଂପୂର୍ଣ୍ଣ ମାଗଣା ଚିକିତ୍ସା କରିବାକୁ ସେ ଦାବି କରିଛନ୍ତି । ମୃତକଙ୍କ ପରିବାରକୁ ସମବେଦନା ଜଣାଇଛନ୍ତି ସସ୍ମିତ ପାତ୍ର । ଘଟଣାର ସଠିକ ତଦନ୍ତ କରି ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯାଉ ବୋଲି ବିଜେଡି ଦାବି କରିଛି ।

ପିପିଲି: ସଡ଼କ ଦୁର୍ଘଟଣାରେ ୨ ଶିକ୍ଷୟିତ୍ରୀଙ୍କ ମୃତ୍ୟୁ । ପିପିଲି ଦାଣ୍ଡମୁକୁନ୍ଦପୁରରେ ସ୍କୁଟିକୁ ପିଟିଲା ଟାଟା ଏସି । ଦୁଇ ଶିକ୍ଷୟିତ୍ରୀ ନିଜ ସ୍କୁଟିରେ ସ୍କୁଲ ଯାଉଥିବା ବେଳେ ଦୁର୍ଘଟଣା ଘଟିଛି ।

ମୃତକ ହେଲେ ଦାଣ୍ଡମୁକୁନ୍ଦପୁର ପୀତବାସ ୟୁଜିଏମଇ ସ୍କୁଲର ଶିକ୍ଷୟିତ୍ରୀ ଶୁଭଲକ୍ଷ୍ମୀ ପରିଡ଼ା ଏବଂ ସ୍ନେହଲତା ସାହୁ । ମୃତଦେହକୁ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଛି ।

ପୁରୀ: ଘୋଷଜାତ ପାଇଁ ପ୍ରସ୍ତୁତି ଏବେ ଠାରୁ ଆରମ୍ଭ ହୋଇ ସାରିଲାଣି । ପୁରୀରେ ପହଞ୍ଚିଲା ରଥକାଠ । ସରସ୍ୱତୀ ପୂଜାରେ ରଥକାଠ ପୂଜାନୀତି । ସେଥିପାଇଁ ପ୍ରଥମ ପର୍ଯ୍ୟାୟରେ ୨ଟି ଟ୍ରକରେ ୫୭ଖଣ୍ଡ କାଠ ପହଞ୍ଚିଛି । ଏଥିରେ ରହିଛି ଧଉରା ଓ ଅଶନ ପ୍ରଜାତିର କାଠ ।

ଦଶପଲ୍ଲା ବନଖଣ୍ଡରୁ ରଥଯାତ୍ରା ପାଇଁ କାଠ ଆସିଛି । ଏହା ପୂର୍ବରୁ ନୟାଗଡ଼ ପୁରୁଣା ସହର ନିକଟ ଜଗନ୍ନାଥ ମନ୍ଦିର ଠାରେ ପୂଜାର୍ଚ୍ଚନା କରାଯାଇଥିଲା । ଏହା ପରେ ରଥକାଠ ଧରି ୨ଟି ଟ୍ରକ ପୁରୀ ଅଭିମୁଖେ ବାହାରିଥିଲା ।

ଭୁବନେଶ୍ୱର: ସ୍ମାର୍ଟସିଟି ଭୁବନେଶ୍ୱରକୁ ପଦୂଷଣମୁକ୍ତ କରିବା ପାଇଁ ବିଏମ୍‌ସିର ଆଉଏକ ପଦକ୍ଷେପ । ମହାନଗର ଅଞ୍ଚଳରେ ୪୩ଟି ମାଇକ୍ରେ। କମ୍ପୋଷ୍ଟ କେନ୍ଦ୍ର ସ୍ଥାପନ କରାଯିବ । ପ୍ରତ୍ୟେକ କେନ୍ଦ୍ର ପାଇଁ ୭୦ଲକ୍ଷ ଲେଖାଏଁ ମୋଟ୍‌ ୩୦କୋଟିରୁ ଅଧିକ ଟଙ୍କାର ଖର୍ଚ୍ଚ ଅଟକଳ କରାଯାଇଛି । ଏସବୁ ପ୍ରକଳ୍ପ ପାଇଁ କିଛି ବାଧକ ଥିଲେ ବି ୬ମାସରୁ ବର୍ଷକ ମଧ୍ୟରେ କାମ ସଂପୂର୍ଣ୍ଣ କରିବାକୁ ଲକ୍ଷ୍ୟ ରଖିଛନ୍ତି ବିଏମ୍‌ସି କର୍ତ୍ତୃପକ୍ଷ।

ସ୍ମାର୍ଟସିଟି ଭୁବନେଶ୍ୱରର ବିଭିନ୍ନ ଓ୍ୱାର୍ଡରୁ ଦୈନିକ ସଂଗୃହୀତ ଅଳିଆ ଆବର୍ଜନାର ସୁପରିଚାଳନା ପାଇଁ ନୂଆ ଯ଼ୋଜନା । ବର୍ଜ୍ୟବସ୍ତୁରୁ ଶୁଖିଲା, ଓଦା ଓ ପ୍ଲାଷ୍ଟିକ୍‌କୁ ଅଲଗା କରି ରିସାଇକ୍‌ଲ କରାଯିବ । ପଦୂଷଣ ନିୟନ୍ତ୍ରଣରେ ଏହା ବେଶ୍‌ ସହାୟକ ହେବ ।

ବିଏମ୍‌ସିରେ ୬୭ଟି ଓ୍ୱାର୍ଡ ମଧ୍ୟରୁ ଏବେ ୪୩ଟି ସ୍ଥାନରେ ମାଇକ୍ରେ। କମ୍ପୋଷ୍ଟ କେନ୍ଦ୍ର ବା ଏମ୍‌ସିସି ସ୍ଥାପନ କରାଯିବ । ପ୍ରତି କେନ୍ଦ୍ର ପାଇଁ ୭୦ଲକ୍ଷ ଟଙ୍କା ହିସାବରେ ୩୦କୋଟିରୁ ଅଧିକ ଟଙ୍କା ଅଟକଳରେ କାମ ଆରମ୍ଭ ହୋଇଛି । ତେବେ ଏଥିରେ କିଛି ବାଧା ଅଛି । କିଛି ଅଞ୍ଚଳରେ ଲୋକ ବିରୋଧ କରୁଛନ୍ତି । ସ୍ଥାନ ପରିବର୍ତ୍ତନ କରିବାକୁ ଦାବି ହୋଇଛି ।

ତେବେ ବିଏମ୍‌ସି କମିଶନର ନିଜେ ସମ୍ପୃକ୍ତ ଅଞ୍ଚଳକୁ ଯାଇ ଲୋକଙ୍କ ସହ ଆଲୋଚନା କରି ସମସ୍ୟାର ସ୍ଥାୟୀ ସମାଧାନର ବାଟ ବାହାର କରୁଛନ୍ତି । ଏନେଇ ସର୍ବୋଚ୍ଚ ନ୍ୟାୟାଳୟ ଏବଂ ଜାତୀୟ ଗ୍ରୀନ ଟ୍ରିବ୍ୟୁନାଲ୍‌ଙ୍କ ନିର୍ଦ୍ଦେଶ ଥିବାରୁ ଖୁବ୍‌ଶୀଘ କାମ ସଂପୂର୍ଣ୍ଣ କରାଯିବ ବୋଲି ବିଏମ୍‌ସି କମିଶନର ସ୍ପଷ୍ଟ କରିଛନ୍ତି । ପ୍ରଦୂଷଣଜନିତ ସମସ୍ୟା ଦିନକୁ ଦିନ ଜଟିଳ ହେଉଥିବା ବେଳେ ଭୁବନେଶ୍ୱର ମହାନଗର ନିଗମର ପଦକ୍ଷେପ ନିଶ୍ଚିତ ଭାବେ ସ୍ୱାଗତଯୋଗ୍ୟ ।