ଜଗାକୁ ନେଇ ଗାଁକୁ ଯିବାକୁ ଏସସିବି କର୍ତ୍ତୃପକ୍ଷଙ୍କୁ ଅନୁରୋଧ କଲେ ବାପା, ମାଆ
କଟକ: ଦିଲ୍ଲୀରୁ ଓଡ଼ିଶା ଆସିବା ପରେ ଏବେ ଜଗା, କାଳିଆଙ୍କ ବାପାମାଆଙ୍କୁ ଘାରିଲାଣି ଗାଁ ନିଶା । ସୁସ୍ଥ ହୋଇଥିବା ଜଗାକୁ ନେଇ ଗାଁ ବୁଲି ଆସିବାକୁ ଜଗା, କାଳିଆଙ୍କ ବାପାମାଆ ଇଚ୍ଛା ପ୍ରକାଶ କରିଛନ୍ତି । ଜଗା, କାଳିଆଙ୍କ ସହ ସେମାନେ ଏବେ କଟକ ଏସ୍ସିବି ମେଡିକାଲରେ ଅଛନ୍ତି । ଗାଁକୁ ଯାଇ ବୁଲି ଆସିବାକୁ ଅନୁମତି ଦେବା ପାଇଁ ସେମାନଙ୍କ ପକ୍ଷରୁ କଟକ ଏସ୍ସିବି ଅଧୀକ୍ଷକଙ୍କୁ ଅନୁରୋଧ କରାଯାଇଛି । ଏସ୍ସିବି କର୍ତ୍ତୃପକ୍ଷ ରାଜ୍ୟ ସରକାରଙ୍କ ଅନୁମତି ମାଗିଛନ୍ତି । ଅନୁମତି ମିଳିଲେ ଜଗାକୁ ନେଇ ବାପାମାଆ କନ୍ଧମାଳ ଜିଲ୍ଲାରେ ଥିବା ନିଜ ଘରକୁ କିଛି ଦିନ ପାଇଁ ଯିବେ । କାଳିଆ ଅସୁସ୍ଥ ଥିବାରୁ ଏସ୍ସିବିରେ ରହିବ ।
୨୦୧୭ ଅକ୍ଟୋବର ୨୫ରେ ଦିଲ୍ଲୀ ଏମ୍ସରେ ଯୋଡ଼ାମୁଣ୍ଡ ଶିଶୁ ଜଗା-କାଳିଆଙ୍କୁ ସଫଳତାର ସହ ଅଲଗା କରାଯାଇଥିଲା । ଏଥିପାଇଁ ରାଜ୍ୟ ସରକାର ସମସ୍ତ ଖର୍ଚ୍ଚ ବହନ କରିଥିଲେ । ଦିଲ୍ଲୀ ଏମ୍ସରେ ଦୀର୍ଘଦିନ ଚିକିତ୍ସା ପରେ ଜଗା-କାଳିଆ ଗତ ସେପ୍ଟେମ୍ବର ୮ ତାରିଖରେ ଓଡ଼ିଶା ଫେରିଥିଲେ । ଓଡ଼ିଶା ଫେରିବା ପରେ ଦୁହିଁଙ୍କ ଚିକତ୍ସା ଏସ୍ସିବିରେ ଚାଲିଛି । ରାଜ୍ୟ ସରକାର ସେମାନଙ୍କ ସମସ୍ତ ଖର୍ଚ୍ଚ ବହନ କରୁଛନ୍ତି । ଏବେ ଜଗା ସୁସ୍ଥ ଥିବାରୁ ତାକୁ ନେଇ ଗାଁ ବୁଲି ଆସିବାକୁ ବାପାମାଆ ଇଚ୍ଛା ପ୍ରକାଶ କରିଛନ୍ତି । ଏବେ ରାଜ୍ୟ ସରକାରଙ୍କ ଅନୁମତିକୁ ଅପେକ୍ଷା ।
ଇଚ୍ଛାଶକ୍ତି ଆଗରେ ହାର ମାନିଲା ବାର୍ଦ୍ଧକ୍ୟ,୧୦୫ ବର୍ଷ ବୟସରେ ଚତୁର୍ଥ ଶ୍ରେଣୀ ପାଠ ସାରିଲେ ବୃଦ୍ଧା
କେରଳ : ପାଠ ପଢିବାକୁ ବୟସ ନୁହେଁ, କେବଳ ଦରକାର ଦୃଢ଼ ଇଚ୍ଛାଶକ୍ତି । ଏହାର ଉଦାହରଣ ହେଉଛନ୍ତି କେରଳର କୋଲ୍ଲମର ୧୦୫ ବର୍ଷର ବୃଦ୍ଧା ଭାଗୀରଥୀ ଆମ୍ମା । ପିଲାବେଳୁ ଭାଗୀରଥିଙ୍କର ପଢ଼ିବାରେ ଥିବା ଇଚ୍ଛା ୧୦୫ ବର୍ଷ ବୟସରେ ପୂରଣ ହୋଇଛି । ସେ ରାଜ୍ୟ ସାକ୍ଷରତା ମିଶନରେ ପାଠପଢ଼ି ଚତୁର୍ଥ ଶ୍ରେଣୀରେ ପରୀକ୍ଷା ଦେଇ ସାରା ଦେଶ ପାଇଁ ଏକ ଉଦାହରଣ ସୃଷ୍ଟି କରିଛନ୍ତି । ଭାଗୀରଥିଙ୍କ ମା’ ମରିଯିବା ପରେ ସେ ଏକ ପ୍ରକାର ପାଠରେ ଡୋରି ବାନ୍ଧି ଦେଇଥିଲେ । କାରଣ ମା’ଙ୍କ ପରେ ତାଙ୍କ ଉପରେ ଥିଲା ଭାଇ ଭଉଣୀଙ୍କ ଦାୟିତ୍ୱ । ପାରିବାରିକ ଜଞ୍ଜାଳରେ ପେସି ହୋଇଯାଉଥିଲେ ଆମ୍ମା । ଗୋଟିଏ ପରେ ଗୋଟିଏ ବିପଦ ତାଙ୍କ ଉପରେ ମାଡ଼ି ପଡ଼ୁଥିଲା । ତାଙ୍କୁ ଯେତେବେଳେ ୩୦ ବର୍ଷ ବୟସ ସେତେବେଳକୁ ତାଙ୍କ ପତିଙ୍କର ଦେହାନ୍ତ ହୋଇଥିଲା ଏବଂ ପୁଣି ଛଅ ପିଲାଙ୍କର ଜଞ୍ଜାଳ ଭାର ତାଙ୍କ ଉପରେ ପଡ଼ିଥିଲା ।
କର୍ମମୟ ଜଞ୍ଜାଳରୁ ବାହାରି ପାଠ ପଢିବାକୁ ବାରମ୍ବାର ଚେଷ୍ଟା କରି ବିଫଳ ହେଉଥିଲେ ଭାଗୀରଥି । ପିଲାମାନେ ବଡ଼ ହେବା ପରେ ଶେଷରେ ୧୦୫ ବର୍ଷ ବୟସରେ ୮ ବର୍ଷରେ ପାସ କରିଥିବା ତୃତୀୟଶ୍ରେଣୀ ପରର ପାଠ ପଢ଼ା ଆରମ୍ଭ କରିଥିଲେ । ଏବେ ବି ତାଙ୍କର ସୃତିଶକ୍ତି ପ୍ରଖର ରହିଛି । ଶୁଣିବାରେ ବି କୌଣସି ଅସୁବିଧା ନାହିଁ । କିନ୍ତୁ ବାର୍ଦ୍ଧକ୍ୟ ଯୋଗୁଁ ହାତ ଥରୁଥିବାରୁ ସେ ପରୀକ୍ଷା ଦେବାକୁ ଅଧିକ ସମୟ ନେଇଛନ୍ତି। ପାଠ ପଢ଼ି ପରୀକ୍ଷା ଦେଇଥିବାରୁ ଭାଗୀରଥି ଆମ୍ମା ବହୁତ ଖୁସୀ ଅଛନ୍ତି ।
ମହାପ୍ରଭୁ ଶ୍ରୀଜଗନ୍ନାଥଙ୍କ ମାମୁଁ ଘରକୁ ନେଇ ବଢ଼ିଲା ବିବାଦ । ନିଆଳି ମାଧବରୁ କାହିଁକି ଆସିଲା ଅଷ୍ଟମୀ ଭାର ?
ପୁରୀ : ଶ୍ରୀଜଗନ୍ନାଥଙ୍କ ମାମୁଁ ଘର କେଉଁଠି ? ପ୍ରଥମାଷ୍ଟମୀରେ କିଛି ଏଭଳି ଅସମାହିତ ପ୍ରଶ୍ନକୁ ନେଇ ଶ୍ରୀକ୍ଷେତ୍ର ସରଗରମ । ବିବାଦ ମଧ୍ୟ ଦେଖାଦେଲାଣି । ଶ୍ରୀଜଗନ୍ନାଥଙ୍କ ସେଭଳି କୌଣସି ମାମୁଁ ଘର ଥିବା ତଥ୍ୟ ସତ୍ଵଲିପି ଏବଂ ଇତିହାସ ରେ ବର୍ଣ୍ଣିତ ନଥିବା ମନ୍ଦିର ପ୍ରଶାସନ ଓ ଗବେଷକ ମାନେ ମତ ରଖିଛନ୍ଥିତି । ନିଆଳି ମାଧବାନନ୍ଦ ଜୀଉଙ୍କ ପକ୍ଷରୁ ମାମୁଁଘର ବୋଲି ଦାବି ଭିତ୍ତିହୀନ । ତେବେ ପ୍ରଭୁ ଶ୍ରୀଜଗନ୍ନାଥଙ୍କ ପ୍ରକୃତ ମାମୁଁ ଘର କେଉଁଠି ଏହା ଉପରେ ଅଧିକ ଗବେଷଣା କରାଯିବାର ଆବଶ୍ୟକତା ଥିବା ଦାବି ଉଠାଇଛନ୍ତି ସେବାୟତ ।
ଜଗତସିଂହପୁରର ନିଆଳି ମାଧବ ମନ୍ଦିରରୁ ମାଧବାନନ୍ଦ ଜୀଉ ବିକାଶ ପରିଷଦ ପକ୍ଷରୁ ଆଜି ପ୍ରଥମାଷ୍ଟମୀ ଅବସରରେ ନୂତନ ପଢ଼ୁଆଁ ବସ୍ତ୍ର ଶ୍ରୀଜଗନ୍ନାଥଙ୍କ ଉଦ୍ଦେଶ୍ୟରେ ଲାଗି କରାଇବା ପାଇଁ ଗତକାଲି ଅନୁଷ୍ଠାନ ପକ୍ଷରୁ ବିଶାଳ ଶୋଭାଯାତ୍ରାରେ ପ୍ରଦାନ କରାଯାଇଥିଲା । ନିଆଳି ମାଧବାନନ୍ଦ ଜୀଉ ମନ୍ଦିର ପକ୍ଷରୁ ଶ୍ରୀଜଗନ୍ନାଥଙ୍କ ମାମୁଁଘର ନିଆଳି ବୋଲି ଦାବି ହେବା ପରେ ବଢ଼ିଥିଲା ବିବାଦ । ଶ୍ରୀମନ୍ଦିର ସତ୍ଵଲିପି ଅଥବା ଇତିହାସରେ ଶ୍ରୀଜଗନ୍ନାଥଙ୍କ ସେଭଳି କୌଣସି ମାମୁଁ ଘର ନଥିବା ଗବେଷକ କହିଛନ୍ତି । ମାମୁଁଘର ବୋଲି ଦାବି କରୁଥିବା ନିଆଳି ମାଧବ ମନ୍ଦିରଙ୍କର ପ୍ରକୃତ ପକ୍ଷେ ଶ୍ରୀମନ୍ଦିର ସହିତ କୌଣସି ସମ୍ପର୍କ ନଥିବା ବେଳେ ମହାପ୍ରଭୁ ଶ୍ରୀଜଗନ୍ନାଥ ପରଂବ୍ରହ୍ମ ହୋଇଥିବାରୁ ତାଙ୍କର ମାମୁଁଘରକୁ ନେଇ ସେଭଳି କୌଣସି ତଥ୍ୟ ମାଦଳାପାଞ୍ଜି ଅଥବା ସତ୍ଵଲିପିରେ ନଥିବା କଥା ଗବେଷକ ମତ ରଖିଛନ୍ତି |
ଏପରିକି ଶ୍ରୀମନ୍ଦିର ପ୍ରଶାସନ ପକ୍ଷରୁ ମଧ୍ୟ ନିଆଳି ମାଧବ ମନ୍ଦିରରୁ ଆସିଥିବା ପଢ଼ୁଆଁ ବସ୍ତ୍ରକୁ ଦାନ ହିସାବରେ ଗ୍ରହଣ କରାଯାଇ ଥିବା ଶ୍ରୀମନ୍ଦିର ପ୍ରଶାସନ ପକ୍ଷରୁ କୁହଯାଇଛି । ଅନ୍ୟପଟେ ଶ୍ରୀଜଗନ୍ନାଥଙ୍କ ଭାଇଆଳି ସେବକ ଭାବେ ପରିଚିତ ଦଇତାପତି ମାନେ ମଧ୍ୟ ମାମୁଁଘର ନିଆଳିରେ ଥିବା ନେଇ ପ୍ରଶ୍ନ ଉଠାଇଛନ୍ତି । ଶ୍ରୀମନ୍ଦିର ପ୍ରଶାସନ ପକ୍ଷରୁ ଏନେଇ ଅନୁସନ୍ଧାନ କରିବାକୁ ଦାବି କରାଯାଇଛି । ଏପରିକି ବିଭ୍ରାନ୍ତିକର ତଥ୍ୟ ପ୍ରଦାନ କରାନଯାଇ ପ୍ରକୃତ ତଥ୍ୟ ଉନ୍ମୋଚନ ପାଇଁ ମନ୍ଦିର ପ୍ରଶାସନ ପ୍ରଚେଷ୍ଟା କରିବାକୁ ସେବାୟତ ଦାବି କରିଛନ୍ତି ।
ଶ୍ରୀଜଗନ୍ନାଥଙ୍କ ସଂସ୍କୃତି ପରମ୍ପରା ସାରା ବିଶ୍ୱରେ ଅନନ୍ୟ ହୋଇଥିବା ବେଳେ ଭକ୍ତ ଓ ଶ୍ରଦ୍ଧାଳୁ ମାନଙ୍କ ଭାବାବେଗକୁ ଭ୍ରମିତ କଲା ଭଳି କୌଣସି ତଥ୍ୟ ପ୍ରକାଶ କରିବା ଉଚିତ ନୁହଁ ବୋଲି ସାଧାରଣରେ ମତ ପ୍ରକାଶ ପାଇଛି । ଏବେ ଆହୁରି ଅନେକ ପ୍ରଶ୍ନ ମଧ୍ୟ ସାମ୍ନାକୁ ଆସିଲାଣି । ଯଦି ନିଆଳିରେ ମହାପ୍ରଭୁଙ୍କର ମାମୁଁଘର ନୁହେଁ ତେବେ ସେଠାରୁ ଭାର ଆସିଲା କାହିଁକି ? ଆଗରୁ କେବେବି ଏଭଳି ଭାର ଶୋଭାଯାତ୍ରାରେ ଆସିବା କେହି ଦେଖିନଥିବା ବେଳେ ଏଥର ଏମିତି କେଲା କାହିଁକି ? ଏହା ମହାପ୍ରଭୁଙ୍କ ସଂପର୍କିତ ରୀତିନୀତିକୁ ଭ୍ରମିତ କରିବାକୁ କରାଯାଇନି ତ ? ଶ୍ରୀମନ୍ଦିର ପ୍ରଶାସନ ଏହା ବିରୋଧରେ କିଛି ପଦକ୍ଷେପ ନେବ ନା ନାହିଁ ?
ମହାପ୍ରଭୁଙ୍କ ମାମୁଁଘର ସଂପର୍କିତ ତଥ୍ୟ ହାସଲ ପାଇଁ ଅଧିକ ଗବେଷଣା ହେବ କି ?
କୃଷିଋଣ ଦୁର୍ନୀତିରେ ସିଣ୍ଡିକେଟ ବ୍ୟାଙ୍କର ପୂର୍ବତନ ଅଧିକାରୀଙ୍କୁ ବାନ୍ଧିଲା କ୍ରାଇମବ୍ରାଞ୍ଚ
ଭୁବନେଶ୍ୱର/ସମ୍ବଲପୁର: କୃଷିଋଣ ଜାଲିଆତି କରି ବନ୍ଧାହେଲେ ୨ ବ୍ୟାଙ୍କର୍ସ । କ୍ରାଇମବ୍ରାଞ୍ଚ ଅର୍ଥନୈତିକ ଅପରାଧ ଶାଖା ସିଣ୍ଡିକେଟ ବ୍ୟାଙ୍କର ୨ ଜଣ ପୂର୍ବତନ ଅଧିକାରୀଙ୍କୁ ଗିରଫ କରିଛି । ଦୁହେଁ ବୁର୍ଲା ସିଣ୍ଡିକେଟ ବ୍ୟାଙ୍କର ପୂର୍ବତନ ମ୍ୟାନେଜର ସୁବାସ ଚନ୍ଦ୍ର ଦାଶ ଓ ପୂର୍ବତନ ସହକାରୀ ମ୍ୟାନେଜର ମାରିନସ୍ ଲାକ୍ରା । ଜାଲ୍ କାଗଜପତ୍ର ଜରିଆରେ ୧୯୬ ଜଣଙ୍କ ନାଁରେ ୧ ଲକ୍ଷ ଟଙ୍କା ଲେଖାଏଁ କୃଷିଋଣ ମଞ୍ଜୁର କରିଥିଲେ । ୨୦୧୪ରୁ ୧୬ ମସିହା ମଧ୍ୟରେ ସିଣ୍ଡିକେଟ କିଶାନ କାର୍ଡ ଜରିଆରେ ୧ କୋଟି ୯୬ ଲକ୍ଷ ଟଙ୍କାର କାରବାର ହୋଇଥିଲା ।
କେୱାଇସି ଯାଞ୍ଚ ବେଳେ ଋଣ ନେଇଥିବା ଲୋକ ଓ ତଥ୍ୟରେ ତାଳମେଳ ହୋଇନଥିଲା । ଏପିରିକି ଋଣ ଦିଆଯାଇଥିବା ୧ କୋଟି ୯୬ ଲକ୍ଷ ଟଙ୍କାକୁ ବ୍ୟାଙ୍କ ଏନପିଏ ଘୋଷଣା କରିଥିଲା । କୃଷିଋଣ ପ୍ରଦାନରେ ଘୋଟାଲା ନେଇ ସିଣ୍ଡିକେଟ ବ୍ୟାଙ୍କ ଭୁବନେଶ୍ୱର ଆଞ୍ଚଳିକ ଶାଖାର ମ୍ୟାନେଜର କ୍ରାଇମବ୍ରାଞ୍ଚ ଇଓଡବ୍ଲୁରେ ଅଭିଯୋଗ କରିଥିଲେ । ଇଓଡବ୍ଲୁ ମାମଲା ରୁଜୁ କରିବା ସହ ଆଇପିସି ଧାରା ୪୧୯/୪୨୦/୪୬୭/୪୬୮/୪୭୧/୪୦୯/ ୧୨୦ (ବି)ରେ ଉଭୟଙ୍କୁ ଗିରଫ କରିବା ସହ କୋର୍ଟ ଚାଲାଣ କରିଛି । ଏଥିସହ ଗିରଫଙ୍କ ବାସଭବନରେ ରେଡ୍ କରାଯାଇ ବହୁ କାଗଜପତ୍ର ଇଓଡବ୍ଲୁ ଜବତ କରିଛି ।
ଓଡ଼ିଶାର ଭାତହାଣ୍ଡି କୁହାଯାଉଥିବା ପଶ୍ଚିମ ଓଡ଼ିଶାରେ କେତେବେଳେ ଚାଷୀ ଋଣ ପାଇଁ ଜୀବନ ହାରୁଛି ତ ଆଉ କେବେ ଟଙ୍କା ଅଭାବରୁ ଫସଲ ନଷ୍ଟ ଖବର ସାମନାକୁ ଆସୁଛି । ଏପରିସ୍ଥଳେ କୃଷିଋଣ ନାଁରେ ବ୍ୟାଙ୍କ କର୍ମଚାରୀ ପ୍ରାୟ ୨ କୋଟି ଟଙ୍କାର ଘୋଟାଲା ସମ୍ବଲପୁରରେ ଚାଷୀଙ୍କୁ କେମିତି ଋଣ ଦିଆଯାଉଛି ତାକୁ ପ୍ରମାଣିତ କରିଛି ।
କୋଟିଏରେ ଦେଖିବାକୁ ମିଳେ ଏମିତି ଗୋଟିଏ ଘଟଣା
ପିପିଲି: ମାନବିକତା ପରିଚୟ ଦେଲେ ୨ ଯୁବକ । ଫେରାଇଲେ ରାସ୍ତାରୁ ପାଇଥିବା ପ୍ରାୟ ୩ ଲକ୍ଷ ଟଙ୍କାର ସୁନା ଗହଣା । ଆଶ୍ଚର୍ଯ୍ୟ ଲାଗୁଥିଲେ ବି ସତ । ନିମାପଡ଼ା ଗୋପୀନାଥ ପାଟଣାର ଚନ୍ଦନ ବାରିକ ଓ ଆଲୋକ ନାୟକଙ୍କ ଏ କାର୍ଯ୍ୟକୁ ସମସ୍ତେ ଭୂୟସୀ ପ୍ରଶଂସା କରୁଛନ୍ତି ।
ଗତ ୧୮ ତାରିଖରେ ନିମାପଡ଼ା ବ୍ଲକ୍ ଇଚ୍ଛାପୁର ଗାଁର କାବେରୀ ପ୍ରଧାନଙ୍କ ଭ୍ୟାନିଟି ବ୍ୟାଗଟି ଗୋପୀନାଥ ପାଟଣା ଗାଁ ନିକଟରେ ଖସିପଡ଼ିଥିଲା । ତାକୁ ପାଇଥିଲେ ଗାଁର ଚନ୍ଦନ ବାରିକ ଓ ଆଲୋକ ନାୟକ । ଭ୍ୟାନିଟିରେ ପର୍ସ ସହ ସୁନା ଅଳଙ୍କାର ଥିବା ଦେଖିଥିଲେ । ହେଲେ, ଉଭୟ ଲୋଭ ନକରି ଗ୍ରାମବାସୀଙ୍କୁ ଏନେଇ ଜଣାଇଥିଲେ । ଆଉ ସୋସିଆଲ ମିଡିଆରେ ହଜିଥିବା ଜିନିଷର ଫଟୋ ଫୋଷ୍ଟ କରିଥିଲେ ।
ସୋସିଆଲ ମିଡିଆରୁ ଜାଣିବା ପରେ ଗୋପୀନାଥପୁର ପାଟଣା ଗ୍ରାମବାସୀଙ୍କୁ ନିଜ ଭ୍ୟାନିଟି ବୋଲି ଦାବି କରିବା ସହ କାବେରୀ ପ୍ରମାଣ ଦେଇଥିଲେ । ତାପରେ ଗ୍ରାମବାସୀ କାବେରୀଙ୍କୁ ବ୍ୟାଗ ଓ ଅଳଙ୍କାର ହସ୍ତାନ୍ତର କରିବା ସହ ୨ ଯୁବକଙ୍କୁ ପ୍ରଶଂସା କରିଛନ୍ତି । ହଜିଥିବା ଜିନିଷ ପାଇ ଫେରାଇଥିବାରୁ ଚନ୍ଦନ ଓ ଆଲୋକଙ୍କୁ କାବେରୀ ପ୍ରଶଂସା କରିବା ସହ ତାଙ୍କ ନିକଟରେ ଋଣୀ ଥିବା କହିଛନ୍ତି ।