ନନ୍ଦିଘୋଷ ବ୍ୟୁରୋ: ଅଧପନ୍ତରିଆ ରାସ୍ତା । ଚାରିଆଡ଼େ ଖାଲ ଖମା । ବାଟ ସାରା ଉଠି ରହିଛି ଗୋଡି ପଥର । ସମ୍ବଲପୁର ଅଇଁଠାପାଲି ଅଞ୍ଚଳ ଏବେ ଦୁର୍ଘଟଣାର ହଟ୍ସ୍ପଟ୍। ଦିନକୁ ଦିନ ବଢ଼ୁଛି ସଡ଼କ ଦୁର୍ଘଟଣା। ଗତ ମାସକ ମଧ୍ୟରେ ଦୁର୍ଘଟଣାରେ ୭ ଜଣଙ୍କ ଜୀବନ ଯାଇଥିବା ଅଭିଯୋଗ ହୋଇଛି ।
ସୂଚନାଯୋଗ୍ୟ, ଦୀର୍ଘଦିନ ଧରି ଚାଲିଥିବା ଫ୍ଲାଏଓଭର୍ ନିର୍ମାଣ କାମ ଯୋଗୁଁ ରାସ୍ତାର ଅବସ୍ଥା ଶୋଚନୀୟ ହୋଇପଡ଼ିଛି । ରାସ୍ତାରେ ଗାଡ଼ି ଚଳାଇବା ଏବେ ଯେମିତି ଜୀବନକୁ ବାଜି ଲଗାଇବା ସହ ସମାନ। ଲଗାତାର ଦୁର୍ଘଟଣା ଘଟିବା ଫଳରେ ଗତ ମାସରେ ୭ ଜଣଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି । ଦୁର୍ଘଟଣା ଭୟରେ ଜାତୀୟ ରାଜପଥକୁ ଓହ୍ଲାଇବାକୁ ମଧ୍ୟ ଲୋକେ ଭୟ କରୁଛନ୍ତି । ଦୀର୍ଘ ଦିନ ଧରି ଫ୍ଲାଏଓଭର୍ ନିର୍ମାଣ କାମ ଜାରି ରହିଛି । ନିର୍ମାଣ କାମ ଯୋଗୁଁ ରାସ୍ତା ସଙ୍କୁଚିତ ହେବା ସହ ଯାତାୟାତରେ ନା ନା ପ୍ରକାରର ସମସ୍ୟା ଉପୁଜୁଛି । ଯାତାୟାତ ବ୍ୟବସ୍ଥା ଠିକ୍ ନଥିବାରୁ ବାରମ୍ବାର ଦୁର୍ଘଟଣା ଘଟୁଥିବା ଅଭିଯୋଗ କରିଛନ୍ତି ସହରବାସୀ । ତେଣୁ ଦୁର୍ଘଟଣା ରୋକିବାକୁ ହେଲେ ଫ୍ଲାଏଓଭର୍ କାମ ତୁରନ୍ତ ଶେଷ କରିବା ସହ ସହରବାସୀଙ୍କୁ ସୁରକ୍ଷା ପ୍ରଦାନ କରାଯାଉ ବୋଲି ଦାବି ଜୋର୍ ଧରିଛି । ଯଥାଶୀଘ୍ର ଏହି ସମସ୍ୟାର ସମାଧାନ ନ ହେଲେ ଆଗକୁ ଆନ୍ଦୋଳନ ହେବ ବୋଲି ଚେତାବନୀ ଦେଇଛନ୍ତି ସମ୍ବଲପୁରବାସୀ।

