ନନ୍ଦିଘୋଷ ବ୍ୟୁରୋ: ବୌଦ୍ଧ ଜିଲ୍ଲା କଣ୍ଟାମାଲ ପୋଲିସ ନାଁରେ ଅଭିଯୋଗ। ଦୁଇ ହୋମଗାର୍ଡଙ୍କୁ ଚାକିରିରୁ ବହିଷ୍କାର ପରେ ଗଞ୍ଜେଇ ଚାଷରେ ସମ୍ପୃକ୍ତି ଦର୍ଶାଇ ମିଥ୍ୟା ମାମଲା ରୁଜ୍ଜୁ କରିଥିବା ଅଭିଯୋଗ ଆଣିଲେ ଅଭିଯୁକ୍ତଙ୍କ ପରିବାର। ସେପଟେ ଏହି ମାମଲାରେ ବୌଦ୍ଧ ଏସପିଙ୍କୁ ନ୍ୟାୟ ଭିକ୍ଷା କରିଛନ୍ତି କଣ୍ଟାମାଳ ଥାନା ଅନ୍ତର୍ଗତ ଲମ୍ବସରି ପଞ୍ଚାୟତର ୫ ଖଣ୍ଡ ଗାଁ ଲୋକେ। ନ୍ୟାୟ ନମିଳିଲେ ପରିବାର ବର୍ଗଙ୍କ ସହ ଏସ୍.ପି. ଅଫିସ୍ ସାମ୍ନାରେ ଆତ୍ମାହୁତି ଦେବାକୁ ଚେତାବନୀ ଦେଇଛନ୍ତି ।
ବୌଦ୍ଧ ଜିଲ୍ଲା କଣ୍ଟାମାଳ ଥାନା ଅଧୀନରେ ରୁଜୁ ହୋଇଥିବା ଏକ ଗଞ୍ଜେଇ ଗଛ ଚାଷ ମାମଲାରେ ସମ୍ପୂର୍ଣ୍ଣ ନିର୍ଦ୍ଦୋଷ ବୋଲି ଦାବି କରିଛନ୍ତି ଦୁଇ ଅଭିଯୁକ୍ତଙ୍କ ପରିବାର। ମିଥ୍ୟା ଓ ଭିତ୍ତିହୀନ ଭାବେ FIRରେ ନାମ ଯୋଡ଼ାଯାଇଥିବା ଅଭିଯୋଗ କରି ସେମାନେ ବୌଦ୍ଧ ପୋଲିସ ଅଧୀକ୍ଷକଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି। ଲମ୍ବସରି ଗାଁର ପ୍ରଶାନ୍ତ ଖେତି ଓ ସେଉଳମୁଣ୍ଡା ଗାଁର ଛବିଳ ନାଏକଙ୍କ ପରିବାର ସମେତ ଆଖପାଖ ୫ଖଣ୍ଡ ଗାଁର ଲୋକେ ଅଭିଯୋଗ କରିଛନ୍ତି ଯେ, କଣ୍ଟାମାଳ ଥାନାରେ ହୋଇଥିବା ଏକ NDPS ମାମଲାରେ ସେମାନଙ୍କର କୌଣସି ସମ୍ପୃକ୍ତି ନାହିଁ। କୌଣସି ପ୍ରକାର ଯାଞ୍ଚ କିମ୍ବା ପ୍ରମାଣ ନଥାଇ ସେମାନଙ୍କ ନାଁକୁ ମାମଲାରେ ଯୋଡି ଦିଆଯାଇଛି ବୋଲି ସେମାନେ ଅଭିଯୋଗ କରିଛନ୍ତି। ଏନେଇ ବୌଦ୍ଧ SPଙ୍କ ପ୍ରତିକ୍ରିୟା ମିଳପାରିନାହିଁ ।
