ପ୍ରବଳ ଖରା ଯୋଗୁଁ ସ୍କୁଲ ଛୁଟି। କଳାହାଣ୍ଡି ଜିଲ୍ଲା ପ୍ରଶାସନ ଆଜିଠୁ ୨୧ ତାରିଖ ଯାଏ ଛୁଟି ଘୋଷଣା କରିଛନ୍ତି। ସେହିପରି ସୁବର୍ଣ୍ଣପୁର ଜିଲ୍ଲାରେ ୧୮ରୁ ୨୨ ତାରିଖ ଯାଏ, ବଲାଙ୍ଗିରରେ ୧୮ରୁ ୨୧ ତାରିଖ ଯାଏ ଓ ବୌଦ୍ଧରେ ୧୮ରୁ ୨୨ ତାରିଖ ଯାଏ ଛୁଟି ଘୋଷଣା କରିଛନ୍ତି ଜିଲ୍ଲା ପ୍ରଶାସନ। ପିଲାଙ୍କ ସୁରକ୍ଷାକୁ ଦେଖି ଏହି ନିଷ୍ପତ୍ତି ନିଆଯାଇଛି। ସେପଟେ ପାଣିପାଗ ବିଜ୍ଞାନୀଙ୍କ ପକ୍ଷରୁ କୁହାଯାଇଛି,
୨୨ ତାରିଖ ପର୍ଯ୍ୟନ୍ତ ଜଳିବ ଆଭ୍ୟନ୍ତରୀଣ ଓଡ଼ିଶା । ତାତିରୁ ମିଳିବନି ନିସ୍ତାର । ଏଭଳି ଆକଳନ କରିଛନ୍ତି ବିଶିଷ୍ଟ ପାଣିପାଗ ବିଜ୍ଞାନୀ ଡ.ସୁରନ୍ଦ୍ର ନାଥ ପଶୁପାଳକ । ଏପରିକି କେତେକ ସ୍ଥାନରେ ପାରଦ ୪୫ ଡିଗ୍ରିରୁ ଅଧିକ ହୋଇପାରେ । IMD, ECMWF ଓ GFS ମଡେଲ ଅନୁଧ୍ୟାନ କରି ସେ ଏହା କହିଛନ୍ତି।
ଆଗାମୀ ୫ ଦିନ ପର୍ଯ୍ୟନ୍ତ କାଳବୈଶାଖୀର ସମ୍ଭାବନା ବି କମ୍। ଉତ୍ତର-ପଶ୍ଚିମ ଆଡ଼ୁ ଆସୁଥବା ଶୁଷ୍କ ବାୟୁ, ତାତି ବଢାଇଛି। କେତେକ ସ୍ଥାନରେ ‘ହିଟ୍ ଇଣ୍ଡେକ୍ସ’ ବୃଦ୍ଧି ପାଇ ଅସହ୍ୟ ଗୁଳୁଗୁଳି ହେଉଛି। ଏଥିପାଇଁ ସତର୍କ ରହିବା ପାଇଁ କୁହାଯାଇଛି।
୨୨ ତାରିଖ ପର୍ଯ୍ୟନ୍ତ ଜଳିବ ଆଭ୍ୟନ୍ତରୀଣ ଓଡ଼ିଶା, ବିଭିନ୍ନ ଜିଲ୍ଲାରେ ସ୍କୁଲ ବନ୍ଦ…
ଆଶ୍ରମ ସ୍କୁଲ ଛାତ୍ରୀଙ୍କ ମୃତ୍ୟୁର ପ୍ରତିବାଦରେ ୧୨ ଘଣ୍ଟିଆ ମୟୂରଭଞ୍ଜ ବନ୍ଦ
ଆଜି ୧୨ ଘଣ୍ଟିଆ ମୟୂରଭଞ୍ଜ ବନ୍ଦ ପାଳନ କରାଯାଉଛି। ସକାଳ ୬ଟା ଠାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଅଖ ଚକ ବନ୍ଦ। ରାସଗୋବିନ୍ଦପୁର ଆଶ୍ରମ ବିଦ୍ୟାଳୟର ଛାତ୍ରୀଙ୍କ ମୃତ୍ୟୁ ପ୍ରତିବାଦରେ ବିଜେଡି ଏହି ବନ୍ଦ ଡାକରା ଦେଇଛି। ବିଷାକ୍ତ ଖାଦ୍ୟ ଯୋଗୁଁ ଛାତ୍ରୀଙ୍କ ମୃତ୍ଯୁ ହୋଇଥିବା ଅଭିଯୋଗ ହୋଇଛି। ବିଜେଡି କହିଛି, ଏହି ହରତାଳ ଆମ ପିଲାଙ୍କ ସୁରକ୍ଷା ପାଇଁ। ସରକାରଙ୍କ ଅବହେଳାରୁ ଛାତ୍ରୀଙ୍କ ମୃତ୍ୟୁ ହେଲା। ସଂପୃକ୍ତ ଛାତ୍ରୀକୁ ନ୍ୟାୟ ଦେବା ପାଇଁ ବନ୍ଦ ପାଳନ କରାଯାଉଛି। ଆନ୍ଦୋଳନ ହେଲେ ହିଁ ଶୋଇଥିବା ସରକାରର ନିଦ ଭାଙ୍ଗିବ। ୧୪୬ ଛାତ୍ର ଛାତ୍ରୀଙ୍କୁ ବିଷାକ୍ତ ଖାଦ୍ୟ ପ୍ରଦାନ କରିବାରେ କିଏ ଦାୟୀ ବୋଲି ପ୍ରଶ୍ନ କରିଛି ବିଜେଡି। ଏହି ବନ୍ଦକୁ ବିଭିନ୍ନ ଦଳଗତ ନିର୍ବିଶେଷରେ ସମସ୍ତେ ସମର୍ଥନ ଦେଇଛନ୍ତି। ଏହା ସହିତ ଜିଲ୍ଲା ଓକିଲ ସଙ୍ଘ, ବସ ସଙ୍ଘ ପରି ଅନେକ ସଙ୍ଗଠନ ସାମିଲ ହୋଇଛନ୍ତି। ମୟୂରଭଞ୍ଜ ବିଜେଡ଼ିର ଜିଲ୍ଲା ସଭାପତି ତଥା ପୂର୍ବତନ ମନ୍ତ୍ରୀ ସୁଦାମ ମାରାଣ୍ଡିଙ୍କ ନେତୃତ୍ବରେ ଏହି ବନ୍ଦ ପାଳନ ଚାଲିଛି। ବାଙ୍ଗିରିପୋଷି ପୁରୀ ସୁପରଫାଷ୍ଟ ଟ୍ରେନ ବେତନଟି ଷ୍ଟେସନ୍ ନିକଟରେ ଅଟକି ରହିଛି। ବାରିପଦା ଦେଇ ଯାଇଥିବା ୧୮ ନମ୍ବର ଜାତୀୟ ରାଜପଥର ପାଲବନି ବାଇପାସ, ମୁର୍ଗାବାଡ଼ି ଛକରେ ଟାୟାର ଜାଳି ରାସ୍ତା ଅବରୋଧ କରାଯାଇଛି। ଅଟକି ରହିଛି ବହୁ ଗାଡ଼ି ମଟର। ଅତ୍ୟାବଶକୀୟ ଦୋକାନ ଖୋଲା ରହିବା ସହିତ ଆମ୍ବୁଲାନ୍ସ କୁ ଅଟକାଯିବ ନାହିଁ ବୋଲି କୁହାଯାଇଛି।
ପୋଲିସ ବାବୁଙ୍କ ବିରୋଧରେ ସଂଗୀନ ଅଭିଯୋଗ
ନୟାଗଡ଼ ଜିଲ୍ଲା ଖଣ୍ଡପଡ଼ା ଏସ୍ଡିପିଓ ମଦନ ମୋହନ ପ୍ରଧାନଙ୍କ ବିରୋଧରେ ସଂଗୀନ ଅଭିଯୋଗ । ଅଭିଯୋଗ ଆଣିଛନ୍ତି ଫତେଗଡ଼ ଥାନା ଅଞ୍ଚଳର ଜଣେ ମହିଳା । ଏକ ମାମଲାର ରଫାଦଫା ପାଇଁ ଏସ୍ଡିପିଓ ହ୍ଵାଟ୍ସଆପରେ ତାଙ୍କୁ ଅଶ୍ଳୀଳ ବାର୍ତ୍ତା ପଠାଉଛନ୍ତି, ଖରାପ ଉଦ୍ଦେଶ୍ୟ ରଖି ବିଭିନ୍ନ ଜାଗାକୁ ଡାକୁଛନ୍ତି। ମହିଳା ଜଣକ ଡିଜିଙ୍କ ନିକଟରେ ଲିଖିତ ଅଭିଯୋଗ କରି ତଦନ୍ତ ଓ ଏସ୍ଡିପିଓଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ପୀଡ଼ିତାଙ୍କ ଅଭିଯୋଗ ଅନୁସାରେ ଗତ ବର୍ଷ ଜୁଲାଇ ୩ ତାରିଖର ଏକ ଗଣ୍ଡଗୋଳକୁ ନେଇ ଥାନାରେ ମାମଲା ହୋଇଥିଲା। ଏହି ମାମଲାକୁ ନେଇ ଫତେଗଡ଼ JMFC କୋର୍ଟରୁ ଏକ ସମନ୍ ଆସିଥିଲା । ତଦନ୍ତ ସମୟରେ ଏସ୍ଡିପିଓ ଖରାପ ଉଦ୍ଦେଶ୍ୟ ରଖି କଥା ହୋଇଥିବା ଓ ଏକ ହୋଟେଲକୁ ଡାକିଥିବା ଅଭିଯୋଗ କରିଛନ୍ତି ପୀଡ଼ିତା। ରାଜି ନ ହେବାରୁ ଅଶ୍ଳୀଳ କଥାବାର୍ତ୍ତା କରିଥିଲେ। ଏହାର ପ୍ରମାଣ ବି ପୀଡ଼ିତାଙ୍କ ପାଖରେ ଅଛି। ତେବେ ଶାରୀରିକ ସମ୍ପର୍କ ନ ରଖିଲେ ମିଥ୍ୟା ମାମଲାରେ ସ୍ବାମୀଙ୍କୁ ଫସାଇ ଦେବାକୁ ଏସଡିପିଓ ଧମକ ଦେଇଥିବା କହିଛନ୍ତି ପୀଡ଼ିତା। କେବଳ ସେତିକି ନୁହେଁ ମିଥ୍ୟା ମାମଲାରେ ପୀଡ଼ିତାଙ୍କୁ ରାତି ସାରା ଥାନାରେ ଅଟକ ରଖି ନିଜ ଉଦ୍ଦେଶ୍ୟ ପୂରଣ କରିବେ ବୋଲି ମଧ୍ୟ ଧମକ ଦେଇଥିବାସେ ଅଭିଯୋଗ କରିଛନ୍ତି। ଏହି ସଂଗୀନ ଅଭିଯୋଗ ନେଇ ଏସଡିପିଓଙ୍କ ପ୍ରତିକ୍ରିୟା ନେବାକୁ ଚେଷ୍ଟା କରାଯାଇଥିଲା। କିନ୍ତୁ ତାଙ୍କ ଫୋନ୍ ସୁଇଚ୍ ଅଫ୍ ଥିବାରୁ ଯୋଗାଯୋଗ ହୋଇପାରିନାହିଁ।
ଟେନସନରେ ଆମେରିକା ! ୩ ବର୍ଷରେ ୫ ପରମାଣୁ ବୈଜ୍ଞାନିକ ମୃତ, ୫ ନିଖୋଜ
ଟେନସନରେ ଆମେରିକା ! ୩ ବର୍ଷରେ ୫ ପରମାଣୁ ବୈଜ୍ଞାନିକ ମୃତ, ୫ ନିଖୋଜ
ନନ୍ଦିଘୋଷ ବ୍ୟୁରୋ: ଆମେରିକା ପରମାଣୁ ପ୍ରୋଗ୍ରାମକୁ ସାରା ଦୁନିଆରେ ସବୁଠାରୁ ସୁରକ୍ଷିତ ବିବେଚନା କରାଯାଏ । କୌଣସି ଦେଶ ଆମେରିକାର ପରମାଣୁ ପ୍ରୋଗ୍ରାମକୁ କୌଣସି ପ୍ରକାର କ୍ଷତି ପହଞ୍ଚାଇବାକୁ ଚିନ୍ତା ବି କରିପାରିବ ନାହିଁ । ହେଲେ ଆମେରିକାର ପରମାଣୁ ବୈଜ୍ଞାନିକଙ୍କ ସୁରକ୍ଷାକୁ ନେଇ ପ୍ରଶ୍ନ ଉଠିବାରେ ଲାଗିଛି । କାରଣ ଗତ ୩ ବର୍ଷରେ ପରମାଣୁ କାର୍ଯ୍ୟକ୍ରମ ଓ ଅନ୍ତରିକ୍ଷ ପ୍ରୋଗ୍ରାମ ସହ ଜଡିତ ୫ ବୈଜ୍ଞାନିକ ସନ୍ଦିଗ୍ଧ ପରିସ୍ଥିତିରେ ନିଖୋଜ ହୋଇଯାଇଥିବା ବେଳେ ୫ ଜଣଙ୍କ ମୃତ୍ୟୁ ଘଟିଛି । ଏହାକୁ ନେଇ ଆମେରିକାରେ ହଙ୍ଗାମା ହେଉଥିବା ବେଳେ ତଦନ୍ତ କମିଟି ଗଠନ କରାଯାଇଛି ।
ସୂଚନାଯୋଗ୍ୟ, ଏହି ୧୦ ବୈଜ୍ଞାନିକ ଆମେରିକାର ସବୁଠାରୁ ସୁରକ୍ଷିତ ବିବେଚନା କରାଯାଉଥିବା ଲ୍ୟାବରେ କାମ କରୁଥିଲେ । ଏଥିରେ ନାସା, ଲସ ଆଲାମୋସ, ଏମଆଇଟି ସାମିଲ ଅଛି । ଏହି ବୈଜ୍ଞାନିକଙ୍କ ମଧ୍ୟରୁ କିଏ ରକେଟ ଧାତୁ, ନ୍ୟୁକ୍ଲିୟର ଫ୍ୟୁଜନ ପରି ସମ୍ବେଦନଶୀଳ ପ୍ରୋଜେକ୍ଟରେ କାମ କରୁଥିଲେ । ନିଖୋଜ କିମ୍ବା ମୃତ ବୈଜ୍ଞାନିକରେ ଗୋଟିଏ ପ୍ରକାର ପାର୍ଟନ ଦେଖିବାକୁ ମିଳିଛି । ୫ଟି ମାମଲାରେ ବୈଜ୍ଞାନିକ ନିଜ ଘରୁ ଯିବା ବେଳେ ଫୋନ, ଚାବି, ପର୍ସ ନନେଇ ଚାଲି ଚାଲି ଯାଇଥିବା ଓ ଆଉ ଫେରି ନଥିବା ଜଣାପଡିଛି ।
ଆମେରିକା ଏୟାରଫୋର୍ସର ଅବସରପ୍ରାପ୍ତ ଜେନେରାଲା ବିଲିୟମ ନୀଲ ମ୍ୟାକକାସଲ୍ୟାଣ୍ଡ ପରମାଣୁ ଫଣ୍ଡିଂ ସହ ଜଡିତ ପ୍ରୋଜେକ୍ଟରେ ସାମିଲ ଥିଲେ । ଚଳିତବର୍ଷ ୨୭ ଫେବୃଆରୀକୁ ସେ ଘରୁ ନିଖୋଜ ହୋଇଯାଇଛନ୍ତି । ନାଶାର ରକେଟ ବୈଜ୍ଞାନିକ ମୋନିକା ରେଗା ଓ ପରମାଣୁ ଅସ୍ତ୍ରଶସ୍ତ୍ରର ଯନ୍ତ୍ରାଶ ନିର୍ମାଣ କରୁଥିବା ଷ୍ଟିବନ ଗାର୍ସିୟା ମଧ୍ୟ ଘରୁ ହଠାତ ନିଖୋଜ ହୋଇଯାଇଛନ୍ତି ।
ଗାର୍ସିୟା ନିଜ ଫୋନ ଓ ପର୍ସ ଘରେ ଛାଡି ଯାଇଥିଲେ । ସେହିପରି ଲସ ଆଲାମୋସ ଲ୍ୟାବର ମେଲିସା କାସିଆସ ମଧ୍ୟ ନିଖୋଜ ହୋଇଗଲେ । ତାଙ୍କ ଫୋନ୍ ଫ୍ୟାକ୍ଟ୍ରିରିସେଟ ମୋଡରୁ ମିଳିଛି । ଆନ୍ଥୋନୀ ଚାଓ୍ବେଜ ମଧ୍ୟ ୨୦୨୫ରୁ ନିଖୋଜ ଅଛନ୍ତି ।
ଏମାନଙ୍କ ବ୍ୟତୀତ କାର୍ଲ ଗ୍ରେଲମେୟର ନାମକ ବୈଜ୍ଞାନିକ ନାସାରେ ଏେ୍ଟ୍ରୋ ଫିଜିସିଷ୍ଟ ଥିଲେ । ତାଙ୍କ ଘରେ ପଶି ଦୃର୍ବୁତ୍ତ ତାଙ୍କୁ ହତ୍ୟା କରିଦେଲେ । ନ୍ୟୁକ୍ଲିୟର ଫ୍ୟୁଜନର ବୈଜ୍ଞାନିକ ନୁନୋ ଲୁରେଇରୋଙ୍କୁ ବି ହତ୍ୟା କରିଦିଆଗଲା । ତାଙ୍କ ଘରକୁ ଅଜ୍ଞାତ ଆକ୍ରମଣକାରୀ ଟାର୍ଗେଟ କରିଥିଲେ ।
ଗତ ବୁଧବାର ସାମ୍ବାଦିକଙ୍କୁ ସୂଚନା ଦେଇ ହ୍ବାଇଟ ହାଉସ ପ୍ରବକ୍ତା କହିଛନ୍ତି, ଆମେ ସୂଚନା ଯୋଗାଡ କରୁଛି । ଏବେ ତଦନ୍ତ ଆରମ୍ଭ ହୋଇଛି । ଏହାକୁ ନେଇ କୌଣସି ସୂଚନା ଆସିଲେ ସମସ୍ତଙ୍କୁ ଅବଗତ କରାଯିବ ।
ମୁକେଶ ଅମ୍ବାନୀଙ୍କୁ ପଛରେ ପକାଇ ଗୌତମ ଆଦାନୀ ହେଲେ ନମ୍ବର ଓ୍ବାନ ଧନୀ
ମୁକେଶ ଅମ୍ବାନୀଙ୍କୁ ପଛରେ ପକାଇ ଗୌତମ ଆଦାନୀ ହେଲେ ନମ୍ବର ଓ୍ବାନ ଧନୀ
ନନ୍ଦିଘୋଷ ବ୍ୟୁରୋ: ଭାରତର ଦୁଇ ଉଦ୍ୟୋଗପତିଙ୍କ ମଧ୍ୟରେ ଏକ ନମ୍ବର ଧନୀ ହେବା ଦୌଡ଼ରେ ବଡ଼ ଓଲଟପାଲଟ ହୋଇଛି । ଗୌତମ ଆଦାନୀ, ମୁକେଶ ଅମ୍ବାନୀଙ୍କୁ ପଛରେ ପକାଇ ପୁଣି ଥରେ ଏସିଆର ଏକ ନମ୍ବର ଧନୀ ହେବାର ଗୌରବ ହାସଲ କରିଛନ୍ତି । ଆଦାନୀ ଗ୍ରୁପର ସେୟାରରେ ଆସିଥିବା ବୃଦ୍ଧି ଯୋଗୁଁ ତାଙ୍କ ଏହି ସଫଳତା ମିଳିଛି ।
ଉଭୟଙ୍କ ସମ୍ପତ୍ତି ମୂଲ୍ୟ କେତେ ?
ତାରା ରାକିଂ ଅନୁସାରେ ଗୌତମ ଆଦାନୀଙ୍କ ସମ୍ପତ୍ତି ୯୨.୬ ବିଲିୟନ ଡଲାରରେ ପହଞ୍ଚି ଯାଇଛି । ସେହିପରି ମୁକେଶ ଅମ୍ବାନୀଙ୍କ ସମ୍ପତି ୯୦.୮ ବିଲିୟନ ଡଲାର ଆକଳନ କରାଯାଇଛି ।
ଷ୍ଟକରୁ ସମ୍ପତ୍ତିର ଦ୍ରୁତ ବୃଦ୍ଧି
କିଛିଦିନ ହେବ ଆଦାନୀ ଗ୍ରୁପ ସେୟାରରେ ଦ୍ରୁତ ବୃଦ୍ଧି ଦେଖିବାକୁ ମିଳିଛି । ବିଶେଷ କରି ପୋର୍ଟ, ଶକ୍ତି ଓ ଇନଫ୍ରାଷ୍ଟ୍ରକଚରରେ କମ୍ପାନୀର ଦୃଢ଼ତା ନିବେଶକଙ୍କ ଭରଷା ଜିତିବାରେ ସକ୍ଷମ ହୋଇଛି । ଏହି କାରଣରୁ ଗ୍ରୁପର ମାର୍କେଟ ଭେଲ୍ୟୁରେ ବିଲିୟ ଡଲାରର ବୃଦ୍ଧି ଘଟିଛି । ଯାହାର ସିଧା ଫାଇଦା ଆଦାନୀଙ୍କ ନେଟଓ୍ବର୍ଥରେ ଦେଖିବାକୁ ମିଳିଛି ।
ଆଦାନୀ ଗ୍ରୁପର ବିସ୍ତାର
ଆଦାନୀ ଗ୍ରୁପ୍ ଦେଶରେ ସବୁଠାରୁ ବଡ଼ ବ୍ୟକ୍ତିଗତ ପୋର୍ଟ ନେଟଓ୍ବର୍କ ଚଲାଉଛି ଏବଂ ନବୀକରଣ ଶକ୍ତି କ୍ଷେତ୍ରରେ ମଧ୍ୟ ଦ୍ରୁତଗତିରେ ବିସ୍ତାର କରୁଛି । ଏହାବାଦ କମ୍ପାନୀ ଏୟାରପୋର୍ଟ ଅପରେସନ ଓ କୋଇଲା ବ୍ୟାପାରରେ ମଧ୍ୟ ମୁଖ୍ୟ ଭୁମିକା ନେଉଛି । ଯାହାଦ୍ବାରା କମ୍ପାନୀକୁ ବେପାରରେ ଦୃଢ଼ତା ମିଳିଛି ।
ଅମ୍ବାନୀଙ୍କ ଗ୍ରୋଥ ସ୍ଥିର
ଅନ୍ୟପକ୍ଷେ ରିଲାଏନ୍ସ ଇଣ୍ଡଷ୍ଟ୍ରୀର ଚେୟାରମ୍ୟାନ ମୁକେଶ ଅମ୍ବାନୀଙ୍କ ସମ୍ପତ୍ତିରେ ବୃଦ୍ଧି ଘଟିଛି । ହେଲେ ଆଦାନୀଙ୍କ ତୁଳନାରେ ଏହା ଧିମା ରହିଛି । ରିଲାଏନ୍ସ ଇଣ୍ଡଷ୍ଟ୍ରୀର ବେପାର ତେଲ, ଗ୍ୟାସ, ଟେଲିକମ୍ ଓ ରିଟେଲ ପରି ଏକାଧିକ କ୍ଷେତ୍ରରେ ବିସ୍ତାର କରିଛି । ହେଲେ ନିକଟ ଅତୀତରେ ଏହାର ଗ୍ରୋଥ କମ ହୋଇଛି ।
ଗ୍ଲୋବାଲ ରାକିଂ
ବ୍ଲୁମବର୍ଗ ଅରବପତି ସୂଚକାଙ୍କ ଅନୁସାରେ, ଗୌତମ ଆଦାନୀ ବର୍ତ୍ତମାନ ଦୁନିଆର ସବୁଠାରୁ ଧନୀ ଲୋକଙ୍କ ସୂଚୀରେ ୧୯ତମ ସ୍ଥାନରେ ରହିଛନ୍ତି ।ଏହି ସୂଚୀର ପ୍ରଥମ ସ୍ଥାନରେ ଏଲନ ମସ୍କ ଅଛନ୍ତି । ତାଙ୍କ ସମ୍ପତ୍ତି ୬୫୬ ବିଲିୟନ ଡଲାର ଆକଳାନ କରାଯାଇଛି ।
ସୂଚନାଯୋଗ୍ୟ, ୨୦୨୨ରେ ଗୌତମ ଆଦାନୀ ପ୍ରଥମ ଥର ଅମ୍ବାନୀଙ୍କୁ ପଛରେ ପକାଇ ଏକ ନମ୍ବର ସ୍ଥାନ ହାସଲ କରିଥିଲେ ।
ଲଳିତ ମୋଦିଙ୍କ ବଡ଼ ଭବିଷ୍ୟବାଣୀ: ୨୦୩୦ରେ ଏହି ଖେଳାଳି ବିକ୍ରି ହେବେ ୧୫୦ କୋଟିରେ
ଲଳିତ ମୋଦିଙ୍କ ବଡ଼ ଭବିଷ୍ୟବାଣୀ: ୨୦୩୦ରେ ଏହି ଖେଳାଳି ବିକ୍ରି ହେବେ ୧୫୦ କୋଟିରେ
ନନ୍ଦିଘୋଷ ବ୍ୟୁରୋ: ଆଇପିଏଲ ଦୁନିଆର ସବୁଠାରୁ ମହଙ୍ଗା ଓ ଲୋକପ୍ରିୟ କ୍ରିକେଟ ଲିଗ୍ । ଏଠାରେ ଖେଳାଳିଙ୍କୁ କ୍ରିକେଟର ଅନ୍ୟ କୌଣସି ଲିଗଠାରୁ ଢେର ଅଧିକ ଟଙ୍କା ମିଳିଥାଏ । ବର୍ତ୍ତମାନ ଲିଗରେ ସବୁଠାରୁ ଦାବି ଖେଳାଳି ଋଷଭ ପନ୍ତ ଅଛନ୍ତି । ଯିଏ ୨୦୨୫ରେ ୨୭ କୋଟି ଟଙ୍କାରେ ବିକ୍ରି ହୋଇଥିଲେ । ସେହିପରି ଶ୍ରୀୟସ ଆୟର ୨୬.୭୫ କୋଟି ଟଙ୍କାରେ ବିକ୍ରି ହୋଇଛନ୍ତି । ସବୁଠାରୁ ଦାମୀ ବିଦେଶୀ ଖେଳାଳି ଭାବେ କେମରାନ ଗ୍ରୀନ ୨୫.୨୦ କୋଟି ଟଙ୍କାରେ ବିକ୍ରି ହୋଇଥିଲେ । ଏହି ଦରମା ଆଇପିଏଲର ଗୋଟିଏ ସିଜନ ପାଇଁ । ହେଲେ ପୂର୍ବତନ ଆଇପିଏଲ ଚେୟାରମ୍ୟାନ ଲଳିତ ମୋଦି ଆଇପିଏଲ ଭବିଷ୍ୟକୁ ନେଇ ଏମିତି ଏକ କଥା କହିଛନ୍ତି ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି । ମୋଦିଙ୍କ ଅନୁସାରେ ଆଗାମୀ ଦିନରେ ଖେଳାଳିଙ୍କୁ ଗୋଟିଏ ସିଜନରେ ୧୫୦ କୋଟି ଟଙ୍କା ବି ମିଳିପାରିବ । ତେବେ ଲଳିତ ମୋଦି କାହାକୁ ନେଇ ଏପରି ଭବିଷ୍ୟବାଣୀକୁ କରିଛନ୍ତି ଆସନ୍ତୁ ଜାଣିବା ।
୨୦୩୦ ଆଇପିଏଲରେ ୧୫୦ କୋଟିରେ ବିକ୍ରି ହେବେ ଖେଳାଳି
ଲଳିତ ମୋଦିଙ୍କ ଅନୁସାରେ ୨୦୩୦ରେ ଆଇପିଏଲରେ ଟପକ୍ଲାସ ଖେଳାଳି ଗୋଟିଏ ସିଜନରେ ୧୫୦ କୋଟି ପର୍ଯ୍ୟନ୍ତ ଦରମା ପାଇପାରିବେ । ମାଇକେଲ ଓ୍ବନଙ୍କ ସହ ଏକ ପୋଡକାଷ୍ଟରେ ଆଲୋଚନା ବେଳେ ଏମିତି ଭବିଷ୍ୟବାଣୀ କରିଛନ୍ତି । ସେ କହିଛନ୍ତି, ୨୦୩୦ରେ ଫ୍ରାନସାଇଜଙ୍କ ପ୍ଲେୟାର ପର୍ସ ୧୦୦ ମିଲିୟନ ଡଲାର ( ପ୍ରାୟ ୯୨୯ କୋଟି ) ପର୍ଯ୍ୟନ୍ତ ପହଞ୍ଚି ପାରେ । ଅର୍ଥାତ ଜଣେ ଟପ୍ ଖେଳାଳି ପ୍ରତି ମ୍ୟାଚରେ ପ୍ରାୟ ୧ ମିଲିୟନ (ପ୍ରାୟ ୯.୩ କୋଟି) ଟଙ୍କା ପାଇପାରିବେ ।
ବିଶେଷକରି ଲଂଲଣ୍ଡର ଯୁବ ଅଲରାଉଣ୍ଡର ଜ୍ୟାକବ ବେଥେଲଙ୍କ ଉଦାହରଣ ଦେଇ ମୋଦି କହିଛନ୍ତି, ବେଥେଲ ୨୦୩୦ ପର୍ଯ୍ୟନ୍ତ ଆଇପିଏଲରେ ପ୍ରତି ସିଜନରେ ୧୬ ମିଲିୟନ (୧୫୦ କୋଟି) ରୋଜଗାର କରିବେ । ମୋଦିଙ୍କ ଏହି ବୟାନ ଏବେ ସୋସିଆଲ ମିଡିଆରେ ଭାଇରାଲ ହେଉଛି ।
ନକଲି ଡାକ୍ତରଙ୍କୁ ମାଡି ବସିଲା ପୋଲିସ
ନନ୍ଦିଘୋଷ ବ୍ୟୁରୋ : ନନ୍ଦିଘୋଷ ବ୍ୟୁରୋ : ନକଲି ଡାକ୍ତରଙ୍କୁ ମାଡି ବସିଲା ପୋଲିସ। ପୋଲିସ ପ୍ଲାନରେ ଫସିଗଲେ ଡାକ୍ତର ଜୟନ୍ତ ବସ୍ତିଆ। ବଡମ୍ବା ଥାନା ଅନ୍ତର୍ଗତ ସୁନାପାଳ ବଜାର ନିକଟରେ ଗର୍ଭପାତ କରାଇବା ବେଳେ ନକଲି ଡାକ୍ତର ଜୟନ୍ତ ବସ୍ତିଆଙ୍କୁ ମାଡି ବସିଲା ବଡମ୍ବା ପୋଲିସ। ରକ୍ତପାତ ଅବସ୍ଥାରେ ଜଣେ ମହିଳା ଉଦ୍ଧାର ହୋଇଛନ୍ତି। ନକଲି ଡାକ୍ତର ଜୟନ୍ତ ବସ୍ତିଆ ସୁନାପାଳ ନିକଟରେ ଖୋଲିଥିଲେ ବେଆଇନି ଗର୍ଭପାତ କ୍ଲିନିକ। ଆଜକୁ ୧୨ ବର୍ଷ ହେବ ଏଠାରେ ଦିନ ରାତ୍ରି ଓ ଭୋରରୁ ଗରାଖ ରେଡି କରି କରୁଥିଲେ ଗର୍ଭ ନଷ୍ଟ। ଏପରିକି ଏକ ମେସିନ ସାହାଯ୍ୟରେ ଏଠାରେ ଭୃଣ ନିରୂପଣ ମଧ୍ୟ କରନ୍ତି । ବଡମ୍ବା ପୋଲିସ ଏସଆଇ ବିଶ୍ୱ ବନ୍ଦିତା ସାହୁ ଗର୍ଭ ନଷ୍ଟ ବାହାନାରେ ଯାଇ ରେଡ଼ କରିଥିଲେ। ବଡମ୍ବା ଥାନା ଅଧିକାରୀ ପରମାନନ୍ଦନାୟକ ଏହି ଘଟଣାର ତଦନ୍ତ କରିବା ସହ ମାମଲା ରୁଜୁ କରିଛନ୍ତି। ବସ୍ତିଆ ଜଣେ ହୋମିଓ ପାଥିକ ଡାକ୍ତର ହୋଇଥିବା ବେଳେ ନିକଟରେ ମେଡିକାଲ ଚଲେଇବା ପାଇଁ ନାହିଁ କୌଣସି ପାଠ୍ୟକ୍ରମ ସାର୍ଟିଫିକେଟ। ବେଆଇନି କ୍ଲିନିକରୁ ଅପରେସନ ପାଇଁ ଆବଶ୍ୟକୀୟ ଯନ୍ତ୍ରପାତି, ଇଂଜେକସନ, ମେଡ଼ିସିନ ଆଦି ଜବତ କରାଯାଇଛି।
ଇରାନ ଯୁଦ୍ଧ: କାହାକୁ କେତେ ଲାଭ, କିଏ କ୍ଷତିରେ ?
ଇରାନ ଯୁଦ୍ଧ: କାହାକୁ କେତେ ଲାଭ, କିଏ କ୍ଷତିରେ ?
ନନ୍ଦିଘୋଷ ବ୍ୟୁରୋ: ଇରାନ ସହ ଯୁଦ୍ଧ କରି ଆମେରିକା ଓ ଇସ୍ରାଏଲ ଫସିଥିବା ବେଳେ ସାରା ବିଶ୍ବ ଉପରେ ଏହାର ପ୍ରଭାବ ଦେଖିବାକୁ ମିଳୁଛି । ହର୍ମୁଜ ପ୍ରଣାଳୀକୁ ବନ୍ଦ କରି ଇରାନ ବିଶ୍ବ ବ୍ୟବସାୟର ତଣ୍ଟି ଚିପି ଦେଇଛି । ଯାହାର ପ୍ରଭାବ ପ୍ରାୟ ସବୁ ଦେଶ ଉପରେ ପଡ଼ିବାରେ ଲାଗିଛି । ଫଳରେ ବହୁ ଦେଶର ଅର୍ଥନୀତି ଦୋହଲି ଯିବା ସ୍ଥିତିକୁ ଚାଲି ଆସିଛି । ହେଲେ ଏପରି ବି କିଛି ଦେଶ ଅଛନ୍ତି, ଯେଉଁମାନଙ୍କ ପାଇଁ ଇରାନ ଯୁଦ୍ଧ ଏକ ଭଲ ସ୍ଥିତି ସୃଷ୍ଟି କରୁଛି । ଆସନ୍ତୁ ଜାଣିବା, ଇରାନ ଯୁଦ୍ଧର ପ୍ରଭାବ କେଉଁ ଦେଶର ଅର୍ଥନୀତି ଉପରେ କେମିତି ପ୍ରଭାବ ପକାଇବାକୁ ଯାଉଛି ।
ଆଇଏମଏଫ ନିଜ ନୂଆ ରିପୋର୍ଟରେ କହିଛି ଇରାନ ଯୁଦ୍ଧ ବିଶ୍ବ ଅର୍ଥନୀତିକୁ ଧିମା କରିଦେଇଛି । ବର୍ଷ ଆରମ୍ଭରେ ଯେଉଁ ଗତି ଦେଖିବାକୁ ମିଳୁଥିଲା ସେଥିରେ ବ୍ରେକ ଲାଗିଛି । ଆଇଏମଏଫ ୨୦୨୬ ପାଇଁ ବୈଶ୍ବିକ ବିକାଶ ୩.୪ ପ୍ରତିଶତରୁ କମାଇ ୩.୧ ପ୍ରତିଶତ କରିଦେଇଛି । ଯଦି ସ୍ଥିତି ଅଧିକ ଖରାପ ହୁଏ ଏହା ୨ ପ୍ରତିଶତ ପର୍ଯ୍ୟନ୍ତ ଖସିବା ସହ ଦରଦାମ ୬ ପ୍ରତିଶତ ପର୍ଯ୍ୟନ୍ତ ବଢ଼ିବାର ଆନୁମାନ କରିଛି ।
ଆଇଏମଏଫ ମୁଖ୍ୟ ଅର୍ଥଶାସ୍ତ୍ରୀ କହିଛନ୍ତି, ଇରାନ ଯୁଦ୍ଧ ବିଶ୍ବ ଅର୍ଥ ବ୍ୟବସ୍ଥା ପାଇଁ ଏକ ଝଟକା । ଏହି କାରଣରୁ ତେଲ ଓ ଅନ୍ୟ ସମାଗ୍ରୀର ଦାମ ବଢ଼ିବା ସହ ଲୋକଙ୍କ ଖର୍ଚ୍ଚ କରିବାର କ୍ଷମତା କମିବାରେ ଲାଗିଛି । ଏବେ ଆସନ୍ତୁ ଜାଣିବା ଇରାନ ଯୁଦ୍ଧ କାହା ପାଇଁ ଲାଭଦାୟକ ସାବ୍ୟସ୍ଥ ହେଉଥିବା ବେଳେ କାହା ପାଇଁ କ୍ଷତିକାରଣ ହେଉଛି ।
ଆମେରିକାରେ ମାନ୍ଦାବସ୍ଥା
ଇରାନ ସହ ଯୁଦ୍ଧ ଆରମ୍ଭ କରି ଆମେରିକାକୁ ଫସାଇ ଦେଇଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଆମେରିକାରେ ପେଟ୍ରୋଲ ଦର ବଢ଼ିବାରେ ଲାଗିଛି । ଅର୍ଥଶାସ୍ତ୍ରୀଙ୍କ କହିବା ଅନୁସାରେ, ଏହାଦ୍ବାରା ସେଠାରେ ମାନ୍ଦାବସ୍ଥା ଆସିବାର ସମ୍ଭାବନା ରହିଛି । ଆଇଏମଏଫ ଅନୁସାରେ, ଆମେରିକା ଅର୍ଥବ୍ୟବସ୍ଥା ୨୦୨୬ରେ ୨.୩ ପ୍ରତିଶତ ବଢ଼ିବ । ଯାହା ପୂର୍ବ ଅନୁମାନରୁ ୦.୧ ପ୍ରତିଶତ କମ ।
ଜି-୭ରେ ବ୍ରିଟେନକୁ ସବୁଠାରୁ ଅଧିକ କ୍ଷତି
ଜି-୭ ଦେଶଙ୍କ ମଧ୍ୟରେ ବ୍ରିଟେନକୁ ସବୁଠାରୁ ଅଧିକ କ୍ଷତି ହେଉଛି । ୨୦୨୬ର ବିକାଶ ଦର ୦.୫ ପ୍ରତିଶତ କମାଇ ୦.୮ କରିଦିଆଯାଇଛି । ତେବେ ୨୦୨୭ରେ ଏହା ୧.୩ ପ୍ରତିଶତ ରହିବା ଅନୁମାନ କରାଯାଉଛି । ସାଉଦୀ ଆରବକୁ ବି ବଡ଼ ଝଟକା ଲାଗିଛି । ୨୦୨୬ରେ ଏହାର ବିକାଶ ଦର ୧.୪ ପ୍ରତିଶତ କମି ୩.୧ ପ୍ରତିଶତ ରହିବା ଅନୁମାନ କରାଯାଉଛି । ତେବେ ୨୦୨୭ରେ କିଛିଟା ସୁଧାର ଆସିବା ସହ ଏହା ୪.୫ ପ୍ରତିଶତରେ ପହଞ୍ଚିବା ଅନୁମାନ କରାଯାଉଛି ।
ଚୀନ-କାନାଡ ଅଭିବୃଦ୍ଧି ହାର କମିଛି
ଚୀନ ଏବଂ କାନାଡର ଅବିବୃଦ୍ଧି ହାର ୦.୧ ପ୍ରତିଶତ କମ ହେବା ଅନୁମାନ କରାଯାଇଛି । ୨୦୨୬ ଓ ୨୦୨୭ ପାଇଁ ଚୀନର ଆର୍ଥିକ ଅଭିବୃଦ୍ଧି ୦.୧ ପ୍ରତିଶତ କମ ରହିବା ଅନୁମାନ କରାଯାଉଛି । ସେହିପରି କାନାଡ଼ାର ବି ସମାନ ସ୍ଥିତି ଅନୁମାନ କରାଯାଇଛି ।
ଭାରତ-ପାକିସ୍ତାନ ଭଲ ସ୍ଥିତିରେ
ତେବେ ଇରାନ ଦେଶ ଭାରତ ଓ ପାକିସ୍ତାନ ପାଇଁ ଏକ ପ୍ରକାର ଲାଭଦାୟକ ସାବ୍ୟସ୍ଥ ହୋଇଛି । ଭାରତର ଆର୍ଥିକ ଅବିବୃଦ୍ଧି ଉଭୟ ୨୦୨୬ ଓ ୨୦୨୭ରେ ୦.୧ ପ୍ରତିଶତ ବୃଦ୍ଧି ହେବା ଅନୁମାନ କରାଯାଇଛି । ୨୦୨୬ ଓ ୨୦୨୭ରେ ଏହା ୬.୫ ପ୍ରତିଶତ ରହିବା ଅନୁମାନ କରାଯାଉଛି । ସେହିପରି ପାକିସ୍ତାନ ପାଇଁ ସବୁଠାରୁ ଅଧିକ ସୁଧାର ଦେଖିବାକୁ ମିଳୁଛି । ୨୦୨୬ରେ ୦.୬ ପ୍ରତିଶତ ଓ ୨୦୨୭ରେ ୦.୬ ପ୍ରତିଶତ ବୃଦ୍ଧି ଅନୁମାନ କରାଯାଉଛି ।
ବ୍ରାଜିଲ-ଋଷ ପାଇଁ ଭଲ ଖବର
ସେହିପରି ଇରାନ ଯୁଦ୍ଧ ଯୋଗୁଁ ଉପୁଜି ଥିବା ସ୍ଥିତିରେ ବ୍ରାଜିଲ ଓ ଋଷ ପାଇଁ ଭଲ ଖବର ରହିଛି । ଯୁଦ୍ଧ ଯୋଗୁଁ ପ୍ରାୟ ସବୁ ରାଷ୍ଟ୍ର ସଙ୍କଟରେ ପଡିଥିବା ବେବଳେ ଉଭୟ ପ୍ରଜିଲ ଓ ଋଷର ଅଭିବୃଦ୍ଧି ୦.୩ ପ୍ରତିଶତ ବଢ଼ିବା ଅନୁମାନ କରାଯାଇଛି । ଏମିତି ସ୍ଥିତିରେ ଆଇଏମଏଫ ଚେତାବନୀ ଦେଇ କହିଛି, ଯଦି ଯୁଦ୍ଧ ଲମ୍ବା ସମୟ ପର୍ଯ୍ୟନ୍ତ ଚାଲିବ କିମ୍ବା ବିସ୍ତାର ହେବ ତେବେ ବିଶ୍ବ ଅର୍ଥବ୍ୟବସ୍ଥା ଆହୁରି ଦୁର୍ବଳ ହେବ । ଏହାବାଦ ଋଣ, ଦେଶ ଦେଶ ମଧ୍ୟରେ ବିବାଦ ଓ ବଜାରରେ ଅନିଶ୍ଚିତତା ବି ସ୍ଥିତିକୁ ବିଗାଡି ପାରେ ।
ଟ୍ରମ୍ପଙ୍କ ଦାବିକୁ ଇରାନର ଖଣ୍ଡନ
ନନ୍ଦିଘୋଷ ବ୍ୟୁରୋ : ଇରାନ ଯୁଦ୍ଧକୁ ନେଇ ଟ୍ରମ୍ପ ଦାବି କରୁଛନ୍ତି ଓ ଟ୍ରମ୍ପଙ୍କ ଦାବିକୁ କିନ୍ତୁ ଇରାନ ଖଣ୍ଡନ କରୁଛି । ଯୁଦ୍ଧ ଆରମ୍ଭରୁ ଏପର୍ଯ୍ୟନ୍ତ ଟ୍ରମ୍ପ ଅନେକ କଥା କହି ସାରିଲେଣି କିନ୍ତୁ ଏହାର ସତ୍ୟତା ଉପରେ ସବୁବେଳେ ପ୍ରଶ୍ନ ଉଠିଛି । ଇରାନ ଯୁଦ୍ଧକୁ ନେଇ ଟ୍ରମ୍ପଙ୍କ ବଡ଼ ଦାବି କରୁଛନ୍ତି । ସେ କହିଛନ୍ତି, ଇରାନ ତାର ୟୁରାନିୟମ ଆମକୁ ଦେବା ପାଇଁ ରାଜି ହୋଇଛି। ଆଲୋଚନା ଚାଲିଛି। ଜଲଦି ଡିଲ୍ ହେବ। ଯୁଦ୍ଧ ବିରତି ଆଉ ବଢ଼ାଇବା ଦରକାର ନାହିଁ । ଏହି ସପ୍ତାହ ଶେଷରେ ପୁଣି ଥରେ ଆଲୋଚନା ହେବ ଓ ଡିଲ୍ ହୋଇପାରେ ବୋଲି କହିଛନ୍ତି ଟ୍ରମ୍ପ। ସେ କହିଛନ୍ତି, ଖୁବ ଶୀଘ୍ର ଆମେ ବିଜୟ ହାସଲ କରିବାକୁ ଯାଉଛୁ। ଇରାନର ଆଉ ନୌସେନା ନାହିଁ। ଆମେ ସେମାନଙ୍କର ୧୫୮ଟି ଜାହାଜ ବୁଡ଼ାଇ ଦେଇଛୁ । ଖୁବ ଶୀଘ୍ର ଡିଲ୍ ହେବ । ଯଦି ଆଲୋଚନା ସଫଳ ହୁଏ, ତେବେ ପାକିସ୍ତାନ ଆସିବେ ବୋଲି ମଧ୍ୟ କହିଛନ୍ତି ଟ୍ରମ୍ପ ।
ଟ୍ରମ୍ପଙ୍କ କଥାକୁ ଖଣ୍ଡନ କରିଛି ଇରାନ। ଇରାନ ପକ୍ଷରୁ କୁହାଯାଇଛି, ଟ୍ରମ୍ପ ଦିବାସ୍ଵପ୍ନ ଦେଖୁଛନ୍ତି। ସେପଟେ ଇସ୍ରାଏଲ ଓ ଲେବାନନ ମଧ୍ୟରେ ଅସ୍ତ୍ରବିରତି। ଉଭୟ ପକ୍ଷ ମଧ୍ୟରେ ଅସ୍ତ୍ରବିରତି ହୋଇଥିବାର ଘୋଷଣା କରିଛନ୍ତି ଆମେରିକାର ରାଷ୍ଟ୍ରପତି ଡୋନାଲଡ ଟ୍ରମ୍ପ। ସେ କହିଛନ୍ତି, ଏହା ହେଉଛି ଐତିହାସିକ। ୱାଶିଂଟନରେ ଲେବାନନ ଓ ଇସ୍ରାଏଲ ମଧ୍ୟରେ ହୋଇଥିଲା ବୈଠକ। ୩୪ ବର୍ଷ ମଧ୍ୟରେ ଏହା ହେଉଛି ପ୍ରଥମ ଇସ୍ରାଏଲ-ଲେବାନନ ବୈଠକ। ଆଜିଠାରୁ ଏହି ଅସ୍ତ୍ରବିରତି ଆରମ୍ଭ ହୋଇଛି। ଏହାକୁ ମିଶାଇ ୧୦ଟି ଯୁଦ୍ଧ ବନ୍ଦ କରିଥିବାର ଦାବି କରିଛନ୍ତି ଟ୍ରମ୍ପ। ଇସ୍ରାଏଲ ଓ ଲେବାନନର ରାଷ୍ଟ୍ରମୁଖ୍ୟଙ୍କ ସହିତ ଆଲୋଚନା କରି ଯୁଦ୍ଧ ବିରତି କରାଇଥିବାର ଟ୍ରମ୍ପ କହିଛନ୍ତି। ଜାତିସଂଘର ମୁଖ୍ୟ ଗୁଣ୍ଟେରସ ମଧ୍ୟ ସ୍ଵାଗତ କରିଛନ୍ତି। ଏହି ଅସ୍ତ୍ରବିରତି ମଧ୍ୟପ୍ରାଚ୍ୟରେ ଶାନ୍ତି ଫେରାଇ ଆଣିବାରେ ସହାୟକ ହେବ ବୋଲି ଜାତିସଂଘର ମୁଖ୍ୟ କହିଛନ୍ତି।
ଅଜ୍ଞାତ ବନ୍ଧୁକଧାରୀ, ପାକିସ୍ତାନରେ ଭୟ
ନନ୍ଦିଘୋଷ ବ୍ୟୁରୋ : ଆପଣ ଫିଲ୍ମ ‘ଧୁରନ୍ଧର’ରେ ଦେଖିଥିବେ ଅଜ୍ଞାତ ବନ୍ଧୁକଧାରୀ ମାନେ ଚୁପ୍ଚାପ୍ ଆସି, ସଠିକ୍ ଟାର୍ଗେଟରେ ଗୁଳିମାଡ଼ କରି ଅଦୃଶ୍ୟ ହୋଇଯାଉଥିଲେ । ଭାରତର ପ୍ରମୁଖ ଶତ୍ରୁମାନଙ୍କୁ ଟାର୍ଗେଟ କରୁଥିଲେ। କିଛି ସମାନ ଘଟଣା ପାକିସ୍ତାନରେ ଘଟିଛି । ଅଜ୍ଞାତ ବନ୍ଧୁକଧାରୀଙ୍କ ଟାର୍ଗେଟରେ ଆତଙ୍କବାଦୀ। ପାକିସ୍ତାନର ଲାହୋରରେ ଲସ୍କର-ଏ- ତୋଇବାର ସହ-ପ୍ରତିଷ୍ଠାତା ସଦସ୍ୟ ଏବଂ ଆତଙ୍କବାଦୀ ଆମିର ହମଜା ଉପରେ ଅଜ୍ଞାତ ବନ୍ଧୁକଧାରୀଙ୍କ ଗୁଳିମାଡ଼ ପରେ ବର୍ତ୍ତମାନ ତା’ ଅବସ୍ଥା ଗୁରୁତର ରହିଛି। । ଏକ ନ୍ୟୁଜ୍ ଚ୍ୟାନେଲ କାର୍ଯ୍ୟାଳୟ ବାହାରେ ଅଜ୍ଞାତ ଆକ୍ରମଣକାରୀମାନେ ତାକୁ ଟାର୍ଗେଟ କରି ଗୁଳିମାଡ଼ କରି ଫେରାର ହୋଇଯାଇଛନ୍ତି। ଆମିର ହମଜାର ଅବସ୍ଥା ବର୍ତ୍ତମାନ ଗୁରୁତର ରହିଛି ଏବଂ ସେ ହସ୍ପିଟାଲରେ ଭର୍ତ୍ତି ହୋଇଛନ୍ତି। ହାଫିଜ ସୟିଦର ଡାହାଣ ହାତ ଭାବେ ପରିଚିତ ଆମିର ହମଜା ଭାରତରେ ହୋଇଥିବା ଅନେକ ବଡ଼ ଆତଙ୍କବାଦୀ ଆକ୍ରମଣରେ ସାମିଲ ରହିଥିଲା । ପାକିସ୍ତାନରେ ପୁଣି ଅଜ୍ଞାତ ଆକ୍ରମଣକାରୀମାନେ ଆତଙ୍କ ସୃଷ୍ଟି କରିଛନ୍ତି। ଏହି ଘଟଣା ଫିଲ୍ମ ‘ଧୁରନ୍ଧର’ ପରି ଲାଗୁଛି — ଚୁପ୍ଚାପ୍ ଆସିବା, ସଠିକ୍ ଟାର୍ଗେଟରେ ଗୁଳିମାଡ଼ କରିବା ଏବଂ ଅଦୃଶ୍ୟ ହୋଇଯିବା। ଏଥର ଅଜ୍ଞାତ ଆକ୍ରମଣକାରୀଙ୍କର ଟାର୍ଗେଟରେ ଥିଲା ଭାରତର ଏକ ପୁରୁଣା ଏବଂ ଭୟଙ୍କର ଶତ୍ରୁ ଆମିର ହମଜା। ଲାହୋରର ରାସ୍ତାରେ ଏକ ନ୍ୟୁଜ୍ ଚ୍ୟାନେଲ ଅଫିସ ବାହାରେ ତାକୁ ଘେରି ଲଗାତାର ଗୁଳିବର୍ଷଣ କରାଯାଇଥିଲା, ଯାହାଫଳରେ ବର୍ତ୍ତମାନ ତା’ ଅବସ୍ଥା ଗୁରୁତର ରହିଛି । ଏହି ଆକ୍ରମଣ ପାକିସ୍ତାନର ସୁରକ୍ଷା ଏଜେନ୍ସି ଗୁଡ଼ିକର ନିଦ ହଜାଇ ଦେଇଛି।
ଆମିର ହମଜା କେବଳ ଏକ ସାଧାରଣ ଆତଙ୍କବାଦୀ ନଥିଲା । । ସେ ହାଫିଜ ସଈଦ ସହିତ ମିଶି ଲସ୍କର-ଏ- ତୋଇବା ସ୍ଥାପନ କରିଥିଲା । ଲସ୍କର-ଏ- ତୋଇବାର ପ୍ରତିଷ୍ଠାତା ସଦସ୍ୟ ଥିଲା। ଆତଙ୍କବାଦୀଙ୍କୁ ପ୍ରସ୍ତୁତ କରିବା ପାଇଁ ସେମାନଙ୍କ ବ୍ରେନ୍ୱାସ୍ କରୁଥିଲା। ୨୦୧୨ ମସିହାରେ ଆମେରିକାର ସରକାର ତାକୁ ବିଶ୍ୱ ଆତଙ୍କବାଦୀ ଭାବେ ଘୋଷଣା କରିଥିଲା ।
ସେ ଲସ୍କର ପାଇଁ ଅର୍ଥ ସଂଗ୍ରହ, ନୂଆ ଯୁବକଙ୍କ ନିଯୁକ୍ତି ଏବଂ ଧରାପଡ଼ିଥିବା ଆତଙ୍କବାଦୀଙ୍କୁ ଛଡ଼ାଇବା ପାଇଁ ଯୋଜନା କରିବାରେ ମଧ୍ୟ ଦକ୍ଷ ଥିଲେ । ୨୦୧୮ରେ ପାକିସ୍ତାନର ଉପରେ ଅନ୍ତର୍ଜାତୀୟ ଚାପ ବଢ଼ିବା ପରେ ଲସ୍କର ଉପରେ କାର୍ଯ୍ୟାନୁଷ୍ଠାନ ହେବା ସମୟରେ ସେ ‘ଜୈଶ-ଏ-ମନକାଫା’ ନାମକ ଏକ ନୂଆ ଶାଖା ତିଆରି କରିଥିଲା , ଯାହାଦ୍ୱାରା କାଶ୍ମୀରରେ ଆତଙ୍କବାଦ ଜାରି ରଖିପାରିବ।
ସେ ଭାରତରେ ହୋଇଥିବା ଅନେକ ଆକ୍ରମଣ ସମେତ ଏକାଧିକ ଆତଙ୍କବାଦୀ କାର୍ଯ୍ୟକଳାପରେ ସମ୍ପୃକ୍ତ ଅଛି। ହାମଜା ଆଫଗାନିସ୍ତାନ ମୁଜାହିଦ୍ଦିନର ଜଣେ ଭେଟେରାନ ସଦସ୍ୟ ଥିଲା । ଆମିର ହମଜା ,ମୌଲାନା ଆମିର ହମଜା ବା ଆବୁ ହମଜା ଭାବେ ମଧ୍ୟ ପରିଚିତ । ୨୦୦୦ ମସିହାର ଆରମ୍ଭରେ ଲସ୍କରର ଭାରତରେ ଆଧାର ସ୍ଥାପନ ଏବଂ ନେଟୱର୍କ ତିଆରି କରିବାର ଦାୟିତ୍ୱ ଆମିର ହମଜା ଉପରେ ଥିଲା । ଡିସେମ୍ବର ୨୮, ୨୦୦୫ରେ ବାଙ୍ଗାଲୋରର ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ସାଇନ୍ସ (IISc) କ୍ୟାମ୍ପସ୍ରେ ଆତଙ୍କବାଦୀ ଆକ୍ରମଣ , ୨୦୦୧ ପାର୍ଲାମେଣ୍ଟ ଉପରେ ଆକ୍ରମଣ, ୨୦୦୫ ଦିଲ୍ଲୀ ବୋମା ବିସ୍ଫୋରଣ,୨୦୦୬ ମୁମ୍ବାଇ ଟ୍ରେନ୍ ବୋମା ବିସ୍ଫୋରଣ, ୨୦୦୮ ମୁମ୍ବାଇ ୨୬/୧୧ ଆକ୍ରମଣ , ୨୦୧୬ ଉରି ଆର୍ମି କ୍ୟାମ୍ପ ଉପରେ ଆକ୍ରମଣ,୨୦୦୬ ନାଗପୁର ରାଷ୍ଟ୍ରୀୟ ସ୍ୱୟଂସେବକ ସଂଘର ମୁଖ୍ୟାଳୟ ଆକ୍ରମଣର ଯୋଜନାରେ ସାମିଲ ଥିଲା ।
ପାକିସ୍ତାନରେ ଗତ କିଛି ବର୍ଷ ଧରି ଲଶ୍କର-ଏ-ତୋୟବା (LeT), ଜୈଶ-ଏ-ମହମ୍ମଦ୍ (JeM) ଏବଂ ଅନ୍ୟାନ୍ୟ ଆତଙ୍କବାଦୀ ସଂଗଠନର ନେତାମାନଙ୍କୁ ଅଜ୍ଞାତ ବନ୍ଦୁକଧାରୀମାନେ ଟାର୍ଗେଟ କରୁଛନ୍ତି । ପରମଜିତ୍ ସିଂହ ପଞ୍ଜୱାର ଖାଲିସ୍ତାନ୍ କମାଣ୍ଡୋ ଫୋର୍ସ (KCF) ମୁଖ୍ୟ, ଶାହିଦ୍ ଲତିଫ୍ ଜୈଶ-ଏ-ମହମ୍ମଦର କମାଣ୍ଡର, ମୁଫ୍ତି କାଇସର ଫାରୁକ୍ — ହାଫିଜ୍ ସଈଦ୍ଙ୍କ ନିକଟତମ ସହଯୋଗୀ,ଆବୁ ସଇଫୁଲ୍ଲା ଖାଲିଦ୍ ଲଶ୍କର-ଏ-ତୋୟବାର କମାଣ୍ଡର,ଆବୁ କାତାଲ୍ ହାଫିଜ୍ ସଈଦ୍ର ନିକଟତମ ସହଯୋଗୀ ,ମୌଲାନା କାଶିଫ୍ ଅଲ୍ଲୀ ଓ କାରୀ ଆବ୍ଦୁ ରହମାନ୍ ହାଫିଜ୍ ସଈଦ୍ଙ୍କ ଆତ୍ମୀୟ , ବିଲାଲ୍ ଆରିଫ୍ ସଲଫି ପ୍ରମୁଖ ଆତଙ୍କବାଦୀଙ୍କୁ ଅଜ୍ଞାତ ବନ୍ଧୁକଧାରୀମାନେ ୨୦୨୪ରୁ ୨୦୨୬ମଧ୍ୟରେ ଟାର୍ଗେଟ କରିଛନ୍ତି ।