ନନ୍ଦିଘୋଷ ବ୍ୟୁରୋ: ICC ଚାମ୍ପିଅନ୍ସ ଟ୍ରଫିରେ ଫାଇନାଲ୍ ଗ୍ରୁପ୍ ମୁକାବିଲା । ଆଜି ଇଣ୍ଡିଆ ନ୍ୟୁଜିଲାଣ୍ଡ ମଧ୍ୟରେ ହେବ ଟକ୍କର । ସେମି ଫାଇନାଲରେ ଉଭୟ ଟିମ୍ ସ୍ଥାନ ପକ୍କା କରିସାରିଛନ୍ତି । ଗ୍ରୁପ ପର୍ଯ୍ୟାୟରେ ଉଭୟଙ୍କ ପ୍ରଦର୍ଶନ ଦମଦାର ରହିଛି। ଦୁବାଇ ଇଣ୍ଟରନ୍ୟାସନାଲ୍ କ୍ରିକେଟ୍ ଷ୍ଟାଡିୟମରେ ଖେଳାଯିବ ମ୍ୟାଚ୍ । ଭାରତୀୟ ସମୟ ୨ଟା ୩୦ରେ ଆରମ୍ଭ ହେବ ଖେଳ । ତେବେ ଭାରତୀୟ ସ୍କ୍ବାର୍ଡରେ କିଛି ପରିବର୍ତ୍ତନ ହୋଇପାରେ । କିୱି ଟିମ ମଧ୍ୟ କିଛି ପରିବର୍ତ୍ତନ ସହ ପଡ଼ିଆକୁ ଓହ୍ଲାଇବା ସମ୍ଭାବନା ରହିଛି । ଉଭୟ ଟିମ୍ ବେଶ ଦମଦାର ପ୍ରଦର୍ଶନ କରିଥିବାରୁ ମନୋବଳ ଦୃଢ଼ ରଖିଛନ୍ତି । ପାକିସ୍ତାନ ଓ ବାଂଲାଦେଶକୁ ହରାଇଛି ନ୍ୟୁଜିଲାଣ୍ଡ । ଭାରତ ମଧ୍ୟ ପାକିସ୍ତାନ ଓ ବାଂଲାଦେଶକୁ ହରାଇଛି।
ଟ୍ରମ୍ପ-ଜେଲେନସ୍କି କଥା କଟାକଟି: କ’ଣ ହେବ ଯୁଦ୍ଧର ସ୍ଥିତି
ଭୁବନେଶ୍ବର: ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ ଓ ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି କଥା କଟାକଟି । ଋଷ-ୟୁକ୍ରେନ ଯୁଦ୍ଧର ଅବସାନ ନେଇ ଦୁଇ ନେତାଙ୍କ ମଧ୍ୟରେ ଆଲୋଚନାକୁ ଗୁରୁତ୍ବ ଦିଆଯାଇଥିବା ବେଳେ ଏହା ଫସର ଫାଟିଛି । କଥାବାର୍ତ୍ତା ବେଳେ ଆମେରିକା ସହ ଖଣିଜ ପଦାର୍ଥ ସଂକ୍ରାନ୍ତ ରାଜିନାମା ସ୍ବାକ୍ଷରିତ ହେବା ଆଶା ଥିଲା । ମାତ୍ର ବୈଠକରେ ଟ୍ରମ୍ପ ଓ ଜେଲେନସ୍କିଙ୍କ ମଧ୍ୟରେ ପାଟିତୁଣ୍ଡ ହେବାରୁ ସବୁ କିଛି ଧୂଳିସାତ ହୋଇଛି । ଏପରିକି ଜେଲେନସ୍କି ଓ ତାଙ୍କ ପ୍ରତିନିଧିଙ୍କୁ ହ୍ବାଇଟ ହାଉସରୁ ବାହାରି ଯିବା ଲାଗି ବି ନିର୍ଦ୍ଦେଶ ଦିଆଯିବାରୁ କୌଣସି ମିଳିତ ଘୋଷଣାନାମା ଜାରି ହୋଇପାରିନାହିଁ ।
ଶାନ୍ତି ପ୍ରତିଷ୍ଠା ଲାଗି ଜେଲେନସ୍କି ଅଙ୍ଗୀକୃତ ନୁହଁନ୍ତି ଏବଂ ସେ ସମ୍ମାନ ଦେଇ ଜାଣନ୍ତି ନାହିଁ ବୋଲି କହିଛନ୍ତି ଟ୍ରମ୍ପ । ଆଲୋଚନା ବେଳେ ଉପରାଷ୍ଟ୍ରପତି ଜେ.ଡି. ଭାନ୍ସ ବି ଉପସ୍ଥିତ ଥିଲେ । ତେବେ ଜେଲେନସ୍କି ଏକ ବିତର୍କ ସୃଷ୍ଟି କରିବାରୁ କଥାବାର୍ତ୍ତାରେ ପୂର୍ଣ୍ଣଚ୍ଛେଦ ପଡ଼ିଥିଲା । ଏପରିକି ଆପଣ ତୃତୀୟ ବିଶ୍ବଯୁଦ୍ଧ ସୃଷ୍ଟି ଲାଗି ଉଦ୍ୟମ କରିବା ସହ ଲକ୍ଷ ଲକ୍ଷ ଲୋକଙ୍କ ଜୀବନ ସହ ଖେଳୁଛନ୍ତି ବୋଲି ଜେଲେନସ୍କିଙ୍କୁ କହିଥିଲେ ଟ୍ରମ୍ପ ।
ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ପ୍ରତି ଦୃଷ୍ଟିଭଙ୍ଗୀ ନେଇ ଟ୍ରମ୍ପଙ୍କୁ ଜେଲେନସ୍କି ପ୍ରଶ୍ନ କରିବା ପରେ ସବୁକିଛି ଓଲଟପାଲଟ ହୋଇଯାଇଥିଲା । କିଛି ଦିନ ତଳେ ଜେଲେନସ୍କିଙ୍କୁ ଏକଛତ୍ରବାଦୀ ବୋଲି ଅଭିହିତ କରିଥିଲେ ଟ୍ରମ୍ପ । ପୁଟିନଙ୍କ ଅସ୍ତ୍ର ବିରତି ଉଲ୍ଲଂଘନ ପ୍ରସଙ୍ଗକୁ ଜେଲେନସ୍କି ଉଠାଇବାରୁ ଟ୍ରମ୍ପ ଉତକ୍ଷିପ୍ତ ହୋଇଯାଇଥିଲେ । ବିଭିନ୍ନ ପ୍ରସଙ୍ଗରେ ଜେଲେନସ୍କିଙ୍କୁ ଭାନ୍ସ ପ୍ରଶ୍ନ କରିବା ପରେ ସେ ଉତ୍ତ୍ୟକ୍ତ ହୋଇଯାଇଥିଲେ । ପରେ ବୈଠକକୁ ଟ୍ରମ୍ପ ବାତିଲ କରିବା ସହ ମିଡିଆକୁ ସମ୍ବୋଧନ କାର୍ଯ୍ୟକ୍ରମକୁ ବାତିଲ କରିଥିଲେ । ତେବେ ବୈଠକରୁ ବାହାରି ଯିବା ପରେ ଆମେରିକାବାସୀଙ୍କୁ ଧନ୍ୟବାଦ ଜଣାଇଥିଲେ ଜେଲେନସ୍କି ।
ସେପଟେ ୟୁକ୍ରେନକୁ ସହାୟତା ଜାରି ରହିବ ବୋଲି କହିଛନ୍ତି ଫ୍ରାନ୍ସ ରାଷ୍ଟ୍ରପତି ଏମାନୁଏଲ ମାକ୍ରନ । ଜେଲେନସ୍କିଙ୍କୁ ବି ସମର୍ଥନ କରିଛନ୍ତି ୟୁରୋପୀୟ କମିଶନ ଅଧ୍ୟକ୍ଷା ଉର୍ସୁଲା ଭନ ଓ ପୋଲାଣ୍ଡ ପ୍ରଧାନମନ୍ତ୍ରୀ ଡୋନାଲ୍ଡ ଟସ୍କ । ସେପଟେ ଜେଲେନସ୍କି କହିଛନ୍ତି, ଯୁଦ୍ଧ ଶେଷ କରିବା ଲାଗି କୌଣସି ପକ୍ଷ ଚାହୁଁନାହାନ୍ତି । କାରଣ ସମସ୍ତ ପକ୍ଷ ଭୟଭୀତ ଅଛନ୍ତି । ଋଷ ପ୍ରତି ୟୁକ୍ରେନର ଥିବା ଦୃଷ୍ଟିଭଙ୍ଗୀକୁ ଗ୍ରହଣ କରିବାକୁ ଟ୍ରମ୍ପ ପ୍ରସ୍ତୁତ ନୁହନ୍ତି ବୋଲି କହିଛନ୍ତି ଜେଲେନସ୍କି । ସେପଟେ ନିଜ ଆଚରଣ ଲାଗି ଜେଲେନସ୍କି ଦୁଃଖ ପ୍ରକାଶ କରିଥିବା ସୂଚନା ମିଳିଛି ।
ସେପଟେ ଟ୍ରମ୍ପଙ୍କ ଏହି ମନୋଭାବକୁ ସମର୍ଥନ କରିଛନ୍ତି ଋଷ ବୈଦେଶିକ ମନ୍ତ୍ରାଳୟ ମୁଖପାତ୍ର ମାରିଆ ଜାଖରୋଭା । ତେଣେ ଜେଲେନସ୍କିଙ୍କୁ ୟୁରୋପୀୟ ରାଷ୍ଟ୍ର ସଂଘର ସଦସ୍ୟ ରାଷ୍ଟ୍ର ସମର୍ଥନ କରିଥିବା ଜଣାଯାଇଛି ।
ବିଜେପିକୁ ନିଗମ ଚିନ୍ତା: ପଦବୀ ଦୁଇ ଶହ, ଆଶାୟୀ ହଜାରେ ଉପରେ
ଭୁବନେଶ୍ବର: ରାଜ୍ୟରେ ବିଜେପି ସରକାର ଗଠନର ୯ ମାସ ପୂରିବାକୁ ବସିଲାଣି। ଚୂଡ଼ାନ୍ତ ହୋଇପାରୁନି ନିଗମ ଓ ବୋର୍ଡ଼ ଅଧ୍ୟକ୍ଷ ତାଲିକା । ଶୀର୍ଷ ନେତୃତ୍ବଙ୍କ ବୈଠକ ବାରମ୍ବାର ବସୁଛି । ରାଷ୍ଟ୍ରୀୟ ଅଧ୍ୟକ୍ଷ ବି ରାଜ୍ୟ ନେତାଙ୍କ ସହ ଆଲୋଚନା କଲେଣି । ହେଲେ ଅଙ୍କ ଛିଡୁନି । ସରକାରୀ ପଦବୀରେ ପ୍ରାୟ ୨ଶହ ନେତାଙ୍କୁ ଥଇଥାନ କରାଯିବାକୁ ଥିବା ବେଳେ ଆଶାୟୀଙ୍କ ସଂଖ୍ୟା ଆଶାତୀତ ଭାବେ ବଢି ଚାଲିଛି । ରାଜ୍ୟ ସଭାପତି ଚୟନ ମଧ୍ୟ ଦଳର ଗୋଷ୍ଠୀ ବିବାଦରେ ଫସିଛି ବୋଲି ଚର୍ଚ୍ଚା ହେଉଛି ।
ଜିଲ୍ଲା ଯୋଜନା କମିଟି, ସ୍ବତନ୍ତ୍ର ଉନ୍ନୟନ ପରିଷଦ, ରାଜ୍ୟ ଯୋଜନା ବୋର୍ଡ଼, ବିଭିନ୍ନ ବିଭାଗରେ ଉପଦେଷ୍ଟା, ନିଗମ ଓ ବୋର୍ଡ଼ ଭଳି ଥଇଥାନ ପଦବୀରେ ଶତାଧିକ ନେତାଙ୍କୁ ନିଯୁକ୍ତି କରିବାକୁ ଦଳ ଯୋଜନା କରୁଛି । ଏଥିପାଇଁ ଏକ୍ସରସାଇଜ ଆରମ୍ଭ ହୋଇଛି । ପରାଜିତ ବିଧାୟକ ପ୍ରାର୍ଥୀ, ବିଧାୟକ, ଛାମୁଆ ନେତା, ପୁରୁଣା କର୍ମକର୍ତ୍ତାଙ୍କୁ ପ୍ରାଥମିକତା ମିଳିବ ବୋଲି ଜଣାପଡ଼ିଛି । ତାଲିକା ଏକ ପ୍ରକାର ଚୂଡ଼ାନ୍ତ ହୋଇଥିବା ବେଳେ ପ୍ରବଳ ଅସନ୍ତୋଷ ଆଶଙ୍କାରେ ଘୋଷଣା ହୋଇପାରୁନି । ଜାତୀୟ ଦଳ ହୋଇଥିବାରୁ ସବୁ କଥାରେ କେନ୍ଦ୍ରୀୟ ନେତୃତ୍ବଙ୍କ ଇସାରାକୁ ଅପେକ୍ଷା କରିବାକୁ ପଡୁଛି ।
ସରକାରରେ ସ୍ଥାଣୁତା, ସଙ୍ଗଠନରେ ଅସ୍ଥିରତା । ବାରମ୍ବାର ଫେଲ୍ ମାରୁଛି ରାଜ୍ୟ ସଭାପତି ଚୟନ ଡେଡଲାଇନ । ରାଷ୍ଟ୍ରୀୟ ଅଧ୍ୟକ୍ଷ-ରାଜ୍ୟ ନେତାଙ୍କ ସହ ବିସ୍ତୃତ ଆଲୋଚନା କରିଥିଲେ ବି ଏହା କେବଳ ଲୋକ ଦେଖାଣିଆ । ଏପରିକି ଆଶାୟୀଙ୍କୁ ଲବି ଓ ଗଣମାଧ୍ୟମରୁ ଦୂରେଇ ରହିବାକୁ ଏକ ପ୍ରକାର ତାଗିଦ କରିଛନ୍ତି ରାଷ୍ଟ୍ରୀୟ ଅଧ୍ୟକ୍ଷ । ନିଜସ୍ବ ସୂତ୍ରରୁ ଇନପୁଟ ସଂଗ୍ରହ କରୁଛି କେନ୍ଦ୍ର ବିଜେପି ନେତା । କେନ୍ଦ୍ରରୁ ଯେଉଁ ତାଲିକା ଚୂଡ଼ାନ୍ତ ହେବ, ତାହା ଘୋଷଣା କରିବାକୁ ରାଜ୍ୟ ବିଜେପି ବାଧ୍ୟ । ବିଜେପି ଅପ୍ରତ୍ୟାଶିତ ବିଜୟ ପରେ ତୃଣମୂଳ ସ୍ତରରେ ପଦପଦବୀ ପାଇଁ ସମସ୍ତଙ୍କ ଆଶା ବଢି ଚାଲିଛି । ପରାଜିତ ବିଧାୟକ ପ୍ରାର୍ଥୀ, ନିର୍ବାଚନରେ ନଲଢି ସଙ୍ଗଠନରେ ଲାଗିଥିବା ନେତା, ନିର୍ବାଚନ ପୂର୍ବରୁ ଦଳରୁ ଦୂରେଇ ଯାଇଥିବା ନେତା, କୋଣଠେସା ହୋଇଥିବା ନେତା, ଆମଦାନୀ ନେତା ମଧ୍ୟରେ ଅଘୋଷିତ ପ୍ରତିଯୋଗିତା ଆରମ୍ଭ ହୋଇଛି । ସାଂସଦ ଓ ବିଧାୟକ ଗୋଷ୍ଠୀଙ୍କ ଛକାପଞ୍ଚା ବି ବିଳମ୍ବର ଆଉ ଏକ କାରଣ ହୋଇଛି ।
ବିଜେପି ଓ ସରକାର ମଧ୍ୟରେ ସମନ୍ବୟ ରଖିବା ଏବେ ନେତୃତ୍ବଙ୍କ ପାଇଁ ଅଗ୍ନି ପରୀକ୍ଷା ସାଜିଛି । ମୁଖ୍ୟମନ୍ତ୍ରୀଙ୍କ ପରେ ରାଜ୍ୟ ସଭାପତି ଦ୍ବିତୀୟ କ୍ଷମତା କେନ୍ଦ୍ର ହେବାକୁ ଯାଉଥିବାରୁ ଏହି ପଦ ଉପରେ ସମସ୍ତଙ୍କ ନଜର ରହିଛି । ଆଗ ନିଗମ ବୋର୍ଡ଼ ଅଧ୍ୟକ୍ଷ ତାଲିକା ନା ରାଜ୍ୟ ସଭାପତି ଘୋଷଣା ତାହାକୁ ନେଇ ଜାରି ରହିଛି ସସପେନ୍ସ ।
ଶିକ୍ଷା ବ୍ୟବସ୍ଥାର ବିଳକ ଚିତ୍ର: ଖାଲି ପଡିଛି ହଜାର ହାଜର ପଦବୀ
ଭୁବନେଶ୍ବର: ପଦାରେ ପଡ଼ିଲା ରାଜ୍ୟ ଶିକ୍ଷା ବ୍ୟବସ୍ଥାର ବିକଳ ଚିତ୍ର । ପ୍ରଧାନଶିକ୍ଷକଠାରୁ ଆରମ୍ଭ କରି ସ୍କୁଲ ଜଗୁଆଳି ଯାଏଁ ଖାଲ ପଡ଼ିଛି ହଜାର ହଜାର ପଦବୀ । ନୂଆ ସରକାର ଦେଇ ପାରି ନାହାନ୍ତି ନିଯୁକ୍ତି । ଶିକ୍ଷକ ମରୁଡ଼ିରେ ଚାଲିଛି ମାଟ୍ରିକ ପରୀକ୍ଷା । ପ୍ରଧାନଶିକ୍ଷକ ନଥିବା ହାଇସ୍କୁଲ ଗୁଡ଼ିକରେ କେମିତି ପରିଚାଳନା ହେଉଥିବ ମାଟ୍ରିକ ପରୀକ୍ଷା, ସେ ନେଇ ଶିକ୍ଷକ ଓ ଅଭିଭାବକ ସଂଘ ପ୍ରଶ୍ନ ଉଠାଇଛନ୍ତି । ହାଇକୋର୍ଟରେ ଝୁଲୁଥିବା ନିଯୁକ୍ତି ମାମଲାରେ ସରକାରଙ୍କ ଅଭିମୁଖ୍ୟ ଏବେ କାଠଗଡ଼ାରେ ଠିଆ ହୋଇଛି । ସେପଟେ ରାଜ୍ୟ ସରକାରଙ୍କ ଚିରାଚରିତ ଉତ୍ତର, ଖୁବ୍ ଶୀଘ୍ର ପୂରଣ ହେବ ଖାଲି ପଦବୀ ।
କେଉଁଠି ହିନ୍ଦୀ ଶିକ୍ଷକ ପଢାଉଛନ୍ତି ଗଣିତ ତ ଆଉ କେଉଁଠି ବିଜ୍ଞାନ ଶିକ୍ଷକ ସାହିତ୍ୟ ପଢାଉଛନ୍ତି । ଏପରି ବିକଳ ସ୍ଥିତି ଦେଇ ଗତି କରୁଛି ରାଜ୍ୟର ଶିକ୍ଷା ବ୍ୟବସ୍ଥା । କାରଣ ମୁରବିବିହୀନ ଭାବେ ଚାଲିଛି ହାଇସ୍କୁଲ । ଖାଲି ପଡ଼ିଛି ହଜାର ହଜାର ପ୍ରଧାନଶିକ୍ଷକ ଓ ସହକାରୀ ଶିକ୍ଷକ ପଦବୀ । ରାଜ୍ୟ ସରକାର ଦେଇ ପାରୁ ନାହାନ୍ତି ନୂଆ ନିଯୁକ୍ତି । ଫେବୃଆରୀ ଏକ ତାରିଖ ଯାଏଁ ମିଳିଥିବା ସରକାରୀ ତଥ୍ୟ ଅନୁସାରେ ରାଜ୍ୟରେ ୨୨୫୦ ପ୍ରଧାନଶିକ୍ଷକ ପଦ ଖାଲି ପଡ଼ିଛି । ଗଜପତି ଜିଲ୍ଲାରେ ସର୍ବାଧିକ ୧୯୯ ପ୍ରଧାନଶିକ୍ଷକ ପଦ ପୂରଣ କରିବାରେ ବିଫଳ ହୋଇଛନ୍ତି ସରକାର । ସେହିପରି କୋରାପୁଟ ଜିଲ୍ଲାରେ ୧୪୨ ଓ ବଲାଙ୍ଗୀରରେ ୧୧୪ ପଦ ଖାଲି ପଡ଼ିଛି । ଆଶ୍ଚର୍ଯ୍ୟର କଥା ହେଉଛି ଦଶମ ବୋର୍ଡ ଅଫିସ ଯେଉଁ କଟକ ଜିଲ୍ଲାରେ ରହିଛି, ସେ ଏହି ତାଲିକାରେ ୧୨୬ ଖାଲି ପଦ ସହ ତୃତୀୟ ସ୍ଥାନରେ ରହିଛି । ଖୋର୍ଦ୍ଧା ଜିଲ୍ଲାରେ ୭୧ ପ୍ରଧାନଶିକ୍ଷକ ପଦ ପୂରଣ ହୋଇ ପାରିନି ।
ସେହିପରି ସାରା ରାଜ୍ୟରେ ୫୧୯୯ ସହକାରୀ ଶିକ୍ଷକ ପଦ ଏଯାଏଁ ଖାଲି ପଡ଼ିଛି । ଏହି ତାଲିକାରେ ୫୮୨ ଖାଲି ପଦ ସହ ଶୀର୍ଷରେ ରହିଛି କଟକ ଜିଲ୍ଲା । ସେପଟେ ଅଣଶିକ୍ଷକ ଭାବେ ୬୧୧ କିରାଣୀ, ୫୦୮୮ ପିଅନ ଓ ୧୫୫୦ ରାତ୍ରୀ ଜଗୁଆଳି ପଦ ଖାଲି ପଡ଼ିଛି । ତାଲିକା ଆହୁରି ଅଧିକ ବଢିପାରେ । କାରଣ କିଛି ଶିକ୍ଷକଙ୍କ ଦେହାନ୍ତ ହେବା ସହ ଫେବୃଆରୀ ଶେଷ ସୁଦ୍ଧା ଅନେକ ଅବସର ନେଇଛନ୍ତି । ଏତେ ଖାଲି ପଦବୀ ସହ କିପରି ଚାଲିଛି ପାଠପଢା ? ପ୍ରଧାନଶିକ୍ଷକ ବିନା କେମିତି ଚାଲିଛି ସ୍କୁଲ ଓ କେମିତି ଚାଲିଛି ପରୀକ୍ଷା କେନ୍ଦ୍ର ? ଏତେ ଅଭାବ ଭିତରେ ଠିକ୍ ଭାବେ ହୋଇ ପାରିବ ତ ମାଟ୍ରିକ ଖାତା ମୂଲ୍ୟାୟନ ? ନୂଆ ସରକାରଙ୍କ ଶିକ୍ଷାର ବିକାଶ ନେଇ କୌଣସି ନିର୍ଦ୍ଦିଷ୍ଟ ଯୋଜନା ନଥିବାରୁ ଏପରି ଅବ୍ୟବସ୍ଥା ଘଟୁଥିବା ଅଭିଯୋଗ କରିଛି ଓଷ୍ଟା । ଏହି ୮ ମାସ ଭିତରେ କେବଳ ପ୍ରଚାର ସର୍ବସ୍ବ ହୋଇ ସରକାର ରହିଯାଇଛି । ଏମିତି ସ୍ଥିତିରେ ଶିକ୍ଷାର ଅଭାବୀ ଦିଗକୁ ଅଣଦେଖା କରାଯାଉଥିବାରୁ ନିଜ ପିଲାମାନଙ୍କ ଭବିଷ୍ୟତକୁ ନେଇ ଚିନ୍ତାରେ ଅଭିଭାବକ ।
ଶୀଘ୍ର ପଦବୀ ପୂରଣ ନେଇ ସରକାର ବାରମ୍ବାର କହୁଛନ୍ତି । ହେଲେ ହାଇକୋର୍ଟରେ ଅଟକି ଥିବା ନିଯୁକ୍ତି ମାମଲାକୁ ରଫାଦଫା କରିବାକୁ ସରକାର କି ଆଭିମୁଖ୍ୟ ନେଉଛନ୍ତି, ତାକୁ ନେଇ ସନ୍ଦେହ ଉପୁଜିଛି । ଶିକ୍ଷକ କ୍ଷେତ୍ରରେ ରାଜ୍ୟ ସରକାର ନୂଆ ନିଯୁକ୍ତି ଦେଇ ନଥିବା ପରିଲକ୍ଷିତ ହୋଇଛି । ଯେଉଁ କନିଷ୍ଠ ଶିକ୍ଷକ ଯୋଜନା ଭିତ୍ତିକ ନିଯୁକ୍ତିକୁ କ୍ୟାବିନେଟ ମୋହର ମାରିଥିଲା, ତାର ସମସ୍ତ ନିଯୁକ୍ତି ପ୍ରକ୍ରିୟା ପୂର୍ବ ନବୀନ ପଟ୍ଟନାୟକ ସରକାର ସାରି ଦେଇଥିଲେ । ଏପରି ସ୍ଥିତିରେ କିଛି ନୂଆ ନକରି ପୁରୁଣାର ଚିତ୍ର ବଦଳାଇଲେ ପରିଚାଳନା ବ୍ୟବସ୍ଥାରେ ସୁଧାର ଆସିବାର ସମ୍ଭାବନା ନାହିଁ । ବେଳ ହୁଁ ନସଜାଡିଲେ ଆଗକୁ ସ୍ଥିତି ଅଣାୟତ୍ତ ହେବା ନିଶ୍ଚିତ ।
ନାରୀଙ୍କ ସୁରକ୍ଷା ଦାବିରେ ମୁଖ୍ୟମନ୍ତ୍ରୀଙ୍କ ବାସଭବନ ଘେରିଲା କଂଗ୍ରେସ
ଭୁବନେଶ୍ବର: ରାଜ୍ୟରେ ବିଜେପି ସରକାରକୁ ଆସିବା ପରେ ବଢ଼ିଛି ନାରୀ ନିର୍ଯାତନା । ମହିଳାମାନଙ୍କୁ ସୁରକ୍ଷା ଯୋଗାଇ ଦେବା ଦାବିରେ ଆଜି ମୁଖ୍ୟମନ୍ତ୍ରୀଙ୍କ ବାସଭବନ ଘେରାଉ କରିଛି କଂଗ୍ରେସ । ଗତ ୮ ମାସରେ ନାରୀ ନିର୍ଯାତନା ବୃଦ୍ଧି ପାଇଛି । ସ୍କୁଲ ହଷ୍ଟେଲରେ ନାବାଳିକା ଛାତ୍ରୀ ପ୍ରସବ କରିବା ଏହାର ପ୍ରମାଣ । ପ୍ରତିବାଦରେ ରାଜରାସ୍ତାକୁ ଓହ୍ଲାଇଛି କଂଗ୍ରେସ । ମୁଖ୍ୟମନ୍ତ୍ରୀଙ୍କ ବାସଭବନ ଘେରାଉ ବେଳେ ପୋଲିସ ଓ କଂଗ୍ରେସ କର୍ମୀଙ୍କ ମଧ୍ୟରେ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଛି । ଦଳ ଦାବି କରିଛି, ମହିଳାଙ୍କୁ ଯଦି ମୋହନ ସରକାର ସୁରକ୍ଷା ଦେଇ ପାରୁ ନାହାନ୍ତି, ତେବେ କ୍ଷମତାରେ ରହିବାର ଅଧିକାର ନାହିଁ, ତୁରନ୍ତ ଗାଦି ଛାଡ଼ନ୍ତୁ ।
ମାଲକାନଗିରି ଚିତ୍ରକୋଣ୍ଡାରେ ଦଶମ ଶ୍ରେଣୀ ଛାତ୍ରୀଙ୍କ ପ୍ରସବ, ଯାଜପୁର ବରୀରେ ବି ଦଶମ ଛାତ୍ରୀ ପିଲା ଜନ୍ମ ଦେବା । ୮ ମାସରେ ୧୬ ଶହ ମହିଳା ବିରୋଧୀ ମାମଲା । ଦିନକୁ ୭ ଜଣ ମହିଳା ଅତ୍ୟାଚାର ଶିକାର । ରାଜ୍ୟରେ ଆଦିବାସୀ ଝିଅମାନେ ଅସୁରକ୍ଷିତ । ବିଜେପି ଶାସନକୁ ଆସିବା ପରେ ନାରୀ ନିର୍ଯାତନା ବୃଦ୍ଧି ପାଇଥିବା ଅଭିଯୋଗ କରି ରାଜଧାନୀର ରାଜରାସ୍ତାରେ ଗର୍ଜିଛି କଂଗ୍ରେସ । ମହିଳାଙ୍କୁ ସୁରକ୍ଷା ଦେଇପାରୁ ନଥିବା ବିଜେପି ସରକାର ଗାଦି ଛାଡ଼ ସ୍ଲୋଗାନ ଦେଇ ଶହ ଶହ କଂଗ୍ରେସ କର୍ମୀ ମୁଖ୍ୟମନ୍ତ୍ରୀଙ୍କ ବାସଭବନ ଘେରାଉ କରିଛନ୍ତି । ଏହି ସମୟରେ କଂଗ୍ରେସ କର୍ମୀ ଓ ପୋଲିସ ମଧ୍ୟରେ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଥିଲା । ବିଜେପି ସରକାର ରାଜ୍ୟର ମହିଳାଙ୍କୁ ସୁରକ୍ଷା ଦେଇପାରି ନଥିବାରୁ କ୍ଷମତାରେ ରହିବାର ଅଧିକାର ସେମାନଙ୍କର ନାହିଁ ବୋଲି କହିଛନ୍ତି କଂଗ୍ରେସ ନେତ୍ରୀ ।
ରାଜ୍ୟରେ ନାରୀ ନିର୍ଯାତନା ବଢି ବଢି ଚାଲିଥିବା ବେଳେ ରାଜ୍ୟ ସରକାର ନୀରବଦଷ୍ଟା ସାଜିଛନ୍ତି । ହଷ୍ଟେଲରେ ରହୁଥିବା ଆଦିବାସୀ ଛାତ୍ରୀମାନେ ଅସୁରକ୍ଷିତ। ପିସିସି ସଭାପତି ଭକ୍ତ ଦାସ କ୍ଷୋଭର ସହିତ କହିଛନ୍ତି, ନାବାଳିକା ଛାତ୍ରୀମାନେ ଗର୍ଭବତୀ ହେବା ଘଟଣାରୁ ଜଣାପଡୁଛି ମହିଳାଙ୍କ ସୁରକ୍ଷା ପ୍ରତି ରାଜ୍ୟ ସରକାର କେତେ ଅଣ ସମ୍ଵେଦନଶୀଳ । ଏହା ବିରୋଧରେ ଆଗକୁ ଜୋରଦାର ଲଢେଇ କରିବ କଂଗ୍ରେସ । ମୁଖ୍ୟମନ୍ତ୍ରୀ ଯଦି ମହିଳାମାନଙ୍କୁ ସୁରକ୍ଷା ଦେଇ ନପାରିବେ, ଆଗକୁ ବାଟଘାଟରେ ଯୁବ ଓ ଛାତ୍ର କଂଗ୍ରେସ ମୁଖ୍ୟମନ୍ତ୍ରୀଙ୍କୁ ବିରୋଧ କରିବେ ବୋଲି ଚେତାବନୀ ଦିଆଯାଇଛି ।
ଭକ୍ତ ଦାସ ପିସିସି ସଭାପତି ହେବା ପରେ ଜୋସରେ ଅଛନ୍ତି କଂଗ୍ରେସ କର୍ମୀ । ସଂଗଠିତ ହୋଇ ପୁଣି ଥରେ କ୍ଷମତା ହାସଲ ଲକ୍ଷ୍ୟରେ ଦଳ ରାଜଧାନୀରେ ଶକ୍ତି ପ୍ରଦର୍ଶନ କରିଛି ।
ରାଜ୍ୟ ସରକାର ଦେଖାଉଛନ୍ତି ଦିବା ସ୍ବପ୍ନ: ୫ ଶହ ବିଲିୟନ ଡଲାର ଲକ୍ଷ୍ୟ କେଉଁ ଆଧାରରେ ହେବ ପୂରଣ ?
ଭୁବନେଶ୍ବର: ଅର୍ଥ ଖର୍ଚ୍ଚ ହୋଇପାରୁନି । ରାଜ୍ୟର ଆୟ କମି କମି ଯାଉଛି । ସେପଟେ ରାଜ୍ୟ ସରକାର କହୁଛନ୍ତି ୨୦୩୬ ବେଳକୁ ରାଜ୍ୟ ଅର୍ଥନୀତି ୫୦୦ ବିଲିୟନ୍ ଡଲାରରେ ପହଞ୍ଚିବ । ସମୀକ୍ଷକଙ୍କ ପ୍ରଶ୍ନ ଯଦି ନାମକୁ ମାତ୍ର ଅଭିବୃଦ୍ଧି ପରିମାଣ ଏବେଠୁ ବାର୍ଷିକ ୧୨.୪୦ ପ୍ରତିଶତ ରହେ । ତା’ହେଲେ ସେତେବେଳକୁ ରାଜ୍ୟ ଅର୍ଥନୀତି ମାତ୍ର ୩୮୫ ବିଲିୟନ୍ ଡଲାର ଛୁଇଁବ । କେଉଁ ଆଧାରରେ କେଉଁ ଆର୍ଥିକ ପରାମର୍ଶରେ ରାଜ୍ୟ ସରକାର ଅଭିବୃଦ୍ଧିର ଏପରି ଗଣିତ କଷିଛନ୍ତି ତାହା କେବଳ ହାସ୍ୟାସ୍ପଦ ବୋଲି ଅର୍ଥନୀତି ବିଶେଷଜ୍ଞ ଅଭିଯୋଗ କରିଛନ୍ତି ।
ଲକ୍ଷ୍ୟ ଛୋଟ ସ୍ବପ୍ନ ବଡ଼ । ଅଭିବୃଦ୍ଧି ନେଇ ମୋହନ ସରକାର ଦେଖାଇଛନ୍ତି ଦିବା ସ୍ବପ୍ନ ! ୨୦୩୬ ବେଳକୁ ରାଜ୍ୟ ଅର୍ଥନୀତ ୫୦୦ ବିଲିୟନ ଡଲାର ବା ୪୩ ଲକ୍ଷ ୫୦ ହଜାର କୋଟି ହେବ । ୨୦୨୫-୨୬ ଆର୍ଥିକ ବର୍ଷରେ ରାଜ୍ୟର ଅଭିବୃଦ୍ଧି ୮ ପ୍ରତିଶତରୁ ୮.୫ ପ୍ରତିଶତ ରହିବ । କେମିତି ଓ କେଉଁ ଆଧାରରେ ଏହି ଲକ୍ଷ୍ୟ ପୂରଣ ହେବ ବୋଲି ସିଧା ପ୍ରଶ୍ନ ଉଠାଇଲେ ଅର୍ଥନୀତି ସମୀକ୍ଷକ ।
ବଜେଟ୍ ଅଧିବେଶନ ଆରମ୍ଭରେ ରାଜ୍ୟପାଳଙ୍କ ମୁହଁରେ ରାଜ୍ୟ ସରକାର ଏପରି କୁହାଇ ଅଡ଼ୁଆ ଭିତରକୁ ପଶିଛନ୍ତି । ଅଭିଯୋଗ ହୋଇଛି, ଏ ସରକାର ମହଙ୍ଗା ବଜାର ବା ମୁଦ୍ରାସ୍ଫୀତିକୁ ଗୁରୁତ୍ବ ଦେଉନାହାନ୍ତି । ଯଦି ବର୍ଷକ ଭିତରେ ମୁଦ୍ରାସ୍ଫୀତି ୪ ପ୍ରତିଶତ ରହେ ତା’ହେଲେ ନୋମିନାଲ ଗ୍ରୋଥ ୧୨.୩୨ ପ୍ରତିଶତ ରହିବ । ୫ ପ୍ରତିଶତ ମୁଦ୍ରାସ୍ଫୀତି ରହିଲେ ଅଭିବୃଦ୍ଧି ହାର ୧୨.୪୦ ପ୍ରତିଶତରେ ପହଞ୍ଚିବ । ସେହିପରି ବାସ୍ତବ ଅଭିବୃଦ୍ଧି ଯଦି ୮.୫ ପ୍ରତିଶତ ରହିଲା, ତା’ହେଲେ ୫ ପ୍ରତିଶତ ମୁଦ୍ରାସ୍ଫୀତି ମିଶିଲେ ନାମକୁ ମାତ୍ର ଅଭିବୃଦ୍ଧି ୧୨.୯୩ ପ୍ରତିଶତ ରହୁଛି । ଏପରି ହିସାବକୁ ନେଲେ ୨୦୩୬ ବେଳକୁ ରାଜ୍ୟ ଅର୍ଥନୀତି ୩୮୫ ବିଲିୟନ୍ ଡଲାରରେ ପହଞ୍ଚୁଛି । ଯେଉଁଠି କି ଛୋଟ ରାଜ୍ୟ ୨୦୨୩-୨୪ରୁ ଓଡ଼ିଶାଠାରୁ କାହିଁ କେତେ ଆଗରେ ଅଭିବୃଦ୍ଧି ଲକ୍ଷ୍ୟ ରଖିସାରିଛନ୍ତି । ତ୍ରିପୁରା ୧୪.୨୧ ପ୍ରତିଶତ ଥିବାବେଳେ, ମେଘାଳୟ ୧୩.୯୮ ପ୍ରତିଶତ ଓ ସିକିମ ୧୪.୬୭ ପ୍ରତିଶତ ଅଭିବୃଦ୍ଧି ଲକ୍ଷ୍ୟ ରଖୁଛନ୍ତି ।
ରାଜ୍ୟ ସରକାର ଆକଳନ ନେଇ କାର୍ପଣ୍ୟ କରୁଥିବା ଆଉ କିଛି ସମୀକ୍ଷକ ଅଭିଯୋଗ କରିଛନ୍ତି । ୨୦୨୪-୨୫ରେ ନାମକୁ ମାତ୍ର ଅଭିବୃଦ୍ଧି ୧୧ ପ୍ରତିଶତ କରିଥିଲେ । କିନ୍ତୁ ହେଲା ୧୦ ପ୍ରତିଶତ । ଚଳିତବର୍ଷ ରାଜ୍ୟ ଅର୍ଥନୀତି ୯ ଲକ୍ଷ ୫୦ ହଜାର କୋଟିରେ ପହଞ୍ଚିବ ବୋଲି ଲକ୍ଷ୍ୟ ରହିଥିଲା । କିନ୍ତୁ ଏହି ଲକ୍ଷ୍ୟ ହାସଲ ହୋଇପାରିନି । ତୃତୀୟ କ୍ବାର୍ଟର ସୁଦ୍ଧା ଯେଉଁଠି ବଜେଟ ଅର୍ଥର ୫୦ ପ୍ରତିଶତ ମାତ୍ର ଖର୍ଚ୍ଚ ହୋଇପାରୁଛି । ଯାହାକୁ ନେଇ ସହୁ ମହଲରେ ସରକାର ସମାଲୋଚିତ ହେଲେ । ଶେଷ ଦୁଇମାସରେ ୮୫ ପ୍ରତିଶତ ଖର୍ଚ୍ଚ କରି ଦେଖାଇବାକୁ ମୁଖ୍ୟମନ୍ତ୍ରୀ ମୋହନ ମାଝୀ ସବୁ ବିଭାଗକୁ ନିର୍ଦ୍ଦେଶ ଦେଉଛନ୍ତି । ଏହା ବାସ୍ତବତାଠାରୁ ବହୁ ଦୂରରେ ବୋଲି ଅର୍ଥନୀତି ବିଶେଷଜ୍ଞ କହିଛନ୍ତି ।
ସେହିପରି ୨୦୨୫-୨୬ ଆର୍ଥିକ ବର୍ଷରେ ରାଜ୍ୟ ୧୦ ଲକ୍ଷ ୬୩ ହଜାର କୋଟିରେ ପହଞ୍ଚିବ ବୋଲି ଆକଳନ କରାଯାଇଛି । ଦିନକୁ ଦିନ ରାଜ୍ୟର ଆୟ କମୁଥିବା ବେଳେ ବ୍ୟୟ ଭାର ବଢି ଚାଲିଛି । କେନ୍ଦ୍ର ସରକାରଙ୍କ ଯୋଜନା କାର୍ଯ୍ୟକାରୀ କରିବାରେ ରାଜ୍ୟକୁ ଅର୍ଥ ଯୋଗାଡ଼ ପାଇଁ ଖୋଲା ବଜାରରୁ ଋଣ କରିବାକୁ ପଡ଼ୁଛି । ଏଭଳି ସ୍ଥିତିରେ ବିକଶିତ ଓଡ଼ିଶା କେବଳ ରାଜ୍ୟବାସୀଙ୍କ ପାଇଁ ଆକାଶ କଇଁଆ ଚିଲିକା ମାଛ ବୋଲି ଚର୍ଚ୍ଚା ହେଉଛି ।
ଇ-କେଓ୍ବାଇସି ଆଳରେ ଗରିବଙ୍କ ରାସନ କାର୍ଡ କାଟିବା ପଡ଼ିବ ମହଙ୍ଗା
ଭୁବନେଶ୍ବର: ଇ-କେଓ୍ବାଇସି ଆଳ ଦେଖାଇ ଗରିବ ଲୋକଙ୍କ ରାସନ କାଟୁଛନ୍ତି ସରକାର । ରାସନରେ ଭୂତ କାର୍ଡ କହି ଲୋକଙ୍କୁ ଭଣ୍ଡାଇବାରେ ଲାଗିଛନ୍ତି ସରକାର । ବାରମ୍ବାର ଲୋକଙ୍କୁ ଭୂତ କାର୍ଡ କଥା ନକହି ଯୋଗ୍ୟ ହିତାଧିକାରୀ କିପରି ରାସନ ପାଇବେ ତାହା ଉପରେ ସରକାର ଗୁରୁତ୍ବ ଦିଅନ୍ତୁ ବୋଲି ବିରୋଧୀ ଦାବି କରିଛନ୍ତି । ସେପଟେ ବିଜେପିର ଯୁକ୍ତି ହେଉଛି ଇ-କେଓ୍ବାଇସିରେ ଭୂତ କାର୍ଡଧାରୀ ଚିହ୍ନଟ ହୋଇଛନ୍ତି । ଇ-କେୱାଇସି ପ୍ରକ୍ରିୟାରେ ସେମାନଙ୍କୁ ବାଦ ଦେଇ ସମସ୍ତ ଯୋଗ୍ୟ ହିତାଧିକାରୀଙ୍କୁ ସାମିଲ କରାଯିବ ।
ଭୂତ ରାସନ କାର୍ଡ ଆଳରେ ହିତାଧିକାରୀଙ୍କୁ ଚାଉଳ ନଦେବା ପାଇଁ ଯୋଜନା କରିଛନ୍ତି ସରକାର । ଇ-କେୱାଇସି ଓ ଭୂତ ନାଁରେ ବହୁତ ଯୋଗ୍ୟ ଲୋକଙ୍କୁ କାଟି ଦେଉଛନ୍ତି ସରକାର । କିଏ ଭୂତ ହିତାଧିକାରୀ ତାଙ୍କ ନାଁ ସରକାର ପ୍ରକାଶ କରନ୍ତୁ । ପଞ୍ଚାୟତ କାର୍ଯ୍ୟାଳୟରେ ତାଲିକା ମାରନ୍ତୁ, ଲୋକ ଜାଣନ୍ତୁ ସେମାନେ କାହିଁକି ଅଯୋଗ୍ୟ ବିବେଚିତ ହେଲେ । ଯେଉଁମାନେ ପ୍ରକୃତରେ ଯୋଗ୍ୟ ସେମାନଙ୍କୁ ରାସନ କାର୍ଡ ମିଳୁ ବୋଲି କଂଗ୍ରେସ ବିଧାୟକ ଅଶୋକ ଦାସ ଦାବି କରିଛନ୍ତି ।
ବିଜେଡି ବିଧାୟକ ଧୃବ ସାହୁ ଅଭିଯୋଗ କରିଛନ୍ତି, ସାଧାରଣ ଲୋକ ଇ-କେୱାଇସି ପ୍ରକ୍ରିୟା ଦ୍ବାରା ବାଦ ପଡିଛନ୍ତି । ପାନ ଦୋକାନୀ, ଚା ଦୋକାନୀଙ୍କ ସହ ବହୁ ଯୋଗ୍ୟ ହିତାଧିକାରୀଙ୍କୁ ସରକାରୀ ରାସନ କାର୍ଡରୁ ବାଦ ଦେଇଛନ୍ତି । ବାରମ୍ବାର ବିଭାଗୀୟ ମନ୍ତ୍ରୀ ଯେଉଁ ତଥ୍ୟ ଦେଉଛନ୍ତି ସେଥିରେ ତାଳମେଳ ରହୁନାହିଁ । ଏସବୁ ସମାଧାନ କରି ନୂଆ ହିତାଧିକାରୀଙ୍କୁ ସାମିଲ କରିବାକୁ ବିଜେଡି ଦାବି କରିଛି । ଗଳାବାଟରେ ଦଳୀୟ ଭିତ୍ତିରେ ଅଯୋଗ୍ୟ ହିତାଧିକାରୀ ସାମିଲ କରିବାକୁ ସରକାର ଏପରି ଯୋଜନା କରୁଛନ୍ତି ବୋଲି ଦୁଇ ବିରୋଧୀ ଅଭିଯୋଗ କରିଛନ୍ତି ।
ନୂଆ ରାସନ କାର୍ଡ ପାଇଁ ଆଜିଠୁ ପୋର୍ଟାଲ ଖୋଲିଥିବା ବେଳେ ରାଜ୍ୟର ତିନି ରାଜନୈତିକ ଦଳ ରାସନ ବିବାଦକୁ ନେଇ ମୁହାମୁହିଁ ହୋଇଛନ୍ତି । ରାସନ କାର୍ଡ କାଟିବାକୁ ନେଇ ଗ୍ରାଉଣ୍ତରେ ଜନ ଅସନ୍ତୋଷ ବୃଦ୍ଧି ପାଇବାରେ ଲାଗିଛି । ଯାହାକୁ ନେଇ ବିଜେଡି ଓ କଂଗ୍ରେସ ରାଜ୍ୟ ସରକାରଙ୍କୁ ସମାଲୋଚନା କରିଛନ୍ତି । ବିଜେପି ବିଧାୟକ ପୂର୍ଣ୍ଣ ସେଠି କହିଛନ୍ତି ପୂର୍ବରୁ ରାସନ କାର୍ଡରେ ଅନେକ ଭୂତ ହିତାଧିକାରୀ ଥିଲେ । ନୂଆ ସରକାରଙ୍କ ଇ-କେୱାଇସି ପ୍ରକ୍ରିୟାରେ ସେମାନଙ୍କୁ ବାଦ ଦେଇ ସମସ୍ତ ଯୋଗ୍ୟ ହିତାଧିକାରୀଙ୍କୁ ସାମିଲ କରାଯିବ ।
ଭୂତ ରାସନ କାର୍ଡ କଥାରେ ବାରମ୍ବାର ଯୋଗାଣ ମନ୍ତ୍ରୀଙ୍କ ବୟାନକୁ ନେଇ ସରକାରଙ୍କୁ ଘେରିଛନ୍ତି ବିରୋଧୀ । ମାର୍ଚ୍ଚ ୩୧ ତାରିଖ ଇ-କେଓ୍ବାଇସିର ଶେଷ ତାରିଖ । ତେଣୁ ଯେମିତି କେହି ଯୋଗ୍ୟ ହିତାଧିକାରୀ ରାସନ କାର୍ଡରୁ ବାଦ ନପଡ଼ିବେ ତାହାକୁ ନେଇ ସରକାରଙ୍କୁ ଚେତାଇ ଦେଇଛନ୍ତି ବିରୋଧୀ ।
ବିଶ୍ବ ଦହିବରା ଦିବସ: ରାଜଧାନୀରେ ବିଶ୍ବର ସବୁଠାରୁ ବଡ଼ ଦହିବରା ପ୍ରସ୍ତୁତ, କଟକ ଦହିବରାକୁ GI ଟ୍ୟାଗ ଦାବି
ଭୁବନେଶ୍ବର: ଆଜି ହେଉଛି ଦହିବରା ଦିବସ । ଏଥିପାଇଁ ଓଡ଼ିଶାର ସବୁଠି ହୋଇଛି ଆୟୋଜନ । ବିଶେଷ କରି କଟକରେ ଏହାର ସ୍ବାଦ ନିଆରା । ଯାହା ଆଜି ବିଶ୍ବ ଦରବାରରେ ଓଡ଼ିଶାକୁ ଏକ ସ୍ବତନ୍ତ୍ର ପରିଚୟ ଦେଇଛି । ତେଣୁ କଟକର ବିଭିନ୍ନ ଦହିବରା ଷ୍ଟଲରେ ଆଜି ବିଶେଷ ଭିଡ଼ ଦେଖିବାକୁ ମିଳିଛି । ସେପଟେ ବିଶ୍ବ ଦହିବରା ଦିବସ ଅବସରରେ ରାଜଧାନୀ ଭୁବନେଶ୍ବରରେ ନିର୍ମାଣ ହୋଇଛି ବିଶ୍ବର ସବୁଠାରୁ ବଡ଼ ଦହିବରା । ଦହିବରା ଏକ୍ସପ୍ରେସ ପକ୍ଷରୁ ୫୦ କିଲୋଗ୍ରାମ ଓଜରର ଦହିବରା ତିଆରି କରାଯାଇଛି । ୧୦ ଜଣ କାରିଗର ମିଶି ୪୦ ଲିଟର ତେଲରେ ଏହାକୁ ଛାଣିଛନ୍ତି ।
ଚଟପଟି ଖାଦ୍ୟ ଭିତରେ ସମସ୍ତଙ୍କ ପସନ୍ଦ ଦହିବରା ଆଳୁଦମ । ଖରାଦିନେ ଦହିବରା ଆଳୁଦମ ସାଙ୍ଗକୁ ଦହିପାଣି ଟିକିଏ ପିଇ ଦେଲେ ମିଳେ ଆତ୍ମତୃପ୍ତି । ଏହାର ଲୋକପ୍ରିୟତାକୁ ଦେଖି ପ୍ରତିବର୍ଷ ମାର୍ଚ୍ଚ ପହିଲାରେ ପାଳନ ହେଉଛି ଦହିବରା ଦିବସ । ତେବେ ସାରା ଓଡ଼ିଶାରେ ଦହିବରା ମିଳୁଥିଲେ ବି କଟକ ଦହିବରାର ସ୍ବାଦ ନିଆରା । ଆଉ ଆଜିର ଦିନରେ କଟକର ବାଉନ ବଜାର ତେପନ ଗଳିରେ ମହକିଛି ଦହିବରା ଆଳୁଦମର ବାସ୍ନା । ବିଭିନ୍ନ ଷ୍ଟଲରେ ଲାଗିଛି ଖାଦ୍ୟ ପ୍ରେମୀଙ୍କ ଭିଡ଼ । ତେବେ କଟକର ଦହିବରା ରାଜ୍ୟ ବାହାରେ ପରିଚିୟ ହାସଲ କରିଥିବାରୁ ଏହାକୁ ଜିଆଇ ଟ୍ୟାଗ ମାନ୍ୟତା ଦେବାକୁ ଦାବି ଉଠିଛି । ତେବେ ବର୍ତ୍ତମାନ ସମୟରେ ଯେଉଁ ଭଳି ଦହିବରା ଲୋକମାନେ ପସନ୍ଦ କରୁଛନ୍ତି ସେହି ଅନୁସାରେ ଦହିବରା ତାଆରି କରାଯାଉଛି ବୋଲି କହିଛନ୍ତି ବ୍ୟବସାୟୀ । ସେପଟେ କଟକର ଦହିବରା ଏକ ଐତିହ୍ୟ ବହନ କରୁଥିବାରୁ ଏହାକୁ ଅଧିକ ପ୍ରୋତ୍ସାହନ ଦେବାକୁ ଯୋଜନା ହାତକୁ ନିଆଯିବ ବୋଲି କହିଛନ୍ତି ଜିଲ୍ଲାପାଳ ।
ସେପଟେ ଭୁବନେଶ୍ବରରେ ତିଆରି ହୋଇଛି ବିଶ୍ବର ସବୁଠାରୁ ବଡ଼ ଦହିବରା । ୫୦ କିଲୋ ଓଜନର ଏହି ଦହିବରାକୁ ତିଆରି କରିଛନ୍ତି ଦହିବରା ଏକ୍ସପ୍ରେସର ୧୦ ଜଣ କାରିଗର । ଯାହାର ମୂଲ୍ୟ ୨୦ ହଜାର ଟଙ୍କା ଥିବାବେଳେ ଏହା ଦୁଇ ଫୁଟ ୩ ଇଞ୍ଚ ଡାଇମିଟର, ଉଚ୍ଚତା ୮ ଇଞ୍ଚ ରହିଛି । ୨୦ କିଲୋଗ୍ରାମ ବିରିରେ ତିଆରି ହୋଇଥିବା ଏହି ବୃହତ୍ତ ବରାକୁ ୪୦ ଲିଟର ତେଲରେ ଛଣାଯାଇଛି । ବିଶ୍ବର ଏହି ବଡ଼ ବରା ଇଣ୍ଟର ନ୍ୟାସନାଲ ବୁକ ଅଫ ରେକର୍ଡରେ ସ୍ଥାନ ପାଇବ ବୋଲି ଆଶା ରଖିଛନ୍ତି ଆୟୋଜକ ।
ଫିକା ପଡ଼ିଲା ସୁଭଦ୍ରା ଶକ୍ତି ମେଳା, ଫେରିଗଲେ ଏସଏଚଜି ମହିଳା
ବଲାଙ୍ଗୀର: ଗତକାଲି ବଲାଙ୍ଗୀରରେ ଆରମ୍ଭ ହୋଇଥିବା ସୁଭଦ୍ରା ଶକ୍ତି ମେଳା ପଡ଼ିଲା ଫିକା । ଆସିଲେନି ଏସଏଚଜି ମହିଳା । ଯିଏ ବି ଆସିଲେ, ଅବ୍ୟବସ୍ଥାକୁ ଦେଖି ସରକାରଙ୍କ ଉପରେ ବର୍ଷିବା ସହ ଫେରିଗଲେ ।
ସୂଚନାଯୋଗ୍ୟ, ବଲାଙ୍ଗୀର କୋଶଳ କଳା ମଣ୍ଡପ ପଡିଆରେ ଗତକାଲି ସୁଭଦ୍ରା ଶକ୍ତି ମେଳାର ଆୟୋଜନ କରାଯାଇଛି । ପୂର୍ବର ବିଜେଡି ସରକାରଙ୍କ ସମୟରେ ଯେପରି ମିଶନଶକ୍ତି ମହିଳା ଓ ମହିଳା ଉଦ୍ୟୋଗୀ ଉତ୍ସାହିତ ହୋଇ ଭାଗ ନେଉଥିଲେ, ସରକାର ବଦଳିବା ପରେ ସେମିତି ଉତ୍ସାହ ଦେଖିବାକୁ ମିଳୁନାହିଁ । ଗତକାଲି ଏହାର ଉଦଘାଟନ ହୋଇଥିବା ବେଳେ ୧୫୦ଟି ଷ୍ଟଲ ନିର୍ମାଣ କରାଯାଇଥିଲା । କିନ୍ତୁ ଅଧିକାଂଶ ଷ୍ଟାଲ ଫାଙ୍କା ପଡ଼ି ଥିବା ଦେଖିବାକୁ ମିଳିଥିଲା । କାମ ଅଧା ସରିଥିବା ବେଳେ ତରବରିଆ ଭାବେ ମେଳା ଉଦଘାଟନ କରାଯାଇଛି । ଅନେକ ଅବ୍ୟବସ୍ଥା ରହିଥିବାରୁ ବାହାରୁ ଆସିଥିବା ସ୍ଵୟଂ ସହାୟକ ଗୋଷ୍ଠୀର ମହିଳାମାନେ ଅସନ୍ତୋଷ ପ୍ରକାଶ କରି ଫେରି ଯାଇଛନ୍ତି I
ସେହିପରି ସୁଭଦ୍ରା କାର୍ଯ୍ୟକ୍ରମ ମଧ୍ୟ ଫିକା ପଡିଥିଲା I ମନ୍ତ୍ରୀ, ସାଂସଦ ଓ ବିଧାୟକ ଅତିଥି ଭାବରେ ଯୋଗ ଦେବାର ଥିଲେ ବି କେହି ଆସି ନଥିଲେ । ଶେଷରେ ବଲାଙ୍ଗୀର ଜିଲ୍ଲାପାଳ ଗୌରବ ଶିବାଜୀ ଇସାଲୱାର ଏହାକୁ ଉଦଘାଟନ କରିଥିଲେ I ଉଦଘାଟନୀ ଉତ୍ସବରେ ହାତଗଣତି କିଛି ମହିଳା ଯୋଗ ଦେଇଥିଲେ । ବହୁ ଚୌକି ଖାଲି ପଡିଥିବା ଦେଖାବାକୁ ମିଳିଥିଲା । ଏହାକୁ ନେଇ ଜିଲ୍ଲାପାଳ ଅସନ୍ତୋଷ ପ୍ରକାଶ କରିବା ସହ ଦାୟିତ୍ଵରେ ଥିବା ଅଧିକାରୀଙ୍କୁ ତାଗିଦ କରିଥିଲେ।
ଶ୍ରୀମନ୍ଦିରରେ ଜେପିଟି କର୍ମଚାରୀ ନିଯୁକ୍ତି ପ୍ରସଙ୍ଗ, ମନ୍ଦିର ପ୍ରଶାସନର ଚିଠିକୁ ନେଇ ତେଜିଲା ଅସନ୍ତୋଷ
ପୁରୀ: ଶ୍ରୀମନ୍ଦିରରେ ଜେଟିପି କର୍ମଚାରୀ ନିୟୋଜନ ନେଇ ମନ୍ଦିର ପ୍ରଶାସନ ପକ୍ଷରୁ ଏକ ଘରୋଇ ସଂସ୍ଥାକୁ ଚିଠି କରାଯାଇଛି । ଏହାକୁ ନେଇ ସେବାୟତଙ୍କ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ମହାପ୍ରମୁଙ୍କ ସେବା ନେଇ ଦୀର୍ଘ ବର୍ଷ ହେବ ଜଗନ୍ନାଥ ଟେମ୍ପଲ ପୋଲିସ ବା ଜେଟିପି ନିୟୋଜିତ ହୋଇ ଆସୁଥିବା ବେଳେ ସେମାନଙ୍କର ନିଯୁକ୍ତି ପୂର୍ବରୁ ଶ୍ରୀମନ୍ଦିର ପ୍ରଶାସନ ନିଜେ କରି ଆସୁଥିଲା ।
ଏବେ ୭୫ଟି ଜେଟିପି ନିଯୁକ୍ତି ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଏକ ଚିଠି କରାଯାଇଛି । ଚିଠିରେ ଭୁବନେଶ୍ଵର ସହିଦନଗରର ଏମ୍/ଏସ୍ ପ୍ରପର୍ଟି ସଲ୍ୟୁସନ ଇଣ୍ଡିଆ ପ୍ରାଇଭେଟ୍ ଲିମିଟେଡକୁ ନିଯୁକ୍ତିରେ ସହଯୋଗ ପାଇଁ ନିବେଦନ କରାଯାଇଛି । ଏହି ଚିଠିର ନମ୍ବର ରହିଛି ୨୬୦୨/୨୭.୦୨.୨୦୨୫ । ଚିଠିରେ ୬୦ଜଣ ପୁରୁଷ ଓ ୧୫ଜଣ ମହିଳାଙ୍କୁ ଜେଟିପି ସ୍କ୍ୱାଡ୍ ଭାବେ ନିଯୁକ୍ତି ଦେବା ପାଇଁ ଦର୍ଶାଯାଇଛି । ଯାହା ବେଆଇନ ବୋଲି ବିଭିନ୍ନ ମହଲରେ ଅଭିଯୋଗ କରାଯାଇଛି ।
ଅନ୍ୟପକ୍ଷରେ ଶ୍ରୀମନ୍ଦିରରେ ସେବାୟତ ପରିବାରର ସଦସ୍ୟଙ୍କୁ ଜେଟିପିରେ ନିଯୁକ୍ତି ପାଇଁ ବରିଷ୍ଠ ସେବାୟତ ଦାବି କରିଛନ୍ତି । ସେପଟେ ଜେଟିପି ନିଯୁକ୍ତିରେ ଘରୋଇ ସଂସ୍ଥାକୁ ଚିଠିକୁ ନେଇ ଦୁର୍ନୀତିର ଗନ୍ଧ ବାରି ହେଉଛି ।