ଭୁବନେଶ୍ବର : ପୋଲାଭରମ ପ୍ରକଳ୍ପ ଓଡ଼ିଶାର ସ୍ବାର୍ଥ ବିରୋଧୀ। ଏହି ପ୍ରକଳ୍ପ ହେଲେ ଆଦିବାସୀ ଭାଇ ଭଉଣୀ ହେବେ କ୍ଷତିଗ୍ରସ୍ତ। ବହୁ ଲୋକ ହରାଇବେ ଭିଟାମାଟି। ପୋଲାଭରମ ପ୍ରକଳ୍ପ ନେଇ ଓଡ଼ିଶାର କଥା କେନ୍ଦ୍ର ଶୁଣୁନାହିଁ ବୋଲି କହିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ। ମାଲକାନଗିରି ମୋଟରେ ମିଳିତ କ୍ରିୟାନୁଷ୍ଠାନ କମିଟି ପକ୍ଷରୁ ଆୟୋଜିତ ସମାବେଶକୁ ଉଦବୋଧନ ଦେଇ ଏକପାଖିଆ ନିଷ୍ପତ୍ତିକୁ କରିଛନ୍ତି କଡା ସମାଲୋଚନା। କାହିଁକି ଏହି ପ୍ରକଳ୍ପ ଲାଗି ୧୮ ହଜାର କୋଟି ଟଙ୍କା ଅନୁଦାନ ଦିଆଗଲା କାହିଁକି ବୋଲି ସେ କରିଛନ୍ତି ପ୍ରଶ୍ନ। ସ୍ଥାନୀୟ ଅଞ୍ଚଳର ସଂଗ୍ରାମୀଙ୍କ ସମେତ ସିଲେରୁ ଓ ସାବେରୀ ନଦୀକୁ ପ୍ରଣାମ ଜଣାଇଥିଲେ ପୂର୍ବତନ ମୁଖ୍ଯମନ୍ତ୍ରୀ। ଓଡ଼ିଶାର ସ୍ବାର୍ଥ ଲାଗି ବିଜେଡି ଲଢେଇ ଜାରି ରଖିବ ବୋଲି ସେ କହିଥିଲେ। ପ୍ରକଳ୍ପ ବିରୋଧରେ ଆଜି ହୋଇଥିଲା ଜନ ସମାବେଶ। ଭିଟାମାଟିର ହକ ଲାଗି ସାମିଲ ହୋଇଥିଲେ ଶହ ଶହ ଲୋକ। ପ୍ରକଳ୍ପ ଯୋଗୁ ମାଲକାନଗିରି ଜିଲ୍ଲାର କାଲିମେଳା, ପଡିଆ, ମାଥିଲି, କୋରକୋଣ୍ଡା ଆଦି ଅଞ୍ଚଳ ବହୁମାତ୍ରାରେ କ୍ଷତିଗ୍ରସ୍ତ ହେବ। ଫଳରେ ପ୍ରକଳ୍ପ ବିରୋଧରେ ସ୍ଥାନୀୟ ଅଞ୍ଚଳରେ ଶୁଭିଥିଲା ପ୍ରତିବାଦର ଗର୍ଜନ। ମୋଟୁ ମୁଗୀ ପଏଣ୍ଟରୁ କଳସ ଓ ପ୍ଲାକାର୍ଡ ଧରି ଶୋଭାଯାତ୍ରା କରିଥିଲେ ମହିଳା। ହକ୍ ପୂରଣ ନ ହେଲେ ଦିଲ୍ଲୀ ଯିବାକୁ ଦେଇଥିଲେ ନାରା। କେବଳ ଓଡ଼ିଶା ନୁହେଁ, ଆନ୍ଧ୍ର ଓ ଛତିଶଗଡ଼ର ବହୁ ସାମାଜିକ ସଂଗଠନ ଓ ଆଦିବାସୀ ସମାଜ ଶୋଭାଯାତ୍ରାରେ ହୋଇଥିଲେ ସାମିଲ।
ପଞ୍ଚଭୂତରେ ବିଲୀନ ହେଲେ ସୁପରଷ୍ଟାର ଉତ୍ତମ ମହାନ୍ତି
ଭୁବନେଶ୍ବର : ପଞ୍ଚଭୂତରେ ଲୀନ ହେଲା ଭର୍ସାଟାଇଲ କଳାକାର ଉତ୍ତମ ମହାନ୍ତିଙ୍କ ମରଶରୀର । ଭୁବନେଶ୍ଵର ସତ୍ୟନଗର ଶ୍ମଶାନରେ ରାଷ୍ଟ୍ରୀୟ ମର୍ଯ୍ୟାଦାରେ ହୋଇଛି ଶେଷକୃତ୍ୟ । ମୁଖାଗ୍ନି ଦେଲେ ପୁଅ ଅଭିନେତା ବାବୁଶାନ ମହାନ୍ତି । ଏହାସହ ବଲିଉଡରେ ଉତ୍ତମ ଯୁଗର ଅବସାନ ଘଟିଛି । ତାଙ୍କ ଦେହାନ୍ତରେ ସାରା ଓଲିଉଡ ଜଗତ ସ୍ତବ୍ଧ ହୋଇଯାଇଛି । ଗତ ୬ ତାରିଖରେ ତାଙ୍କର ସ୍ବାସ୍ଥ୍ଯବସ୍ଥା ବିଗିଡିବାରୁ ତାଙ୍କୁ ଭୁବନେଶ୍ବର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା । ତେବେ ଅବସ୍ଥାରେ ଉନ୍ନତି ନ ଆସିବାରୁ ୮ ତାରିଖରେ ଏୟାର ଆମ୍ବୁଲାନ୍ସ ଯୋଗେ ଦିଲ୍ଲୀ ମେଦାନ୍ତ ହସ୍ପିଟାଲ ସ୍ଥାନାନ୍ତର କରାଯାଇଥିଲା । ଲିଭର ସିରୋସିସ ସହ ନିମୋନିଆ ଯୋଗୁଁ ୨୦ ଦିନ ହସପିଟାଲରେ ମୃତ୍ଯୁ ସହ ସଂଗ୍ରାମ କରିବା ପରେ ଗତକାଲି ରାତିରେ ସେ ଶେଷ ନିଶ୍ବାସ ତ୍ଯାଗ କରିଥିଲେ । ୬୭ ବର୍ଷ ବୟସରେ ଓଲିଉଡରେ ଏହି ସୁପରଷ୍ଟାରଙ୍କ ମୃତ୍ଯୁ ସାରା ଚଳଚ୍ଚିତ୍ର ଜଗତକୁ ଶୋକ ସାଗରରେ ଭସାଇ ଦେଇଛି । ଆଜି ଦିନ ୧୧ଟା ୩୦ରେ ତାଙ୍କ ମୃତ ଶରୀର ଭୁବନେଶ୍ବର ବିମାନ ବନ୍ଦରରେ ପହଞ୍ଚିବା ପରେ ଆମ୍ବୁଲନ୍ସରେ ବରମୁଣ୍ଡା ଜଗନ୍ନାଥ ବିହାର ସ୍ଥିତ ତାଙ୍କ ବାସଭବନକୁ ନିଆଯାଇଥିଲା । ସେଠାରେ ରାଜନେତା ଠାରୁ ଆରମ୍ଭ କରି ଓଲିଉଡ ଜଗତର କଳାକାର ଓ ଶୁଭେଚ୍ଛୁ ଶେଷ ଦର୍ଶନ କରିଥିଲେ । ଏହାପରେ ଏକ ବିଶାଳ ଶୋଭାଯାତ୍ରାରେ ଭୁବନେଶ୍ବର ସତ୍ଯନଗର ଅଭିମୁଖେ ବାହାରିଥିଲା ମର ଶରୀର । ହଜାର ହଜାର ପ୍ରଶଂସକ ଓ ସାଧାରଣ ଜନତା ଓଲିଉଡର ଏହି ସୁପରଷ୍ଟାରଙ୍କୁ ଶେଷ ସମ୍ମାନ ଜଣାଇବାକୁ ରାସ୍ତାର ଦୁଇ ପାର୍ଶ୍ବ ଓ ସତ୍ଯନଗର ଶ୍ମଶାନରେ ଏକାଠି ହୋଇଥିଲେ । ଶେଷରେ ରାଷ୍ଟ୍ରୀୟ ମର୍ଯ୍ଯାଦା ସହ ଶ୍ମଶାନରେ ତାଙ୍କର ଶେଷକୃତ୍ଯ ସମ୍ପନ୍ନ କରାଯାଇଛି । ଉତ୍ତମ ଥିଲେ ଓଲିଉଡରେ ଜୀବନ୍ତ ପାଠଶାଳା । ତାଙ୍କର ମୃତ୍ଯୁ ଓଡ଼ିଆ ଚଳଚ୍ଚିତ୍ର ଜଗତର ଏକ ଦିଗଦର୍ଶକଙ୍କୁ ସବୁଦିନ ପାଇଁ ହରାଇ ଦେଇଛି ବୋଲି କହିଛନ୍ତି କଳାକାର ।
ଓଡ଼ିଆ ଫିଲ୍ମ ଜଗତରେ ଚାଲିଥିଲା ଉତ୍ତମଙ୍କ ରାଜ୍ ,ମୁରବୀ ଶୂନ୍ୟ ହୋଇଗଲା ଓଲିଉଡ୍ ଇଣ୍ଡଷ୍ଟ୍ରୀ
ନନ୍ଦିଘୋଷ ବ୍ୟୁରୋ: ବରିଷ୍ଠ ଅଭିନେତା ଉତ୍ତମ ମହାନ୍ତିଙ୍କ ପରଲୋକ । ୬୭ ବର୍ଷ ବୟସରେ ଉତ୍ତମ ମହାନ୍ତିଙ୍କ ପରଲୋକ ହୋଇଛି । ଦୀର୍ଘ ଦିନ ଧରି ଅସୁସ୍ଥ ହୋଇ ମେଡିକାଲରେ ଚିକିତ୍ସିତ ହେଉଥିଲେ। ମେଦାନ୍ତ ହସପିଟାଲରେ ଚିକିତ୍ସାଧୀନ ଅବସ୍ଥାରେ ପରଲୋକ। ତାଙ୍କ ବିୟୋଗରେ ଓଲିଉଡ ଜଗତରେ ଶୋକର ଛାୟା ଖେଳିଯାଇଛି। ଅଶି ଓ ନବେ ଦଶକରେ ଓଡ଼ିଆ ଫିଲ୍ମ ଜଗତରେ ଚାଲିଥିଲା ଉତ୍ତମ ମହାନ୍ତିଙ୍କ ରାଜୁତି। ସେତେବେଳେ ଯେଉଁ କେତେ ଜଣ ଓଡ଼ିଆ ଫିଲ୍ମ ଜଗତରେ ନାୟକ ଭୂମିକାରେ ଅଭିନୟ କରି ଦର୍ଶକଙ୍କୁ ମୋହିତ କରିଥିଲେ, ସେମାନଙ୍କ ମଧ୍ୟରେ ଥିଲେ ଉତ୍ତମ ମହାନ୍ତି। ସତୁରି ଦଶକର ଶେଷ ଭାଗରେ ଫିଲ୍ମ ଦୁନିଆରେ ପ୍ରବେଶ କରିଥିଲେ ଉତ୍ତମ ମହାନ୍ତି । ତାଙ୍କର ପ୍ରଥମ ଫିଲ୍ମ ଥିଲା ଅଭିମାନ। ଏହା ପରେ ସେ ଆଉ ପଛକୁ ଫେରି ଚାହିଁ ନାହାନ୍ତି। ୧୩୫ରୁ ଅଧିକ ଓଡ଼ିଆ ଫିଲ୍ମ, ୩୦ରୁ ଅଧିକ ବଙ୍ଗଳା ଫିଲ୍ମ ଓ ଗୋଟିଏ ହିନ୍ଦୀ ଫିଲ୍ମରେ ବି ଅଭିନୟ କରିଛନ୍ତି ଉତ୍ତମ ମହାନ୍ତି। ହିନ୍ଦୀ ଫିଲ୍ମଟି ହେଲା ନୟା ଜହର।
ବାରିପଦାରେ ଜନ୍ମ ଗ୍ରହଣ କରିଥିଲେ ଉତ୍ତମ ମହାନ୍ତି। ସେଠାରେ ସେ ଶିକ୍ଷା ସମାପ୍ତ କରିଥିଲେ। କଲେଜ ପଢ଼ିବା ସମୟରେ ହିଁ ଅଭିନୟ ପ୍ରତି ଆକୃଷ୍ଟ ହୋଇ ନାଟକ, ଡ୍ରାମାରେ ଅଭିନୟ କରୁଥିଲେ। ୧୯୭୭ ମସିହାରେ ସାଧୁ ମେହେରଙ୍କ ଅଭିମାନ ଚଳଚ୍ଚିତ୍ରରେ ଅଭିନୟ କରିବାର ସୁଯୋଗ ପାଇଥିଲେ ଉତ୍ତମ ମହାନ୍ତି। ତା ପରେ ସେ ଆଉ ପଛକୁ ଫେରି ଚାହିଁ ନାହାନ୍ତି।
ଅଭିମାନ ପରେ ପରେ ଗୌରୀ ଚଳଚ୍ଚିତ୍ର ପାଇଁ ତାଙ୍କୁ ଅଫର୍ ମିଳିଥିଲା। ତେବେ ପରବର୍ତ୍ତୀ ସମୟରେ କୌଣସି କାରଣରୁ ସେହି ଚଳଚ୍ଚିତ୍ରରେ ପ୍ରଶାନ୍ତ ନନ୍ଦ ଅଭିନୟ କରିଥିଲେ। କିନ୍ତୁ ତା ପରେ ଉତ୍ତମଙ୍କ ପଛରେ ଲାଗି ଯାଇଥିଲା ଓଡ଼ିଆ ଫିଲ୍ମ ଲମ୍ବା ଧାଡ଼ି।
୧୯୭୮ ମସିହାରେ କବି ସମ୍ରାଟ ଉପେନ୍ଦ୍ର ଭଞ୍ଜ, ପତିପତ୍ନୀ, ଶଙ୍ଖ ମହୁରି, ସରପଞ୍ଚ ଭଳି ଫିଲ୍ମରେ ଅଭିନୟ କରିଥିଲେ। ୧୯୭୯ ମସିହାରେ ଚିହ୍ନା ଅଚିହ୍ନା, ନିଝୁମ୍ ରାତିର ସାଥୀ ଭଳି ସୁପର୍ ହିଟ୍ ଫିଲ୍ମ ଭେଟି ଦେଇଥିଲେ ଉତ୍ତମ । ୧୯୮୦ ମସିହାରେ ରାମାୟଣ ଫିଲ୍ମ ବେଶ୍ ଆଦୃତି ଲାଭ କରିଥିଲା। ପରେ ପରେ ରାମ ବଳରାମ, ଅକ୍ଷୟ ତୃତୀୟା, ଆରତୀ, ଦେବଯାନୀ ଭଳି ଫିଲ୍ମ ୧୯୮୧ ମସିହାର ବେଶ୍ ଚହଳ ସୃଷ୍ଟି କରିଥିଲା। ୧୯୮୨ ମସିହାରେ ଫୁଲଚନ୍ଦନ, ଅସ୍ତରାଗ, ଦେଖ୍ ଖବର୍ ରଖ ନଜର, ଜ୍ଵାଇଁ ପୁଅ, ୧୯୮୩ ମସିହାରେ ଅଭିଳାଷ, ଝିଅଟି ସୀତା ପରି, ରାମ ରହିମ୍ ହିଟ୍ ହୋଇଥିଲା। ୧୯୮୪ ମସିହାରେ ତାଙ୍କ ଅଭିନୀତ ଜାଇଫୁଲ, ଜନନୀ, ୧୯୮୫ ମସିହାରେ ଚକା ଭଉଁରି, ଜଗା ହାତରେ ପଘା, ମମତା ମାଗେ ମୂଲ, ପଳାତକ, ସମୟ ବଡ଼ ବଳବାନ୍, ଶଙ୍ଖା ସିନ୍ଦୁର ଯେମିତି ଚହଳ ପକାଇଥିଲା, ୧୯୮୬ ମସିହାରେ ସହରୀ ବାଘ, ସତ କେବେ ଲୁଚି ରହେନା, ସ୍କୁଲ ମାଷ୍ଟର, ଏଇ ଆମ ସଂସାର, ଜୋର୍ ଯାର ମୁଲକ ତାର୍, ପକା କମ୍ଵଳ ପୋତ ଛତା ବେଶ ଆଦୃତ ହୋଇଥିଲା। ୧୯୮୭ ମସିହାରେ ସୁନା ଚଢ଼େଇ, ତୁଣ୍ଡ ବାଇଦ, ବଧୁ ନିରୁପମା, ଚକା ଆଖି ସବୁ ଦେଖୁଛି, ଏଇ ତ ଦୁନିଆ, ଗୋଲାମଗିରି, ଅନ୍ୟାୟ ସହିବି ନାହିଁ, ମିଛ ମାୟାର ସଂସାର ମଧ୍ୟ ଦର୍ଶକଙ୍କ ମନକୁ ଛୁଇଁଥିଲା। ୧୯୮୮ ମସିହାରେ ଥିଲି ଝିଅ ହେଲି ବୋହୂ, ଯାହାକୁ ରଖିବେ ଅନନ୍ତ, ବଡ଼ ଭାଉଜ, କନ୍ଯାଦାନ, ପାପ ପୁଣ୍ୟ, ପୁଅ ମୋର କଳା ଠାକୁର, ଚକା ଡୋଳା କରୁଛି ଲୀଳା ଦର୍ଶକଙ୍କ ମଧ୍ୟରେ ଆଦୃତ ହୋଇଥିଲା। ୧୯୮୯ ରେ ଦଇବ ଦଉଡ଼ି, ହସ ଲୁହ ଭରା ଦୁନିଆ, ରଜନୀଗନ୍ଧା, ନ୍ୟାୟ ଅନ୍ୟାୟ, ପରଦେଶୀ ଚଢ଼େଇ ଓ ଠାକୁରେ ଅଛନ୍ତି ଚଉବାହାକୁ ଉତ୍ତମ ମହାନ୍ତିଙ୍କ ଅଭିନୟର ଶ୍ରେଷ୍ଠ ସମୟ କରିଲେ ଭୁଲ ହେବ ନାହିଁ। ୧୯୯୦ ମସିହାରେ ମୁକ୍ତି ଲାଭ କରିଥିବା ଟୋପାଏ ସିନ୍ଦୁର ଦୁଇ ଟୋପା ଲୁହ, ଶାସ୍ତି, ଯା ଦେବୀ ସର୍ବ ଭୁତେଷୁ, ଗୋପ ବଢୁଛି କଳା କହ୍ନେଇ, ରାଜାରାଣୀ, କଣ୍ଢେଇ, ପଞ୍ଚୁ ପାଣ୍ଡବ, ନୂଆ ଭାଉଜ ଓ ବିଧିର ବିଧାନ ଦର୍ଶକ ମହଲରେ ବେଶ ଚହଳ ପକାଇଥିଲା।
୧୯୯୧ ମସିହାରେ ସେ ହିନ୍ଦୀ ଚଳଚ୍ଚିତ୍ର ନୟା ଜହରରେ ଅଭିନୟ କରିଥିଲେ। ପରେ ପରେ ମୁକ୍ତିଲାଭ କରିଥିଲା ଓଡ଼ିଆ ଚଳଚ୍ଚିତ୍ର ଆମ ଘର ଆମ ସଂସାର, ମୁକ୍ତି ତୀର୍ଥ, ବସ୍ତ୍ର ହରଣ, ଅକୁହା କଥା, କପାଳ ଲିଖନ, ତୋ ବିନୁ ଅନ୍ୟ ଗତି ନାହିଁ ପରି ଫିଲ୍ମ ଆସିଥିଲା। ଏମିତି ବର୍ଷ ପରେ ବର୍ଷ ବିତିଛି। ଉତ୍ତମ ମହାନ୍ତି ଭେଟି ଦେଇଛନ୍ତି ଫିଲ୍ମ ପରେ ଫିଲ୍ମ। ପାଖାପାଖି ୧୩୦ ଓଡ଼ିଆ ଫିଲ୍ମ, ୩୦ରୁ ଅଧିକ ବଙ୍ଗାଳି ଫିଲ୍ମ ଓ ଗୋଟିଏ ହିନ୍ଦୀ ଫିଲ୍ମ ତାଙ୍କ ଗୋଟିଏ ଗୋଟିଏ ଅମ୍ଳାନ କୃତୀ। ଅଶି ଓ ନବେ ଦଶକରେ ସେ ପାଲଟିଥିଲେ ଓଡ଼ିଆ ଫିଲ୍ମ ଜଗତର ଅପ୍ରତିନ୍ଦ୍ଵନ୍ଦ୍ଵୀ ରୋମାଣ୍ଟିକ୍ ହିରୋ। ସବୁ ପ୍ରକାର ଭୂମିକାରେ ସେ ନିଜ ଅଭିନୟର ପରାକାଷ୍ଠା ପ୍ରଦର୍ଶନ କରିଛନ୍ତି।
ରୋମାଣ୍ଟିକ ହେଉ କି ଗାଁର ସରଳ ଯୁବକ ସବୁ ଭୂମିକାରେ ସେ ନିଖୁଣ ଅଭିନୟ କରିଛନ୍ତି। ଏଥିପାଇଁ ସେ ଅନେକ ପୁରସ୍କାର ଓ ସମ୍ମାନ ପାଇଛନ୍ତି ଉତ୍ତମ ମହାନ୍ତି। ନବେ ଦଶକର ଶେଷ ଆଡ଼କୁ ଓ ତା ପରେ ସେ ଚରିତ୍ର ଭୂମିକାରେ ଅଭିନୟ କରିଛନ୍ତି। ଉତ୍ତମ ମହାନ୍ତି ଅଭିନୟ କରିଥିବା କେତେକ ସିରିଏଲ୍ ହେଲା ଯେ ପକ୍ଷୀ ଉଡ଼େ ଯେତେ ଦୂର, ସାରା ଆକାଶ, ପଣତକାନି, ଉତ୍ତରଦାୟୀ ଇତ୍ୟାଦି। ଅଭିନେତ୍ରୀ ଅପରାଜିତା ମହାନ୍ତିଙ୍କୁ ସେ ବାହା ହୋଇଥିଲେ। ଉଭୟଙ୍କ ପୁଅ ବାବୁସାନ୍ ବି ଏବେ ଓଲିଉଡ୍ ର ଆଗ ଧାଡ଼ିର ନେତା।
ଅଭିନୟ ସାରି ଅଫେରା ରାଜ୍ୟକୁ ଫେରିଗଲେ ‘ପଳାତକ’
ଭୁବନେଶ୍ବର : ବର୍ଷିଆନ ଅଭିନେତା ତଥା ୧୯୮୦ ଦଶକରେ ୱାନ୍ ମ୍ୟାନ୍ ଇଣ୍ଡଷ୍ଟ୍ରି ଭାବେ ପରିଚିତ ଉତ୍ତମ ମହାନ୍ତିଙ୍କର ଦିଲ୍ଲୀର ଏକ ଘରୋଇ ହସ୍ପିଟାଲରେ ପରଲୋକ ହୋଇଯାଇଛି । ମୃତ୍ୟୁ ବେଳକୁ ତାଙ୍କୁ ୬୭ ବର୍ଷ ହୋଇଥିଲା । ୨୩ ଡିସେମ୍ବର ୧୯୫୮ ମସିହାରେ ବାରିପଦାରେ ଜନ୍ମିତ ଉତ୍ତମ ମହାନ୍ତି ଦୀର୍ଘ ୪ ଦଶକରୁ ଉର୍ଦ୍ଧ୍ୱ ସମୟ ଧରି ଓଡିଆ ସିନେମା ଜଗତରେ ସକ୍ରୀୟ ଥିଲେ ।
ଚାର୍ଟାଡ୍ ଆକାଉଣ୍ଟାଣ୍ଟରୁ ଷ୍ଟାର
ବାରିପଦାର ଏମ.କେ.ସି ହାଇସ୍କୁଲରୁ ସ୍କୁଲ ଶିକ୍ଷା ସମାପ୍ତି ପରେ ଉତ୍ତମ ମହାନ୍ତି ମହାରାଜା ପୂର୍ଣ୍ଣଚନ୍ଦ୍ର କଲେଜରୁ ବିଜ୍ଞାନରେ ଇଣ୍ଟରମେଡିଏଟ୍ ପାସ୍ କରିଥିଲେ । ଏହାପରେ ସେ ପଂଜାବର ଲୁଧିଆନରେ ଚାର୍ଟାଡ୍ ଆକାଉଣ୍ଟାନ୍ସି ପଢ଼ିବାକୁ ଚାଲିଯାଇଥିଲେ । ସେଠାରୁ ଫେରିବା ପରେ ସେ ନିଜ ବଡ଼ ଭାଇଙ୍କ ସହ କୋଲକତାରେ କିଛି ଦିନ ରହିଥିଲେ । ଏହି ସମୟରେ ସେ ସେଠାର ଗୋଟିଏ ଚାର୍ଟାଡ୍ ଆକାଉଣ୍ଟିଂ ଫାର୍ମରେ କିଛି ଦିନ କାର୍ଯ୍ୟ କରିଥିଲେ । କୋଲକତାରେ ଥିବା ବେଳେ ବାରିପଦାରୁ ‘ଅଭିମାନ’ ନାମକ ଫିଲ୍ ତିଆରି ହେଉଥିବା ଖବର ପାଇ ସେ ନିଜ ଗୃହ ନଗରକୁ ଭାଗ୍ୟ ପରୀକ୍ଷା ପାଇଁ ଫେରିଥିଲେ ।
ପ୍ରଥମ ଫିଲ୍ମ ‘ଅଭିମାନ’
ଅଭିମାନର ନିର୍ଦ୍ଦେଶକ ସାଧୁ ମେହର ଅନେକଙ୍କ ମଧ୍ୟରୁ ଉତ୍ତମଙ୍କୁ ଅଭିମାନରେ ମୁଖ୍ୟ ଭୂମିକା ପାଇଁ ଚୟନ କରିଥିଲେ । ପ୍ରଥମ ଦିନର ସୁଟିଂ ପାଇଁ ଉତ୍ତମ ସଜବାଜ ହୋଇ ସେଟ୍ କୁ ଯାଇଥିଲେ । କିନ୍ତୁ ସାଧୁ ମେହେର ତାଙ୍କୁ ପୁଣି ମେକଅପ୍ ନେବାକୁ କହିଥିଲେ । ଉତ୍ତମଙ୍କୁ ଜଣେ ଗରିବ ବ୍ୟକ୍ତିର ଗେଟଅପ୍ ନେବାକୁ କୁହାଯାଇଥିଲା । ଫିଲ୍ମ ରିଲିଜ୍ ହେବା ପରେ ହିଟ୍ ସାବ୍ୟସ୍ତ ହୋଇଥିଲା । ଏହାପରେ ଉତ୍ତମ ଆଉ ପଛକୁ ଫେରି ଚାହିଁନଥିଲେ ।
୧୩୫ ଓଡ଼ିଆ ଫିଲ୍ମ,୩୦ ବଂଗଳା ଓ ଗୋଟିଏ ହିନ୍ଦି ଫିଲ୍ମ
ଉତ୍ତମ ମହାନ୍ତି ନିଜର ୪ ଦଶକରୁ ଅଧିକ କ୍ୟାରିୟରରେ ୧୩୫ ଓଡ଼ିଆ ଫିଲ୍ମରେ ଅଭିନୟ କରିଥିଲେ । ସେ ମଧ୍ୟ ୩୦ ଟି ବଂଗଳା ସିନେମାରେ ମୁଖ୍ୟ ଭୂମିକାରେ ଅଭିନୟ କରିଥିଲେ । ନୟା ଜହର ନାମକ ହିନ୍ଦି ଫିଲ୍ମରେ ସେ ଶତାବ୍ଦୀ ରାୟଙ୍କ ବିରୋଧରେ ନଜର ଆସିଥିଲେ ।
ଉତ୍ତମ ମାନେ ସୁପରହିଟର ଗ୍ୟାରେଣ୍ଟି
୧୯୮୦ରୁ ୧୯୯୦ର ମଧ୍ୟ ଭାଗ ପର୍ଯ୍ୟନ୍ତ ଓଡ଼ିଆ ବକ୍ସ ଅଫିସରେ ଉତ୍ତମ ମହାନ୍ତିଙ୍କ ରାଜ୍ ଥିଲା । ଯେଉଁ ସମୟରେ ଓଡ଼ିଆ ଫିଲ୍ମ ବ୍ୟବସାୟିକ ଭାବେ ଅସଫଳ ହେଉଥିଲା,ସେହି ସମୟରେ ଉତ୍ତମ ଏକ ରକମ ଓଡ଼ିଆ ସିନେମାର ସାହରା ଭାବେ ଉଭା ହୋଇଥିଲେ । ଅନେକ ପ୍ରଯୋଜକ,ନିର୍ଦ୍ଦେଶକ ତାଙ୍କୁ ୱାନ୍ ମ୍ୟାନ୍ ଇଣ୍ଡଷ୍ଟ୍ରୀ ବୋଲି ମଧ୍ୟ କହୁଥିଲେ । ୧୯୯୫ ପରେ ସେ ଚରିତ୍ର ଅଭିନେତା କାର୍ଯ୍ୟ କରିବା ଆରମ୍ଭ କରିଥିଲେ । ଏହାପରେ ସେ କିଛି ଟେଲି ସିରିୟଲରେ ମଧ୍ୟ ଅଭିନୟ କରିଥିଲେ । କଥା କହୁଥିଲେ ସରିବନି,ପଣତକାନୀ ଓ ସାରା ଆକାଶ ଭଳି ସିରିଏଲ ମାଧ୍ୟମରେ ସେ ତାଙ୍କ ଅଭିନୟର ଦ୍ୱିତୀୟ ପାଳି ଆରମ୍ଭ କରିଥିଲେ ।
ପାରିବାରିକ ଜୀବନ
୧୯୮୭ ମସିହାରେ ଅଭିନେତ୍ରୀ ଅପରାଜିତାଙ୍କୁ ସେ ବିବାହ କରିଥିଲେ । ଅଭିନେତା ବାବୁ ସାନ୍ ହେଉଛନ୍ତି ଉତ୍ତମଙ୍କ ପୁଅ । ଅପରାଜିତାଙ୍କ ସହିତ ଉତ୍ତମ ୫୦ରୁ ଅଧିକ ଫିଲ୍ମରେ ଅଭିନୟ କରିଥିଲେ ।
ଡିଜିଟାଲ ଆରେଷ୍ଟ କହି ବ୍ରହ୍ମପୁର ବିଶ୍ବବିଦ୍ୟାଳୟର କୁଳପତିଙ୍କ ପାଖରୁ ୧୪ ଲକ୍ଷ ଠକେଇ
ବ୍ରହ୍ମପୁର: ଡିଜିଟାଲ ଆରେଷ୍ଟ କହି ୧୪ ଲକ୍ଷ ଟଙ୍କାର ଠକେଇ । ସାଇବର ଠକାମୀର ଶିକାର ହେଲେ ବ୍ରହ୍ମପୁର ବିଶ୍ବବିଦ୍ୟାଳୟର କୁଳପତି ପ୍ରଫେସର ଗୀତାଞ୍ଜଳି ଦାଶ । ଏନେଇ କୁଳପତି ସାଇବର ଥାନାରେ ଲିଖିତ ଅଭିଯୋଗ ଦେବା ପରେ ତଦନ୍ତ ଆରମ୍ଭ ।
ଗତ ୭ ଦିନ ପୂର୍ବରୁ ଜଣେ ଦୁର୍ବୃତ୍ତ ନିଜକୁ ଇଡ଼ି ଅଫିସର କହି ଫୋନ କରିଥିଲେ । କୁଳପତିଙ୍କ ନାମରେ ଇଡ଼ିରେ ମାମଲା ରହିଥିବା ନେଇ ଜଣାଇବା ସହିତ କାନାରା ବ୍ୟାଙ୍କରେ ରହିଥିବା ଆକାଉଣ୍ଟରେ ବେଆଇନ ଭାବେ କୋଟି କୋଟି ଟଙ୍କା ଜମା ହୋଇଥିବା କହିଥିଲେ । ଆଉ ସେ ଇଡ଼ି ଦ୍ବାରା ଡିଜିଟାଲ ଆରେଷ୍ଟ ହୋଇଛନ୍ତି ବୋଲି ଦୁର୍ବୃତ୍ତ ଜଣକ କହିଥିଲେ । ମାମଲାର ରଫାଦଫା ନେଇ ୧୪ ଲକ୍ଷ ଟଙ୍କା ମାଗିବା ପରେ କୁଳପତି ଦୁର୍ବୃତ୍ତଙ୍କ ଆକାଉଣ୍ଟକୁ ୧୪ ଲକ୍ଷ ଟଙ୍କା ପଠାଇଛନ୍ତି । ଏହାପରେ କୁଳପତି ସାଇବର ଅପରାଧର ଶିକାରର ହେବା ନେଇ ଜାଣିବା ପରେ ସାଇବର ଥାନାରେ ଅଭିଯୋଗ କରିଛନ୍ତି ।
ସେପଟେ ଜଣେ ଉଚ୍ଚଶିକ୍ଷିତା ଓ ଏତେ ବଡ଼ ବିଶ୍ବବିଦ୍ୟାଳୟର କୁଳପତି ଏଭଳି ସାଇବର ଠକାମିର ଶିକାର ହେବା ଯେତିକି ଆଶ୍ଚର୍ଯ୍ୟଜନକ ସେତିକି ସନ୍ଧେହଜନକ । ସେ ଛାତ୍ରଛାତ୍ରୀଙ୍କୁ ସଚେତନତା ରହିବା ନିମନ୍ତେ ଶିକ୍ଷା ପ୍ରଦାନ କରୁଥିବା ବେଳେ ବର୍ତ୍ତମାନ ନିଜେ ଠକେଇର ଶିକାର ହୋଇଛନ୍ତି । କୁଳପତି ନିଜେ ଚେକରେ ଦୁର୍ବୃତ୍ତଙ୍କ ଆକାଉଣ୍ଟ ନମ୍ବର ଓ ନାଁ ସହିତ ବ୍ୟାଙ୍କରେ ଜମା କରିଛନ୍ତି । ତେଣୁ ଏହା ସାଇବର ଠକେଇ କି ନୁହଁ ତାହା ସନ୍ଦେହ ସୃଷ୍ଟି କରିଛି । କୌଣସି କାରଣକୁ ନେଇ କୁଳପତି ଦୁର୍ବୃତ୍ତଙ୍କୁ ଟଙ୍କା ଦେଇଥାଇପାରନ୍ତି ବୋଲି ସନ୍ଦେହ କରାଯାଇଛି । ଯଦି କୁଳପତି ଏଭଳି ଅଭିଯୋଗ କରୁଛନ୍ତି ତେବେ ତାହାର ପ୍ରମାଣ ମଧ୍ୟ ଦେଖାଇବାର ଆବଶ୍ୟକତା ରହିଛି । କାରଣ ଦୁର୍ବୃତ୍ତଙ୍କୁ ଧରିବା ପୋଲିସ ପାଇଁ କଷ୍ଟକର ହୋଇଥିବା ବେଳେ କେବଳ କୁଳପତିଙ୍କ ଅଭିଯୋଗକୁ ନେଇ ତଦନ୍ତ ସୁଫଳ ଦେଲା ଭଳି ଲାଗୁ ନଥିବା କହିଛନ୍ତି ବ୍ରହ୍ମପୁର ବିଶ୍ବବିଦ୍ୟାଳୟର ପୂର୍ବତନ କୁଳପତି ।
ସେପଟେ ଜଣେ କୁଳପତି କେଉଁ ଭୟରେ ଅଜଣା ଲୋକଙ୍କୁ ୧୪ ଲକ୍ଷ ଟଙ୍କା ପ୍ରଦାନ କରିଛନ୍ତି ? କେଉଁ ବିଷୟକୁ ନେଇ ଦୁର୍ବୃତ୍ତ ଭୟଭୀତ କରିଥିଲା ? ସମ୍ପୃକ୍ତ ବିଷୟରେ କୁଳପତିଙ୍କ ଭୂମିକା କ’ଣ ? ତାହାର ମଧ୍ୟ ପୁଙ୍ଖାନୁପୁଙ୍ଖ ଭାବେ ତଦନ୍ତ କରିବାର ଆବଶ୍ୟକତା ରହିଛି ବୋଲି କହିଛନ୍ତି ଆଇନଜୀବୀ ଓ ସାମାଜିକ କର୍ମୀ । ସେପଟେ ଆପଣଙ୍କୁ ଯଦି ଅଜଣା ନମ୍ବରରୁ କଲ୍ ଆସୁଛି ତେବେ ନିଜର ବ୍ୟକ୍ତିଗତ ତଥ୍ୟ ଦିଅନ୍ତୁ ନାହିଁ କି କଥା ହୁଅନ୍ତୁ ନାହିଁ । ଏହାପରେ ୧୯୩୦ ଅଥବା ୧୧୨କୁ କଲ କରି ନିଜର ଅଭିଯୋଗ ଜଣାନ୍ତୁ ବୋଲି ସଚେତନ କରିଛନ୍ତି ବ୍ରହ୍ମପୁର ଏସପି ।
ନବରଙ୍ଗପୁର ବିଜେପି ଦୁଇଫାଳ: ସାଂସଦ ଓ ବିଧାୟକ ପ୍ରତିନିଧି ହାତାହାତି
ଚନ୍ଦାହାଣ୍ଡି: ସାଂସଦ ପ୍ରତିନିଧି ଓ ବିଧାୟକ ପ୍ରତିନିଧି ହାତାହାତି । ଥାନାକୁ ଗଲା କଥା । ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକ କାର୍ଯ୍ୟାଳୟ ଆଗରେ ନବରଙ୍ଗପୁର ବିଜେପି ସାଂସଦ ବଳଭଦ୍ର ମାଝୀଙ୍କ ପ୍ରତିନିଧି ତଥା ସାଂସଦଙ୍କ ନିଜ ଭାଇ ଏବଂ ଝରିଗାଁ ବିଧାୟକ ବିଜେପି ନରସିଂହ ଭତ୍ରାଙ୍କ ପ୍ରତିନିଧି ପ୍ରତାପ ବାଘ ହାତାହାତି ଓ ମାର ପିଟ ହୋଇଛନ୍ତି । ଉଭୟ ପକ୍ଷକୁ ପୋଲିସର ପଚରା ଉଚରା କରିଛି ।
ଆଜି ଚନ୍ଦାହାଣ୍ଡି ବ୍ଲକ କାର୍ଯ୍ୟାଳୟରେ ସମିତି ବୈଠକ ଅନୁଷ୍ଠିତ ହୋଇଥିଲା । ବୈଠକ ସରିବା ପରେ ବିଧାୟକଙ୍କ ପ୍ରତିନିଧି ପ୍ରତାପ ବାଘ ବ୍ଲକରୁ ଫେରିବା ସମୟରେ ସାଂସଦଙ୍କ ଭାଇ ତଥା ତାଙ୍କ ପ୍ରତିନିଧି ବସନ୍ତ ମାଝୀ ବ୍ଲକ କାର୍ଯ୍ୟାଳୟ ଫାଟକ ସାମ୍ନାରେ ପ୍ରତାପଙ୍କ ଗାଡ଼ିକୁ ଅଟକାଇଥିଲେ । ପରେ ପ୍ରତାପଙ୍କୁ ଏକ ମୁଥ ମାରିଥିଲେ । ଏହାକୁ ନେଇ ଉଭୟଙ୍କ ମଧ୍ୟରେ ହାତା ହାତି ଆରମ୍ଭ ହୋଇଯାଇଥିଲା l ଉଭୟଙ୍କ ସମର୍ଥନକଙ୍କ ମଧ୍ୟରେ ଗଣ୍ଡଗୋଳ ବି ଆରମ୍ଭ ହୋଇଯାଇଥିଲା । ଖବର ପାଇ ଚନ୍ଦାହାଣ୍ଡି ଥାନା ଏଏସଆଇ ଲାବଣ୍ଯ ବେମାଲ ଓ ଏସଆଇ ଖଗେଶ୍ବର ଖୋସଲା ଘଟଣା ସ୍ଥଳରେ ପହଞ୍ଚିଥିଲେ । ଘଟଣା ସମ୍ପର୍କରେ ପଚରା ଉଚରା ପାଇଁ ଥାନାକୁ ଡକାଇଥିଲେ । ବର୍ତ୍ତମାନ ସୁଦ୍ଧା ଗଣ୍ଡଗୋଳର କାରଣ ସ୍ପଷ୍ଟ ହୋଇ ନଥିବା ବେଳେ ଏହା ଦଳୀୟ ଅନ୍ତର୍ଦ୍ଵନ୍ଦ୍ବ କିମ୍ବା ଠିକା କାମ ବଣ୍ଟନ ପାଇଁ ହୋଇପାରିଥାଏ ବୋଲି ସନ୍ଦେହ କରାଯାଉଛି ।
ତିନି ଠାକୁରଙ୍କ ପାଟ ସେବାୟତଙ୍କ ପରଲୋକ
ପୁରୀ: ଆଉ ନାହାନ୍ତି ତିନି ଠାକୁରଙ୍କ ପାଟ ସେବାୟତ । ମହାପ୍ରଭୁ ଜଗନ୍ନାଥ, ବଳଭଦ୍ର ଏବଂ ଦେବୀ ସୁଭଦ୍ରାଙ୍କ ପାଟବସ୍ତ୍ର ପାଇଁ ଦୀର୍ଘ ବର୍ଷ ଧରି ସୂତା ବୁଣିଥିବା ଖୋର୍ଦ୍ଧା ରାଉତପଡ଼ା ଗ୍ରାମର ଆସେଲି ଦାସ ଆଉ ନାହାନ୍ତି । ୯୭ ବର୍ଷ ବୟସରେ ତାଙ୍କର ପରଲୋକ ଘଟିଛି । କିଛିଦିନ ଧରି ସେ ଅସୁସ୍ଥ ଥିଲେ।
ଜୀବନର ଶେଷ ସମୟ ପର୍ଯ୍ୟନ୍ତ ଜଗନ୍ନାଥଙ୍କ ବସ୍ତ୍ର ପ୍ରସ୍ତୁତି ସେବାରେ ନିଜକୁ ସମର୍ପିତ କରିଥିଲେ । ପ୍ରତିବର୍ଷ ରଥଯାତ୍ରା ଆସିଲେ ନିଷ୍ଠା ସହକାରେ ଶ୍ରୀପଞ୍ଚମୀ ଦିନଠାରୁ ସୂତା ବୁଣା ଆରମ୍ଭ କରନ୍ତି । ନିଜ ହାତରେ ସୂତା ବୁଣି ବୁଣାକାରଙ୍କୁ ଦିଅନ୍ତି । ସେଇ ସୂତାରେ ମହାପ୍ରଭୁଙ୍କ ପାଟବସ୍ତ୍ର ପ୍ରସ୍ତୁତ ହୋଇଥାଏ । ବୃଦ୍ଧା ବୁଣାକାର ଆସେଲି ଜଗନ୍ନାଥଙ୍କ ଛଡା ଆଉ କାହା ପାଇଁ ସୂତା ବୁଣି ନଥାନ୍ତି । ନବ କଳେବର ସମୟରେ ମଧ୍ୟ ଆସେଲିଙ୍କ ହାତରେ ବୁଣା ସୂତାରେ ପାଟବସ୍ତ୍ର ପ୍ରସ୍ତୁତ ହୋଇଥିଲା । ଆସେଲିଙ୍କ ପୁଅ ଗୋପୀନାଥ ଦାସଙ୍କ ସମେତ ଆହୁରି ୨୪ ବୁଣାକାର ପରିବାର ମହାପ୍ରଭୁଙ୍କ ପାଟବସ୍ତ୍ର ବୁଣି ଆସୁଛନ୍ତି । ତେବେ ସେ କେବଳ ଜଗନ୍ନାଥଙ୍କ ପାଇଁ ସୂତା ବୁଣିବେ ବୋଲି କିଛି ଦିନ ତଳେ ନନ୍ଦିଘୋଷ ଟିଭି ତରଫରୁ କରାଯାଇଥିବା ସାକ୍ଷାତକାରରେ କହିଥିଲେ ।
ମାଟ୍ରିକ ପରୀକ୍ଷା: ୫ ଛାତ୍ରଙ୍କୁ କପି କରୁଥିବା ବେଳେ ଧରିଲା AI କ୍ୟାମେରା
କଟକ: ମାଟ୍ରିକ ପରୀକ୍ଷାର ତୃତୀୟ ଦିନରେ କପି ଧରିଲା AI କ୍ୟାମେରା । ଗଣିତ ପରୀକ୍ଷାରେ ସାରା ରାଜ୍ୟରେ କପି କରି ୫ ଜଣ ପରୀକ୍ଷାର୍ଥୀ ଏଆଇ କ୍ୟାମେରାରେ ଧରାପଡ଼ିଛନ୍ତି । କପି କରି ଧରା ପଡିଥିବା ଏହି ପରୀକ୍ଷାର୍ଥୀଙ୍କୁ ଏମପିରେ ବୁକ କରିଛି ବୋର୍ଡ ।
୩ ହଜାର ୧୩୩ଟି ପରୀକ୍ଷା କେନ୍ଦ୍ରରେ ଲାଗିଥିବା ୬ ଶହ ଏଆଇ କ୍ୟାମେରାରୁ ୫ ଜଣ ପରୀକ୍ଷାର୍ଥୀ କପି କରୁଥିବା ବେଳେ ଧରାପଡିଛନ୍ତି । ଗଣିତ ପରୀକ୍ଷା ପାଇଁ ଅଧିକ ୧୫ ମିନିଟ ସମୟ ଦିଆଯାଇଥିଲା । ଅର୍ଥାତ ସକାଳ ୯ ଟାରୁ ୧୧ ଟା ୪୫ ପର୍ଯ୍ୟନ୍ତ ଗଣିତ ପରୀକ୍ଷା ଦେଇଥିଲେ ପରୀକ୍ଷାର୍ଥୀ । ସେପଟେ ତୃତୀୟ ଦିନରେ ଶାନ୍ତି ଶୃଙ୍ଖଳାରେ ପରୀକ୍ଷା ଶେଷ ହୋଇଛି । କପି କରି ଧରାପଡିଥିବା ପରୀକ୍ଷାର୍ଥୀଙ୍କ ପାଖରୁ କିଛି ଆପତ୍ତିଜନକ ଜିନିଷ ଥିବା AI କ୍ୟାମେରାରୁ ଜଣାପଡିବା ପରେ ଚେକିଂ କରାଯାଇ କପି ଧରାଯାଇଥିଲା । ଲାଇଭ ଷ୍ଟ୍ରିମିଙ୍ଗ ବେଳେ ଏହି ଫୁଟେଜ ସାମ୍ନାକୁ ଆସିଛି । ଧରାପଡ଼ିଥିବା ଛାତ୍ର ବାକି ବିଷୟ ଗୁଡିକରେ ପରୀକ୍ଷା ଦେଇପାରିବେ । ବୋର୍ଡ ରେଗୁଲେସନ୍ କମିଟି ପରବର୍ତ୍ତୀ ସମୟରେ ଆକ୍ସନ ନେଇ ନିଷ୍ପତ୍ତି ନେବ ବୋଲି କହିଛନ୍ତି ବୋର୍ଡ ଉପସଭାପତି । ଆସନ୍ତା ଶନିବାର ବିଦ୍ୟାର୍ଥୀ ଦେବେ ବିଜ୍ଞାନ ପରୀକ୍ଷା ।
ରାଜ୍ୟରେ ଅସୁରକ୍ଷିତ ମହିଳା: ୮ ମାସରେ ୧୬ ଶହରୁ ଅଧିକ ଅତ୍ୟାଚାରର ଶିକାର
ଭୁବନେଶ୍ବର: ରାଜ୍ୟରେ ସୁରକ୍ଷିତ ନାହାନ୍ତି ମହିଳା । ୮ ମାସରେ ୧୬ ଶହ ମହିଳାଙ୍କ ଉପରେ ହୋଇଛ ଅତ୍ୟାଚାର । ବିପର୍ଯ୍ୟସ୍ତ ହୋଇଛି ଆଇନଶୃଙ୍ଖଳl । ଏହାକୁ ନେଇ ସରକାରଙ୍କୁ ଘେରିଛନ୍ତି ବିରୋଧୀ । ନାରୀ ନିର୍ଯାତନା ପ୍ରସଙ୍ଗରେ କଂଗ୍ରେସ ଅନୁଧ୍ୟାନ କମିଟି ଗଠନ କରିବା ସହ ମୁଖ୍ୟମନ୍ତ୍ରୀଙ୍କୁ ଟାର୍ଗେଟ କରିଛନ୍ତି ପିସିସି ସଭାପତି । ଅନ୍ୟପଟେ ରାଜ୍ୟରେ ଶାସନ ବ୍ୟବସ୍ଥା ବୋଲି କିଛି ନାହିଁ କହି କଟାକ୍ଷ କରିଛି ବିଜେଡି ।
ରାଜ୍ୟରେ ବିଜେପି ସରକାର ଆସିବା ଦିନଠୁ ବିପର୍ଯ୍ୟସ୍ତ ହୋଇପଡିଛି ଆଇନଶୃଙ୍ଖଳା । ୮ ମାସରେ ୧୬ ଶହ ମହିଳାଙ୍କ ଉପରେ ହୋଇଛି ଅତ୍ୟାଚାର । ସବୁଠି ଉଲ୍ଲଂଘନ ହେଲାଣି ସୀମା । ଅସୁରକ୍ଷିତ ମନେ କରୁଛନ୍ତି ଆଦିବାସୀ । ମହିଳାଙ୍କ ଉପରେ ବଢୁଥିବା ନିର୍ଯାତନାକୁ ନେଇ ରାଜ୍ୟ ସରକାରଙ୍କ ଉପରେ ବର୍ଷିଛି ବିଜେଡି । ବିଧାୟକ ବ୍ୟୋମକେଶ ରାୟ କହିଛନ୍ତି, ରାଜ୍ୟରେ କେହି ସୁରକ୍ଷିତ ନୁହନ୍ତି । ଆଦିବାସୀ କଥା କହିଥିବା ଡବଲ ଇଞ୍ଜିନ ସରକାର ଆଦିବାସୀଙ୍କୁ ସୁରକ୍ଷା ଯୋଗାଇ ଦେଇପାରୁନି। ସେପଟେ ପିସିସି ସଭାପତି ଭକ୍ତ ଦାସ ମଧ୍ୟ ଆଦିବାସୀ ପ୍ରସଙ୍ଗରେ ସିଧାସଳଖ ମୁଖ୍ୟମନ୍ତ୍ରୀଙ୍କୁ ଟାର୍ଗେଟ କରିଛନ୍ତି । ସମାଲୋଚନା କରି କହିଛନ୍ତି, ମାଆଙ୍କୁ ସୁରକ୍ଷା ଦେବାରେ ବିଫଳ ହୋଇଛି ବିଜେପି ସରକାର । ଯଦି ନ୍ୟାୟ ନମିଳେ, ତେବେ ଲୋକସଭା ଭବନରେ ପଶି ଜବାବ ମାଗିବେ କଂଗ୍ରେସ ନେତା ଓ କର୍ମୀ ।
ସେପଟେ ସାରା ରାଜ୍ୟରେ ନିର୍ଯାତନା ବଢୁଥିବା ଦେଖି, ୭ ଜଣିଆ କମିଟି ଗଠନ କରିଛି କଂଗ୍ରେସ । ଏହି ଟିମ୍ ପୂରା ରାଜ୍ୟ ଗସ୍ତ କରିବ । ବରିଷ୍ଠ କଂଗ୍ରେସ ନେତା ସୁରେଶ ରାଉତରାୟ କହିଛନ୍ତି, ବିଜେପି ସରକାରରେ ରାଜ୍ୟରେ ବିଗିଡିଛି ଆଇନଶୃଙ୍ଖଳା । ସେହିପରି ବିଜେଡି ବିଧାୟକ ଅନନ୍ତ ନାରାୟଣ ଜେନା ମଧ୍ୟ ରାଜ୍ୟ ସରକାରଙ୍କୁ କଡ଼ା ଭର୍ତ୍ସନା କରିଛନ୍ତି ।
ଲାଭ ଦେଉଥିବା ଭୁବନେଶ୍ବର ବିମାନ ବନ୍ଦରକୁ କାହିଁକି ଲିଜ ଦେଉଛ ରାଜ୍ୟବାସୀଙ୍କୁ ଜଣାଅ ?
ଭୁବନେଶ୍ବର: ଖୁବଶୀଘ୍ର ଭୁବନେଶ୍ବର ଆନ୍ତର୍ଜାତିକ ବିମାନବନ୍ଦରକୁ ଘରୋଇକରଣ କରାଯିବ । ଜାତୀୟ ମୁଦ୍ରୀକରଣ ପାଇପ ଲାଇନ୍ ନୀତି ଆଧାରରେ ଆସନ୍ତା ଆର୍ଥିକ ବର୍ଷ ଭିତରେ ୧୩ଟି ଛୋଟବଡ଼ ବିମାନବନ୍ଦରକୁ ଘରୋଇ କମ୍ପାନୀ ହାତକୁ ୫୦ ବର୍ଷିଆ ଲିଜ୍ ଆକାରରେ ଟେକି ଦିଆଯିବ । ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର ଘରୋଇକରଣକୁ ବିଜେଡି ଓ କଂଗ୍ରେସ ପୂର୍ବରୁ ବିରୋଧ କରିଆସୁଛନ୍ତି । ଏବେ ପ୍ରକ୍ରିୟା ଆରମ୍ଭ ହୋଇଥିବାରୁ ସାଧାରଣ ଲୋକଙ୍କ ଭିତରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ବିଶେଷଜ୍ଞଙ୍କ ଅଭିଯୋଗ ଲାଭରେ ଚାଲୁଥିବା ବିମାନବନ୍ଦର ଘରୋଇକରଣ ଉଚିତ ନୁହେଁ । କ’ଣ ପାଇଁ କେନ୍ଦ୍ର ସରକାର ଏଭଳି ପଦକ୍ଷେପ ନେଉଛନ୍ତି ସେ ବିଷୟରେ ସାଧାରଣରେ ପ୍ରକାଶ କରିବା ଦରକାର ।
କେନ୍ଦ୍ରକୁ ଘାରିଛି ଘରୋଇକରଣ ନିଶା । ଗୋଟିଏ ପରେ ଗୋଟିଏ ରାଷ୍ଟ୍ରୀୟ ସମ୍ପତ୍ତିକୁ କିଛି ମୁଷ୍ଟିମେୟ ପୁଞ୍ଜିପତିଙ୍କୁ ଟେକି ଦେବାକୁ ଉଦ୍ୟମ ଚାଲିଛି । ଖୁବଶୀଘ୍ର ଭୁବନେଶ୍ବର ବିଜୁ ପଟ୍ଟନାୟକ ଆନ୍ତର୍ଜାତିକ ବିମାନବନ୍ଦରର ହେବ ଘରୋଇକରଣ । ଏ ନେଇ କେନ୍ଦ୍ର ବେସାମରିକ ବିମାନଚଳାଚଳ ମନ୍ତ୍ରାଳୟ ଆରମ୍ଭ କରିଛି ପ୍ରକ୍ରିୟା । ଜାତୀୟ ମୁଦ୍ରୀକରଣ ପାଇପଲାଇନ୍ ଯୋଜନା ଅନ୍ତର୍ଗତ ୨୦୨୨ରୁ ୨୦୨୫ ଭିତରେ ଦେଶର ଛୋଟବଡ଼ ୨୫ଟି ବିମାନବନ୍ଦରର ପରିଚାଳନା ଦାୟିତ୍ବ ଘରୋଇ ସରକାରୀ ସହଭାଗିତା ମୋଡରେ ୫୦ ବର୍ଷିଆ ଲିଜ୍ ସୂତ୍ରରେ ଦେବାକୁ ପୂର୍ବରୁ ନୀତିଗତ ନିଷ୍ପତ୍ତି ନେଇଥିଲେ । ଏଥିରେ ଭୁବନେଶ୍ବର ବିମାନବନ୍ଦର ସାମିଲ ଥିଲା । ଯାହାକୁ ବିଜେଡି ଓ କଂଗ୍ରେସ କଡ଼ା ବିରୋଧ କରିଆସୁଛନ୍ତି ।
ସୂତ୍ରରୁ ଜଣାପଡ଼ିଛି ଏବେ ତୃତୀୟ ପର୍ଯ୍ୟାୟରେ ୧୦ରୁ ଅଧିକ ବିମାନବନ୍ଦର ଘରୋଇକରଣ କରିବା ନେଇ କ୍ୟାବିନେଟ୍ ନୋଟ ପ୍ରସ୍ତୁତ ହେବା ସହ ବିଡିଂ ପାଇଁ ପ୍ରକ୍ରିୟା ଆରମ୍ଭ କରିଛନ୍ତି କେନ୍ଦ୍ର ସରକାର । କେନ୍ଦ୍ର ସରକାରଙ୍କ ଏଭଳି ପଦକ୍ଷେପକୁ କଡ଼ା ଭାଷାରେ ନିନ୍ଦା କରିଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ଓ ବୁଦ୍ଧିଜୀବୀ । ଭୁବନେଶ୍ବର ବିମାନବନ୍ଦର ଲାଭ କରୁଥିବାବେଳେ ଏହାକୁ ଘରୋଇ କମ୍ପାନୀ ହାତକୁ ଟେକି ଦେଇ କେନ୍ଦ୍ର ନିଜେ ପରିଚାଳନା କରିବାରେ ଅସମର୍ଥ ବୋଲି ପ୍ରମାଣିତ କରୁଛି ବୋଲି ଅଭିଯୋଗ ହୋଇଛି ।
ବଡ଼ ଆକାରର କେନ୍ଦ୍ର ବଜେଟ୍ ହେଉଛି । କିନ୍ତୁ ଋଣ ଓ ରାଷ୍ଟ୍ରୀୟ ସମ୍ପତ୍ତିରୁ ପୁଞ୍ଜି ପ୍ରତ୍ୟାହାର କରି ପାଣ୍ଠି ସଂଗ୍ରହ ଉପରେ ଗୁରୁତ୍ବ ଦିଆଯାଇଛି । ୨୦୨୫-୨୬ ଆର୍ଥିକ ବର୍ଷ ବଜେଟରେ ଆସେଟ୍ସ ମନିଟାଇଜେସନ୍ ବାବଦରେ ଆସନ୍ତା ଆର୍ଥିକ ବର୍ଷ ସୁଦ୍ଧା ୧୦ ଲକ୍ଷ କୋଟି ସଂଗ୍ରହ କରିବାକୁ ଟାର୍ଗେଟ୍ ଦିଆଯାଇଛି । ଏହାର ଅର୍ଥ କେନ୍ଦ୍ର ସରକାର ଯେଣତେଣ ପ୍ରକାରେ ନିଜ ମୁଣ୍ଡରୁ ଦାୟିତ୍ବ ଖସାଇ ରାଷ୍ଟ୍ରୀୟ ସମ୍ପତ୍ତିକୁ ଲିଜ୍ ସୂତ୍ରରେ ଘରୋଇ ହାତକୁ ଟେକି ଦେଇ ରୟାଲଟି ସଂଗ୍ରହ କରିବେ । ଏହି ଯୋଜନାରେ ବିମାନବନ୍ଦରର ମାଲିକାନା ସରକାରଙ୍କ ପାଖରେ ରହିବ । ଓଡ଼ିଶାବାସୀଙ୍କ କ’ଣ ଲାଭ ହେବ ସେ ସମ୍ପର୍କରେ କେନ୍ଦ୍ର ରାଜ୍ୟବାସୀଙ୍କୁ ଅବଗତ କରିବା ଦରକାର । ଗୋଟିଏ ପଟେ ଭୁବନେଶ୍ବର ବିମାନବନ୍ଦରରେ ତୃତୀୟ ଟର୍ମିନସ୍ ଖୋଲିବାକୁ ବିମାନବନ୍ଦର ପ୍ରାଧିକରଣ ଅଣ୍ଟା ଭିଡ଼ୁଥିବା ବେଳେ ସେହି ସମୟରେ ଲିଜ୍ ଆଉଟ ପାଇଁ ପ୍ରକ୍ରିୟା ଆରମ୍ଭ କରିବା ଆଦୌ ସମୀଚିନ ନୁହେଁ ।
ପୂର୍ବରୁ ବିଜେଡି ସରକାରଙ୍କ ଉଦ୍ୟମରେ ଭୁବନେଶ୍ବର ବିମାନବନ୍ଦରରୁ ବ୍ଯାଙ୍କକ, ଦୁବାଇ, ସିଙ୍ଗାପୁରକୁ ଉଡାଣ ଆରମ୍ଭ ହୋଇଥିଲା । ଉଡ଼ାଣ ଯୋଜନାରେ ରାଜ୍ୟରେ ନୂଆ ନୂଆ ବିମାନବନ୍ଦର ଖୋଲୁଛି । କିଛି ପୁଞ୍ଜିପତିଙ୍କ ସ୍ବାର୍ଥ ପାଇଁ ଓଡ଼ିଶା ସମେତ ପୂର୍ବୋଦୟର ବିକାଶକୁ ବଳି ପକାଇବା ଡବଲ ଇଞ୍ଜିନ ସରକାରଙ୍କ ଏକଚାଟିଆ ନୀତି ବୋଲି ଧରାଯିବ । ରାଜ୍ୟର ସ୍ବାର୍ଥ ଦୃଷ୍ଟିରୁ ମୋହନ ସରକାର ଏ ଦିଗରେ ସ୍ବର ଉଠାଇବାକୁ ସବୁ ମହଲରେ ଦାବି ଉଠିଛି ।