ବାଲେଶ୍ୱର: ବିପଦରେ ଓଡ଼ିଆ ଅସ୍ମିତା । ବିଜୁ ବାବୁଙ୍କୁ ଅପମାନ କରି ଇତିହାସରୁ ହଟାଇଦେବା ଭଳି ଘୃଣ୍ୟ ରାଜନୀତି କରିବାକୁ ଚେଷ୍ଟା କରୁଛି ବିଜେପି । ଓଡ଼ିଆଙ୍କ ପ୍ରତିଟି ହୃଦୟରେ ବିଜୁ ପଟ୍ଟନାୟକ ଅଛନ୍ତି । ଚାହିଁଲେ ବି ଏହାକୁ କେହି ବାହାର କରିପାରିବେନି । ବାଲେଶ୍ୱର ଜିଲ୍ଲାରେ ବିଜୁଙ୍କ ଶ୍ରଦ୍ଧାବାର୍ଷିକ ପାଳନ ଅବସରରେ ଏପରି ଚେତାବନୀ ଦେଇଛନ୍ତି ବିଜେଡି ମୁଖପାତ୍ର ଲେଖାଶ୍ରୀ ସାମନ୍ତ ସିଂହାର । ବିଜୁ ପଟ୍ଟନାୟକଙ୍କ ଶ୍ରାଦ୍ଧ ବାର୍ଷିକୀ ପାଳନ ଅବସରରେ ବିଜେଡି ପକ୍ଷରୁ ବାଲେଶ୍ୱର ଗାନ୍ଧିସ୍ମୃତି ଭବନ ପରିସରରେ ସାଧାରଣ ସଭାର ଆୟୋଜନ ହୋଇଥିଲା । ବିଜେଡି ମୁଖପାତ୍ର ଲେଖାଶ୍ରୀ ସାମନ୍ତ ସିଂହାର, ପୂର୍ବତନ ବିଧାୟକ ସ୍ୱରୂପ ଦାସ, ପୁର୍ବତନ ରେମୁଣା ବିଧାୟକ ସୁଦାମ ପରିଡ଼ା, ପୁର୍ବତନ ନୀଳଗିରି ବିଧାୟକ ସୁକାନ୍ତ ନାୟକଙ୍କ ନେତୃତ୍ୱରେ ସଦର, ରେମୁଣା ଓ ନୀଳଗିରିର ଶତାଧିକ ବିଜେଡି କର୍ମୀ ଓ ବୁଦ୍ଧିଜୀବି, ସରପଞ୍ଚ, ସମିତିସଭ୍ୟ, କାଉନସିଲର ପ୍ରମୁଖ ସାମିଲ ହୋଇଥିଲେ।
ସଦୃଢ଼ ହେବ ରାଜ୍ୟ ଟ୍ରାଫିକ୍ ଓ ସଡ଼କ ସୁରକ୍ଷା ଶାଖା, ସୃଷ୍ଟି ହେଲା ୨ ହଜାର ନୂଆ ପଦବୀ
ଭୁବନେଶ୍ବର: ସଦୃଢ ହେବ ରାଜ୍ୟ ଟ୍ରାଫିକ୍ ଓ ସଡକ ସୁରକ୍ଷା ଶାଖା । ସୃଷ୍ଟି ହେଲା ୨ ହଜାର ନୂଆ ପଦବୀ । ରାଜ୍ୟସ୍ତରରେ ୭୦, ଜିଲ୍ଲା ସ୍ତରରେ ୧୯୩୦ ପଦବୀ ସୃଷ୍ଟି ହୋଇଛି । ରାଜ୍ୟସ୍ତରୀୟ ସେଟ-ଅପରେ ଗୋଟିଏ ADGP/IGP ପଦବୀ, ଗୋଟିଏ DIG-ପୋଲିସ , ୨ଟି ଏସପି , ୪ଟି ଡିଏସପି, ୬ଟି ଇନସପେକ୍ଟର, ୮ଟି ଏସଆଇ. ୮ଟି ଏଏସଆଇ, ୨୨ଟି କନଷ୍ଟେବଳ, ୧୦ଟି ଡ୍ରାଇଭର, ଗୋଟିଏ ଏଷ୍ଟାବ୍ଲିସମେଣ୍ଟ ଅଫିସର, ଗୋଟିଏ ସେକ୍ସନ ଅଫିସର, ୩ଟି ଏଏସ୍ଓ ଓ ୩ଟି ଜୁନିଅର ଆସିଷ୍ଟାଣ୍ଟ ପାଇଁ ପଦବୀ ସୃଷ୍ଟି ହୋଇଛି। ଏପରି ସମୁଦାୟ ୭୦ଟି ପଦବୀ ସୃଷ୍ଟି ହୋଇଛି। ସେହିପରି ଜିଲ୍ଲାସ୍ତରୀୟ ସେଟ-ଅପ୍ରେ ୫ଟି ଡି.ଏସ୍.ପି. ପଦବୀ,୪୧ଟି ଇନ୍ସପେକ୍ଟର, ୮୩ଟି ସବ୍- ଇନ୍ସପେକ୍ଟର, ୮୩ଟି ଏ.ଏସ୍.ଆଇ, ୩୧୦ ହାବିଲ୍ଦାର, ଓ ୧୪୦୮ଟି କନଷ୍ଟେବଳ ପାଇଁ ପଦବୀ ସୃଷ୍ଟି କରାଯାଇଛି। ସମୁଦାୟ ୧୯୩୦ ଟି ପଦବୀ ସୃଷ୍ଟି ହୋଇଛି ।
ଏହାଦ୍ୱାରା ରାଜ୍ୟର ଟ୍ରାଫିକ୍ ବ୍ୟବସ୍ଥା ସୁଦୃଢ଼ ହେବ ଏବଂ ସଡକ ସୁରକ୍ଷା କ୍ଷେତ୍ରରେ ଓଡ଼ିଶା ଏକ ଅଗ୍ରଣୀ ରାଜ୍ୟ ଭାବେ ଅନ୍ୟ ରାଜ୍ୟ ମାନଙ୍କ ପାଇଁ ଅନୁକରଣୀୟ ହେବ ବୋଲି ମୁଖ୍ୟମନ୍ତ୍ରୀ ଆଶା ପ୍ରକାଶ କରିଛନ୍ତି।.. ..
ବଢ଼ିଲା ଓଡ଼ିଶା ସ୍ପେଶାଲ ଷ୍ଟ୍ରାଇକିଂ ଫୋର୍ସରେ ନିଯୁକ୍ତ ପୋଲିସ କର୍ମଚାରୀଙ୍କ ପାରିଶ୍ରମିକ
ଭୁବନେଶ୍ବର: ବଢ଼ିଲା ଓଡ଼ିଶା ସ୍ପେଶାଲ ଷ୍ଟ୍ରାଇକିଂ ଫୋର୍ସରେ ନିଯୁକ୍ତ ପୋଲିସ କର୍ମଚାରୀଙ୍କ ପାରିଶ୍ରମିକ । ସର୍ବନିମ୍ନ ମାସିକ ପାରିଶ୍ରମିକ ୩୦ ହଜାରରୁ ୪୫ ହଜାର ଟଙ୍କାକୁ ବୃଦ୍ଧି କରିଛନ୍ତି ରାଜ୍ୟ ସରକାର । ଏ ସମ୍ପର୍କୀୟ ଏକ ପ୍ରସ୍ତାବକୁ ମୁଖ୍ୟମନ୍ତ୍ରୀ ମୋହନ ମାଝୀ ଅନୁମୋଦନ ଦେଇଛନ୍ତି। ସିପାହୀମାନଙ୍କ ମାସିକ ପାରିଶ୍ରମିକ ୩୦ ହଜାର ଟଙ୍କାରୁ ୪୫ ହଜାର ଟଙ୍କାକୁ ବୃଦ୍ଧି ପାଇଛି ।
ସେହିପରି ଲାନ୍ସ ନାଏକ/ନାଏକ/ହାବିଲ୍ଦାରମାନଙ୍କ ପାରିଶ୍ରମିକ ୩୨ ହଜାରରୁ ୫୦ ହଜାର, ଜୁନିଅର କମିସନ୍ଡ ଅଫିସର ୪୦ ହଜାରରୁ ୫୫ ହଜାର, ଜୁନିଅର କମିସନ୍ଡ ଅଫିସର-ଇନଷ୍ଟ୍ରକ୍ଟରଙ୍କ ଦରମା ୪୦ ହଜାରରୁ ୫୫ ହଜାର ଟଙ୍କାକୁ ବୃଦ୍ଧି ପାଇଛି । ସେହିପରି ଡିଙ୍ଗି ଡ୍ରାଇଭର/ସି-ମ୍ୟାନ୍ ମେକାନିକ୍/ ଖଲାସିମାନଙ୍କ ମାସିକ ପାରିଶମିକ ୩୦ ହଜାରରୁ ୪୫ ହଜାର, ସିରାଙ୍ଗ/ଇଞ୍ଜିନ୍ ଡ୍ରାଇଭର ମାନଙ୍କର ୩୨ ହଜାରରୁ ୫୦ ହଜାର ଏବଂ ମାଷ୍ଟରମାନଙ୍କ ମାସିକ ପାରିଶ୍ରମିକ ୪୦ ହଜାରରୁ ୫୫ ହଜାର ଟଙ୍କାକୁ ବୃଦ୍ଧି ପାଇଛି। ରାଜ୍ୟ ସରକାର ଓଡ଼ିଶା ସ୍ପେଶାଲ ଷ୍ଟ୍ରାଇକିଂ ଫୋର୍ସରେ ତିନୋଟି ନୂଆ ବାଟାଲିଅନ ଗଠନ କରିଛନ୍ତି। ଏଥିରେ ମୁଖ୍ୟତଃ ପୂର୍ବତନ ଆର୍ମି ଓ ନାଭିର ସୈନିକ ଏବଂ କୈନ୍ଦ୍ରୀୟ ସଶକ୍ତ ପୋଲିସ ବାହିନୀର କର୍ମଚାରୀମାନେ ନିଯୁକ୍ତ ହୋଇଥାନ୍ତି।
ରାଜ୍ୟ ସରକାରଙ୍କ ଉପରେ ବର୍ଷିଲେ ବରିଷ୍ଠ ବିଜେଡି ନେତା ରୋହିତ ପୂଜାରୀ
ସମ୍ବଲପୁର: ରାଜ୍ୟରେ ସରକାର ପରିବର୍ତ୍ତନ ପରେ ସମ୍ପୂର୍ଣ୍ଣ ବଦଳିଯାଇଛି ପୋଲିସର କାର୍ଯ୍ୟକଳାପ ଓ ଆଭିମୁଖ୍ୟ । ରାଜଧାନୀରେ ଯେପରି କଂଗ୍ରେସ ବିକ୍ଷୋଭ ସମୟରେ ବିକ୍ଷୋଭକାରୀଙ୍କ ଉପରେ ପୋଲିସ ଦମନ ଲୀଳା ଚଳାଇଲା, ଠିକ୍ ସେହିପରି ସମ୍ବଲପୁରରେ ବିଜେଡି କର୍ମୀମାନେ ଶାନ୍ତିପୂର୍ଣ୍ଣ ଭାବେ ବିକ୍ଷୋଭ କରୁଥିବା ସମୟର ମାଡ଼ ମାରିଲା ପୋଲିସ ।
ତେବେ ମାଡ଼ ମାରି ପୁଣି ବାନ୍ଧିବାକୁ ପ୍ରୟାସ ଆରମ୍ଭ କରିଛି ସମ୍ବଲପୁର ପୋଲିସ । କାରଣ ମିଛ ଅଭିଯୋଗ ଆଣି ନିଜେ ମାଡ଼ ମାରି ଓଲଟା ୨୦ ଜଣ ବିଜେଡି କର୍ମୀଙ୍କ ନାଁରେ ମାମଲା ରୁଜୁ କରିଛି । ଯାହାକୁ ନେଇ ବର୍ଷିଛନ୍ତି ବରିଷ୍ଠ ବିଜେଡି ନେତା ରୋହିତ ପୂଜାରୀ । ସେ କହିଛନ୍ତି ପୋଲିସ ସରକାରଙ୍କ ଗୁଣ୍ଡା ପାଲଟିଗଲା ଓ ବିଜେଡି କର୍ମୀଙ୍କୁ ମାଡ଼ ମାରିବା ସମୟ ଥାଉ ଥାଉ ନ ସୁଧୁରିଲା ପରିସ୍ଥିତି ଭୟଙ୍କର ହେବବୋଲି କହିଛନ୍ତି ରୋହିତ ।
ନବମ ଥର ପାଇଁ ନବୀନ ପଟ୍ଟନାୟକ ରାଜ୍ୟ ସଭାପତି ହେବା ନିଶ୍ଚିତ
ଭୁବନେଶ୍ବର: ନବମ ଥର ପାଇଁ ନବୀନ ପଟ୍ଟନାୟକ ରାଜ୍ୟ ସଭାପତି ହେବା ନିଶ୍ଚିତ। ବିଜେଡି ସଭାପତି ପଦ ଲାଗି ଆଜି କେବଳ ଜଣେ ମାତ୍ର ପ୍ରାର୍ଥୀ ଭାବେ ନବୀନ ପଟ୍ଟନାୟକ ନାମାଙ୍କନ ଦାଖଲ କରିଥିଲେ। ଆସନ୍ତା ୧୯ ସକାଳ ୧୧ଟାରେ ବିଧିବଦ୍ଧ ଭାବେ ତାଙ୍କ ନାଁ ଘୋଷଣା କରାଯିବ ବୋଲି କହିଛନ୍ତି ରାଜ୍ୟ ନିର୍ବାଚନ ଅଧିକାରୀ ପ୍ରତାପ ଦେବ। ଆସନ୍ତା ଏପ୍ରିଲ ୧୯ ସକାଳ ୧୧ଟାରେ ଷ୍ଟେଟ କାଉନସିଲ ଓ ଷ୍ଟେଟ ଏକଜିକ୍ଯୁଟିଭ ମେମ୍ବରଙ୍କ ଉପସ୍ଥିତିରେ ତାଙ୍କ ନାଁ ଘୋଷଣା ହେବ। ଆଜି ଦଳୀୟ ନେତା ଓ କର୍ମୀଙ୍କ ଗହଣରେ ଶଙ୍ଖ ଭବନରେ ବିଜେଡି ରାଜ୍ୟ ନିର୍ବାଚନ ଅଧିକାରୀ ପ୍ରତାପ ଦେବଙ୍କ ଉପସ୍ଥିତିରେ ନାମାଙ୍କନ ଦାଖଲ କରିଥିଲେ ନବୀନ।
ଲକ୍ଷେ ପାର୍ କରିବ ସୁନା ଦର, ଏବେ ନିବେଶ ପାଇଁ ସଠିକ୍ ସମୟ କି?
ନୂଆଦିଲ୍ଲୀ: ହୁ ହୁ ହେଇ ବଢ଼ି ଚାଲିଛି ସୁନା ଦର । ରୋକିବା ନାଁ ଧରୁନି କି ଦର କମିବାରେ ବି କୌଣସି ସଂକେତ ବି ଦେଖାଯାଉନାହିଁ । ଲାଗୁଛି ଆଉ ଦୁଇ କି ୩ ଦିନ ମଧ୍ୟରେ ସୁନା ଦର ଲକ୍ଷେ ପାର୍ କରିବ । କାହିଁକି ବଢ଼ୁଛି ସୁନା ଦର? ଏବେ କ’ଣ ସୁନା କିଣିବା ପାଇଁ ସଠିକ ସମୟ ? ସୁନାରେ ନିବେଶ କରିବା କ’ଣ ଠିକ୍? ଜାଣନ୍ତୁ ।
ଗତକାଲି ଦିଲ୍ଲୀରେ ସୁନା ଦର ଥିଲା ୧୦ ଗ୍ରାମକୁ ୯୮, ୧୦୦ ଟଙ୍କା । ଚଳିତ ବର୍ଷ ଆରମ୍ଭରୁ ସୁନା ଦର ୨୪ ପ୍ରତିଶତ ବୃଦ୍ଧି ପାଇଛି ।
ତେବେ ଏହାର କାରଣ ହେଉଛି ବିଶ୍ବ ସ୍ତରରେ ବୃଦ୍ଧି ପାଉଥିବା ଅନିଶ୍ଚିତତା । ଆମେରିକା ଏବଂ ଚୀନ ମଧ୍ୟରେ ଚାଲିଥିବା ଯୁଦ୍ଧ ନିବେଶକଙ୍କୁ ଭୟଭୀତ କରିଛି । ଟ୍ରମ୍ପ ପ୍ରଶାସନ ଚୀନରୁ ଆମଦାନୀ ହେଉଥିବା ସାମଗ୍ରୀ ଉପରେ ୨୪୫% ଶୁଳ୍କ ବୃଦ୍ଧି କରିଛି । ଏହା ବ୍ୟତୀତ ଆମେରିକୀୟ ଡଲାର ମଧ୍ୟ କ୍ରମାଗତ ଭାବରେ ଦୁର୍ବଳ ହେଉଛି । ଯାହା ସୁନା ମୂଲ୍ୟ ବୃଦ୍ଧିକୁ ସୁହାଉଛି । ଏହା ସହ ଚିପ୍ସ, ଔଷଧ ଏବଂ ଖଣିଜ ପଦାର୍ଥ ଆମଦାନୀ ଉପରେ ନୂଆ ଶୁଳ୍କ ସମ୍ଭାବନା ପାଇଁ ବିଶ୍ବ ବଜାରରେ ଆତଙ୍କ ଦେଖାଯାଇଛି । ଏହି କାରଣରୁ ସୁନା ଦର ଦ୍ରୁତ ଗତିରେ ବୃଦ୍ଧି ପାଉଛି ।
ଯେ ପର୍ଯ୍ୟନ୍ତ ଯୁଦ୍ଧ ସମସ୍ୟାର ସମାଧାନ ନହୁଏ ସୁନା ଦର ଏପରି ବୃଦ୍ଧି ପାଉଥିବ । ଏହାର ଅର୍ଥ ନିବେଶକଙ୍କ ପାଇଁ ଏହା ଏକ ସୁଯୋଗ ସୃଷ୍ଟି କରିଛି । ଯଦି ଆପଣ ଆପଣଙ୍କ ସମ୍ପତ୍ତିକୁ ସୁରକ୍ଷିତ କରିବାକୁ ଚାହୁଁଛନ୍ତି ତାହାଲେ ସୁନା ଏକ ଭଲ ବିକଳ୍ପ ହୋଇପାରେ ।
ଖୁବ୍ ଶୀଘ୍ର ଇରାନ ବିକଶିତ କରିପାରେ ଆଣବିକ ଅସ୍ତ୍ର, ଚୂଡ଼ାନ୍ତ ପର୍ଯ୍ୟାୟରେ ବିକାଶ ପ୍ରକ୍ରିୟା
ନନ୍ଦିଘୋଷ ବ୍ୟୁରୋ: ଖୁବ୍ ଶୀଘ୍ର ଇରାନ ବିକଶିତ କରିପାରେ ଆଣବିକ ଅସ୍ତ୍ର । ବିପଜ୍ଜନକ ଭାବେ ବିକଶିତ ହେଉଥିବା ଆଣବିକ ଅସ୍ତ୍ର ଲାଭ କରିବା ଇରାନ ଲାଗି ଆଉ ବେଶୀ ଦୂର ନୁହେଁ । ଆଣବିକ ପ୍ରସଙ୍ଗରେ ଆଲୋଚନା ଲାଗି ତେହରାନ ଗସ୍ତରେ ଥିବା ଜାତିସଂଘ ଆଣବିକ ତଦାରଖକାରୀ ସଂସ୍ଥାର ମୁଖ୍ୟ ରାଫେଲ ଗ୍ରସି ଏନେଇ ଆଶଙ୍କା ପ୍ରକାଶ କରିଛନ୍ତି ।
ସେ କହିଛନ୍ତି- ଆଣବିକ ଅସ୍ତ୍ର ସଂକ୍ରାନ୍ତ ସମସ୍ତ ବ୍ୟବସ୍ଥା ଇରାନ ହସ୍ତଗତ କରିସାରିଛି । ଖୁବ୍ ଶୀଘ୍ର ଇରାନଏକ ଆଣବିକ ଶକ୍ତି ସମ୍ପନ୍ନ ରାଷ୍ଟ୍ରରେ ପରିଣତ ହେବ । ଆଣବିକ ଅସ୍ତ୍ର ସମ୍ପର୍କରେ ଇରାନ ମୌଖିକ ଭାବେ ଅଗ୍ରାହ୍ୟ କରୁଥିଲେ ବି ଏହାର ତଦନ୍ତଗତ ପ୍ରମାଣ ପରେ ସବୁ କିଛି ସ୍ପଷ୍ଟ ହେବ ବୋଲି କହିଛନ୍ତି ଅନ୍ତର୍ଜାତୀୟ ଆଣବିକ ଶକ୍ତି ସଂସ୍ଥାର ମୁଖ୍ୟ ଗ୍ରସି । ୨୦୧୫ରେ ଆଣବିକ ପ୍ରସଙ୍ଗରେ ଆମେରିକା ଓ ଇରାନ ମଧ୍ୟରେ ଚୁକ୍ତି ହୋଇଥିଲା । ମାତ୍ର ୨୦୧୮ରେ ରାଷ୍ଟ୍ରପତି ଡୋନାଲଡ ଟ୍ରମ୍ପ ଏଥିରୁ ଓହରିଯାଇଥିଲେ । ସେବଠାରୁ ଇରାନ ଆଣବିକ କାର୍ଯ୍ୟକ୍ରମରେ ଲିପ୍ତ ଥିବା ସୂଚନା ମିଳିଛି । ଆମେରିକାର ବାରମ୍ବାର ଚେତାବନୀ ସତ୍ତ୍ବେ ଏହି କାର୍ଯ୍ୟକ୍ରମ ବେସାମରିକ ସ୍ବାର୍ଥ ଲାଗି ଉଦ୍ଦିଷ୍ଟ ବୋଲି କହିଆସୁଛି ଇରାନ । ଓମାନରେ ବସିଥିବା ଆମେରିକା-ଇରାନ ବୈଠକରେ ଏନେଇ ସକାରାତ୍ମକ ଆଲୋଚନା ହୋଇଛି ବୋଲି କୁହାଯାଇଛି । ଏପ୍ରିଲ ୧୯ରେ ତେହରାନରେ ଏହି ପ୍ରସଙ୍ଗରେ ଆଲୋଚନା ହେବ ।
ଆସିଲା ଚାଞ୍ଚଲ୍ୟକର ତଥ୍ୟ, ଆଉ ଏକ ଗ୍ରହରେ ଥାଇ ପାରନ୍ତି ଏଲିୟନ୍
ନନ୍ଦିଘୋଷ ବ୍ୟୁରୋ: ସୌରମଣ୍ଡଳ ବାହାରେ ଆଉ ଏକ ଗ୍ରହରେ ଥାଇପାରନ୍ତି ଏଲିଏନ । ଜେମସ ଓ୍ବେବ ସ୍ପେସ ଟେଲିସ୍କୋପ ଜରିଆରେ ହୋଇଥିବା ଗବେଷଣା ଅନୁସାରେ ଗବେଷକମାନେ ଦେଇଛନ୍ତି ଚାଞ୍ଚଲ୍ୟକର ତଥ୍ୟ । ସେହି ଗ୍ରହର ଜଳବାୟୁ ପ୍ରାଣୀଙ୍କ ଜୀବନ ଲାଗି ଅନୁକୂଳ ଏବଂ ବିଭିନ୍ନ ଗ୍ୟାସର କେମିକାଲ ଫିଙ୍ଗରପ୍ରିଣ୍ଟ ଏହା ପ୍ରମାଣ କରୁଛି ବୋଲି କହିଛନ୍ତି ବୈଜ୍ଞାନିକ । ପୃଥିବୀରେ ଏହି ଧରଣର ପ୍ରକ୍ରିୟା ଥିବାରୁ ସେହି ଗ୍ରହରେ ବି ଜୀବସତ୍ତା ଥାଇପାରନ୍ତି ବୋଲି ସେମାନେ କହିଛନ୍ତି । K2-18 b ନାମକ ସେହି ଗ୍ରହରେ ଦୁଇଟି ଗ୍ୟାସ ଯଥା ଡାଇମିଥାଇଲ ସଲଫାଇଡ ବା DMS ଏବଂ ଡାଇମିଥାଇଲ ଡାଇସଲଫାଇଡ ବା DMDS ଥିବା ଜଣାଯାଇଛି । ସାଧାରଣତଃ ପୃଥିବୀ ପରି ଗ୍ରହରେ ଜୀବଜଗତ ଥିବାରୁ ଏହି ଦୁଇ ଗ୍ୟାସ ରହିଥାଏ । ଏହି ଦୁଇ ଗ୍ୟାସ K2-18 b ଗ୍ରହରେ ଉପଲବ୍ଧ ଥିବାରୁ ସେଠାରେ ବି ଜୀବସତ୍ତା ଥିବା ସମ୍ଭାବନା ବୋଲି କୁହାଯାଇଛି ।
କେମ୍ବ୍ରିଜ ବିଶ୍ଭବିଦ୍ୟାଳୟର ଇନଷ୍ଟିଚ୍ୟୁଟ ଅଫ ଆଷ୍ଟ୍ରୋନୋମିର ଆଷ୍ଟ୍ରୋଫିଜିସିଷ୍ଟ ତଥା ଭାରତୀୟ ବଂଶୋଦ୍ଭବ ବୈଜ୍ଞାନିକ ନିକ୍କୁ ମଧୁସୂଦନ ଏହି ସୂଚନା ଦେଇଛନ୍ତି । K2-18 b ହେଉଛି ପୃଥିବୀଠାରୁ ୮.୬ ଗୁଣ ବଡ଼ ଏବଂ ଏହାର ବ୍ୟାସ ହେଉଛି ପୃଥିବୀଠାରୁ ୨.୬ ଗୁଣ ଅଧିକ । ଏହି ଗ୍ରହ ଏକ ବସତିଯୋଗ୍ୟ ଜୋନରେ ଘୂର୍ଣ୍ଣାୟମାନ ଯେଉଁଠି ଜଳ ଉପଲବ୍ଧ ହେବାର ସୁଯୋଗ ରହିଛି । ପୃଥିବୀଠାରୁ ଏହାର ଦୂରତା ରହିଛି ୧୨୪ ଆଲୋକ ବର୍ଷ । ଏକ ଆଲୋକ ବର୍ଷର ଦୂରତା ହେଉଛି ୯.୫ ଟ୍ରିଲିୟନ କିଲୋମିଟର । ୧୯୯୦ ପରଠାରୁ ସୌରଜଗତ ବାହାରେ ୫ ହଜାର ୮୦୦ଗ୍ରହ ବା ଏକ୍ସୋପ୍ଲାନେଟର ଆବିଷ୍କାର କରାଗଲାଣି । ଏହି ଏକ୍ସୋପ୍ଲାନେଟଗୁଡିକରେ ଜୀବଜଗତ ଲାଗି ସହାୟକ DMS ଓ DMDS ଗ୍ୟାସର ଉପସ୍ଥିତି ଥିବାରୁ ସେଠାରେ ଜୀବସତ୍ତା ଥାଇପାରନ୍ତି ବୋଲି କୁହାଯାଇଛି । ..
ବିଜେଡି ରାଜ୍ୟ ସଭାପତି ପଦ ପାଇଁ ନାମାଙ୍କନ ଭରିଲେ ନବୀନ ପଟ୍ଟନାୟକ
ଭୁବନେଶ୍ବର: ବିଜୁ ଜନତା ଦଳ ସାଂଗଠନିକ ନିର୍ବାଚନ। ବିଜେଡି ରାଜ୍ୟ ସଭାପତି ପଦ ପାଇଁ ନାମାଙ୍କନ ଭରିଛନ୍ତି ନବୀନ ପଟ୍ଟନାୟକ। ଏକମାତ୍ର ପ୍ରାର୍ଥୀଭାବେ ନବମ ଥର ପାଇଁ ରାଜ୍ୟ ବିଜେଡି ସଭାପତି ହେବାକୁ ନାମାଙ୍କନ ଭରିଛନ୍ତି ନବୀନ । ଦଳୀୟ ନେତା ଓ କର୍ମୀଙ୍କ ଗହଣରେ ଶଙ୍ଖ ଭବନରେ ବିଜେଡି ରାଜ୍ୟ ନିର୍ବାଚନ ଅଧିକାରୀ ପ୍ରତାପ ଦେବଙ୍କ ଉପସ୍ଥିତିରେ ନାମାଙ୍କନ ଦାଖଲ କରିଛନ୍ତି। ଏପ୍ରିଲ ୧୯ରେ ହେବ ସଭାପତିଙ୍କ ନାମ ଘୋଷଣା।
‘ଓଡ଼ିଶାକୁ ଶ୍ରେଷ୍ଠ ରାଜ୍ୟ କରିବା ଥିଲା ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଲକ୍ଷ୍ୟ’
ଭୁବନେଶ୍ବର: ଓଡ଼ିଶାକୁ ଶ୍ରେଷ୍ଠ ରାଜ୍ୟ କରିବା ଥିଲା ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଲକ୍ଷ୍ୟ। ତାଙ୍କ ସ୍ବପ୍ନ ସାକାର କରିବା ଲାଗି ଜାରି ରହିଛି ଉଦ୍ୟମ। ୨୦୦୦ରୁ ୨୦୨୪ ବିଜେଡି ସରକାର ଅମଳରେ ରାଜ୍ୟର ହୋଇଥିଲା ବହୁଳ ବିକାଶ। ତାଙ୍କ ଆଦର୍ଶ ଆଜି ପାଥେୟ ହୋଇଛି ବୋଲି କହିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ। ବିଜୁ ପଟ୍ଟନାୟକଙ୍କ ତିରୋଧାନ ଦିବସରେ ଆୟୋଜିତ ସଭାରେ ଯୋଗ ଦେଇ ନବୀନ କହିଛନ୍ତି- ବିଜୁବାବୁଙ୍କ ସମୟରେ ଓଡ଼ିଶା ଜାତୀୟ ଓ ଅନ୍ତର୍ଜାତୀୟ ସ୍ତରରେ ଖ୍ୟାତି ଅର୍ଜନ କରିଥିଲା। ବର୍ତ୍ତମାନ ଇତିହାସକୁ ବଦଳାଇବା ଲାଗି ଚାଲିଛି ହୀନ ଉଦ୍ଯମ। ଇତିହାସ ପରିବର୍ତ୍ତନ ହୋଇପାରିବ ନାହିଁ। ଇତିହାସରେ ନୂଆ ଅଧ୍ୟାୟ ଯୋଡ଼ିବାକୁ ହେବ। ଏଥିଲାଗି ସମସ୍ତଙ୍କୁ ଉଦ୍ୟମ କରିବାକୁ ପଡିବ ବୋଲି କହିଛନ୍ତି ନବୀନ ।
ଏହା ସହ ବିଜେଡିର ଅନ୍ୟ ନେତା ମଧ୍ୟ ବିଜୁ ବାବୁଙ୍କୁ ଶ୍ରଦ୍ଧାଞ୍ଜଳି ଦେଇଥିଲେ । ବିଜୁ ପଟ୍ଟନାୟକଙ୍କ ରାଷ୍ଟ୍ରପତି କି ପ୍ରଧାନମନ୍ତ୍ରୀ ହୋଇଥାନ୍ତେ । ତାଙ୍କ ଷଡ଼ଯନ୍ତ୍ରକାରୀ ଏହା କରାଇ ଦେଲେନାହିଁ । କିନ୍ତୁ ସେ ସମସ୍ତଙ୍କୁ କ୍ଷମା କରି ଦେଇଛନ୍ତି । ବିଜେପି ସରକାର ତାଙ୍କ ନାଁକୁ ଲିଭାଇବାକୁ ଚେଷ୍ଟା କରୁଛନ୍ତି । ତାଙ୍କ ନାଁରେ ଯୋଜନାକୁ ଲିଭାଇଦେବାକୁ ଉଦ୍ୟମ କରୁଛନ୍ତି । ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତିକୁ ପୋଡ଼ିବାକୁ ପଛାଉ ନାହାନ୍ତି। ସୁନାକୁ ଯେତେ ପୋଡ଼ିଲେ ସେ ଚମକିବ । ବିଜୁ ପଟ୍ଟନାୟକଙ୍କୁ ଲୋକଙ୍କ ମନରୁ ଲିଭେଇ ପାରିବେନି ବୋଲି କହିଥିଲାେ ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ।