ନନ୍ଦିଘୋଷ ବ୍ୟୁରୋ: ଭେଟେରାନ୍ ଅଭିନେତା ଉତ୍ତମ ମହାନ୍ତିଙ୍କୁ କରାଗଲା ଏୟାରଲିପ୍ଟିଂ । ସ୍ୱାସ୍ଥ୍ୟବସ୍ଥା ଗୁରୁତର ଥିବାରୁ ଭୁବନେଶ୍ବର ଏକ ଘରୋଇ ହସ୍ପିଟାଲରୁ ତାଙ୍କୁ ଗୁରଗାଁଓର ମେଦାନ୍ତ ହସପିଟାଲକୁ ଏୟାରଲିଫ୍ଟ କରାଯାଇଛି । ଏଥିପାଇଁ ହସପିଟାଲରୁ ଏୟାରପୋର୍ଟ ଯାଏଁ କରାଯାଇଥିଲା ଗ୍ରୀନ କରିଡ଼ର । ୩ ଦିନ ତଳୁ ହସ୍ପିଟାଲରେ ଆଡ଼ମିଶନ ହୋଇ ଚିକିତ୍ସିତ ହେଉଛନ୍ତି ଉତ୍ତମ । ଲିଭର ସିରୋସିସରେ ଆକ୍ରାନ୍ତ ହୋଇଥିବା ବେଳେ ତାଙ୍କର ଲିଭର ଫେଲ୍ୟୁର ରହିଛି । ଗତକାଲିଠାରୁ ସେ ଭେଣ୍ଟିଲେଟର ସପୋର୍ଟରେ ଅଛନ୍ତି । ତେଣୁ ଅଧିକ ଚିକିତ୍ସା ପାଇଁ ଆଜି ସଂଧ୍ଯା ୮ଟାରେ ସ୍ବତନ୍ତ୍ର ଏୟାର ଆମ୍ବୁଲାନ୍ସ ଯୋଗେ ତାଙ୍କୁ ଗୁରଗାଁଓର ମେଦାନ୍ତ ହସପିଟାଲକୁ ଏୟାର ଲିଫ୍ଟି କରାଯାଇଛି ।
ଜରାଜୀର୍ଣ୍ଣ ଅବସ୍ଥାରେ ବାରିପଦାର ଶ୍ରୀରାମଚନ୍ଦ୍ର ପାଠାଗାର, ରକ୍ଷଣାବେକ୍ଷଣ ଅଭାବରୁ ନଷ୍ଟ ହେବାକୁ ବସିଛି ଐତିହ୍ୟ
ନନ୍ଦିଘୋଷ ବ୍ୟୁରୋ: ରାଜତନ୍ତ୍ର ସମୟରୁ ମୟୂରଭଞ୍ଜର କଳା ସାହିତ୍ୟ ସଂସ୍କୃତିର ସ୍ଵତନ୍ତ୍ର ପରିଚୟ ରହିଆସିଛି । ସେଥିମଧ୍ୟରୁ ଅନ୍ୟତମ ହେଉଛି ଶ୍ରୀରାମଚନ୍ଦ୍ର ପାଠାଗାର । ୧୮୯୮ ମସିହାରେ ବାରିପଦା ଠାରେ ଲାଇବ୍ରେରୀକୁ ପ୍ରତିଷ୍ଠା କରିଥିଲେ ତତ୍କାଳୀନ ରାଜା ଶ୍ରୀରାମଚନ୍ଦ୍ର ଭଞ୍ଜଦେଓ । ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ବାରିପଦାର ପୁରାତନ ଐତିହ୍ୟ ସମ୍ପନ୍ନ ଲାଇବ୍ରେରୀ ଶ୍ରୀରାମଚନ୍ଦ୍ର ପାଠାଗାର ନଷ୍ଟ ହେବାକୁ ବସିଛି । ଲାଇବ୍ରେରୀକୁ ସଂରକ୍ଷଣ କରିବାକୁ ଅଣ୍ଟା ଭିଡିଛନ୍ତି ମୟୂରଭଞ୍ଜର ପ୍ରମୁଖ ବ୍ୟକ୍ତି ବିଶେଷ ।
ଜରାଜୀର୍ଣ୍ଣ ଅବସ୍ଥାରେ ଶ୍ରୀରାମଚନ୍ଦ୍ର ପାଠାଗାର । ଭାଙ୍ଗିଯାଇଛି ଛାତର ଆଜବେଷ୍ଟ । ରକ୍ଷଣାବେକ୍ଷଣ ଅଭାବରୁ ନଷ୍ଟ ହେବାକୁ ବସିଛି ଐତିହ୍ୟ । ରାଜତନ୍ତ୍ର ସମୟର ଏହି ପାଠାଗାର ଶ୍ରୀହିନ ହୋଇ ପଡ଼ିଥିବା ବେଳେ, ଏହାର ପୁନ୍ନରୁଦ୍ଧାର କାର୍ଯ୍ୟ ପାଇଁ ପ୍ରୟାସ ଆରମ୍ଭ ହୋଇଛି । ୧୮୯୮ ମସିହାରେ ବାରିପଦା ଠାରେ ଲାଇବ୍ରେରୀକୁ ପ୍ରତିଷ୍ଠା କରିଥିଲେ ରାଜା ଶ୍ରୀରାମଚନ୍ଦ୍ର ଭଞ୍ଜଦେଓ । ସେହି ସମୟରେ ବ୍ରିଟିସ ମହାରାଣୀ ଭିକ୍ଟୋରିଙ୍କ ନାମରେ ନାମିତ କରାଯାଇଥିଲା । ପରବର୍ତ୍ତୀ ପର୍ଯ୍ୟାୟରେ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓଙ୍କ ନାମରେ ନାମିତ ହୋଇଥିଲା । ୧୯୪୯ ମସିହାରେ ମୟୂରଭଞ୍ଜର ଓଡ଼ିଶା ସହିତ ମିଶ୍ରଣ ପରେ ଶିକ୍ଷାବିତ ଓ ବୁଦ୍ଧିଜୀବୀଙ୍କୁ ନେଇ ଗଠିତ କମିଟି ଦ୍ଵାରା ପରିଚାଳିତ ହୋଇଆସୁଛି । ରାଜ୍ୟର ଅନ୍ୟତମ ପୁରାତନ ପାଠାଗାର ଶ୍ରୀରାମଚନ୍ଦ୍ର ଲାଇବ୍ରେରୀର ସୁରକ୍ଷା ଏବଂ ସଂରକ୍ଷଣ ପାଇଁ ପରବର୍ତ୍ତୀ ପର୍ଯ୍ୟାୟରେ ବିଗତ ସରକାରଙ୍କ ସମୟରେ ଆର୍ଥିକ ଅନୁଦାନ ମିଳିଥିଲା । ଜରାଜୀର୍ଣ ଅବସ୍ଥାରେ ଥିବା ଏହି ପାଠାଗାରର ପୁନ୍ନରୁଦ୍ଧାର ପାଇଁ ଜାତୀୟ ସ୍ମାରକ ପ୍ରାଧୀକରଣ ସଂସ୍ଥା ଅଧ୍ୟକ୍ଷ ତଥା ପାଠାଗାରର ପୂର୍ବତନ ସଦସ୍ୟ ପ୍ରଫେସର କିଶୋର କୁମାର ବସାଙ୍କ ନେତୃତ୍ଵରେ ପ୍ରୟାସ ଆରମ୍ଭ ହୋଇଛି ।
ଶ୍ରୀରାମଚନ୍ଦ୍ର ପାଠାଗାରର ପୁନ୍ନରୁଦ୍ଧାର ପାଇଁ ଉଦ୍ୟମ ଆରମ୍ଭ କରିଛନ୍ତି ଅଞ୍ଚଳର ପ୍ରମୁଖ ବ୍ଯକ୍ତି ବିଶେଷ । ପ୍ରଫେସର କିଶୋର କୁମାର ବସାଙ୍କ ନେତୃତ୍ଵରେ ଐତିହାସିକ ସ୍ମାରକୀର ସଂରକ୍ଷଣ ପାଇଁ ଗତ ୨୮ ତାରିଖରେ ଆଇଏସଆଇର ଏକ ଟିମ ଲାଇବ୍ରେରୀର ଅବସ୍ଥା ଅନୁଧ୍ୟାନ କରିଛି । ଲାଇବ୍ରେରୀର ପୁନ୍ନରୁଦ୍ଧାର ପାଇଁ ଜିଲ୍ଲାପାଳଙ୍କ ସହିତ ଆଲୋଚନା କରାଯାଇଛି । ଆଲୋଚନାରେ ବିପିୟୁଟିର ପୂର୍ବତନ କୁଳପତି ଡକ୍ଟର ଦାମୋଦର ଆଚାର୍ଯ୍ୟ, ଓଡ଼ିଶା ସୋସାଇଟି ଅଫ୍ ଆମେରିକାର ପ୍ରତିନିଧି ଡକ୍ଟର ଅଜୟ କୁମାର ମହାନ୍ତି, ଭୂବନେଶ୍ଵର ଆଇଆଇଟିର ପ୍ରଫେସର ସୁରେଶ ଦାସ, ବାରିପଦା ପୌରପରିଷଦ ଅଧ୍ୟକ୍ଷ କୃଷ୍ଣାନନ୍ଦ ମହାନ୍ତି ଓ ଭାରତୀୟ ସର୍ବେକ୍ଷଣ ସଂସ୍ଥାର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ଏହି ପାଠାଗାରକୁ ଦେଶର ଏକ ମଡେଲ ପାଠାଗାରରେ ପରିଣତ କରି ଖଡଗପୁରର ଲାଇବ୍ରେରୀ ଏବଂ ଆର୍କିଟେକ୍ଟର ବିଶେଷଜ୍ଞ ମାନଙ୍କୁ ଏହାର ମଡେଲ ପ୍ରସ୍ତୁତ କରିବାକୁ ନିୟୋଜିତ କରାଯିବାକୁ ଆଲୋଚନା ହୋଇଥିଲା । ରାଜତନ୍ତ୍ର ସମୟର ଏକ ସ୍ମାରକୀ ପାଠାଗାର ଶ୍ରୀହୀନ ହୋଇପଡୁଥିବା ବେଳେ ଅତ୍ୟାଧୁନିକ ପାଠାଗାରରେ ପରିଣତ କରାଯାଇପାରିଲେ ଛାତ୍ରଛାତ୍ରୀ, ଶିକ୍ଷକ ଗବେଷକଙ୍କ ପାଇଁ ଉପାଦେୟ ହୋଇପାରିବ ।
ଟମାଟୋ କିଲୋ ପିଛା ୨ ଟଙ୍କାରୁ ୩ ଟଙ୍କାରେ ବିକ୍ରୀ
ନନ୍ଦିଘୋଷ ବ୍ୟୁରୋ: ଗଞ୍ଜାମ ଜିଲ୍ଲାରେ ଟମାଟୋର ଅଭାବୀ ବିକ୍ରୀ । ଟମାଟୋ କିଲୋ ପିଛା ୨ ଟଙ୍କାରୁ ୩ ଟଙ୍କାରେ ବିକ୍ରୀ ହେଉଛି । ଯାହାକୁ ନେଇ ଚିନ୍ତାରେ ପଡ଼ିଯାଇଛନ୍ତି ଚାଷୀ କୂଳ । ବଜାରରେ ଟମାଟୋ କିଲେ ପିଛା ୧୫ ଟଙ୍କା ରହିଥିବା ବେଳେ ଚାଷୀଙ୍କ ଠାରୁ ୨ ରୁ ୩ ଟଙ୍କାରେ କିଣୁଛନ୍ତି ବ୍ୟବସାୟୀ । ଲେବର, ପେଷ୍ଟିସାଇଡ୍ ଖର୍ଚ୍ଚ ସହିତ ଉତ୍ପାଦନ ଖର୍ଚ୍ଚ ବୃଦ୍ଧି ପାଉଥିବା ବେଳେ ପାରିଶ୍ରମିକ ମିଳୁନାହିଁ । ଅନେକ ଚାଷୀ ଟମାଟୋକୁ ନତୋଳି ଚାଷ ଜମିରେ ଛାଡ଼ି ଦେଉଛନ୍ତି । ହେକ୍ଟର ହେକ୍ଟର ଚାଷ ଜମିରେ ଟମାଟୋ ସେଭଳି ପଚିସଢ଼ି ନଷ୍ଟ ହେଉଥିବା ଦେଖିବାକୁ ମିଳିଛି ।
ଗଞ୍ଜାମ ଜିଲ୍ଲା ଡିଆଁଡ଼େଇଁ ଗାଁରୁ ଆସିଛି ଏଭଳି ଦୃଶ୍ୟ । ଜିଲ୍ଲାର ମଧୁରଚୁଆ, ସିପକୁଦା, ଶ୍ରୀରାମଚନ୍ଦ୍ରପୁର, ହରିପୁର, କଣ୍ଟପଡ଼ା ଭଳି ଅନେକ ଗାଁରେ ଚଳିତ ବର୍ଷ ଟମାଟୋ ଚାଷ ଭଲ ହୋଇଛି । ଗତ କିଛି ଦିନ ପୂର୍ବରୁ ଟମାଟୋ କିଲୋ ପିଛା ୧୫ରୁ ୨୦ ଟଙ୍କାରେ ବିକ୍ରି ହେଉଥିଲା । ହଠାତ୍ ଦର ଖସି ଯିବାରୁ ଏବେ ୨ରୁ ୩ ଟଙ୍କାରେ ବିକ୍ରି ହେଉଛି ଟମାଟୋ । ପାରିଶ୍ରମିକ ମିଳୁନଥିରୁ ହେକ୍ଟର ହେକ୍ଟର ଜମିରେ ଟମାଟୋକୁ ଛାଡ଼ି ଦେଉଛନ୍ତି ଚାଷୀ । ଚାଷ କାର୍ଯ୍ୟ ପାଇଁ ଲେବର, ପେଷ୍ଟିସାଇଡ୍ ଖର୍ଚ୍ଚ ସହିତ ଉତ୍ପାଦନ ଖର୍ଚ୍ଚ ବୃଦ୍ଧି ପାଇବାରେ ଲାଗିଛି । ଏକର ପିଛା ଟମାଟୋ ଚାଷ ପାଇଁ ପ୍ରାୟ ୩୦ରୁ ୪୦ ହଜାର ଟଙ୍କା ଖର୍ଚ୍ଚ ହୋଇଥିବା ବେଳେ ଟମାଟୋ ତୋଳି ବଜାରକୁ ବିକ୍ରି ପାଇଁ ନେଲେ ପାରିଶ୍ରମିକ ମିଳୁନାହିଁ । କିପରି ଋଣ ଶୁଝିବେ ଓ ପରିବାର ପ୍ରତିପୋଷଣ କରିବେ ସେଇ ଚିନ୍ତାରେ ଚାଷୀ ।
ଗଞ୍ଜାମ ସଦର ବ୍ଲକ ଅଞ୍ଚଳର ଚାଷୀ ଋଣ କରି ଟମାଟୋ ଚାଷ କରିଥିଲା ଚାଷୀ । ସାର ଓ ପେଷ୍ଟିସାଇଡ୍ ଦର ବୃଦ୍ଧି ପାଇଥିବା ବେଳେ ଟମାଟୋ ତୋଳିବାକୁ ପଡୁଥିବା ପାରିଶ୍ରମିକ ମଧ୍ୟ ଉଠୁନାହିଁ । ପ୍ରତି ବର୍ଷ ଏହି ସମୟରେ ପ୍ରଚୁର ପରିମାଣରେ ଟମାଟୋ ଉତ୍ପାଦନ ହୋଇଥାଏ । ତେବେ ସଂରକ୍ଷଣ କରି ରଖିବାକୁ ଶୀତଳ ଭଣ୍ଡାର ସୁବିଧା ନଥିବାରୁ ପ୍ରତି ବର୍ଷ ଏହିପରି ଅଭାବୀ ବିକ୍ରିର ଶିକାର ହୋଇଥାନ୍ତି ଚାଷୀ । ଟମାଟୋ ନତୋଳି ଚାଷ ଜମିରେ ଛାଡ଼ି ଦେଉଥିବାରୁ ଟମାଟୋ ଚାଷ ଜମିରେ ପଡ଼ି ପଚିସଢ଼ି ଯାଉଛି । ଟମାଟୋ ସହିତ ଅନ୍ୟାନ୍ୟ ପନିପରିବା ଚାଷ କରି ପରିବାର ପୋଷିବା କଷ୍ଟକର ହେଉଥିବା ବେଳେ ବର୍ତ୍ତମାନ ବାଧ୍ୟ ହୋଇ ଦାଦନ ଖଟିବା ନିମନ୍ତେ ବାହାର ରାଜ୍ୟକୁ ଯିବାକୁ ପଡ଼ିବ ବୋଲି କହିଛନ୍ତି ଚଷା ପୁଅ । ଚାଷ କାର୍ଯ୍ଯ ପାଇଁ ସାର ଓ ଔଷଧ ରିହାତି ଦରରେ ଯୋଗାଇ ଦେବା ସହିତ ଶୀତଳଭଣ୍ଡାର ବ୍ୟବସ୍ଥା କରିବାକୁ ସରକାରଙ୍କ ନିକଟରେ ଦାବି କରିଛନ୍ତି ଚାଷୀ ।
ଗଞ୍ଜାମ ବ୍ଳକରେ ବହୁଳ ଭାବେ ଟମାଟୋ ସହିତ ପନିପରିବା ଚାଷ ହୋଇଥାଏ । ଏଠାରୁ ବାହାର ଜିଲ୍ଲା ଓ ପୋଡ଼ଶୀ ରାଜ୍ୟକୁ ପନିପରିବା ରପ୍ତାନୀ କରାଯାଇଥାଏ । ତେଣୁ ଚାଷୀଙ୍କ ସ୍ଵାର୍ଥକୁ ଦୃଷ୍ଟିରେ ରଖି ଶୀତଳଭଣ୍ଡାର ସୁବିଧା କରାଗଲେ ଅଧିକରୁ ଅଧିକର ଚାଷୀ ପନିପରିବା ଫସଲ ପାଇଁ ଆଗ୍ରହୀ ହେବେ ।
ବାରବାଟୀରେ ଅଭ୍ୟାସ କଲେ ଭାରତୀୟ ଖେଳାଳି
ନନ୍ଦିଘୋଷ ବ୍ୟୁରୋ: ବାରବାଟୀ ପ୍ରସ୍ତୁତ, ଇଣ୍ଡିଆ ପ୍ରସ୍ତୁତ ଆଉ ଇଂଲଣ୍ଡ ବି ରେଡି। ଆସନ୍ତାକାଲିର ଟକ୍ଟର ପାଇଁ ଉତ୍କଣ୍ଠା ପହଞ୍ଚିଛି ଚରମ ସୀମାରେ। ସାରା ରାଜ୍ୟରେ କ୍ରିକେଟ ଫିଭର୍। ବାରବାଟୀ ମ୍ୟାଚ ପାଇଁ ସବୁ ପ୍ରସ୍ତୁତି ଶେଷ ହୋଇଛି। ଆଶା କରାଯାଉଛି, ଏହି ମ୍ୟାଚ ହାଇସ୍କୋରିଂ ହେବ। ଟିମ୍ ଇଣ୍ଡିଆର ବ୍ୟାଟିଂ କୋଚ୍ ସୀତାଂଶୁ କୋଟାକ ସଂକେତ ଦେଇଛନ୍ତି, କାଲିର ମ୍ୟାଚରେ ବିରାଟ କୋହଲି ଓ ମହମ୍ମଦ ସାମି ଖେଳିପାରନ୍ତି। ଉଭୟେ ଫିଟ୍ ଅଛନ୍ତି। ଆହତ କାରଣରୁ ସିରିଜର ପ୍ରଥମ ମ୍ୟାଚ ଖେଳି ପାରିନଥିଲେ କୋହଲି। କାଲିର ମ୍ୟାଚ ଯଦି ସେ ଖେଳନ୍ତି, ତେବେ କିଏ ବାଦ୍ ପଡ଼ିବ। ପ୍ଲେଇଂ ଇଲେଭେନ୍ ରେ କିଏ କିଏ ରହିବ, ତାକୁ ନେଇ ନାନା ଅଙ୍କ କଷା। ସେପଟେ ଆଜି ଅପରାହ୍ନରେ ବାରବାଟୀ ଯାଇ ପ୍ରାକ୍ଟିସ୍ କରିଛନ୍ତି ଟିମ୍ ଇଣ୍ଡିଆର କ୍ରିକେଟର୍। ଗତକାଲି ଦୁଇଟି ଯାକ ଟିମ୍ ଭୁବନେଶ୍ଵରରେ ପହଞ୍ଚିଥିଲେ। ସେମାନଙ୍କୁ ଜୋରଦାର ସ୍ଵାଗତ କରାଯାଇଥିଲା। ଆଜି ଅପରାହ୍ନରେ କଡ଼ା ସୁରକ୍ଷାରେ ବାରବାଟୀ ଯାଇ ପ୍ରାକଟିସ୍ କରିଛି ଟିମ୍ ଇଣ୍ଡିଆ। ତେବେ ଇଂଲଣ୍ଡ ଟିମ୍ ପ୍ରାକ୍ଟିସ୍ କରିନି। ବାରବାଟୀରେ ହୋଇଛି ମୋଟ ୧୯ଟି ୱାନ ଡେ। ଭାରତ ଖେଳିଛି ୧୭ଟି ମ୍ୟାଚ। ସେଥି ମଧ୍ୟରୁ ଜିତିଛି ୧୩ଟି । ଭାରତ ଖେଳିଥିବା ଗତ ୭ଟି ଯାକ ମ୍ୟାଚରେ ବିଜୟୀ ହୋଇଥିବାରୁ ଏହି ଧାରା ବଜାୟ ରଖିବାକୁ ଟିମ୍ ଲକ୍ଷ୍ୟ ରଖିଛି। ବାରବାଟୀର ସର୍ବୋଚ୍ଚ ସ୍କୋର ହେଲା ୩୮୧ ରନ, ଯାହାକି ଭାରତ କରିଥିଲା । ଗତ ୨୦୧୭ ଜାନୁଆରି ୧୯ରେ ଏହି ମ୍ୟାଚ ହୋଇଥିଲା। ବାରବାଟୀରେ ହୋଇଥିବା ମୋଟ୍ ୧୯ଟି ୱାନ ଡେ ମଧ୍ୟରୁ ୧୧ଟି ମ୍ୟାଚରେ ଚେଜ୍ କରିଥିବା ଟିମ୍ ଜିତିଥିବା ବେଳେ ପ୍ରଥମେ ବ୍ୟାଟିଂ କରିଥିବା ଦଳ ୮ଟି ମ୍ୟାଚରେ ବିଜୟୀ ହୋଇଛନ୍ତି।
ବୋଲିଂରେ ବ୍ୟାଟରଙ୍କୁ କରୁଛନ୍ତି ଧରାଶାୟୀ, ବ୍ୟାଟିଂରୁ ହୁଏ ଚଉକା ଛକାର ବର୍ଷା
ନନ୍ଦିଘୋଷ ବ୍ୟୁରୋ: ମାଲକାନଗିରି ଜିଲ୍ଲାର ଦଳପତିପୁଟର ଏକ ସାଧାରଣ ଝିଅ, ଯିଏ ତାଙ୍କ ସଂଘର୍ଷ ଓ ଆତ୍ମବିଶ୍ୱାସର ଆଧାରରେ କେବଳ ଗାଁ ନୁହେଁ, ସାରା ରାଜ୍ୟର ମାନ ରଖିଛନ୍ତି । ଆଜି ସେ ପ୍ରେରଣାର ପରିଚୟ । ଗରିବ ପରିବାରର ଏହି ମାଟିର ହୀରା ଦେଖାଇ ଦେଇଛନ୍ତି ଯେ ସଂଘର୍ଷ ଓ କଠିନ ପରିଶ୍ରମ ସହ ଆତ୍ମବିଶ୍ୱାସ ରଖିଲେ କୌଣସି ସ୍ଵପ୍ନ ବହୁ ଦୂର ନୁହେଁ। ଏବେ ସେ ଓଡ଼ିଶା ଦିବ୍ୟାଙ୍ଗ ମହିଳା କ୍ରିକେଟ ଦଳର ଅଂଶ।
ଗ୍ରାଉଣ୍ଡରେ ବୋଲିଂ କଲେ ଧରାସାୟୀ ହୋଇଯାଉଛନ୍ତି ବ୍ଯାଟର । ତାଙ୍କ ବ୍ୟାଟିଂରୁ ବର୍ଷା ହୁଏ ଚଉକା ଛକା । ଆମେ କହୁଛି ମାଲକାନଗିରି ଜିଲ୍ଲାର ଦଳପତିପୁଟ କଣିଆ ଅଞ୍ଚଳର କ୍ରିକେଟ ଖେଳାଳି ସୁକାନ୍ତି ଦଳପତିଙ୍କ କଥା । ଦିବ୍ୟାଙ୍ଗ ହୋଇ ମଧ୍ୟ ପରିଶ୍ରମ ଓ ଆତ୍ମବିଶ୍ୱାସ ବଳରେ ଜଣେ ଜାତୀୟ ସ୍ତରର ଖେଳାଳି ଭାବେ ପ୍ରତିଷ୍ଠିତ ହୋଇପାରିଛନ୍ତି ଗତ କିଛିଦନ ତଳେ କେରଳରେ ଆୟୋଜିତ ପଞ୍ଚମ ଜାତୀୟ ଦିବ୍ୟାଙ୍ଗ ମହିଳା କ୍ରିକେଟ ଟୁର୍ଣ୍ଣାମେଣ୍ଟରେ ସୁକାନ୍ତି ଓଡିଶାକୁ ପ୍ରତିନିଧିତ୍ୱ କରିଥିଲେ । ଏହା ତାଙ୍କ ଜୀବନର ପ୍ରଥମ ବଡ଼ ପ୍ଲାଟଫର୍ମ ଓ ଦୀର୍ଘ ସଂଘର୍ଷର ପୁରସ୍କାର ବୋଲି ସେ କୁହନ୍ତି । ଜାତୀୟ ଟୁର୍ଣ୍ଣାମେଣ୍ଟରେ ସଫଳତା ପାଇ ଗାଁରେ ପହଞ୍ଚିବା ପରେ ତାଙ୍କୁ ନାଚଗୀତରେ ଫୁଲମାଳ ପିନ୍ଧାଇ ପାଛୋଟି ଆଣିଥିଲେ ଅଞ୍ଚଳବାସୀ । ତାଙ୍କର ଏହି ସଫଳତା ପାଇଁ ପରିବାର ଓ ଅଞ୍ଚଳବାସୀ ଗର୍ବ ଅନୁଭବ କରନ୍ତି ।
ଉପାନ୍ତ ମାଲାକାନଗିରି ଜିଲ୍ଲାର କଣିଆ ମଠରୁ ସୁକାନ୍ତିଙ୍କ କ୍ରିକେଟ ଯାତ୍ରା ଆରମ୍ଭ ହୋଇଥିଲା । ପାଠପଢ଼ାରୁ ଅବସର ସମୟରେ ସେ ଗାଁ ମାଟିରେ ଅଭ୍ୟାସ ଆରମ୍ଭ କରିଦିଅନ୍ତି । ସେ ଅଲରାଉଣ୍ଡର ଭାବେ ଓଡ଼ିଶାର ଭିନ୍ନକ୍ଷମ ମହିଳା କ୍ରିକେଟ ଟିମରେ ସ୍ଥାନ ପାଇଛନ୍ତି । କେରଳରେ ଏକ ଜାତୀୟ ଟୁର୍ଣ୍ଣାମେଣ୍ଟରେ ତାଙ୍କର ଖେଲ ପ୍ରଦର୍ଶନ ସମସ୍ତଙ୍କୁ ଆଚମ୍ଵିତ କରିଥିଲା । ସୁକାନ୍ତି ଭୁବନେଶ୍ୱରର ଏଲଜି ବିଦ୍ୟାଳୟରେ ପାଠ ପଢନ୍ତି । ଦିବ୍ୟାଙ୍ଗ ହୋଇ ମଧ୍ୟ ଦୃଢ଼ ଇଛାଶକ୍ତି ଓ କଠିନ ପରିଶ୍ରମ ପାଇଁ ସେ ଜଣେ ସଫଳ କ୍ରିକେଟର ହୋଇପାରିଛନ୍ତି । ଦଳପତିପୁଟର ଏହି ସୁକାନ୍ତିଙ୍କୁ ସାରା ରାଜ୍ୟ ଓ ଦେଶରୁ ଅଭିନନ୍ଦନର ସୂଅ ଛୁଟିଛି । ଝିଅକୁ ସରକାରୀ ପ୍ରୋତ୍ସାହନ ମିଳିପାରିଲେ ଝିଅ ଆଗକୁ ଦେଶ ପାଇଁ ଖେଳି ଗୌରବ ଆଣିବ ବୋଲି କହିଛନ୍ତି ସୁକାନ୍ତିଙ୍କ ବାପା ।
ଦିବ୍ୟାଙ୍ଗ ହୋଇ ନିଜର କଠିନ ପରିଶ୍ରମ ଓ ଦୃଢ଼ ଇଛାଶକ୍ତି ବଳରେ ସଫଳତା ପଥରେ ଅଗ୍ରସର ହେଉଛନ୍ତି ମାଲକାନଗିରିର କ୍ରିକେଟର ସୁକାନ୍ତି ଦଳପତି । ମାଲକାନଗିରି ଜିଲ୍ଲାକୁ ଗର୍ବିତ କରିବା ସହିତ ଅନ୍ୟମାନଙ୍କ ପାଇଁ ପାଲଟିଛନ୍ତି ପ୍ରେରଣାର ଉତ୍ସ ।
ପ୍ରଥମ ସ୍ବାମୀ ଥିଲେ ବି ଦ୍ବିତୀୟ ସ୍ବାମୀ ଦେବେ ଭରଣପୋଷଣ
ନନ୍ଦିଘୋଷ ବ୍ୟୁରୋ: ପ୍ରଥମ ସ୍ବାମୀ ଥାଉ ଥାଉ ଦ୍ବିତୀୟ ସ୍ବାମୀଠୁ ଭରଣପୋଷଣ ପାଇପାରିବେ ମହିଳା । ସୁପ୍ରିମକୋର୍ଟ କହିଛନ୍ତି ଯେ , ଜଣେ ମହିଳା ସିଆରପିସି ୧୨୫ ଧାରା ଅନୁଯାୟୀ ନିଜର ଦ୍ବିତୀୟ ସ୍ବାମୀଠୁ ଭରଣପୋଷଣ ପାଇବାର ହକଦାର୍ ଅଟେ । ଯଦିଓ ତାଙ୍କର ପ୍ରଥମ ବିବାହ ଆଇନଗତ ଭାବରେ ବଞ୍ଚି ରହିଛି । ଜଷ୍ଟିସ୍ ବି.ଭି ନାଗାରତ୍ନ ଏବଂ ବିଚାରପତି ସତୀଶ ଚନ୍ଦ୍ର ଶର୍ମାଙ୍କ ଖଣ୍ଡପୀଠ କହିଛନ୍ତି ଯେ ,ଭରଣପୋଷଣ ଭଳି ସାମାଜିକ କଲ୍ୟାଣ ବ୍ୟବସ୍ଥାର ଉଦ୍ଦେଶ୍ୟକୁ ବ୍ୟାପକ ଭାବରେ ବ୍ୟାଖ୍ୟା କରାଯିବା ଉଚିତ ଏବଂ କଠୋର ଆଇନଗତ ବ୍ୟାଖ୍ୟା ଯୋଗୁଁ ମାନବିକ ଉଦ୍ଦେଶ୍ୟ ପ୍ରଭାବିତ ହେବା ଉଚିତ୍ ନୁହେଁ।
ଫୌଜଦାରୀ କାର୍ଯ୍ୟବିଧି ସଂହିତା (CrPC)ର ଧାରା ୧୨୫କୁ ଭାରତୀୟ ନାଗରିକ ସୁରକ୍ଷା ସଂହିତାର ଧାରା ୧୪୪ ଦ୍ୱାରା ବଦଳାଯାଇଛି, ଯାହା ଜୁଲାଇ ୧, ୨୦୨୪ ରୁ କାର୍ଯ୍ୟକାରୀ ହୋଇଛି। ସୁପ୍ରିମକୋର୍ଟ ଜାନୁଆରୀ ୩୦ ତାରିଖରେ ଏକ ନିର୍ଦ୍ଦେଶ ଦେଇଥିଲେ, ଯେଉଁଥିରେ ଦ୍ୱିତୀୟ ସ୍ୱାମୀଙ୍କୁ ତାଙ୍କ ବିଚ୍ଛିନ୍ନ ପତ୍ନୀଙ୍କୁ ଭରଣପୋଷଣ ଦେବାକୁ ନିର୍ଦ୍ଦେଶ ଦିଆଯାଇଥିଲା। କୋର୍ଟ ଜଣେ ମହିଳାଙ୍କ ଦ୍ୱାରା ଦାୟର କରାଯାଇଥିବା ଏକ ଆବେଦନର ଶୁଣାଣି କରୁଥିଲେ, ଯିଏ ୨୦୦୫ ମସିହାରେ ଏକ ସମ୍ମତି ଫର୍ମରେ ସ୍ୱାକ୍ଷର କରିବା ପରେ ତାଙ୍କ ପ୍ରଥମ ସ୍ୱାମୀଙ୍କଠାରୁ ଅଲଗା ହୋଇଯାଇଥିଲେ, ଯଦିଓ ଛାଡପତ୍ରର କୌଣସି ଆନୁଷ୍ଠାନିକ ଆଇନଗତ ନିର୍ଦ୍ଦେଶ ମିଳିନଥିଲା।
ପରେ, ମହିଳା ଜଣକ ତାଙ୍କ ପଡ଼ୋଶୀଙ୍କୁ ଭେଟିଲେ ଏବଂ ସେମାନେ ଦୁହେଁ ୨୭ ନଭେମ୍ବର ୨୦୦୫ରେ ବିବାହ କଲେ। ମତଭେଦ ପରେ, ଦ୍ୱିତୀୟ ସ୍ୱାମୀ ବିବାହକୁ ବାତିଲ କରିବାକୁ ଆବେଦନ କରିଥିଲେ, ଯାହାକୁ ଫେବୃଆରୀ ୨୦୦୬ ରେ ଏକ ପରିବାର ଅଦାଲତ ମଞ୍ଜୁର କରିଥିଲେ। ପରେ, ଦୁହେଁ ମିଳନ କଲେ ଏବଂ ପୁଣି ଥରେ ବିବାହ କଲେ, ଯାହା ହାଇଦ୍ରାବାଦରେ ପଞ୍ଜୀକୃତ ହୋଇଥିଲା। ଜାନୁଆରୀ ୨୦୦୮ରେ ସେମାନଙ୍କ ଦୁହିଁଙ୍କର ଗୋଟିଏ ଝିଅ ହୋଇଥିଲା। କିନ୍ତୁ, ଦମ୍ପତିଙ୍କ ମଧ୍ୟରେ ପୁଣି ମତଭେଦ ଦେଖାଦେଲା ଏବଂ ମହିଳା ଜଣକ ଦ୍ୱିତୀୟ ସ୍ୱାମୀ ଏବଂ ତାଙ୍କ ପରିବାର ସଦସ୍ୟଙ୍କ ବିରୁଦ୍ଧରେ ଯୌତୁକ ନିରୋଧ ଆଇନ ଅନୁଯାୟୀ ଅଭିଯୋଗ ଦାୟର କଲେ।
ଏହା ପରେ, ମହିଳା ଜଣକ ସିଆରପିସିର ଧାରା ୧୨୫ ଅନୁଯାୟୀ ନିଜ ଏବଂ ତାଙ୍କ ଝିଅ ପାଇଁ ଭରଣପୋଷଣ ଦାବି କରିଥିଲେ, ଯାହାକୁ ପରିବାର କୋର୍ଟ ଗ୍ରହଣ କରିଥିଲେ, କିନ୍ତୁ ଦ୍ୱିତୀୟ ସ୍ୱାମୀ ଦ୍ୱାରା ଏହାକୁ ଚ୍ୟାଲେଞ୍ଜ କରାଯିବା ପରେ ତେଲେଙ୍ଗାନା ହାଇକୋର୍ଟ ଏହି ଆଦେଶକୁ ବାତିଲ କରିଦେଇଥିଲେ।
ତାଙ୍କ ଆବେଦନରେ, ଦ୍ୱିତୀୟ ସ୍ୱାମୀ ଯୁକ୍ତି ଦେଇଥିଲେ ଯେ ମହିଳାଙ୍କୁ ତାଙ୍କର ଆଇନଗତ ପତ୍ନୀ ଭାବରେ ବିବେଚନା କରାଯାଇପାରିବ ନାହିଁ କାରଣ ତାଙ୍କର ପ୍ରଥମ ବିବାହ ଏବେ ବି ଆଇନଗତ ଭାବରେ ବୈଧ। ଦ୍ୱିତୀୟ ସ୍ୱାମୀଙ୍କ ଯୁକ୍ତିକୁ ପ୍ରତ୍ୟାଖ୍ୟାନ କରି, ସୁପ୍ରିମକୋର୍ଟ ହାଇକୋର୍ଟର ନିର୍ଦ୍ଦେଶକୁ ବାତିଲ କରି ଭରଣପୋଷଣ ପାଇଁ ଦିଆଯାଇଥିବା ନିଷ୍ପତ୍ତିକୁ ପୁନଃସ୍ଥାପିତ କରିଥିଲେ।
ଖଣ୍ଡଗିରି ମେଳା : ନବୀନଙ୍କୁ ଝୁରୁଛନ୍ତି ଉଠା ଦୋକାନୀ
ନନ୍ଦିଘୋଷ ବ୍ୟୁରୋ: ଖଣ୍ଡଗିରିରେ ଚାଲିଛି ମାଘ ସପ୍ତମୀ ମେଳା । ହେଲେ ଚଳିତ ବର୍ଷ ମେଳାରେ ସେମିତି ଆଖୃଦୃଶିଆ ବେପାର ହେଉ ନଥିବା କହିଛନ୍ତି ଉଠା ଦୋକାନୀ । ବ୍ଯବସାୟ ନଥିବାବେଳେ ଜାଗା ପାଇଁ ୯ ହଜାର ଟଙ୍କା ପ୍ରଶାସନକୁ ଦେବାକୁ ପଡୁଛି । ଯାହା ଭାରି ବାଧୁଥିବା କହିବ ସହ ପୂର୍ବ ସରକାରଙ୍କ କଥାକୁ ମନେ ପକାଇ ଆଖିରୁ ଲୁହ ଝରାଇଛନ୍ତି ଉଠା ଦୋକାନୀ ।
ପୂର୍ବ ସରକାରକୁ ଝୁରିଲେ ଖଣ୍ଡଗିରି ଉଠା ଦୋକାନୀ । ଚଳିତବର୍ଷ ମାଘ ସପ୍ତମୀ ମେଳାରେ ମିଳୁନି ସୁବିଧା । ବେପାର ନାହିଁ, ପ୍ରଶାସନକୁ ଅର୍ଥ ଦେଇ ବଢୁଛି କ୍ଷତି । ଟିକେ ନଜର ପକାନ୍ତୁ ଏହି ଦୋକାନ ଗୁଡିକ ଉପରେ । ପ୍ରତିବର୍ଷ ଦୁଇ ପଇସା ରୋଜଗାର କରିବା ପାଇଁ କେତେ ଆଶା ନେଇ ଖଣ୍ଡଗିରି ମେଳାରେ ଦୋକାନ ଖୋଲି ଆସୁଛନ୍ତି । ହେଲେ ପୂର୍ବରୁ ଭଲ ବେପାର ହେଉଥିବା ବେଳେ ଚଳିତ ବର୍ଷ ମାନ୍ଦା ପଡ଼ିଛି ବ୍ଯବସାୟ । ଫଳରେ କ୍ଷତି ହେଉଛି । ୪ ଦିନ ହେଲା ବେପାର ନଥିବାବେଳେ ଉଠା ଦୋକାନ ପାଇଁ ଦୋକାନ ବାବଦକୁ ଦେବାକୁ ପଡୁଛି ୯ ହଜାର ଟଙ୍କା ଭଡ଼ା । ଯାହା ବେଶି ବାଧୁଥିବା କହିଛନ୍ତି ଦୋକାନୀ । ପୂର୍ବ ସରକାର ସମୟରେ ସେମାନଙ୍କୁ ସୁବିଧା ଯୋଗାଇ ଦିଆଯାଉଥିଲା । ହେଲେ ଏବେ ଦୋକାନ କଲେ ପକେଟକୁ ବାଧୁଛି ବୋଲି କହିଛନ୍ତି ଦୋକାନୀ ।
୭ ଫୁଟ ଦୋକାନ ଖୋଲିବା ପାଇଁ ୯ ହଜାର ଟଙ୍କା ଭଡ଼ା । ପୁଣି ବିଦ୍ୟୁତ ପାଇଁ ଆହୁରି ୪ ହଜାର ଟଙ୍କା ଦେବାକୁ ପଡୁଛି । ଯାହା ବୋଝ ଉପରେ ଲଳିତା ବିଡ଼ା ପରି । ଦୀପ ଦାନୀ, ବେଲଣା ଚକି ବିକ୍ରି କରିବାକୁ ସବୁ ବର୍ଷ ମେଳାରେ ଦୋକାନ ଖୋଲିବାକୁ ଆସନ୍ତି ଶାନ୍ତି ମାଉସୀ । ହେଲେ ପୂର୍ବରୁ ଟଙ୍କା ଟିଏ ବି ଦେବାକୁ ପଡୁନଥିଲା । ହେଲେ ଚଳିତବର୍ଷ ତାଙ୍କୁ ବି ୯ ହଜାର ଟଙ୍କା ଦେବାକୁ କହିଛନ୍ତି ଅଧିକାରୀ । ବେପାର ନଥିବାବେଳେ ଏତେଟଙ୍କା କିପରି ଦେବେ ବୋଲି କହିଛନ୍ତି ଦୋକାନୀ ।
ଦିଲ୍ଲୀର ସବୁଠାରୁ ଧନୀ ବିଧାୟକ କିନ୍ତୁ ଶିକ୍ଷାଗତ ଯୋଗ୍ୟତା ୧୦ମ ପାସ୍ , ଜାଣନ୍ତୁ କିଏ ?
ନନ୍ଦିଘୋଷ ବ୍ୟୁରୋ: ୨୦୨୫ ଦିଲ୍ଲୀ ବିଧାନସଭା ନିର୍ବାଚନର ଫଳାଫଳ ପ୍ରକାଶ ପାଇଛି । ଯେଉଁଥିରେ ଆମ୍ ଆଦମୀ ପାର୍ଟିର ସରକାରଙ୍କୁ ବ୍ୟାପକ ପରାଜୟର ସାମ୍ନା କରିବାକୁ ପଡିଛି । ବହୁମତ ହାସିଲ୍ କରି ବିଜେପି ଦିଲ୍ଲୀରେ ଆମ୍ ଆଦମୀ ପାର୍ଟିକୁ କ୍ଷମତାରୁ ବାହାର କରିଦେଇଛି । ତେବେ ଏହି ନିର୍ବାଚନରେ ଅରବିନ୍ଦ କେଜ୍ରିଓ୍ବାଲ୍ , ମନୀଷ ସିସୋଦିଆ, ଅବଧ ଓଝାଙ୍କ ସମେତ ଅନେକ ବଡ ବଡ ନେତା ନିର୍ବାଚନ ହାରିଯାଇଛନ୍ତି । କିନ୍ତୁ ଆପଣ ଜାଣନ୍ତି କି ଦିଲ୍ଲୀର ସବୁଠାରୁ ଧନୀ ବିଧାୟକ କିଏ ?
ଦିଲ୍ଲୀର ସବୁଠାରୁ ଧନୀ ବିଧାୟକ କିଏ ?
ଦିଲ୍ଲୀ ବିଧାନସଭା ନିର୍ବାଚନ ଆରମ୍ଭ ହେବା ପୂର୍ବରୁ ନାମାଙ୍କନ ସମୟରେ , ପ୍ରାର୍ଥୀମାନେ ତାଙ୍କ ସମ୍ପତ୍ତି ତାଲିକା ପ୍ରକାଶ କରିଥିଲେ । ଯେଉଁଥିରୁ ଜଣାପଡିଛି ଯେ , ବିଜେପିର କର୍ଣ୍ଣେଲ୍ ସିଂହ ଦିଲ୍ଲୀର ସବୁଠାରୁ ଧନୀ ବିଧାୟକ । ଆମେରିକାରେ ତାଙ୍କର ୪ଟି ଘର ରହିଛି । ତାହା ଛଡା ତାଙ୍କ ପାଖରେ ଲକ୍ଷ ଲକ୍ଷ ଟଙ୍କାର ସୁନାଗହଣା ମଧ୍ୟ ରହିଛି । ତାଙ୍କର ଶିକ୍ଷାଗତ ଯୋଗ୍ୟତା ୧୦ମ ପାସ୍ ଅଟେ ।
ଏତିକି ଭୋଟରେ ଜିତିଛନ୍ତି କର୍ଣ୍ଣେଲ୍ ସିଂହ
ଆପର ସତ୍ୟେନ୍ଦ୍ର ଜୈନଙ୍କ ଠାରୁ ବିଜେପିର କର୍ଣ୍ଣେଲ୍ ସିଂହ ୧୮୮୬୩ ଭୋଟରେ ଜିତିଛନ୍ତି । ସେ ଶାକୁର ବସ୍ତି ବିଧାନସଭା ନିର୍ବାଚନମଣ୍ଡଳୀରୁ ନିର୍ବାଚନ ଲଢୁଥିଲେ ।
ନିର୍ବାଚନୀ ଶପଥପତ୍ର ଅନୁଯାୟୀ ବିଜେପି ପ୍ରାର୍ଥୀ କର୍ଣ୍ଣେଲ୍ ସିଂହ ୨୫୯.୬୭ କୋଟି ଟଙ୍କାର ସମ୍ପତ୍ତି ଘୋଷଣା କରିଛନ୍ତି । ତାଙ୍କ ପାଖରେ ନଗଦ ୧.୩୨ ଲକ୍ଷ ଟଙ୍କା ଅଛି । ବ୍ୟାଙ୍କ୍ ଆକାଉଣ୍ଟରେ ୨୭.୫୯ ଲକ୍ଷ ଟଙ୍କା ଜମା ରହିଛି । ଏବଂ ୨୫ ଲକ୍ଷ ଟଙ୍କାର ଜୀବନ ବୀମା ରହିଛି । ସୁନା ଏବଂ ହୀରା ଅଳଙ୍କାରର ମୂଲ୍ୟ ୩୮.୪୫ ଲକ୍ଷ ଟଙ୍କା ରହିଛି । କର୍ଣ୍ଣେଲ୍ ସିଂହଙ୍କର ୨୫୮ କୋଟି ଟଙ୍କାର ଅସ୍ଥାବର ସମ୍ପତ୍ତି ମଧ୍ୟ ରହିଛି । ହରିୟାଣାରେ ୬୦ କୋଟି ଟଙ୍କାର ଏକ ଫାର୍ମ ହାଉସ୍ ଅଛି । ଏହା ଛଡା ସୋନିପତରେ ତାଙ୍କର ୫୫ଲକ୍ଷ ଟଙ୍କାର ଏକ ଦୋକାନ ଅଛି । ଆମେରିକାର ଓ୍ବାଶିଂଟନ୍ ଏବଂ କାର୍ଲିଫର୍ଣ୍ଣିଆରୁ ହରିୟାଣାର ସୋନିପତ୍ ପର୍ଯ୍ୟନ୍ତ ତାଙ୍କର ୧୯୮ କୋଟି ଟଙ୍କାର ଘର ଅଛି । ଯେଉଁଥିରୁ ଆମେରିକାରେ କେବଳ ୪ଟି ଘର ଅଛି ।
ଏମଜିଏମ ଟି ୨୦ ଚାମ୍ପିୟନସିପ୍ ୨୦୨୫ ଅନୁଷ୍ଠିତ
ନନ୍ଦିଘୋଷ ବ୍ୟୁରୋ: କଟକ ଜିଲ୍ଲା ଆଠଗଡ କପୁରସିଂ ସ୍ଥିତ “ଏମ୍ ଜି ଏମ୍ ସ୍କୁଲ ଅଫ ସ୍ପୋର୍ଟସ ” ଠାରେ ଏମଜିଏମ ଟି ୨୦ ଚାମ୍ପିୟନସିପ୍ ୨୦୨୫ ଅନୁଷ୍ଠିତ ହୋଇଯାଇଛି । ଅନ୍ତର୍ଜାତୀୟ କ୍ରିକେଟର ରବି ଶାସ୍ତ୍ରୀ, ଭେଙ୍କଟରାଜୁ, ଦେବାଶିଷ ମହାନ୍ତିଙ୍କ ସହ ପଙ୍କଜ ଲୋଚନ ମହାନ୍ତି ପ୍ରମୁଖ ଯୋଗ ଦେଇ ଏହି ମ୍ୟାଚର ଶୁଭ ଉଦଘାଟନ କରିଥିଲେ । ଏମଜିଏମ ସ୍କୁଲରେ ପହଞ୍ଚି ସ୍କୁଲ ପରିସର ବୁଲି ଦେଖିବା ସହ ଖେଳାଳି ମାନଙ୍କ ପାଇଁ ହୋଇଥିବା ଭିତ୍ତିଭୂମିକୁ ପ୍ରଶଂସା କରିଥିଲେ । ଏହି ଠାରୁ ପ୍ରଶିକ୍ଷଣ ନେଇ ଆଗାମୀ ଦିନରେ ବହୁ ଖେଳାଳି ଅନ୍ତର୍ଜାତୀୟ ସ୍ତରକୁ ମନୋନୀତ ହୋଇପାରିବେ ବୋଲି ଗଣ ମାଧ୍ୟମକୁ ସୂଚନା ଦେଇଛନ୍ତି।
ମୋଦିଙ୍କୁ କହିଥିଲେ ଏମିତି, ପରାଜୟ ପରେ ସୋସିଆଲ ମିଡିଆରେ ଭାଇରାଲ ହେଉଛି କେଜ୍ରିଓ୍ବାଲଙ୍କ ଭିଡିଓ
ନନ୍ଦିଘୋଷ ବ୍ୟୁରୋ: ଦିଲ୍ଲୀ ଆପର ଶୋଚନୀୟ ପରାଜୟ ପରେ ଏବେ ସୋସିଆଲ ମିଡିଆରେ ଏକ ଭିଡିଓ ବେଶ ଭାଇରାଲ ହେବାରେ ଲାଗିଛି । ଯେଉଁଥିରେ ଦିଲ୍ଲୀ ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ କହିଛନ୍ତି । କେଜ୍ରିଓ୍ବାଲ ଏହି ଭିଡିଓରେ କହିଛନ୍ତି କି, ଆପକୁ ହରାଇବା ପାଇଁ ବିଜେପି ବହୁ ଯୋଜନା କରିଛି । କିନ୍ତୁ ଦିଲ୍ଲୀରେ ଏଇ ଜନ୍ମରେ ମୋଦି କେବେ ଆପକୁ ହରାଇ ପାରିବେ ନାହିଁ । ଜେଲରେ ଥାଇ ମଧ୍ୟ ଆପ ଜିତିବ । ଯାହାର ଭିଡିଓଟି ସୋସିଆଲ ମିଡିଆରେ ମିଡିଆରେ ଭାଇରାଲ ହେଉଥିବାବେଳେ ୟୁଜର୍ସମାନେ ଏହାକୁ ସେୟାର କରୁଛନ୍ତି । ଏବଂ କିଛି ୟୁଜର୍ସ ଅଜବ ଅଜବ କମେଣ୍ଟମାନ ମଧ୍ୟ ଦେଉଥିବା ଦେଖିବାକୁ ମିଳୁଛି । ଜଣେ ୟୁଜର୍ସ ଲେଖିଛନ୍ତି କି, ରାବଣର ଗର୍ବ ମଧ୍ୟ ଭାଙ୍ଗି ଯାଇଥିଲା । ଆଉ ଆଜି କେଜ୍ରିଓ୍ବାଲଙ୍କ କ୍ଷେତ୍ରରେ ମଧ୍ୟ ତାହା ଦେଖିବାକୁ ମିଳିଛି । ତେବେ ଏହି ଭିଡିଓରେ କେଜ୍ରିଓ୍ବାଲ କହିଥିଲେ କି, ଯଦି ଆମେ ଦୁର୍ନିତୀ ଗ୍ରସ୍ତ ବୋଲି ଭାବୁଛନ୍ତି ତାହେଲେ ଆମକୁ ଭୋଟ ଦିଅନ୍ତୁ ନାହିଁ । ଏହାକୁ ନେଇ ୟୁଜର୍ସମାନେ ତାଙ୍କୁ ଟ୍ରୋଲ କରୁଛନ୍ତି ।
https://www.instagram.com/arvindkejriwal/?utm_source=ig_embed&ig_rid=ca7577c5-6d38-4f48-a045-af10ac4f3c5f