ନୂଆଦିଲ୍ଲୀ: ଦ୍ବିତୀୟ ପର୍ଯ୍ୟାୟରେ ଆଜି ଆମେରିକାରୁ ଭାରତ ଫେରିବେ ଆଉ ୧୧୯ ଭାରତୀୟ । ପଞ୍ଜାବ ଅମୃତସରରେ ପହଞ୍ଚିବ ଆମେରିକୀୟ ବିମାନ ସି-17 ଗ୍ଲୋବମାଷ୍ଟର । ପୂର୍ବରୁ ପ୍ରଥମ ପର୍ଯ୍ୟାୟରେ ଭାରତ ଆସିଥିଲେ ୧୦୪ ଭାରତୀୟ । ଆମେରିକାରେ ବେଆଇନ ଭାବେ ବାସ କରିଥିବା ଲୋକଙ୍କୁ ନିଜ ନିଜ ଦେଶକୁ ଫେରାଇଦିଆଯିବା ପ୍ରକ୍ରିୟା ଜାରି ରହିଥିବାବେଳେ ଭାରତକୁ ବହୁ ସଂଖ୍ୟକ ନାଗରିକ ଫେରିବା ସମ୍ଭାବନା ରହିଛି । ଫେରିବାକୁ ଥିବା ଲୋକଙ୍କ ମଧ୍ୟରେ ସର୍ବାଧିକ ୬୭ ଜଣ ଅଛନ୍ତି ପଞ୍ଜାବର । ହରିୟାଣାର ୩୩, ଗୁଜରାଟର ୮ ଜଣ, ଉତ୍ତରପ୍ରଦେଶର ୩ଜଣ, ରାଜସ୍ଥାନର ୨ ଜଣ, ମହାରାଷ୍ଟ୍ରର ୨ ଜଣ, ହିମାଚଳ ପ୍ରଦେଶ ଓ ଜାମ୍ମୁ ଓ କାଶ୍ମୀରର ୨ ଜଣ ଭାରତ ଫେରିେବ । ଦୟନୀୟ ଅବସ୍ଥାରେ ଭାରତୀୟମାନଙ୍କୁ ପଠାଇ ଦିଆଯାଉଥିବା ଘଟଣାକୁ ନେଇ ଦେଶରେ ବିବାଦ ଲାଗିରହିଛି । ଏହି ବିଷୟ ସଂସଦରେ ବି ଉଠିଛି । ପର୍ଯ୍ୟାୟକ୍ରମେ ଆମେରିକାରେ ବାସ କରୁଥିବା ବେଆଇନ ଭାରତୀୟଙ୍କୁ ଫେରାଇ ଅଣାଯିବ ବୋଲି ସୂଚନା ମିଳିଛି ।
ଦିଲ୍ଲୀ ମୁଖ୍ୟମନ୍ତ୍ରୀ ଚୟନ ପାଇଁ ନିଯୁକ୍ତି ହେବେ ପର୍ଯ୍ୟବେକ୍ଷକ: ହାଇକମାଣ୍ଡଙ୍କ ନିକଟକୁ ପଠାଯିବ ନାମ
ନୂଆଦିଲ୍ଲୀ: ଭାରତୀୟ ଜନତା ପାର୍ଟି ଦିଲ୍ଲୀରେ ଶାନଦାର ବିଜୟ ହାସଲ କରିବା ପରେ ଏବେ ମୁଖ୍ୟମନ୍ତ୍ରୀ ଚୟନକୁ ନେଇ ସସପେନ୍ସ ଜାରି ରହିଛି । ମୁଖ୍ୟମନ୍ତ୍ରୀ କାହାକୁ କରାଯିବ, କେଉଁ ଫର୍ମୂଲା ଆପ୍ଲାଏ ହେବ ତାହାକୁ ତଜର୍ମା କରୁଛନ୍ତି ହାଇକମାଣ୍ଡ । ଦୀର୍ଘବର୍ଷ ପରେ ଦିଲ୍ଲୀରେ ପଦ୍ମ ଫୁଟିଥିବାରୁ ଏଥର ବିଜେପି ସରପ୍ରାଇଜ୍ ଦେଇପାରେ ବୋଲି କୁହାଯାଉଛି । ବିଭିନ୍ନ ରାଜ୍ୟରେ ମୁଖ୍ୟମନ୍ତ୍ରୀ ଚୟନ ସମୟରେ ବିଜେପି ସର୍ବଦା ସଭିଙ୍କୁ ଚକିତ କଲା ଭଳି ପଦେକ୍ଷପ ଗ୍ରହଣ କରିଥାଏ । ତେଣୁ ଏଥର ରାଷ୍ଟ୍ରୀୟ ରାଜଧାନୀରେ ଅନୁରୂପ କିଛି ଦେଖିବାକୁ ମିଳିପାରେ ବୋଲି ରାଜନୈତିକ ବିଶାରଦମାନେ ଅନୁମାନ କରୁଛନ୍ତି । ମୁଖ୍ୟମନ୍ତ୍ରୀ ରେସରେ ଏକାଧିକ ଚେହେରା ରହିଥିଲେ ହେଁ ଦଳ କେଉଁ ଗୋଟି ଚାଳନା କରୁଛି, ତା’ ଉପରେ ସଭିଙ୍କ ନଜର ।
ଦିଲ୍ଲୀ ମୁଖ୍ୟମନ୍ତ୍ରୀ ନାମକୁ ନେଇ ବିଜେପି ଅନ୍ତିମ ରୂପ ଦେବାକୁ ଯାଉଛି । ଏଥିପାଇଁ ନବନିର୍ବାଚିତ ବିଧାୟକଙ୍କ ସହିତ ଆଲୋଚନା ପାଇଁ ଦଳ ପର୍ଯ୍ୟବେକ୍ଷକଙ୍କୁ ନିଯୁକ୍ତି କରିବ । ଦଳର କେନ୍ଦ୍ରୀୟ ନେତୃତ୍ବଙ୍କ ପ୍ରତିନିଧିତ୍ବ କରିବେ ପର୍ଯ୍ୟବେକ୍ଷକ । ଦଳର ୪୮ ଜଣ ବିଧାୟକ ଓ ହାଇକମାଣ୍ଡଙ୍କ ମଧ୍ୟରେ ମଧ୍ୟସ୍ଥତା କରିବେ ପର୍ଯ୍ୟବେକ୍ଷକ । ବିଧାୟକଙ୍କ ସହ ଆଲୋଚନା କରିବା ପରେ ମୁଖ୍ୟମନ୍ତ୍ରୀ ନାମ ହାଇକମାଣ୍ଡଙ୍କ ନିକଟକୁ ପଠାଇବେ ପର୍ଯ୍ୟବେକ୍ଷକ ବୋଲି କହିଛନ୍ତି ଦିଲ୍ଲୀ ଭାଜପା ଅଧ୍ୟକ୍ଷ ବୀରେନ୍ଦ୍ର ସଚଦେବା । ଖୁବଶୀଘ୍ର ଦିଲ୍ଲୀରେ ନୂଆ ମୁଖ୍ୟମନ୍ତ୍ରୀଙ୍କୁ ନେଇ ଜାରି ରହିଥିବା ସସପେନ୍ସ ଉପରୁ ହଟିବ ପରଦା । ସୂଚନାଯୋଗ୍ୟ ଯେ, ୨୭ ବର୍ଷ ପରେ ବିଜେପି ଦିଲ୍ଲୀରେ କ୍ଷମତାକୁ ଫେରିଛି । ବିଧାନସଭାର ମୋଟ ୭୦ଟି ଆସନ ମଧ୍ୟରୁ ବିଜେପି ୪୮ଟି ଆସନରେ ଜିତିଥିବା ବେଳେ ଆମ ଆଦମୀ ପାର୍ଟି (ଆପ)କୁ ୨୨ଟି ମିଳିଥିଲା । ଏଥର ଦିଲ୍ଲୀରେ ଆପର ଗଡ଼ ଚୁରମାର ହୋଇଯାଇଥିବା ବେଳେ କଂଗ୍ରେସ ଖାତା ଖୋଲିପାରିନଥିଲା ।
କିଏ ହେବେ ଦିଲ୍ଲୀ ମୁଖ୍ୟମନ୍ତ୍ରୀ: ଜଣେ ଅଣଚର୍ଚ୍ଚିତ ବ୍ୟକ୍ତିଙ୍କ ନାମରେ ବାଜିପାରେ ମୋହର
ନୂଆଦିଲ୍ଲୀ: ଆଜି ଘୋଷଣା ହୋଇପାରେ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ନାଁ। ଆଜି ୪୮ ବିଜେପି ବିଧାୟକଙ୍କ ବୈଠକରେ ନୂଆ ମୁଖ୍ୟମନ୍ତ୍ରୀଙ୍କ ନାଁ ହୋଇପାରେ ଘୋଷଣା। ତେବେ ମୁଖ୍ୟମନ୍ତ୍ରୀ କିଏ ହେବେ ତାହାକୁ ନେଇ ଜୋର ଧରିଛି ଚର୍ଚ୍ଚା। ନୂଆ ସିଏମଙ୍କ ନାଁ ଘୋଷଣା କରିବେ ହାଇକମାଣ୍ଡ। କୁହାଯାଉଛି ସିଏମ ରେସରେ ଜଣେ ସାଂସଦ ବି ଅଛନ୍ତି। ତେବେ ଜଣେ ବିଧାୟକଙ୍କୁ ହିଁ ସିଏମ କରାଯାଇପାରେ ବୋଲି ଆଲୋଚନା ଚାଲିଛି। ମଧ୍ୟପ୍ରଦେଶ ଓ ରାଜସ୍ଥାନ ଢାଞ୍ଚାରେ ଜଣେ ଅଣଚର୍ଚ୍ଚିତ ବ୍ୟକ୍ତିଙ୍କୁ ବି ମୁଖ୍ୟମନ୍ତ୍ରୀ କରାଯିବା ସମ୍ଭାବନା ରହିଛି। ବିଧାୟକଙ୍କ ମଧ୍ୟରେ ସବୁଠାରୁ ଅଧିକ ଆଗରେ ରହିଛନ୍ତି ପରବେଶ ବର୍ମା। ସେ ନୂଆଦିଲ୍ଲୀ ଆସନରେ ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କୁ ହରାଇଥିଲେ। ସେ ବି ପୂର୍ବତନ ମୁଖ୍ୟମନ୍ତ୍ରୀ ସାହେବ ସିଂ ବର୍ମାଙ୍କ ପୁଅ। ତେଣେ ଅଣପ୍ରଭାବଶାଳୀ ଜାତିର ଜଣେ ନେତାଙ୍କୁ ବି ମୁଖ୍ୟମନ୍ତ୍ରୀ କରିବା ସମ୍ଭାବନା ରହିଛି।
ନୂଆଦିଲ୍ଲୀ ରେଳ ଷ୍ଟେସନରେ ଅଚାନକ ଦଳାଚକଟା ଘଟିଲା କାହିଁକି?
ନୂଆଦିଲ୍ଲୀ: ନୂଆଦିଲ୍ଲୀ ରେଳ ଷ୍ଟେସନରେ ଗତକାଲି ରାତିରେ ଘଟିଥିବା ଦଳାଚକଟାରେ ୧୮ ଜଣଙ୍କର ମୃତ୍ୟୁ ଘଟିଥିଲା । ଏଥିସହିତ ଉକ୍ତ ଦଳାଚକଟାରେ ୧୫ ଜଣ ଆହତ ହୋଇଥିବା କୁହାଯାଉଛି । ମୃତକଙ୍କ ମଧ୍ୟରେ ୯ ଜଣ ମହିଳା, ୪ ଜଣ ପୁରୁଷ ଓ ୫ ଜଣ ଶିଶୁ ରହିଛନ୍ତି । ମୃତକଙ୍କ ମଧ୍ୟରେ ବିହାରର ସର୍ବାଧିକ ୯ ଜଣ, ଦିଲ୍ଲୀର ୮ ଜଣ ଓ ହରିୟାଣାର ଜଣେ ରହିଛନ୍ତି । ରାତି ପାଖାପାଖି ୧୦ଟା ସମୟରେ ୧୩ ଓ ୧୪ ନମ୍ବର ପ୍ଲାଟଫର୍ମରେ ଏହି ଘଟଣା ଘଟିଥିଲା । ପ୍ରୟାଗରାଜ ମହାକୁମ୍ଭ ଯିବାକୁ ହଜାର ହଜାର ସଂଖ୍ୟାରେ ଶ୍ରଦ୍ଧାଳୁ ଏକତ୍ର ହୋଇଥିବା ବେଳେ ଏହି ଘଟଣା ଘଟିଥିଲା । ଟ୍ରେନରେ ଚଢ଼ିବାକୁ ଲୋକମାନେ ପ୍ରୟାସ କରୁଥିବା ବେଳେ ଅନେକ ମୃତାହତ ହୋଇଥିଲେ । ଖବର ପାଇ ଘଟଣାସ୍ଥଳରେ ଦିଲ୍ଲୀର ଏଲଜି ଭି.କେ ସକ୍ସେନା ଓ ପୂର୍ବ ସିଏମ୍ ଆତିଶୀ ଆହତଙ୍କୁ ଜାଣିବା ପାଇଁ ହସ୍ପିଟାଲରେ ପହଞ୍ଚିଥିଲେ ।
ତେବେ ସବୁଠାର ବଡ଼ ପ୍ରଶ୍ନ ହେଉଛି ଅଚାନକ ଏତେବଡ଼ ଅଘଟଣ ଘଟିଲା କାହିଁକି? ଦେଖଣାହାରୀଙ୍କ ଅନୁଯାୟୀ, ସବୁ ପ୍ଲାଟଫର୍ମରେ ବହୁତ ଭିଡ଼ ଥିଲା । ମାତ୍ର ପ୍ଲାଟଫର୍ମ ନମ୍ବର ୧୨, ୧୩, ୧୪ ଓ ୧୫ରେ ଅତ୍ୟଧିକ ଭିଡ଼ ଥିଲା । ରେଲଓ୍ବେ ତରଫରୁ ଟ୍ରେନ ରହିବାକୁ ନେଇ ବାରମ୍ବାର ପ୍ଲାଟଫର୍ମ ନମ୍ବର ବଦଳିବାର ଘୋଷଣା କରାଯାଇଥିଲା । ଏହାକୁ ନେଇ ପ୍ଲାଟଫର୍ମରେ ଚଳାଚକଟା ହୋଇଥିଲା । ରେଳ ଅଧିକାରୀଙ୍କ ବୟାନ ଅନୁସାରେ, ପ୍ରୟାଗରାଜ ଏକ୍ସପ୍ରେସ ପ୍ଲାଟଫର୍ମ ନମ୍ବର ୧୪ରେ ଛିଡ଼ା ହୋଇଥିଲା । ପ୍ଲାଟଫର୍ମ ନମ୍ବର ୧୫ରେ ବନାରସ ସୁପରଫାଷ୍ଟ ସ୍ପେଶାଲ ଟ୍ରେନ ରହିଥିଲା । ସ୍ବତନ୍ତ୍ରତା ସେନାନୀ ଏକ୍ସପ୍ରେସ ଓ ଭୁବନେଶ୍ବର ରାଜଧାନୀ ଏକ୍ସପ୍ରେସ ବିଳମ୍ବରେ ଚାଲୁଥିଲା । ଏହି ଦୁଇ ଟ୍ରେନର ଯାତ୍ରୀ ମଧ୍ୟ ପ୍ଲାଟଫର୍ମ ନମ୍ବର ୧୨, ୧୩ ଓ ୧୪ରେ ରହିଥିଲେ । ଭିଡ଼ ଆହୁରି ବଢ଼ିବା ଫଳରେ ପ୍ଲାଟଫର୍ମ ନମ୍ବର ୧୪ ଓ ୧୬ର ଏସ୍କେଲେଟର ନିକଟରେ ଅଚାନକ ଦଳାଚକଟା ଦେଖିବାକୁ ମିଳିଥିଲା । ରେଲଓ୍ବେ ଦ୍ବାରା ପ୍ରତି ଘଣ୍ଟାକୁ ୧୫୦୦ ସାଧାରଣ ଟିକେଟ ବିକ୍ରି ହେଉଥିଲ, ସେଥିପାଇଁ ଷ୍ଟେସନରେ ଭିଡ଼ ବଢ଼ିଥିଲା ଓ ସ୍ଥିତି ନିୟନ୍ତ୍ରଣ ବାହାରକୁ ଚାଲିଯାଇଥିଲା ବୋଲି ଅନ୍ୟ ଜଣେ ଅଧିକାରୀ କହିଛନ୍ତି ।
କୋଟାରେ ବିଷାକ୍ତ ଗ୍ୟାସ ଲିକ୍, ୧୬ରୁ ଅଧିକ ଛାତ୍ରଛାତ୍ରୀ ଅସୁସ୍ଥ
କୋଟା: କୋଟାରୁ ଆସିଲା ପୁଣି ଅଭାବନୀୟ ଘଟଣା । ଏଥର ଛାତ୍ର ଆତ୍ମହତ୍ୟା ନୁହେଁ । ବିଷାକ୍ତ ଗ୍ୟାସ ଲିକ୍ ହୋଇଛି । ଫଳରେ ୧୬ରୁ ଅଧିକ ଛାତ୍ରଛାତ୍ରୀ ଅସୁସ୍ଥ ହୋଇଛନ୍ତି । ଜେଇଇ ପ୍ରସ୍ତୁତିର ହବ୍ କୋଟାର ସିମଲିଆ ଅଞ୍ଚଳର ଏକ କେମିକାଲ ପ୍ଲାଣ୍ଟରୁ ଏହି ଗ୍ୟାସ୍ ନିର୍ଗତ ହୋଇଥିଲା । ଚମ୍ବଲ ଫର୍ଟିଲାଇଜର୍ସ ଆଣ୍ଡ କେମିକାଲ ଲିମିଟେଡ୍ ପ୍ଲାଣ୍ଟରୁ ନିର୍ଗତ ହୋଇଥିଲା ଆମେନିଆ ଗ୍ୟାସ୍ । ଏହାର ପାଖରେ ଏକ ସ୍କୁଲ ଥିଲା । ତେଣୁ ଅନେକ ପିଲା ଅସୁସ୍ଥ ହୋଇ ପଡ଼ିଥିଲେ ।
ଏପରିକି ସ୍କୁଲର ଦୁଇ ଜଣ କର୍ମଚାରୀ ଓ ପାଖ ଅଞ୍ଚଳର ଜଣେ ବ୍ୟକ୍ତି ମଧ୍ୟ ଅସୁସ୍ଥ ହୋଇ ପଡ଼ିଛନ୍ତି । ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । କେତେକଙ୍କ ଅବସ୍ଥା ସଂକଟାପନ୍ନ ହେବାରୁ ସେମାନଙ୍କୁ କୋଟା ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ।
ଗାଁ ଲୋକେ କହିଛନ୍ତି, ଦିନ ପ୍ରାୟ ୧୧ଟାରେ ଗ୍ୟାସ୍ ଲିକ୍ ହୋଇଥିଲା । ପରେ ପରେ ନିଶ୍ଵାସ ନେବାରେ କଷ୍ଟ ଅନୁଭବ କରିଥିଲେ ପିଲାମାନେ । କେତେକ ଛାତ୍ରଛାତ୍ରୀ ଅଚେତ ହୋଇ ପଡ଼ିଥିଲେ । ସେହି ଫ୍ୟାକଟ୍ରିରେ ୟୁରିଆ ସାର ପ୍ରସ୍ତୁତ ହୁଏ । ସ୍କୁଲକୁ ଯାଇ ଜିଲ୍ଲାପାଳ ପରିସ୍ଥିତିର ଅନୁଧ୍ୟାନ କରିଛନ୍ତି । ସ୍କୁଲକୁ ଛୁଟି ଘୋଷଣା କରାଯାଇଛି ।
ମଣିପୁରରେ ରାଷ୍ଟ୍ରପତି ଶାସନକୁ ବିରୋଧ, ବଡ଼ ଧରଣର ବିକ୍ଷୋଭ
ଇମ୍ଫାଲ: ମଣିପୁରରୁ ରାଷ୍ଟ୍ରପତି ଶାସନକୁ ବିରୋଧ । ରାଷ୍ଟ୍ରପତି ଶାସନ ହଟାଇବା ଦାବିରେ ବଡ଼ ଧରଣର ଆନ୍ଦୋଳନ । ହଜାର ହଜାର ମଣିପୁରବାସୀ କରିଛନ୍ତି ବିକ୍ଷୋଭ । ମଣିପୁରର ଇମ୍ଫାଲ ପୂର୍ବ ଜିଲ୍ଲା ଅନ୍ତର୍ଗତ ନୋଙ୍ଗପୋକ ସେଞ୍ଜବାନ ଅଞ୍ଚଳରେ ବିକ୍ଷୋଭ କରାଯାଇଛି ।
ମୁଖ୍ଯମନ୍ତ୍ରୀ ପଦରେ ଏନ. ବୀରେନ ସିଂଙ୍କୁ ପୁଣି ଅବସ୍ଥାପିତ କରିବାକୁ ସେମାନେ ଦାବି କରିଛନ୍ତି । ଗତ ୯ ତାରିଖରେ ବିଧାନସଭା ଅଧିବେଶନ ପୂର୍ବରୁ ମୁଖ୍ଯମନ୍ତ୍ରୀ ପଦରୁ ଇସ୍ତଫା ଦେଇଥିଲେ ବୀରେନ । ଗତ ୧୩ ତାରିଖରେ ରାଜ୍ଯରେ ଜାରି ହୋଇଥିଲା ରାଷ୍ଟ୍ରପତି ଶାସନ । ବୀରେନଙ୍କ ଇସ୍ତଫା ପରେ ସାରା ମଣିପୁରରେ ଅସନ୍ତୋଷ ତୀବ୍ର ହୋଇଥିଲା । ବୀରେନଙ୍କ ଇସ୍ତଫା ଓ ରାଷ୍ଟ୍ରପତି ଶାସନ ଜାରି ପରେ ସାରା ରାଜ୍ଯରେ ଅସନ୍ତୋଷ ତୀବ୍ର ହେବାରେ ଲାଗିଛି । ମଣିପୁର ହିଂସାରେ ୨୦୦ରୁ ଅଧିକ ଲୋକଙ୍କ ଜୀବନ ଯାଇଥିବାବେଳେ ୬୦ ହଜାରରୁ ଅଧିକ ଲୋକ ବାସଚ୍ୟୁତ ହେଲେଣି ।
ପଙ୍କଜ ଲୋଚନ ମହାନ୍ତି ହେଲେ ଓସିଏ ନୂଆ ସଭାପତି
କଟକ: ଓସିଏର ନୂଆ ସଭାପତି ଭାବେ ନିର୍ବାଚିତ ହେଲେ ପଙ୍କଜ ଲୋଚନ ମହାନ୍ତି । ଖାଲି ପଡ଼ିଥିବା ସଭାପତି ପଦ ପାଇଁ ସେ ଏକାକୀ ନାମାଙ୍କନ ଦାଖଲ କରିଥିଲେ । ତାହା ଭ୍ୟାଲିଡ୍ ବି ରହିଥିଲା । ଆଉ କେହି ନାମାଙ୍କନ ଦାଖଲ କରି ନଥିବାରୁ ପଙ୍କଜ ଓସିଏର ସଭାପତି ହେବା ନିଶ୍ଚିତ ।
କେବଳ ଆନୁଷ୍ଠାନିକ ଘୋଷଣା ବାକି ରହିଛି । ଆଗରୁ ସେ ଓସିଏର ଉପସଭାପତି ଥିଲେ । ଏହି ପଦରୁ ଇସ୍ତଫା ଦେଇ ସେ ନୂଆ ପଦ ଗ୍ରହଣ କରିବେ । ଆସନ୍ତା ଫେବୃଆରୀ ୨୩ ରେ ତାଙ୍କୁ ଏ ସଂପର୍କିତ ସାର୍ଟିଫିକେଟ ଦିଆଯିବ ।
ଅର୍ଥନୈତିକ ସର୍ଭେ ରିପୋର୍ଟ: ୨୦୨୪-୨୫ରେ ଓଡ଼ିଶାର ଅଭିବୃଦ୍ଧି ହାର ୭.୨ ପ୍ରତିଶତ ଲକ୍ଷ୍ୟ
ଭୁବନେଶ୍ବର: ଆସିଲା ଅର୍ଥନୈତିକ ସର୍ଭେ ରିପୋର୍ଟ । ୨୦୨୪-୨୫ ଲାଗି ଅଭିବୃଦ୍ଧି ୭.୨ ପ୍ରତିଶତ ଲକ୍ଷ୍ୟ ରଖାଯାଇଛି । ୨୦୨୪-୨୫ରେ ଓଡ଼ିଶାରେ ମୁଣ୍ଡପିଛା ଆୟ ୧ ଲକ୍ଷ ୮୨ ହଜାର ୫୪୮ ଆକଳନ କରାଯାଇଛି । ବଜେଟ୍ ପୂର୍ବରୁ ପ୍ରକାଶ ପାଇଛି ଅର୍ଥନୈତିକ ସର୍ଭେ ରିପୋର୍ଟ । ୨୦୨୪-୨୫ ଆର୍ଥିକ ବର୍ଷରେ ଓଡିଶା ଅର୍ଥନୀତିର ଆକାର ୯.୫ ଲକ୍ଷ କୋଟି ଟଙ୍କା ହେବ ବୋଲି ଆକଳନ କରାଯାଇଛି, ଯାହା ପ୍ରାୟ ୧୧୩ ବିଲିୟନ ଆମେରିକୀୟ ଡଲାର । ଏହା ସର୍ବଭାରତୀୟ ସ୍ତରର ୬.୪ ପ୍ରତିଶତ ତୁଳନାରେ ଅଧିକ ।
ରାଜ୍ୟ ଅର୍ଥନୀତିରେ କୃଷି ଓ ଆନୁଷଙ୍ଗିକ କ୍ଷେତ୍ରର ଯୋଗଦାନ ପ୍ରାୟ ୧୯ ପ୍ରତିଶତ ଓ ଏହାର ଅଭିବୃଦ୍ଧି ହାର ୩.୩ ପ୍ରତିଶତ ଅଟେ । ଯାହା ସର୍ବଭାରତୀୟ ସ୍ତରର ଅଭିବୃଦ୍ଧି ସହ ପ୍ରାୟତଃ ସମାନ । ଅପରପକ୍ଷରେ ରାଜ୍ୟ ଅର୍ଥନୀତିରେ ଶିଳ୍ପ କ୍ଷେତ୍ରର ଯୋଗଦାନ ୪୪ ପ୍ରତିଶତ ଥିବାବେଳେ ଏହାର ଅଭିବୃଦ୍ଧି ହାର ୬.୧ ପ୍ରତିଶତ ଯାହାକି ସର୍ବଭାରତୀୟ ସ୍ତର ସହିତ ପ୍ରାୟ ସମାନ । ରାଜ୍ୟରେ ସେବାକ୍ଷେତ୍ରର ଯୋଗଦାନ ପ୍ରାୟ ୩୭ ପ୍ରତିଶତ ଏବଂ ଏହାର ୧୦ ପ୍ରତିଶତ ହାରରେ ଅଭିବୃଦ୍ଧି ଘଟିବ ବୋଲି ଆକଳନ କରାଯାଇଛି ।
୨୦୨୪-୨୫ ଆର୍ଥିକ ବର୍ଷରେ ମୁଣ୍ଡପିଛା ଆୟ ୧୦.୬ ପ୍ରତିଶତ ବୃଦ୍ଧି ପାଇ ୧.୮୩ ଲକ୍ଷ ଟଙ୍କା ସ୍ତରରେ ପହଞ୍ଚିଛି ଓ ସର୍ବଭାରତୀୟ ମୁଣ୍ଡପିଛା ଆୟଠାରୁ ଏହାର ବ୍ୟବଧାନ ୮.୮ ପ୍ରତିଶତକୁ ହ୍ରାସ ପାଇଛି ।
କିଶୋର, କିଶୋରୀ ଉପବାସ କଲେ ହୋଇପାରନ୍ତି ମେଧୁମେୟ ରୋଗରେ ପୀଡ଼ିତ
ଭୁବନେଶ୍ବର: ଜର୍ମାନ ସ୍ବାସ୍ଥ୍ୟ ବିଶେଷଜ୍ଞଙ୍କ ନୂଆ ଆବିଷ୍କାର । କିଶୋର କିଶୋରୀ ଉପବାସ ରହିବା ବିପଦ । ଯଦି ଜଣେ ତରୁଣ ବୟସରେ ବେଶିଦିନ ବିରତି ନେଇ ପୁଣି ଉପବାସର କରୁଛନ୍ତି ତା’ହେଲେ ତାଙ୍କର ସେଲ୍ ବିକାଶ ବାଧାପ୍ରାପ୍ତ ହେବା ସହ ସେ ମଧୁମେହ ରୋଗରେ ପୀଡ଼ିତ ହେଉଛନ୍ତି । ତେବେ ଡାଏଟିଆସିଆନଙ୍କ ମତରେ ଓଜନ ହ୍ରାସ କରି ନିଜକୁ ସ୍ଲିମ୍ଫିଟ୍ ରଖିବା ପାଇଁ ଆଜି କାଲି ଏପରି ଉପବାସ ରହିବାକୁ ବେଶୀ ପସନ୍ଦ କରୁଛନ୍ତି ଯୁବବର୍ଗ । କିନ୍ତୁ ରାତି ଅନିଦ୍ରା, କିମ୍ବା ଲମ୍ବା ସମୟ ପାଇଁ ମୋବାଇଲ ଓ ମାନସିକ ଚାପଗ୍ରସ୍ତ ରହୁଥିବା ଯୁବବର୍ଗଙ୍କ ପାଇଁ ଏହା ଲାଭ ପରିବର୍ତ୍ତେ କ୍ଷତି ପହଞ୍ଚାଉଛି ।
ଓଜନ କମାଇ ଓ ନିଜକୁ କିପରି ସ୍ଲିମ୍ ଟ୍ରିମ୍ ରଖିବେ । ଯୁବବର୍ଗଙ୍କ ଭିତରେ ଏବେ ପପୁଲାର ହୋଇଛି ଇଣ୍ଟରମିଟେଣ୍ଟ ଫାଷ୍ଟିଂ ବା ବିରତି ନେଇ ପୁଣି ଉପବାସ । କିନ୍ତୁ ଏହି ଉପବାସ ତରୁଣଙ୍କ ସ୍ବାସ୍ଥ୍ୟ ପ୍ରତି ଖରାପ । ୭ରୁ ୮ ଘଣ୍ଟା ଉପବାସ ରହୁଥିବା ତରୁଣଙ୍କ ସେଲ ବିକାଶ ହେଉନି । ଏହାସହ ଉପବାସ ସମୟରେ ପାକସ୍ଥଳୀରେ ରାସାୟନିକ ପ୍ରତିକ୍ରିୟା ଜୋର ହେଉଥିବାରୁ ଯୁବ ବୟସରୁ ସେମାନେ ମଧୁମେହ ରୋଗରେ ପୀଡ଼ିତ ହେଉଛନ୍ତି ।
ଜର୍ମାନୀର ମ୍ୟୁନିକ ବୈଷୟିକ ବିଶ୍ବବିଦ୍ୟାଳୟ ଓ ଏଲ୍ଏମ୍ୟୁ ହସ୍ପିଟାଲର ବୈଜ୍ଞାନିକ ଗବେଷଣା କରି ଏପରି ନୂଆ ତଥ୍ୟ ଆବିଷ୍କାର କରିଛନ୍ତି । ଦୀର୍ଘ ୭ରୁ ୮ ଘଣ୍ଟା ଧରି ଉପବାସ ରହୁଥିବା ବୟସ୍କଙ୍କ ପାଇଁ ଫାଷ୍ଟିଂ ଭଲ କାମ କରୁଥିବାବେଳେ ତରୁଣମାନେ ୧୦ ସପ୍ତାହ ପରେ ସ୍ବାସ୍ଥ୍ୟ ସମସ୍ୟାରେ ପଡୁଛନ୍ତି । ସେମାନଙ୍କ କିଡନୀ ଉପରେ ଥିବା ପାକସ୍ଥଳୀରେ ଅସ୍ବାଭାବିକ ପ୍ରତିକ୍ରିୟା ସୃଷ୍ଟି ହେବା ସହ କିଶୋର କିଶୋରୀ ଅଳ୍ପ ବୟସରୁ ମଧୁମେହ ରୋଗରେ ପୀଡ଼ିତ ହେଉଥିବା ଜଣାପଡ଼ିଛି ।
ଉପବାସ ଦେହ ପାଇଁ ଭଲ କାମ କରେ । ଉପବାସ ରହିଲେ ଶରୀର ସୁସ୍ଥ ରହିବା ସହିତ ଅନେକ ରୋଗ ଦାଉରୁ ମୁକ୍ତି ମିଳିଥାଏ । ଏ ନେଇ ଭାରତୀୟ ସଂସ୍କୃତିରେ ଉପବାସକୁ ଅନେକ ମହତ୍ତ୍ବ ଦିଆଯାଇଛି । ତରୁଣମାନଙ୍କ କ୍ଷେତ୍ରରେ ଏହା ଓଲଟା କାମ କରୁଛି । ଏହାର ଅର୍ଥ ସେମାନଙ୍କ ଜୀବନଶୈଳୀ । ଆଜିକାଲି କିଶୋର ବୟସରୁ ତରୁଣ ବିଳମ୍ବିତ ରାତି ପର୍ଯ୍ୟନ୍ତ ମୋବାଇଲରେ କଥା ହେବା, ରାତି ଅନିଦ୍ରା ହେବା ସହିତ ଫାଷ୍ଟ୍ ଫୁଡ୍, ଜଙ୍କ୍ ଫୁଡ୍, ଚକଲେଟ୍ ଅତିମାତ୍ରାରେ ସେବନ କରୁଛନ୍ତି । ଯେଉଁଥିପାଇଁ ସେମାନଙ୍କ ଶରୀରରେ ରାସାୟନିକ ପ୍ରତିକ୍ରିୟା ସୃଷ୍ଟି ହେଉଛି । ରାତି ଅନିଦ୍ରା ରହୁଥିବାରୁ ସେମାନଙ୍କ ମେଟାବଲିଜିମ୍ ବିଗିଡ଼ି ଯାଇ ଶରୀର ବୃଦ୍ଧି ପାଇଁ ଆବଶ୍ୟକ ଭିଟାମିନ୍ ଅଭାବ ପଡ଼ୁଛି । ଯେଉଁଥି ପାଇଁ ଉପବାସ ସମୟରେ ସେମାନଙ୍କ ଶରୀରରେ ଭଲ ପ୍ରଭାବ ପଡ଼ିବା ପରିବର୍ତ୍ତେ ଖରାପ ପ୍ରଭାବ ପଡ଼ୁଛି ।
ଭାରତରେ ଏବେ ଦିନକୁ ଦିନ ମଧୁମେହ ରୋଗୀଙ୍କ ସଂଖ୍ୟା ବଢି ଚାଲିଛି । ଯୁବ ବୟସରୁ ମଧ୍ୟ ମଧୁମେହର ଶିକାର ହେଉଛନ୍ତି ଲୋକେ । ଖାଦ୍ୟ ସହିତ ଯଦି ତରୁଣ ବୟସରୁ ଶାରୀରିକ ବ୍ୟାୟାମ ନ କରାଯାଏ ତା’ହେଲେ ଏହି ସମସ୍ୟା ଆହୁରି ବଢିବା ଆଶଙ୍କା ରହିଛି । ତେବେ ନୂଆ ଗବେଷଣା ତରୁଣଙ୍କ ଏକ ପାଇଁ ସଚେତନତା ସୃଷ୍ଟି କରିବ ଏଥିରେ ସନ୍ଦେହ ନାହିଁ ।
ବେଆଇନ ଭାବେ ବିଏମସି ଅଞ୍ଚଳରେ ବିଡ଼ିଏ ଦେଉଛି ଘର ପ୍ଲାନ ଅନୁମୋଦନ
ଭୁବନେଶ୍ବର: ନଗର ଉନ୍ନୟନ ବିଭାଗର ନିର୍ଦ୍ଦେଶକୁ ବିଡ଼ିଏର ବେଖାତିର । ଘରର ପ୍ଲାନ ଅନୁମୋଦନ ୨୦୧୫ରୁ ବିଏମସି ପାଖକୁ ଯାଇଥିଲେ ମଧ୍ୟ ବିଡ଼ିଏ ଚଲାଇଛି ମନମାନି । ମନଇଚ୍ଛା ବେଆଇନ ଭାବେ ବିଏମସି ଅଞ୍ଚଳରେ ବିଡ଼ିଏ ଦେଉଛି ଘର ପ୍ଲାନ ଅନୁମୋଦନ । ବିଏମସିକୁ କ୍ଷମତା ଯିବା ପରଠାରୁ ବିଡ଼ିଏ ପ୍ରାୟ ୨୮୫୮ ପ୍ରକଳ୍ପକୁ ଅନୁମୋଦନ ଦେଇଛି । ବିଡ଼ିଏ ଓ ବିଏମସି କଳିରେ ଫସୁଛନ୍ତି ସାଧାରଣ କ୍ରେତା । ଏହି ୨୮୫୮ ପ୍ରକଳ୍ପର ଭାଗ୍ୟକୁ ନେଇ ଦେଖାଦେଇଛି ଅନିଶ୍ଚିତତା ।
ବିଡିଏ-ବିଏମସି କଳିରେ ଫସୁଛନ୍ତି ଘର କ୍ରେତା । ନଗର ଉନ୍ନୟନ ବିଭାଗର ଦୁଇ ଏଜେନ୍ସି ମଧ୍ୟରେ ନାହିଁ ତାଳମେଳ । ଘର ପ୍ଲାନ ଅନୁମୋଦନ ବିବାଦ ଘେରରେ ୨୮୫୮ ପ୍ରକଳ୍ପ । ୨୦୧୫ ମସିହାରୁ ରାଜ୍ୟ ସରକାର ସ୍ବାୟତ୍ତ ଶାସନ ବ୍ୟବସ୍ଥାକୁ ମଜବୁତ କରିବାକୁ ଘର ପ୍ଲାନ ଅନୁମୋଦନ କ୍ଷମତା ବିଏମସିକୁ ଦେଇଥିଲେ । ସରକାରଙ୍କ ବିଜ୍ଞପ୍ତି ସତ୍ତ୍ବେ ଘର ପ୍ଲାନ ଦେଇ କ୍ରୀମ ଖାଉଥିବା ବିଡ଼ିଏ ଏହାକୁ ଛାଡ଼ିଲା ନାହିଁ । ମନଇଚ୍ଛା ଜୋରଜବରଦସ୍ତ ବିଏମସି ଏରିଆରେ ବିଡ଼ିଏ ପ୍ଲାନ ଅନୁମୋଦନ କରିଚାଲିଲା । ବିଏମସି ଅଧୀନରେ ଥିବା ବିଡ଼ିଏର ନିଜ ପ୍ରୋଜେକ୍ଟ ଦୟା ଏନକ୍ଲେଭର କେଳେଙ୍କାରୀକୁ ରେରା ଧରିବା ପରେ କଥା ସାମ୍ନାକୁ ଆସିଲା ସତ, ହେଲେ ସୁଧୁରିଲା ନାହିଁ ବିଡ଼ିଏ । ଏବେ ବିଡ଼ିଏରୁ ମିଳିଥିବା ତଥ୍ୟ ଅନୁସାରେ ବିଏମସିକୁ କ୍ଷମତା ଗଲା ପରେ ବି ବିଡ଼ିଏ ୨୮୫୮ଟି ପ୍ରକଳ୍ପକୁ ଅନୁମୋଦନ ଦେଇଛି, ଯାହା ସମ୍ପୂର୍ଣ୍ଣ ବେଆଇନ । ଏହା ବାବଦକୁ ବିଡ଼ିଏ ୪୮ କୋଟି ୧୪ ଲକ୍ଷ ଟଙ୍କା ଆଦାୟ କରିଛି । ଯାହା ବିଏମସିକୁ ହରାଇବାକୁ ପଡ଼ିଛି । ଏହି ସବୁ ପ୍ରକଳ୍ପର ଭବିଷ୍ୟତ ଓ ଆଇନଗତ ଦିଗ ନେଇ ପ୍ରଶ୍ନ ଉଠାଇଛନ୍ତି ଆକ୍ଟିଭିଷ୍ଟ ।
ବଢି ଚାଲିଛି ରାଜଧାନୀ ଭୁବନେଶ୍ବରର କଳେବର । ଭୁବନେଶ୍ବରରେ ଘର ଖଣ୍ଡିଏ କିଣିବାକୁ ଲୋକେ ଜୀବନ ଯାକର ରୋଜଗାର ଲଗାଉଛନ୍ତି । ହେଲେ ପ୍ରଶାସନିକ ଉଦାସୀନତା ଏବଂ ଦ୍ବନ୍ଦ୍ବ ଯୋଗୁଁ ଘର କରିବା ପରେ ବି ଆଇନର ଜାଲରୁ ମୁକୁଳି ପାରୁନାହାନ୍ତି । ବିଏମସି ଏରିଆରେ ଘର କଲେ କିଏ ଦେବ ପ୍ଲାନ ଅନୁମୋଦନ ? ବିଡ଼ିଏ ନା ବିଏମସି ? ଏହା ସାଧାରଣ କ୍ରେତାଟିଏ ଜାଣିବ କିପରି ? ପ୍ଲାନ ଅନୁମୋଦନ ବାବଦକୁ ନଗର ଉନ୍ନୟନ ବିଭାଗର ବିଜ୍ଞପ୍ତିକୁ ବିଡ଼ିଏ ମାନୁ ନଥିବା ବେଳେ ବିଏମସି ବି ଚୁପ୍ ବସିଛି । ଜାଗା କିଣିବା ଠାରୁ ଆରମ୍ଭ କରି ଘରର ପ୍ଲାନ ଅନୁମୋଦନ, ବିଭାଗୀୟ କ୍ଲିୟରାନ୍ସ, ଡ୍ରେନେଜ ଓ ସ୍ବେରେଜ ବ୍ୟବସ୍ଥା ଯାଏଁ ସବୁଠି ଫସୁଛନ୍ତି ଘର କ୍ରେତା । ଯଦିଓ ରେରା କୋର୍ଟର କଡ଼ା ଆଭିମୁଖ୍ୟ ପରେ ସ୍ଥିତିରେ କିଛିଟା ସୁଧାର ଆସିଛି, ହେଲେ ବିଏମସି ବଦଳରେ ବିଡ଼ିଏ ଦେଇଥିବା ପ୍ରକଳ୍ପର ଭାଗ୍ୟ ଅନିଶ୍ଚିତତା ଘେରକୁ ଚାଲିଯାଇଛି ।
୨୦୧୫ରୁ ବିଡ଼ିଏ ଦେଇଥିବା ୨୮୫୮ଟି ପ୍ରକଳ୍ପ ମଧ୍ୟରୁ ଅଧିକାଂଶ ସାଧାରଣ ଲୋକଙ୍କର ହୋଇଥିବା ବେଳେ ବଡ଼ ବଡ଼ ଆପାର୍ଟମେଣ୍ଟ ବି ଏଥିରେ ରହିଛି । ଏସବୁ ପ୍ରକଳ୍ପ ଆଇନର ଜାଲରେ ଛନ୍ଦି ହେବାକୁ ଯାଉଥିବା ବେଳେ ବେଫିକର ହୋଇ ବସି ରହିଛି ନଗର ଉନ୍ନୟନ ବିଭାଗ । ୨୦୧୭ ପୂର୍ବର ଆପାର୍ଟମେଣ୍ଟ ପଞ୍ଜୀକରଣ ପାଇଁ କୌଣସି ସମସ୍ୟା ନାହିଁ ବୋଲି ବିଭାଗୀୟ ବିଜ୍ଞପ୍ତି ଉପରେ ଏବେ ହାଇକୋର୍ଟରେ ରହିତାଦେଶ ହୋଇଛି । ଏଭଳି ଏହିସବୁ ବେଆଇନ ପ୍ରକଳ୍ପ ଉପରେ ଆଗକୁ କ’ଣ ପଦକ୍ଷେପ ନିଆଯିବ, ତାକୁ ନେଇ ସଂଶୟରେ ରହିଛନ୍ତି ହଜାର ହଜାର କ୍ରେତା ।