ନନ୍ଦିଘୋଷ ବ୍ୟୁରୋ: ICC ଚାମ୍ପିଅନ୍ସ ଟ୍ରଫି 2025 ରେ ଇଲଣ୍ଡର ବଡ଼ ବିପର୍ଯ୍ୟୟ । ଇଂଲଣ୍ଡ ଭଳି ବିଶ୍ୱ ଚାମ୍ପିଅନ ଦଳକୁ ପରାସ୍ତ କରିଛି ଦୁର୍ବଳ ବିବେଚିତ ଆଫଗାନିସ୍ତାନ ଦଳ । ହସମତୁଲ୍ଲା ଶାହିଦିଙ୍କ ଅଧିନାୟକତ୍ୱରେ ଆଫଗାନିସ୍ତାନ ଦଳ ଇଂଲଣ୍ଡକୁ ୮ ରନରେ ପରାସ୍ତ କରିଛଇ । ଏହି ପରାଜୟ ସହିତ, ଜସ୍ ବଟଲରଙ୍କ ଅଧିନାୟକତ୍ୱରେ ଇଂଲଣ୍ଡ ଦଳ ଟୁର୍ଣ୍ଣାମେଣ୍ଟରୁ ବାହାର ହୋଇଯାଇଛି। ଏବେ ଆଫଗାନିସ୍ତାନ ଦଳ ସେମିଫାଇନାଲ ଦୌଡ଼ରେ ରହିଛି । ପରବର୍ତ୍ତୀ ମ୍ୟାଚ୍ ଅଷ୍ଟ୍ରେଲିଆ ବିପକ୍ଷରେ ଖେଳିବ ଆଫଗାନିସ୍ଥାନ । ଯଦି ଆଫଗାନିସ୍ତାନ ଦଳକୁ ସେମିଫାଇନାଲରେ ପ୍ରବେଶ କରିବାକୁ ପଡ଼େ, ତେବେ ତାକୁ ଯେକୌଣସି ମୂଲ୍ୟରେ କଙ୍ଗାରୁ ଦଳକୁ ପରାସ୍ତ କରିବାକୁ ପଡ଼ିବ। ଆଫଗାନିସ୍ତାନ ଏବଂ ଅଷ୍ଟ୍ରେଲିଆ ମଧ୍ୟରେ କାଲି ଲାହୋରରେ ଅନୁଷ୍ଠିତ ହେବ ମ୍ୟାଚ।
ଲିଙ୍ଗରାଜ ମନ୍ଦିରରେ ଉଠିଲା ମହାଦୀପ
ଭୁବନେଶ୍ୱର: ବାବା ଲିଙ୍ଗରାଜଙ୍କ ମନ୍ଦିରରେ ଉଠିଲା ମହାଦୀପ। ନିର୍ଦ୍ଧାରିତ ସମୟ ଠାରୁ ସାମାନ୍ୟ ବିଳମ୍ବ ପରେ ଉଠିଲା ମହାଦୀପ। ବେଢା ପରିକ୍ରମା ପରେ ରାତି ୧୦ଟା ୪୦ରେ ନମନ୍ଦିର ଉପରକୁ ମହାଦୀପ ଉଠିଲା । ହର ହର ମହାଦେବ ଧ୍ୱନୀରେ କମ୍ପିଲା ଲିଙ୍ଗରାଜ ମନ୍ଦିର ପରିସର । ମହାଦୀପ ଦର୍ଶନ କଲେ ଶ୍ରଦ୍ଧାଳୁ ।
ମହାଦୀପକୁ ଦର୍ଶନ କରିଛନ୍ତି ହଜାର ହଜାର ଶ୍ରଦ୍ଧାଳୁ। ମହାଦୀପକୁ ଦର୍ଶନ କରି ବ୍ରତ ପୂରଣ କରିଛନ୍ତି ଶ୍ରଦ୍ଧାଳୁ। ଜାଗର ପାଇଁ ଉତ୍ସବମୁଖର ହୋଇ ଉଠିଥିଲା ଭୁବନେଶ୍ବର ଏକାମ୍ରକ୍ଷେତ୍ର ।
ମହାଦୀପ ଉଠାଉଥିବା ବେଳେ ଖସିପଡିଲେ ସେବାୟତ
ଭୁବନେଶ୍ୱର: ଲିଙ୍ଗରାଜ ମନ୍ଦିରରେ ଅଘଟଣ। ମହାଦୀପ ଉଠୁଥିବା ବେଳେ ମନ୍ଦିରରେ ଅଘଟଣ । ମହାଦୀପ ନେଇ ମନ୍ଦିର ଉପରକୁ ଉଠୁଥିବା ବେଳେ ଖସିପଡିଲେ ସେବାୟତ ।ଅନ୍ୟ ଜଣେ ସେବାୟତ ମହାଦୀପକୁ ନେଇ ମନ୍ଦିର ଚୂଡ଼ାକୁ ଗଲେ । ଅଘଟଣକୁ ନେଇ ସେବାୟତଙ୍କ ମଧ୍ୟରେ ଅସନ୍ତୋଷ । ଗୁରୁତର ଅବସ୍ଥାରେ ସେବାୟତଙ୍କୁ ମେଡିକାଲରେ ଭର୍ତ୍ତି କରାଯାଇଛି ।
ଆସନ୍ତା ଶିକ୍ଷାବର୍ଷରୁ CBSE ଦଶମରେ ଦୁଇଟି ବୋର୍ଡ ପରୀକ୍ଷା ନେଇ ବଢିଲା ଦ୍ଵନ୍ଦ୍ଵ
ଭୁବନେଶ୍ୱର: ୨୦୨୫-୨୬ ଶିକ୍ଷା ବର୍ଷରୁ CBSE ବର୍ଷକୁ ୨ଟି ଦଶମ ବୋର୍ଡ ପରୀକ୍ଷା କରିବାକୁ ଯାଉଛି। ପ୍ରଥମ ପରୀକ୍ଷା ଫେବୃଆରୀ ଓ ଦ୍ଵିତୀୟ ମେ’ ମାସରେ ହେବ। ଯିଏ ଅଧିକ ଭଲ କରିବାକୁ ଚାହୁଁଥିବେ ସେମାନେ ପ୍ରଥମ ସହ ଦ୍ଵିତୀୟ ପରୀକ୍ଷା ବି ଦେଇପାଇବେ। ହେଲେ ପ୍ରଥମ ପରୀକ୍ଷା ବାଧ୍ୟତାମୂଳକ। ମତାମତ ମାର୍ଚ୍ଚ ୯ସୁଦ୍ଧା ଦେବାକୁ ଅଭିଭାବକ, ଶିକ୍ଷାବିତଙ୍କ ସହ ଅନେକ ଅଂଶୀଦାରଙ୍କ ପାଇଁ ସିବିଏସଇ ୱେବସାଇଟରେ ବ୍ୟବସ୍ଥା କରାଯାଇଛି। ହେଲେ ମତାମତ ଆସିବା ପର୍ବରୁ ହିଁ ଦ୍ବନ୍ଦ୍ବ ଓ ଅସନ୍ତୋଷ ଦେଖା ଦେଲାଣି। ଗୋଟିଏ ପଟେ ଛାତ୍ରଛାତ୍ରୀ ଦୁଇଟି ପରୀକ୍ଷାକୁ ନେଇ ଖୁସି ଅନୁଭବ କରୁଛନ୍ତି। ହେଲେ ଦୁଇଟି ପରୀକ୍ଷାର ଚାପ ବି ମନରେ ରହିଛି। ଏକାଦଶ ପାଠପଢା ସହ କ୍ରାସ୍ କୋର୍ସ ପ୍ରସ୍ତୁତିରେ ଅସୁବିଧା ଆଶଙ୍କା ରହିଛି। କାରଣ ଦ୍ବିତୀୟ ପରୀକ୍ଷା ଯେଉଁ ସମୟରେ ଦେବେ, ସେହି ସମୟରେ JEE, ମେଡିକାଲ ପରି ପାଠ୍ୟକ୍ରମର ଅଗ୍ରୀମ କୋଚିଂ ଆରମ୍ଭ କରିଥାନ୍ତି। ଡବଲ ବୋର୍ଡ ପରୀକ୍ଷାରେ ଭିତ୍ତିଭୂମି ମଧ୍ୟ ଏକ ପ୍ରମୁଖ ଦିଗ ବହନ କରିବ। ପ୍ରଥମ ବୋର୍ଡ ପରୀକ୍ଷା ସହ ଅନ୍ୟ କ୍ଲାସ ପ୍ରମୋସନ ପରୀକ୍ଷାର ଖାତା ଦେଖାରେ ଶିକ୍ଷକ ବ୍ୟସ୍ତ ଥିବେ। ପୁଣି ଦ୍ବିତୀୟ ପରୀକ୍ଷାର ଖାତା ଦେଖା ସମୟରେ ଏକାଦଶ ପାଠପଢା ପ୍ରଭାବିତ ହୋଇପାରେ। ଅଡୁଆ ସେତେବେଳେ ବଢିବ, ଯେବେ ଆଇସିଏସଇ ଓ ଷ୍ଟେଟ ବୋର୍ଡ ଗୁଡ଼ିକରୁ ନିଷ୍ପତ୍ତି ମଗାଯିବ। ସେମାନେ ପିଲାମାନଙ୍କୁ ଡବଲ ପରୀକ୍ଷାର ଆଉ ଏକ ସୁଯୋଗ ଦେବେ ତ? ନା ସିବିଏସଇକୁ ଆଗରେ ରଖି କେନ୍ଦ୍ର ଶିକ୍ଷା ବିଭାଗ ନିଷ୍ପତ୍ତି ନେବ? ବେଷ୍ଟ ଅଫ୍ ଓ୍ବାନର ରେଜଲ୍ଟ ପ୍ରକାଶ ପାଇବ ନା ପରୀକ୍ଷାକୁ ସପ୍ଲିମେଣ୍ଟାରୀ ଢାଞ୍ଚାରେ ବିବେଚନା କରାଯିବ? ଏତେ ସବୁ ପ୍ରଶ୍ନ ଭିତରେ ଏବେ ଘାଣ୍ଟି ହେଉଛି ସିବିଏସଇର ନୂଆ ନିୟମ ।
ସେପଟେ କେନ୍ଦ୍ରକୁ ତୀବ୍ର ଭର୍ସନା କରିଛନ୍ତି ଅଭିଭାବକ ଓ ଶିକ୍ଷାବିତ। ସରକାର ଦୁଇ ପ୍ରକାର କଥା କହି ପାରିବେନି। ପ୍ରଥମେ ଜାତୀୟ ଶିକ୍ଷା ନୀତି ୨୦୨୦ ରେ କହିଲେ ବୋର୍ଡ ପରୀକ୍ଷା ଦ୍ବାଦଶ ଶ୍ରେଣୀରେ ହେବ। ଏବେ ଦଶମରେ ଦୁଇଟି ବୋର୍ଡ ପରୀକ୍ଷାର ଅର୍ଥ କଣ ବୋଲି ଓଡ଼ିଶା ଅଭିଭାବକ ମହାସଂଘ ପ୍ରଶ୍ନ କରିଛି। ସେହିପରି ଶିକ୍ଷାବିତମାନେ ସିବିଏସଇ ଓ କେନ୍ଦ୍ର ସରକାରଙ୍କ ବ୍ୟବସାୟିକ ଦିଗ ଆଡ଼କୁ ଇସାରା କରିଛନ୍ତି। ଯେତେ ଥର ପରୀକ୍ଷା ହେବ, ସେତେ ଥର ଫର୍ମ ଫିଲ ଅପ୍ ହେବ। ବାରମ୍ବାର ଫର୍ମ ଫିଲ ଉପରେ ଟଙ୍କା ଖର୍ଚ୍ଚ ହେବ। ସରକାରଙ୍କ ଏହା ଏକ ବ୍ୟୟ ବହୁଳ ନିଷ୍ପତ୍ତି ବୋଲି ଶିକ୍ଷାବିତ ମହଲରେ ଅଭିଯୋଗ ହୋଇଛି।
ଜାତୀୟ ଶିକ୍ଷା ନୀତି ୨୦୨୦ ଆଧାରରେ ଆଞ୍ଚଳିକ ଭାଷାରେ ପରୀକ୍ଷା ଦେବାର ନିୟମ ରହିଛି। ହେଲେ ଉର୍ଦ୍ଦୁ, ବଙ୍ଗଳା, ତାମିଲ, ତେଲଗୁ, ଗୁଜୁରାଟି ଓ ମଣିପୁରୀ ପରି ଆଞ୍ଚଳିକ ଭାଷାରେ ପରୀକ୍ଷା ଦେବାକୁ ସିବିଏସଇ ଚିଠା ଯୋଜନାରେ ସ୍ଥାନ ମିଳିଥିବାବେଳେ ଓଡ଼ିଆକୁ ଏଥିରୁ ବାଦ୍ ଦିଆଯାଇଥିଲା। ହେଲେ ବିଭିନ୍ନ ମହଲରୁ ଓଡ଼ିଆ ଅସ୍ମିତା ନେଇ ନିନ୍ଦା ଆସିବା ପରେ ଚିଠା ଯୋଜନାକୁ ପୁଣି ସଂଶୋଧନ କରି ଓଡ଼ିଆ ଭାଷାକୁ ସାମିଲ କରାଗଲା ।
ଫେଲ୍ ମାରୁଛି ରାଜ୍ୟ ବିଜେପି ସଭାପତି ଚୟନ ଡେଡଲାଇନ
ଭୁବନେଶ୍ୱର: ଚାଲିଛି ବିଜେପି ସାଙ୍ଗଠନିକ ନିର୍ବାଚନ ପର୍ବ। ଫେଲ୍ ମାରୁଛି ରାଜ୍ୟ ସଭାପତି ଚୟନ ଡେଡଲାଇନ। ପ୍ରଥମେ ଜାନୁଆରୀ ୧୫, ତାପରେ ଜାନୁଆରୀ ଶେଷ ଓ ପୁଣି ଫେବୃଆରୀ ଶେଷ। ଏବେ ରାଜ୍ୟ ପ୍ରଭାରୀ କହୁଛନ୍ତି ମାର୍ଚ୍ଚ ୧୫ ସୁଦ୍ଧା ବଛାଯିବ ରାଜ୍ୟ ସଭାପତି। ତାରିଖ ପରେ ତାରିଖ ବଦଳୁଥିବା ବେଳେ ଦୂର ହୋଇପାରୁନି ରାଜ୍ୟ ସଭାପତି ଦ୍ବନ୍ଦ। ସଭାପତି ପଦକୁ ନେଇ ଦଳ ଭିତରେ ସ୍ପଷ୍ଟ ଭାବେ ବାରି ହୋଇପଡୁଛି କନ୍ଦଳ। ତେବେ ସରକାର ଗଠନର ୮ ମାସ ପରେ ବି ନିଗମ ଓ ବୋର୍ଡ ନିଯୁକ୍ତିକୁ ନେଇ ମଧ୍ୟ କସରତ ସରୁନାହିଁ। ଜିଲ୍ଲା ଯୋଜନା କମିଟି, ସ୍ବତନ୍ତ୍ର ଉନ୍ନୟନ ପରିଷଦ, ରାଜ୍ୟ ଯୋଜନା ବୋର୍ଡ, ବିଭିନ୍ନ ବିଭାଗରେ ଉପଦେଷ୍ଟା, ନିଗମ ଓ ବୋର୍ଡ ଭଳି ଥଇଥାନ ପଦବୀରେ ଶତାଧିକ ନେତାଙ୍କୁ ନିଯୁକ୍ତି କରିବାକୁ ଦଳ ଯୋଜନା କରୁଛି। ଏଥିପାଇଁ ଆରମ୍ଭ ହୋଇଛି କସରତ।
ରାଜ୍ୟରେ ପ୍ରଥମ ଥର ପାଇଁ ସରକାର ଗଠନ ପରେ ଦଳ ଓ ସରକାର ମଧ୍ୟରେ ସମନ୍ବୟ ପାଇଁ ଘନ ଘନ ବୈଠକ ବସୁଛି। ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓଙ୍କ ସରକାରୀ ବାସଭବନରେ ଏକାଠି ହୋଇଛନ୍ତି ଦଳର ତୁଙ୍ଗ ନେତା। ରାଜ୍ୟ ପ୍ରଭାରୀ ବିଜୟ ପାଲ ତୋମାର, ରାଷ୍ଟ୍ରୀୟ ସାଧାରଣ ସମ୍ପାଦକ ତରୁଣ ଚୁଗ, ରାଜ୍ୟ ସଭାପତି, ମୁଖ୍ୟମନ୍ତ୍ରୀ, ଉପମୁଖ୍ୟମନ୍ତ୍ରୀ, ଦଳର ବରିଷ୍ଠ ନେତାମାନେ ଏକାଠି ହୋଇ ନିଗମ ଓ ବୋର୍ଡ଼ ନିଯୁକ୍ତି ବାବଦରେ ଆଲୋଚନା କରିଥିବା ଜଣାପଡ଼ିଛି। ଏହା ସହ ରାଜ୍ୟ ସଭାପତି ଓ ରାଜ୍ୟ କମିଟି ପଦାଧିକାରୀ ଚୟନ ବି ମୁଖ୍ୟ ପ୍ରସଙ୍ଗ ରହିଛି। ଏସବୁ ନିଯୁକ୍ତି ହୋଇପାରୁନଥିବାରୁ ଦଳ ଓ ସରକାର ଉଭୟ ଗତିଶୀଳ ହୋଇ ପାରୁନାହାନ୍ତି। ସବୁ କଥାରେ କେନ୍ଦ୍ରୀୟ ନେତୃତ୍ବଙ୍କ ଇଙ୍ଗିତକୁ ଅପେକ୍ଷା କରୁଛି ରାଜ୍ୟ ବିଜେପି। ତେବେ ଖୁବ ଶୀଘ୍ର ସାଙ୍ଗଠନିକ ନିର୍ବାଚନ ସହିତ ନିଗମ ଓ ବୋର୍ଡ ନିଯୁକ୍ତି ହେବ ବୋଲି କେନ୍ଦ୍ର ନେତା କହିଛନ୍ତି।
ସଙ୍ଗଠନରେ ଦ୍ବନ୍ଦ, ସରକାରରେ ସ୍ଥାଣୁତା। ସଭାପତି ଚୟନ ନେଇ ପଦ୍ମ ଯେପରି ଘୁଞ୍ଚି ଘୁଞ୍ଚି ଯାଉଛି, ନିଗମ ଓ ବୋର୍ଡ ନିଯୁକ୍ତି ମଧ୍ୟ ସେତିକି ବିଳମ୍ବିତ ହେଉଛି। ଅନ୍ୟପଟେ ଆଶାୟୀଙ୍କ ତାଲିକା ବଢ଼ି ଚାଲିଥିବାରୁ, ବିଜେପି ନେତାଙ୍କ ଚିନ୍ତା ବଢ଼ିବାରେ ଲାଗିଲାଣି।
ବାଲେଶ୍ବରରେ ବଢୁଛି ବାଂଲାଦେଶୀଙ୍କ ସଂଖ୍ୟା, ନିଶା କାରବାର ଓ ଅପରାଧରେ ବାଂଲାଦେଶୀଙ୍କ ସଂପୃକ୍ତି
ବାଲେଶ୍ବର: ବାଲେଶ୍ବରରେ ଦିନକୁ ଦିନ ବଢିବାରେ ଲାଗିଛି ବାଂଲାଦେଶୀଙ୍କ ସଂଖ୍ୟା। ବାଲେଶ୍ବର ଉପକଣ୍ଠରେ ବଢୁଛି ଝୁମ୍ପୁଡ଼ି ବସ୍ତି । ବସ୍ତିରେ ଥିବା ଜନସଂଖ୍ୟା ମଧ୍ୟରୁ ଅଧିକ ବାଂଲାଦେଶୀ । ସମୁଦ୍ରକୂଳ ଅଞ୍ଚଳରେ ସମାନ ସ୍ଥିତି। ଜନବସତି ଓ ସମୁଦ୍ର ଆଡ଼ିବନ୍ଧ ମଝିରେ ଥିବା ସରକାରୀ ଜମିକୁ ମାଡ଼ି ବସିଲେଣି ଅନୁପ୍ରବେଶକାରୀ। ଜଣେ ଝାଟିମାଟି ଘରକରି ରହିବାପରେ ପରବର୍ତ୍ତୀ ସମୟରେ ସେମାନଙ୍କ ସମ୍ପର୍କୀୟ ଆସି ତିଆରି କରୁଛନ୍ତି ଗାଁ। କିଏ ରାଜମିସ୍ତ୍ରୀ ତ କିଏ ଗାଁକୁ ଗାଁ ବୁଲି ଫେରି କରୁଛନ୍ତି । କିଛି ସମୁଦ୍ରରୁ ମାଛ ମାରିବାରେ ଟ୍ରଲର୍, ବୋଟରେ ନିୟୋଜିତ ହେଉଛନ୍ତି । ଏପରିକି ବେଆଇନ ଭାବେ ଆଧାର କାର୍ଡ ହାତେଇ ଭାରତୀୟ ଭାବେ ବିଦେଶକୁ ଯାଉଥିବା ଅଭିଯୋଗ ହୋଇଛି। ତେବେ ଅଞ୍ଚଳରେ ନିଶା, ଚୋରି, ଛିନତାଇ, ହତ୍ଯା ପରି ଘଟଣାରେ ବାଂଲାଦେଶୀଙ୍କ ସଂପୃକ୍ତି ଅଭିଯୋଗ ଆସିବା ପରେ ଚିନ୍ତାରେ ଲୋକେ । ତୁରନ୍ତ ଅନୁପ୍ରବେଶକାରୀଙ୍କୁ ଚିହ୍ନଟ କରି କାର୍ଯ୍ଯାନୁଷ୍ଠାନ ପାଇଁ ଦାବି ହୋଇଛି ।
ଓଡ଼ିଶା ବିଧାନ ସଭାରେ ରାଜସ୍ଵ ମନ୍ତ୍ରୀଙ୍କ ଉତ୍ତରରୁ ମିଳିଥିବା ତଥ୍ୟ ଅନୁସାରେ ଓଡ଼ିଶାର ୧୧ ଜିଲ୍ଲାରେ ମୋଟ ୧ ଲକ୍ଷ ୫୭ ହଜାର ୪୩୨ ଜଣ ବାଂଲାଦେଶୀ ଅଛନ୍ତି । ସେମାନଙ୍କ ମଧ୍ୟରୁ ମାଲକାନାଗିରି ଜିଲ୍ଲାରେ ସର୍ବାଧିକ ୧ ଲକ୍ଷ ୪ ହଜାର ୨୩୩ । ହେଲେ ବାସ୍ତବ ସ୍ଥିତି ଭିନ୍ନ । ଅନେକ ଅନୁପ୍ରବେଶକାରୀ ବେଆଇନଭାବେ ପ୍ରମାଣପତ୍ର ପ୍ରସ୍ତୁତ କରି ଭାରତୀୟ ପାଲଟି ଯାଇଥିବା ଗୁଇନ୍ଦା ବିଭାଗ ନିକଟରେ ସୂଚନା ରହିଛି । ନିକଟରେ ହାଇୱେ ଡ଼କାୟତି, ଟ୍ରିପଲ ମର୍ଡ଼ର, ବ୍ରାଉନସୁଗାର ଚାଲାଣ ମାମଲାରେ ବାଂଲାଦେଶୀଙ୍କ ସମ୍ପୃକ୍ତି ଏହି ଅଭିଯୋଗକୁ ପ୍ରମାଣିତ କରିଛି । ରାଜସ୍ଵ ମନ୍ତ୍ରୀ କହିଛନ୍ତି ଏହି ସମ୍ବେଦନଶୀଳ ପ୍ରସଙ୍ଗରେ ସରକାର ଉଦ୍ୟମ ଆରମ୍ଭ କରିଛନ୍ତି ।
ଦିନରେ ଶ୍ରମିକ ଓ ବ୍ୟବସାୟୀ । ଆଉ ରାତିରେ ସାଜୁଛନ୍ତି ଅପରାଧୀ । ସରକାରଙ୍କ ଉଦାସୀନତା ଅନୁପ୍ରବେଶକୁ ଉତ୍ସାହିତ କରୁଥିବା ଅଭିଯୋଗ ହୋଇଛି ।
ସୁଡାନରେ ସୈନ୍ୟ ବିମାନ ଦୁର୍ଘଟଣାଗ୍ରସ୍ତ, ୪୯ ମୃତ
ନନ୍ଦିଘୋଷ ବ୍ୟୁରୋ : ସୁଡାନରେ ସୈନ୍ୟ ବିମାନ ଦୁର୍ଘଟଣାଗ୍ରସ୍ତ। ଏଥିରେ ଥିବା ୪୯ ଜଣ ଯାତ୍ରୀଙ୍କ ମୃତ୍ୟୁ ଘଟିଥିବା ବେଳେ ୧୦ ଜଣ ଆହାତ ହୋଇଛନ୍ତି । ଏନେଇ ସେନା ଅଧିକାରୀ ସୂଚନା ଦେଇଛନ୍ତି।
ସେନା ଅଧିକାରୀଙ୍କ ସୂଚନା ଅନୁଯାୟୀ, ସୁଡାନର ଓମଡୁରମାନ ସହରରେ ଘଟିଛି ଏହି ଦୁର୍ଘଟଣା। ସେନା ବିମାନ ଆଣ୍ଟୋନୋଭ୍ ମଙ୍ଗଳବାର ଦିନ ଓମଡୁରମାନର ଉତ୍ତରରେ ଥିବା ୱାଡି ସୟେଦନା ଏୟାରବେସରୁ ଉଡ଼ାଣ ଭରିଥିଲା। ତେବେ ଟେକ୍ ଅପ୍ କରିବା ସମୟରେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା। ଦୁର୍ଘଟଣାର କାରଣ ଏପର୍ଯ୍ୟନ୍ତ ସେନା ଅଧିକାରୀ ସ୍ପଷ୍ଟ କରିନାହିନ୍ତି ।
ଏହି ଦୁର୍ଘଟଣାରେ ସାମରିକ କର୍ମଚାରୀ ଏବଂ ସାଧାରଣ ନାଗରିକଙ୍କ ମୃତ୍ୟୁ ହୋଇଥିବା ସେନା ଅଧିକାରୀ ସୂଚନା ଦେଇଛନ୍ତି ।
ଅବହେଳା ଯୋଗୁଁ ଭୌଗଳିକ ମାନଚିତ୍ରରୁ ବିଲୁପ୍ତ ହେବାକୁ ବସିଲାଣି ତାମ୍ପରା ହ୍ରଦ
ଗଞ୍ଜାମ: ସରକାରୀ ଜମିକୁ ଆନ୍ଧ୍ର ବ୍ୟବସାୟୀଙ୍କ ହଡ଼ପ। ପୋଖରୀ ପାଣିରେ ରାସାୟନିକ ସାର ଓ କେମିକାଲ ପ୍ରୟୋଗ। ପ୍ରଦୂଷିତ ସହ ବିଷାକ୍ତ ହେଉଛି ତାମ୍ପରା ଜଳାଶୟ ପାଣି। ଗଞ୍ଜାମ ଜିଲ୍ଲା ଛତ୍ରପୁର ବ୍ଲକ ଅନ୍ତର୍ଗତ ବିପୁଳିଙ୍ଗୀ ପଞ୍ଚାୟତର କରାତଳି ଗାଁ ନିକଟରେ ଥିବା ତାମ୍ପରା ଜଳାଶୟକୁ ଆନ୍ଧ୍ର ମାଛ ବ୍ୟବସାୟୀ ହଡ଼ପ କରି ମାଛ ଚାଷ କରୁଛନ୍ତି । ଏହା ସହିତ ଉକ୍ତ ପୋଖରୀରେ ରାସାୟନିକ ସାର ଓ କେମିକାଲ ଦ୍ରବ୍ୟ ପ୍ରୟୋଗ କରାଯାଉଛି। ସେହି ପାଣି ତମ୍ପରା ହଦ୍ରକୁ ଯିବା ଦ୍ୱାରା ଜଳ ପ୍ରଦୂଷିତ ହେବା ସହ ବିଷାକ୍ତ ହେଉଛି। ଜନସାଧାରଣ ସେହି ପାଣିକୁ ବ୍ୟବହାର କରି ବିଭିନ୍ନ ଚର୍ମ ରୋଗରେ ଆକ୍ରାନ୍ତ ହେଉଛନ୍ତି । ଏଥିସହିତ ରାସାୟନିକ ପାଣି ଚାଷ ଜମିକୁ ଆସୁଥିବାରୁ ଫସଲ ମଧ୍ୟ ନଷ୍ଟ ହେଉଛି। ହ୍ରଦର ମଧୁର ଜଳକୁ ବଡ଼ ବଡ଼ ପାଣି ମୋଟର ସାହାଯ୍ୟରେ ମାଛ ଚାଷ ପାଇଁ ତିଆରି କରିଥିବା ପୋଖରୀରେ ଭର୍ତ୍ତି କରୁଛନ୍ତି । ଆଉ ବେଆଇନ ଭାବେ ବିଶାକ୍ତ ଜଳକୁ ପୁଣି ତମ୍ପରା ହ୍ରଦକୁ ଛାଡ଼ିଦେଉଥିବା ଅଭିଯୋଗ ହୋଇଛି। ତୁରନ୍ତ ଆନ୍ଧ୍ର ମାଛ ବ୍ୟବସାୟୀଙ୍କୁ ସେଠାରୁ ଉଛେଦ କରିବା ସହ ତାମ୍ପରା ହ୍ରଦର ସୁରକ୍ଷା କରିବାକୁ ଦାବି କରିଛନ୍ତି ସ୍ଥାନୀୟ ଲୋକେ ।
ଛତ୍ରପୁର ଓ ଗଞ୍ଜାମ ବ୍ଲକର ପାଖାପାଖି ୧୦ରୁ ଅଧିକ ପଞ୍ଚାୟତବାସୀଙ୍କ ଲାଇଫ ଲାଇନ୍ ହେଉଛି କରାତଳି ତମ୍ପରା ହଦ୍ର। ଦିନଥିଲା ଏହି ଜଳ ଭଣ୍ଡାରରୁ ମତ୍ସ୍ୟଜୀବୀମାନେ ମାଛ ମାରି ନିଜ ପରିବାର ଲୋକଙ୍କ ମୁହଁରେ ଦାନ ଯୋଗାଉଥିଲେ। ଚାଷ ଜମିକୁ ଜଳ ସେଚନ କରୁଥିଲେ ଚାଷୀ। ହେଲେ ଆନ୍ଧ୍ର ମାଛ ମାଫିଆଙ୍କ ନଜର ପଡ଼ିବା ପରେ ଶ୍ରୀହୀନ ହୋଇପଡ଼ିଛି ତାମ୍ପରା ହ୍ରଦ। ଆନ୍ଧ୍ର ମାଫିଆମାନେ ତାମ୍ପରାର ଚତୁପାଶ୍ୱର୍ରେ ଥିବା ଜମିକୁ ଜବର ଦଖଲ କରିବା ଫଳରେ ଜଳସେଚନ ପଥ ଦିନକୁ ଦିନ ସଙ୍କୁଚିତ ହେବାରେ ଲାଗିଛି l ଅନେକ ଥର ପଞ୍ଚାୟତ ସମିତି ବୈଠକ, ବିଧାନସଭାରେ ମଧ୍ୟ ପ୍ରଶ୍ନ ଉଠାଯାଇଥିଲେ ମଧ୍ୟ ଏଯାଏଁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ । ତୁରନ୍ତ ତାମ୍ପରାକୁ ଆନ୍ଧ୍ର ଦଲାଲ କବଳରୁ ମୁକ୍ତ କରି ଜଳସେଚନ ପ୍ରଣାଳୀକୁ କ୍ରିୟାଶୀଳ କରିବାକୁ ଚାଷୀ ନେତାମାନେ ଦାବି କରିଛନ୍ତି । ନଚେତ ଆଗାମି ଦିନରେ ଜନସଧାରଣଙ୍କ ଦ୍ୱାରା ବ୍ୟାପକ ଆନ୍ଦୋଳନର କରାଯିବ ବୋଲି ସେମାନେ ଚେତାବନୀ ଦେଇଛନ୍ତି ।
ବ୍ୟାଙ୍କ ଯଦି ବନ୍ଦ ହୋଇଯିବ, ତେବେ ଗ୍ରାହକଙ୍କ ଜମା ଅର୍ଥ କ’ଣ ହେବ: ଭାରତରେ କ’ଣ ରହିଛି ବ୍ୟାଙ୍କିଂ ନିୟମ?
ସାଧାରଣ ଭାବେ ଜନସାଧାରଣ ସେମାନଙ୍କର ସଞ୍ଚିତ ଅର୍ଥକୁ ବ୍ୟାଙ୍କରେ ରଖିଥାନ୍ତି । ଆବଶ୍ୟକ ପଡ଼ିଲେ ଲୋକମାନେ ନିଜ ନିଜ ଆକାଉଣ୍ଟରୁ ଟଙ୍କା ଉଠାଇଥାନ୍ତି । ଅଧିକ ରୋଜଗାର କରୁଥିବା ଲୋକମାନେ ବ୍ୟାଙ୍କରେ ଲକ୍ଷାଧିକ ଟଙ୍କା ଜମା ରଖିଥାନ୍ତି । ତେବେ ଅନେକ ସମୟରେ ବ୍ୟାଙ୍କିଂ ନିୟମ ଉଲ୍ଲଂଘନ କାରଣରୁ କିଛି ବ୍ୟାଙ୍କର ଲାଇସେନ୍ସ ରଦ୍ଦ କରିଦେଇଥାଏ ଭାରତୀୟ ରିଜର୍ଭ ବ୍ୟାଙ୍କ (RBI) । ବିଭିନ୍ନ ସମୟରେ ବ୍ୟାଙ୍କ ଉପରେ କେନ୍ଦ୍ରୀୟ ବ୍ୟାଙ୍କ କାର୍ଯ୍ୟାନୁଷ୍ଠାନ ଗ୍ରହଣ କରିଥାଏ । କେଉଁ ବ୍ୟାଙ୍କ ବନ୍ଦ ହେବ, ବ୍ୟାଙ୍କିଂ ଅପରେସନ ଜାରି ରହିବ କି ନା ତାହା ଆରବିଆଇ ସ୍ଥିର କରିଥାଏ । ବ୍ୟାଙ୍କଗୁଡ଼ିକ ଆରବିଆଇର ନିର୍ଦ୍ଦେଶ ମାନିବାକୁ ବାଧ୍ୟ ହୋଇଥାନ୍ତି । ନିକଟରେ ନ୍ୟୁ ଇଣ୍ଡିଆ କୋ-ଅପରେଟିଭ ବ୍ୟାଙ୍କକୁ ଆରବିଆଇ ବ୍ୟାନ କରିଦେଇଥିଲା । ଏହି ବ୍ୟାଙ୍କ ଉପରେ ଆରବିଆଇ ୬ ମାସ ପାଇଁ କଟକଣା ଲାଗୁ କରିଥିଲା ।
ତେଣୁ କୌଣସି ବ୍ୟାଙ୍କ ଯଦି ବନ୍ଦ ହୋଇଯାଏ ବା ଲାଇସେନ୍ସ ରଦ୍ଦ ହୋଇଯାଏ, ତେବେ ଗ୍ରାହକମାନେ କଣ କରିବେ? ବ୍ୟାଙ୍କରେ ଜମା ଥିବା ସେମାନଙ୍କର ଅର୍ଥ କ’ଣ ହେବ? ଏପରି ଏକାଧିକ ପ୍ରଶ୍ନ ସାମ୍ନାକୁ ଆସୁଛି । ନ୍ୟୁ ଇଣ୍ଡିଆ କୋ-ଅପରେଟିଭ ବ୍ୟାଙ୍କ ବନ୍ଦ ହୋଇଯିବା ଫଳରେ ଅନେକ ଗ୍ରାହକଙ୍କର ଲକ୍ଷାଧିକ ଟଙ୍କା ଫସି ରହିଥିଲା । ଅନେକ ଲୋକ ବର୍ଷ ବର୍ଷର ପେନସନ ରାଶି ମଧ୍ୟ ଉଠାଇ ପାରିନଥିଲେ । ବ୍ୟାଙ୍କ ଶାଖାମାନଙ୍କରେ ଲମ୍ବା ଲାଇନ୍ ଦେଖିବାକୁ ମିଳିଥିଲା । ଅନ୍ୟପକ୍ଷରେ ଆଗାମୀ ୬ ମାସ ପାଇଁ କୌଣସି ନେଣଦେଣ ହୋଇପାରିବ ନାହିଁ ବୋଲି ଆରବିଆଇ ପକ୍ଷରୁ କୁହାଯାଇଥିଲା । ତେଣୁ ଏପରି ସ୍ଥିତି ଆପଣଙ୍କ ସହ ବି ଘଟିପାରେ । ବ୍ୟାଙ୍କ ବନ୍ଦ ହେବା ପରେ ଗ୍ରାହକମାନେ ନିଜ ଆକାଉଣ୍ଟରୁ କେତେ ଟଙ୍କା ଉଠାଇ ପାରିବେ, ତାହା ଜାଣିବା ନିହତି ଆବଶ୍ୟକ ।
ନ୍ୟୁ ଇଣ୍ଡିଆ କୋ-ଅପରେଟିଭ ବ୍ୟାଙ୍କ କଥା ଯଦି କହିବା, ବ୍ୟାଙ୍କର ଶାଖାମାନଙ୍କରେ ଭିଡ଼ ବୃଦ୍ଧିକୁ ଦୃଷ୍ଟିରେ ରଖି ଏକ ନମ୍ବର ଜାରି କରାଯାଇଥିଲା । ଏହି ନମ୍ବର ଜରିଆରେ ଗ୍ରାହକମାନେ ସୂଚନା ପାଇଥିଲେ । ଏଥିସହିତ ବ୍ୟାଙ୍କ ଲକର ସିଷ୍ଟମକୁ ମଧ୍ୟ ଚାଲୁ କରାଯାଥିଲା । ଲକରରେ ଜମା ଥିବା ଅର୍ଥ ଗ୍ରାହକ ଉଠାଇ ପାରିବେ ବୋଲି କୁହାଯାଇଥିଲା । ମାତ୍ର ଏନେଇ ଆରବିଆଇର କିଛି ନିୟମ ରହିଛି । ଆରବିଆଇ ତରଫରୁ ଏକ ଡିପୋଜିଟ ଇନସ୍ୟୁରାନ୍ସ ଆଣ୍ଡ କ୍ରେଡିଟ ଗ୍ୟାରେଣ୍ଟି କର୍ପୋରେସନ (DICGC) ଗଠନ କରାଯାଇଛି । ଏପରି ସ୍ଥିତିରେ DICGC ବ୍ୟାଙ୍କ ଓ ବ୍ୟାଙ୍କର ଗ୍ରାହକଙ୍କୁ ସହାୟତା ପ୍ରଦାନ କରିଥାଏ । ବ୍ୟାଙ୍କ ବନ୍ଦ ହୋଇଗଲେ ଗ୍ରାହକଙ୍କୁ କେତେ ଟଙ୍କା ମିଳିବ ତାହା DICGC ସ୍ଥିର କରିଥାଏ ।
୧୯୭୮ ମସିହାରେ ଆରବିଆଇ DICGCର ଗଠନ କରିଥିଲା । ଯେଉଁ ଲୋକମାନେ ବ୍ୟାଙ୍କରେ ଅର୍ଥ ଜମା କରିଥାନ୍ତି, ଏହି ନିଗମ ସେମାନଙ୍କୁ ଏହି ବୀମା କଭରେଜ ପ୍ରଦାନ କରିଥାଏ । ଯେତେବେଳେ ବ୍ୟାଙ୍କ ଦେବାଳିଆ ବା ବନ୍ଦ ହୋଇଯାଏ, ସେହି ସମୟରେ ଏହି ନିଗମ ଅଧିନରେ ଲୋକଙ୍କୁ ପଇସା ମିଳିଥାଏ । ପ୍ରକୃତରେ ଏହା ବୀମା ଅର୍ଥ ହୋଇଥାଏ । ବ୍ୟାଙ୍କ ବନ୍ଦ ହେଲେ କି ଦେବାଳିଆ ହେଲେ ଗ୍ରାହକଙ୍କୁ ସିଧାସଳଖ ଅର୍ଥ ମିଳିନଥାଏ । ପ୍ରତି ଜମାକାରୀଙ୍କ ପାଇଁ ଏହି ବୀମା କଭର ୫ ଲକ୍ଷ ଟଙ୍କା ପର୍ଯ୍ୟନ୍ତ ହୋଇଥାଏ । ଯଦି କୌଣସି ବ୍ୟାଙ୍କ ଦେବାଳିଆ ହୋଇଯାଏ, ତେବେ ଗ୍ରାହକଙ୍କୁ DICGC ଅଧିନରେ ଅର୍ଥ ମିଳିଥାଏ । DICGC ମୁତାବକ, ବ୍ୟାଙ୍କ ବନ୍ଦ ହେବା ପରେ ଗ୍ରାହକଙ୍କୁ ସର୍ବାଧିକ ୫ ଲକ୍ଷ ଟଙ୍କା ପର୍ଯ୍ୟନ୍ତ ମିଳିଥାଏ । ଏହାର ଅର୍ଥ ହେଉଛି, ଯଦି କୌଣସି ବ୍ୟକ୍ତି ବ୍ୟାଙ୍କରେ ୫ ଲକ୍ଷରୁ ଅଧିକ କି କମ୍ ଅର୍ଥ ଜମା କରିଥାନ୍ତି, ତେବେ ତାଙ୍କୁ ୫ ଲକ୍ଷ ଟଙ୍କା ହିଁ ମିଳିବ ।
ଚଳିତ ବର୍ଷ ମେ’ ୨ରେ ଖୋଲିବ କେଦାରନାଥଙ୍କ କପାଟ
ନୂଆଦିଲ୍ଲୀ: ଚାରିଧାମ ଯାତ୍ରା ପାଇଁ ଖୁସି ଖବର। ବାବା କେଦାରନାଥ ଧାମଙ୍କ ଦ୍ୱାର ଖୋଲିବାର ତାରିଖ ଘୋଷଣା ହୋଇଛି । ପବିତ୍ର ମହାଶିବରାତ୍ରି ଅବସରରେ ସ୍ଥିର ହୋଇଛି ତାରିଖ ଓ ସମୟ । ଯେଉଁ ସମୟକୁ ଯେଉଁ ମୁହୂର୍ତ୍ତକୁ କୋଟି କୋଟି ଶିବଭକ୍ତ ଅପେକ୍ଷା କରି ରହିଥିଲେ ଶେଷରେ ସେହି ସମୟ ଆସିଯାଇଛି ଆଉ ମହାଦେବ ବାବା କେଦାରନାଥଙ୍କ କପାଟ ଖୋଲିବାର ଦିନ ଓ ମୁହୂର୍ତ୍ତର ସ୍ଥିର ହୋଇଛି ।
ଚଳିତ ବର୍ଷ ମେ’ ୨ରେ ଖୋଲିବ କେଦାରନାଥଙ୍କ କପାଟ । ଠିକ୍ ସକାଳ ୭ଟାରେ ଏହି ଦିବ୍ୟ କାର୍ଯ୍ୟର ଆରମ୍ଭ କରାଯିବ ଆଉ ସେହି ସମୟରୁ ହିଁ ଆରମ୍ଭ ହେବ ଚାରିଧାମ ଯାତ୍ରା। ତେବେ ଉଖୀମଠ ସ୍ଥିତ ଓଁକାରେଶ୍ବର ମନ୍ଦିରରୁ ବାବାଙ୍କ ଶୋଭାଯାତ୍ରା ମେ ୧ରେ କେଦାରନାଥରେ ପହଞ୍ଚିବ ଆଉ ମେ ୨ ସକାଳେ କପାଟ ଖୋଲାଯିବ ।
ତେବେ ଏକାଦଶ ଜୋତିର୍ଲିଙ୍ଗ ଭାବେ ପରିଚିତ ବାବା କେଦାରନାଥଙ୍କ ଧାମ ପ୍ରତି ବର୍ଷ ଶୀତଋତୁରେ ବନ୍ଦ ରୁହେ । ପ୍ରବଳ ତୁଷାରପାତ ପାଇଁ ୬ ମାସ ଏହି ଧାମ ବନ୍ଦ ରହୁଥିବା ବେଳେ ଏହି ୬ ମାସ ଯାଏଁ ଉଖୀମଠ ସ୍ଥିତ ଓଁକାରେଶ୍ବର ମନ୍ଦିରରେ ବାବାଙ୍କ ପୂଜାର୍ଚ୍ଚନା କରାଯାଏ ।