ପୁରୀ : ପୁଣି ଶ୍ରୀମନ୍ଦିର ନିଶିଦ୍ଧାଞ୍ଚଳରେ ଉଡ଼ିଲା ଡ୍ରୋନ୍ । ପ୍ରାୟ ୨୫ ମିନିଟ୍ ଧରି ପଇଁତରା ମାରିଲା ଡ୍ରୋନ୍ । ନୀଳଚକ୍ର ଉପରିଭାଗ ଓ ପରିକ୍ରମା ମାର୍ଗ ଉପରେ ଉଡ଼ିଲା ଡ୍ରୋନ୍ । ଡ୍ରୋନ୍ ଟି କେଉଁଠାରୁ ଅପରେଟ ହେଉଛି, ତାର ସ୍ପଷ୍ଟ ସୂଚନା ମିଳିପାରି ନାହିଁ । ଗତ ୫ ଜାନୁଆରୀରେ ଏକ ଅଜଣା ଡ୍ରୋନ୍ ଉଡ଼ିବା ଘଟଣା ସାଧାରଣରେ ଅସନ୍ତୋଷ ସୃଷ୍ଟି କରିଥିଲା । ଘଟଣାକୁ ଗୁରୁତର ସହ ନେଇଥିଲା ପ୍ରଶାସନ । ହେଲେ ତାଗିଦ ଓ ବ୍ଯପକ ବ୍ଯବସ୍ଥା ସତ୍ତ୍ବେ ଆଜି ପୁଣି ନିଶିଦ୍ଧାଞ୍ଚଳରେ ଉଡ଼ିଛି ଡ୍ରୋନ୍ । ଯାହାକୁ ନେଇ ତୀବ୍ର ଅସନ୍ତୋଷ ପ୍ରକାଶ ପାଇଛି ।
ଭୁବନେଶ୍ଵରରେ ଉତ୍କର୍ଷ ଓଡ଼ିଶା-ମେକ୍ ଇନ୍ ଓଡ଼ିଶା ଉଦଘାଟିତ
ଭୁବନେଶ୍ବର : ଶିଳ୍ପ କ୍ଷେତ୍ରରେ ଓଡ଼ିଶା ଦେଶର ଡ୍ରାଇଭିଂ ଇଞ୍ଜିନ । ଓଡିଶାରେ ନୂଆ ଭାରତ ନିର୍ମାଣର ରହିଛି ପର୍ୟ୍ୟାପ୍ତ ସମ୍ଭାବନା। ଓଡ଼ିଶା ବାସୀ ଙ୍କ କୌଶଳ, ପରିଶ୍ରମ ଓ ସଚୋଟତା ମୁଁ ଗୁଜରାଟ ରେ ଅନୁଭବ କରିଛି । ଖୁବଶୀଘ୍ର ଓଡ଼ିଶା ଏତେ ଉଚ୍ଚ ଶିଖର ରେ ପହଁଚିବ ଯେ କେହି କେବେ କଳ୍ପନା କରି ନଥିବେ । ନିବେଶକ ମାନଙ୍କ ପାଇଁ ଦେଶରେ ଆଗୁଆ ରାଜ୍ୟ ଭିତରେ ଓଡ଼ିଶା ଏକ ନମ୍ବର। ଭାରତର ଟ୍ରେଣ୍ଡ ବଦଳୁଛି । ସମୟର ଓ ନିଜର ଆବଶ୍ୟକତା ଅନୁଯାୟୀ ଆମକୁ ପରିବର୍ତ୍ତନ ହେବାକୁ ପଡ଼ିବ । ରିନିଉବୁଲ ଏନର୍ଜି ଓ ଗ୍ରୀନ ହାଇଡ୍ରୋଜେନକୁ ନେଇ ଓଡ଼ିଶାରେ ପର୍ୟ୍ୟାପ୍ତ ସମ୍ଭାବନା ଅଛି । ଓଡ଼ିଶାରେ ପେଟ୍ରୋ ଓ ପେଟ୍ରୋ କେମିକାଲ ପାଇଁ ବି ସମ୍ଭାବନା ରହିଛି । ଓଡିଶାରେ ଶିଳ୍ପ ର ଲଜିଷ୍ଟିକ ଦାମ କମ କେମିତି ହେବ ସେଥିପାଇଁ ନୂଆ ପୋର୍ଟ ନିର୍ମାଣ କରାଯାଉଛି । ବ୍ଲୁ ଇକୋନୋମି ରେ ଦେଶର ଅଗ୍ରଣୀ ରାଜ୍ୟରେ ସାମିଲ ହେବ ଓଡ଼ିଶା । ଓଡିଶା ପର୍ୟ୍ୟଟନ ର କଥା କହିଲେ ପ୍ରଧାନମନ୍ତ୍ରୀ । ଭାରତ କୁ ବୁଝିବାକୁ ହେଲେ ଓଡ଼ିଶା କୁ ଦେଖନ୍ତୁ । ଏଠାକାର ଆଧ୍ୟାତ୍ମିକ, ଜଙ୍ଗଲ, ପର୍ୟ୍ୟଟନ, ସମୁଦ୍ର କୁ ଦେଖିବାକୁ ହେବ ଓଡିଶା ପର୍ୟ୍ୟଟନ ର କଥା କହିଲେ ପ୍ରଧାନମନ୍ତ୍ରୀ । ଭାରତ କୁ ବୁଝିବାକୁ ହେଲେ ଓଡ଼ିଶା କୁ ଦେଖନ୍ତୁ । ଏଠାକାର ଆଧ୍ୟାତ୍ମିକ, ଜଙ୍ଗଲ, ପର୍ୟ୍ୟଟନ, ସମୁଦ୍ର କୁ ଦେଖିବାକୁ ହେବ । ଶିଳ୍ପପତି ଓ ଓଡିଶା ସରକାର ମିଳିତ ଭାବେ ଏଠି ଏକ ଆଧୁନିକ ଇକୋ ସିଷ୍ଟମ ପ୍ରସ୍ତୁତ କରନ୍ତୁ । ଏଠିକାର ଯୁବକ ଙ୍କୁ ଓଡ଼ିଶାରେ ହିଁ ନିଯୁକ୍ତି ଦିଅନ୍ତୁ । ଓଡିଶା ସଶକ୍ତ ହେବ, ସମୃଦ୍ଧ ହେବ ଓ ଉତ୍କର୍ଷ ହେବ ବୋଲି ପ୍ରଧାନମନ୍ତ୍ରୀ ଉତ୍କର୍ଷ ଓଡ଼ିଶା ୨୦୨୫ର ଉଦ୍ଘାଟନ କରି କହିଛନ୍ତି। ପୁଞ୍ଜିନିବେଶର ନୂଆ ଦିଗ କନସର୍ଟ ଇକୋନୋମୀ ଏବଂ କନଫରେନ୍ସ ଟୁରିଜମ୍ ବୋଲି ପ୍ରଧାନମନ୍ତ୍ରୀ କହିଛନ୍ତି। ଉତ୍ସବରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସମସ୍ତଙ୍କୁ ସ୍ୱାଗତ କରିବା ସହ ପ୍ରଧାନମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି।
କେନ୍ଦୁଝରରେ ଜେଏସ୍ଡ଼ବ୍ଲୁ ଓ ପୋସ୍କୋ ମିଳିତ ଭାବେ ଇସ୍ପାତେ କାରଖାନା କରିବେ। ଏ ନେଇ ସଙ୍କେତ ଦେଇଛନ୍ତି ସଜ୍ଜନ ଜିନ୍ଦଲ। ରାଜ୍ୟରେ ଆଲୁମିନିୟମ ରିଫାଇନାରୀ କ୍ଷେତ୍ରରେ ବିର୍ଲା ଗ୍ରୁପ ୩ହଜାର କୋଟି ଟଙ୍କା ବିନିଯୋଗ କରିବ। ଜେଏସ୍ପିଏଲ୍ ଗ୍ରୁପ ଅନୁଗୁଳ ଇସ୍ପାତ କାରଖାନାର ସଂପ୍ରସାରଣ କରି ୧୨ ର୍ନିୟୁତ ଟନକୁ କ୍ଷମତା ବଢାଇବା ସହ ୨୦୩୦ ସୁଦ୍ଧା ଦେଶର ସର୍ବ ବୃହତ ୨୫ ମିଲିଅନ୍ ଟନ୍ କରିବ ବୋଲି ନବୀନ ଜିନ୍ଦଲ କହିଛନ୍ତି। ପୁଞ୍ଜିନିବେଶ ପାଇଁ ଓଡ଼ିଶା ପ୍ରକୃଷ୍ଟ ସ୍ଥାନ ବୋଲି ବେଦାନ୍ତ ମୁଖ୍ୟ ଅନିଲ ଅଗ୍ରୱାଲ କହିଛନ୍ତି। ବିକଶିତ ଭାରତ ରେ ଓଡ଼ିଶାର ବି ଗୁରୁତ୍ୱପୂର୍ଣ୍ଣ ଭୂମିକା ରହିଛି । ସମୃଦ୍ଧ ଓଡ଼ିଶା ନିର୍ମାଣ ପାଇଁ ଓଡିଶାବାସୀ ସଂକଳ୍ପ ନେଇଛନ୍ତି । କେନ୍ଦ୍ର ସରକାର ସମ୍ପୂର୍ଣ୍ଣ ସହଯୋଗ କରିବେ । କେନ୍ଦ୍ର ସରକାର ଆପଣ ଙ୍କ ସହ ଛିଡା ହୋଇଛନ୍ତି ବୋଲି ପ୍ରଧାନମନ୍ତ୍ରୀ କହିଛନ୍ତି। ପ୍ରଧାନମନ୍ତ୍ରୀ ହେବା ରେ ମୁଁ ଓଡ଼ିଶା ୩୦ ଥର ଆସି ସାରିଛି ସ୍ୱାଧୀନତା ପରେ ଯେତେ ପ୍ରଧାନମନ୍ତ୍ରୀ ହୋଇଛନ୍ତି ସମସ୍ତେ ମିଶିକି ଯେତିକି ଥର ଓଡିଶା ଆସି ନାହାନ୍ତି ମୁଁ ଏକା ତା ଠୁ ଅଧିକ ଆସିଛି । ଏହା ହିଁ ଆପଣ ମାନଙ୍କ ଭଲ ପାଇବା । ଇଲେକ୍ଟ୍ରୋନିକ୍ସ ଉତ୍ପାଦ, ଅକ୍ଷୟ ଶକ୍ତି, ବୋୟୋଟେକ୍ନୋଲାଜି ଓ ସବୁଜ ଇନ୍ଧନ ଭଳି ଉଦୀୟମାନ କ୍ଷେତ୍ରରେ ପୁଞ୍ଜିନିବେଶ ପାଇଁ ଆମେ ଜୋର ଦେଉଛୁ।
ଉତ୍କର୍ଷ ଓଡ଼ିଶା –ମେକ ଇନ୍ ଓଡ଼ିଶା ୨୦୨୫ର ଦୁଇଦିନିଆ ସମ୍ମିଳନୀରେ ଷ୍ଟାର୍ଟ ଅପ୍ ଓଡ଼ିଶା, ସ୍କିଲଡ଼୍ ଇନ୍ ଓଡ଼ିଶା, ମହିଳା ଉଦ୍ୟୋଗୀକରଣ ଉପରେ ସ୍ୱତନ୍ତ୍ର ସସେନ ଥିବା ବେଳେ ଏମ୍ଏସ୍ଏମ୍ଇ ସେକ୍ଟର ଉପରେ ବି ଗୁରୁତ୍ୱ ଦିଆଯାଇଛି। ଉଦ୍ଘାଟନୀ ଉତ୍ସବରେ ଆଦାନୀ, ଆଇଟିସି, ଆଇଓସିଏଲ୍, ଜିନ୍ଦଲ, ବିର୍ଲା ଭଳି କର୍ପୋରେଟ କମ୍ପାନୀର ମୁଖ୍ୟମାନଙ୍କ ସହ ୧୨ଟି ଦେଶରୁ ୧୦୦ରୁ ଅଧିକ ଅନ୍ତର୍ଜାତୀୟ ନିବେଶକ ଏବଂ ସାଢେ ୭ ହଜାର ଡ଼େଲିଗେଟ ଭାଗ ନେଇଛନ୍ତି।
ହଇଜାର ହଟସ୍ପଟ ପାଲଟିଛି ପୁରୀ କଣାସ ବ୍ଲକ, ମାନବାଧିକାର କମିଶନରେ ପହଞ୍ଚିଲା ମାମଲା
ଭୁବନେଶ୍ବର : ହଇଜାର ହଟସ୍ପଟ୍ ପାଲଟିଛି ପୁରୀ ଜିଲ୍ଳା କଣାସ ବ୍ଲକ । ପ୍ରତିଦିନ ବଢିବାରେ ଲାଗିଛି ଆକ୍ରାନ୍ତଙ୍କ ସଂଖ୍ୟା । ଏହାରି ଭିତରେ ଗଲାଣି ୪ ଜଣଙ୍କ ଜୀବନ । ହେଲେ ସରକାର ଜଣେ ମୃତ୍ୟୁ ହୋଇଥିବା ରିପୋର୍ଟ ଦେଇଥିବାରୁ ବଢିଛି ଜନ ଅସନ୍ତୋଷ । ମାନବାଧିକାର କମିଶନଙ୍କ ନିକଟରେ ପହଞ୍ଚିଲା ମାମଲା । ଦୟା ନଦୀର ଦୂଷିତ ପାଣି ବ୍ୟବହାର ଯୋଗୁଁ କଣାସ ବ୍ଲକରେ ହଇଜା ବ୍ୟାପିଛି । ଏହି ସମ୍ବେଦନଶୀଳ ଘଟଣାରେ ରାଜ୍ୟ ମାନବାଧିକାର କମିଶନଙ୍କ ଦୃଷ୍ଟି ଆକର୍ଷଣ କରିଛି ମହାନଦୀ ବଞ୍ଚାଅ ଆନ୍ଦୋଳନ । ପ୍ରଦୂଷିତ ପାଣି ପିଇ ଯେଉଁ ୪ ଜଣଙ୍କ ମୃତ୍ୟୁ ଘଟିଲା, ସେମାନଙ୍କ ପରିବାରକୁ ୧୫ ଲକ୍ଷ ଟଙ୍କା ସହାୟତା ଯୋଗାଇ ଦେବାକୁ ନିର୍ଦ୍ଦେଶ ଦେବା ପାଇଁ ଅପିଲ କରାଯାଇଛି । ଭୁବନେଶ୍ବରର ସମସ୍ତ ବର୍ଜ୍ଯବସ୍ତୁ ସହ ବିଷାକ୍ତ ପାଣି ଗଙ୍ଗୁଆ ମାଧ୍ୟମରେ ଦୟା ନଦୀରେ ମିଶୁଛି l ସେହି ଜହର ବ୍ୟବହାର କରି କଣାସ ଅଞ୍ଚଳର ଲୋକଙ୍କ ଦୁର୍ଦ୍ଦଶା ବଢ଼ି ଚାଲିଛି l ଦୟାନଦୀ ଦୂଷିତ ହେବାନେଇ ସମ୍ପୂର୍ଣ୍ଣ ଭାବେ ଭୁବନେଶ୍ବର ମହାନଗର ନିଗମ ଓ ରେଳବାଇକୁ ଦାୟୀ କରିଛି ମହାନଦୀ ବଞ୍ଚାଅ ଆନ୍ଦୋଳନ । ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଲିଖିତ ଭାବେ କମିଶନଙ୍କୁ ଅନୁରୋଧ କରାଯାଇଛି । ହଇଜା ପ୍ରଭାବିତ ଗାଁ ଗୁଡ଼ିକରେ ଜଳ ଯୋଗାଣ ଠିକ ଭାବେ ହେଉ ନଥିବାରୁ ଏଥିପ୍ରତି ଦୃଷ୍ଟି ଦେବାକୁ ଅନୁରୋଧ କରାଯାଇଛି ।
କଣାସ ବକ୍ଲର ହଇଜା ଆକ୍ରାନ୍ତ ଗାଁ ଗୁଡ଼ିକରେ ୩୮ଟି ଟ୍ୟାଙ୍କର ଯୋଗେ ପାଣି ଯୋଗାଉଛି ପ୍ରଶାସନ । ନୂଆଗାଁ ଓ ଜାଗୁଳାଇପଦରକୁ ପର୍ଯ୍ୟାନ୍ତ ପାଣି ମିଳୁଛି । ହେଲେ ଗଡ଼ିଶାଗଦା, ଗୋପୀନାଥପୁର ଓ ଜାମଳଗଦା ପାଞ୍ଚାୟତକୁ ପର୍ଯ୍ୟାପ୍ତ ପାଣି ପହଞ୍ଚି ପାରୁନାହିଁ । ସେପଟେ ୪ଟି ପାଣି ଟ୍ୟାଙ୍କର ଅଚଳ ହୋଇ ପଡ଼ିଥିବାରୁ ତୁରନ୍ତ ମରାମତି ପାଇଁ ନିର୍ଦ୍ଦେଶ ଦେଇଛନ୍ତି RWSS ସର୍ବୋଚ୍ଚ ଯନ୍ତ୍ରୀ । ଦୟା ଓ ଗଙ୍ଗୁଆ ନଦୀ ସଫା କରିବାକୁ ଜଳ ସମ୍ପଦ ବିଭାଗକୁ ଅନୁମତି ମାଗିଛି ଭୁବନେଶ୍ବର ମହାନଗର ନିଗମ । ହେଲେ ଏଯାଏଁ ଜଳ ସମ୍ପଦ ବିଭାଗ ଅନୁମତି ଦେଇ ନଥିବାରୁ ନିଜ ଆଡ଼ୁ ପରୀକ୍ଷାମୂଳକ ଭାବେ ଦୟା ଓ୍ବେଷ୍ଟ କେନାଲର ଶହେ ମିଟର ସଫଳ କରିବାକୁ ବିଏମସି ଯୋଜନା କରୁଛି ।
କେନ୍ଦ୍ରର ଶିକ୍ଷା ନୀତିକୁ କଡ଼ା ବିରୋଧ, ୟୁଜିସି ଚିଠା ପ୍ରସ୍ତାବକୁ ନେଇ ତାତିଲେ ଶିକ୍ଷାବିତ
ଭୁବନେଶ୍ବର : କେନ୍ଦ୍ରର ଶିକ୍ଷା ନୀତିକୁ କଡ଼ା ବିରୋଧ । ଉଚ୍ଚଶିକ୍ଷାକୁ ବ୍ୟବସାୟୀକରଣ କରିବାକୁ ଉଦ୍ୟମ କରାଯାଉଛି । ୟୁଜିସି ପରାମର୍ଶ ଦେଇପାରିବ । କିନ୍ତୁ ପ୍ରଶାସକ ହେଲେ ଚଳିବନି । ବିଶ୍ବବିଦ୍ୟାଳୟରେ କୁଳପତି ଚୟନରେ ୟୁଜିସିର ନୂଆ ଚିଠା ପ୍ରସ୍ତାବକୁ କଡ଼ା ବିରୋଧ । ତାତିଲେଣି ଶିକ୍ଷାବିତ ଓ ସବୁବର୍ଗର ବୁଦ୍ଧିଜୀବୀ । ଆଜି ଭୁବନେଶ୍ବରରେ ଏକାଠି ହୋଇ ଗଠନ କରିଛନ୍ତି ଓଡ଼ିଶା ବିକଳ୍ପ ଶିକ୍ଷା ମଞ୍ଚ । ଜଣେ ଅଧ୍ୟାପକ ଦୀର୍ଘ ବର୍ଷ ଧରି ଛାତ୍ରଛାତ୍ରୀଙ୍କ ସହ ରହିବା ପରେ ପ୍ରଫେସର ହେଉଛି । ୧୦ ବର୍ଷ ପ୍ରଫେସର ରହିବା ପରେ କୁଳପତି ହେବା ପାଇଁ ସେ ଯୋଗ୍ୟ ହୋଇଥାଏ । ଏହି ବ୍ୟବସ୍ଥାରେ ପରିବର୍ତ୍ତନ କରି ଅମଲାତନ୍ତ୍ରରୁ ଆସିଥିବା ବ୍ୟକ୍ତି କିମ୍ବା ଉଦ୍ୟୋଗପତିଙ୍କୁ କୁଳପତି କରିବା ଅର୍ଥ ଶିକ୍ଷାନୁଷ୍ଠାନକୁ ବ୍ୟବସାୟିକ ଅନୁଷ୍ଠାନରେ ପରିଣତ କରିବା । କେବଳ ଶିକ୍ଷାବିତ ହି କୁଳପତି ହେବା ଉଚିତ୍ । ଦୀର୍ଘ ବର୍ଷରୁ ଚାଲିଆସୁଥିବା ଏହି ପରମ୍ପରାକୁ ଭାଙ୍ଗିଲେ ବିପଦ । ଏ ନେଇ ରାଜ୍ୟ ସରକାର ଓ କେନ୍ଦ୍ର ଶିକ୍ଷା ମନ୍ତ୍ରୀଙ୍କୁ ସ୍ମାରକପତ୍ର ପ୍ରଦାନ କରାଯିବ ।
ଶିକ୍ଷାକୁ ନେଇ ଖେଳ ଖେଳାଯାଉଛି । ୨୦୨୦ ମସିହାରୁ ଜାତୀୟ ଶିକ୍ଷା ନୀତିକୁ ଶିକ୍ଷାବିତମାନେ ବିରୋଧ କରିଆସୁଛନ୍ତି । ଓଡ଼ିଶାରେ ସରକାର ପରିବର୍ତ୍ତନ ପରେ ଏବେ ମୌଳିକ ଶିକ୍ଷାଠୁ ଆରମ୍ଭ କରି ଉଚ୍ଚଶିକ୍ଷା ଜାତୀୟ ଶିକ୍ଷା ନୀତି ଆଧାରରେ ହେବ ବୋଲି ସରକାର ଘୋଷଣା କରିଛନ୍ତି । ଏହା ଆଦୌ ଗ୍ରହଣୀୟ ନୁହେଁ । ଏବେ ନିୟମ ପରିବର୍ତ୍ତନ ହୋଇଛି । ବିନା ପିଏଚ୍ଡିରେ ଜଣେ ପୋଷ୍ଟ ଗ୍ରାଜୁଏଟ ଅଧ୍ୟାପକ ହୋଇପାରିବ । ଏପରି ବ୍ୟବସ୍ଥା କୌଣସି ଦେଶରେ ନଥିବ । ଆଗାମୀ ଦିନରେ ଓଡ଼ିଶା ବିକଳ୍ପ ଶିକ୍ଷା ମଞ୍ଚ ଏପରି ଅଗଣତାନ୍ତ୍ରିକ ଶିକ୍ଷା ନୀତିକୁ ପରିବର୍ତ୍ତନ ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କୁ ଦାବି ପତ୍ର ଦେବ । ଯଦି ସରକାର ନ ଶୁଣନ୍ତି ତାହେଲେ ରାଜରାସ୍ତାରେ ଆନ୍ଦୋଳନକୁ ଓହ୍ଲାଇବ ମଞ୍ଚ ବୋଲି ଚେତାବନୀ ଦେଇଛି । ଏହି ମଞ୍ଚର ଅଧ୍ୟକ୍ଷ ଭାବେ ଉତ୍କଳ ବିଶ୍ବବିଦ୍ୟାଳୟର ପ୍ରାକ୍ତନ କୁଳପତି ଡ.ବିନାୟକ ରଥ ଅଧ୍ୟକ୍ଷ ରହିଥିବା ବେଳେ ଉପାଧ୍ୟକ୍ଷ ଭାବେ ଓୟୁଏଟିର ପୂର୍ବତନ କୁଳପତି ଡ.ସୁରେନ୍ଦ୍ର ନାଥ ପଶୁପାଳକ ଓ ସାଧାରଣ ସମ୍ପାଦକ ଭାବେ କାର୍ଯ୍ୟ କରିବେ ଫକୀର ମୋହନ ବିଶ୍ବବିଦ୍ୟାଳୟର ପୂର୍ବତନ କୁଳପତି ଡ.ଶିବ ପ୍ରସାଦ ଅଧିକାରୀ । ଆଲୋଚନା ଚକ୍ରରେ ୟୁଜିସିର ନୂଆ ଚିଠା ପ୍ରସ୍ତାବ ଓ ଜାତୀୟ ଶିକ୍ଷା ନୀତି ଲାଗୁ ନେଇ କୌଣସି ଶିକ୍ଷାବିତଙ୍କ ସହ ପରାମର୍ଶ କରାଯାଇନଥିବା ନେଇ ବହୁ ବୁଦ୍ଧିଜୀବୀ ସ୍ବର ଉଠାଇଥିଲେ ।
ସଂଗଠନକୁ ନୂଆରୂପ ଦେବା ପାଇଁ ୩ ପ୍ରମୁଖ ରାଜନୈତିକ ଦଳ କସରତ ଜାରି
ଭୁବନେଶ୍ବର : ସବୁ ଦଳକୁ ସଂଗଠନ ଚିନ୍ତା । ଜାରି ରହିଛି ୩ ରାଜନୈତିକ ଦଳର ନବକଳେବର ପ୍ରକ୍ରିୟା । ବିଜେଡ଼ି କହିଲା ଖୁବଶୀଘ୍ର ନୂଆ ଟିମ । ଅଧା ଟିମ ଗଢିଛି ବିଜେପି । ୭ମାସ ହେବ ମୁଖିଆ ପାଉନି କଂଗ୍ରେସ ।.ବିଜେଡ଼ି-ବିଜେପି ଓ କଂଗ୍ରେସକୁ ଘାରିଛି ସାଂଗଠନିକ ନିର୍ବାଚନ ପ୍ରକ୍ରିୟା। ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ ଦଳର ସବୁ ଛାମୁଆ ସଂଗଠନକୁ ଭାଙ୍ଗିବା ସହ ତୃଣମୂଳ ସ୍ତରରୁ ରାଜ୍ୟ କାର୍ଯ୍ୟକାରଣୀ ନିର୍ବାଚନ ପ୍ରକ୍ରିୟାକୁ ତ୍ବରାନ୍ବିତ କରିଛନ୍ତି । ଦଳର ନିର୍ବାଚନୀ ଅଧିକାରୀ ଭାବେ ବିଧାୟକ ପ୍ରତାପ ଦେବକୁ ନିଯୁକ୍ତି ଦେଇଛନ୍ତି ନବୀନ । ଦଳର ବିଧାୟକମାନେ କହିଛନ୍ତି ଯେ ବିଜେଡି ତାର ସଂଗଠନକୁ ତୃଣମୂଳ ସ୍ତରରୁ ଅଧିକ ଶକ୍ତିଶାଳୀ କରିଛି । ଦଳର ସୁପ୍ରିମୋଙ୍କ ନିର୍ଦ୍ଦେଶ ଅନୁସାରେ ସଂଗଠନର ନବକଳେବର ହେଉଛି । ନିୟମ ଅନୁସାରେ ପ୍ରତି ୩ ବର୍ଷରେ ଥରେ ଦଳ ସାଂଗଠନିକ ନିର୍ବାଚନ ପ୍ରକ୍ରିୟା କରାଯାଉଛି । ନୂଆଟିମରେ କାହାକୁ ସ୍ଥାନ ଦିଆଯିବ ତାହାକୁ ନେଇ ଦଳ ଭିତରେ ଚାଲିଛି ବିଚାରବିମର୍ଶ । ବିଜୁ ଜନତା ଦଳ ଟିମ ସହ, ଛାମୁଆ ସଂଗଠନ ମହିଳା, ଯୁବ, ଛାତ୍ର ,ଶ୍ରମିକ ସାମ୍ମୁଖ୍ୟ , ଲିଗାଲ ସେଲ ପରି ସଂଗଠନକୁ ନବକଳେବର କରିବ । ବିଜେଡ଼ି ନୂଆରୂପରେ ଆସି ଓଡ଼ିଶାବାସୀଙ୍କ ସେବା ପାଇଁ ଦିନରାତି ଏକ କରି କାମ କରିବେ ବୋଲି ଦଳୀୟ ବିଧାୟକମାନେ କହିଛନ୍ତି ।
ସେପଟେ ଶାସକ ବିଜେପିରେ ମଧ୍ୟ ସାଂଗଠନିକ ନିର୍ବାଚନ ପ୍ରକ୍ରିୟା ଜାରି ରହିଛି । ଏଯାଏ ଦଳ ୨୩ଟି ଜିଲ୍ଲା ସଭାପତି ଘୋଷଣା କରିଥିବା ବେଳେ ୧୪ ଟି ସାଂଗଠନିକ ଜିଲ୍ଳାରେ ଜିଲ୍ଲାସଭାପତି ଚୟନ କରିପାରୁନାହିଁ । ୧୪ଟି ଜିଲ୍ଲାରେ ସଭାପତି ରେସରେ ଏକାଧିକ ପ୍ରାର୍ଥୀ ଥିବାରୁ ଦଳ ଅଧାଗଢା ଟିମ ଗଠନ କରିଛି ।ଅନ୍ୟପଟେ ୭ ମାସ ଧରି କଂଗ୍ରେସର ମୁଖିଆ ଚୟନ ଅଭିଯାନ ଜାରି ରହିଛି । ଦଳର ବରିଷ୍ଠ ନେତା ସନ୍ତୋଷ ସିଂହ ସାଲୁଜା କହିଛନ୍ତି ଦିଲ୍ଲୀ ନିର୍ବାଚନରେ ପରେ ଓଡ଼ିଶା କଂଗ୍ରେସକୁ ମିଳିବ ନୂଆ ପିସିସି ସଭାପତି । ଏହାପରେ ଦଳ ସାଂଗଠନିକ ନିର୍ବାଚନ ପ୍ରକ୍ରିୟାକୁ ତ୍ବରାନ୍ବିତ କରାଯାଇ ଜିଲ୍ଲାରୁ ରାଜ୍ୟ ଯାଏ ସଂଗଠନର ନବକଳେବର କରାଯିବ । ୨୦୨୪ ନିର୍ବାଚନ ପରେ ୨୦୨୭ ପାଇଁ ଏବେଠାରୁ ୩ ପ୍ରମୁଖ ରାଜନୈତିକ ଦଳ ସଂଗଠନକୁ ନୂଆରୂପ ଦେଇ ତୃଣମୂଳ ସ୍ତରରୁ ନିଜକୁ ମଜଭୁତ କରିବାକୁ ଫୋକସ କରିଛନ୍ତି । ୩ ପ୍ରମୁଖ ଦଳର ନୂଆଟିମକୁ ନେଇ ଦଳ ଭିତରେ ଉତ୍ସାହ ରହିଥିବା ବେଳେ ନେତାଙ୍କୁ ଦାୟିତ୍ବ ବଣ୍ଟନ କରିବା ଶୀର୍ଷ ନେତୃତ୍ବ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି ।
ଆୟୁଷ୍ମାନ ଭାରତ ଯୋଜନାକୁ ଝଟକା
ଚଣ୍ଡୀଗଡ଼ : ଆୟୁଷ୍ମାନ ଭାରତ ଯୋଜନାକୁ ବଡ଼ ଝଟକା। ଇଣ୍ଡିଆନ ମେଡିକାଲ ଆସୋସିଏସନ୍ ହରିୟାଣା ଶାଖାର ବଡ଼ ଘୋଷଣା। ରାଜ୍ଯର ୬୦୦ ପ୍ରାଇଭେଟ ହସପିଟାଲ ଆୟୁଷ୍ମାନ ଭାରତ ଯୋଜନାରେ ରୋଗୀଙ୍କୁ ଚିକିତ୍ସା କରିବେ ନାହିଁ। ଫେବୃଆରୀରେ ସେମାନେ ଆଉ ଚିକିତ୍ସା କରିବେ ନାହିଁ। କାରଣ ଏହି ଯୋଜନାରେ ଚିକିତ୍ସା ବାବଦରେ ୪୦୦ କୋଟି ଟଙ୍କା ଏଯାଏ ଦେଇ ନାହାନ୍ତି ସରକାର। ଏହା ଦ୍ଵାରା ହସପିଟାଲ ଚଳାଇବା ବହୁତ କଷ୍ଟ ହେଉଛି। ମାସ ମାସ ଧରି ବିଲ୍ ପଡ଼ି ରହୁଛି। ମୁଖ୍ୟମନ୍ତ୍ରୀ ନାଏବ ସିଂହ ସୈନିଙ୍କ ସହିତ ଆଲୋଚନା ପରେ ବି ଫଳ ଶୂନ। ବୀମା ରାଶିର ମାତ୍ର ୧୦ ରୁ ୧୫ ପ୍ରତିଶତ ଟଙ୍କା ମିଳୁଛି। ତୁରନ୍ତ ସମସ୍ତ ରାଶି ପ୍ରଦାନ କରନ୍ତୁ ବୋଲି ହରିୟାଣାର ଘରୋଇ ହସପିଟାଲ ସଂଘ ତରଫରୁ କୁହାଯାଇଛି। ହରିୟାଣାର ୧ କୋଟି ୨୦ ଲକ୍ଷରୁ ଅଧିକ ଲୋକ ଆୟୁଷ୍ମାନ ଭାରତ ଯୋଜନାରେ ପଂଜୀକରଣ କରିଛନ୍ତି। ଏହି ଯୋଜନାରେ ପ୍ରତ୍ୟେକ ପରିବାରକୁ ବର୍ଷକୁ ମାଗଣାରେ ୫ ଲକ୍ଷ ଟଙ୍କାର ଚିକିତ୍ସା ସୁବିଧା ମିଳିବାର ବ୍ଯବସ୍ଥା ଅଛି। ଯେଉଁ ପରିବାରର ବାର୍ଷିକ ଆୟ ୨ ଲକ୍ଷ ୫୦ ହଜାରରୁ କମ୍ ହୋଇଥିବ, ସେହି ପରିବାରକୁ ଏହି ସୁବିଧା ମିଳୁଛି। ଏବେ କିନ୍ତୁ ଟଙ୍କା ମିଳୁନଥିବାରୁ ଘରୋଇ ହସପିଟାଲଗୁଡ଼ିକ ଚିକିତ୍ସା କରିବାକୁ ମନା କଲେଣି।
ସଂସଦ ଅଧିବେଶନରେ ଉଠିବ ଓଡ଼ିଶାର ସ୍ବାର୍ଥ ସମ୍ବଳିତ ପ୍ରସଙ୍ଗ : ବିଜେଡି
ଭୁବନେଶ୍ବର : ସଂସଦରେ ସାଢେ ୪ କୋଟି ଓଡ଼ିଆଙ୍କ ସ୍ବର ହେବ ବିଜେଡି । ଉଠିବ ଓଡ଼ିଆ ସ୍ବାର୍ଥ ସମ୍ପର୍କିତ ପ୍ରସଙ୍ଗ । ଦିନକ ପରେ ସଂସଦ ଅଧିବେଶନ ଆରମ୍ଭ ହେବାକୁ ଥିବାବେଳେ ଆଜି ବସିଥିଲା ବିଜେଡି ସଂସଦୀୟ ଦଳ ବୈଠକ । ନବୀନ ପଟ୍ଟନାୟକଙ୍କ ଅଧ୍ଯକ୍ଷତାରେ ନବୀନ ନିବାସରେ ଏହି ବୈଠକରେ ବିଜେଡିର ସମସ୍ତ ସାଂସଦଙ୍କୁ ଗୁରୁମନ୍ତ୍ର ଦେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ସ୍ବତନ୍ତ୍ର ରାଜ୍ଯପାହ୍ଯା ପାଇଁ ପୁଣି ଦାବି କରିବ ବିଜେଡି । ଏ ନେଇ ନିର୍ବାଚନୀ ଇସ୍ତାହାରରେ ବିଜେପି ଘୋଷଣା କରିଥିଲା । ହେଲେ ଏଯାଏଁ ମିଳିଲାନି ସ୍ବତନ୍ତ୍ର ରାଜ୍ଯ ପାହ୍ଯା । ଦରଦାମ ବୃଦ୍ଧି ପ୍ରସଙ୍ଗ ମଧ୍ଯ ବିଜେଡି ଉଠାଇବ । ଡବଲ ଇଞ୍ଜିନ ସରକାରରେ ଡବଲ ହୋଇଛି ବେକାରୀ ସମସ୍ଯା । ସଂସଦରେ ଉଠିବ ଚାଷୀଙ୍କ ପ୍ରତି ଅବହେଳା ପ୍ରସଙ୍ଗ । ସ୍ବାମୀନାଥନ କମିଶନ ରିପୋର୍ଟ ଲାଗୁ କରିବାକୁ ଦାବି କରିବ ବିଜେଡି । ପୋଲାଭରମ ଓ ମହାନଦୀ ପ୍ରସଙ୍ଗ ବି ଉଠାଇବ ଦଳ । କୋଷ୍ଟାଲ ହାଇୱେ ଓ ଅନୁସୂଚିତ ଜନଜାତିଙ୍କୁ ତାଲିକାଭୁକ୍ତ କରିବାକୁ ଦାବି କରାଯିବ । ହୋ, ମୁଣ୍ଡାରି, ଭୂମିଜ ଓ କୁଇ ଭାଷାକୁ ସମ୍ବିଧାନରେ ଅଷ୍ଟମ ପରିଚ୍ଛେଦରେ ସାମିଲ ଲାଗି ଦାବି କରିବ ଦଳ । ଏହାସହ ମୋବାଇଲର ନେଟଓ୍ବର୍କ କନେକ୍ଟିଭିଟି ବୃଦ୍ଧି ପାଇଁ ମଧ୍ଯ ଦାବି କରାଯିବ ।
ଦୁଇ ଦିନ ପରେ ରାଜ୍ୟରେ ହେବ ଟାଇଁ ଟାଇଁ ଖରା
ଭୁବନେଶ୍ବର : ଆସନ୍ତା ଦୁଇ ଦିନ ପରେ ରାଜ୍ୟରେ ହେବ ଟାଇଁ ଟାଇଁ ଖରା । ଆଭ୍ୟନ୍ତରୀଣ ଓଡ଼ିଶା ଅପେକ୍ଷା ଉପକୂଳ ଓଡ଼ିଶାରେ ଅଧିକ ବଢିବ ପାରଦ । ସ୍ବାଭାବିକ ଠାରୁ ୨ ରୁ ୪ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇବ ତାପମାତ୍ରା । ଆଜି ରାଜ୍ୟର ଅଧିକାଂଶ ସହରରେ ତାପମାତ୍ରା ବଢିଛି । କିଛି ସ୍ଥାନରେ ଗରମ ଅନୁଭୁବ ହୋଇଛି । ଆସନ୍ତା ୫ ଦିନ ପର୍ଯ୍ୟନ୍ତ ରାଜ୍ୟରେ ପାଗ ମୁଖ୍ୟତଃ ଶୁଖିଲା ରହିବା ସହ ତାପମାତ୍ରା ବୃଦ୍ଧି ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ସେପଟେ ତାପମାତ୍ରା ବୃଦ୍ଧି ସହ ଆସନ୍ତା ଦୁଇ ଦିନ ପର୍ଯ୍ୟନ୍ତ ଅସ୍ତବ୍ୟସ୍ତ କରିବ ଘନ କୁହୁଡି । ଆଜି ରାତି ଦୁଇଟାରୁ କାଲି ସକାଳ ୯ଟା ପର୍ଯ୍ୟନ୍ତ ଘନ କୁହୁଡି ନେଇ ୧୨ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ବିଶେଷ କରି ବାଲେଶ୍ବର, ଭଦ୍ରକ, କେନ୍ଦ୍ରାପଡା, ଜଗତସିଂହପୁର, କଟକ, ଖୋର୍ଦ୍ଧା, ଯାଜପୁର, କେନ୍ଦୁଝର, ଅନୁଗୁଳ, ଢେଙ୍କାନାଳ, ନୟାଗଡ ଏବଂ ଗଞ୍ଜାମ ଜିଲ୍ଲାକୁ ସତର୍କତା ଜାରି କରାଯାଇଛି । ସେହିଭଳି ୩୦ ତାରିଖରେ ମୟୁରଭଞ୍ଜ, ବାଲେଶ୍ବର, ଭଦ୍ରକ, ଯାଜପୁର ଏବଂ ଗଞ୍ଜାମକୁ ଘନ କୁହୁଡି ନେଇ ୟେଲୋ ଆଲର୍ଟ ଜାରି କରିଛି ପାଣିପାଗ କେନ୍ଦ୍ର । ଏହି ସବୁ ଜିଲ୍ଲାରେ ୫୦ ମିଟରରୁ କମ୍ ରହିବ ଦୃଶ୍ୟମାନ କ୍ଷମତା । କିଛି ସ୍ଥାନରେ ଜିରୋ ଭିଜିବିଲିଟି ଅନୁଭୁତ ହେବା ନେଇ ସତର୍କତା ଜାରି କରାଯାଇଛି । ଗତ ୨୪ ଘଣ୍ଟା ମଧ୍ୟରେ ପାରଳାଖେମୁଣ୍ଡିରେ ସର୍ବାଧିକ ୩୪ ଡିଗ୍ରୀ ତାପମାତ୍ରା ରେକର୍ଡ କରାଯାଇଥିବା ବେଳେ ରାଉରକେଲାରେ ସର୍ବନିମ୍ନ ୮.୨ଡିଗ୍ରୀ ତାପମାତ୍ରା ରେକର୍ଡ ହୋଇଛି । ସେହିପରି ଦେଶରେ ଘନ କୁହୁଡି ତାଲିକାରେ ପାରାଦୀପ, ଗୋପାଳପୁର, ପୁରୀରେ ଜିରୋ ଭିଜିବିଲିଟି ରହିଛି । ଭୁବନେଶ୍ବର ବିମାନବନ୍ଦରରେ ବି ଆଜି ୧୦୦ ମିଟର ରହିଥିଲା ଦୃଶ୍ୟମାନ ଦୂରତା ।
ସରୁନି ପାର୍କ ନିର୍ମାଣ କାମ, ସରକାରୀ ଟଙ୍କା ଖର୍ଚ୍ଚ ପରେ ବି ଲୋକେ ପାଇଲେନି ସୁବିଧା
ବାଲେଶ୍ବର : ରାସ୍ତା ପାଖରେ ନିର୍ମାଣ ଚାଲିଛି ପାର୍କ। ନାଳ କଡେ କଡେ ପୋତା ଯାଇ ଖାଲୁଆ ଯାଗାକୁ ଉଚ୍ଚା କରାଯାଇଛି। ଆଉ ସେହି ସ୍ଥାନରେ ମୁଖ୍ୟ ଫାଟକ ପାଇଁ ସିକ୍ୟୁରିଟି ଗୃହ କାମ ଅଧାରେ ଅଟକି ଯାଇଛି। ପ୍ରସ୍ତାବିତ ପାର୍କ ପାଇଁ ପାଚେରୀ ନିର୍ମାଣ ମଧ୍ୟ ଶେଷ ହୋଇପାରୁ ନାହିଁ। ୨୦୨୨ ମସିହାରୁ ଆରମ୍ଭ ହୋଇଥିବା କାମ ସରକାର ବଦଳିବା ପରେ ଅଟକି ଯାଇଛି। ଫଳରେ ଲୋକଙ୍କୁ ଏହାର ସୁବିଧା ମିଳିପାରୁ ନାହିଁ। ବାଲେଶ୍ବର ସହରରେ ଗାନ୍ଧୀସ୍ମୃତି ଭବନ ଓ ଗୋପବନ୍ଧୁ ପାର୍କ ନାମରେ ୨ଟି ଛୋଟ ଛୋଟ ପାର୍କ ରହିଛି।…
ବାଲେଶ୍ବର ବାସୀଙ୍କ ପାଇଁ ବିଜେଡି ସରକାର ସହର ଉପକଣ୍ଠ ନୁଣିଆଯୋଡ଼ି ନିକଟରେ ୧୦ ଏକର ଜମିରେ ଏକ ଅତ୍ୟାଧୁନିକ ପାର୍କ ନିର୍ମାଣ କରିବାକୁ ଯୋଜନା ପ୍ରସ୍ତୁତ କରିଥିଲେ। ଏହି ଯୋଜନା ଅନୁସାରେ ୨ କୋଟି ୬୬ ଲକ୍ଷ ୩୭ ହଜାର ୧୬୩ ଟଙ୍କା ବ୍ୟୟରେ ନିର୍ମାଣ ହେଉଛି ପାର୍କ। ଏଥିରେ ବୋଟିଂ, ୱାଟର ଫାଉଣ୍ଟେନ୍, ଲାଇଟ୍ ସୋ ସାଙ୍ଗକୁ ସମସ୍ତ ପ୍ରକାର ଅତ୍ୟାଧୁନିକ ସୁବିଧା, ସୁଯୋଗ ରହିଛି। ଏହି ପାର୍କର ନିର୍ମାଣ ଦାୟିତ୍ବ ଜଳସେଚନ ବିଭାଗକୁ ପ୍ରଦାନ କରାଯାଇଛି। ହେଲେ ୧୦ ଏକର ଜମି ମଧ୍ୟରୁ କିଛି ଜମି ଦେବୋତ୍ତର ଓ ଜଙ୍ଗଲ କିସମ ରହିଛି। ଫଳରେ ପାର୍କ ନିର୍ମାଣରେ ଏହା ପ୍ରତିବନ୍ଧକ ସୃଷ୍ଟି କରୁଛି। ଏଥିସହିତ ପ୍ରଥମ ପର୍ଯାୟରେ ୧ କୋଟି ଟଙ୍କା ଅନୁଦାନ ପ୍ରଦାନ କରାଯାଇଥିଲା। ନିର୍ମାଣ କାମରେ ଏହି ଟଙ୍କା ଖର୍ଚ୍ଚ ହୋଇଯିବା ସହିତ ସରକାର ବଦଳି ଯାଇଥିଲେ। ଫଳରେ ପରବର୍ତ୍ତି ଅନୁଦାନ ଯୋଗାଇ ଦେବାରେ ବିଭାଗ ଅନିଚ୍ଛା ପ୍ରକାଶ କରିଛି। ପ୍ରକଳ୍ପ ଆଜି ସୁଦ୍ଧା ମାତ୍ର ୧୫ ପ୍ରତିଶତ କାମରେ ଅଟକି ଯାଇଛି। ସେପଟେ ବିଭାଗୀୟ ଅଧିକାରୀ କହିଛନ୍ତି ନଗର ଉନ୍ନୟନ ବିଭାଗରୁ ଟଙ୍କା ଆସିଲେ ପୁଣି ଆରମ୍ଭ ହେବ ନିର୍ମାଣ କାମ।
ସମ୍ବଲପୁରରେ ମାନସିକ ଅନଗ୍ରସରଙ୍କୁ ନିର୍ଯାତନା ଦେବା ମାମଲାରେ ଦୁଇ ଗିରଫ
ସମ୍ବଲପୁର : ସମ୍ବଲପୁରରେ ମାନସିକ ଅନଗ୍ରସରଙ୍କୁ ନିର୍ଯାତନା ଦେବା ମାମଲାରେ ଦୁଇ ଜଣକୁ ଗିରଫ କଲl ସମ୍ବଲପୁର ପୋଲିସ। ବିନା କାରଣରେ ଓ ବିନା ଦୋଷରେ କାହିଁକି ଅନ୍ତେବାସୀଙ୍କୁ ମାଡ ମରାଯାଇଛି ସେନେଇ ତଦନ୍ତ ଆରମ୍ଭ ହୋଇଥିବା ସ୍ପଷ୍ଟ କରିଛନ୍ତି ଜିଲ୍ଲାପାଳ। ଘଟଣାକୁ ଜିଲ୍ଲା ପ୍ରାଶାସନ ଗୁରୁତର ସହ ନେଇଛି ବୋଲି କହିଛନ୍ତି ସମ୍ବଲପୁର ଜିଲ୍ଲାପାଳ ସିଦ୍ଧେଶ୍ୱର ବଳିରାମ ବୋନ୍ଦର।
ତେବେ ଖବର ପାଇ ତୁରନ୍ତ ସମର୍ଥ କେନ୍ଦ୍ରର ସମ୍ପାଦକ ହରିଶ ଚନ୍ଦ୍ର ଦାସ ଓ ସହାୟିକା ସ୍ୱାଗତିକାଙ୍କୁ ଗିରଫ କରି ତଦନ୍ତ ଆରମ୍ଭ କରିଛି ସମ୍ବଲପୁର ପୋଲିସ । ଦୁଇ ଜଣଙ୍କ ବିରୁଦ୍ଧରେ ଖୁବ୍ ଶୀଘ୍ର କଡା କାର୍ଯ୍ୟାନୁଷ୍ଠନ ନିଆଯିବ ବୋଲି କହିଛନ୍ତି ଜିଲ୍ଲାପାଳ । ସେପଟେ ମହିଳା ସହାୟିକାଙ୍କ ବିରୁଦ୍ଧରେ ମଧ୍ୟ ହେବ କାର୍ଯ୍ୟାନୁଷ୍ଠାନ। ଖୁବ୍ ଶୀଘ୍ର ସମର୍ଥ ଅନୁଷ୍ଠାନ ବନ୍ଦ ହେବା ସହ ସମର୍ଥ କେନ୍ଦ୍ରକୁ କଳା ତାଲିକା ଭୁକ୍ତ କରିବା ପାଇଁ ପ୍ରୟାସ ଆରମ୍ଭ ହୋଇଥିବା କହିଛନ୍ତି ଜିଲ୍ଲାପାଳ। ସବୁଠାରୁ ବଡ଼କଥା ହେଲା ଏଥିପାଇଁ କାମ କରୁଥିବା ବିଭାଗ କିଭଳି ଏକଥା ଜାଣିପାରିଲାନାହିଁ ତାକୁ ନେଇ ଉଠିଛି ବଡ ପ୍ରଶ୍ନ।