ପାଟକୁରା : ଦାଦନ ଖଟିବାକୁ ଯାଇ ଶ୍ରମିକ ନିଖୋଜ । ଏଗାର ଦିନ ହେବ ମିଳୁନି ନିଖୋଜ ଦାଦନ ଶ୍ରମିକଙ୍କ ପତ୍ତା। ଡେରାବିଶ ଥାନା ଲକ୍ଷ୍ମୀନାରାୟଣ ପୁର ପଞ୍ଚାୟତ ବରାହୀଲୋ ଗାଁର କେଶବ ମଲ୍ଲିକ ନିଖୋଜ । ନିଖୋଜ କେଶବ ମଲ୍ଲିକଙ୍କୁ ସ୍ଥାନୀୟ ଠିକାଦାର ରଞ୍ଜନ ମଲ୍ଲିକ ଚାପ ପକାଇ ଜାନୁୟାରୀ ପାଞ୍ଚ ତାରିଖ ରେ ଅନୁଗୁଳ ପରଙ୍ଗ ଅଞ୍ଚଳକୁ କାମ କରିବାକୁ ନେଇଥିଲେ। ଗତ ବାର ତାରିଖରୁ ସେହି ପରଙ୍ଗ ଅଞ୍ଚଳରୁ ନିଖୋଜ ହୋଇଯାଇଥିଲେ କେଶବ । ଏହି ଖବର ଠିକାଦାର ରଂଜନ ନିଖୋଜ କେଶବଙ୍କ ପରିବାରକୁ ଜଣାଇଥିଲେ.। ଘଟଣା ପରେ କେଶବଙ୍କ ମାଆ ଅଞ୍ଜନା ମଲ୍ଲିକ ଡେରାବିଶ ଥାନାରେ ଠିକାଦାର ନାଁରେ ଅଭିଯୋଗ କରିଛନ୍ତି । ଏଥି ସହ ନିଖୋଜ ଯୁବକଙ୍କ ଭାଇ ବୀରବର ମଲ୍ଲିକ ମଧ୍ୟ ଅନୁଗୁଳ ସ୍ଥିତ ନିଶା ଶିଳ୍ପାଞ୍ଚଳ ପୋଲିସ ଷ୍ଟେସନ ରେ ଏକ ନିଖୋଜ ମାମଲା ରୁଜୁ କରିଛନ୍ତି। ଏହାକୁ ନେଇ ନିଖୋଜ କେଶବଙ୍କ ପରିବାରରେ ଶୋକର ଛାୟା ଖେଳି ଯାଇଛି। କେଶବଙ୍କ ରୋଜଗାରରେ ତାଙ୍କ ପରିବାର ଚଳୁଥିଲା। ଏବେ କେଶବଙ୍କ ପତ୍ତା ନ ମିଳିବାରୁ ଅସହାୟ ହୋଇପଡିଛନ୍ତି ପରିବାର । କେଶବଙ୍କ ନିଖୋଜ ହେବା ପଛରେ ଠିକାଦାର ରଂଜନ ମଲିକ ଦାୟୀ ବୋଲି କହିଛନ୍ତି ପରିବାର।
ରାସନ ଚାଉଳକୁ ନେଇ ମା’କୁ ମାରିଦେଲା ପୁଅ !
ବାରିପଦା : ବାରିପଦା ସଦର ଥାନା ଶରତଚନ୍ଦ୍ରପୁର ଗାଁରେ ରାସନ ଚାଉଳକୁ ନେଇ ମା’କୁ ମାରିଦେଲା ପୁଅ। ମୃତ ମହିଳା ହେଲେ ରଇବାରୀ ସିଂହ। ମା’ ରାସନ ଚାଉଳ ଦେବାକୁ ମନା କରିବାରୁ କୋଦାଳରେ ହାଣି ହତ୍ୟା କରିଛି ପୁଅ।ପରେ ଉତ୍ତ୍ୟକ୍ତ ହୋଇ ହତ୍ୟାକାରୀ ପୁଅ ରୋହିଦାସ ସୋରେନ ଆତ୍ମହତ୍ୟା ଉଦ୍ୟମ କରୁଥିବା ବେଳେ ପଡୋଶୀ ମାନେ ଉଦ୍ଧାର କରିଥିଲେ। ଖବର ଅନ୍ୟ ଜଣେ ପୁଅ ଘଟଣାସ୍ଥଳରେ ପହଞ୍ଚି ପୋଲିସକୁ ଖବର ଦେଇଥିଲେ। ଏହାସହ ଆହତ ଭାଇକୁ ମେଡିକାରେ ଭର୍ତ୍ତି କରାଯାଇଥିଲା। ପୋଲିସ ଅଭିଯୁକ୍ତ ରୋହିଦାସକୁ ଗିରଫ କରିଛି।
ମୌଳିକ ସୁବିଧା ସୁଯୋଗରୁ ବଞ୍ଚିତ ଗ୍ରାମବାସୀ, ବ୍ଲକ କାର୍ଯ୍ୟାଳୟ ସମ୍ମୁଖରେ ସତ୍ୟାଗ୍ରହ ଆନ୍ଦୋଳନ
କାଶୀପୁର : ମୌଳିକ ସୁବିଧା ସୁଯୋଗରୁ ବଞ୍ଚିତ ଲମ୍ବେରି ଏବଂ ଘୁମୁରାପୁଟ ଗ୍ରାମବାସୀ । ରାୟଗଡ଼ା ଜିଲା କାଶୀପୁର ବ୍ଲକ ଗୋରଖପୁର ପଞ୍ଚାୟତଠାରୁ ମାତ୍ର ୪ କି.ମି. ଦୂର ପାହାଡ଼ ତଳେ ଅବସ୍ଥିତ ଲମ୍ବେରି ଏବଂ ଘୁମୁରାପୁଟ ଗାଁ । ଏହି ଗାଁରେ ପାନୀୟ ଜଳ ସୁବିଧା ନଥିବା ବେଳେ ଗମନାଗମନ ପାଇଁ ପକ୍କା ରାସ୍ତା ନାହିଁ । ଏପରିକି ଗ୍ରାମବାସୀ ଏବେ ବି ବିଜୁଳି ଆଲୋକ ସେବାରୁ ବଞ୍ଚିତ ଅଛନ୍ତି । ଗ୍ରାମର ବିଭିନ୍ନ ସମସ୍ୟାର ସମାଧାନ ପାଇଁ ଗ୍ରାମବାସୀ ବାରମ୍ବାର ପ୍ରଶାସନ ନିକଟରେ ଅଭିଯୋଗ କରିଥିଲେ । ହେଲେ ପ୍ରଶାସନ ତରଫରୁ କୌଣସି ପଦକ୍ଷେପ ନିଆଯାଉନଥିବା ଅଭିଯୋଗ ହୋଇଛି । ଆଜି ୨ ଗ୍ରାମର ଲୋକେ ବାଧ୍ୟ ହୋଇ ବ୍ଲକ କାର୍ଯ୍ୟାଳୟ ସମ୍ମୁଖରେ ସତ୍ୟାଗ୍ରହ ଆନ୍ଦୋଳନ କରିଛନ୍ତି । ଗାଁଠାରୁ ପଦଯାତ୍ରାକରି ବ୍ଲକ କାର୍ଯ୍ୟାଳୟ ସମ୍ମୁଖରେ ପହଞ୍ଚି ଅହିଂସା ଏବଂ ସାମ୍ବିଧାନିକ ପ୍ରକ୍ରିୟାରେ ଆନ୍ଦୋଳନ କରିଛନ୍ତି । ମରିବୁ ପଛେ ସାମ୍ବିଧାନିକ ଅଧିକାର ହାସଲ ବିନା ଗାଁକୁ ଫେରିବୁ ନାହିଁ ବୋଲି ନିଷ୍ପତ୍ତି ନେଇଛନ୍ତି ।
କଣାସରେ ହଇଜା ସ୍ଥିତି ପରଖି ରାଜ୍ୟ ସରକାରକୁ ନିନ୍ଦା କଲା କଂଗ୍ରେସ
ଭୁବନେଶ୍ବର : କଣାସରେ ନିୟନ୍ତ୍ରଣ ବାହାରେ ହଇଜା। ସ୍ଥିତି ଲାଗି ସରକାର ଦାୟୀ। କଣାସରେ ହଇଜା ସ୍ଥିତି ପରଖି ରାଜ୍ୟ ସରକାରକୁ ନିନ୍ଦା କରିଛି କଂଗ୍ରେସର ଫ୍ୟାକ୍ଟ ଫାଇଣ୍ଡିଂ ଟିମ୍। କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମଙ୍କ ନେତୃତ୍ୱରେ ଯାଇଥିବା ଟିମ ସ୍ଥିତି ପରଖିଥିଲେ। ଟିମରେ ପୂର୍ବତନ ପିସିସି ସଭାପତି ପ୍ରସାଦ ହରିଚନ୍ଦନ, ସୁଦର୍ଶନ ଦାସଙ୍କ ସହିତ ଅନ୍ୟ ବରିଷ୍ଠ କଂଗ୍ରେସ ନେତା ଆକ୍ରାନ୍ତଙ୍କୁ ଭେଟି ସେମାନଙ୍କ ସହ ଆଲୋଚନା କରିଥିଲେ। କଣାସର ନୂଆ ଗାଁ, ନଇକୁଳ ପାଟଣା ଆଦି ଗ୍ରସ୍ତ କରି ଆକ୍ରାନ୍ତଙ୍କୁ ଭେଟିଛନ୍ତି। ବିଶେଷ କରି ହଇଜାରେ ମୃତ୍ୟୁ ହୋଇଥିବା ୪ ମୃତକଙ୍କ ପରିବାରକୁ ଭେଟି ସମବେଦନା ଜଣାଇବା ସହିତ ସଚେତନ ରହିବା ପାଇଁ ପରାମର୍ଶ ଦେଇଛନ୍ତି। ୪ ମୃତକଙ୍କ ପରିବାରକୁ ୫ ହଜାର ଲାେଖାଏଁ ଅନୁକମ୍ପାମୂଳକ ସହାୟତା ପ୍ରଦାନ କରିଛି କଂଗ୍ରେସ ଫ୍ୟାକ୍ଟ ଫାଇଣ୍ଡିଂ ଟିମ । ଦୟା ନଦୀ ପାଣି ବିଷାକ୍ତ ହୋଇଥିବାରୁ ଏହାକୁ ବ୍ୟବହାର ନକରିବା ପାଇଁ ଜନସାଧାରଣଙ୍କୁ ଅନୁରୋଧ କରିଛନ୍ତି। କଣାସରେ ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହୋଇଥିବା ବେଳେ ହଇଜା ରୋକିବାରେ ପ୍ରଶାସନ ବିଫଳ ବୋଲି ଅଭିଯୋଗ କରିଛି କଂଗ୍ରେସ ଟିମ।
ପୁଣି ସ୍କୁଲକୁ ବୋମାରେ ଉଡ଼଼ାଇବାକୁ ଧମକ
ମୁମ୍ବାଇ : ମୁମ୍ବାଇରେ ପୁଣି ସ୍କୁଲକୁ ବୋମାରେ ଉଡ଼଼ାଇବାକୁ ଧମକ। ଜୋଗେଶ୍ଵରୀ ଓସିୱାରା ଅଂଚଳରେ ଏକ ଘରୋଇ ସ୍କୁଲ କର୍ତ୍ତୃପକ୍ଷଙ୍କୁ ଆସିଥିଲା ଧମକପୂର୍ଣ୍ଣ ଇ-ମେଲ। ଧମକ ଆସିବା ପରେ ଚାରିଆଡେ ହୋହାଲ୍ଲା ସୃଷ୍ଟି ହୋଇଥିଲା। ପୋଲିସକୁ ଖବର ପରେ ତୁରନ୍ତ ଆସି ପହଞ୍ଚିଥିଲା ପୋଲିସ ସହ ବୋମା ନିଷ୍କ୍ରିୟକାରୀ ଟିମ। ସ୍କୁଲରେ ଯାଞ୍ଚ ପରେ କୌଣସି ସନ୍ଦିଗ୍ଧ ସାମଗ୍ରୀ ମିଳିନଥିବା ଜଣାପଡିଛି। ଅଫଜଲ ଗ୍ଯାଙ୍ଗ ପକ୍ଷରୁ ଏହି ବୋମା ରଖାଯାଇଥିବା ଧମକ ଦିଆଯାଇଥିଲା। ମୁମ୍ବାଇର ଗ୍ଲାୋବାଲ ରିୟାନ ସ୍କୁଲରେ ଏହି ବୋମା ରଖାଯାଇଥିବା ଧମକ ଆସିଥିଲା। ତେବେ ମାମଲା ଯାଞ୍ଚ କରୁଛି ପୋଲିସ ।
ବିଜାପୁରରେ IED ବୋମା ଡିଫ୍ୟୁଜ କଲେ ସୁରକ୍ଷାକର୍ମୀ
ରାୟପୁର : ଛତିଶଗଡ଼ ବିଜାପୁରରେ IED ବୋମାକୁ ନିଷ୍କ୍ରିୟ କଲେ ସୁରକ୍ଷାକର୍ମୀ। ରାସ୍ତାରେ ବୋମା ଖଞ୍ଜାଯାଇଥିବା ନେଇ ସୂଚନା ପରେ ଶକ୍ତିଶାଳୀ ବୋମାକୁ କରାଗଲା ଡିଫ୍ୟୁଜ। ୫୦ କେଜି ଓଜନର ଏହି ବୋମା ଥିବା ଜଣାପଡିଛି। ବିଜାପୁର ଅଂଚଳରେ ମୁତୟନ ସିଆପିଏଫଙ୍କ ଟିମ ଏହି ବୋମାକୁ ନିଷ୍କ୍ରିୟ କରିଛି। ବିଜାପୁର ଲ୍ଯାଣ୍ଡମାଇନ ବିସ୍ଫୋରଣ ଭଳି ପୁଣି ଏକ ଅଘଟଣ ଘଟିବା ପୂର୍ବରୁ ନକ୍ସଲଙ୍କ ଯୋଜନାକୁ ପଣ୍ଡ କରିଛନ୍ତି ଯବାନ। ବାସାଗୁଡ଼ା-ଆବାପଲ୍ଲ ରାସ୍ତାରେ ଲଗାଇଥିଲେ ଏହି IED। ରାସ୍ତାର ତିମ୍ମାପୁର ନିକଟରେ ଏହି ଉଚ୍ଚଶକ୍ତି ସମ୍ପନ୍ନ ବୋମା ଲଗାଇଥିଲେ ନକ୍ସଲ। ସର୍ଚ୍ଚ ଅପରେସନରେ ଏହି ବୋମାକୁ ଠାବ କରିବା ପରେ ନିଷ୍କ୍ରିୟ କରାଯାଇଛି। ରିମୋଟ କଣ୍ଟ୍ରୋଲ ସାହାଯ୍ଯରେ ବଡ଼ ଧରଣର ବିସ୍ଫୋରଣ କରିବାକୁ ଯୋଜନା କରିଥିଲେ ମାଓବାଦୀ। ସିଆରପିଏଫ ୧୬୮ ବାଟାଲିୟନର ଯବାନ ଏହି ବୋମା ଖଂଜାଯାଇଥିବା ସୂଚନା ପାଇଥିଲେ। ରାସ୍ତାରେ ଏକ ବ୍ରିଜ ତଳେ ପଥର ହଟାଇ ଏହି ବୋମା ଖଂଜିଥିଲେ ନକ୍ସଲ। ଯାହାକୁ ଖୋଜି ବାହାର କରି ନାକାମ କରିଥିଲେ ସୁରକ୍ଷାକର୍ମୀ।
ଦିଲ୍ଲୀରେ ବେରୋଜଗାର ହଟାଇବା ଲାଗି ସଂଗ୍ରାମ କରୁଛି ଆପ୍ : ଅରବିନ୍ଦ କେଜ୍ରିୱାଲ
ନୂଆଦିଲ୍ଲୀ : ଦିଲ୍ଲୀରେ ବେରୋଜଗାର ହଟାଇବା ଲାଗି ସଂଗ୍ରାମ କରୁଛି ଆମ୍ ଆଦମୀ ପାର୍ଟି। ନିଯୁକ୍ତି ନେଇ ଗତ ୧୦ ବର୍ଷ ଧରି ଆପ୍ ସରକାର ବିଭିନ୍ନ ସ୍ତରରେ ଉଦ୍ଯମ ଜାରି ରଖିଛି। ଶିକ୍ଷା, ପାନୀୟ ଜଳ, ସ୍ବାସ୍ଥ୍ଯ ଆଦି କ୍ଷେତ୍ରରେ ବ୍ଯାପକ ବିକାଶ ସାଧିତ ହୋଇଛି। ତେବେ ରୋଜଗାରେ ଏବେ ମୁଖ୍ଯ ସମସ୍ଯା ଭାବେ ଠିଆ ହୋଇଛି। ବର୍ତ୍ତମାନ ଦିଲ୍ଲୀରେ ବେରୋଜଗାରୀ ବଢିଛି। ଆସନ୍ତା ୫ ବର୍ଷରେ ଦିଲ୍ଲୀରୁ ବେରୋଜଗାରୀ ହଟାଇବା ଆପର ମୁଖ୍ଯ ଆହ୍ବାନ ହେବ ବୋଲି କହିଛନ୍ତି ପୂର୍ବତନ ମୁଖ୍ଯମନ୍ତ୍ରୀ ଅରବିନ୍ଦ କେଜ୍ରିୱାଲ। ସେ କହିଛନ୍ତି- କରୋନା କାଳରେ ବେରୋଜଗାରୀ ବଢିଥିଲା। ତଥାପି ଦିଲ୍ଲୀ ସରକାର ୧୨ ଲକ୍ଷ ଲୋକଙ୍କୁ ଚାକିରି ଦେଇଥିଲେ। ପଞ୍ଜାବରେ ଶିକ୍ଷା ଓ ନିଯୁକ୍ତିକୁ ଗୁରୁତ୍ବ ଦିଆଯାଇଛି। ଦିଲ୍ଲୀର ବିଭିନ୍ନ କ୍ଷେତ୍ରରେ ଐତିହାସିକ ସଫଳତା ହାସଲ ହୋଇଛି ବୋଲି କହିଛନ୍ତି କେଜରିୱାଲ। ତେଣେ ଆପର ପ୍ରଚାର ପ୍ରକ୍ରିୟାରେ ସାମିଲ ହୋଇଛନ୍ତି ପଞ୍ଜାବ ମୁଖ୍ଯମନ୍ତ୍ରୀ ଭଗବନ୍ତ ମାନ୍।
ଫେବ୍ରୁଆରୀରେ ଆସିବେ ଷୋଡ଼ଶ ଅର୍ଥ କମିଶନ
ଭୁବନେଶ୍ବର : ଫେବ୍ରୁଆରୀ ୪ରୁ ୭ ଓଡ଼ିଶା ଗସ୍ତରେ ଆସୁଛନ୍ତି ଷୋଡ଼ଶ ଅର୍ଥ କମିଶନ । ବିକଶିତ ଓଡ଼ିଶା ପାଇଁ ମିଳିବ କି ରାଜ୍ୟକୁ ସ୍ବତନ୍ତ୍ର ରାଜ୍ୟ ପାହ୍ୟା ? ନା’ ଡବଲ ଇଞ୍ଜିନ ସରକାରରେ ପୁଣି ଥରେ ଓଡ଼ିଶା ହେବ ଅବହେଳିତ ? ଓଡ଼ିଶାକୁ ସ୍ବତନ୍ତ୍ର ରାଜ୍ୟ ପାହ୍ୟା ଦାବି ନେଇ ଚତୁର୍ଦ୍ଦଶ ଓ ପଞ୍ଚଦଶ କେନ୍ଦ୍ର ଅର୍ଥ କମିଶନଙ୍କ ପାଖରେ ପୂର୍ବ ନବୀନ ସରକାର ଦାବି କରିଆସୁଥିଲେ । ଖାଲି ସେତିକି ନୁହେଁ, ରାଜ୍ୟକୁ ଭର୍ଟିକାଲ ଟିକସ ବାବଦରେ ୫୦ ପ୍ରତିଶତ ଦେବାକୁ ଦାବି କରିଥିଲେ । ଏହାସହିତ ଦୁର୍ବିପାକ ପ୍ରବଣ ଓଡ଼ିଶା ପାଇଁ ସ୍ବତନ୍ତ୍ର ଆର୍ଥିକ ପ୍ୟାକେଜ୍ ଦେବାକୁ ମଧ୍ୟ ଦେଇଥିଲେ ୮ ଲକ୍ଷ ୨୪ ହଜାର କୋଟିର ଦାବି ପତ୍ର । କିନ୍ତୁ ଓଡ଼ିଶା ପାଇଁ କେନ୍ଦ୍ରକୁ ଅର୍ଥ କମିଶନଙ୍କ ସୁପାରିସ ଥିଲା ମାତ୍ର ୨ ଲକ୍ଷ ୨୨ ହଜାର କୋଟି । ଅର୍ଥାତ୍ ଦାବିର ୪ ଗୁଣରୁ ଭାଗେ । କେନ୍ଦ୍ର ଅର୍ଥ କମିଶନ ଓଡ଼ିଶାକୁ ଆସନ୍ତି । ବୁଲନ୍ତି, ବୁଝନ୍ତି ଦାବି ଶୁଣନ୍ତି । କିନ୍ତୁ ଦିଲ୍ଲୀ ଗଲା ପରେ ସବୁ ଓଲଟିଯାଏ । ଯାହା ସୁପାରିସ କରାଯାଏ ତାକୁ ଠିକଣା ସମୟରେ ଦେବାରେ ବି କେନ୍ଦ୍ର ଅବହେଳା କରେ । ଏଭଳି ସ୍ଥିତିରେ ମୋହନ ସରକାରଙ୍କ ନିଷ୍ପତ୍ତି କମିଶନଙ୍କ ଆଗରେ ୧୨ ଲକ୍ଷ ୫୬ ହଜାର ୧୪୮ କୋଟି ଟଙ୍କାର ଦାବି ଉପସ୍ଥାପନ କରାଯିବ । କିନ୍ତୁ ସ୍ବତନ୍ତ୍ର ରାଜ୍ୟ ପାହ୍ୟା ନେଇ କଣ ରାଜ୍ୟ ସରକାରଙ୍କ ଆଭିମୁଖ୍ୟ ସେ ନେଇ ମୁଖ୍ୟମନ୍ତ୍ରୀ ଉଁ କି ଚୁଁ ପଦୁଟିଏ କହୁନାହାନ୍ତି । ବିଜେଡିର ଅଭିଯୋଗ, ଓଡ଼ିଶାକୁ ସ୍ବତନ୍ତ୍ର ରାଜ୍ୟ ପାହ୍ୟା ଦେବାକୁ ୨୦୧୪ ନିର୍ବାଚନୀ ଇସ୍ତାହାରରେ ବିଜେପି ପ୍ରତିଶୃତି ରଖିଥିଲା । କିନ୍ତୁ କ୍ଷମତାକୁ ଆସିବା ପରେ ସବୁ ଭୁଲିଗଲେ । ସୁଧମୁକ୍ତ ଋଣ ଦେଇ ବାହାବା ନେଉଛନ୍ତି । ଏସବୁ ପ୍ରଶ୍ନର ବିଜେପି କଣ ଉତ୍ତର ଦେଉ କି ନ ଦେଉ, ପୂର୍ବୋଦୟର ବିକାଶ କଥା କହି ପଞ୍ଚାୟତ ହାତକୁ ଅଧିକ ପାଣ୍ଠି ଆସିଲେ ରାଜ୍ୟର ସର୍ବାଙ୍ଗୀନ ବିକାଶ ହେବ ବୋଲି ଯୁକ୍ତି ବାଢିଛି ।
ଚତୁର୍ଦ୍ଦଶ ଅର୍ଥ କମିଶନ ରାଜ୍ୟକୁ ୪୨ ପ୍ରତିଶତ ଟିକସ ଅର୍ଥ ଆବଣ୍ଟନ କରିଥିଲେ । କିନ୍ତୁ ଜାମ୍ମୁ ଓ କାଶ୍ମୀର କେନ୍ଦ୍ର ଶାସିତ ଅଞ୍ଚଳ ହେଲା ପରେ ୪୨ ପ୍ରତିଶତରୁ ୪୧ ପ୍ରତିଶତକୁ ହ୍ରାସ କଲେ ପଞ୍ଚଦଶ ଅର୍ଥ କମିଶନ । ଏବେ ହୋରାଇଜେଣ୍ଟାଲ ଟିକସ ବ୍ୟବସ୍ଥାରେ କେନ୍ଦ୍ର ଟିକସ ଅଂଶରୁ ଓଡ଼ିଶାକୁ ମିଳୁଛି ୪.୫୨୮ ପ୍ରତିଶତ । ଯାହାକି ସମୁଦ୍ରକୁ ଶଙ୍ଖେ । ବିକଶିତ ଓଡ଼ିଶାର ସ୍ବପ୍ନ ଏଥିରେ ପୂରା ହେବନି । ପୂର୍ବତନ ଅର୍ଥମନ୍ତ୍ରୀଙ୍କ ମତ, କେନ୍ଦ୍ର ଅର୍ଥ କମିଶନଙ୍କ ପାଖରେ ବଡ଼ ପରିମାଣର ଟଙ୍କା ଦାବି ରଖିଲେ ହେବନି । ଏଥିପାଇଁ ଏହାକୁ କିପରି ଖର୍ଚ୍ଚ କରାଯିବ ସେ ନେଇ ଠୋସ ଖସଡ଼ା ସହ ଦାବି ରଖିବା ଦରକାର । ଓଡ଼ିଶାର ଜନସଂଖ୍ୟା ସହିତ ଅପପୁଷ୍ଟି ଓ ଦୁର୍ବିପାକକୁ ଆଖିରେ ରଖି ରାଜ୍ୟକୁ ସ୍ବତନ୍ତ୍ର ପାହ୍ୟା କିମ୍ବା ବିହାର ଓ ଆନ୍ଧ୍ର ଭଳି ସ୍ବତନ୍ତ୍ର ଆର୍ଥିକ ପ୍ୟାକେଜ ଦେବାର ଆବଶ୍ୟକତା ରହିଛି । ତା ନ ହେଲେ ଡବଲ ଇଞ୍ଜିନ ସରକାରକୁ ଓଡ଼ିଶାବାସୀ ଯେପରି କ୍ଷମତାକୁ ଆଣିଲେ ଆଗାମୀ ଦିନରେ ଏହି ଚିତ୍ର ବି ଓଲଟି ଯାଇପାରେ ।
ରାଜ୍ୟକୁ ସ୍ବତନ୍ତ୍ର ପାହ୍ୟା ଦେବାରେ ଏବେ କେନ୍ଦ୍ର ଟାଳୁଟୁଳ ନୀତି ଆପଣାଉଛି । ଷୋଡ଼ଶ ଅର୍ଥ କମିଶନଙ୍କ କାର୍ଯ୍ୟକାଳ ୨୦୨୬ରୁ ଆରମ୍ଭ ହୋଇ ୨୦୩୧ ପର୍ଯ୍ୟନ୍ତ ଜାରି ରହିବ । ଖଣିଜ ସମ୍ପଦ ଭରା ଓଡ଼ିଶା ପାଇଁ ଏ ପର୍ଯ୍ୟନ୍ତ କୋଇଲା ରୟାଲଟି ରିଭିଜନ ହେଉନି କି ଖଣି ରୟାଲଟି ନେଇ କେନ୍ଦ୍ର ଏକ ପ୍ରକାର ବାଟ ବନ୍ଦ କରିଦେଇଛି । ଏବର ରାଜ୍ୟ ସରକାର ରାଜ୍ୟବାସୀଙ୍କ ହିତ କଥା ଚିନ୍ତା କରୁଛନ୍ତି ନା ଦିଲ୍ଲୀ ଆକ୍କାଙ୍କୁ ଖୁସି କରିବାକୁ କେବଳ ଔପଚାରିକତା ପୂର୍ଣ୍ଣ କରିବାରେ ବ୍ୟସ୍ତ ରହିବେ ତାକୁ ରାଜ୍ୟବାସୀ ଅନାଇବସିଛନ୍ତି ।
‘ନବୀନଙ୍କ ନେତୃତ୍ବରେ ଶିଳ୍ପାୟନର ହବ ପାଲଟିଥିଲା ଓଡ଼ିଶା’
ଭୁବନେଶ୍ବର : ନବୀନଙ୍କ ନେତୃତ୍ବରେ ଓଡ଼ିଶା ଶିଳ୍ପାୟନର ହବ ପାଲଟିଥିଲା । ୨୦୧୬ରୁ ମେକ୍ ଇନ୍ ଓଡ଼ିଶା କାର୍ଯ୍ୟକ୍ରମ ଆରମ୍ଭ କରି ନବୀନ ପଟ୍ଟନାୟକ ନିବେଶକାରୀଙ୍କୁ ଓଡ଼ିଶା ମୁହାଁ କରାଇଥିଲେ । ୨୦୧୬ରେ ମେକ୍ ଇନ୍ ଓଡ଼ିଶାର ପ୍ରଥମ ସଂସ୍କରଣରେ ଅଢ଼େଇରୁ ୩ ଲକ୍ଷ କୋଟି ଟଙ୍କାର ପୁଞ୍ଜି ଆସିଥିଲା । ୨୦୧୮ରେ ଦ୍ବିତୀୟ ସଂସ୍କରଣରେ ସାଢ଼େ ୪ ଲକ୍ଷ କୋଟି ପୁଞ୍ଜି ଆସିଥିଲା । ୨୦୨୨ରେ ମେକ୍ ଇନ୍ ଓଡ଼ିଶାର ତୃତୀୟ ସଂସ୍କରଣରେ ୧୦ ଲକ୍ଷ ୩୦ ହଜାର କୋଟି ପୁଞ୍ଚି ଆସିଥିଲା । ମେକ୍ ଇନ୍ ଓଡ଼ିଶାର ୩ଟି ସଂସ୍କରଣରେ ଓଡ଼ିଶାକୁ ଭଲ ପୁଞ୍ଜି ଆସିବା ସହ ୬୦ ପ୍ରତିଶତ ପ୍ରକଳ୍ପ କାର୍ଯକାରୀ ହେବା ଆରମ୍ଭ ହୋଇଥିଲା । ଯାହା ଦେଶ ତୁଳନାରେ ଓଡ଼ିଶା ଆଗରେ ଥିଲା । ଆଜିର ତାରିଖରେ ଓଡ଼ିଶାରେ ଶିଳ୍ପାୟନର ଆବଶ୍ୟକତା ଅଛି । ତେଣୁ ବିଜେପି ସରକାର ଆସିଲା ପରେ ଚିରାଚରିତ ଢଙ୍ଗରେ ନାଁ ପରିବର୍ତ୍ତନ କରୁଛି । ମେକ୍ ଇନ୍ ଓଡ଼ିଶାର ନାଁ ପରିବର୍ତ୍ତନ କରି ଉତ୍କର୍ଷ ଓଡ଼ିଶା ନାଁ ଦେଇଛି । ହେଲେ ଏଥିରେ କେତେ ପୁଞ୍ଜି ଆସୁଛି ତାହା ଦେଖିବାର କଥା । ୨୮ ଓ ୨୯ ତାରିଖ ଦୁଇଦିନ ଧରି ଉତ୍କର୍ଷ ଓଡ଼ିଶା ହେବ । ପ୍ରବାସୀ ଭାରତୀୟ ସମ୍ମିଳନୀରେ କହିଲେ ୧୫ ହଜାର ପ୍ରବାସୀ ଆସିବେ । କେତେ ପ୍ରବାସୀ ଆସିଲେ ତାହା ଓଡ଼ିଶା ଲୋକ ଦେଖିଛନ୍ତି ବୋଲି ବିଜେଡି ବିଧାୟକ ପ୍ରତାପ ଦେବ କହିଛନ୍ତି । ବିଜେଡି ସରକାର ଏକୁଟିଆ ରାଜ୍ୟ ପାଇଁ ଯେତିକି ପୁଞ୍ଜି ଆଣିଛି, ବିଜେପିର ଡବଲ ଇଞ୍ଜିନ ସରକାର ଅଧିକ ପୁଞ୍ଜି ଆଣୁ ବୋଲି ବିଜେଡି ଦାବି କରିଛି । ଉତ୍କର୍ଷ ଓଡ଼ିଶା ସରିବା ପରେ କେତେ ପୁଞ୍ଚି ଓଡ଼ିଶା ପାଇଲା ତାହାର ହିସାବ କରାଯିବ ଓ ବିଧାନସଭାରେ ପ୍ରଶ୍ନ କରାଯିବ ବୋଲି ବିଜେଡି ବିଧାୟକ ପ୍ରତାପ ଦେବ କହିଛନ୍ତି ।
ନାମକୁ ମାତ୍ର ଭୁବନେଶ୍ଵର ଜାତୀୟ ଅନୂସୂଚିତ ଜନଜାତି କମିଶନଙ୍କ ଆଞ୍ଚଳିକ କାର୍ଯ୍ୟାଳୟ
ଭୁବନେଶ୍ବର : ସାଇନବୋର୍ଡ ହିଁ ବୟାନ କରୁଛି ଏ ସରକାରୀ କାର୍ଯ୍ଯାଳୟ କିଭଳି କାର୍ଯ୍ଯ କରୁଛି। ବୋର୍ଡରୁ ଅକ୍ଷର ଲିଭି କଳଙ୍କି ଲାଗିଲାଣି।ଭିତରେ ଅଧିକାରୀ ନଥିବାରୁ ଖାଲି ପଡ଼ିଛି ଏକାଧିକ ସିଟ୍। ଜାତୀୟ ଅନୁସୂଚିତ ଜନଜାତି ଆୟୋଗଙ୍କ ଏ ହେଉଛି ଭୁବନେଶ୍ବର ଆଂଚଳିକ କାର୍ଯ୍ଯାଳୟ।ଏହି ଅଫିସ ଅଧିନରେ ଓଡିଶା ସମେତ ପଶ୍ଚିମବଂଗ, ତାମିଲନାଡୁ, ତେଲଂଗାନା, ଆନ୍ଧ୍ର ପ୍ରଦେଶ, ପୁଡୁଚେରୀ, ଆଣ୍ଡାମାନ ଓ ନିକୋବର ଦ୍ଵୀପପୁଂଜ ରହିଛି। ଅନୁସୂଚିତ ଜନଜାତି ବର୍ଗଙ୍କ ଉପରେ ହେଉଥିବା ଅତ୍ଯାଚାର, ଚାକିରୀ ଓ ଉନ୍ନୟନମୂଳକ କାର୍ଯ୍ଯରେ ଅବ୍ଯବସ୍ଥା ସମ୍ପର୍କିତ ଅଭିଯୋଗର ଶୁଣାଣି କମିସନ କରିଥାନ୍ତି। ତଦାରଖ ପାଇଁ ଭୁବନେଶ୍ବର ଆଞ୍ଚଳିକ କାର୍ଯ୍ଯାଳୟରେ ଜଣେ ନିର୍ଦ୍ଦେଶକ ମଧ୍ୟ ରହିଛନ୍ତି। ସେହିଭଳି ଅନୁମୋଦିତ କର୍ମଚାରୀକଂ ସଂଖ୍ଯା ୧୪। ହେଲେ ଅଛନ୍ତି ମାତ୍ର ୫ ଜଣ।ସ୍ଥାୟୀ ନିର୍ଦ୍ଦେଶକ ପଦବୀ ଦୀର୍ଘ ଦିନ ଧରି ଖାଲି ପଡିଛି।ଦାୟିତ୍ଵରେ ଥିବା ଅଧିକାରୀ ଦିଲ୍ଲୀରେ ଥିବା ମୁଖ୍ଯ କାର୍ଯ୍ଯାଳୟ ସମେତ ଉତ୍ତରପୂର୍ବ ବିଭିନ୍ନ ରାଜ୍ଯ ଦାୟିତ୍ଵରେ ଅଛନ୍ତି।ତେଣୁ ସେ ଏଠାକୁ ଆସିବା ସମ୍ଭବପର ହେଉନି। ଦୟନୀୟ ଅବସ୍ଥାରେ ପଡିରହିଛି କମିଶନଙ୍କ କାର୍ଯ୍ୟାଳୟ ।
ଅନୂସୁଚିତ ଜନଜାତି କମିଶନଙ୍କ ନୂଆଦିଲ୍ଲୀ ମୂଖ୍ଯ କାର୍ଯ୍ଯାଳୟ ସମେତ ଦେଶରେ ୬ଟି ଆଂଚଳିକ କାର୍ଯ୍ଯାଳୟ ରହିଛି।ଦେଶରେ ସାମାଜିକ ନ୍ଯାୟ ପ୍ରତିଷ୍ଠା, ଅନୁସୂଚିତ ଜାତି ଓ ଜନଜାତି ବର୍ଗଙ୍କୁ ସଶକ୍ତ କରିବା ପାଇଁ ୮୯ତମ ସମ୍ବିଧାନ ସଂଶୋଧନ ଅନୁଯାୟୀ ୨୦୦୪ରେ କମିଶନ ଗଠନ ହୋଇଥିଲା।ଜଣେ ଅଧ୍ଯ୍ଯକ୍ଷ, ଜଣେ ଉପାଧ୍ୟକ୍ଷଙ୍କ ସହ ୩ ସଦସ୍ୟ ରହିବା ବ୍ୟବସ୍ଥା ରହିଛି।ହେଲେ ଏବେ କମିଶନରେ ଉପାଧ୍ଯ୍ଯକ୍ଷ ପଦବୀ ମଧ୍ଯ୍ଯ ଖାଲି ପଡିଛି। ଜନଜାତି ବର୍ଗଙ୍କୁ ଅଧିକ ସୁରକ୍ଷା ଦେବା ପାଇଁ ତତ୍କାଳୀନ ବିଜେଡି ସରକାର କେନ୍ଦ୍ରୀୟ ଢାଂଚାରେ ରାଜ୍ଯ ଜନଜାତି କମିଶନ ଗଠନ ଲାଗି ନିଷ୍ପତ୍ତି ନେଇଥିଲେ। ହେଲେ ସରକାର ବଦଳିବା ପରେ ନୂଆ ସରକାର ପୂରା ଚୁପ।କେବଳ ସାମ୍ବିଧାନିକ ପଦପଦବୀରେ କିଛି ଜନଜାତି ବର୍ଗଙ୍କୁ ବସାଇ ସରକାର ନିଜ ଦାୟିତ୍ଵ ସାରିଦେଇଥିବା ଅଭିଯୋଗ ହୋଇଛି। କର୍ମଚାରୀ ଅଭାବରୁ କିଛି ବର୍ଷ ଧରି ଜନଜାତି କମିଶନଙ୍କ ଭୁବନେଶ୍ବର ଆଂଚଳିକ କାର୍ଯ୍ଯାଳୟ କୌଣସି ମାମଲା ନିଜ ଆଡୁ ରୁଜୁ କରିନାହିଁ। ଶେଷଥର ପାଇଁ କେବେ ହୋଇଥିଲା ସେ ଖବର ମଧ୍ଯ୍ଯ କାହା ପାଖରେ ନାହିଁ। ଗତ ଡିସେମ୍ବର ସୁଦ୍ଧା ମାତ୍ରା ୨୪୩ ମାମଲା ଦାୟର ହୋଇଛି।