ଭୁବନେଶ୍ୱର : ବେଲଗାମ ଆମ ବସ୍ । ପୁଣି ରାଜଧାନୀର ରାଜରାସ୍ତାରେ ଘଟାଇଲା ଦୁର୍ଘଟଣା । ଅଟୋକୁ ଧକ୍କାଦେଇ ଚାଳକଙ୍କୁ କଲା ଲହୁଲୁହାଣ । ନୟାପଲ୍ଲୀ ଦୁର୍ଗା ମଣ୍ଡପ ସାମ୍ନାରେ ଅଟୋକୁ ପିଟିଲା ଆମ ବସ୍ । ଦୁର୍ଘଟଣାରେ ଅଟୋ ଡ୍ରାଇଭର ଗୁରୁତର ହୋଇଥିବା ବେଳେ ପିସିଆର ପହଞ୍ଚି ତାଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଚିକତ୍ସା ପାଇଁ ଭର୍ତ୍ତି କରିଛି । ଦୁର୍ଘଟଣାରେ ଅଟୋ ସମ୍ପୂର୍ଣ ନଷ୍ଟ ହୋଇଯାଇଛି । ଦୁର୍ଘଟଣା ପରେ ଉତ୍ୟକ୍ତ ଲୋକେ ଆମ ବସ୍ ଡ୍ରାଇଭରଙ୍କୁ ଘେରି ଗଣ୍ଡଗୋଳ କରିଛନ୍ତି । କିଛି ସମୟ ସେଠାରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିବା ବେଳେ ପୋଲିସ ପହଞ୍ଚି ସ୍ଥିତିକୁ ନିୟନ୍ତ୍ରଣକୁ ଆଣିଛି । ତେବେ ଆମ ବସ୍ ଡ୍ରାଇଭରର ବେପରୁଆ ଗାଡି ଚାଳନା ଯୋଗୁ ବାରମ୍ଭାର ରାଜଧାନୀରେ ଏଭଳି ଘଟଣା ଘଟୁଥିବା ଅଭିଯୋଗ ହୋଇଛି ।
ପୁଣି ଶ୍ରୀମନ୍ଦିର ନିଶିଦ୍ଧାଞ୍ଚଳରେ ଡ୍ରୋନ ଉଡାଇ ଭିଡ଼ିଓ ଭାଇରାଲ
ପୁରୀ : ପୁଣି ପୁରୀ ଶ୍ରୀମନ୍ଦିର ନିଶିଦ୍ଧାଞ୍ଚଳରେ ଡ୍ରୋନ ଉଡାଇ ଭିଡ଼ିଓ ଭାଇରାଲ । ଭିଡ଼ିଓକୁ ସୋସିଆଲ ମିଡ଼ିଆରେ ଅପଲୋଡ଼ କରାଯାଇ ଭାଇରାଲ୍ କରାଯାଇଛି । ମନୀଷ ସୋଲାଙ୍କି ନାମକ ଜଣେ ବ୍ୟକ୍ତି ନିଜର ୟୁଟ୍ୟୁବ୍ ଚ୍ୟାନେଲରେ ଶ୍ରୀମନ୍ଦିର ଉପର ଭିଡ଼ିଓକୁ ଉଠାଇବା ସହ ସେହି ଭିଜୁଆଲକୁ ଅପଲୋଡ଼ କରିଥିବା ନଜରକୁ ଆସିଛି । ଏହି ଭିଡିଓରେ ସେ ଶ୍ରୀମନ୍ଦିର ଉପରେ ଡ୍ରୋନ୍ ଉଡ଼ାଇ ଶ୍ରୀମନ୍ଦିର ବାହାର ଓ ଭିତର ସରଞ୍ଚନାକୁ ଉତ୍ତଳନ କରିଥିବା ନଜରକୁ ଆସୁଛି । ବ୍ଲଗର ଜଣକ ଶ୍ରୀମନ୍ଦିର ବିଷୟରେ ଅନେକ ସୂଚନା ଦେଉଥିବା ବେଳେ ଶ୍ରୀମନ୍ଦିର ଉପର ଭିଜୁଆଲକୁ ସ୍ପଷ୍ଟ ଦେଖାଉଥିବା ଜଣାପଡିଛି। ଯେଉଁଥିରେ ଶ୍ରୀମନ୍ଦିର ଭିତର ବେଢ଼ା ଆଦିର ଚିତ୍ର ରହିଛି। ତେବେ ଭିଡିଓଟି ଗତ ୭ ଦିନ ତଳେ ଅପଲୋଡ଼ ହୋଇଥିବା ବେଳେ ଭିଜୁଆଲ କେବେ ନିଆଯାଇଛି ତାହାର ସ୍ପଷ୍ଟ ସୂଚନା ମିଳିପାରିନାହିଁ । ଯାହାକି ଶ୍ରୀମନ୍ଦିର ସୁରକ୍ଷା ବ୍ୟବସ୍ଥା ଓ ପୋଲିସର ପାରିବା ପଣିଆ ଉପରେ ପ୍ରଶ୍ନ ଉଠିଛି।
କମ୍ପିଟିସନରେ ହାରିଯିବେ ପିଲା,ଏହି ଭୟରେ ଦୁଇ ପୁଅଙ୍କୁ ମାରି ଆତ୍ମହତ୍ୟା କଲେ ପିତା !
ନନ୍ଦିଘୋଷ ବ୍ୟୁରୋ : ଦୁଇ ପୁଅକୁ ମାରି ଆତ୍ମହତ୍ୟା କଲା ବାପା । ପ୍ରତିଯୋଗିତା ମୂଳକ ଦୁନିଆରେ ଭବିଷ୍ୟତ ଅନ୍ଧକାରମୟ ହୋଇଯିବା ଭୟରେ ଏଭଳି ପଦକ୍ଷେପ ନେଇଛନ୍ତି ଆନ୍ଧ୍ରପ୍ରଦେଶର କାକିନାଡା ସହରର ରାମନାୟପେଟରେ ରହୁଥିବା ବ୍ୟକ୍ତି । ନିଜେ ଜୀବନ ହାରିବା ସହ ଜଣେ ୬ବର୍ଷ ଆଉ ଜଣେ ୭ବର୍ଷର ପୁଅକୁ ହତ୍ୟା କରିଛନ୍ତି । ଆତ୍ମହତ୍ୟା ପୂର୍ବରୁ ସେ ଏକ ସୁଇସାଇଟ୍ ନୋଟ୍ ଛାଡି ଦେଇଯାଇଛନ୍ତି । ଯେଉଁଥିରେ ଲେଖାହୋଇଛି ଯେ, ଯେଉଁମାନେ UKG ଏବଂ ପ୍ରଥମ ଶ୍ରେଣୀରେ ପଢୁଛନ୍ତି, ସେମାନଙ୍କୁ ଏବେ ପ୍ରତିଯୋଗିତାମୂଳକ ଦୁନିଆରେ ନିଜକୁ ପ୍ରତିଷ୍ଠିତ କରିବା ପାଇଁ ସଂଘର୍ଷ କରିବାକୁ ପଡିବ ।
ପୋଲିସ ଅନୁଯାୟୀ, ଆତ୍ମହତ୍ୟା କରିଥିବା ପିତା ଜଣକ ହେଲେ ୩୧ ବର୍ଷୀୟ ବନପଲ୍ଲୀ ଚନ୍ଦ୍ର କିଶୋର । ସେ କାକିନାଡାର ONGC ଅଫିସରେ ଆସିଷ୍ଟାଣ୍ଟ ଭାବେ କାମ କରୁଥିଲେ । ନିଜର ଦୁଇ ପୁଅଙ୍କ ହାତ ଗୋଡ ବାନ୍ଧି ବାଲଟି ପାଣିରେ ବୁଡାଇ ହତ୍ୟା ଭଳି ଜଘନ୍ୟ କାଣ୍ଡ କରିଛନ୍ତି । କିନ୍ତୁ ପୋଲିସ ମତରେ, ତାଙ୍କ ପରିବାରରେ ସେଭଳି ଆର୍ଥିକ ଅବସ୍ଥା ଖରାପ ନଥିଲା ଯେଉଁଥିପାଇଁ ସେ ଏଭଳି ପଦକ୍ଷେପ ନେଇଛନ୍ତି । ଏହା ପୋଲିସକୁ ମଧ୍ୟ ଚିନ୍ତାରେ ପକାଇ ଦେଇଛି । ରିପୋର୍ଟ ଅନୁଯାୟୀ, ବନପଲ୍ଲୀଙ୍କ ଦୁଇ ପୁଅ ନିକଟସ୍ଥ ଏକ ଘରୋଇ ସ୍କୁଲରେ ପାଠପଢ଼ୁଥିଲେ। ପିଲାମାନେ ସ୍କୁଲରେ ଭଲ କରୁନଥିବାରୁ, ନୂତନ ଶିକ୍ଷାବର୍ଷରୁ ସେମାନଙ୍କୁ ଏକ ଭଲ ସ୍କୁଲକୁ ସ୍ଥାନାନ୍ତର କରିବାକୁ ସେ ଓ ତାଙ୍କ ପତ୍ନୀ ନିଷ୍ପତ୍ତି ନେଇଥିଲେ ।
ଶୁକ୍ରବାର ଦିନ ହୋଲି ଛୁଟି ଥିବାରୁ, କିଶୋର ତାଙ୍କ ସ୍ତ୍ରୀ ଏବଂ ପିଲାମାନଙ୍କ ସହିତ ହୋଲି ସେଲିବ୍ରେସନ କରିବାକୁ ଅଫିସକୁ ଯାଇଥିଲେ। ସେଠାରେ ପହଞ୍ଚିବାର କିଛି ମିନିଟ୍ ପରେ, ସେ ତାଙ୍କ ସ୍ତ୍ରୀଙ୍କୁ କହିଥିଲେ ଯେ ସେ ପିଲାମାନଙ୍କୁ ନୂତନ ସ୍କୁଲ ୟୁନିଫର୍ମ ସିଲାଇ କରିବା ପାଇଁ ଜଣେ ଦର୍ଜୀଙ୍କ ପାଖକୁ ନେଇଯିବେ। ସେ ତାଙ୍କୁ ଅଫିସରେ ଛାଡି ପିଲାମାନଙ୍କ ସହିତ ବାହାରକୁ ଚାଲିଗଲେ। ଯେତେବେଳେ ସେମାନେ ବହୁତ ସମୟ ପର୍ଯ୍ୟନ୍ତ ଫେରିଲେ ନାହିଁ, ସେ ତାଙ୍କ ସ୍ୱାମୀଙ୍କୁ ତାଙ୍କ ବାରମ୍ବାର ଫୋନ୍ କରିଥିଲେ, କିନ୍ତୁ ସେ କୌଣସି ଉତ୍ତର ଦେଇ ନଥିଲେ। କିଛି ସମୟ ପରେ, କିଶୋର ଏକ ମେସେଜ୍ ପଠାଇଲେ ଯେ ସେ ୧୦ ମିନିଟ୍ ମଧ୍ୟରେ ଫେରି ଆସିବେ। କିନ୍ତୁ ସେ ଫେରି ନଥିଲେ। ତାଙ୍କ ପତ୍ନୀ ଯେତେବେଳେ ଘରକୁ ଯାଇ ଦେଖିଲେ ଯେ କବାଟ ଭିତରୁ ବନ୍ଦ ଅଛି। ଜୋରରେ ଡାକିବା ସତ୍ତ୍ୱେ ଭିତରୁ କୌଣସି ଉତ୍ତର ନ ମିଳିବାରୁ, କିଶୋରଙ୍କ ସହକର୍ମୀ କିଛି ସ୍ଥାନୀୟ ଲୋକଙ୍କୁ ଡାକି ମୁଖ୍ୟ ଦ୍ୱାର ଭାଙ୍ଗି ଦେଇଥିଲେ। ଆଉ ଘର ଭିତରେ କିଶୋରଙ୍କୁ ଗୋଟିଏ କୋଠରୀରେ ସିଲିଂ ଫ୍ୟାନ୍ରେ ଝୁଲୁଥିବା ଅବସ୍ଥାରେ ପାଇଥିଲେ, ଏବଂ ଦୁଇ ପୁଅଙ୍କୁ ବାଥରୁମରେ ମୃତ ଅବସ୍ଥାରେ ପାଇଥିଲେ। ସେମାନଙ୍କ ହାତ ଏବଂ ଗୋଡ଼ ବନ୍ଧା ହୋଇଥିଲା ଏବଂ ସେମାନେ ଏକ ପାଣି ଭର୍ତ୍ତି ବାଲଟିରେ ବୁଡିକି ଥିଲେ । ଏହାପରେ ଘଟଣା ସ୍ଥଳରେ ପୋଲିସ ପହଞ୍ଚି ଏହାର ତଦନ୍ତ ଆରମ୍ଭ କରିଛି ।
କେଦାରନାଥରେ ଅଣହିନ୍ଦୁଙ୍କ ପ୍ରବେଶ ଉପରେ ଲାଗିବ ରୋକ !
ନନ୍ଦିଘୋଷ ବ୍ୟୁରୋ : ଉତ୍ତରାଖଣ୍ଡର ପ୍ରସିଦ୍ଧ ତୀର୍ଥସ୍ଥଳ କେଦାରନାଥରେ ଅଣହିନ୍ଦୁଙ୍କ ପ୍ରବେଶ ନିଷେଧ କରିବାକୁ ପ୍ରସ୍ତୁତି ଚାଲିଛି। ଏହି ସୂଚନା ସ୍ଥାନୀୟ ବିଧାୟକ ଆଶା ନୌଟିୟାଲ ଦେଇଛନ୍ତି। ସେ କହିଛନ୍ତି ଯେ କିଛି ଅଣହିନ୍ଦୁ ତତ୍ତ୍ୱ କେଦାରନାଥ ଧାମର ପବିତ୍ରତାକୁ ବିପର୍ଯ୍ୟସ୍ତ କରିବାକୁ ଚେଷ୍ଟା କରୁଛନ୍ତି, ତେଣୁ ସେମାନଙ୍କୁ ରୋକିବାର ଆବଶ୍ୟକତା ରହିଛି। ବିଧାୟକ ଆଶା ନୌଟିୟାଲଙ୍କ ଅନୁଯାୟୀ, କେଦାରନାଥ ଧାମରେ କିଛି ଅଣହିନ୍ଦୁ ଲୋକ ମାଂସ, ମାଛ ଏବଂ ମଦ୍ୟପାନ କରୁଛନ୍ତି, ଯାହା ଏହି ପବିତ୍ର ସ୍ଥାନର ମର୍ଯ୍ୟାଦାକୁ ପ୍ରଭାବିତ କରୁଛି। ସେ କହିଛନ୍ତି, “ଆମର ପ୍ରୟାସ ହେଉଛି ଏପରି ଲୋକଙ୍କୁ ଚିହ୍ନଟ କରି ସେମାନଙ୍କୁ ନିଷିଦ୍ଧ କରିବା। ତୀର୍ଥସ୍ଥଳର ପବିତ୍ରତା ବଜାୟ ରଖିବା ଆମର ପ୍ରାଥମିକତା।”
ଆଶା ନୌଟିୟାଲ କହିଛନ୍ତି ଯେ ସମ୍ପ୍ରତି ରାଜ୍ୟ ପ୍ରଭାରୀ ମନ୍ତ୍ରୀ ସୌରଭ ବହୁଗୁଣା କେଦାରନାଥରେ ସ୍ଥାନୀୟ ଲୋକ ଏବଂ ପ୍ରଶାସନିକ ଅଧିକାରୀଙ୍କ ସହ ଏକ ବୈଠକ କରିଥିଲେ। ଏହି ବୈଠକରେ କେଦାରନାଥ ଧାମକୁ କିଛି ଅଣହିନ୍ଦୁ ବ୍ୟକ୍ତି ବଦନାମ କରିବାକୁ ଚେଷ୍ଟା କରୁଥିବା ପ୍ରସଙ୍ଗ ମଧ୍ୟ ପ୍ରମୁଖ ଭାବରେ ଉଠାଯାଇଥିଲା। ବୈଠକରେ ପରାମର୍ଶ ଦିଆଯାଇଥିଲା ଯେ ଏପରି ବ୍ୟକ୍ତିମାନଙ୍କୁ ଚିହ୍ନଟ କରାଯିବା ଉଚିତ ଏବଂ ସେମାନଙ୍କର ପ୍ରବେଶକୁ ନିଷେଧ କରାଯିବା ଉଚିତ।
କେଦାରନାଥ ହିନ୍ଦୁ ଧର୍ମର ଏକ ପ୍ରମୁଖ ତୀର୍ଥସ୍ଥଳ, ଯେଉଁଠାରେ ପ୍ରତିବର୍ଷ ଲକ୍ଷ ଲକ୍ଷ ଭକ୍ତ ଦର୍ଶନ ପାଇଁ ଆସନ୍ତି। ଏପରି ପରିସ୍ଥିତିରେ, ସ୍ଥାନୀୟ ଲୋକ ଏବଂ ହିନ୍ଦୁ ସଂଗଠନଗୁଡ଼ିକ ବିଶ୍ୱାସ କରନ୍ତି ଯେ ଏଠାରେ ଧାର୍ମିକ ପରମ୍ପରାକୁ କଡ଼ାକଡ଼ି ପାଳନ କରାଯିବା ଉଚିତ। ଅନେକ ସଂଗଠନ ପ୍ରଶାସନ ନିକଟରେ ଦାବି କରିଛନ୍ତି ଯେ ଧାର୍ମିକ ଭାବନାକୁ ଆଘାତ ଦେଉଥିବା ବ୍ୟକ୍ତିଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ତଥାପି, କିଛି ରାଜନୈତିକ ଦଳ ଏବଂ ମାନବାଧିକାର ସଂଗଠନ ମଧ୍ୟ ଏହି ନିଷ୍ପତ୍ତି ଉପରେ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି ଯେ ଏହା ସମ୍ବିଧାନର ମୌଳିକ ଅଧିକାର ବିରୁଦ୍ଧରେ ହୋଇପାରେ। ବିରୋଧୀ ଦଳଗୁଡ଼ିକ ମଧ୍ୟ ଏହି ପ୍ରସଙ୍ଗରେ ସରକାରଙ୍କଠାରୁ ସ୍ପଷ୍ଟ ମତାମତ ଦାବି କରିଛନ୍ତି।
ବିଧାୟକ ଆଶା ନୌଟିୟାଲଙ୍କ ଏହି ବୟାନ ପରେ, ରାଜ୍ୟ ସରକାର ଏବଂ ପ୍ରଶାସନ ପକ୍ଷରୁ କୌଣସି ସରକାରୀ ଘୋଷଣା କରାଯାଇ ନାହିଁ। କିନ୍ତୁ ଯଦି ଏହି ପ୍ରସ୍ତାବ ଆଗକୁ ବଢ଼ିଯାଏ, ତେବେ ଏହା ଆଇନଗତ ଏବଂ ସାମାଜିକ ସ୍ତରରେ ବହୁତ ବିତର୍କ ସୃଷ୍ଟି କରିପାରିବ। ଏବେ ଦେଖିବାକୁ ବାକି ରହିଲା ଯେ ସରକାର ଏହି ପ୍ରସଙ୍ଗରେ କି ଆଭିମୁଖ୍ୟ ଗ୍ରହଣ କରୁଛନ୍ତି ଏବଂ କେଦାରନାଥରେ ପ୍ରକୃତରେ ଅଣହିନ୍ଦୁଙ୍କ ପ୍ରବେଶ ନିଷେଧ ହେବ କି ନାହିଁ।
ପାଞ୍ଚ ନିଷ୍ପାପ ଶିଶୁଙ୍କ ଦୁର୍ଦ୍ଦିନରେ କଟୁଛି ଜୀବନ, ସ୍ବାର୍ଥପର ସମାଜରେ ଖୋଜୁଛନ୍ତି ସହାୟତା
ନନ୍ଦିଘୋଷ ବ୍ୟୁରୋ : ବାପା ମା’ ଚାଲିଯିବା ପରେ ଏବେ ଅସହାୟ ୫ ପିଲା । ସଂସାରର ଭିଡ ଭିତରେ ସହାୟତା ଲୋଡୁଛନ୍ତି ନିଶ୍ପାପ ଶୁିଶୁ । ବାପା ମାଆ ନଥିବାରୁ ଦୟନୀୟ ଭାବେ ୫ ପିଲା ଦାଦାଙ୍କ ଘରେ ରହୁଛନ୍ତି । ଏପରି ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ହାଟଡିହି ବ୍ଲକ ପନ୍ଦାଡ଼ୋ ପଞ୍ଚାୟତ ପୋଡାସିଙ୍ଗିଡି ଗାଁରେ । ପୋଡାସିଙ୍ଗିଡି ଗାଁର ମରା ହୋ ଓ ପତ୍ନୀ ସଞ୍ଜୁଙ୍କର ୬ ଛୁଆଙ୍କୁ ନେଇ ପରିବାର ଚାଲୁଥିଲା । ହଠାତ ସଞ୍ଜୁ ନିଜର ୫ ଛୁଆଙ୍କୁ ଛାଡି ଅନ୍ୟତ୍ର ଚାଲିଯିବାର ଦୁଇ ମାସ ପରେ ବାପା ଆରପାରିକୁ ଚାଲିଗଲେ । ଏବେ ଅସହାୟ ଅବସ୍ଥାରେ ୫ ପିଲା ଜୀବନ କାଟୁଛନ୍ତି । ଜେଜେମା ଜଙ୍ଗଲରୁ ଦାନ୍ତକାଠି ଆଣି ବିକ୍ରି କରି ବହୁ କଷ୍ଟରେ ପିଲାଙ୍କ ମୁହଁରେ ଦାନା ଗଣ୍ଡେ ଦେଉଛନ୍ତି ।
ଦାଦା ବୁଦୁ ହୋ ଏକ ଗ୍ୟାରେଜରେ କାମ କରନ୍ତି । ତେଣୁ ତାଙ୍କ ପାଖେ ନିଜ ପରିବାର ସହିତ ବଡ ଭାଇଙ୍କ ୫ପିଲାଙ୍କୁ ଚଳାଇବା କଷ୍ଟକର ହୋଇପଡୁଛି । ଯାହା ଫଳରେ ସେ ଛୁଆଙ୍କୁ ପେଟପୁରା ଗଣ୍ଡେ ଖାଇବାକୁ ମଧ୍ୟ ଦେଇପାରୁ ନାହାନ୍ତି । ଅନ୍ୟପକ୍ଷରେ ୫ ଜଣ ପିଲା ରାସନ କାର୍ଡରୁ ବଞ୍ଚିତ ଅଛନ୍ତି । ଏପରି ସ୍ଥିତିରେ ପିଲାମାନେ ପାଠ ମଧ୍ୟ ପଢିପାରୁନାହାଁନ୍ତି । ଫଳରେ ସେମାନଙ୍କ ଭବିଷ୍ୟତ ଅନ୍ଧକାର ଆଡକୁ ଗତି କରୁଛି । ଅନ୍ୟପକ୍ଷରେ ସେମାନଙ୍କୁ ମାସିକ ୨୫ କିଗ୍ରା ଚାଉଳ ଦିଆଯାଉଛି, ଆବାସ ଯୋଜନାରେ ଶୀଘ୍ର ଘର ଯୋଗାଇବା ସହ ସେମାନଙ୍କୁ ବାଳାଶ୍ରମରେ ରଖାଯାଇ ପାଠ ପଢ଼ିବାର ବ୍ୟବସ୍ଥା କରାଯିବ ବୋଲି ସରପଞ୍ଚ ପ୍ରତିଶ୍ରୁତି ଦେଇଛନ୍ତି । ଅନ୍ୟପଟେ ପ୍ରଶାସନ ତୁରନ୍ତ ଏହି ଶିଶୁମାନଙ୍କୁ ଉଦ୍ଧାର କରି ଅନାଥାଶ୍ରମରେ ଥଇଥାନ କରି ଶିକ୍ଷାଦାନ ବ୍ୟବସ୍ଥା ଯୋଗାଇଦେବାକୁ ଦାବି କରିଛନ୍ତି ଗ୍ରାମବାସୀ ।
ରାଉରକେଲାରେ ନିର୍ମାଣ କାମ ଏକପ୍ରକାର ଠପ୍, ୨୪ ବାଲିଘାଟ ଥିବା ସତ୍ତ୍ବେ ବଢୁଛି ବାଲି ସଂକଟ
ରାଉରକେଲା : ରାଉରକେଲାରେ ମିଳୁନି ବାଲି । କନଷ୍ଟ୍ରକସନ କାମ ଏକପ୍ରକାର ଠପ୍ । ଟ୍ରିପ ପିଛା ୪ ଗୁଣା ଟଙ୍କା ଦେଇ କିଣୁଛନ୍ତି ଲୋକେ । ଉନ୍ନୟନ କାମ ପାଇଁ ମନ ଦେଉ ନାହାନ୍ତି ଠିକାଦାର । ଅତ୍ଯଧିକ ଜୋରିମାନା ଯୋଗୁଁ ପରିବହନ ପାଇଁ ଅମଙ୍ଗ ଟ୍ରକ ମାଲିକ । ସହର ଓ ନିକଟବର୍ତ୍ତୀ ଅଞ୍ଚଳରେ ୨୪ ଟି ବାଲିଘାଟ ଥିଲେ ସୁଦ୍ଧା ଦେଖାଦେଇଛି ବାଲି ସଙ୍କଟ । ଫଳରେ ସହରର ବିଭିନ୍ନ ସରକାରୀ ଉନ୍ନତିମୂଳକ କାର୍ଯ୍ୟ ବାଧାପ୍ରାପ୍ତ ହୋଇଛି । ବାଲି ଟ୍ରିପ ସରକାରୀ ମୁଲ୍ୟ ୪ ହଜାର ଟଙ୍କା ଧାର୍ଯ୍ୟ ଥିବାବେଳେ ୧୨ ହଜାର ଟଙ୍କାରେ କିଣୁଛନ୍ତି ଠିକାଦାର । ବଢୁଛି କଳାବଜାରୀ । ତୁରନ୍ତ ସମାଧାନ ନକଲେ ସହରରେ ସରକାରୀ ଉନ୍ନତିମୂଳକ କାର୍ଯ୍ୟ ବନ୍ଦ କରିବାକୁ ବାଧ୍ଯ ହେବେ ବୋଲି କହିଛନ୍ତି ଠିକାଦାର।
ଲଘୁ ଖଣିଜ ଚୋରା ଚାଲାଣ ଅଭିଯୋଗରେ ଜିଲ୍ଲାରେ ୨୦୨୪ ଏପ୍ରିଲ ମାସରୁ ୨୦୨୫ ଫେବୃଆରୀ ମଧ୍ୟରେ ସୁନ୍ଦରଗଡ଼ ଜିଲ୍ଲାର ବିଭିନ୍ନ ସ୍ଥାନରେ ଚଢ଼ାଉ କରାଯାଇ ୧୨୦ଟି ଗାଡି ଜଵତ କରାଯାଇ ଏକ କୋଟି ୨୩ ଲକ୍ଷ ୫୮ ହଜାର ୯୦୧ ଟଙ୍କା ରାଜସ୍ୱ ଆଦାୟ କରାଯାଇଛି । ଚଳିତ ମାର୍ଚ୍ଚ ମାସରେ ୧୯ ଟି ଚୋରା ବାଲି ଭର୍ତ୍ତି ଗାଡି ଜଵତ କରାଯାଇଛି । ତେବେ ଅତ୍ୟାଧିକ ଜୋରିମାନା ଯୋଗୁଁ ବାଲି ଚାଲାଣ ପାଇଁ ମଙ୍ଗୁ ନାହାନ୍ତି ଟ୍ରକ ମାଲିକ । ଫଳରେ ସହରରେ ବାଲି ସଂକଟ ଉତ୍କଟ ହୋଇଛି । ଉରକେଲା ସହରରେ ବାଲି ଚୋରା କାରବାର ବୃଦ୍ଧି ପାଇଥିବା ଓ ବାଲିର କଳାବଜାରୀ ହେଉଥିବା ଅଭିଯୋଗ ହେଵା ପରେ ପ୍ରଶାସନ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ବିଭିନ୍ନ ମହଲରେ ଦାବି ହେଉଛି ।
ନାଗସାପ କାମୁଡିଲା,ସାପକୁ ପଲିଥିନରେ ଧରି ଡାକ୍ତରଖାନାରେ ପହଞ୍ଚିଗଲେ ଯୁବକ
ନନ୍ଦିଘୋଷ ବ୍ୟୁରୋ : ମୟୂରଭଞ୍ଜ ଜିଲ୍ଲାରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି । ଯେଉଁଥିରେ ଜଣେ ବ୍ୟକ୍ତିକୁ ଏକ ନାଗ ସାପ ୩ରୁ ୪ ଥର କାମୁଡିଛି । କିନ୍ତୁ ବ୍ୟକ୍ତି ଜଣକ ସାପଟିକୁ ମାରି ତାକୁ ପଲଥିନରେ ଧରି ଡାକ୍ତରଖାନା ପହଞ୍ଚିଥିଲା । ଏପରି ଘଟଣା ଦେଖି ଡାକ୍ତର ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ । ଅନ୍ୟପଟେ ସାପ ଚିହ୍ନି ସେହି ଅନୁଯାୟୀ ଠିକ୍ ସମୟରେ ବ୍ୟକ୍ତିଙ୍କର ଚିକିତ୍ସା କରାଯାଇଥିଲା , ଯାହା ଫଳରେ ତାଙ୍କ ଜୀବନ ବଞ୍ଚିଯାଇଛି ।
ସୂଚନା ଅନୁସାରେ, ଏହି ଘଟଣାଟି ମୟୂରଭଞ୍ଜ ଜିଲ୍ଲା ଉଦଳା ଥାନା ଅନ୍ତର୍ଗତ ନାଗପାଳ ଗାଁରେ ଦେଖିବାକୁ ମିଳିଛି । ଅଜିତ୍ କର୍ମକାର ନାମକ ବ୍ୟକ୍ତି ଜଣକୁ ନିଜ ଘର ବାହାରେ ଏକ ନାଗସାପ କାମୁଡି ଦେଇଥିଲା । ରିପୋର୍ଟ ମୁତାବକ, ଅଜିତ୍ ନିଜ ଘର ବାହାରେ ଛିଡା ହୋଇଥିବା ବେଳେ ହଠାତ୍ ତାଙ୍କୁ ୩ରୁ ୪ଥର ସାପଟି କାମୁଥିଲା । ଯାହାପରେ ସେ ସାପଟିକୁ ପିଟି ମାରିଦେଇଥିଲେ । ଏହା ପରେ ମଲା ସାପକୁ ପଲଥିନରେ ପୁରାଇ ସିଧା ଡାକ୍ତରଖାନାରେ ପହଞ୍ଚିଥିଲେ ।
ଡାକ୍ତରଖାନାରେ ପହଞ୍ଚିବା ବେଳକୁ ଅଜିତଙ୍କ ଶରୀରରେ ବିଷ ଖେଳିଯାଇଥିଲା, କ୍ଷତ ସ୍ଥାନରୁ ରକ୍ତ ବାହାରିବା ସହ ଲକ୍ଷଣ ମଧ୍ୟ ଜଣାପଡୁଥିଲା । ତାଙ୍କ ଅବସ୍ଥା ଦେଖି ଡାକ୍ତର ସଙ୍ଗେ ସଙ୍ଗେ ଚିକିତ୍ସା ଆରମ୍ଭ କରିଦେଇଥିଲେ । ଡାକ୍ତରଖାନାର କର୍ମଚାରୀ ତାଙ୍କର ଏପରି କାମକୁ ଦେଖି ପ୍ରଥମେ ଡରିଯାଇଥିଲେ । କିନ୍ତୁ ପରେ ସାପକୁ ଚିହ୍ନି ତାଙ୍କ ଚିକିତ୍ସା କରିଥିଲେ ।
ISSରେ ପହଞ୍ଚିଲା ସ୍ପେସଏକ୍ସ ଡ୍ରାଗନ; ଆସନ୍ତା ୧୯ରେ ଫେରିପାରନ୍ତି ସୁନୀତା ଓ ୱିଲମୋର
ନନ୍ଦିଘୋଷ ବ୍ୟୁରୋ : ଅନ୍ତର୍ଜାତୀୟ ମହାକାଶ ଷ୍ଟେସନରେ ପହଞ୍ଚିଲା କ୍ରିଉ-୧୦ ମିଶନର ସ୍ପେସଏକ୍ସ ଡ୍ରାଗନ ସ୍ପେସକ୍ରାଫ୍ଟ। ଏହା ସହ ସେଠାରେ ପହଞ୍ଚିଛନ୍ତି ଅନ୍ୟ ୪ ଜଣ ମହାକାଶଚାରୀ। ସେମାନେ ହେଲେ ଆନ୍ନେ ମ୍ୟାକଲେନ, ନିକୋଲ ଆୟର୍ସ, ତାକୁୟା ଓନିଶି ଓ କିରିଲ ପେସକୋଭ। ଏହି ୪ ଜଣଙ୍କ ଉପସ୍ଥାନ ସହ ମହାକାଶରେ ଥିବା ମୋଟ ମହାକାଶଚାରୀଙ୍କ ସଂଖ୍ୟା ହୋଇଛି ୧୧। ପୂର୍ବରୁ ସୁନୀତା ଓ ୱିଲମୋରଙ୍କ ସମେତ ଆଉ ୫ ଜଣ ମହାକାଶଚାରୀ ସେଠାରେ ଥିଲେ। ସେମାନେ ହେଲେ ନିକ ହଗ୍, ଡନ ପେଟିଟ, ଆଲେକଜାଣ୍ଡର ଗୋର୍ବୁନୋଭ, ଆଲେକ୍ସି ଓଭଚିନିନ ଓ ଇଭାନ ଭାଗନର। ସେପଟେ ମହାକାଶଚାରୀ ସୁନୀତା ଓ୍ବିଲିୟମ୍ସ ଓ ବଚ୍ ଓ୍ବିଲମୋର ନାନା ସ୍ବାସ୍ଥ୍ୟଗତ ସମସ୍ୟାରେ ପୀଡ଼ିତ ।
ପୃଥିବୀକୁ ଫେରିବା ଲାଗି ଦିନ ପାଖେଇ ଆସୁଥିବାବେଳେ ତାଙ୍କ ଶାରୀରିକ ଅବସ୍ଥା ଚିନ୍ତାର କାରଣ ପାଲଟିଛି । ସେମାନଙ୍କ ପାଦ ଜଣେ ଶିଶୁର ପାଦ ଅର୍ଥାତ ବେବି ଫୁଟ୍ ପରି ଅତି ନରମ ହୋଇଯାଇଛି । ପାଦ ଏତେ ନରମ ହୋଇଯାଇଛି ଯେ ସେମାନେ ଚାଲିବାକୁ ଅକ୍ଷମ ହୋଇଯାଇଛିନ୍ତି । ନାସାର କ୍ରିଉ-୧୦ ମିଶନରେ ଅନ୍ତର୍ଜାତୀୟ ମହାକାଶ ଷ୍ଟେସନ ବା ଆଇଏସଏସକୁ ପଠାଯାଇଥିବା ଡ୍ରାଗନ ସ୍ପେସକ୍ରାଫ୍ଟରେ ସେମାନେ ଆସନ୍ତା ୧୯ରେ ଫେରିବେ ।
ଗତବର୍ଷ ଜୁନ ୫ରେ ସେମାନେ ବୋଇଂ ଷ୍ଟାରଲାଇନରେ ଆଇଏସଏସକୁ ଯାଇ ସେଠାରେ ଫସିଯାଇଥିଲେ । ସେମାନେ ପୃଥିବୀକୁ ଫେରିଲେ ବେଶ୍ କିଛି ମାସ ଚିକିତ୍ସିତ ହେବା ପରେ ସେମାନଙ୍କ ସ୍ବାଭାବିକ ଅବସ୍ଥା ଫେରିବ । ସେପଟେ ଦୁଇ ମହାକାଶଚାରୀଙ୍କ ଅସ୍ଥି ସାନ୍ଧ୍ରତା ବା ବୋନ୍ ଡେନସିଟି ବି ହ୍ରାସ ପାଇଛି । ସେମାନଙ୍କ ମାଂସପେଶୀ ଦୁର୍ବଳ ହୋଇଯିବା ସହ ରକ୍ତ ପରିମାଣ ହ୍ରାସ ପାଇଛି । ସେମାନଙ୍କ ହାର୍ଟ ସଠିକ୍ ଭାବେ ରକ୍ତକୁ ପ୍ରବାହିତ କରିବାରେ ବିଫଳ ହୋଇଛି । ଶରୀରର ତରଳ ପଦାର୍ଥ ସଠିକ୍ ଭାବେ ପରିଚାଳିତ ହେବା ସମ୍ଭବ ହୋଇପାରୁନାହିଁ । ସେପଟେ ସବୁଠାରୁ ବଡ ବିପଦ ହେଲା ତେଜଷ୍କ୍ରିୟତାର ସମ୍ମୁଖୀନ । ପୃଥିବୀରେ ଉଚ୍ଚ ତେଜଷ୍କ୍ରିୟ ବିପଦରୁ ଜଳବାୟୁ ଓ ଚୁମ୍ବକୀୟ କ୍ଷେତ୍ର ମଣିଷକୁ ରକ୍ଷା କରୁଥିବାବେଳେ ମହାକାଶରେ ତାହା ସମ୍ଭବ ହୋଇପାରୁନାହିଁ । ଫଳରେ ଦୁଇ ମହାକାଶଚାରୀ ଏହି ବିପଦରେ ପଡିଛନ୍ତି ।
ପୁଣି ଦଳ ଉପର ଅସନ୍ତୋଷ ବ୍ୟକ୍ତ କଲେ ବରିଷ୍ଠ ବିଜେପି ନେତା ଜୟନାରାୟଣ ମିଶ୍ର
ନନ୍ଦିଘୋଷ ବ୍ୟୁରାେ : ବିଜେପିକୁ ପୁଣି ହଟ୍ଟହଟ୍ଟା କଲେ ବରିଷ୍ଠ ବିଜେପି ନେତା ଜୟନାରାୟଣ ମିଶ୍ର । ସମ୍ବଲପୁର ବୈଠକରେ ତାଙ୍କୁ ଅଣଦେଖାକୁ ନେଇ ବୈଠକ ଭିତରେ ଓ ବାହାରେ ନିଜ ଅସନ୍ତୋଷ ଝାଡିଛନ୍ତି ଜୟନାରାୟଣ । ବୈଠକ ଶେଷ ହେବାପରେ ଗଣମାଧ୍ୟମ ଆଗରେ ନିଜ କ୍ଷୋଭ ପ୍ରକାଶ କରିଛନ୍ତି ଜୟନାରାୟଣ । ସେ କହିଛନ୍ତି, ମୁଁ ଛୋଟକାଟିଆ ନେତା, ବୈଠକରେ ବସିବାକୁ ମୋର ଯୋଗ୍ୟତା ନାହିଁ । ଡାକିଥିଲେ ବୋଲି ଆସିଥିଲି । ବୈଠକରେ ମୋର କୌଣସି ଭୂମିକା ନାହିଁ । ମୋର ମତାମତ ନିଆଯାଇନି କି ଦାୟୀତ୍ବ ଦିଆଯାଇନି । ଯାହା ପଚାରିବାର ଅଛି ବଡ଼ ବଡ଼ ନେତାଙ୍କୁ ପଚାର ବୋଲି କହିଛନ୍ତି ଜୟନାରାୟଣ ।
କେନ୍ଦ୍ର ଗୃହମନ୍ତ୍ରୀ ଅମିତ ସାହଙ୍କ ସମ୍ବଲପୁର ଗସ୍ତକୁ ନେଇ ପ୍ରସ୍ତୁତି ବୈଠକ ଆୟୋଜିତ ହୋଇଥିଲା । ଯେଉଁଥିରେ ରାଜ୍ୟ ସଭାପତିଙ୍କ ସମେତ ୨ ଜଣ ମନ୍ତ୍ରୀ ଓ ପଶ୍ଚିମ ଓଡିଶାର ଅନ୍ୟ ବିଧାୟକମାନେ ସାମିଲ ହୋଇଥିଲେ । ବୈଠକରେ ହିଁ ଜୟନାରାୟଣ ନିଜ ଅସନ୍ତୋଷ ଝାଡ଼ିଛନ୍ତି । ସବୁଠାରୁ ବଡ଼କଥା ହେଲା ଜୟନାରାୟଣଙ୍କ କଟ୍ଟର ବିରୋଧୀ ଗିରୀଶ ପଟେଲ ବୈଠକରେ ଉପସ୍ଥିତ ଥିଲେ । ହେଲେ ସମ୍ବଲପୁରର ବିଧାନସଭାର ୫ ଥର ବିଧାୟକ ଜୟନାରାୟଣ ମିଶ୍ରଙ୍କୁ ବୈଠକରେ ଅବହେଳା ନେଇ ସାମ୍ବାଦିକଙ୍କ ପ୍ରଶ୍ନରେ ସେ ଚିହିଁକି ଉଠିଥିଲେ ।
ପାକିସ୍ତାନକୁ ହରାଇଲେ ବଲୁଚିସ୍ତାନ ଖେଳାଳି !
ନନ୍ଦିଘୋଷ ବ୍ୟୁରୋ : ନ୍ୟୁଜିଲ୍ୟାଣ୍ଡ ବିପକ୍ଷ ମ୍ୟାଚରେ ଶୋଚନୀୟ ପରାଜୟ ହାସଲ କରିଛି ପାକିସ୍ତାନ । ଏବେ ପାକିସ୍ତାନ ଟିମର ଅବସ୍ଥା କହିଲେ ନସରେ । ପାକିସ୍ତାନର ଏପରି ଅବସ୍ଥା ପଛରେ ବଲୁଚିସ୍ତାନ ଖେଳାଳିଙ୍କ ବଡ଼ ହାତ ଅଛି ବୋଲି କୁହାଯାଉଛି । ଯେଉଁଥିରେ ଟିମର ସବୁଠାରୁ ସିନିୟର ଖେଳାଳି ଥାଇ ମଧ୍ୟ ଏକ ଲଜ୍ୟାକର ପରାସ୍ତର ସାମ୍ନା କରିବାକୁ ପଡିଛି ।
ଅନ୍ୟପଟେ ଚାମ୍ପିଅନ୍ସ ଟ୍ରଫିରେ ପରାଜୟ ପରେ, ପାକିସ୍ତାନୀମାନେ କିୱି ଭୂମିରେ ଭଲ ପ୍ରଦର୍ଶନ କରିବେ ବୋଲି ଆଶା କରାଯାଉଥିଲା। ଏଥିପାଇଁ ପାକିସ୍ତାନ କ୍ରିକେଟ୍ ବୋର୍ଡ ତରଫରୁ ବାବର ଏବଂ ରିଜୱାନଙ୍କୁ ଟି-୨୦ ଦଳରୁ ବାଦ ଦେବା ଭଳି କିଛି ବଡ଼ ନିଷ୍ପତ୍ତି ମଧ୍ୟ ନେଇଥିଲା। କିନ୍ତୁ, ଦଳରେ ପରିବର୍ତ୍ତନ ମଧ୍ୟ ଖେଳରେ ଉନ୍ନତି ଆଣି ନଥିଲା। ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଟି-୨୦ ମ୍ୟାଚ୍ରେ ପାକିସ୍ତାନ ଦଳ ପାଇଁ ୧୦୦ ରନ୍ କରିବା ମଧ୍ୟ କଷ୍ଟକର ହୋଇପଡ଼ଥିଲା। ଏବେ ନ୍ୟୁଜିଲ୍ୟାଣ୍ଡରେ ପାକିସ୍ତାନର ଟି-୨୦ ଦଳର ଦୟନୀୟ ଅବସ୍ଥା ପାଇଁ ଦୁଇ ଜଣ ବେଲୁଚିସ୍ତାନ ଖେଳାଳି ଦାୟୀ ବୋଲି କୁହାଯାଉଛି। ସେ ନିଜର ଭୂମିକା ନିର୍ବାହ କରିବା ପରିବର୍ତ୍ତେ ଦଳକୁ ନଷ୍ଟ କରିଦେଲେ।
ପାକିସ୍ତାନକୁ ହରାଇଲେ ବାଲୁଚିସ୍ତାନୀ ଖେଳାଳି !
T20ରେ ପାକିସ୍ତାନୀ ଦଳର ଅବସ୍ଥା ଶୋଚନୀୟ କରିଥିବା ବଲୁଚିସ୍ତାନ ଖେଳାଳି ମଧ୍ୟରୁ ଏହି ୨ ଖେଳାଳି ସଲମାନ ଅଲି ଆଗା ଏବଂ ଶାହିନ ଶାହ ଆଫରିଦି । ଏହି ଦୁଇ ଖେଳାଳି ପାକିସ୍ତାନର ବେଲୁଚିସ୍ତାନରୁ ଆସିଛନ୍ତି। ଏମାନେ ଦୁହେଁ ବର୍ତ୍ତମାନର ପାକିସ୍ତାନ ଟି-୨୦ ଦଳର ସବୁଠାରୁ ବରିଷ୍ଠ ଖେଳାଳିଙ୍କ ମଧ୍ୟରେ ଅନ୍ୟତମ। କିନ୍ତୁ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଟି-୨୦ରେ ତାଙ୍କର ପ୍ରଦର୍ଶନ ତାଙ୍କ ଅଭିଜ୍ଞତା ଅନୁଯାୟୀ ନଥିଲା।
କ୍ୟାପ୍ଟେନ୍ ସଲମାନ ଆଗାଙ୍କ ଖରାପ ପ୍ରଦର୍ଶନ
ଅଧିନାୟକ ସଲମାନ ଅଲି ଆଗା ଦଳକୁ ସମ୍ଭାଳିବାରେ ବିଫଳ ହୋଇଥିଲେ। ତାଙ୍କ ବ୍ୟାଟିଂ ମଧ୍ୟ ଦୁର୍ବଳ ଥିଲା । ଯେଉଁଥିରେ ଷ୍ଟ୍ରାଇକ୍ ରେଟ୍ ଅଧିକ ଉଡ଼ୁଥିବା ପରି ମନେ ହେଉଥିଲା ଏବଂ ରନ ବିଷୟରେ କଥା ନ ହେବା ଭଲ ହେବ। ସଲମାନ ଅଲି ଆଗା ୨୦ ବଲ ସାମ୍ନା କରି ମାତ୍ର ୧୮ ରନ କରିଥିଲେ। ଅର୍ଥାତ୍ ତାଙ୍କର ଷ୍ଟ୍ରାଇକ୍ ରେଟ୍ ୧୦୦ ମଧ୍ୟ ନଥିଲା। ତେବେ ଯଦି ଦଳର ଅଧିନାୟକ ଏବଂ ସବୁଠାରୁ ଅଭିଜ୍ଞ ବ୍ୟାଟସମ୍ୟାନଙ୍କ ଅବସ୍ଥା ଯଦି ଏହିପରି ହୁଏ, ତେବେ ଅନ୍ୟ ଖେଳାଳିମାନଙ୍କ ଅବସ୍ଥା କ’ଣ ହେବ?
ବୋଲିଂରେ ଶାହିନ ଆଫ୍ରିଦିଙ୍କ ପ୍ରଦର୍ଶନ ମଧ୍ୟ ଫିକା ଥିଲା
ସେହିପରି ନ୍ୟୁଜିଲାଣ୍ଡ ବିପକ୍ଷରେ ବୋଲିଂରେ ଶାହିନ ଶାହ ଆଫ୍ରିଦିଙ୍କ ଅଭିଜ୍ଞତା ମଧ୍ୟ ବ୍ୟର୍ଥ ଗଲା ପରି ମନେ ହେଉଥିଲା। ଶାହିନଙ୍କୁ ବଲ୍ ସହିତ ୱିକେଟ୍ ନେବାରେ ବିଶେଷଜ୍ଞ ବୋଲି ବିବେଚନା କରାଯାଏ । ହେଲେ ସେ ନ୍ୟୁଜିଲାଣ୍ଡ ବିପକ୍ଷରେ ଜଣେ ନବାଗତ ପରି ଦେଖାଯାଉଥିଲେ। ୱିକେଟ ନେବା କଥା ଭୁଲିଯାଆନ୍ତୁ, ସେ ତାଙ୍କ ଦୁଇ ଓଭରରେ ୧୭ ରନ ଦେଇଥିଲେ। ତେଣୁ ଏହି ଦୁଇ ଖେଳାଳିଙ୍କ ଖରାପ ପ୍ରଦର୍ଶନ ଯୋଗୁଁ ପାକିସ୍ତାନର ପରାସ୍ତର କାରଣ ବୋଲି କୁହାଯାଉଛି।