ଚେନ୍ନାଇ : ତାମିଲନାଡୁ ବିରୁଧନଗର ଜିଲ୍ଲାରେ ଏକ ବାଣ କାରଖାନାରେ ବିସ୍ଫୋରଣ । ଜଳିଯାଇ ୬ ଜଣ ଶ୍ରମିକଙ୍କ ମୃତ୍ୟୁ ହୋଇଛି । ବାଣ କାରଖାନାରେ କାମ ଚାଲିଥିବା ବେଳେ ଏହି ବିସ୍ଫୋରଣ ଘଟିଥିଲା । ବିସ୍ଫୋରଣରେ ରାସାୟନିକ ମିଶ୍ରଣ ପ୍ରକ୍ରିୟା ଯୋଗୁଁ ଏହି ବିସ୍ଫୋରଣ ଘଟିଥିବା କୁହାଯାଉଛି । ବିସ୍ଫୋରଣରେ ଅନେକ ଘର ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ଘଟଣାସ୍ଥଳରେ ଅଗ୍ନିଶମ ବାହିନୀ ଉଦ୍ଧାରକାରୀ ଟିମ୍ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ଘଟଣାସ୍ଥଳରେ ପୋଲିସ ପହଞ୍ଚି ଘଟଣାର ତଦନ୍ତ ଜାରି ରଖିଛି । ଏହି କାରଖାନାରେ ୩୫ରୁ ଅଧିକ କୋଠରୀରେ ୮୦ରୁ ଅଧିକ ଶ୍ରମିକ କାମ କରୁଥିଲେ । ଆପାନାୟାକାନପାଟୀ ପଞ୍ଚାୟତର ବୋମ୍ଵାୟପୁରମ୍ ଗାଁରେ ଏହି ବାଣ କାରଖାନା ରହିଥିବା ବେଳେ ବାଲାଜି ନାମକ ଜଣେ ବ୍ୟକ୍ତିଙ୍କ ନାମରେ ରହିଛି । ମୃତକମାନେ ହେଲେ ଭେଲମୁରୁଗାନ୍, ନାଗରାଜ, କନ୍ନନ୍, କାମରାଜ, ଶିବକୁମାର ଏବଂ ମୀନାକ୍ଷୀ ସୁନ୍ଦରମ୍ ବୋଲି ଜଣାପଡ଼ିଛି । ଏହା ବ୍ୟତୀତ ଅନ୍ୟ ଜଣେ ବ୍ୟକ୍ତିଙ୍କୁ ଗୁରୁତର ଅବସ୍ଥାରେ ବିରୁଧୁନଗର ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଛି।
ଦିଲ୍ଲୀ-ଏନସିଆର ସମେତ ସମଗ୍ର ଉତ୍ତର ଭାରତରେ ଘନ କୁହୁଡ଼ି
ନୂଆଦିଲ୍ଲୀ : ଦିଲ୍ଲୀ-ଏନସିଆର ସମେତ ସମଗ୍ର ଉତ୍ତର ଭାରତରେ ଘନ କୁହୁଡ଼ି । ଦିଲ୍ଲୀରେ ସର୍ବ ନିମ୍ନ ତାପମାତ୍ରା ୧୦ ଡିଗ୍ରୀକୁ ଖସି ଆସିଛି । ଆଜି ଘନ କୁହୁଡ଼ି ଧଳା କମ୍ଵଳ ଆଛାଦିତ ପରି ଦୃଶ୍ୟମାନ ହୋଇଛି । ଦିଲ୍ଲୀର ଅନେକ ଅଞ୍ଚଳରେ ଘନ କୁହୁଡ଼ି ଯୋଗୁଁ ୧୦ ମିଟର ଦୂରରୁ ଦେଖିବା ସମ୍ଭବ ହେଉନାହିଁ । ଅନେକ ଅଞ୍ଚଳରେ ଜିରୋ ଭିଜିବିଲିଟି ରହିଛି । ଶୁକ୍ରବାର ଦିନ ମଧ୍ୟ ଦିଲ୍ଲୀର ଲୋକଙ୍କୁ ଘନ କୁହୁଡ଼ିର ସମ୍ମୁଖୀନ ହେବାକୁ ପଡିଥିଲା । ଭାରତୀୟ ପାଣିପାଗ ବିଜ୍ଞାନ ବିଭାଗ ଅନୁଯାୟୀ ସର୍ବନିମ୍ନ ତାପମାତ୍ରା ଆସନ୍ତା କିଛି ଦିନ ପାଇଁ ୭ ରୁ ୯ ଡିଗ୍ରୀ ସେଲସିୟସ ମଧ୍ୟରେ ରହିବ । ଘନ କୁହୁଡ଼ି ଯୋଗୁଁ ଦିଲ୍ଲୀରେ ଗାଡ଼ି ଚଳାଚଳ ବାଧାପ୍ରାପ୍ତ ହୋଇଛି । ଅତି ଧୀର ଗତିରେ ଗାଡ଼ି ଚଳାଚଳ କରୁଛି । ଟ୍ରେନ ଚଳାଚାଳ ଓ ବିମାନ ଉଡ଼ାଣରେ ବିଳମ୍ବ ହୋଇଛି । ଲୋ ଭିଜିବିଲିଟି ଯୋଗୁଁ ଦିଲ୍ଲୀ ବିମାନ ବନ୍ଦରରେ ସମସ୍ତ ବିମାନ ସେବା ପ୍ରଭାବିତ ହୋଇଛି। ପ୍ରାୟ ବିମାନ ଉଡ଼ାଣ ୩୦ ମିନିଟ ବିଳମ୍ଵରେ ଚାଲିଛି । ବିମାନ ଯାତ୍ରୀମାନଙ୍କୁ ଘରୁ ବାହାରିବା ପୂର୍ବରୁ ବିମାନର ବର୍ତ୍ତମାନର ସ୍ଥିତି ଯାଞ୍ଚ କରିବାକୁ ପରାମର୍ଶ ଦିଆଯାଇଛି । ଘନ କୁହୁଡ଼ି ଯୋଗୁଁ ପ୍ରାୟ ୫୦ଟି ଟ୍ରେନ୍ ବିଳମ୍ବରେ ଚାଲୁଛି । ଉତ୍ତର ଭାରତର ଦିଲ୍ଲୀ-ଏନସିଆର, ୟୁପି, ହରିୟାଣା, ମଧ୍ୟପ୍ରଦେଶ, ରାଜସ୍ଥାନ, ବିହାରରେ କୁହୁଡ଼ି ଏବଂ ଭୀଷଣ ଥଣ୍ଡାର ପ୍ରଭାବ ଦେଖିବାକୁ ମିଳିଛି । ଜାମ୍ମୁ କାଶ୍ମୀର, ଉତ୍ତରପ୍ରଦେଶ ଏବଂ ହିମାଚଳ ପ୍ରଦେଶ ଭଳି ପାହାଡ଼ିଆ ରାଜ୍ୟରେ ତୁଷାରପାତ ଏବଂ ତାପମାତ୍ରା ହ୍ରାସ ପାଇବା ସହିତ ଶୀତ ବୃଦ୍ଧି ପାଉଛି ।
୧୮ ବର୍ଷରୁ କମ୍ ପିଲାଙ୍କୁ ସୋସିଆଲ ମିଡିଆ ମନା !
ନୂଆଦିଲ୍ଲୀ : ମାନଙ୍କ ସୋସିଆଲ ମିଡିଆ ବ୍ୟବହାରରେ ଲାଗିବ ରୋକ । ଆଗାମୀ ସମୟରେ ଆପଣଙ୍କ ପିଲାମାନେ ଆପଣଙ୍କ ବିନା ଅନୁମତିରେ ସୋସିଆଲ ମିଡିଆର ଅପବ୍ୟବହାର କରିପାରିବେ ନାହିଁ । ୧୮ ବର୍ଷରୁ କମ୍ ବୟସର ପିଲାମାନଙ୍କ ପାଇଁ ସୋସିଆଲ ମିଡିଆ ବ୍ୟବହାର ଉପରେ ଲାଗିବ କଟକଣା । କେନ୍ଦ୍ର ସରକାର ଏଭଳି ଏକ ନିୟମ ଆଣିବାକୁ ଯାଉଛନ୍ତି ଯାହା କାର୍ଯ୍ୟକାରୀ ହେବା ପରେ ୧୮ ବର୍ଷରୁ କମ ବୟସର ପିଲାମାନେ ସୋସିଆଲ ମିଡିଆରେ ଆକାଉଣ୍ଟ ଖୋଲିବା ପାଇଁ ହେଲେ ଅଭିଭାବକଙ୍କ ଅନୁମତି ଆବଶ୍ୟକ ପଡିପାରେ । ଏହି ନିମକୁ କାର୍ଯ୍ୟକାରୀ କରିବା ପାଇଁ କେନ୍ଦ୍ର ସରକାର ଡିଜିଟାଲ ପର୍ସୋନାଲ ଡାଟା ପ୍ରୋଟେକ୍ସନ ଆକ୍ଟ ବା ଡିପିଡିପି ଡ୍ରାଫ୍ଟ ରୁଲରେ ପର୍ସୋନାଲ ଡାଟା ସୁରକ୍ଷା ପାଇଁ କଡ଼ା ନିୟମାବଳୀ ରଖିଛନ୍ତି । ଏ ସମ୍ପର୍କରେ କେନ୍ଦ୍ର ଇେଲେକ୍ଟ୍ରୋନିକ୍ସ ଏବଂ ଇନଫର୍ମେଶନ ଟେକନୋଲଜି ମନ୍ତ୍ରାଳୟ ପକ୍ଷରୁ ଡ୍ରାଫ୍ଟ ବିଜ୍ଞପ୍ତି ପ୍ରକାଶ ପାଇଛି ।
ତଥ୍ୟ ସ୍ଥାନାନ୍ତର କରିବା ପୂର୍ବରୁ ଅନୁମୋଦନ ଗ୍ରହଣ କରିବାକୁ ପଡିବ । ଏହି ଡ୍ରାଫ୍ଟ ଅନୁଯାୟୀ କୈଣସି କମ୍ପାନି ଯଦି ଭାରତୀୟ ବ୍ୟବହାରକାରିଙ୍କ କୈଣସି ତଥ୍ୟକୁ ଦେଶ ବାହାରକୁ ନେବାକୁ ଚାହୁଁଛନ୍ତି ତେବେ ସରକାରଙ୍କ ଅନୁମତି ନବାକୁ ପଡିବ ।ଏହି ନିୟମକୁ ସଠିକ ରୂପେ କାର୍ଯ୍ୟକାରୀ କରିବା ପାଇଁ ଏକ ଡାଟା ସୁରକ୍ଷା ବୋର୍ଡ ପ୍ରତିଷ୍ଠା କରାଯିବ ।ଯାହା ଏକ ଡିଜିଟାଲ ଅଫିସ ପରି କାମ କରିବ । କୁହାଯାଉଛି ସରକାରଙ୍କ ଏହି ନିୟମ ଲାଗୁ ହେବା ପରେ ତଥ୍ୟ ସହ ହେଉଥିବା ହେରଫେର ସାମ୍ନାକୁ ଆସିବ ।
ବିଭାଗୀୟ ମନ୍ତ୍ରୀ ଅଶ୍ବିନୀ ବୈଷ୍ଣବ ତାଙ୍କ ଆକାଉଣ୍ଟରେ ସୂଚନା ଦେଇ କହିଛନ୍ତି ଡ୍ରାଫ୍ଟ ଡିପିଡିପି ରେ ସମସ୍ତଙ୍କ ମତ ଆହ୍ନାନ କରାଯାଇଛି ।ଏଥିପାଇଁ ଜାନୁଆରୀ ୩ରୁ ଫେବୃଆରୀ ୧୮ ତାରିଖ ମଧ୍ୟରେ mygov.in ଓ୍ବବସାଇଟ୍ ଜରିଆରେ ନିଜର ମତାମତ ଓ ଅଭିଯୋଗ କରିପାରିବେ । ଫେବୃଆରୀ ୧୮ ତାରିଖ ପରେ ନିୟମାବଳୀ ସମ୍ପର୍କରେ ନିଷ୍ପତି ନିଆଯିବ । ବ୍ୟକ୍ତିଗତ ତଥ୍ୟ ଉପରେ ବ୍ୟବହାରକାରୀଙ୍କ ଅଧିକାର , ବ୍ୟକ୍ତଗତ ତଥ୍ୟ ସଂଗ୍ରହ ସମୟରେ ଉଦ୍ଦେଶ୍ୟ ପଚାରିବା ଓ ଡାଟା ଲିକ୍ ପାଇଁ ୨୫୦ କୋଟି ଟଙ୍କା ପର୍ଯ୍ୟନ୍ତ ଫାଇନ ଦେବା ଏହି ବ୍ୟବସ୍ଥା ରହିଛି ।
ମଣପୁରମରୁ ସୁନା ଡକାୟତି ଘଟଣା : ବ୍ରାଞ୍ଚ ମ୍ୟାନେଜର ଓ ସହକାରୀ ବ୍ରାଞ୍ଚ ମ୍ୟାନେଜରଙ୍କୁ ଅଟକ
ସମ୍ବଲପୁର : ସମ୍ବଲପୁର ମଣପୁରମ ଗୋଲ୍ଡ ଲୋନରୁ ପାଖାପାଖି ୩୦ କେଜି ସୁନା ଓ ୪ ଲକ୍ଷ ୮୦ ହଜାର ଡକାୟତି ଘଟଣାରେ ତନାଘନା। ବ୍ରାଞ୍ଚ ମ୍ୟାନେଜର ଓ ସହକାରୀ ବ୍ରାଞ୍ଚ ମ୍ୟାନେଜରଙ୍କୁ ଅଟକ ରଖି ପଚରାଉଚରା କରୁଛି ପୋଲିସ। କେଉଁ ପରିସ୍ଥିତିରେ ଡକାୟତି ହୋଇଛି ସେନେଇ ଛାନବିନ ଚାଲିଛି। ସହରର ବିଭିନ୍ନ ସିସିଟିଭି ଫୁଟେଜ ଆଧାରରେ ଯାଞ୍ଚ କରାଯାଉଛି। ସମସ୍ତେ ହିନ୍ଦୀରେ କଥା ହେଉଥିବାରୁ ୪ଟି ଟିମକୁ ରାଜ୍ୟ ବାହାରକୁ ପଠାଇଛି ପୋଲିସ। ପୋଲିସର ସୂଚନା ଅନୁସାରେ ଚାରିଟି ବାଇକରେ ମୋଟ ୭ ଜଣ ଆସି ଡକାୟତି କରି ଝାରସୁଗୁଡ଼ା କିମ୍ବା ଦେବଗଡ଼ ରାସ୍ତାରେ ଯାଇଛନ୍ତି। ତେଣୁ ବିହାର ଓ ପଶ୍ଚିମବଙ୍ଗ ସମେତ ଆଉ ଦୁଇ ରାଜ୍ୟକୁ ଟିମ୍ ପଠାଇ ସମସ୍ତ ସୀମାକୁ ସିଲ୍ କରିଛି ପୋଲିସ। ସିସିଟିଭିରେ କଏଦ ହୋଇଛି ଲୁଟ୍ ପରେ ଫେରାର ବେଳର ଦୃଶ୍ୟ। ଏହି ଖବର ଜଣାପଡ଼ିବା ପରେ ଏବେ ସୁନା ରଖିଥିବା ଗ୍ରାହକ ଚିନ୍ତାରେ ପଡିଲେଣି। ସୁନା କିମ୍ବା ଟଙ୍କା ଫେରାଇବାକୁ ଦାବି କରିଛନ୍ତି ଗ୍ରାହକ।
ପଞ୍ଚମୁଖୀ ମନ୍ଦିରରୁ କବାଟ ଶିକୁଳି ଭାଙ୍ଗି ଲୁଟିନେଲେ ସୁନା ଅଳଙ୍କାର
କଟକ : କଟକ ଖାନନଗରରେ ଥିବା ପଞ୍ଚମୁଖୀ ମନ୍ଦିରରୁ ଲୁଟ୍ । ଗତକାଲି ବିଳମ୍ବିତ ରାତିରେ ଦୁର୍ବୃତ୍ତମାନେ ମନ୍ଦିର ପଛ ପଟ ଲୁହା କବାଟର ଶିକୁଳି ଭାଙ୍ଗି ମନ୍ଦିରରୁ ଲୁଟ୍ କରିଥିବା ଜଣାପଡିଛି। ଏହାସହ ପଞ୍ଚମୁଖୀଙ୍କ ଦେହରେ ଲାଗିଥିବା ସୁନା ଅଳଙ୍କାର, ଗଦା, କଳସ ଲୁଟିବା ସହିତ ପାର୍ଶ୍ଵରେ ଥିବା ରାମ ମନ୍ଦିରରେ ପୂଜା ପାଉଥିବା ସୀତା ମା’ଙ୍କ ରୁପା ମୁକୁଟ ଲୁଟି ନେଇଛନ୍ତି ଦୁର୍ବୃତ୍ତ। ଆଜି ସକାଳୁ ପୂଜକ ଆସି ମନ୍ଦିର ଖୋଲିବାରୁ ଲୁଟ ହୋଇଥିବା ଜାଣି ପୋଲିସକୁ ଖବର ଦେଇଥିଲେ। ପୋଲିସ ଘଟଣାର ତଦନ୍ତ କରୁଛି।
ବ୍ୟାଙ୍କ ଆକାଉଣ୍ଟରେ ଆପଣ କେତେ ଟଙ୍କା ଜମା କରିପାରିବେ: କେବେ ଆସିଥାଏ ଆୟକର ନୋଟିସ୍
ନୂଆଦିଲ୍ଲୀ: ସାଧାରଣ ଭାବେ ଗ୍ରାହକମାନେ ନିଜର ସଞ୍ଚିତ ଅର୍ଥକୁ ବିଭିନ୍ନ ବ୍ୟାଙ୍କରେ ଥିବ ନିଜ ନିଜର ଆକାଉଣ୍ଟରେ ଡିପୋଜିଟ କରିଥାନ୍ତି । ଆପଣମାନେ ନିଜର ସେଭିଙ୍ଗ ଆକାଉଣ୍ଟରେ ଏକ ଲିମିଟ ପର୍ଯ୍ୟନ୍ତ ଅର୍ଥ ଜମା କରିପାରିବେ ବୋଲି ନିୟମ ରହିଛି । କେନ୍ଦ୍ର ସରକାରଙ୍କ ଅର୍ଥ ମନ୍ତ୍ରଣାଳୟ ଅଧୀନରେ କାମ କରୁଥିବା ଇନକମ ଟ୍ୟାକ୍ସ ବିଭାଗ ଆପଣଙ୍କ ବିତ୍ତୀୟ କାର୍ଯ୍ୟକଳାପ ଉପରେ ଖାସ୍ ନଜର ରଖିଥାଏ । ଆପଣମାନେ ଯଦି ଲିମିଟରୁ ଅଧିକ ଅର୍ଥ ଜମା କରନ୍ତି, ତେବେ ଏପରି ସ୍ଥିତିରେ ଆପଣମାନେ ଆୟକର ବିଭାଗର ରାଡାରକୁ ଆସିପାରନ୍ତି । ଆପଣମାନେ ଏକ ଆର୍ଥିକ ବର୍ଷରେ ସର୍ବାଧିକ ୧୦ ଲକ୍ଷ ଟଙ୍କା ଜମା କରିପାରିବେ ।
ଆକ୍ସିସ ବ୍ୟାଙ୍କ ମୁତାବକ, ଯଦି ଆପଣ ଗୋଟିଏ ବର୍ଷରେ ୧୦ ଲକ୍ଷରୁ ଅଧିକ ଟଙ୍କା ଜମା କରନ୍ତି, ତେବେ ବ୍ୟାଙ୍କ ନିଜେ ଏହି ସୂଚନା ଆୟକର ବିଭାଗକୁ ଦେଇଥାଏ । ଏପରି ସ୍ଥିତିରେ ଆପଣଙ୍କ ପାଖକୁ ଇନକମ ଟ୍ୟାକ୍ସ ବିଭାଗ ତରଫରୁ ନୋଟିସ ଆସିପାରେ । ଏହି ମାମଲାର କାର୍ଯ୍ୟାନୁଷ୍ଠାନ ସ୍ବରୂପ ଇନକମ ଟ୍ୟାକ୍ସ ଅଧିକାରୀ ଆପଣଙ୍କୁ ଇନକମ ସୋର୍ସ ବିଷୟରେ ପଚରାଉଚରା କରିପାରନ୍ତି । ଏହାପରେ ଆପଣଙ୍କୁ ରିଟର୍ଣ୍ଣ ଫାଇଲ କରି ଇନକମ ସୋର୍ସର ସଠିକ୍ ବିବରଣୀ ଦେବାକୁ ପଡ଼ିବ । ଏଥିସହିତ ଆପଣଙ୍କୁ ଚିହ୍ନଟ ହୋଇଥିବା ଟ୍ୟାକ୍ସ ରିଜିମ ହିସାବରେ ଟ୍ୟାକ୍ସ ମଧ୍ୟ ଦେବାକୁ ପଡ଼ିବ ।
ଶ୍ରୀମନ୍ଦିରରେ ହେବ ଧାଡି ଦର୍ଶନ, ଆରମ୍ଭ ହେଲା କାଠର ରାମ୍ପ୍ ଓ ବ୍ୟାରିକେଡ୍ ନିର୍ମାଣ
ପୁରୀ : ଆସନ୍ତା ୨୦ ତାରିଖରୁ ଶ୍ରୀମନ୍ଦିରରେ ହେବ ଧାଡି ଦର୍ଶନ। ଧାଡ଼ି ଦର୍ଶନ ପ୍ରକ୍ରିୟା ଆରମ୍ଭ ହେବ ବୋଲି ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିବା ପରେ ଆରମ୍ଭ ହୋଇଛି ପ୍ରକ୍ରିୟା। ମହାପ୍ରଭୁଙ୍କୁ ସ୍ପଷ୍ଟ ଦେଖିବା ପାଇଁ ବାହାର କାଠ ପାଖରେ ଭକ୍ତଙ୍କ ପାଇଁ ପଡ଼ିବ କାଠର ରାମ୍ପ୍ ଓ ବ୍ୟାରିକେଡ୍ ନିର୍ମାଣ। ବ୍ୟାରିକେଡରେ ଭକ୍ତମାନେ ଶୃଙ୍ଖଳିତ ଦର୍ଶନ କରିବା ପାଇଁ ଏଭଳି ନିଷ୍ପତ୍ତି ନିଆଯାଇଛି। ୬ ଥାକିଆ ଧାଡି ଦର୍ଶନ ମଧ୍ୟରେ ପ୍ରଥମ ଧାଡି ଦିବ୍ୟାଙ୍ଗ ଭକ୍ତଙ୍କ ପାଇଁ, ଦ୍ୱିତୀୟ ଧାଡିରେ ମହିଳା,ପରେ ଛୋଟପିଲା ଓ ବରିଷ୍ଠ ନାଗରିକ ମାନଙ୍କ ପାଇଁ ଚାଲିଛି କାଷ୍ଠ ନିର୍ମିତ ରାମ୍ପ ଓ ବ୍ୟାରିକେଡ୍ ନିର୍ମାଣ ପ୍ରକ୍ରିୟା ତେବେ ସମସ୍ତ ଭକ୍ତମାନେ ସାତପାହାଚ ଦ୍ବାର ଦେଇ ପ୍ରବେଶ କରିବାକୁ ଥିବାବେଳେ ମହିଳା ଓ ବରିଷ୍ଠ ନାଗରିକ ମାନେ ଘଣ୍ଟିଦ୍ବାର ପ୍ରସ୍ଥାନ କରିବେ ଏବଂ ପୁରୁଷ ଭକ୍ତମାନେ ଗାରଦଦ୍ୱାର ଦେଇ ପ୍ରସ୍ଥାନ କରିବେ।
ଭାରତୀୟ ବୋଲର ଆଗରେ ଚାଲିଲାନି ବ୍ୟାଟ୍, ୧୮୧ରନରେ ଅଷ୍ଟ୍ରେଲିଆ ଅଲଆଉଟ୍
ନୂଆଦିଲ୍ଲୀ : ସିଡନୀ ଟେଷ୍ଟରେ ଅଷ୍ଟ୍ରେଲିଆ ଅଲଆଉଟ୍ । ଭାରତୀୟ ବୋଲର ଆଗରେ ଚାଲିଲାନି କଙ୍ଗାରୁ ଦଳର ବ୍ୟାଟ୍ । ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଚାଲିଛି ବର୍ଡର ଗାଭାସ୍କର ଟ୍ରଫିର ଶେଷ ଟେଷ୍ଟ । ଜାନୁଆରୀ ୩ରୁ ସିଡନୀରେ ଆରମ୍ଭ ହୋଇଥିଲା ଏହି ମ୍ୟାଚ୍ । ଆଜି ପ୍ରତିଯୋଗିତାର ଦ୍ୱିତୀୟ ଦିନ । ଏହି ମ୍ୟାଚ୍ରେ ଭାରତୀୟ ଦଳ ପ୍ରଥମ ଇନିଂସରେ ୧୮୫ ରନ୍ କରିଥିଲା । ଏହାର ଜବାବରେ ୧୮୧ରନରେ ଅଲଆଉଟ ହୋଇଛି ଘରୋଇ ଅଷ୍ଟ୍ରେଲିଆ । ଫଳରେ ପ୍ରଥମ ଇନିଂସରେ ୪ ରନରେ ଆଗୁଆ ରହିଛି ଭାରତ । ଭାରତୀୟ ବୋଲରଙ୍କ ଆଗରେ ଚାଲିଲାନି କଙ୍ଗାରୁ ଦଳର ବ୍ୟାଟ । ମହମ୍ମଦ ସିରାଜ ସର୍ବାଧିକ ୩ ଟି ୱିକେଟ ନେଇଛନ୍ତି । ସେହପରି ବୁମରା ୨ଟି ଓ୍ୱିକେଟ ଏବଂ ନୀତିଶ ରାଣା ୨, ପ୍ରସିଦ୍ଧ କ୍ରିଷ୍ଣା ୩ ଟି ଲେଖାଏଁ ଓ୍ୱିକେଟ ନେଇଛନ୍ତି । ବର୍ତ୍ତମାନ ଭାରତୀୟ ଦଳ ଦ୍ୱିତୀୟ ଇନିଂସରେ ବ୍ୟାଟିଂ କରୁଛି । ଭାରତ ପକ୍ଷରୁ ଯଶସ୍ୱୀ ଜୈସୱାଲ ଏବଂ କେ.ଏଲ୍ ରାହୁଲ ଓପନିଂ କରିବାକୁ ଆସିଛନ୍ତି।
ଖଣ୍ଡା ଓ ବନ୍ଧୁକ ଦେଖାଇ ଲୁଟିନେଲେ ଲକ୍ଷାଧିକ ଟଙ୍କା
ତାଳଚେର : ତାଳଚେରରେ ଡ଼କାୟତଙ୍କ ଆତଙ୍କରାଜ । ଖଣ୍ଡା ଏବଂ ବନ୍ଧୁକ ଦେଖାଇ ଲୁଟିନେଲେ ଲକ୍ଷାଧିକ ଟଙ୍କା । ଗତକାଲି ରାତିରେ ଗୋପାଳପ୍ରସାଦ ଥାନା ନିକଟସ୍ଥ ଜଗାବଳିଆ ପେଟ୍ରୋଲ ପମ୍ପରେ ୪ ଜଣ ମୁଖାପିନ୍ଧା ଦୁର୍ବୃତ୍ତ ଆତଙ୍କ ଖେଳାଇଥିଲେ । ପେଟ୍ରୋଲ ପମ୍ପ ସେଲ୍ସମ୍ୟାନକୁ ଖଣ୍ଡାରେ ଆକ୍ରମଣ କରି ଟଙ୍କା ବ୍ୟାଗ ଛଡାଇ ନେଇଥିଲେ । ପ୍ରାୟ ଅଧଘଣ୍ଟା ଧରି ଚାଲିଥିଲା ଏଭଳି ଆତଙ୍କରାଜ । ଯାହାକୁ ନେଇ ଭୟଭୀତ ଅବସ୍ଥାରେ ପେଟ୍ରୋଲ ପମ୍ପର ସମସ୍ତ କର୍ମଚାରୀ । ଲୁଟ ବେଳର ଚିତ୍ର ସିସିଟିଭିରେ କଏଦ ହୋଇଥିବା ବେଳେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି ।
ରୋଷେଇ ବେଳେ ହଠାତ ଫାଟିଲା ପ୍ରେସର କୁକର
ସୋର : ରୋଷେଇ ବେଳେ ହଠାତ ଫାଟିଲା ପ୍ରେସର କୁକର । ଅଳ୍ପକେ ବର୍ତ୍ତିଲେ ସ୍ୱାମୀ ସ୍ତ୍ରୀ। ବାଲେଶ୍ବର ବାହାନଗା ବ୍ଲକ ସାଉଡ଼ ଅଞ୍ଚଳର ସମୋନାଥ ଜେନାଙ୍କ ଘରେ ଘଟିଛି ଅଘଟଣ। ସୋମନାଥ ଜେନାଙ୍କ ସ୍ତ୍ରୀ ଝରଣା ଜେନା ରାତିରେ ସାଢେ ତିନି କିଲୋ ମାଂସ ପ୍ରେସର କୁକରରେ ସିଝାଇବା ବେଳେ ପ୍ରେସର କୁକର ଫାଟିଯିବାରୁ ସେ ପୋଡି ଯାଇ ଗୁରୁତର ହୋଇଥିଲେ l ଝରଣାଙ୍କ ମୁହଁ ଓ ହାତ ପୋଡି ଯାଇଛି l ପ୍ରେସର କୁକରକୁ ଗ୍ୟାସରୁ ଓହ୍ଲାଉଥିବା ସ୍ୱାମୀ ସୋମନାଥ ହାତ ପୋଡି ଯିବାରୁ ସାମାନ୍ୟ ଆହତ ହୋଇଛନ୍ତି l ଉଭୟଙ୍କୁ ସୋର ଡାକ୍ତରଖାନାରେ ଭର୍ତ୍ତି କରାଯାଇଛି l ସ୍ତ୍ରୀ ଗୁରୁତର ଥିବାରୁ ସୋରରୁ ବାଲେଶ୍ୱରକୁ ସ୍ଥାନାନ୍ତର କରାଯାଇଛି।