ଭୁବନେଶ୍ବର : ବିଧାନସଭାରେ ୱାଲଟିୟର ଝଡ଼ । ପୂର୍ବତଟ ରେଳପଥକୁ ସଙ୍କୁଚିତ ପାଇଁ ବିଜେପିର ଷଡ଼ଯନ୍ତ୍ର । ବିଜେଡି କହିଲା, ୨୦ ହଜାର କୋଟି ଟଙ୍କା ରାଜସ୍ବ ହରାଇବ ଓଡିଶା । ରେଳମନ୍ତ୍ରୀ ଉପରେ ବର୍ଷିଲା କଂଗ୍ରେସ । ରାଜ୍ୟ ସ୍ବାର୍ଥ ଭୁଲି ଓକିଲାତି କଲା ବିଜେପି । ୱାଲଟିୟର ଡିଭିଜନକୁ ବିଶାଖାପାଟଣାରେ ମିଶାଇଦେବା ପ୍ରସଙ୍ଗରେ ରାଜ୍ୟ ସରକାରଙ୍କୁ କଡା ଭାଷାରେ ସମାଲୋଚନା କରିଛି ବିଜେଡି । ଶୂନ୍ୟକାଳରେ ବରିଷ୍ଠ ବିଜେଡି ବିଧାୟକ ରଣେନ୍ଦ୍ର ପ୍ରତାପ ସ୍ୱାଇଁ ଏ ପ୍ରସଙ୍ଗ ଉଠାଇ ଡବଲ ଇଞ୍ଜିନ ସରକାର ଓଡ଼ିଶା ବିରୋଧରେ ଷଡଯନ୍ତ୍ର କରିଥିବା ଅଭିଯୋଗ କରିଛନ୍ତି । ରଣେନ୍ଦ୍ରଙ୍କ ଟାର୍ଗେଟରେ କେନ୍ଦ୍ର ରେଳମନ୍ତ୍ରୀ । ସେ ସିଧାସିଧା ଅଭିଯୋଗ କରିଛନ୍ତି ଯେ ରେଳମନ୍ତ୍ରୀ ଓଡିଶା ପ୍ରତି ବେଇମାନି କରୁଛନ୍ତି । ଲଜ୍ଜା ଲାଗୁଛି ଆମେ ତାଙ୍କୁ ଭୋଟ ଦେଇ ଦିଲ୍ଲୀ ପଠାଇଛୁ । ୱାଲଟିଅର ଡିଭିଜନ ଯଦି ସାଉଥ ସେଣ୍ଟ୍ରାଲ ରେଲୱେ, ବିଶାଖାପାଟଣା ସହିତ ମିଶାଇ ଦିଆଯାଏ ତେବେ ୨୦ ହଜାର କୋଟି ଟଙ୍କା ଓଡିଶାର ରାଜସ୍ବ ହାନି ହେବ । ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଆଶୀର୍ବାଦରେ ପୂର୍ବତଟ ରେଳପଥ ହୋଇଥିଲା । ତେଣୁ ତୁରନ୍ତ କେନ୍ଦ୍ର ସରକାର ଏହି ନିଷ୍ପତ୍ତିରୁ ଓହରିଯିବାକୁ ଗୃହରେ ଦାବି କରିଛନ୍ତି ବିଜେଡିର ବରିଷ୍ଠ ବିଧାୟକ  ।

ବିଜେଡି ସହ ଶୂନ୍ୟକାଳରେ ସ୍ଵର ମିଳାଇଥିଲା କଂଗ୍ରେସ୍  । ଆନ୍ଧ୍ର ପାଇଁ ୱାଲଟିୟର ଡିଭିଜନକୁ ବିଶାଖାପାଟଣାରେ ମିଶାଇଦେବା ନେଇ କେନ୍ଦ୍ର ସରକାରଙ୍କ ନିଷ୍ପତ୍ତି ଦୁର୍ଭାଗ୍ୟଜନକ ବୋଲି ଦଳ କହିଛି  । ତୁରନ୍ତ ଏ ନିଷ୍ପତ୍ତିରୁ ସରକାର ଓହରିଯାଆନ୍ତୁ l ରେଳମନ୍ତ୍ରୀ ଓଡିଶାର ହୋଇ କିପରି ଓଡ଼ିଶା ସ୍ବାର୍ଥ ବିରୋଧୀ କାମ କରୁଛନ୍ତି ବୋଲି ପ୍ରଶ୍ନ କରିଛନ୍ତି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ  । ୱାଲଟିୟର ଡିଭିଜନ ଯଦି ଆନ୍ଧ୍ରକୁ ଯାଏ ତାହା ଚିନ୍ତାଜନକ । ଏଥିରେ ଓଡିଶା ତାହାର ହକ ହରାଇବ l ଓଡିଶାର ଖଣି, ପାଣି ଲୁଟ କରିବାକୁ ବିଜେପି ସରକାର ଚେଷ୍ଟା ଚଳାଇଛି ବୋଲି କଂଗ୍ରେସ ଅଭିଯୋଗ କରିଛି l ସେପଟେ ପୂର୍ବତଟ ରେଳବାଇ ପ୍ରସଂଗରେ ବିରୋଧୀଙ୍କ ଅଭିଯୋଗର ଜବାବ ଦେଇଛି ଶାସକ ଦଳ  । ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂ ଦେଓ କହିଛନ୍ତି ଯେ ଓଡିଶାର ଗୋଟେ ଇଞ୍ଚ ମଧ୍ୟ ଅଲଗା ରାଜ୍ୟକୁ ଯିବ ନାହିଁ | ଇଷ୍ଟ କୋଷ୍ଟ ତିନୋଟି ଡିଭିଜନକୁ ନେଇ ଚାଲିବ  ।
ପୂର୍ବତଟ ରେଳବାଇରୁ ୱାଲଟିୟର ଡିଭିଜନକୁ ବିଚ୍ଛିନ୍ନ କରିବା ଏବଂ ଏହାକୁ ଦକ୍ଷିଣ କେନ୍ଦ୍ରୀୟ ରେଳଜୋନ ସହିତ ମିଶ୍ରଣ କରିବାର ନିଷ୍ପତ୍ତିକୁ ନେଇ ପୂରା ଓଡ଼ିଶାରେ ଉଦବେଗ ପ୍ରକାଶ ପାଇଛି l ହେଲେ ଡବଲ ଇଞ୍ଜିନ ସରକାର ଏହାକୁ ଅଣଦେଖା କରି ନିଷ୍ପତ୍ତି ଉପରେ ଓକିଲାତି କରିଛି l ଯାହାକୁ ନେଇ ବିଜେପିକୁ ନିଶାଣ କରିଛନ୍ତି ଦୁଇ ବିରୋଧୀ l ୧୯୯୬ରେ ପ୍ରତିଷ୍ଠା ପରଠାରୁ, ପୂର୍ବତଟ କ୍ରମାଗତ ଭାବରେ ଭାରତୀୟ ରେଳବାଇରେ ସର୍ବାଧିକ ରାଜସ୍ୱ ଯୋଗଦାନକାରୀଙ୍କ ମଧ୍ୟରେ ସ୍ଥାନୀତ ହୋଇଛି । ୱାଲ୍ଟିୟର ଡିଭିଜନର ଅପସାରଣ ପୂର୍ବତଟ ରେଳବାଇକୁ ଯଥେଷ୍ଟ ଦୁର୍ବଳ କରିବ । ଏହାର କାର୍ଯ୍ୟକଳାପ ଏବଂ ଓଡିଶାର ବିକାଶରେ ଏହାର ଗୁରୁତ୍ୱପୂର୍ଣ୍ଣ ଭୂମିକାକୁ ବିପଦରେ ପକାଇବ ବୋଲି ନେତା ଯୁକ୍ତି ବାଢ଼ିଛନ୍ତି  ।

ଭୁବନେଶ୍ବର :  ମିଶନ ଶକ୍ତି ମହିଳାଙ୍କ ଦରମା ବୃଦ୍ଧି ନେଇ ବିଧାନସଭାରେ ତୁମ୍ବିତୋଫାନ । ଦରମା ଦେବା ଦାବିରେ ଗୃହରେ ବିଜେଡିର ଗର୍ଜନ  । .ରଣେନ୍ଦ୍ର କହିଲେ ମିଶନ ଶକ୍ତିକୁ ବନ୍ଦ ପାଇଁ  ହୋଇଛି ଷଡଯନ୍ତ୍ର । ଅରୁଣ କହିଲେ ଉପ ମୁଖ୍ୟମନ୍ତ୍ରୀ ମହିଳାଙ୍କ ପ୍ରତି ଅପଶବ୍ଦ ନକୁହନ୍ତୁ  । ବର୍ଷିଲା କଂଗ୍ରେସ୍, ଜବାବ ଦେଲେ ମନ୍ତ୍ରୀ  । ବିଜେପି ସରକାର ମିଶନ ଶକ୍ତିର ସିଆରପି,ଏମବିକେ, ବ୍ୟାଙ୍କ ମିତ୍ର, ପାଣି ମିତ୍ରଙ୍କ ୯ ମାସ ଦରମା ବନ୍ଦ କରିବାକୁ ନେଇ ବିଧାନସଭା ହୁଲସ୍ତୁଲ ହୋଇଛି l ଏନେଇ ବିଜେଡି ମୁଲତବୀ ପ୍ରସ୍ତାବ ଦେଇ  ସରକାରଙ୍କୁ ସିଧା ନିଶାନା କରିଥିଲେ ବିଜେଡି ବିଧାୟକ ରଣେନ୍ଦ୍ର ପ୍ରତାପ ସ୍ଵାଇଁ। ସେ କହିଛନ୍ତି ଯେ ସରକାର ଆସିବ ଯିବ କିନ୍ତୁ ସମସ୍ୟା ସମାଧାନ କରିବା ସରକାରଙ୍କ ଦାୟିତ୍ଵ। ଏମଏସପି ଆଉ ସୁଭଦ୍ରା ବିଜେପି ବର୍ତ୍ତମାନ ଦୁଇଟି ଗୋଡ଼ରେ ଠିଆ ହୋଇଛି। ଏମଏସପି ଭୁଶୁଡି ଗଲାଣି । ଆଉ ସୁଭଦ୍ରାରେ ସରକାର ଏକ୍ସପୋଜ ହୋଇ ସାରିଛନ୍ତି। ମିଶନ ଶକ୍ତିକୁ ବନ୍ଦ ପାଇଁ ଷଡ଼ଯନ୍ତ୍ର କରାଯାଇଛି। ଗତବର୍ଷ ମିଶନ ଶକ୍ତି ପାଇଁ ୩ ହଜାର ୪ କୋଟି ବଜେଟ ହୋଇଥିବା ବେଳେ ଏଥର ୨ ହଜାର ୭୦୦ କୋଟି ଟଙ୍କା ବଜେଟ ହୋଇଛି। ଡବଲ ଇଞ୍ଜିନ ସରକାର ଡବଲ ଷ୍ଟାଣ୍ଡାର୍ଡ। ମହାରାଷ୍ଟ୍ର, ହରିଆନା, ଛତିଶଗଡ଼ରେ ମହିଳାଙ୍କ ପାଇଁ ଅଧିକ ସୁବିଧା ଥିବା ବେଳେ ଓଡ଼ିଶାରେ ମାଆମାନଙ୍କୁ ଅବହେଳା କରାଯାଇଛି। ମାଆ ମାନେ ରାସ୍ତାରେ ବସିଛନ୍ତି। ତୁରନ୍ତ ସେମାନଙ୍କ ଦାବି ଉପରେ ଧ୍ୟାନ ଦିଆଯାଉ। ବିଜେଡି ବିଧାୟକ ଅରୁଣ ସାହୁଙ୍କ କହିଥିଲେ ଯେ ସବୁ ଦୋଷ ପୂର୍ବ ସରକାର କହିବା ଟ୍ୟାଗ୍ ଲାଇନ୍ ସୃଷ୍ଟି କରୁଛନ୍ତି ରାଜ୍ୟ ସରକାର । ଶୀତ କାକରରେ ହଜାର ହଜାର ମାଆ ମାନେ ରାଜରାସ୍ତାରେ ଅଛନ୍ତି । ସେଠାରେ ରାତ୍ରି ବି ଯାପନ କରୁଛନ୍ତି କିନ୍ତୁ ସରକାର ନୀରବ ଦ୍ରଷ୍ଟା ।

ସେପଟେ ମିଶନ ଶକ୍ତି ମହିଳାଙ୍କ ଦରମା ବନ୍ଦ ଓ ୩ଦିନ ଧରି ମହିଳାମାନେ ହକ ପାଇଁ ବିଧାନସଭା ଆଗରେ ଅହରାତ୍ରୀ ଧାରଣ ଦେବାକୁ ନେଇ ରାଜ୍ୟ ସରକାରଙ୍କ ଉପରେ କଂଗ୍ରେସ ମଧ୍ୟ ବର୍ଷିଛି l ମୁଲତବୀ ଆଲୋଚନାରେ କଂଗ୍ରେସ ବିଧାୟିକା ସୋଫିଆ ଫିର୍ଦୌସ ଅଭିଯୋଗ କରିଛନ୍ତି ଯେ ମିଶନ ଶକ୍ତି ମହିଳାଙ୍କୁ ନେଇ ପରସ୍ପରକୁ କେବଳ ଦୋଷାରୋପ କରାଯାଉଛି । ମିଶନ ଶକ୍ତି ମହିଳାମାନେ ସଶକ୍ତ ହେବାର ସ୍ଵପ୍ନ ଦେଖିଛନ୍ତି । ସ୍କୁଟି ଋଣ ନେଇଛନ୍ତି । ଏବେ ସ୍କୁଟି ଋଣ କେମିତି ସୁଝିବେ ଚିନ୍ତାରେ ପଡ଼ିଛନ୍ତି । ସେମାନେ ତିନି ଦିନ ହେଲା ବସିଲେଣି, ହେଲେ ପାଣି ଟୋପେ ବି ଦେଇ ନାହାନ୍ତି ରାଜ୍ୟ ସରକାର। ବୁଝା ପଡୁନାହିଁ, ସେମାନଙ୍କ ଦାବି ପୂରଣ କରିବା ପାଇଁ ରାଜ୍ୟ ସରକାରଙ୍କୁ କିଏ ଅଟକାଉଛି । ଏପରିକି ମିଶନ ଶକ୍ତିର ହେଲ୍ପ ଲାଇନ ନମ୍ବର ବି କାମ କରୁନି ।  ସେପଟେ ବିରୋଧୀଙ୍କ ଅଭିଯୋଗ ଭିତ୍ତିହୀନ ବୋଲି ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା କହିଛନ୍ତି l ସରକାର ମୁକ ହୋଇ ବସିବା ପୁରା ମିଛ କଥା । ଯେଉଁମାନେ ଆନ୍ଦୋଳନରେ ବସିଛନ୍ତି, ସେମାନେ ମିଶନ ଶକ୍ତି ମହିଳା ନୁହନ୍ତି, ସେମାନେ ମିଶନ ଶକ୍ତିର କମ୍ୟୁନିଟି ଷ୍ଟାଫ । ଯେଉଁ ମାନଙ୍କର ପାଂଚ ବର୍ଷ ଅବଧି ପୁରିଯାଇଛି । ସେମାନେ ଦରମା ପାଇ ସାରିଛନ୍ତି ବୋଲି ଉପ ମୁଖ୍ୟମନ୍ତ୍ରୀ କହିଛନ୍ତି l

ଭୁବନେଶ୍ବର : ଅଧାରୁ ବନ୍ଦ ହୋଇଗଲା ବିଧାନସଭାର ଶୀତ ଅଧିବେଶନ । ଡିସେମ୍ବର ୩୧ରେ ସରିବାକୁ ଥିବା ବେଳେ ୧୬ଟି କାର୍ଯ୍ୟଦିବସ ପୂର୍ବରୁ ବିଧାନସଭାକୁ ଅନିର୍ଦ୍ଧିଷ୍ଟକାଳ ପାଇଁ ମୁଲତବି କରିଦିଆଗଲା । ନଭେମ୍ବର ୨୬ ତାରିଖରୁ ଆରମ୍ଭ ହୋଇଥିଲା ଶୀତ ଅଧିବେଶନ । ବିଧାନସଭାରେ ରାଜ୍ୟର ଅନେକ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ଆଲୋଚନା ହେବାକୁ ବାକି ଥିଲା । ରାଜରାସ୍ତାରେ ମିଶନ ଶକ୍ତି ମହିଳାମାନେ ଆନ୍ଦୋଳନ କରୁଛନ୍ତି । ସେମାନଙ୍କ ଦାବି ପୂରଣ ନେଇ ସରକାର କୌଣସି ବ୍ୟବସ୍ଥା କରିନାହାଁନ୍ତି । ବିଧାନସଭାରେ ମଧ୍ୟ ଏହି ପ୍ରସଙ୍ଗ ଉଠିଛି । ହେଲେ ସରକାର ସେମାନଙ୍କୁ ହତାସ କରିଛନ୍ତି । ସେହିଭଳି ବିଧାୟକଙ୍କ ଦରମା ଓ ପେନସନ ବୃଦ୍ଧି ନେଇ ନେଇ ମଧ୍ୟ ଜନପ୍ରତିନିଧିମାନେ ଅନେକ ବସିଥିଲେ । ବିଧାୟକଙ୍କୁ ସରକାର ହତାସ କରିଛନ୍ତି । ଏମିତି ରାଜ୍ୟ ସମ୍ପର୍କିତ ପ୍ରସଙ୍ଗରେ ଆଲୋଚନା କରିବାକୁ ପଛଘୁଞ୍ଚା ଦେଇ ସରକାରୀ ଦଳ ବିଧାନସଭାକୁ ବନ୍ଦ କରିବାକୁ ପ୍ରସ୍ତାବ ଆଣିଥିଲା । ସରକାରୀ ଦଳ ଆଲୋଚନାକୁ ଭୟ କରି ବିଧାନସଭା ବନ୍ଦ କରିଦେଇଥିବା ବିଜେଡି ଅଭିଯୋଗ କରିଛି । ସୁଭଦ୍ରା ଯୋଜନା ହେଉ କି ଧାନ କିଣା ଅବ୍ୟବସ୍ଥା ସବୁଠି ବ୍ୟାକଫୁଟରେ ଥିଲେ ସରକାର । ସେଥିପାଇଁ ସରକାର ବିଧାନସଭାକୁ ଅଧାରୁ ବନ୍ଦ କରିଦେଇଥିବା ଅଭିଯୋଗ କରିଛି ବିଜେଡି । ସେପଟେ ବିଜେପି ବିଧାୟକ କହିଛନ୍ତି, ବିଭିନ୍ନ ପ୍ରସଙ୍ଗରେ ଗୃହରେ ଆଲୋଚନା ହୋଇଛି ଓ ସବୁ ଆଲୋଚନାର ସରକାର ଉତ୍ତର ରଖିଛନ୍ତି । ବିରୋଧୀଙ୍କ ପାଖରେ ପ୍ରସଙ୍ଗ ନଥିବାରୁ ସରକାରଙ୍କ ଉପରେ ଦୋଷାରୋପ କରୁଥିବା ବିଜେପି ବିଧାୟକ ଅଶୋକ ମହାନ୍ତି କହିଛନ୍ତି ।