ନୂଆଦିଲ୍ଲୀ : ସୁପ୍ରିମକୋର୍ଟର ୫୧ତମ ପ୍ରଧାନ ବିଚାରପତି ହେଲେ ଜଷ୍ଟିସ ସଞ୍ଜୀବ ଖାନ୍ନା । ସୁପ୍ରିମକୋର୍ଟର ୫୧ତମ ପ୍ରଧାନ ବିଚାରପତି ଭାବେ ଶପଥ ନେଇଛନ୍ତି ଜଷ୍ଟିସ ସଞ୍ଜୀବ ଖାନ୍ନା। ରାଷ୍ଟ୍ରପତି ଭବନରେ ଜଷ୍ଟିସ ଖାନ୍ନାଙ୍କୁ ଶପଥ ପାଠ କରାଇଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଜଷ୍ଟିସ ଡି.ୱାଇ. ଚନ୍ଦ୍ରଚୂଡଙ୍କ ଅବସର ପରେ ଦାୟିତ୍ବ ନେଇଛନ୍ତି ଜଷ୍ଟିସ ଖାନ୍ନା। ୨୦୨୫ ମେ ୧୩ ତାରିଖ ଯାଏ ଦାୟିତ୍ବ ସମ୍ଭାଳିବେ ଜଷ୍ଟିସ ଖାନ୍ନା । ଦିଲ୍ଲୀ ହାଇକୋର୍ଟରୁ ସୁପ୍ରିମକୋର୍ଟରେ ବିଚାରପତି ଭାବେ ଗତ ୨୦୧୯ ଜାନୁଆରୀ ୧୮ରେ ସେ ଯୋଗଦେଇଥିଲେ । ଜଷ୍ଟିସ ସଞ୍ଜୀବ ଖାନ୍ନାଙ୍କ ଜନ୍ମ ୧୯୬୦ ମେ ୧୪ରେ। ସେ ନୂଆଦିଲ୍ଲୀର ମଡର୍ଣ୍ଣ ସ୍କୁଲରୁ ଶିକ୍ଷାଲାଭ କରିଥିଲେ। ଦିଲ୍ଲୀ ବିଶ୍ବବିଦ୍ୟାଳୟରୁ ସେ ଆଇନ ଶିକ୍ଷା ଲାଭ କିରବା ପରେ ସେ ୧୯୮୩ ମସିହାରେ ଦିଲ୍ଲୀର ତିସ୍ ହାଜାରି କୋର୍ଟରେ ଓକିଲାତି ଆରମ୍ଭ କରିଥିଲେ । ସେ ୨୦୦୫ରେ ଦିଲ୍ଲୀ ହାଇକୋର୍ଟର ବିଚାରପତି ହୋଇଥିଲେ । ଜାନୁଆରୀ ୨୦୧୯ରେ ସେ ସୁପ୍ରିମକୋର୍ଟର ବିଚାରପତି ଭାବରେ ନିଯୁକ୍ତ ହୋଇଥିଲେ । ତାଙ୍କୁ ଆପରାଧିକ, ସିଭିଲ, ଟିକସ ଏବଂ ସାମ୍ବିଧାନିକ ଆଇନଗୁଡ଼ିକରେ ଜଣେ ମହାନ ବିଶେଷଜ୍ଞ ଭାବରେ ବିବେଚନା କରାଯାଏ । ତାଙ୍କ ବାପା ଜଷ୍ଟିସ ଦେବରାଜ ଖନ୍ନା ଥିଲେ ଦିଲ୍ଲୀ ହାଇକୋର୍ଟର ବିଚାରପତି। ୧୯୮୩ରେ ସେ ଦିଲ୍ଲୀ ବାର କାଉନସିଲରେ ଆଡଭୋକେଟ ଭାବେ ଯୋଗ ଦେଇଥିଲେ। ସେ ନିଜ କାର୍ଯ୍ୟକାଳରେ ସେ ଦିଲ୍ଲୀ ମଦନୀତି ମାମଲାରେ ଆପ୍ ନେତା ଅରବିନ୍ଦ କେଜରିୱାଲ, ମନୀଷ ସିସୋଦିଆ, ସଞ୍ଜୟ ସିଂଙ୍କ ଜାମିନ ଆବେଦନର ଶୁଣାଣି କରିଥିଲେ । ଗତ ମେ ମାସରେ କେଜରିୱାଲଙ୍କୁ ଅନ୍ତରୀଣ ଜାମିନ ଦେଇ ଚର୍ଚ୍ଚାର ପରିସରକୁ ଆସିଥିଲେ ଜଷ୍ଟିସ ଖନ୍ନା । ଜୁଲାଇରେ ବି ତାଙ୍କ ନେତୃତ୍ବାଧୀନ ଖଣ୍ଡପୀଠ କେଜରିୱାଲଙ୍କୁ ଅନ୍ତରୀଣ ଜାମିନ ଦେଇଥିଲେ । ସେହିପରି ଭୋଟର ଭେରିଫାଏଡ ପେପର ଅଡିଟ ଟ୍ରେଲସ ବା ଭିଭିପାଟ ପ୍ରସଙ୍ଗରେ ତାଙ୍କ ଖଣ୍ଡପୀଠ ଶୁଣାଣି କରିଥିଲେ । ୧୦୦ ପ୍ରତିଶତ ଭିଭିପାଟ ଭେରିଫିକେସନକୁ ସେହି ଖଣ୍ଡପୀଠ ରଦ୍ଦ କରିଥିଲା । ଏହା ସହ ଧାରା ୩୭୦ ଓ ଇଲେକ୍ଟୋରାଲ ବଣ୍ଡ ପ୍ରସଙ୍ଗରେ ବି ଗୁରୁତ୍ବପୂର୍ଣ୍ଣ ରାୟ ଶୁଣାଥିଲେ ଜଷ୍ଟିସ ଖାନ୍ନା ନେତୃତ୍ବାଧୀନ ଖଣ୍ଡପୀଠ।
ପ୍ରତିଶ୍ରୁତି ରକ୍ଷା କଲେ ମୁକେଶ ଖାନ୍ନା, ସୁପର ହିରୋ-ସୁପର ଟିଚର ହୋଇ ଫେରୁଛି ଶକ୍ତିମାନ
ନନ୍ଦିଘୋଷ ବ୍ୟୁରୋ : ଭାଟେରାନ ଅଭିନେତା ମୁକେଶ ଖାନ୍ନା ନିଜର ପ୍ରତିଶ୍ରୁତି ରକ୍ଷା କରିଛନ୍ତି । ୯୦ ଦଶକର ଶକ୍ତିମାନକୁ ଫେରାଇ ଆଣିବାକୁ କହିଥିଲେ । ଏବେ ସେ ନିଜର ପ୍ରତିଜ୍ଞା ପୂରଣ କରିଛନ୍ତି । ଦେଶୀ ସୁପର ହୀରୋ ଭାବେ ସେ ପୁଣି ପରଦାକୁ ଫେରିବାକୁ ଯାଉଛନ୍ତି । ମୁକେଶ ଖାନ୍ନା ସୋସିଆଲ ମିଡିଆରେ ଶକ୍ତିମାନର ଟିଜର ରିଲିଜ କରିଛନ୍ତି । ମୁକେଶ ଖାନ୍ନା ଖାଲି ଟିଜର ରିଲିଜ କରି ନାହାନ୍ତି ପୋଷ୍ଟର ମଧ୍ୟ ସେୟାର କରିଛନ୍ତି । ବର୍ତ୍ତମାନ ଦର୍ଶକ ରିଲିଜ ତାରିଖକୁ ଅପେକ୍ଷା କରିଛନ୍ତି ।
ମୁକେଶ ଖାନ୍ନା ସ୍କୁଲରେ ଉଡୁଥିବାର ଟିଜରରେ ନଜର ଆସିଛନ୍ତି । ଚନ୍ଦ୍ରଶେଖର ଆାଜାଦ, ଭଗତ ସିଂହ, ସୁବାଷ ଚନ୍ଦ୍ର ବୋଷ ଭଳି ସଗ୍ରାମୀଙ୍କ ଫଟୋ ସାମ୍ନାରେ ଛିଡା ହୋଇ ଗୀତ ଗାଉଥିବାର ନଜର ଆସିଛନ୍ତି । ଭିଡିଓ କ୍ୟାପସନରେ ଲେଖାଯାଇଛି କି, ତାଙ୍କୁ ଫେରିବାର ସମୟ ଆସିଛି । ଆମର ପ୍ରଥମ ଭାରତୀୟ ସୁପର ଟିଚର-ସୁପର ହିରୋ । ଆାଜିକାଲିର ପିଲାମାନଙ୍କ ପାଇଁ ଫେରି ଆସୁଛି । ତାହା ପୁଣି ବର୍ତ୍ତମାନ ପୀଡିର ପିଲାମାନଙ୍କ ଶିକ୍ଷାଦାନ ସହିତ ଏକ ବାର୍ତ୍ତା ନେଇ । ତାକୁ ଦୁଇ ହାତରେ ସ୍ବାଗତ କରନ୍ତୁ ।
ପ୍ରସଂଶକମାନେ ନିଜର ପିଲା ଦିନର ପ୍ରିୟ ଶୋ‘ ଫେରି ଆସିବା ଦେଖି ବହୁତ ଉତ୍ସାହିତ । ୧୯୯୭ ମସିହାରେ ଶକ୍ତିମାନ ଦୂରଦର୍ଶନ ଚ୍ୟାନେଲରେ ଆସିଥିଲା । ବର୍ତ୍ତମାନ ଶକ୍ତିମାନ ଫଲ୍ମ, ଟିଭି, ଓ୍ବେବ ସିରିଜ କେଉଁ ମାଧ୍ୟମରେ ଆସିବ ତାହା ଜଣାପଡି ନାହିଁ ।
ସଲମାନ ଓ ଶାହାରୁଖଙ୍କ ପରେ ଯୋଡି ହେଲା ମିଥୁନଙ୍କ ନାମ : ପାକିସ୍ତାନରୁ ଆସିଲା ଧମକ
ନନ୍ଦିଘୋଷ ବ୍ୟୁରୋ : ନିକଟରେ ବଲିଉଡ ଅଭିନେତା ସଲମାନ ଖାନ ଓ ଶାହାରୁଖ ଖାନଙ୍କୁ ଧମକ ଆସିଥିଲା । ଏବେ ବଲିଉଡ ଅଭିନେତା ତଥା ବିଜେପି ନେତା ମିଥୁନ ଚକ୍ରବର୍ତ୍ତୀଙ୍କୁ ଧମକ ମିଳିଛି । ସୋସିଆଲ ମିଡିଆରେ ଏକ ଭିଡିଓ ସାମ୍ନାକୁ ଆସିଛି, ଯେଉଁଥିରେ ଦୁବାଇରେ ଥିବା ଜଣେ ପାକିସ୍ତାନୀ ମିଥୁନଙ୍କୁ ଧମକ ଦେଇଛନ୍ତି । ପାକିସ୍ତାନୀ ଡନ୍ ଶାହାଜାଦ ଭଟ୍ଟୀ ଏକ ଭିଡିଓ ଜାରି କରି ତାଙ୍କୁ କ୍ଷମା ମାଗିବାକୁ କହିଛନ୍ତି।
ବାସ୍ତବରେ ଦୁବାଇରେ ଥିବା ପାକିସ୍ତାନୀ ଡନ୍ ଏକ ଭିଡିଓ ମାଧ୍ୟମରେ କରି ମିଥୁନଙ୍କୁ ସର୍ବସାଧାରଣରେ ଧମକ ଦେଇଛନ୍ତି । ଏହି ଭିଡିଓରେ ଶାହଜାଦ କହିଛନ୍ତି, ଆପଣ ୧୦-୧୫ ଦିନ ମଧ୍ୟରେ ଏକ ଭିଡିଓ ମାଧ୍ୟମରେ କ୍ଷମା ମାଗନ୍ତୁ । କ୍ଷମା ମାଗିବା ଆପଣଙ୍କ ପାଇଁ ଭଲ ଏବଂ ଆପଣଙ୍କର କ୍ଷମା ପ୍ରାର୍ଥନା ଯଥାର୍ଥ ଅଟେ । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି ।
ଗତ ମାସରେ ମିଥୁନ ଚକ୍ରବର୍ତ୍ତୀ ଉତ୍ତର ୨୪ ପରଙ୍ଗନା ଜିଲ୍ଲାରେ ଏକ ଦଳୀୟ କାର୍ଯ୍ୟକ୍ରମ ସମୟରେ ଏକ ଭାଷଣ ଦେଇଥିଲେ । ଯାହାକୁ ନେଇ ଏତଲା ଦାଏର କରାଯାଇଥିଲା । ସେ କହିଥିଲେ, ମୁଁ ଜଣେ ଅଭିନେତା ନୁହଁ ବରଂ ୬୦ ଦଶକର ମିଥୁନ ଚକ୍ରବର୍ତ୍ତୀ ଭାବରେ କହୁଛି । ରାଜନୀତିର କୌଣସି କୌଶଳ ମୋ ପାଇଁ ନୂଆ ନୁହେଁ, ମୁଁ ରକ୍ତ ରାଜନୀତି କରିସାରିଛି । ମିଥୁନ ଆହୁରି କହିଛନ୍ତି, ମୁଁ ଜାଣେ, ମୁଁ କ‘ଣ କଲେ କ‘ଣ ହୋଇ ପାରିବ । ମୁଁ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ମଧ୍ୟ କହିଛି ଯେ ଏଥିପାଇଁ ଯାହା ଦରକାର ତାହା କରିବି। ଏଠାରେ ଜଣେ ନେତା କହିଥିଲେ ଯେ ହିନ୍ଦୁମାନଙ୍କୁ ବଧ କରି ଭାଗିରଥୀରେ ଭସାଇ ଦିଆଯିବ । ମୁଁ ଭାବିଲି ସିଏମ କିଛି କହିବେ । କିନ୍ତୁ କିଛି ହେଲା ନାହିଁ । ବର୍ତ୍ତମାନ ମୁଁ କହୁଛି ତୁମକୁ ତୁମ ଭୂମିରେ କବର ଦେବି ।
କିଛି ଦିନ ହେବ ସଲମାନ ଖାନଙ୍କୁ କ୍ରମାଗତ ଭାବେ ଧମକ ଆସୁଛି । ସଲମାନଙ୍କ ପରେ ନିକଟରେ ଶାହାରୁଖ ଖାନଙ୍କୁ ମଧ୍ୟ ଧମକ ମିଳିଥିଲା ଏବଂ ବର୍ତ୍ତମାନ ମିଥୁନଙ୍କ ନାମ ମଧ୍ୟ ଏହି ତାଲିକାରେ ଯୋଡି ହୋଇଛି। ମିଥୁନ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ଦେଇନାହାନ୍ତି ।
‘ସିଙ୍ଘମ ଏଗେଇନ’କୁ ପଛରେ ପକାଇଲା ‘ଭୁଲ୍ ଭୁଲେୟା-୩’ !
ଲୋକମାନେ ହରର୍ କମେଡି ଫିଲ୍ମ ‘ଭୁଲ୍ ଭୁଲେୟା-୩’ ଏବଂ ‘ସିଙ୍ଘମ ଏଗେଇନ’ ପାଇଁ ବହୁ ସମୟ ଅପେକ୍ଷା କରିଥିଲେ । ଯେଉଁଠାରେ ଅକ୍ଷୟ କୁମାର, ଅଜୟ ଦେବଗନ୍, ରଣଭୀର ସିଂ, ଟାଇଗର ଶ୍ରଫ୍ ଏବଂ ଦୀପିକା ପାଦୁକୋନ୍ ଅଭିନୀତ ଚଳଚ୍ଚିତ୍ର ‘ସିଙ୍ଘମ ଏଗେଇନ’। ଏଥି ସହିତ କାର୍ତ୍ତିକ ଆର୍ଯ୍ୟନ୍, ବିଦ୍ୟା ବାଲାନ୍ ଏବଂ ମାଧୁରୀ ଦୀକ୍ଷିତଙ୍କ ଅଭିନୀତ ଭୟଙ୍କର କମେଡି ଫିଲ୍ମ ‘ଭୁଲ୍ ଭୁଲେୟା-୩’ ଅଛି । ଉଭୟ ଚଳଚ୍ଚିତ୍ର ମଧ୍ୟରେ ଏକ କଡା ପ୍ରତିଯୋଗିତା ଚାଲିଛି । ‘ସିଙ୍ଘମ ଏଗେଇନ’, ଯିଏ ପ୍ରଥମ ଦିନରେ ଆଗରେ ଥିଲା, ସେ ବର୍ତ୍ତମାନ ମଞ୍ଜୁଲିକା ଠାରୁ ପଛରେ ପଡିଛି ।
ଅଜୟ ଦେବଗାନଙ୍କ ଆକ୍ସନ୍ ଫିଲ୍ମ ‘ସିଙ୍ଘମ ଏଗେଇନ’ ପାଇଁ ଲୋକମାନେ ଉତ୍ସାହର ସହିତ ଅପେକ୍ଷା କରିଥିଲେ, ଯାହା ପ୍ରଥମ ଦିନରେ ବକ୍ସ ଅଫିସରେ କମ୍ପନ ସୃଷ୍ଟି କରିଥିଲା । ବର୍ତ୍ତମାନ ଫିଲ୍ମ ପ୍ରେକ୍ଷାଳୟରେ ୧୦ ଦିନ ପୂରଣ କରିଛି । ଏଭଳି ପରିସ୍ଥିତିରେ ବର୍ତ୍ତମାନ ପର୍ଯ୍ୟନ୍ତ ଏହାର ରୋଜଗାର ମଧ୍ୟ ପ୍ରକାଶ ପାଇଛି । ଏକ ରିପୋର୍ଟ ଅନୁଯାୟୀ, ଦଶମ ଦିନରେ ଫିଲ୍ମ ୧୩.୨୫ କୋଟି ଟଙ୍କା ରୋଜଗାର କରିଛି । ଏହି ରୋଜଗାର ରିପୋର୍ଟ ଲେଖିବା ପର୍ଯ୍ୟନ୍ତ ତେଣୁ ଏହା ପରିବର୍ତ୍ତନ ହୋଇପାରେ । ଏହି ଚଳଚ୍ଚିତ୍ର ୨୦୦ କୋଟି ଟଙ୍କା କ୍ଲବରେ ପ୍ରବେଶ କରିଛି । ଚଳଚ୍ଚିତ୍ରର ମୋଟ ସଂଗ୍ରହ ଯାହା ଖୋଲିବା ଦିନ ୪୩.୫ କୋଟି ଟଙ୍କା ଥିଲା ତାହା ଏବେ ୨୦୬.୫୦ କୋଟି ଟଙ୍କା ହୋଇଛି । ତେବେ ଫିଲ୍ମଟି ଏପର୍ଯ୍ୟନ୍ତ ଏହାର ବଜେଟ୍ ଅତିକ୍ରମ କରିନାହିଁ, ଯାହା ନିର୍ମାତାମାନଙ୍କ ପାଇଁ ଚିନ୍ତାର କାରଣ ହୋଇପାରେ ।
ବର୍ତ୍ତମାନ ହରର ଚଳଚ୍ଚିତ୍ର ‘ଭୁଲ୍ ଭୁଲେୟା-୩’ ବିଷୟରେ କହିବାକୁ ଗଲେ ଏହା ବକ୍ସ ଅଫିସରେ ଏକ ଆଗେଇ କରିଛି । ଫିଲ୍ମ ଆରମ୍ଭରେ ଭଲ କରିନଥିଲା କିନ୍ତୁ ବର୍ତ୍ତମାନ ଏହାର ରୋଜଗାର ବଢିଯାଇଛି । ଏକ ରିପୋର୍ଟ ଅନୁଯାୟୀ, ହରର୍ ଚଳଚ୍ଚିତ୍ର ରିଲିଜ ହେବାର ଦଶମ ଦିନରେ ୧୬.୫୦ କୋଟି ଟଙ୍କା ରୋଜଗାର କରିଛି ।
ଶ୍ରୀମନ୍ଦିରରେ ଅନୁଷ୍ଠିତ ହେବ ହରିହର ବେଶ
ପୁରୀ : ଆଜି ଶ୍ରୀମନ୍ଦିରରେ ଅନୁଷ୍ଠିତ ହେବ ହରିହର ବେଶ। ଅବକାଶ ନୀତି ପରେ ବଡ଼ଠାକୁରଙ୍କୁ ହରିହର ବେଶରେ ସଜ୍ଜିତ କରାଯିବ ।ଏହି ବେଶରେ ବଡ଼ଠାକୁର ଅର୍ଦ୍ଧେକ ଧଳା ଓ ଅର୍ଦ୍ଧେକ କଳା ଦିଶିବା ସହ ୩୨ ପ୍ରକାର ସୁବର୍ଣ୍ଣ ଅଳଙ୍କାର ପରିଧାନ କରିଥାନ୍ତି। କାର୍ତ୍ତିକ ମାସର ଦୀପାବଳି ଅମାବାସ୍ୟା ପର ଠାରୁ ଶୁକ୍ଳ ଦଶମୀ ମଧ୍ୟରେ ଯେଉଁଦିନ ସୋମବାର ପଡେ, ସେହିଦିନ ରତ୍ନସିଂହାସନରେ ଅଧିଷ୍ଟିତ ବଡ଼ଠାକୁରଙ୍କୁ ହରିହର ବେଶରେ ସଜ୍ଜିତ କରିବାର ବିଧି ରହିଥାଏ। ପୁଷ୍ପାଳକ ସେବକମାନେ ବଡ଼ଠାକୁରଙ୍କୁ ହରିହର ବେଶରେ ଏବଂ ଶ୍ରୀଜଗନ୍ନାଥଙ୍କୁ ରାଧାଦାମୋଦର ବେଶରେ ସଜ୍ଜିତ କରିବେ । ଶ୍ରୀମନ୍ଦିରରେ ବଡ଼ଠାକୁରଙ୍କ ହରିହର ବେଶ ସାଙ୍ଗକୁ ଶ୍ରୀଜଗନ୍ନାଥଙ୍କର ରାଧାଦାମୋଦର ବେଶ ଦେଖି ଭକ୍ତ ଆତ୍ମତୃପି ଲାଭ କରିବେ । ଆଜିଠାରୁ ଶ୍ରୀମନ୍ଦିରରେ ପଞ୍ଚୁକ ବ୍ରତ ଆରମ୍ଭ ହେବା ସହ ବିଭିନ୍ନ ଦିନରେ ମହାପ୍ରଭୁଙ୍କୁ ବିଭିନ୍ନ ବେଶରେ ସଜ୍ଜିତ କରାଯିବ ।
ପୁରୀରେ ଧ୍ବଜା ବନ୍ଧା ସମୟରେ ହେବ ପରିବର୍ତ୍ତନ
ପୁରୀ : ପୁରୀରେ ଧ୍ବଜା ବନ୍ଧା ସମୟରେ ହେବ ପରିବର୍ତ୍ତନ। ସନ୍ଧ୍ୟା ବଦଳରେ ଅପରାହ୍ନ ୩.୩୦ ରୁ ୪.୦୦ଟା ମଧ୍ୟରେ ଧ୍ବଜା ବନ୍ଧା ଅନୁଷ୍ଠିତ ହେବ । ଏନେଇ ଚୁନରା ସେବକମାନଙ୍କୁ ମୁଖ୍ୟ ପ୍ରଶାସକ ନିର୍ଦ୍ଦେଶ ଦେଇଛନ୍ତି । ଧ୍ଵଜା ବନ୍ଧା ଦେଖିବା ପାଇଁ ଶ୍ରୀମନ୍ଦିର ଭିତରେ ଓ ସିଂହଦ୍ଵାର ବାହାର ମାର୍ଗରେ ବହୁତ ଭକ୍ତ ଗହଳି କରୁଛନ୍ତି । ଅପରାହ୍ନ ସମୟରେ କମ୍ ଗହଳି ଥିବାରୁ ଧ୍ଵଜା ବନ୍ଧା ସମ୍ପର୍ଣ୍ଣ କରିବାକୁ ଲକ୍ଷ୍ୟ ରଖାଯାଇଛି । ସପ୍ତାହଟି ପାଇଁ ୩.୩୦ ରୁ ୪.୦୦ଟା ମଧ୍ୟରେ ଧ୍ଵଜା ବନ୍ଧା ସମାପନ କରିବା ପାଇଁ ଶ୍ରୀମନ୍ଦିର କମାଣ୍ଡର ଓ ସୁପରଭାଇଜାରଙ୍କୁ ନିର୍ଦ୍ଦେଶ ପ୍ରଦାନ କରାଯାଇଛି l ଏନେଇ ଚୁନରା ସେବକଙ୍କ ସହଯୋଗ କାମନା କରିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ।
ନିଶା ନିବାରଣ କେନ୍ଦ୍ରରେ ଯୁବକଙ୍କୁ ପିଟି ପିଟି ହତ୍ୟା କରାଯାଇଥିବା ଅଭିଯୋଗ
ଭୁବନେଶ୍ବର : ନିଶା ନିବାରଣ କେନ୍ଦ୍ର ବିରୋଧରେ ହତ୍ୟା ଅଭିଯୋଗ । ଯୁବକଙ୍କୁ ପିଟି ପିଟି ହତ୍ୟା କରାଯାଇଥିବା ଅଭିଯୋଗ ଆଣିଛନ୍ତି ପରିବାର ଲୋକେ । ମୃତକ ହେଲେ ଭୁବନେଶ୍ବର ୟୁନିଟ ୬ ଅଞ୍ଚଳର ୩୬ ବର୍ଷୀୟ ଯୁବକ ସୁମନ୍ତ ପଣ୍ଡା । ଗତକାଲି ତାଙ୍କୁ ଭୁବନେଶ୍ବର ଖଣ୍ଡଗିରି ଥାନା ଅଞ୍ଚଳରେ ଥିବା ଏକ ନିଶା ନିବାରଣ କେନ୍ଦ୍ରରେ ଭର୍ତ୍ତି କରାଯାଇଥିଲା । ଆଜି ତାଙ୍କର ମୃତ୍ୟୁ ହୋଇଥିବା ଜଣାପଡିଛି । ତାଙ୍କୁ ପିଟିପିଟି ଅତି ନିର୍ମମ ଭାବେ ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ ଆଣିଛନ୍ତି । ମୃତଦେହକୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ଘଟଣା ସମ୍ପର୍କରେ ପୋଲିସର କୌଣସି ପ୍ରତିକ୍ରିୟା ମିଳିପାରି ନାହିଁ ।
ବଢିଲା ଟିମ୍ ଇଣ୍ଡିଆର ସମସ୍ୟା, ଅଷ୍ଟ୍ରେଲିଆ ଯିବେ ନାହିଁ କ୍ୟାପଟେନ ରୋହିତ ଶର୍ମା
ନନ୍ଦିଘୋଷ ବ୍ୟୁରୋ : ଟିମ୍ ଇଣ୍ଡିଆର ଅଧିନାୟକ ରୋହିତ ଶର୍ମା ଭାରତୀୟ ଦଳ ସହିତ ଅଷ୍ଟ୍ରେଲିଆ ଯିବେ ନାହିଁ । ତେବେ ରୋହିତ ପର୍ଥରେ ଅନୁଷ୍ଠିତ ହେବାକୁ ଥିବା ପ୍ରଥମ ଟେଷ୍ଟ ମ୍ୟାଚରୁ ବଞ୍ଚିତ ହେବେ କି ନାହିଁ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ହିଟମ୍ୟାନ୍ ଖୁବ୍ ଶୀଘ୍ର ଦ୍ୱିତୀୟ ଥର ପାଇଁ ପିତା ହେବାକୁ ଯାଉଛନ୍ତି ଏବଂ ଏହି କାରଣରୁ ସେ ସିରିଜର ପ୍ରଥମ କିମ୍ବା ଦ୍ୱିତୀୟ ମ୍ୟାଚ୍ ହରାଇ ପାରନ୍ତି । ବର୍ଡର-ଗାଭାସ୍କର ସିରିଜର ପ୍ରଥମ ଟେଷ୍ଟ ମ୍ୟାଚ୍ ନଭେମ୍ବର ୨୨ରୁ ଆରମ୍ଭ ହେବ ।
ବର୍ଡର-ଗାଭାସ୍କର ସିରିଜ୍ ଆରମ୍ଭ ପୂର୍ବରୁ ମଧ୍ୟ ଟିମ୍ ଇଣ୍ଡିଆ ପାଇଁ ଏକ ଖରାପ ଖବର ଆସିଛି | କ୍ୟାପଟେନ ରୋହିତ ଶର୍ମା ଭାରତୀୟ ଦଳ ସହ ଅଷ୍ଟ୍ରେଲିଆ ଯିବେ ନାହିଁ । ବିସିସିଆଇ ସୂତ୍ରରୁ ପ୍ରକାଶ ଯେ ରୋହିତ ଦଳ ସହ ଅଷ୍ଟ୍ରେଲିଆ ଯିବେ ନାହିଁ, କିନ୍ତୁ ସେ ପ୍ରଥମ ଟେଷ୍ଟ ମ୍ୟାଚରୁ ବଞ୍ଚିତ ହେବେ କି ନାହିଁ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ରୋହିତ ଦ୍ୱିତୀୟ ଥର ପାଇଁ ପିତା ହେବାକୁ ଯାଉଛନ୍ତି ଏବଂ ଏହି କାରଣରୁ ସେ ସିରିଜର ପ୍ରଥମ କିମ୍ବା ଦ୍ୱିତୀୟ ଟେଷ୍ଟ ମ୍ୟାଚରୁ ବଞ୍ଚିତ ହେବେ । ରୋହିତ ଏହା ପୂର୍ବରୁ ବିସିସିଆଇକୁ କହିଛନ୍ତି ।
ଯଦି ରୋହିତ ଶର୍ମା ପର୍ଥରେ ଅଷ୍ଟ୍ରେଲିଆ ବିପକ୍ଷ ପ୍ରଥମ ଟେଷ୍ଟ ମ୍ୟାଚରୁ ବଞ୍ଚିତ ହୁଅନ୍ତି, ତେବେ ଟିମ୍ ଇଣ୍ଡିଆର କମାଣ୍ଡ ତାଙ୍କ ସ୍ଥାନରେ ଜସପ୍ରୀତ ବୁମ୍ରାଙ୍କ ହାତରେ ରହିବ । ବର୍ଡର-ଗାଭାସ୍କର ସିରିଜ୍ ପାଇଁ ବୁମ୍ରାଙ୍କୁ ଉପ-ଅଧିନାୟକ ଦାୟିତ୍ବ ଦିଆଯାଇଛି । ଏହାପୂର୍ବରୁ ବୁମ୍ରା ରୋହିତଙ୍କ ଅନୁପସ୍ଥିତିରେ ଇଂଲଣ୍ଡରେ ଭାରତୀୟ ଦଳର ନେତୃତ୍ୱ ନେଇଥିଲେ । ୩୫ ବର୍ଷ ପରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୫ ମ୍ୟାଚ୍ ବିଶିଷ୍ଟ ବର୍ଡର-ଗାଭାସ୍କର ସିରିଜ୍ ଖେଳାଯିବ । ୧୯୯୧-୯୨ ମସିହାରେ ଏହା ପୂର୍ବରୁ ଦୁଇ ଦଳ ମଧ୍ୟରେ ଏକ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଖେଳାଯାଇଥିଲା, ଯେଉଁଠାରେ କଙ୍ଗାରୁ ଦଳ ଦୃଢ ପ୍ରଦର୍ଶନ କରି ୪-୦ରେ ସିରିଜ୍ ଜିତିଥିଲା ।
କ୍ୟୁବାରେ ଭୁମିକମ୍ପ। ଥରିଲା ଅଟ୍ଟାଳିକା, ଭୁଶୁଡ଼ି ପଡ଼ିବାର ଆଶଙ୍କା
ନନ୍ଦଘୋଷ ବ୍ୟୁରୋ : ପ୍ରଥମେ କାରିବିଆନ୍ ସାଗରରେ ସୃଷ୍ଟି ହୋଇଥିବା ଝଡ଼ ରାଫେଲ୍ ବିନାଶ ଘଟାଇଥିଲା । ବର୍ତ୍ତମାନ ଭୂମିକମ୍ପର କମ୍ପନ ଲୋକଙ୍କ ମନରେ ଭୟ ସୃଷ୍ଟି କରିଛି। ରବିବାର ବିଳମ୍ବିତ ରାତିରେ କ୍ୟୁବା ଦ୍ୱୀପରେ କ୍ରମାଗତ ଦୁଇଟି ଭୂମିକମ୍ପ ଅନୁଭୂତ ହୋଇଥିଲା। ଏହି ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ ୬.୮ ରହିଥିଲା । ତେବେ ଭୂମିକମ୍ପ ଯୋଗୁଁ କୌଣସି ଜୀବନ ହାନୀ ହେବାର ସୂଚନା ନାହିଁ। କୌଣସି ସୁନାମି ଚେତାବନୀ ନାହିଁ, କିନ୍ତୁ କୋଠାଘର ଭାଙ୍ଗି ନଷ୍ଟ ହୋଇଛି । ଅନେକ ଅଟ୍ଟାଳିକା ଥରି ଉଠିଛି ଏବଂ ବର୍ତ୍ତମାନ ଭୁଶୁଡ଼ି ପଡ଼ିବାର ଆଶଙ୍କା ରହିଛି। ଏପରିକି ଲୋକଙ୍କ ଘରର ଜିନିଷ, କବାଟ ଏବଂ ଝରକା ମଧ୍ୟ ଦୋହଲି ଯାଇଛି । ଅଧିକାଂଶ ସହରରେ ଲୋକମାନେ ନିଜ ଘର ବାହାରେ ରାତି ବିତାଇଲେ । ଲୋକମାନେ ରାତିସାରା ନିଜ ପିଲା ଏବଂ ପରିବାର ସହିତ ରାସ୍ତାରେ ବସି ରହିଲେ । ଲୋକମାନେ କହିଛନ୍ତି ଯେ ଭୂମିକମ୍ପ ଯୋଗୁଁ ସେମାନଙ୍କ ଘରର କାନ୍ଥ ଭାଙ୍ଗି ଘରଗୁଡ଼ିକ ଖରାପ ହୋଇଯାଇଛି ।
ଆମେରିକାର ଭୂତତ୍ତ୍ବ ସର୍ବେକ୍ଷଣ ଅନୁଯାୟୀ ସାଣ୍ଟିଆଗୋ ଡି କ୍ୟୁବାରେ ଏହି ଭୂମିକମ୍ପ ଅନୁଭୂତ ହୋଇଥିଲା । କ୍ୟୁବାର ପୂର୍ବ ଭାଗରେ ମଧ୍ୟ ଭୂମିକମ୍ପ ଅନୁଭୂତ ହୋଇଥିଲା । ଭୂମିକମ୍ପର କେନ୍ଦ୍ର ପୂର୍ବ କ୍ୟୁବାର ଦକ୍ଷିଣ ଗ୍ରାନମା ପ୍ରଦେଶର ବାର୍ଟୋଲୋମେ ମାସୋ ଠାରୁ ପ୍ରାୟ ୪୦କିଲୋମିଟର ଦୂରରେ ଥିଲା ଏବଂ ଏହାର ଗଭୀରତା ୧୬.୬ ମାଇଲ ଥିଲା ଦ୍ୱିତୀୟ ଶକ୍ତିଶାଳୀ ଭୂମିକମ୍ପ, ଯାହାର ତୀବ୍ରତା ୬.୮ ଥିଲା । ପୂର୍ବ ଭୂମିକମ୍ପର ଏକ ଘଣ୍ଟା ପରେ ପୁଣି ଭୂମିକମ୍ପ ଘଟିଥିଲା । ଯାହାର ତିବ୍ରତା ୫.୯ ବୋଲି USGS ରିପୋର୍ଟରୁ ଜଣାପଡିଛି । ୧୯୯୦ ଦଶକରୁ ସବୁଠାରୁ ଖରାପ ଅର୍ଥନୈତିକ ସଙ୍କଟ ଦେଇ ଗତି କରୁଛି କ୍ୟୁବା ।
ଗଣମାଧ୍ୟମ ରିପୋର୍ଟ ଅନୁଯାୟୀ କ୍ୟୁବାର ରାଷ୍ଟ୍ରପତି ମିଗୁଏଲ୍ ଡିଆଜ୍-କାନେଲ କହିଛନ୍ତି ଯେ ଏହି ଭୂମିକମ୍ପ ଅନେକ ଅଞ୍ଚଳରେ ଭୂସ୍ଖଳନ ମଧ୍ୟ କରିଛି। ଅନେକ ଘର ଓ ବିଦ୍ୟୁତ ତାର କ୍ଷତିଗ୍ରସ୍ତ ହୋଇଛି । ରବିବାର ଦିନ ରାଜଧାନୀର ପ୍ରାୟ ୮୫ ପ୍ରତିଶତ ବାସିନ୍ଦାଙ୍କ ପାଇଁ ବିଦ୍ୟୁତ୍ ସ୍ଥାପିତ ହୋଇଥିବାବେଳେ ପଶ୍ଚିମ ଦିଗରେ ସବୁଠାରୁ ଅଧିକ କ୍ଷତିଗ୍ରସ୍ତ ପ୍ରଦେଶ ଆର୍ଟେମିସା ଏବଂ ପିନାର୍ ଡେଲ ରିଓ ଅନ୍ଧାରରେ ରହିଥିଲେ।
କ‘ଣ କରିବେ ଆମେରିକା ଉପରାଷ୍ଟ୍ରପତି କମଳା ହାରିସ ?
ନନ୍ଦିଘୋଷ ବ୍ୟୁରୋ : ନିର୍ବାଚନରେ ପରାସ୍ତ ପରେ କଣ କରିବେ ଆମେରିକା ଉପରାଷ୍ଟ୍ରପତି କମଳା ହାରିସ ? ଆଉ ୭୦ ଦିନ ପରେ ଅଫିସରୁ ବିଦାୟ ନେବେ କମଳା। ଚଳିତ ନିର୍ବାଚନରେ ପରାଜୟର ସ୍ବାଦୁ ଚାଖିଥିବା କମଳା ଆସନ୍ତା ୨୦୨୮ ରାଷ୍ଟ୍ରପତି ନିର୍ବାଚନ ଲାଗି ପ୍ରସ୍ତୁତ ହେବେ ନା ଅନ୍ଯ ଦିଗରେ ମୁହାଁଇବେ ତାହାକୁ ନେଇ ଜାରି ରହିଛି ସସପେନ୍ସ। ୨୦୦୪ରେ ଡେମୋକ୍ରାଟିକ ଦଳ ପ୍ରାର୍ଥୀ ଜନ କେରୀ ରିପବ୍ଲିକାନ ପ୍ରାର୍ଥୀ ଜର୍ଜ ବୁଶଙ୍କଠାରୁ ପରାସ୍ତ ହୋଇଥିଲେ। ତେବେ ସେ ରାଜନୀତିରୁ ଦୂରେଇ ନଥିଲେ। ପରେ ବାରାକ ଓବାମାଙ୍କ ଶାସନରେ ସେ ବୈଦେଶିକ ମନ୍ତ୍ରୀ ଦାୟିତ୍ବ ନେଇଥିଲେ। ମାତ୍ର କମଳା ହାରିସଙ୍କ କ୍ଷେତ୍ରରେ ଏହା ସମ୍ଭବ ହୋଇ ନପାରେ କିମ୍ବା ଅଧିକ କଷ୍ଟସାଧ୍ଯ ହେବ। ଅନ୍ଯ ଏକ ବିକଳ୍ପ ହେଲା କମଳା ଡେମୋକ୍ରାଟିକ ଦଳର ମୁଖପାତ୍ର ହୋଇପାରନ୍ତି। ହିଲାରୀ କ୍ଲିଣ୍ଟନ ଓ ଅଲ ଗୋରେଙ୍କ ପରି ଦୁଇ ପରାଜିତ ରାଷ୍ଟ୍ରପତି ପ୍ରାର୍ଥୀ ଯେପରି ନିର୍ବାଚନରେ ପରାଜୟ ପରେ ନିଜକୁ ଲେଖାଲେଖି ଓ ଅନ୍ଯାନ୍ଯ କାର୍ଯ୍ଯରେ ଜଡ଼ିତ ରଖିଲେ ଠିକ ସେପରି କମଳା ବି କରିପାରନ୍ତି ବୋଲି ସମ୍ଭାବନା ରହିଛି। ହିଲାରୀ ଏକ ପୁସ୍ତକ ଲେଖିଥିବାବେଳେ ଏକ ଡକ୍ଯୁମେଣ୍ଟାରୀ ନିର୍ମାଣ କରିଥିଲେ ଅଲ ଗୋରେ। ନଚେତ ହିଲାରୀ କ୍ଲିଣ୍ଟନଙ୍କ ପରି ବ୍ଯକ୍ତିଗତ ଜୀବନ ଉପରେ ନିଜକୁ ଫୋକସ କରିପାରନ୍ତି କମଳା।