କଣ୍ଟାବାଞ୍ଜି : କଣ୍ଟାବାଞ୍ଜି ସ୍ବାସ୍ଥ୍ୟକେନ୍ଦ୍ରରେ ରୋଗୀ ପିଇବା ପାଇଁ ନାହିଁ ପାଣି । ଶୋଷ ହେଲେ ଯିବାକୁ ପଡୁଛି ଅନେକ ଦୂର । ଅନେକ ସମସ୍ୟା ଭିତରେ ଏବେ ମୁଖ୍ୟ ସମସ୍ୟା ପାଲଟିଛି ଜଳ । ବହୁବାର ଅଭିଯୋଗ ସତ୍ବେ ଫଳ ଶୁନ । ଏହି ସ୍ୱାସ୍ଥ୍ୟ କେନ୍ଦ୍ର ଉପରେ ନିର୍ବାଚନ ମଣ୍ଡଳୀର ତୁରେକେଲା, ବଙ୍ଗୋମୁଣ୍ଡା ଓ ମୁରିବାହାଲ ବ୍ଲକ ଏବଂ ଆଖ ପାଖ ବ୍ଳକ ର ହଜାର ହଜାର ରୋଗୀ ଓ ତାଙ୍କ ପରିଜନ ନିର୍ଭର କରୁଛନ୍ତି । ହେଲେ ଏଠି ରୋଗୀଙ୍କ ପାଇଁ ବର୍ଷ ବର୍ଷ ହେଲା ପିଇବା ପାଣି ନଥିବା ଘଟଣା ସମସ୍ତଙ୍କୁ ଚକିତ କରିଛି । ପାଣି ନଥିବା ଯୋଗୁ ଅନେକ ଅସୁବିଧାର ସମ୍ମୁଖୀନ ହେଉଥିବା ରୋଗୀଙ୍କ ପରିଜନ ଅଭିଯୋଗ କରିଛନ୍ତି।
କଣ୍ଟାବାଞ୍ଜି ସ୍ବାସ୍ଥ୍ୟକେନ୍ଦ୍ରରେ ପାଣି ସମସ୍ୟା ବିଷୟରେ ସମସ୍ତେ ଅବଗତ। ଜଳ ଯୋଗାଣ ବିଭାଗ ପକ୍ଷରୁ ସ୍ୱାସ୍ଥ୍ୟ କେନ୍ଦ୍ର ପରିସରରେ ଏକ ଓଭର ହେଡ ଟ୍ୟାଙ୍କର ନିର୍ମାଣ କରଯାଇଛି । ୫ମାସ ହେଲା ଏହାର ନିର୍ମାଣ କାମ ୯୦ପ୍ରତିଶତ ସରିଛି । ହେଲେ ଏବେ ଓଭର ହେଡ ଟାଙ୍କି କୁ ପାଣି କଉଠୁ ଉଠିବ ବୋଲି ପ୍ରଶ୍ନ ଉଠିଛି । ସ୍ୱାସ୍ଥ୍ୟ କେନ୍ଦ୍ର ପରିସରରେ ପାଣି ର ସ୍ରୋତ ନଥିବା ଜଣାପଡିଛି । ବିଭାଗ ଏହାକୁ ନେଇ ଏବେ କଣ୍ଟାବାଞ୍ଜି ଥାନା ପରିସରରେ ଏକ ନଳକୂପ ଖନନ କରି ପାଣି ଆଣିବାର ବ୍ୟବସ୍ଥା କରିବାକୁ ଚେଷ୍ଟା କରୁଛି । ସ୍ୱାସ୍ଥ୍ୟ ମନ୍ତ୍ରୀ ମୁକେଶ ମହଲିଙ୍ଗ କଣ୍ଟାବାଞ୍ଜି ଡାକ୍ତରଖାନାକୁ ପରିଦର୍ଶନରେ ଆସି ପାଣି ସମସ୍ୟା ପାଇଁ କ୍ଷୋଭ ପ୍ରକାଶ କରିଛନ୍ତି । କଣ୍ଟାବାଞ୍ଜି ଡାକ୍ତରଖାନାରେ ପାଣିର ସମସ୍ୟା ନେଇ ଅନେକ ସମୟରେ ଅନେକ ସଂଗଠନ ପକ୍ଷରୁ ଦାବି ଉପସ୍ଥାପନ କରାଯାଉଛି । ହେଲେ ଯଥା ପୂର୍ବଂ ତଥା ପରଂ ସ୍ଥିତି ।
