ଭୁବନେଶ୍ବର: ଚାଲିଛି ବାତ୍ୟା ‘ଦାନା’ର ଲ୍ୟାଣ୍ଡଫଲ ପ୍ରକ୍ରିୟା । ଆହୁରି ପ୍ରାଏ ଘଣ୍ଟାଏ ଲ୍ୟାଣ୍ଡଫଲ ପ୍ରକ୍ରିୟା ଚାଲିବ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି । ଲ୍ୟାଣ୍ଡଫଲ ପରେ ବାତ୍ୟା ‘ଦାନା’ର ପ୍ରକୋପ କମିଯିବ ବୋଲି ଯଦି ଆଶା କରୁଛନ୍ତି ତେବେ ଭୁଲ । ଆଜି ଦିନସାରା ଘାଣ୍ଟିବ ବାତ୍ଯା ଦାନା । କାରଣ ବଡ଼କଥା ହେଲା ବାତ୍ୟା ସ୍ଥଳଭାଗ ଛୁଇଁବା ପରେ ପଶ୍ଚିମବଙ୍ଗ ଓ ଝାଡ଼ଖଣ୍ଡ ମୁହାଁ ହୋଇନାହିଁ । ସ୍ଥଳଭାଗ ଛୁଇଁବା ପରେ ଉତ୍ତର ଓଡ଼ିଶା ଉପକୂଳ ଅତିକ୍ରମ କରୁଛି ବାତ୍ଯା ।

ମଧ୍ଯାହ୍ନରେ ଦିଗ ପରିବର୍ତ୍ତନ କରି ପଶ୍ଚିମ ଓ ଉତ୍ତର ପଶ୍ଚିମ ଦିଗରେ ଗତିକରି କ୍ରମଶଃ ଦୁର୍ବଳ ହୋଇ ସାମୁଦ୍ରିକ ଝଡ଼ରେ ପରିଣତ ହେବ । ଧାମରା ନିକଟରେ ପ୍ରବେଶ କରିବା ପରେ ଯାଜପୁର, ଢେଙ୍କାନାଳ, ଅନୁଗୁଳ, ନୟାଗଡ଼, ବୌଦ୍ଧ, ସୁବର୍ଣ୍ଣପୁର ଦେଇ ଆଭ୍ୟନ୍ତରୀଣ ଓଡ଼ିଶାରେ ପଶୁଛି । ଫଳରେ ୧୧ ଜିଲ୍ଲାରେ ଅତିପ୍ରବଳ ବର୍ଷା ସମ୍ଭାବନା ରହିଛି । ଜଗତସିଂହପୁର, କେନ୍ଦ୍ରାପଡ଼ା, କଟକ, ଭଦ୍ରକ, ଯାଜପୁର, ବାଲେଶ୍ବର ଓ ମୟୂରଭଞ୍ଜ ଜିଲ୍ଲାରେ ଅତିରୁ ଅତିପ୍ରବଳ ବର୍ଷା ହେଉଛି ।

ପୁରୀ, ଖୋର୍ଦ୍ଧା, କେନ୍ଦୁଝର, ନୟାଗଡ଼ ଓ ଢେଙ୍କାନାଳ ଜିଲ୍ଲାର ଅଧିକାଂଶ ସ୍ଥାନରେ ପ୍ରବଳରୁ ଅତିପ୍ରବଳ ବର୍ଷା ଓ ଗଞ୍ଜାମ, ବୌଦ୍ଧ, ଅନୁଗୁଳ, ଦେବଗଡ଼, ସମ୍ବଲପୁର, ଝାରସୁଗୁଡ଼ା, ସୁନ୍ଦରଗଡ଼ ଓ କନ୍ଧମାଳ ଜିଲ୍ଲାରେ ପ୍ରବଳ ବର୍ଷା ହେଉଛି । ଯାଜପୁର, ଭଦ୍ରକ, ପୁରୀ, ଢେଙ୍କାନାଳ, ଖୋର୍ଦ୍ଧା, କଟକ, ଜଗତସିଂହପୁର, କେନ୍ଦ୍ରାପଡ଼ା ଓ ଅନୁଗୁଳର କେତେକ ସ୍ଥାନରେ ୨୦ ସେ.ମି.ରୁ ଅଧିକ ବର୍ଷା ହୋଇପାରେ ।

କେନ୍ଦୁଝର, ମୟୂରଭଞ୍ଜ, ବାଲେଶ୍ବର, ନୟାଗଡ଼, ବୌଦ୍ଧ ଓ ସୁବର୍ଣ୍ଣପୁରରେ ପ୍ରବଳରୁ ଅତିପ୍ରବଳ ଏବଂ ଗଞ୍ଜାମ, କନ୍ଧମାଳ, ସମ୍ବଲପୁର, ଝାରସୁଗୁଡ଼ା, ଦେବଗଡ଼ ଓ ସୁନ୍ଦରଗଡ଼ରେ ପ୍ରବଳ ବର୍ଷା ହେବ ବୋଲି ପାଣିପାଗ ବିଭାଗ ଆକଳନ କରିଛି । ପୁରୀ, ଧାମରା, ଚାନ୍ଦବାଲି ଓ ପାରାଦୀପ ବନ୍ଦରରେ ଗ୍ରେଟ୍ ଡେଞ୍ଜର ସିଗ୍ନାଲ୍ ନମ୍ବର ଜାରି ହୋଇଛି । ଉପକୂଳବର୍ତ୍ତୀ ଜିଲ୍ଲା କେନ୍ଦ୍ରାପଡ଼ା, ଭଦ୍ରକ, ବାଲେଶ୍ବର ଉପକୂଳରେ ସମୁଦ୍ର ଜୁଆର ୧ରୁ ୨ ମିଟର ଅଧିକ ଉଚ୍ଚ ରହିବ । ପ୍ରବଳ ବର୍ଷା ଯୋଗୁଁ ବନ୍ୟା ପରିସ୍ଥିତି ମଧ୍ୟ ଉପୁଜି ପାରେ । ରାଜ୍ୟର ୧୬ ଜିଲ୍ଲା ଅନୁଗୁଳ, ବାଲେଶ୍ବର, ବୌଦ୍ଧ, ଭଦ୍ରକ, କଟକ, ଢେଙ୍କାନାଳ, ଗଜପତି, ଗଂଜାମ, ଜଗତସିଂହପୁର, ଯାଜପୁର, କନ୍ଧମାଳ, କେନ୍ଦୁଝର, ଖୋର୍ଦ୍ଧା, ମୟୂରଭଂଜ, ନୟାଗଡ଼ ଓ ପୁରୀରେ ମଧ୍ୟମ ଧରଣର ବନ୍ୟା ହୋଇପାରେ ।

ଭୁବନେଶ୍ବର: ଭୟଙ୍କର ରୂପ ନେଇ ସ୍ଥଳଭାଗ ଅତିକ୍ରମ କରୁଛି ବାତ୍ଯା ‘ଦାନା’ । ଜାରି ରହିଛି ଭୀଷଣ ବାତ୍ଯାର ଲ୍ଯାଣ୍ଡଫଲ୍ ପ୍ରକ୍ରିୟା । ହବାଳିଖଟିରେ ସ୍ଥଳଭାଗ ଛୁଇଁଲା ବାତ୍ଯା ‘ଦାନା’ । ରାତି ୧୨ଟା ୫ ମିନିଟରେ ଆରମ୍ଭ ହୋଇଥିଲା ଲ୍ୟାଣ୍ଡଫଲ । ଆଉ ପ୍ରାଏ ଘଣ୍ଟାଏ ଭିତରେ ସରିବ ଲ୍ଯାଣ୍ଡଫଲ୍ ପ୍ରକ୍ରିୟା ।

ବାତ୍ୟା ‘ଦାନା’ ଭିତରକନିକାରେ ତାଣ୍ଡବ ରଚୁଛି । ଉଗ୍ରରୂପ ଧାରଣ କରିଛି ସମୁଦ୍ର । ପ୍ରାୟ ୩ ମିଟରର ଜୁଆର ସମୁଦ୍ରରେ ଉଠୁଛି । ଘଣ୍ଟାପ୍ରତି ୧୦୦ରୁ ୧୨୦ କି.ମି. ବେଗରେ ପବନ ବୋହିଛି । କେତେକ ସ୍ଥାନରେ ପବନର ବେଗ ୧୨୫ କି.ମି. ପର୍ଯ୍ୟନ୍ତ ପହଞ୍ଚିଥିଲା ।

ଦୀର୍ଘ ସମୟ ପର୍ଯ୍ଯନ୍ତ ପବନ ସହିତ ପ୍ରବଳ ବର୍ଷା ଜାରି ରହିଥିଲା । ପବନରେ ଅନେକ ବଡ଼ବଡ଼ ଗଛ ଉପୁଡ଼ି ପଡ଼ିଥିବାବେଳେ ଘର ମଧ୍ଯ କ୍ଷତିଗ୍ରସ୍ତ ହୋଇଛି । ଦାନା ଦ୍ବାରା ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁର ଓ ବାଲେଶ୍ବର ଜିଲ୍ଲାରେ ବ୍ୟାପକ କ୍ଷତି ଘଟିଛି । ଉପକୂଳବର୍ତ୍ତୀ କିଛି ଗାଁରେ କଚ୍ଚା ତଥା ମାଟି କାନ୍ଥ ଘର ଭାଙ୍ଗିବା ସହ ଚାଳଘର ଗୁଡ଼ିକର ଛପର ଉଡ଼ିଯାଇଛି । ଗଛଡାଳ ପଡ଼ି କିଛି ସ୍ଥାନରେ ବିଦ୍ୟୁତ୍ ଓ ଟେଲିଫୋନ୍ ତାର ଛିଣ୍ଡିଛି । ପିଚୁ ଓ ମାଟି ରାସ୍ତା ଧୋଇଯାଇଛି । ବାତ୍ୟା ଯେଉଁ ସ୍ଥାନରେ ସ୍ଥଳଭାଗ ଛୁଇଁଛି ସେଠାରେ ବଡ଼ ବଡ଼ ଗଛ ଉପୁଡ଼ି ପଡ଼ିଛି । ବ୍ୟାପକ ପରିମାଣରେ ଧାନ ଫସଲ କ୍ଷତି ହୋଇଥିବା ସୂଚନା ମିଳିଛି ।

ଭିତରକନିକା ଜାତୀୟ ଉଦ୍ୟାନରେ ବନ୍ୟପ୍ରାଣୀମାନେ ପ୍ରଭାବିତ ହୋଇଥିବା ଆଶଙ୍କା କରାଯାଉଛି । ସେହିପରି ସମୁଦ୍ର କୂଳରେ ଥିବା ଅନ୍ୟ ଜଙ୍ଗଲରେ ମଧ୍ୟ ଜୀବଜନ୍ତୁ ପ୍ରଭାବିତ ହୋଇଛନ୍ତି । ଜୀବଜନ୍ତୁମାନେ କେତେ ପ୍ରଭାବିତ ହୋଇଛନ୍ତି ସେନେଇ ସ୍ପଷ୍ଟ ସୂଚନା ଯଦିଓ ମିଳିପାରିନି ତଥାପି ଗୁରୁତର ଭାବେ ପ୍ରଭାବିତ ହୋଇଥିବା ଆଶଙ୍କା କରାଯାଉଛି ।

ବାତ୍ଯା ପରେ ବିଭିନ୍ନ ସ୍ଥାନରେ ରେସ୍କ୍ଯୁ ଅପରେସନ ଆରମ୍ଭ ହୋଇଯାଇଛି । ଅଗ୍ନିଶମ ବାହିନୀ, ଓଡ୍ରାଫ୍ ଓ ଏନଡିଆରଏଫର ଟିମ୍ ଉଦ୍ଧାର କାର୍ଯ୍ଯରେ ନିୟୋଜିତ ହୋଇଛନ୍ତି । ରାସ୍ତାରୁ ଗଛ ହଟାଇବା କାମ ଆରମ୍ଭ ହୋଇଯାଇଛି । ବିଭିନ୍ନ ସ୍ଥାନରେ ବିଦ୍ଯୁତ ସରବରାହ ବନ୍ଦ ରହିଛି । ଯୁଦ୍ଧକାଳୀନ ଭିତ୍ତିରେ ସ୍ଥିତି ସ୍ବାଭାବିକ ପାଇଁ ରେସ୍କ୍ଯୁ ଟିମ୍ ଲାଗି ପଡ଼ିଛନ୍ତି । ବାତ୍ୟା ଓ ବାତ୍ୟା ପରବର୍ତ୍ତୀ ସ୍ଥିତିକୁ ସ୍ବାଭାବିକ କରିବା ପାଇଁ କସରତ କରୁଛି ପ୍ରଶାସନ । ୧୪ଟି ଜିଲ୍ଲାରେ ହେଲ୍ପଲାଇନ୍ ନମ୍ବର ବ୍ୟବସ୍ଥା କରାଯାଇଛି । ବାତ୍ୟା ଆଶ୍ରୟସ୍ଥଳୀରେ ପ୍ରାୟ ୪ ଲକ୍ଷ ଲୋକଙ୍କୁ ରଖି ଖାଇବା-ପିଇବାକୁ ଦିଆଯାଉଛି । ବର୍ଷା କମିବା ପରେ ବାତ୍ୟା ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ ।

ଭୁବନେଶ୍ବର: ଆରମ୍ଭ ହେଲା ବାତ୍ୟା ‘ଦାନା’ର ଲ୍ୟାଣ୍ଡଫଲ୍ ପ୍ରକ୍ରିୟା । ସକାଳ ପର୍ଯ୍ୟନ୍ତ ଚାଲିବ ଏହି ଲ୍ୟାଣ୍ଡଫଲ୍ ପ୍ରକ୍ରିୟା । ଦାନାର ଲ୍ୟାଣ୍ଡଫଲ ସହ ବଢ଼ିବାରେ ଲାଗିଛି ବର୍ଷା ସାଙ୍ଗକୁ ପବନର ପରିମାଣ । ସମୁଦ୍ରରେ ଉଠୁଛି ଉଚ୍ଚ ଜୁଆର ।

ଭୟଙ୍କର ରୂପ ନେଇ ବାତ୍ୟା ଦାନା ଲ୍ୟାଣ୍ଡଫଲ କରିବା ଆଣମ୍ଭ କରିଛି । ପୂର୍ବାନୁମାନ ଅଣଚାଷ ପବନ ବହିବା ଆରମ୍ଭ କରି ଦେଇଛି । ଦାନା ପ୍ରଭାବରେ ଉପକୂଳ ଓଡ଼ିଶାରେ ପ୍ରବଳ ବେଗରେ ପବନ ବହିବା ଆରମ୍ଭ କରିଛି । ପ୍ରାୟ ୨ରୁ ୩ ଘଣ୍ଟା ଲ୍ୟାଣ୍ଡଫଲ୍ ପ୍ରକ୍ରିୟା ଚାଲିବ । ବାତ୍ୟାର ଆଖି ସ୍ଥଳଭାଗ ଛୁଇଁବା ପରେ ମଧ୍ୟ ପ୍ରାୟ ୩ ଘଣ୍ଟା ବର୍ଷା, ପବନ ଜାରି ରହିବ ।