ଭୁବନେଶ୍ୱର: ଭରତପୁର ଥାନା ଲଜ୍ଜା ଘଟଣାରେ କାଲି ଗୁଜରାଟ ଯିବ କ୍ରାଇମବ୍ରାଞ୍ଚ ଟିମ୍। ଅଭିଯୁକ୍ତ ପୋଲିସ ଅଧିକାରୀଙ୍କ ପଲିଗ୍ରାଫ, ବ୍ରେନ୍ ମ୍ୟାପିଂ ଓ ନାର୍କୋ ଟେଷ୍ଟ ହେବ। ତେଣୁ କ୍ରାଇମବ୍ରାଞ୍ଚ ସେହି ପୋଲିସ ଅଧିକାରୀଙ୍କୁ ଗୁଜରାଟ ଗାନ୍ଧିନଗର ନେବ।
ସୋମବାର ଦିନ ନିଲମ୍ଵିତ ଆଇଆଇସି ଦୀନକୃଷ୍ଣ ମିଶ୍ରଙ୍କ ପଲିଗ୍ରାଫ, ବ୍ରେନ୍ ମ୍ୟାପିଂ ଓ ନାର୍କୋ ଟେଷ୍ଟ କରାଯିବ। ବାକି ୪ ପୋଲିସଙ୍କ ପଲିଗ୍ରାଫ ଟେଷ୍ଟ ହେବ। ଏହି ସବୁ ରିପୋର୍ଟ ଆସିବା ପରେ ତଦନ୍ତକୁ ନୂଆ ଦିଗ ମିଳିବ ବୋଲି ଆଶା କରାଯାଉଛି। ଅନୁସନ୍ଧାନରେ ମଧ୍ୟ ଅଗ୍ରଗତି ହେବ। ଜଣାପଡ଼ିବ କିଏ ସତ କହୁଛି, କିଏ ମିଛ କହୁଛି।
ଭୁବନେଶ୍ୱର: ନର୍ସିଂ ଷ୍ଟାଫ ଧର୍ମଘଟକୁ ଦୃଷ୍ଟିରେ ରଖି କ୍ୟାପିଟାଲ ହସ୍ପିଟାଲ ଜାରି କଲା ନିର୍ଦ୍ଦେଶ ନାମା। ହସ୍ପିଟାଲ ମଧ୍ୟରେ ଆଡ଼ମିଶନ ବନ୍ଦ। ଜରୁରୀକାଳୀନ OT ଛଡ଼ା ଅନ୍ୟ ସେବା ବନ୍ଦ ବୋଲି ନିର୍ଦ୍ଦେଶ ଦିଆଯାଇଛି। ଆଶ୍ଚର୍ଯ୍ୟର ବିଷୟ ରୋଗୀ ମାନଙ୍କ ସଂଖ୍ୟା ୱାର୍ଡରୁ କମାଇବା ପାଇଁ ରୋଗୀଙ୍କୁ ଡିସଚାର୍ଜ କରିବାକୁ ଦିଆଯାଇଛି ନିର୍ଦ୍ଦେଶ। ନର୍ସିଂ ଅଫିସରଙ୍କ କାର୍ଯ୍ୟବନ୍ଦ ଆନ୍ଦୋଳନର ବଡ଼ ଧରଣର ପ୍ରଭାବ ପରିଲକ୍ଷିତ ହୋଇଛି କ୍ୟାପିଟାଲ ହସ୍ପିଟାଲରେ ।
କ୍ୟାପିଟାଲ ହସ୍ପିଟାଲରେ ସମସ୍ତ ସେଲେକ୍ଟିଭ ଅପରେସନ ବନ୍ଦ କରାଯାଇଥିବା ବେଳେ କେବଳ ଏମର୍ଜେନ୍ସି ଅପରେସନ କରାଯାଉଛି। ୧୮୦ ନର୍ସିଂ ଅଫିସର ଆନ୍ଦୋଲୋନରେ ରହିଛନ୍ତି।
ନନ୍ଦିଘୋଷ ବ୍ୟୁରୋ : ଥମିବାର ନାଁ ନେଉନାହିଁ ତିରୁପତି ଲଡୁ ବିବାଦ। ରାଜ୍ଯ ନିୟନ୍ତ୍ରଣରୁ ମନ୍ଦିରଗୁଡିକୁ ମୁକ୍ତ କରିବା ପ୍ରସଙ୍ଗ ନେଇ ବିଜେପିକୁ ଟାର୍ଗେଟ କଲେ ଶିବସେନା ୟୁବିଟି ରାଜ୍ଯସଭା ସଦସ୍ଯ ପ୍ରିୟଙ୍କା ଚତୁର୍ବେଦୀ । ଆସନ୍ତା ସଂସଦ ଅଧିବେଶନରେ ଏନେଇ ଏକ ବିଲ୍ ବିଜେପି ସରକାର ଆଣୁ ବୋଲି ଦାବି କରିଛନ୍ତି ପ୍ରିୟଙ୍କା । ତିରୁମାଲା ତିରୁପତି ମନ୍ଦିରରେ ପ୍ରସ୍ତୁତ ଲଡୁରେ ବିଭିନ୍ନ ପ୍ରାଣୀଙ୍କ ଚର୍ବି ମିଶ୍ରଣ ଅଭିଯୋଗ କ୍ରମେ ସେ କହିଛନ୍ତି- ଏହି ଘଟଣାରେ ଯିଏ ଦୋଷୀ ତାକୁ ଦଣ୍ଡ ଦିଆଯାଉ । ଆସନ୍ତା ସଂସଦ ଅଧିବେଶନରେ ଦେଶର ସମସ୍ତ ମନ୍ଦିରର ଅଡିଟ ଲାଗି ଦଳ ଦାବି କରିବ ।
ସେପଟେ ତିରୁପତି ମନ୍ଦିରକୁ ଆଜି ପୂର୍ବତନ ମୁଖ୍ଯମନ୍ତ୍ରୀ ଜଗନ ମୋହନ ରେଡ୍ଡୀ ଯେଉଁ ଗସ୍ତ କାର୍ଯ୍ୟକ୍ରମ କରିଥିଲେ ତାହାକୁ ବାତିଲ କରିଛନ୍ତି। ତାଙ୍କ ଗସ୍ତକୁ ବାତିଲ ଲାଗି ସରକାର ନିର୍ଦ୍ଦେଶନାମା ଜାରି କରିଛନ୍ତି ବୋଲି ସେ ଅଭିଯୋଗ କରିଛନ୍ତି। ମନ୍ଦିର ଦର୍ଶନ ପୂର୍ବରୁ ଅଣହିନ୍ଦୁଙ୍କ ଲାଗି ଉଦ୍ଦିଷ୍ଟ ଏକ ଘୋଷଣାନାମାରେ ଜଗନ ସ୍ବାକ୍ଷର କରନ୍ତୁ ବୋଲି ଦାବି କରିଥିଲେ ଟିଡିପି ଓ ବିଜେପି । ଦୁଇ ଦଳ କହିଛନ୍ତି ଟିଟିଡିର ନିୟମାବଳୀ ଅନୁସାରେ ବିଦେଶୀ ଓ ଅଣହିନ୍ଦୁମାନେ ମନ୍ଦିର ଦର୍ଶନ କରିବା ପୂର୍ବରୁ ଭଗବାନ ଭେଙ୍କଟଶ୍ବରଙ୍କ ଉପରେ ତାଙ୍କର ବିଶ୍ବାସ ରହିଛି ବୋଲି ପ୍ରଥମେ ଘୋଷଣା କରିବା ଦରକାର ।
ସେପଟେ ଅଯୋଧ୍ଯା ରାମମନ୍ଦିରରେ ବଣ୍ଟନ କରାଯାଉଥିବା ପ୍ରସାଦର ଲାବରେଟୋରୀ ଟେଷ୍ଟିଂ ପାଇଁ ପଠାଯାଇଛି । ତେଣେ ଆନ୍ଧ୍ରପ୍ରଦେଶ ବିଜୟୱାଡାରେ ତାତିଛନ୍ତି ଭକ୍ତ। ତିରୁପତି ମନ୍ଦିର ଅପବିତ୍ର ହୋଇଥିବା ଅଭିଯୋଗ କରି ମନ୍ଦିରରେ ସ୍ବତନ୍ତ୍ର ପୂଜାର୍ଚ୍ଚନା କରିଛନ୍ତି ଭକ୍ତ।
ନୂଆଦିଲ୍ଲୀ: ଜମ୍ମୁ କଶ୍ମୀରରେ ନିର୍ବାଚନ ମାହୋଲ ସରଗରମ ଥିବା ବେଳେ ଏକ ବଡ ଖବର ସାମ୍ନାକୁ ଆସିଛି । କୁଲଗାମରେ ପୁଣି ଥରେ ସୁରକ୍ଷାକର୍ମୀ ଓ ଆତଙ୍କବାଦୀ ମୁହାଁମୁହିଁ ହୋଇଛନ୍ତି। କୁଲଗାମ ଜିଲ୍ଲାର ଦେବସର ଅଞ୍ଚଳର ଆଦିଗାମ ଗାଁରେ ଦୁଇ ଆତଙ୍କବାଦୀ ଲୁଚିଥିବା ଖବର ପାଇ ଆଜି ଭୋରରୁ ସର୍ଚ୍ଚ ଅପରେସନ ଆରମ୍ଭ ହୋଇଛି।
ସୂଚନା ମୁତାବକ, ଆତଙ୍କବାଦୀଙ୍କ ଉପସ୍ଥିତି ସମ୍ପର୍କରେ ସୁରକ୍ଷାକର୍ମୀ ଗୁପ୍ତଚର ଭାବେ ଖବର ପାଇଥିଲେ । ସୂଚନା ପାଇବା ପରେ ଏହି ଅଞ୍ଚଳକୁ କର୍ଡନ କରାଯାଇଥିଲା ଏବଂ ସର୍ଚ୍ଚ ଅପରେସନ୍ ଆରମ୍ଭ ହୋଇଥିଲା। ଏହ ସର୍ଚ୍ଚ ଅପପରେସନରେ ଜମ୍ମୁ କଶ୍ମୀର ପୁଲିସ୍, ସିଆରପିଏଫ ଓ ସଂଯୁକ୍ତ ଟିମ୍ ସାମିଲ ଅଛନ୍ତି। ସୁରକ୍ଷାକର୍ମୀ ଗାଁର ଘର ଘର ତଲାସୀ କରୁଥିବା ବେଳେ ଲୁଚି ରହିଥିବା ଆତଙ୍କବାଦୀ ହଠାତ୍ ଫାୟାରିଂ ଆରମ୍ଭ କରି ଦେଇଥିଲେ। ଏହାପରେ ଏନକାଉଣ୍ଟର ଆରମ୍ଭ ହୋଇଛି । ଏଥିରେ ୩ ଯବାନ ଓ ଜଣେ ପୁଲିସ୍ ଅଧିକାରୀ ଆହତ ହୋଇଛନ୍ତି। ସେମାନଙ୍କୁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଛି।
ରାଉରକେଲା: ରାଉରକେଲା ଇସ୍ପାତ କାରଖାନାରେ ଦୁର୍ଘଟଣା । ଇସ୍ପାତ କାରଖାନାର SMS-୧ ୟୁନିଟରେ ବିସ୍ଫୋରଣ। ତରଳ ଲୁହା ପଡ଼ି ୫ ଶ୍ରମିକ ଗୁରୁତର ହୋଇଛନ୍ତି । ୪ ଜଣ ସ୍ଥାୟୀ କର୍ମଚାରୀ ଓ ଜଣେ ଠିକା କର୍ମଚାରୀ ଗୁରୁତର ହୋଇଥିବା ସୂଚନା ମିଳିଛି। ଗୁରୁତରଙ୍କୁ ଇସ୍ପାତ ଜେନେରାଲ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି।
ନନ୍ଦିଘୋଷ ବ୍ୟୁରୋ: ସାଉଥ ସୁପରଷ୍ଟାର ଜୁନିଅର ଏନଟିଆରଙ୍କ ଫିଲ୍ମ ‘ଦେବରା ପାର୍ଟ -1′ ରିଲଜ ହୋଇସାରିଛି । ପ୍ରଥମ ଦିନରେ ବକ୍ସ ଅଫିସରେ ଧୁମ୍ ମଚେଇଛି ‘ଦେବରା’ । ଥିଏଟରରେ ସୋ’ ହାଉସଫୁଲ ହୋଇଥିବା ବେଳେ ଫିଲ୍ମଟି ଦର୍ଶକଙ୍କ ହୃଦୟକ ଛୁଇଁଛି। ଯାହାକୁ ନେଇ ସୋସିଆଲ ମିଡିଆରେ ପ୍ରତିକ୍ରିୟା ଦେଉଛନ୍ତି ୟୁଜର୍ସ ।
ରିପୋର୍ଟ ଅନୁଯାୟୀ, ‘ଦେବରା’ ପ୍ରଥମ ଦିନରେ ୭୭ କୋଟି ଟଙ୍କା ବ୍ୟବସାୟ କରିଛି। ଏହି ଚଳଚ୍ଚିତ୍ର ତେଲୁଗୁରେ ୬୮.୬ କୋଟି, ହିନ୍ଦୀରେ ୭ କୋଟି, ତାମିଲରେ ୦.୮ କୋଟି, କନ୍ନଡରେ ୩ କୋଟି ଏବଂ ମାଲାୟାଲମରେ ୩ କୋଟି ବ୍ୟବସାୟ କରିଛି। ଏହା ସହିତ ଜୁନିଅର ଏନଟିଆରରଙ୍କ ଏହି ଫିଲ୍ମ ଶାହାରୁଖ ଖାନଙ୍କ ‘ପଠାନ’, ରଣବୀର କପୁରଙ୍କ ‘ଆନିମଲ’ ଏବଂ ଆଲୁ ଅର୍ଜୁନଙ୍କ ‘ପୁଷ୍ପା’ର ପ୍ରଥମ ଦିନର ରୋଜଗାରକୁ ପଛରେ ପକାଇଛି । ବକ୍ସ ଅଫିସରେ ରେକର୍ଡ ସୃଷ୍ଟି କରିଛି ‘ଦେବରା’।
ଶାହାରୁଖ ଖାନଙ୍କ ପଠାନ ଫିଲ୍ମ ପ୍ରଥମ ଦିନରେ ୫୫ କୋଟି ବ୍ୟବସାୟ କରିଥିବା ବେଳେ ରଣବୀର କାପୁରଙ୍କ ‘ଆନିମଲ୍’ ଫିଲ୍ମ ପ୍ରଥମ ଦିନରେ ୫୦ କୋଟି ଇନକମ୍ କରିଥିଲା । ଅଲ୍ଲୁ ଅର୍ଜୁନଙ୍କ ଫିଲ୍ମ ପୁଷ୍ପା ପ୍ରଥମ ଦିନରେ ୫୨.୫୦ କୋଟି ବ୍ୟବସାୟ କରିଥିଲା । ଏହାସହିତ ଜୁନିଅର ଏନଟିଆରଙ୍କ ଫିଲ୍ମ ‘ଦେବରା’ ଫିଲ୍ମ ଏହି ୩ଟି ଫିଲ୍ମକୁ ପଛରେ ପକାଇ ନିଜର ରେକର୍ଡ ସୃଷ୍ଟି କରିଛି । ଚଳଚ୍ଚିତ୍ରର ଡ୍ୟାନ୍ସ ଏବଂ ଆକ୍ସନ୍ କୋରିଓଗ୍ରାଫି ବହୁତ ପ୍ରଶଂସା କରାଯାଉଛି । ଏହି ଫିଲ୍ମ କେବଳ ଦେଶରେ ନୁହେଁ ବିଦେଶରେ ମଧ୍ୟ ବହୁତ ପସନ୍ଦ କରାଯାଉଛି ।
‘ଦେବରା’ ଫିଲ୍ମକୁ ଦର୍ଶକ ପସନ୍ଦ କରୁଥିବା ବେଳେ ସୋସିଆଲ ମିଡିଆରେ ଅନେକ ପ୍ରତିକ୍ରିୟା ମଧ୍ୟ ଦେଇଛନ୍ତି । ନିର୍ଦ୍ଦେଶକ କୋର୍ଟଲା ଶିବା ‘ଦେବରା’ ଫିଲ୍ମର ନିର୍ଦ୍ଦେଶନା ଦେଇଛନ୍ତି । ଏହି ଫିଲ୍ମରେ ଜୁନିଅର ଏନଟିଆର, ସୈଫ ଅଲି ଖାନ ଏବଂ ଜାହ୍ନବୀ କପୁରଙ୍କୁ ଦେଖିବାକୁ ମିଳିଛି । ତେବେ ଏହି ଫିଲ୍ମ ସହ ପ୍ରଥମ ଥର ପାଇଁ ଜୁନିଅର ଏନଟିଆରଙ୍କ ସହ ଜାହ୍ନବୀ ଓ ସୈଫ ନଜର ଆସିଥିବା ବେଳେ ଏହି ଫିଲ୍ମ ସହ ଉଭୟ ତେଲୁଗୁ ଇଣ୍ଡଷ୍ଟ୍ରିରେ ଡେବ୍ୟୁ କରିଛନ୍ତି ।
ନୂଆଦିଲ୍ଲୀ: ଅଡୁଆରେ ଅର୍ଥମନ୍ତ୍ରୀ ନିର୍ମଳା ସୀତାରମଣ । ନିର୍ମଳା ସୀତାରମଣଙ୍କ ନାଁରେ ରୁଜୁ ହେବ ମାମଲା । ମାମଲା ରୁଜୁ ପାଇଁ ନିର୍ଦ୍ଦେଶ ଦେଲେ ବେଙ୍ଗାଲୁରୁ କୋର୍ଟ । ନିର୍ବାଚନୀ ବଣ୍ଡ୍ ଯୋଗେ ଜବରଦସ୍ତି ଟଙ୍କା ଆଦାୟ କରାଯାଇଥିବା ଅଭିଯୋଗରେ ଏହି ମାମଲା ରୁଜୁ ହେବ ।
ଜନାଧିକାର ସଂଘର୍ଷ ସଙ୍ଗଠନ ପକ୍ଷରୁ ଏନେଇ ସୀତାରମଣ ଓ ଅନ୍ୟ କିଛି ବ୍ୟକ୍ତିଙ୍କ ନାମରେ ଅଭିଯୋଗ ହୋଇଥିଲା। ଏହାପରେ ବେଙ୍ଗାଲୁରୁ ସ୍ଥିତ ଜନପ୍ରତିନିଧିର ବିଶେଷ ଅଦାଲତ ସୀତାରମଣଙ୍କ ବିରୋଧରେ ମାମଲା ରୁଜୁ ପାଇଁ ଆଦେଶ ଦେଇଛନ୍ତି। କୋର୍ଟଙ୍କ ନିର୍ଦ୍ଦେଶ ଆଧାରରେ ତିଳକ ନଗର ପୁଲିସ୍ ଏବେ ସୀତାରମଣ ଓ ଅନ୍ୟମାନଙ୍କ ନାଁରେ ମାମଲା ରୁଜୁ କରିବ ।
ରାଜନୀତିକ ଦଳମାନଙ୍କୁ ଅର୍ଥ ଦାନ କରିବାର ଏକ ମାଧ୍ୟମ ହେଉଛି ନିର୍ବାଚନୀ ବଣ୍ଡ। କେନ୍ଦ୍ର ସରକାର ୨୦୧୭ରେ ନିର୍ବାଚନ ବଣ୍ଡ ସ୍କିମ୍ ଘୋଷଣା କରିଥିଲେ। ଏହି ସ୍କିମ୍ ୨୯ ଜାନୁୟାରୀ ୨୦୧୮ରେ ଆଇନଗତ ଭାବରେ କାର୍ଯ୍ୟକାରୀ ହୋଇଥିଲା।
ନୂଆଦିଲ୍ଲୀ: ଦିଲ୍ଲୀର ରଙ୍ଗପୁରୀ ଅଞ୍ଚଳରେ ଚାଞ୍ଚଲ୍ୟ। ପିତାଙ୍କ ସହ ୪ ଦିବ୍ୟାଙ୍ଗ ଝିଅଙ୍କ ଆତ୍ମହତ୍ୟା। ଏକ ଭଡାଘରୁ ବାପା ଏବଂ ୪ ଝିଅଙ୍କ ମୃତଦେହ ଉଦ୍ଧାର ହୋଇଛି ।
ସୂଚନା ଅନୁଯାୟୀ, ବିହାରର ୫୦ ବର୍ଷୀୟ ହୀରାଲାଲ ତାଙ୍କ ପରିବାର ସହ ଦିଲ୍ଲୀ ରଙ୍ଗପୁରୀ ଗାଁରେ ଏକ ଭଡାଘରେ ରହୁଥିଲେ। ସେଠାରେ ହୀରାଲାଲ ରଙ୍ଗମିସ୍ତ୍ରୀ କାମ କରନ୍ତି । ଗୋଟେ ବର୍ଷ ପୂର୍ବେ କ୍ୟାନ୍ସରରେ ତାଙ୍କ ସ୍ତ୍ରୀ ମୃତ୍ୟୁବରଣ କରିଥିଲେ । ତାଙ୍କ ପରିବାରରେ ୧୮ ବର୍ଷର ଝିଅ ନିତୁ, ୧୫ ବର୍ଷର ଝିଅ ନିଶି, ୧୦ ବର୍ଷର ଝିଅ ନିରୁ ଏବଂ ୮ ବର୍ଷର ଝିଅ ନିଧି ସହ ରହୁଥିଲେ । ଝିଅମାନେ ଦିବ୍ୟାଙ୍ଗ ହେବା ଯୋଗୁଁ ଚଲାବୁଲା କରିବାରେ ଅସମର୍ଥ ଥିଲେ ଯାହାକୁ ନେଇ ହୀରାଲାଲ ସବୁବେଳେ ଚିନ୍ତାରେ ରହୁଥିଲେ ।
ସ୍ତ୍ରୀର ମୃତ୍ୟୁ ପରେ ହୀରାଲାଲ ଭାଙ୍ଗିପଡିଥିଲେ । ଏହାପରେ ପିଲାଙ୍କର ସମସ୍ତ ଦାୟୀତ୍ୱ ହୀରାଲାଲଙ୍କ ଉପରକୁ ଆସିଥିଲା । ଏବଂ ରୋଜଗାର କରି ପରିବାର ଚଳାଇବା ହୀରାଲାଲଙ୍କ ପକ୍ଷରେ ଅସମ୍ଭବ ହୋଇପଡିଥିଲା । ଯାହାକୁ ନେଇ ହୀରାଲାଲ ଆତ୍ମହତ୍ୟା କରିବାର ଚରମ ନିଷ୍ପତ୍ତି ନେଇଥିଲେ । ହାରୀଲାଲ ତାଙ୍କ ୪ ଝିଅଙ୍କ ସହ ବିଷ ପିଇ ଆତ୍ମହତ୍ୟା କରିଥିବା ଦିଲ୍ଲୀ ପୋଲିସ ସୂଚନା ଦେଇଛି ।
ରାଉରକେଲା: ରାଉରକେଲା ସହରରେ ପୁଣି ଲଜ୍ଜା। ଜଣେ ଶିଶୁ କନ୍ୟାକୁ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି। ୧୧ ବର୍ଷର ଶିଶୁ କନ୍ୟାକୁ ଦୁଷ୍କର୍ମ କରାଯାଇଥିବା ଅଭିଯୋଗ। ଘର ମାଲିକଙ୍କ ଶଳା ଶିଶୁ କନ୍ୟାକୁ ଦୁଷ୍କର୍ମ କରିଥିବା ଅଭିଯୋଗ ହୋଇଛି। ଉଦିତନଗର ଥାନାରେ ଅଭିଯୋଗ ପରେ ପୋଲିସ ପକ୍ଷରୁ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଛି।
ଅନ୍ୟପଟେ ଅସୁରକ୍ଷିତ ପାଲଟିଛି ରାଉରକେଲା ସହର? ଦିନକୁ ଦିନ ସହରରେ ଅପରାଧ ବଢିଚାଲିଛି । ଗତ କିଛିଦିନ ଭିତରେ ୨ଟି ସମାନ ଘଟଣା ସାମ୍ନାକୁ ଆସିଥିଲା । ରାଉରକେଲାରେ ଆଇନ ଶୃଙ୍ଖଳାକୁ ନେଇ ସାଧାରଣରେ ପ୍ରଶ୍ନ ଉଠିିଛି ।
ନନ୍ଦିଘୋଷ ବ୍ୟୁରୋ: ଦ୍ବିତୀୟ ଦିନରେ ନର୍ସିଂ କର୍ମଚାରୀ ସଂଘର କାର୍ଯ୍ୟବନ୍ଦ ଆନ୍ଦୋଳନ। ରୋଗୀ ସେବା ଉପରେ ଏହାର ଗୁରୁତର ପ୍ରଭାବ ପଡିଛି। ଭୁବନେଶ୍ବରରୁ ବ୍ରହ୍ମପୁର, ରାଉରକେଲାରୁ ସମ୍ବଲପୁର ସବୁଠି ନର୍ସିଂ କର୍ମଚାରୀ ସଂଘର କାର୍ଯ୍ୟବନ୍ଦ ଆନ୍ଦୋଳନ। ସମସ୍ତ ହସ୍ପିଟାଲରେ ଇଞ୍ଜେକ୍ସନ ଦେବାକୁ ଖୋଜିଲେ ବି ନର୍ସ ମିଳୁନାହାନ୍ତି। ରାଜ୍ଯରେ କାର୍ଯ୍ଯବନ୍ଦ ଆନ୍ଦୋଳନକୁ ଓହ୍ଲାଇଛନ୍ତି ଓଡ଼ିଶା ନର୍ସିଂ କର୍ମଚାରୀ ସଂଘ । ଫଳରେ ସ୍ବାସ୍ଥ୍ଯ ସେବା ସମ୍ପୂର୍ଣ୍ଣ ଭାବେ ଭୁଶୁଡ଼ି ପଡ଼ିଛି। ରୋଗୀସେବା ଗୁରୁତର ଭାବେ ପ୍ରଭାବିତ ହୋଇଛି ।
ଗତ ବୁଧବାର ଓ ଗୁରୁବାର ଆନ୍ଦୋଳନ କରିଥିଲେ ବି ଜରୁରୀକାଳୀନ ସେବା ଯୋଗାଉଥିଲେ ନର୍ସ । ହେଲେ ସରକାର ଦାବି ନଶୁଣିବାରୁ ଶୁକ୍ରବାରଠୁ ସମ୍ପୂର୍ଣ୍ଣ କାର୍ଯ୍ଯବନ୍ଦ ଆନ୍ଦୋଳନ କରିଛନ୍ତି ନର୍ସ । ବିକ୍ଷୋଭରେ ପ୍ରାୟ ୧୫ ହଜାର ନର୍ସ ସାମିଲ ହୋଇଛନ୍ତି । ୨୦୧୩ ପୂର୍ବରୁ ନିଯୁକ୍ତି ପାଇଥିବା ନର୍ସିଂ ଅଫିସର ମାନଙ୍କର ୬ ବର୍ଷ ଚୁକ୍ତି ଭିତ୍ତିକ ଅବଧିକୁ ମୂଳ ଚାକିରି ସୀମାରେ ମିଶାଇ ପଦୋନ୍ନତି ସହ ସମସ୍ତ ଆର୍ଥିକ ସହାୟତା ଦାବି କରିଛି ସଂଘ । ଏହାସହ ବରିଷ୍ଠତା ଭିତ୍ତିରେ ପଦୋନ୍ନତି, CHO ପଦବୀରୁ ଫେରାଇ ଆଣି କ୍ୟାଡ଼ର ପୋଷ୍ଟ, ମେରୁଦଣ୍ଡ ଆଘାତ ଚିକିତ୍ସା କେନ୍ଦ୍ର ନର୍ସିଂ ଅଫିସର ମାନଙ୍କୁ ସ୍ଥାୟୀ, ଠିକା ସଂସ୍ଥା ଦ୍ୱାରା ନର୍ସିଂ ଅଫିସର ନିୟୋଜିତ ହୋଇଥିବା ଆଦେଶ ପ୍ରତିହାର ପରି ୧୦ ଦଫା ଦାବି ନେଇ ଆନ୍ଦୋଳନକୁ ଓହ୍ଲାଇଛି ନର୍ସିଂ କର୍ମଚାରୀ ସଂଘ ।
