ନନ୍ଦିଘୋଷ ବ୍ୟୁରୋ: ଦିଲ୍ଲୀ ଉପରାଜ୍ୟପାଳଙ୍କ ବିରୋଧରେ ଆମ ଆଦମୀ ପାର୍ଟିର ସାଂଘାତିକ ଅଭିଯୋଗ। ରାଜ୍ୟପାଳଙ୍କ ନିର୍ଦ୍ଦେଶରେ ମୁଖ୍ୟମନ୍ତ୍ରୀ ଆତିଶୀଙ୍କ ଆସବାବପତ୍ର ସରକାରୀ ବଙ୍ଗଳାରୁ ବାହାର କରିଦିଆଯାଇଥିବା ଅଭିଯୋଗ ହୋଇଛି। ସରକାରୀ ବଙ୍ଗଳାକୁ କବଜା କରିବାକୁ ଏପରି କରାଯାଉଥିବା ଆମ ଆଦମୀ ପାର୍ଟି ଅଭିଯୋଗ କରିଛି। ଉପ ରାଜ୍ୟପାଳଙ୍କ ନିର୍ଦ୍ଦେଶରେ ମୁଖ୍ୟମନ୍ତ୍ରୀ ଆତିଶୀଙ୍କ ଜିନିଷପତ୍ର ତାଙ୍କ ସରକାରୀ ବଙ୍ଗଳାରୁ ବାହାରକୁ ଫିଙ୍ଗି ଦିଆଯାଇଛି ବୋଲି ଆପ ଅଭିଯୋଗ କରିଛି। ଫ୍ଲାଗଷ୍ଟାଫ ରୋଡରେ ଥିବା ସରକାରୀ ବଙ୍ଗଳରେ ଏପରି ଘଟଣା ଘଟିଛି। ମୁଖ୍ୟମନ୍ତ୍ରୀଙ୍କ ସରକାରୀ ବାସଭବନକୁ କବଜା କରିବା ପାଇଁ ବିଜେପି ଷଡ଼ଯନ୍ତ୍ର କରୁଥିବା ଅଭିଯୋଗ କରିଛି ଆପ। ସିଭିଲ ଲାଇନ୍ସର ୬ ଫ୍ଲାଗଷ୍ଟାଫ ରୋଡ୍ରେ ଥିବା ଦିଲ୍ଲୀ ମୁଖ୍ୟମନ୍ତ୍ରୀଙ୍କ ସରକାରୀ ବାସଭବନକୁ ବଳପୂର୍ବକ ଖାଲି କରାଯାଇଛି ବୋଲି ଦିଲ୍ଲୀ ସିଏମଓ ପକ୍ଷରୁ ଏକ ବିବୃତିରେ କୁହାଯାଇଛି । ଉପ ରାଜ୍ୟପାଳ ସକ୍ସେନା ମୁଖ୍ୟମନ୍ତ୍ରୀଙ୍କ ସରକାରୀ ବାସଭବନକୁ ବିଜେପିର ଜଣେ ନେତାଙ୍କୁ ଦେବାକୁ ଚାହୁଁଛନ୍ତି। ଏକାଧିକ ପେଟିରେ ଜିନିଷପତ୍ରକୁ ଟ୍ରଲିରେ ମୁଖ୍ୟମନ୍ତ୍ରୀଙ୍କ ବାସଭବନରୁ ଅନ୍ୟତ୍ର ନିଆଯାଉଥିବା ଦେଖିବାକୁ ମିଳୁଛି। ଜିନିଷ ବାହାର କରିବା ପରେ ବାସଭବନକୁ ବନ୍ଦ କରି ଦିଆଯାଇଛି।
ତୋରଣରେ ଓଡ଼ିଶାର କଳା, ସଂସ୍କୃତି ଓ ଟେରାକୋଟାର ଝଲକ୍
ନନ୍ଦିଘୋଷ ବ୍ୟୁରୋ: ଶାରଦୀୟ ପୂଜା ଲାଗି ଉତ୍ସବ ମୁଖର ରାଜଧାନୀ। ଦେଶ, ବିଦେଶ ର ମନ୍ଦିର ଓ ପ୍ୟାଲେଶକୁ ନେଇ ଭୁବନେଶ୍ୱର ତିଆରି ହୋଇଛି ତୋରଣ। ଭୁବନେଶ୍ୱର ବାସିନ୍ଦାଙ୍କ ଲାଗି ନୂଆ କରି କାଳ୍ପନିକ ତୋରଣ ଭେଟି ଦେଇଛି ନୂଆପଲି ପୂଜା କମିଟି। ତୋରଣରେ ଓଡ଼ିଶାର କଲା, ସଂସ୍କୃତି ଓ ଟେରାକୋଟାର ଝଲକ। ବତା , ବାଉଁଶ ଓ ମାଟି ଘୋଡ଼ା ରେ ତିଆରି ହୋଇଛି ପୁରା ତୋରଣ। ଲାଲ ରଙ୍ଗର ତୋରଣ ହୋଇଥିବାରୁ ମଣ୍ଡପଟି ନବ ବଧୂ ପରି ସଜେଇ ହୋଇଛି। 80 ଫୁଟର ଉଚ୍ଚତା ଓ 120 ଫୁଟ ଚଉଡା ରହିଛି। ଜାତୀୟ ରାଜପଥ କଡ଼ରେ ହେଉଥିବାରୁ ସୁରକ୍ଷା ଓ ଟ୍ରାଫିକ ନିୟନ୍ତ୍ରଣ ଉପରେ କମିଟି ଅଧିକ ଧ୍ୟାନ ଦେଇଛି।
ଭୁଶୁଡିଲା ନିର୍ମାଣାଧିନ କୋଠା, ଜଣେ ମୃତ
ନନ୍ଦିଘୋଷ ବ୍ୟୁରୋ: ଭୁଶୁଡିଲା ନିର୍ମାଣାଧିନ ୫ମହଲା କୋଠା । ତିନିଟି ପିଲର ଭାଙ୍ଗିଯିବାରୁ ଜଣେ ଶ୍ରମିକର ମୃତ୍ୟୁ ହୋଇଥିବା ବେଳେ ଦୁଇ ଜଣ ଗରୁତର ହୋଇଛନ୍ତି । ଢେଙ୍କାନାଳ ଟାଉନଥାନା ଅନ୍ତର୍ଗତ ମହିଷାପାଟ ଛକ ନିକଟରେ ବଡ଼ ଅଘଟଣ ଘଟିଛି । ଏବେବି ୪ ଜଣ ଶ୍ରମିକ ଭିତରେ ଫସି ରହିଥିବା ସୂଚନା ରହିଛି । ଉଦ୍ଧାର କାର୍ଯ୍ୟାରେ ଅଗ୍ନିଶମ ବାହିନୀ ଓ ପୋଲିସ ନିୟୋଜିତ ରହିଛନ୍ତି । ଘଟଣା ସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି ଉପ ଜିଲ୍ଲାପାଳ ଓ ପ୍ରଶାସନିକ ଅଧିକାରୀ । ସେପଟେ ଉଦ୍ଧାର କରାଯାଇଥିବା ଜଣେ ଶ୍ରମିକଙ୍କ ଦୁଇ ହାତ କଟିଯାଇଥିବା ଜଣାପଡିଛି । ସମସ୍ତ ଗୁରୁତରଙ୍କ ହସ୍ପିଟାଲରେ ଚିକତ୍ସା ଜାରି ରହିଛି ।
KYC ଅପଡେଟ୍ କରିବାକୁ ଆସି ହନ୍ତସନ୍ତ
ନନ୍ଦିଘୋଷ ବ୍ୟୁରୋ: KYC ଅପଡେଟ୍ କରିବାକୁ ଆସି ହନ୍ତସନ୍ତ। ବ୍ୟାଙ୍କରେ ଲାଗିଛି ଲମ୍ବା ଲାଇନ। ଭଦ୍ରକ ବାସୁଦେବପୁର ଅଂଚଳର ଏ ଘଟଣା। ଷ୍ଟେଟ ବ୍ୟାଙ୍କ ଶାଖା ସାମନାରେ ଶହ ଶରହ ସଂଖ୍ୟାରେ ଲୋକଙ୍କ ଗହଳି ଲାଗିଛି। ସକାଳଠାରୁ ଅପରାହ୍ନ ପର୍ଯ୍ୟନ୍ତ ଲାଗୁଛି ଲମ୍ବା ଧାଡ଼ି।ସୁଭଦ୍ରା ଯୋଜନାର ଟଙ୍କା ଆସିବା ପରେ ଟଙ୍କା ଉଠାଇବାକୁ କରୁଛନ୍ତି KYC ଅପଡେଟ। ଲୋକଙ୍କ ମଧ୍ୟରେ ଠେଲାପେଲାରୁ ଜଣେ ଯୁବକ ଆହତ ହୋଇଥଲେ। ଅଲେଖ ନାୟକ ନାମକ ଯୁବକ ଜଣକ ସଂଜ୍ଞାହୀନ ହୋଇ ମେଡିକାଲ ଯିବାକୁ ପଡିଥିଲା। ସେଠାରେ ପ୍ରାଥମିକ ଚିକିତ୍ସା ପ୍ରଦାନ କରାଯାଇଥିଲା। ସହରରେ ଥିବା ସମସ୍ତ ବ୍ୟାଙ୍କରେ ଏଭଳି ସ୍ଥିତି ଦେଖିବାକୁ ମିଳିଛି। ବର୍ଷବର୍ଷ ଧରି ବ୍ୟାଙ୍କ ଜମା ଖାତା ଅଚଳ ପଡିଥିବାରୁ KYC ପାଇଁ ଭିଡ ଲାଗୁଛି ବୋଲି ବ୍ୟାଙ୍କ କର୍ତ୍ତୃପ୍କ୍ଷ କହିଛନ୍ତି।
ବିମଳାଙ୍କ ପ୍ରତିନିଧି ମା’ କାକୁଡ଼ିଖାଇ
ନନ୍ଦିଘୋଷ ବ୍ୟୁରୋ: ଶ୍ରୀକ୍ଷେତ୍ରର ସବୁ ପୀଠ ମଧ୍ୟରେ ଅନ୍ୟତମ ପ୍ରମୁଖ ଶକ୍ତି ପୀଠର ମାନ୍ୟତା ପାଇଛି ମା’କାକୁଡ଼ିଖାଇ । ପ୍ରତି ବର୍ଷ ଭଳି ଚଳିତ ବର୍ଷ ଶାରଦୀୟ ପୂଜାକୁ ବିଶେଷ ଆଡ଼ମ୍ବର ସହକାରେ ପାଳନ କରାଯାଉଛି । ଏହି ପୀଠରେ ନିର୍ମିତ ମୃଣ୍ମୟୀ ମୂର୍ତ୍ତିକୁ ମା’ ବିମଳାଙ୍କ ସ୍ୱରୂପ ଭାବେ ବିବେଚନା କରାଯାଉଛି। ଆଜି ଆଶ୍ୱିନ ଶୁକ୍ଳ ସପ୍ତମୀ ଠାରୁ ଦଶମୀ ପର୍ଯ୍ୟନ୍ତ ଏହି ପୀଠରେ କାକୁଡ଼ିଖାଇଙ୍କ ଶାରଦୀୟ ପୂଜାର ରୀତିନୀତି ଅନୁପାଳନ ହେବାର ପରମ୍ପରା ରହିଛି। ଦେବୀଙ୍କ ମୃଣ୍ମୟ ପ୍ରତିମାର ନିର୍ମାଣ ଷଷ୍ଠୀ ଓଷା ଠାରୁ ଆରମ୍ଭ ହୋଇଛି l ଏଠାକୁ ଶ୍ରୀମନ୍ଦିରରୁ ଶ୍ରୀଜଗନ୍ନାଥଙ୍କ ଓଲାଗିପାଟ ଓ ପ୍ରସାଦ ଆସିଥାଏ। ଆଜି ସପ୍ତମୀ ଦିନରେ ଖଣ୍ଡା ପୂଜା ପରେ ଅଷ୍ଟମୀରେ ଉଗ୍ରବଳି ହୋଇଥାଏ । ନାମ ଦୃଷ୍ଟିରୁ ମା’ଙ୍କ ପୀଠରେ କାକୁଡ଼ି ଓ କୁଷ୍ମାଣ୍ଡ ବଳିର ବହୁଳ ଭାବେ ପ୍ରଚଳନ ଥିଲେ ମଧ୍ୟ ଅଷ୍ଟମୀ ଓ ନବମୀରେ ପଶୁବଳିର ନିଆରା ପରମ୍ପରା ରହିଛି । ମା’ ବିମଳାଙ୍କ ଠାରୁ ଖଡ୍ଗ ଆସିଲା ପରେ ଏଠାରେ ସେହି ଖଡ୍ଗରେ ବଳି ଚ୍ଛେଦ ହୁଏ । ଦଶହରା ଦିନ ଶାନ୍ତିପଣା ଅର୍ପଣ ପରେ ଘଟ ଆସିଥିବା ଅଣତୁଠରେ ହିଁ ଦେବୀଙ୍କର ମୃଣ୍ମୟୀ ପ୍ରତିମାଙ୍କ ବିସର୍ଜନ କରିବାର ନିୟମ ରହିଛି । କାକୁଡିଖାଇଙ୍କ ପାଇଁ ନିର୍ମିତ ମେଢ଼କୁ ରୂପା ଛାଉଣୀ କରାଯାଇଛି । ରୂପା ମେଢ଼ରେ ବିଜେ ଠାକୁରାଣୀଙ୍କୁ ରୂପାର କିରିଟୀ ସହ ଅନ୍ୟ ଅସ୍ତ୍ରଶସ୍ତ୍ର, ଅଳଙ୍କାର ଲାଗି ହେଉଛି । ଭକ୍ତମାନେ ସପ୍ତମୀ, ଅଷ୍ଟମୀ, ନବମୀ ଓ ଦଶହରା ଦିନ ବିଭିନ୍ନ ବେଶରେ ମା’ କାକୁଡ଼ିଖାଇଙ୍କ ଦର୍ଶନ କରିବା ସହ ଆମିଷଭୋଗ ପାଇବାର ବ୍ୟବସ୍ଥା ମଧ୍ୟ ରହିଛି ।
ହାଇୱା ସହ ବୋଲେରୋ ଧକ୍କା, ଦୁର୍ଘଟଣାରେ ୬ ଜଣ ଆହତ
ନନ୍ଦିଘୋଷ ବ୍ୟୁରୋ: ହାଇୱା ସହ ବୋଲେରୋ ଧକ୍କା। ଦୁର୍ଘଟଣାରେ ୬ ଜଣ ଆହତ। ଢେଙ୍କାନାଳ ମହିଷା ପାଟ ଛକ ନିକଟରେ ଘଟିଛି ଦୁର୍ଘଟଣା। ଆହତ ମାନଙ୍କୁ ଢେଙ୍କାନାଳ ମୁଖ୍ୟ ଚିକିତ୍ସାଳୟ ଭର୍ତ୍ତି କରାଯାଇଛି। ଦୁର୍ଘଟଣା ଘଟାଇ ଥିବା ହାଇୱା ରାସ୍ତା ନିକଟରେ ଥିବା ଏକ ହୋଟେଲ ଭିତରକୁ ପଶିଯାଇଛି। ବୋଲେରୋ ଗାଡିରେ ଥିବା ୫ ଜଣ କଳାକାର ଓ ଡ୍ରାଇଭର ଆହତ ହୋଇଛନ୍ତି । ଭୁବନେଶ୍ବରରୁ ତାଳଚେରକୁ ଦାଣ୍ଡିଆ ନୃତ୍ୟ କରିବାକୁ ବୋଲେରୋରେ ଯାଉଥିଲେ ଏମାନେ। ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି। ଉତ୍ତ୍ୟକ୍ତ ଲୋକେ ରାସ୍ତା ଅବରୋଧ କରିଛନ୍ତି ।
ମହଙ୍ଗା ପଡ଼ିଲା ଅଶ୍ଳୀଳ ନୃତ୍ୟ, ଦର୍ଶକଙ୍କ ଚେୟାର ମାଡ଼ରେ ନିଶା ମହାରଣା ଆହତ
ନନ୍ଦିଘୋଷ ବ୍ୟୁରୋ: ମହଙ୍ଗା ପଡ଼ିଲା ଅଶ୍ଳୀଳ ନୃତ୍ୟ। ଯାତ୍ରା ପେଣ୍ଡାଲରେ ଅଶ୍ଳୀଳ ନୃତ୍ୟ କରି ହଟହଟା ହେଲେ ଯାତ୍ରା ଅଭିନେତ୍ରୀ। ଦର୍ଶକଙ୍କ ଚେୟାର ମାଡ଼ରେ ହେଲେ ଆହତ । ଯାଜପୁର ଜିଲ୍ଲା କୋରେଇ ଥାନା ଅନ୍ତର୍ଗତ ରଗଡ଼ି ଅଞ୍ଚଳରେ ଦେଖିବାକୁ ମିଳିଛି ଏଭଳି ଘଟଣା । ଅଶ୍ଳୀଳ ନୃତ୍ୟ ପରିବେଷଣ କରିବା ଯୋଗୁଁ ଦର୍ଶକଙ୍କ ଆକ୍ରୋଶର ଶିକାର ହୋଇଛନ୍ତି। ଗତକାଲି ରଗଡ଼ି ସ୍ଥିତ କାମୁଡେଇ ପଡ଼ିଆରେ ଅପେରା ସ୍ବପ୍ନ ମହଲ ପକ୍ଷରୁ ଯାତ୍ରା ପରିବେଷଣ କରାଯାଉଥିଲା। ଏଥିରେ ଅତିଥି କଳାକାର ଭାବେ ଯୋଗ ଦେଇ ନୃତ୍ୟ ପରିବେଷଣ କରୁଥିଲେ ଯାତ୍ରା ଅଭିନେତ୍ରୀ ଜଣକ। ମେଲୋଡି ଚାଲିଥିବା ସମୟରେ ଏକ ଆଇଟମ ଗୀତରେ ଅଶ୍ଳୀଳ ନୃତ୍ୟ ପରିବେଷଣ କରିବା ନେଇ ଦର୍ଶକ ତାଙ୍କ ଉପରକୁ ଚେୟାର ଫିଙ୍ଗିବା ସହ ହୋହାଲ୍ଲା କରିଥିଲେ । ଅଭିନେତ୍ରୀଙ୍କ ମୁଣ୍ଡରେ ଚେୟାର ବାଜିବାରୁ ତାଙ୍କ ଡ଼ାହାଣ ଆଖି ପତା ଫାଟି ଯାଇଥିଲା। ତାଙ୍କୁ କୋରେଇ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସା କରାଯାଇଛି। ଏହି ଘଟଣାକୁ ନେଇ ଯାତ୍ରା ସ୍ଥଳରେ କିଛି ସମୟ ପାଇଁ ଉତ୍ତେଜନା ଲାଗି ରହିବାରୁ ଯାତ୍ରା ବନ୍ଦ ରହିଥିଲା।
ଅର୍ଥ ହେରଫେର ମାମଲା : ହାଇକୋର୍ଟ ଗଲେ ଶିଳ୍ପା-କୁନ୍ଦ୍ରା ଦମ୍ପତ୍ତି
ନନ୍ଦିଘୋଷ ବ୍ୟୁରୋ: ଅର୍ଥ ହେରଫେର ମାମଲାରେ ବଲିଉଡ ଅଭିନେତ୍ରୀ ଶିଲ୍ପା ସେଟ୍ଟୀ ଓ ସ୍ଵାମୀ ରାଜ କୁନ୍ଦ୍ରାଙ୍କୁ ଘର ଖାଲି କରିବାକୁ ଇଡି ନୋଟିସକୁ ହାଇକୋର୍ଟରେ ଚ୍ଯାଲେଂଜ। ବମ୍ବେ ହାଇକୋର୍ଟଙ୍କ ଦ୍ଵାରସ୍ଥ ହୋଇଛନ୍ତି ସେଲିବ୍ରିଟି ଦମ୍ପତ୍ତି ଶିଲ୍ପା ସେଟ୍ଟୀ ଓ ରାଜ କୁନ୍ଦ୍ରା। ମନି ଲଣ୍ଡରିଂ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟର ଶିଳ୍ପା ସେଟ୍ଟୀ ଓ ରାଜ କୁନ୍ଦ୍ରାଙ୍କୁ ଘର ଖାଲି କରିବାକୁ ନୋଟିସ ଜାରି କରିଛି। ମୁମ୍ବାଇର ଜୁହୁ ଅଂଚଳରେ ରହିଛି ସେଲିବ୍ରିଟି ଦମ୍ପତ୍ତିଙ୍କ ବାସଭବନ ଏବଂ ପବନା ହ୍ରଦ ନିକଟରେ ରହିଛି ଫାର୍ମ ହାସୁସ। କ୍ରିପ୍ଟୋ କରେନ୍ସି ଠକେଇ ଯୋଜନାରେ ଅସ୍ଥାୟୀ ଭାବେ ଏହି ଦୁଇ ବାସଭବନକୁ ଜବତ କରିଥିଲା ଇଡି। ଏହି ଘରକୁ ଖାଲି କରିବାକୁ ଇଡିର ନୋଟିସକୁ ଚ୍ଯାଲେଂଜ କରି ବମ୍ବେ ହାଇକୋର୍ଟଙ୍କ ଦ୍ଵାରସ୍ଥ ହୋଇଛନ୍ତି ଉଭୟ। ମାମଲାରେ ଆସନ୍ତକାଲି ପରବର୍ତ୍ତୀ ଶୁଣାଣି ହେବ। ଗତ ୩ ତାରିଖରେ ରାଜ କୁନ୍ଦ୍ରାଙ୍କୁ ଉଚ୍ଛେଦ ନୋଟିସ ଜାରି କରିଥିଲା ଇଡି। ୨୦୧୮ରୁ ଏହି ମାମଲା ଜାରି ରହିଛି। କ୍ରିପ୍ଟୋ କଏନ ସ୍କିମ ଜରିଆରେ ଗ୍ରାହକଙ୍କୁ ୬ କୋଟି ଟଙ୍କା ଠକେଇ ହୋଇଥିବା ଅଭିଯୋଗ ହୋଇଛି।
ଦୁର୍ଗାପୂଜା ପାଇଁ କମିସନରେଟ ପୋଲିସର ବ୍ୟାପକ ବ୍ୟବସ୍ଥା, ଟ୍ରାଫିକ୍ ପାଇଁ ମୁତୟନ ହେବେ ୩୦ ସେକ୍ସନ ଫୋର୍ସ
ନନ୍ଦିଘୋଷ ବ୍ୟୁରୋ: ଦୁର୍ଗାପୂଜା ପାଇଁ କମିସନରେଟ ପୋଲିସର ବ୍ୟାପକ ବ୍ୟବସ୍ଥା । କେବଳ ଟ୍ରାଫିକ ପାଇଁ ମୁତୟନ ହେବେ ୩୦ ସେକ୍ସନ ଫୋର୍ସ। ପୂଜା ପାଇଁ ୩୩ ପ୍ଲାଟୁନ ଫୋର୍ସ ମୁତୟନ ହେବେ। ମହିଳା ଓ ଶିଶୁଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯିବ। ବିଶେଷକରି ଚୋରି, ଛିନତାଇ ରୋକିବା ପାଇଁ ସ୍ୱତନ୍ତ୍ର ବ୍ୟବସ୍ଥା କରିଛି ପୋଲିସ I ସିସିଟିଭି ସର୍ଭେଲାନ୍ସରେ ରହିବ ପୂଜା ମଣ୍ଡପ। ସ୍ୱର୍ଣ୍ଣ ଓ ରୌପ୍ୟ ଅଳଙ୍କାର ସଜ୍ଜିତ ଥିବା ମୋଟ ୨୨ଟି ମଣ୍ଡପରେ ୩ ଏପିଆର ବନ୍ଧୁକଧାରୀ ପୋଲିସ ଜଗିବେ I ପିଇବା ପାଣି ଠାରୁ ଆରମ୍ଭ କରି ଭଲ୍ୟୁଣ୍ଟର ପର୍ଯ୍ୟନ୍ତ ବ୍ୟବସ୍ଥା ପାଇଁ ପୂଜା କମିଟିଙ୍କୁ କୁହାଯାଇଛି। ଏହାସହ ୨ ଜଣ ଡିସିପି, ୧୦ ଜଣ ଆଡିସନାଲ ଡିସିପି, ୨୨ ଜଣ ଏସିପି, ୨୪୫ ଜଣ ଅଫିସର, ୬୫୭ ହାବିଲଦାର, କନଷ୍ଟେବଳ, ୩୨୮ ହୋମଗାର୍ଡ, ଗୋଟିଏ ପ୍ଲାଟୁନ BSF ଯବାନ ମୁତୟନ ହେବେ। ରାବଣପୋଡି ପାଇଁ ୧୨ଟି ପୂଜା ମଣ୍ଡପ ଆବେଦନ କରିଥିବା ବେଳେ, ବର୍ତ୍ତମାନ ସୁଦ୍ଧା ୮ ଜଣଙ୍କୁ ଅନୁମତି ମିଳିଛି I ବିସ୍ଫୋରକ ବାଣ ଫୁଟାଇବା ପାଇଁ ମାର୍ଗଦର୍ଶିକା ଜାରି କରାଯାଇଛି ବୋଲି କହିଛନ୍ତି ଭୁବନେଶ୍ବର ଡିସିପି ପିନାକ ମିଶ୍ର।
ଗଜପତି ଜିଲ୍ଲାରେ ଆରମ୍ଭ ହେଲା ବିଜେଡିର ସଭ୍ୟ ସଂଗ୍ରହ ଅଭିଯାନ
ନନ୍ଦିଘୋଷ ବ୍ୟୁରୋ: ଗଜପତି ଜିଲ୍ଲାରେ ଆରମ୍ଭ ହୋଇଛି ବିଜୁ ଜନତା ଦଳର ସଭ୍ୟ ସଂଗ୍ରହ ଅଭିଯାନ। ଭର୍ଚୁଆଲ ମାଧ୍ୟମରେ କାର୍ଯ୍ୟକ୍ରମର ଶୁଭାରମ୍ଭ କରିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ। ପାରଳାଖେମୁଣ୍ଡି ସ୍ଥିତ ବିଜୁ କଲ୍ୟାଣ ମଣ୍ଡପ ଠାରେ ଆୟୋଜିତ ହୋଇଥିଲା କାର୍ଯ୍ୟକ୍ରମ। ଅଭିଯାନକୁ ଯୋରଦାର କରିବା ପାଇଁ ସଙ୍କଳ୍ପ ନେଇଛନ୍ତି ନେତା ଓ କର୍ମୀ। ଦୁଇ ମାସ ମଧ୍ୟରେ ଜିଲ୍ଲାର କୋଣ ଅନୁକୋଣରୁ ସଭ୍ୟ ସଂଗ୍ରହ କରିବାକୁ ନିଷ୍ପତ୍ତି ନିଆଯାଇଛି। ଜିଲ୍ଲାରେ ବିଜୁ ଜନତା ଦଳ ମଜଭୁତ ରହିଛି। ପଞ୍ଚାୟତ ଠାରୁ ଜିଲ୍ଲା ପର୍ଯ୍ୟନ୍ତ ସବୁଠି ନିର୍ବାଚିତ ପ୍ରତିନିଧି ବିଜେଡିର ରହିଛନ୍ତି। ସାଧାରଣ ନିର୍ବାଚନରେ ଦୁଇଟି ବିଧାନସଭା ଆସନ ମଧ୍ୟରୁ ଗୋଟିଏ ଆସନରେ ବିଜୟୀ ହୋଇଛି ଦଳ। ସମସ୍ତ ନେତା କର୍ମୀ ଦଳକୁ ଆହୁରି ସୁଦୃଢ଼ କରିବାକୁ ଆହ୍ୱାନ ଦେଇଛନ୍ତି। କାର୍ଯ୍ୟକ୍ରମରେ ଜିଲ୍ଲାର ବରିଷ୍ଠ ନେତା ଓ କର୍ମୀ ସାମିଲ ହୋଇଥିଲେ ।