ନନ୍ଦିଘୋଷ ବ୍ୟୁରୋ: ଆମେରିକାରେ ବିରୋଧୀ ଦଳ ନେତା ରାହୁଲ ଗାନ୍ଧି। ଏହି ଗସ୍ତକାଳରେ ରାହୁଲ ଭାରତ-ଆମେରିକା ସମ୍ପର୍କ ସୁଦୃଢ କରିବା ଲାଗି ଉଦ୍ଯମ କରିବେ ବୋଲି ସୂଚନା ମିଳିଛି। ଟେକ୍ସାସର ଡଲାସରେ ପହଞ୍ଚିବା ପରେ ତାଙ୍କୁ ସ୍ବାଗତ କରିଥିଲେ କଂଗ୍ରେସର ଦରିଆପାରି ସଂଗଠନ ଅଧ୍ଯକ୍ଷ ସାମ ପିଟ୍ରୋଡା ଓ ବହୁ ଭାରତୀୟ। ରାହୁଲ କହିଛନ୍ତି- ଦୁଇ ଦେଶ ମଧ୍ଯରେ ସମ୍ପର୍କ ସୁଦୃଢ କରିବା ଉଦ୍ଦେଶ୍ଯରେ ସେ ଗଠନମୂଳକ ଆଲୋଚନା କରିବେ। ବିରୋଧୀ ଦଳ ନେତା ହେବା ପରେ ରାହୁଲଙ୍କ ଏହା ହେଉଛି ପ୍ରଥମ ବିଦେଶ ଗସ୍ତ। ଓ୍ବାଶିଂଟନ ଡିସି, ଟେକ୍ସାସ ଓ ଡଲାସରେ ବିଭିନ୍ନ କାର୍ଯ୍ୟକ୍ରମରେ ଯୋଗଦେବେ ରାହୁଲ। ଟେକ୍ସାସ ବିଶ୍ବବିଦ୍ୟାଳୟରେ ସେ ଉଦବୋଧନ ଦେବେ । ଚଳିତ ମାସର ଶେଷ ଭାଗରେ ବି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆମେରିକା ଗସ୍ତରେ ଯିବାର କାର୍ଯ୍ୟକ୍ରମ ରହିଛି। ଗସ୍ତବେଳେ ରାହୁଲ ଭାରତୀୟ ସମୁଦାୟ, ବ୍ଯବସାୟୀ, ଶିକ୍ଷାବିତ୍, ଛାତ୍ର, ଆନ୍ତର୍ଜାତିକ ଗଣମାଧ୍ଯମ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି। ଆମେରିକା ରାଷ୍ଟ୍ରପତି ନିର୍ବାଚନ ଆସନ୍ତା ନଭେମ୍ବରରେ ହେବାକୁ ଯାଉଥିବାବେଳେ ରାହୁଲଙ୍କ ଏହି ଗସ୍ତ ଗୁରୁତ୍ବ ବହନ କରୁଛି।
ଢେଙ୍କାନାଳରେ ଲଜ୍ଜା, ୨୨ ବର୍ଷୀୟ ଯୁବତୀଙ୍କୁ ଗଣଦୁଷ୍କର୍ମ ଅଭିଯୋଗ
ଢେଙ୍କାନାଳ: ଢେଙ୍କାନାଳରେ ଲଜ୍ଜା । ୨୨ ବର୍ଷୀୟ ଯୁବତୀଙ୍କୁ ଅଙ୍ଗନବାଡ଼ି ଛାତ ଉପରକୁ ଟେକି ନେଇ ବାରମ୍ବାର ଗଣଦୁଷ୍କର୍ମ ଅଭିଯୋଗ। ୭ ଜଣ ଯୁବକ ଦୁଷ୍କର୍ମ କରିଥିବା ନେଇ ହୋଇଛି ଅଭିଯୋଗ। ବାପା ଆଗରେ ଝିଅକୁ ଟେକି ନେଇ ବାରମ୍ବାର କରୁଥିଲେ ଦୁଷ୍କର୍ମ। ବାପା ମାନସିକ ରୋଗୀ ହୋଇଥିବା ସୂଚନା ମିଳିଛି। ଯୁବତୀଜଣକ ୭ ମାସର ଗର୍ଭବତୀ ଥିବା ଜଣାପଡ଼ିଛି।କିଛିଦିନ ହେବ ପ୍ରତ୍ୟେକ ଦିନ ଯୁବତୀଙ୍କୁ ରାତିରେ ଗଣଦୁଷ୍କର୍ମ କରାଯାଉଥିବା ଅଭିଯୋଗ ହୋଇଛି। ଯୁବତୀଙ୍କୁ ପୋଲିସ ଉଦ୍ଧାର କରି ସଖୀ କେନ୍ଦ୍ରରେ ରଖିଛି। ଢେଙ୍କାନାଳ ସଦର ଥାନା ଅନ୍ତର୍ଗତ ଭାପୁର ଫାଣ୍ଡି ଅଞ୍ଚଳରେ ଏହି ଘଟଣା ଘଟିଛି।
ଗିରଫ ହେଲେ ନୂଆପଡ଼ା ଏମଭିଆଇ
ନୂଆପଡା: ନୂଆପଡ଼ା ଏମଭିଆଇ ବିଜୟ କୁମାର ବେହୁରିଆଙ୍କୁ ଗିରଫ କଲା ଭିଜିଲାନ୍ସ। ୧ ଲକ୍ଷ ୩୨ ହଜାର ଟଙ୍କା ନେଇ ନୂଆପଡ଼ାରୁ ଭୁବନେଶ୍ଵର ଆସୁଥିବାବେଳେ ଗତକାଲି ଧରିଥିଲା ଭିଜିଲାନ୍ଶ। ପାଖରେ ଥିବା ଟଙ୍କା ନେଇ କୌଣସି ସନ୍ତୋଷଜନକ ଉତ୍ତର ଦେଇନପାରିବାରୁ ସମସ୍ତ ଟଙ୍କାକୁ ଜବତ କରି ତନାଘନା ଚାଲିଛି। ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଏମଭିଆଇଙ୍କ ଘର ସମେତ ୫ଟି ସ୍ଥାନରେ ଚଢାଉ କରିଥିଲା ଭିଜିଲାନ୍ସ। ଏତେ ପରିମାଣର ଟଙ୍କା ନେଇ ଏମଭିଆଇ କେଉଁଆଡେ ଆସୁଥିଲେ ଏହାକୁ ନେଇ ଚାଲିଛି ତଦନ୍ତ। ଗତକାଲି ଖୋର୍ଦ୍ଧା ହସ୍ପିଟାଲ ଛକରୁ ଏମଭିଆଇଙ୍କୁ ଧରିଥିଲା ଭିଜିଲାନ୍ଶ। ସେ ଆସୁଥିବା ଏକ ଘରୋଇ ଗାଡ଼ିକୁ ମଧ୍ୟ ଜବତ କରାଯାଇଛି। ଗତକାଲି ଏମଭିଆଇଙ୍କୁ ଧରିବା ପରେ ନୂଆପଡ଼ା ସ୍ଥିତ ବାସଭବନ ସମେତ ଯାଜପୁର ସିଂହପୁରରେ ଥିବା ପୈତୃକ ଘର ଏବଂ ଭୁବନେଶ୍ଵର ଶୈଳଶ୍ରୀ ବିହାରରେ ଥିବା ଘରେ ଚଡାଉ କରିଥିଲା ଭିଜିଲାନ୍ଶ। ଗିରଫ ପରେ ଏମଭିଆଇଙ୍କୁ କୋର୍ଟ ଚାଲାଣ କରିଛି ଭିଜିଲାନ୍ସ ।
ସ୍ବୀକାର କଲା ପାକିସ୍ତାନ, ୧୯୯୯ କାରଗିଲରେ ଭାରତ ବିରୋଧରେ ଲଢିଥିଲା ଯୁଦ୍ଧ
ନନ୍ଦିଘୋଷ ବ୍ୟୁରୋ: ୨୫ ବର୍ଷ ପରେ ସତ ମାନିଲା ପାକିସ୍ତାନ । ୧୯୯୯ କାରଗିଲ ଯୁଦ୍ଧରେ ପାକିସ୍ତାନ ଲଢିଥିବା ନେଇ ପ୍ରଥମ ଥର ଲାଗି ସ୍ବୀକାର କଲା ପାକିସ୍ତାନ ସେନା । ପାକିସ୍ତାନର ସେନା ମୁଖ୍ଯ ଜେନେରାଲ ଆସିମ ମୁନିରଙ୍କ ଏହି ସ୍ବୀକାରୋକ୍ତି ଚହଳ ସୃଷ୍ଟି କରିଛି । ପାକିସ୍ତାନର ପ୍ରତିରକ୍ଷା ଦିବସ ଅବସରରେ ଉଦବୋଧନ ଦେଇ ସେ ଏହି ପ୍ରସଙ୍ଗ ଉତଥାପନ କରିଛନ୍ତି । ରାଓଲପିଣ୍ଡିରେ ସେ କହିଛନ୍ତି ୧୯୪୮, ୧୯୬୫, ୧୯୭୧ ଓ କାରଗିଲ ଯୁଦ୍ଧ ଭାରତ ସହ ଲଢିଛି ପାକିସ୍ତାନ । ଅନ୍ଯ ତିନି ଯୁଦ୍ଧ ସହ ସେ ପ୍ରଥମ ଥର ଲାଗି କାରଗିଲ ଯୁଦ୍ଧ ପ୍ରସଙ୍ଗ ଉଠାଇଥିଲେ । ଏହି ସମସ୍ତ ଯୁଦ୍ଧରେ ହଜାର ହଜାର ଯବାନ ସହିଦ ହୋଇଥିଲେ । ୧୯୯୯ ମେ ମାସରୁ ଜୁଲାଇ ମଧ୍ଯରେ ହୋଇଥିବା କାରଗିଲ ଯୁଦ୍ଧରେ ପାକିସ୍ତାନ ବାହିନୀ ଜାମ୍ମୁ ଓ କାଶ୍ମୀରର ନିୟନ୍ତ୍ରଣ ରେଖା ଅତିକ୍ରମ କରି କାରଗିଲ ଜିଲ୍ଲାରେ ପ୍ରବେଶ କରିଥିଲେ । ଏହା ବିରୋଧରେ ଭାରତ ଆରମ୍ଭ କରିଥିଲା ଅପରେସନ ବିଜୟ । ପ୍ରଥମେ କାରଗିଲ ଅନୁପ୍ରବେଶକାରୀଙ୍କୁ କାଶ୍ମୀରୀ ସ୍ବାଧୀନତା ସଂଗ୍ରାମୀ ବା ମୁଜାହିଦ୍ଦିନଙ୍କ କାଣ୍ଡ ବୋଲି କହିଆସୁଥିଲା ପାକିସ୍ତାନ । ଏହା ସହ ଅନୁପ୍ରବେଶ କ୍ଷେତ୍ରରେ ପାକିସ୍ତାନର କୌଣସି ହାତ ନାହିଁ ବୋଲି କହୁଥିଲା । ମୁନିର ଆହୁରି କହିଛନ୍ତି- କାରଗିଲର ବିଭିନ୍ନ ପୋଷ୍ଟକୁ ଆଦିବାସୀ ନେତାମାନେ ଦଖଲ କରିଥିବାବେଳେ ପାକିସ୍ତାନ ବାହିନୀ ସକ୍ରିୟ ଭାବେ ସେଠାରେ ପାଟ୍ରୋଲିଂ କରୁଥିଲା । ବଡ଼କଥା ହେଉଛି ଏହି ଦୋଷ ଲୁଚାଇବା ଲାଗି ସେତେବେଳେ ନିହତ ହୋଇଥିବା ସୈନିକଙ୍କ ଶବକୁ ଗ୍ରହଣ କରିବା ଲାଗି ଅଗ୍ରାହ୍ୟ କରିଥିଲା ପାକିସ୍ତାନ । ଏକଥା ସତ୍ଯ ଯେ କାରଗିଲ ଯୁଦ୍ଧରେ ପାକିସ୍ତାନର ହାତ ଥିଲା । ମାତ୍ର ପାକିସ୍ତାନ ଏହାକୁ ସ୍ବୀକାର କରୁ ନଥିଲା । ମାତ୍ରେ ସେନାଧ୍ଯକ୍ଷ ଏହାକୁ ସ୍ବୀକାର କରିବା ଚର୍ଚ୍ଚାର କାରଣ ହୋଇଛି । କାରଗିଲ ଯୁଦ୍ଧ ବେଳେ ପାକିସ୍ତାନର ପ୍ରଧାନମନ୍ତ୍ରୀ ଥିବା ନଓ୍ବାଜ ସରିଫ ଏହି ଅପରସେନକୁ ସମାଲୋଚନା କରିବା ସହ ଏହା ଏକ କୌଶଳଗତ ଅକ୍ଷମଣୀୟ ଭୁଲ୍ ଓ ରାଜନୈିତିକ ବିପର୍ଯ୍ୟୟ ବୋଲି ଦର୍ଶାଇଥିଲେ । ଏପରିକି କାରଗିଲ ଆକ୍ରମଣ ପ୍ରସଙ୍ଗରେ କେବଳ ଜେନେରାଲ ପରଭେଜ ମୁଶାରଫ ଓ ଅନ୍ଯ ତିନି ଜଣ ଜାଣିଥିଲେ ଏବଂ ବାୟୁସେନା ମୁଖ୍ଯ, ନୌସେନା ମୁଖ୍ଯ ଓ ଏପରିକି ପ୍ରଧାନମନ୍ତ୍ରୀ ଅବଗତ ନଥିଲେ ବୋଲି କୁହାଯାଉଛି । ଏହି ଯୁଦ୍ଧରେ ଭାରତର ୫୨୭ ଯବାନ ପ୍ରାଣ ହରାଇଥିଲେ । ପାକିସ୍ତାନର ପ୍ରାୟ ୪ ହଜାର ଯବାନ ପ୍ରାଣ ହରାଇଥିଲେ ବୋଲି କୁହାଯାଇଛି । ତେବେ ପାକିସ୍ତାନ ପକ୍ଷର ମୃତ୍ଯୁ ସଂଖ୍ଯା ୭୦୦ ବୋଲି ଆମେରିକା କହିଆସୁଛି ।
ସେମିନାଲ ହଲକୁ କାହିଁକି ଯାଇଥିଲ ? ପଲିଗ୍ରାଫ୍ ଟେଷ୍ଟରେ ସଞ୍ଜୟକୁ CBI ପଚାରିଥିଲା ଏଭଳି ପ୍ରଶ୍ନ ..
ନନ୍ଦିଘୋଷ ବ୍ୟୁରୋ: କୋଲକାତା ଆର୍.ଜି କର ମେଡିକାଲ କଲେଜ ଏବଂ ହସ୍ପିଟାଲରେ ଜଣେ ମହିଳା ଡାକ୍ତରଙ୍କୁ ବଳାତ୍କାର ଏବଂ ପରେ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ସଞ୍ଜୟ ରୟଙ୍କର ଗତ ୨୫ଅଗଷ୍ଟରେ ସିବିଆଇ ପଲିଗ୍ରାଫ ଟେଷ୍ଟ କରିଥିଲା ।ସିବିଆଇ ଏନେଇ କୋର୍ଟଙ୍କ ଅନୁମତି ନେଇଥିଲା ଏବଂ ଏହି ଟେଷ୍ଟରେ ସଞ୍ଜୟ ନିଜକୁ ନିର୍ଦ୍ଦୋଷ ବୋଲି କହିଥିଲା । ଜେଲ ଭିତିରେ ପଲିଗ୍ରାଫ ଏକ୍ସପର୍ଟ ସଞ୍ଜୟକୁ ବିଭିନ୍ନ ପ୍ରକାରର ପ୍ରଶ୍ନ ପଚାରିଥିଲେ । ଟାଇମ୍ସ ନାଓ ରିପାର୍ଟ ଅନୁଯାୟୀ ସିବିଆଇ ସଞ୍ଜୟ ରୟ ପାଇଁ ପ୍ରଶ୍ନର ଏକ ଲିଷ୍ଟ ତିଆରି କରିଥିଲା । ଯାହା କେବଳ ହଁ ଏବଂ ନାଁ ରେ ଥିଲା । ତେବେ ନଜର ପକାନ୍ତୁ ପଲିଗ୍ରାଫି ଟେଷ୍ଟରେ ସଞ୍ଜୟଙ୍କୁ କି କି ପ୍ରଶ୍ନ ପଚରାଯାଇଥିଲା ..
ପ୍ରଶ୍ନ: ତୁମର ଜନ୍ମତାରିଖ କେବେ ?
ପ୍ରଶ୍ନ: ତୁମର ନାମ ଏବଂ ଜନ୍ମସ୍ଥାନ କେଉଁଠି ?
ପ୍ରଶ୍ନ: ତୁମେ ସିଭିକ୍ ଭଲ୍ୟୁଣ୍ଟର ଭାବେ କେବେ ସାମିଲ ହେଇଥିଲ ?
ପ୍ରଶ୍ନ: କଣ ଏହା ସତ୍ୟ ଯେ, ଆପଣ ବିପର୍ଯ୍ୟୟ ପରିଚାଳନାରେ ସାମିଲ ନହୋଇ କୋଲକତା ପୋଲିସ ପାଇଁ କାମ କରିଥିଲ ?
ପ୍ରଶ୍ନ: ତୁମ ପରିବାରରେ ସମସ୍ତେ କେମିତି ଅଛନ୍ତି ?
ପ୍ରଶ୍ନ: ତୁମେ କେଉଁଯାଏ ପାଠ ପଢିଛ ?
ପ୍ରଶ୍ନ: କଣ ଏହା ସତ୍ୟ ଯେ , ଆର ଜି କର ହସ୍ପିଟାଲରେ ତୁମେ ରୋଗୀଙ୍କ ଠାରୁ ଚିକିତ୍ସା ନାଁରେ ଲାଞ୍ଚ ନେଉଥିଲ ?
ପ୍ରଶ୍ନ: କଣ ଏହା ସତ ? ତୁମେ ଅପରାଧ କରିଛ ?
ପ୍ରଶ୍ନ: କୋଲକତା ପୋଲିସ ତୁମକୁ କେବେ ଗିରଫ କରିଥିଲା ?
ପ୍ରଶ୍ନ: ଅଗଷ୍ଟ ୧୦ତାରିଖ ଦିନ ସକାଳେ ତୁମେ କେଉଁଠି ଥିଲ ?
ପ୍ରଶ୍ନ: ଅଗଷ୍ଟ ୮ତାରିଖ ଦିନ ତୁମେ ଦିନତମାମ କଣ କରିଥିଲ ?
ପ୍ରଶ୍ନ: ସିସିଟିଭି ଅନୁଯାୟୀ ତୁମେ ଅଗଷ୍ଟ ୮ତାରିଖ ଦିନ ରାତି ୧୧ଟାରେ ହସ୍ପିଟାଲକୁ ଆସିଥିଲ , ଏହା ସତ କି ?
ପ୍ରଶ୍ନ: ତୁମେ ୩୦ମିନିଟ ଭିତରେ କାହିଁକି ଚାଲିଗଲ, କହିପାରିବ କି ?
ପ୍ରଶ୍ନ: ତୁମେ ୪ଘଣ୍ଟା ପରେ ଫେରିଥିଲ, କୁଆଡେ ଯାଇଥିଲ ?
ପ୍ରଶ୍ନ: ଆମେ ଜଣେ ସାକ୍ଷୀ ସହ କଥା ହେଲୁ, ସେ କହିଲେ କି ତୁମେ ନିକଟ କଲୋନୀକୁ ଯାଇଥିଲ ଏବଂ ମଦ ପିଇଥିଲ । ଏହା କଣ ସତ୍ୟ ଅଟେ ?
ପ୍ରଶ୍ନ: ତୁମେ ସଂଧ୍ୟା ୪ଟା ପୂର୍ବରୁ ହସ୍ପିଟାଲ କାହିଁକି ଯାଇଥିଲ ?
ପ୍ରଶ୍ନ: ତୁମେ ସେମିନାର ହଲକୁ କାହିଁକି ଯାଇଥିଲ ? ଏବଂ ପୋଲିସ ବ୍ୟାରେକରେ କାହିଁକି ଶୋଇପଡିଲ ?
ପ୍ରଶ୍ନ: ତୁମକୁ ଲାଗୁଛି କି କିଏ ତୁମକୁ ଏହି ମାମଲାରେ ଫସାଉଛି ?
ପ୍ରଶ୍ନ: ନିଜ ମୁଣ୍ଡକୁ ଦୋଷ ନେଇଯିବାକୁ କିଏ ଚାପ ଦେଉଛି କି? ହଁ କି ନାଁ ?
ପ୍ରଶ୍ନ: ପୋଲିସ ଏବଂ ହସ୍ପିଟାଲର ବରିଷ୍ଠ କର୍ମଚାରୀମାନେ ତୁମକୁ ହସ୍ପିଟାଲରେ ଖୋଲା ଛାଡିଥିଲେ କି ? ସତ ନା ମିଛ !
ପ୍ରଶ୍ନ: କେହି ତୁମକୁ ଅପରାଧ ମାନିବାକୁ ଧମକାଉଛି କି ?
ଅଗଷ୍ଟ ୯ରେ ଆରଜି କର ମେଡିକାଲ କଲେଜ ଓ ହସ୍ପିଟାଲର ସେମିନାର ରୁମରୁ ୩୧ ବର୍ଷୀୟ ମହିଳା ଡାକ୍ତରଙ୍କ କ୍ଷତାକ୍ତ ମୃତଦେହ ମିଳିଥିଲା। ମୃତଦେହ ମିଳିବାର ୧୨ ଘଣ୍ଟା ମଧ୍ୟରେ କୋଲକାତା ପୁଲିସ୍ ସିଭିକ ସ୍ୱେଚ୍ଛାସେବୀ ଭାବେ କାମ କରୁଥିବା ସଞ୍ଜୟ ରୟକୁ ଗିରଫ କରିଥିଲା।
ଟ୍ରକକୁ ପଛପଟୁ ଧକ୍କାଦେଲା ଆମ୍ବୁଲାନ୍ସ , ଜଣେ ମୃତ
ଯାଜପୁର: ଟ୍ରକକୁ ପଛପଟୁ ଧକ୍କାଦେଲା ଆମ୍ବୁଲାନ୍ସ । ଦୁର୍ଘଟଣାରେ ଜଣଙ୍କ ମୃତ୍ୟୁ ହୋଇଥିବା ବେଳେ ଦୁଇ ଜଣ ଗୁରୁତର ଆହତ ହୋଇଛନ୍ତି । ଏଭଳି ଘଟଣା ଘଟିଛି ଏନଏଚ ୧୬ ଧର୍ମଶାଳା ଥାନା ଅଧୀନ ରଥିଆ ଛକ ଠାରେ । ଦୁର୍ଘଟଣାଗ୍ରସ୍ତ ୧୦୮ ଆମ୍ବୁଲାନ୍ସଟି କଟକ ମେଡିକାଲରେ ରୋଗୀ ଛାଡି ଆନନ୍ଦପୁର ଅଭିମୁଖେ ଫେରୁଥିଲା । ଏହି ସମୟରେ ରଥିଆ ଛକ ନିକଟରେ ଛିଡା ହୋଇଥିବା ଟ୍ରକକୁ ପଛପଟୁ ଧକ୍କା ଦେଇଥିଲା ଆମ୍ବୁଲାନ୍ସ । ଘଟଣାସ୍ଥଳରେ ଚଣ୍ଡିଖୋଲ ଅଗ୍ନିଶମ ବାହିନୀ ପହଞ୍ଚି ଆମ୍ବୁଲାନ୍ସ କର୍ମଚାରୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ବଡ଼ଚଣା ମେଡିକାଲକୁ ସ୍ଥାନାନ୍ତର କରିଥିଲା । ମେଡିକାଲରେ ଜଣଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଦୁଇ ଜଣଙ୍କୁ କଟକ ମେଡିକାଲକୁ ସ୍ଥାନାନ୍ତର କରାଯାଇଛି । ଘଟଣାସ୍ଥଳରେ ଧର୍ମଶାଳା ପୋଲିସ ପହଞ୍ଚି ତଦନ୍ତ ଚଳାଇଛି ।
ବ୍ୟାୟାମ ପାଇଁ ଜିମ୍ ନା ଯୋଗ ଭଲ ? ଜାଣନ୍ତୁ ଆଶ୍ଚର୍ଯ୍ୟକର କଥା
ନନ୍ଦିଘୋଷ ବ୍ୟୁରୋ: ସୁସ୍ଥ ଏବଂ ଫିଟ ରହିବା ପାଇଁ ଲୋକମାନେ ବିଭିନ୍ନ ଉପାୟ ଅବଲମ୍ବନ କରନ୍ତି । କିଛି ଲୋକ ଜିମ୍ ଯିବାକୁ ପସନ୍ଦ କରନ୍ତି, ଆଉ କିଛି ଲୋକ ଯୋଗ କରନ୍ତି । କିନ୍ତୁ ଆପଣ ଜାଣିଛନ୍ତିକି କେଉଁ ଉପାୟ ଆମ ଶରୀର ପାଇଁ ଭଲ ? କେଉଁଟି କଲେ ଆମ ଶରୀର ସୁସ୍ଥ ରହିଥାଏ । ଜିମରେ ବ୍ୟାୟାମ କରିବା ନା ଖୋଲା ଆକାଶ ତଳେ ଯୋଗ କରିବା ? ଯଦି ଆପଣ ନିଜ ଶରୀରକୁ ଫିଟ୍ ଏବଂ ସୁସ୍ଥ ରଖିବାକୁ ଚାହାଁନ୍ତି, ତେବେ ନିୟମିତ ଭାବେ ଯୋଗ କିମ୍ବା ବ୍ୟାୟାମ କରନ୍ତୁ । ଆଜିକାଲି ଅଧିକାଂଶ ଲୋକ ମୋଟାପଣ ସମସ୍ୟା ସହ ସଂଘର୍ଷ କରୁଛନ୍ତି। ଏଭଳି ପରିସ୍ଥିତିରେ ଅଧିକାଂଶ ଏହି ଦ୍ବନ୍ଦରେ ଥାଆନ୍ତି କି କେଉଁଟା ତାଙ୍କ ଶରୀର ପାଇଁ ଅଧିକ ଲାଭଦାୟକ ।ତେବେ ଆପଣ ଜିମ ଏବଂ ଯୋଗର ଉପକାରୀତା ସମ୍ପର୍କରେ ଜାଣିଲେ ଜାଣିପାରିବେ ଏହି ଦୁଇଟି ମଧ୍ୟରୁ ଆପଣଙ୍କ ଶରୀର ପାଇଁ କେଉଁଟା ଭଲ ।
ଯୋଗ କ’ଣ?
ଯୋଗ ହେଉଛି ଏକ ପ୍ରାଚୀନ ଅଭ୍ୟାସ ଯେଉଁଥିରେ ଶାରୀରିକ ସ୍ଥିତି, ଧ୍ୟାନ ଏବଂ ଗଭୀର ନିଶ୍ୱାସ ଅନ୍ତର୍ଭୁକ୍ତ | ଯୋଗ ହେଉଛି ଏକ ଆଧ୍ୟାତ୍ମିକ ପ୍ରକ୍ରିୟା ଯେଉଁଠାରେ ଶରୀର, ମନ ଏବଂ ଆତ୍ମା ଏକ ହୋଇଥାନ୍ତି । ଯୋଗ ଶବ୍ଦର ଅର୍ଥ ସଂଗ୍ରହ କିମ୍ବା ବାନ୍ଧିବା । ଯୋଗ ହେଉଛି ଏକ ଆଧ୍ୟାତ୍ମିକ ଅନୁଶାସନ । ଯୋଗରେ ସୂର୍ଯ୍ୟ ନମସ୍କାରଙ୍କ ସମେତ ଅନେକ ଆସନ ଏବଂ ପ୍ରାଣାୟାମ ଅଛି । ଯୋଗ ପ୍ରତି ଲୋକଙ୍କ ପ୍ରବୃତ୍ତି ସମଗ୍ର ବିଶ୍ୱରେ ଯଥେଷ୍ଟ ବୃଦ୍ଧି ପାଇଛି । ଯୋଗ ପାଚନ ଶକ୍ତିକୁ ନିୟନ୍ତ୍ରଣ କରିଥାଏ ଯାହା ଦ୍ବାରା ଅଧିକ ଭୋକ ଲାଗିନଥାଏ । ଯୋଗ କରିବା ଦ୍ବାରା ଶରୀର କୋମଳ ହେଇଥାଏ ।
ଜିମ୍ ୱାର୍କଆଉଟ୍
ଏ ବିଷୟରେ ସମସ୍ତେ ଜାଣନ୍ତି । ଜିମରେ, ଆମେ ବିଭିନ୍ନ ମେସିନ୍ ସହିତ ଜଡିତ ଗ୍ୟାଜେଟ୍ ବ୍ୟବହାର କରି ବ୍ୟାୟାମ କରୁ | ଲୋକମାନେ ଏକ ଫିଟ୍ ଏବଂ ଟୋନ୍ଡ୍ ଶରୀର ପାଇବା ପାଇଁ ଜିମ୍କୁ ବହୁତ ଯାଆନ୍ତି । ଲୋକମାନେ ଜିମ୍ ଯାଇ କାର୍ଡିଓ, ଲେଗ୍ ଏବଂ ଓଜନ କମାଇବା ପାଇଁ ବିଭିନ୍ନ ବ୍ୟାୟାମ କରନ୍ତି । ହେଲେ ଜିମ କଲେ ଆପଣ ଅଧିକ ଥକି ପଡିବେ ଏବଂ ଆପଣଙ୍କୁ ଅଧିକ ଭୋକ ଲାଗିବ । ଜିମ ଦ୍ବାରା ଶରୀର ମାଂସପେଶୀ ଅଧିକ ଶକ୍ତ ହୁଏ । ଏହାସହିତ ଜିମ କରିବା ଦ୍ବାରା ଆପଣ ଅଳ୍ପ ସମୟରେ ଓଜନ ହ୍ରାସ କରିପାରିବେ ।
ଦୁହିଁଙ୍କ ମଧ୍ୟରେ କୋଉଟା ଭଲ?
ବିଶେଷଜ୍ଞଙ୍କ ଅନୁସାରେ ଉଭୟ ନିଜ ନିଜ ସ୍ଥାନରେ ଭଲ। ଯୋଗରେ ନିଶ୍ୱାସ ନିୟନ୍ତ୍ରଣ ଯଥା ପ୍ରାଣାୟାମ, ଆସନ ଏବଂ ଯୋଗ ଉତ୍ତମ ନିଦ୍ରା ଏବଂ ଶରୀରକୁ ସୁସ୍ଥ ରଖିବାରେ ସହାୟକ ହୁଏ । ଏହା ଉଭୟ ଶରୀର ଏବଂ ମନକୁ ଆରାମ ଦେଇଥାଏ | ତେଣୁ, ଜିମ୍ ବ୍ୟାୟାମଟି ଶକ୍ତି ପ୍ରଶିକ୍ଷଣରେ ଅନ୍ତର୍ଭୁକ୍ତ ଯାହା ମେଟାବୋଲିଜିମ୍ ଏବଂ ମାଂସପେଶୀ ପାଇଁ ଭଲ । ବିଶେଷଜ୍ଞଙ୍କ ଅନୁଯାୟୀ, ଆପଣଙ୍କ ଶରୀରକୁ ଜାଣନ୍ତୁ ଏବଂ ଆପଣଙ୍କ ପାଇଁ ଯାହା ଅଧିକ ଆରାମଦାୟକ ତାହା ଅଭ୍ୟାସ କରନ୍ତୁ ।
ୟୁକ୍ରେନ-ଋଷ ଯୁଦ୍ଧର ଅନ୍ତ ପାଇଁ ଡୋଭାଲ ଯିବେ ମସ୍କୋ
ନନ୍ଦିଘୋଷ ବ୍ୟୁରୋ: ରୁଷିଆ-ୟୁକ୍ରେନରେ ଚାଲିଆସୁଥିବା ଯୁଦ୍ଧର ଘଟିବକି ପରିସମାପ୍ତି ? ଏହି ଯୁଦ୍ଧର ମୂକ ସାକ୍ଷୀ ସାଜିବକି ଭାରତ ! ଲାଗିରହିଥିବା ଯୁଦ୍ଧକୁ ସମାପ୍ତ କରିବା ପାଇଁ ଭାରତ ନେଇଛି ଏକ ବଡ ନିଷ୍ପତ୍ତି । ଚାଲିଆସୁଥିବା ଯୁଦ୍ଧକୁ ଶେଷ କରିବା ପାଇଁ ଭାରତ ପୁଣି ଥରେ ଏକ ବଡ ପଦକ୍ଷେପ ଗ୍ରହଣ କରିଛି ।ଅଗଷ୍ଟ ୨୭ ରେ ପ୍ରଧାନମନ୍ତ୍ରୀ ମୋଦୀ ରୁଷିଆର ରାଷ୍ଟ୍ରପତି ପୁଟିନଙ୍କ ସହ ଫୋନରେ କଥା ହୋଇଥିଲେ, ଏହା ପରେ ପ୍ରଧାନମନ୍ତ୍ରୀ ମୋଦି ରୁଷିଆ-ୟୁକ୍ରେନ ଯୁଦ୍ଧ ମଧ୍ୟରେ ଶାନ୍ତି କଥାବାର୍ତ୍ତା ପାଇଁ NSA ଅଜିତ ଡୋଭାଲଙ୍କୁ ରୁଷିଆ ଗସ୍ତରେ ପଠାଇବାକୁ ନିଷ୍ପତ୍ତି ନେଇଛନ୍ତି ।
ରୁଷିଆ ଏବଂ ୟୁକ୍ରେନ ମଧ୍ୟରେ ଥିବା ତିକ୍ତତା ହ୍ରାସ ହେବାର କୌଣସି ସଙ୍କେତ ମିଳୁନଥିବା ବେଳେ ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଗଷ୍ଟ ୨୭ରେ ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଫୋନରେ କଥା ହୋଇ ଦୁଇ ଦେଶ ମଧ୍ୟରେ ଯୁଦ୍ଧ ବନ୍ଦ କରିବାକୁ ପ୍ରତିଶ୍ରୃତି ଦେଇଛନ୍ତି । ରାଷ୍ଟ୍ରୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ରୁଷିଆ-ୟୁକ୍ରେନ ଯୁଦ୍ଧ ମଧ୍ୟରେ ଶାନ୍ତି କଥାବାର୍ତ୍ତା ବିଷୟରେ ଆଲୋଚନା କରିବାକୁ ଖୁବଶୀଘ୍ର ରୁଷିଆ ଗସ୍ତ କରିବେ।
ରୁଷିଆ -ୟୁକ୍ରେନ ଯୁଦ୍ଧ ମଧ୍ୟରେ ଏନଏସଏ ଅଜିତ ଡୋଭାଲ ପ୍ରଧାନମନ୍ତ୍ରୀ ମୋଦୀଙ୍କ ନିର୍ଦ୍ଦେଶ ଅନୁଯାୟୀ ରୁଷିଆ ଗସ୍ତ କରିବାକୁ ଯାଉଛନ୍ତି। ତେବେ ସେ କେଉଁଦିନ ରୁଷିଆ ଗସ୍ତ କରିବେ ତାହା ଏପର୍ଯ୍ୟନ୍ତ ଜଣାପଡିନାହିଁ। ଅଜିତ ଡୋଭାଲଙ୍କ ଏହି ଗସ୍ତ ରୁଷିଆ ଏବଂ ୟୁକ୍ରେନ ମଧ୍ୟରେ ଶାନ୍ତି ଆଣିବା ପାଇଁ ସହାୟକ ହେବ। ଏହି ସମୟ ମଧ୍ୟରେ ଅଜିତ ଡୋଭାଲ ରାଷ୍ଟ୍ରପତି ପୁଟିନଙ୍କୁ ମଧ୍ୟ ଭେଟିବେ। ଯେତେବେଳେ ପ୍ରଧାନମନ୍ତ୍ରୀ ମୋଦୀ ରୁଷିଆର ରାଷ୍ଟ୍ରପତିଙ୍କ ସହ ଫୋନରେ କଥା ହୋଇଥିଲେ ସେତେବେଳେ ମୋଦୀ ରୁଷିଆ ଗସ୍ତରେ NSAଙ୍କୁ ପଠାଇବା ବିଷୟରେ କହିଥିଲେ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଥମେ ଜୁଲାଇ ମାସରେ ରୁଷିଆ ଗସ୍ତରେ ଯାଇ ସେଠାରେ ରାଷ୍ଟ୍ରପତି ପୁଟିନଙ୍କୁ ଭେଟି କହିଥିଲେ ଯେ ଏହା ଯୁଦ୍ଧର ସମୟ ନୁହେଁ। ରୁଷିଆ ପରେ ଅଗଷ୍ଟ ୨୩ରେ ପ୍ରଧାନମନ୍ତ୍ରୀ ମୋଦି ୟୁକ୍ରେନ ଗସ୍ତରେ ଯାଇ ରାଷ୍ଟ୍ରପତି ଜେଲେନସ୍କିଙ୍କୁ ମଧ୍ୟ ଭେଟିଥିଲେ। ଏହା ପରେ ବର୍ତ୍ତମାନ ଭାରତ ପୁଣି ଥରେ ଦୁଇ ଦେଶ ମଧ୍ୟରେ ତିକ୍ତତା ହ୍ରାସ କରିବାକୁ ଏକ ବଡ ପଦକ୍ଷେପ ନେଉଛି ଏବଂ ପ୍ରଧାନମନ୍ତ୍ରୀ NSA ଅଜିତ ଡୋଭାଲଙ୍କୁ ରୁଷିଆ ପଠାଉଛନ୍ତି ।
ନିକଟରେ, ଇଷ୍ଟର୍ନ ଇକୋନୋମିକ୍ ଫୋରମରେ ଭାଷଣ ଦେଇ ରାଷ୍ଟ୍ରପତି ପୁଟିନ୍ କହିଥିଲେ ଯେ ସେ ଶାନ୍ତି ବିରୋଧରେ ନୁହଁନ୍ତି। କିନ୍ତୁ ସେ ଏହା ମଧ୍ୟ କହିଥିଲେକି ଚାଲିଥିବା ଯୁଦ୍ଧକୁ ସମାପ୍ତ କରିବା ମାମଲାରେ ଭାରତ ଏକ ବଡ ଭୂମିକା ଗ୍ରହଣ କରିବ । ପୁଟିନଙ୍କ ବିବୃତ୍ତିର ମାତ୍ର ୪୮ଘଣ୍ଟା ପରେ ଇଟାଲୀର ପ୍ରଧାନମନ୍ତ୍ରୀ ଜର୍ଜିଆ ମେଲୋନି କହିଛନ୍ତି ନିକଟରେ ମେଲୋନି ୟୁକ୍ରେନ ରାଷ୍ଟ୍ରପତି ଜେଲେନସ୍କିଙ୍କୁ ଭେଟିଥିଲେ, ଏବଂ ରୁଷିଆ ଏବଂ ୟୁକ୍ରେନ ମଧ୍ୟରେ ଶାନ୍ତି ଆଲୋଚନାରେ ଭାରତ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ ଏବଂ ଯୁଦ୍ଧକୁ ବନ୍ଦ କରିପାରିବ।
ଲକ୍ଷ୍ନୌରେ କୋଠା ଭୁଶୁଡିବା ଘଟଣା, ମୃତ୍ୟୁସଂଖ୍ୟା ୮କୁ ବୃଦ୍ଧି
ନନ୍ଦିଘୋଷ ବ୍ୟୁରୋ: ଉତ୍ତରପ୍ରଦେଶ ଲକ୍ଷ୍ନୌରେ କୋଠା ଭୁଶୁଡ଼ିବା ଘଟଣାରେ ମୃତ୍ୟୁସଂଖ୍ୟା ୮କୁ ବୃଦ୍ଧି । ଭଙ୍ଗାକୋଠା ତଳେ ଆହୁରି ଅନେକ ଲୋକ ଚାପି ହୋଇ ରହିଥିବା ଆଶଙ୍କା ରହିଛି। ଉଦ୍ଧାର ଦଳ କାର୍ଯ୍ୟକୁ ଜୋରଦାର କରିଛନ୍ତି। ଏପର୍ଯ୍ୟନ୍ତ ଆଠ ଜଣଙ୍କ ମୃତଦେହ ଉଦ୍ଧାର କରାଯାଇଥିବାବେଳେ ୨୮ଜଣ ଆହତଙ୍କୁ ଡାକ୍ତରଖାନା ଭର୍ତ୍ତି କରାଯାଇଛି ।
ଶନିବାର ସଂନ୍ଧ୍ୟା ୫ଟା ସୁଦ୍ଧା ଉତ୍ତରପ୍ରଦେଶର ରାଜଧାନୀ ଲକ୍ଷ୍ନୌ ସହିଦପାଥ ନିକଟରେ ଥିବା ଟ୍ରାନ୍ସପୋର୍ଟ ନଗରରେ ଏଭଳି ଅଘଟଣ ଘଟିଥିଲା । ଭୀଷଣ ବର୍ଷା ଯୋଗୁ ପୁରୁଣା ବିଲ୍ଡିଂଟି ଭୁଶୁଡି ପଡିଥିବା ସନ୍ଦେହ କରାଯାଉଛି। ଏହି ପୁରୁଣା ୩ମହଲା କୋଠାରେ ଔଷଧ ଗୋଦାମ ଚାଲୁଥିଲା । ଘଟଣା ସମୟରେ ବିଲ୍ଡିଂରେ ଅନେକ ଲୋକ କାମ କରୁଥିଲେ।
କୋଠା ଭୁଶୁଡ଼ିବା ପୂର୍ବରୁ ଭିତରେ କାମ କରୁଥିବା ଲୋକମାନେ ପ୍ରାୟ ୧୫ସେକେଣ୍ଡ ପାଇଁ ଭୂମିକମ୍ପ ଅନୁଭବ କରିଥିଲେ । ଲୋକମାନେ କିଛି ଭାବିବା ଏବଂ ବାହାରକୁ ଯିବାକୁ ଚେଷ୍ଟା କରିବା ପୂର୍ବରୁ, ଛାତରୁ କିଛି ଅଦ୍ଭୁତ ଶବ୍ଦ ଆସିବାକୁ ଲାଗିଲା | ଏହା ପରେ, କିଛି ସମୟ ମଧ୍ୟରେ ସମଗ୍ର କୋଠା ଭୁଶୁଡି ପଡିଥିଲା ।ବିଲଡିଂ ବାହାରେ ଉପସ୍ଥିତ ଲୋକମାନେ ତୁରନ୍ତ ପୋଲିସକୁ ଏ ସମ୍ପର୍କରେ ସୂଚନା ଦେଇଥିଲେ। ଏହା ପରେ ପୋଲିସ, ଅଗ୍ନିଶମ ବାହିନୀ, SDRF ଏବଂ NDRF ଟିମ୍ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ।
ପୋଲିସର ସୂଚନାନୁସାରେ, ମୃତକମାନେ ହେଉଛନ୍ତି ମନଜିତ ସିଂ ସାହନି, ଧୀରଜ, ପଙ୍କଜ, ଅରୁଣ, ରାମ କିଶୋର, ରାଜେଶ କୁମାର, ରୁଦ୍ର ଯାଦବ ଏବଂ ଜାଗ୍ରୁପ ସିଂ ବୋଲି ଜଣାପଡିଛି ।
ଆଜିଠୁ ବିଜୁଳି ଘଡ଼ଘଡ଼ି ସହ ପ୍ରବଳ ବର୍ଷା, ଜାଣନ୍ତୁ କେଉଁ କେଉଁ ଜିଲ୍ଲାରେ ବର୍ଷିବ ?
ଭୁବନେଶ୍ବର: ଓ୍ବେଲମାର୍କ ଲୋପ୍ରେସରରେ ପରିଣତ ହେଲା ଲଘୁଚାପ। ଉତ୍ତର-ପଶ୍ଚିମ ବଙ୍ଗୋପସାଗରରେ କେନ୍ଦ୍ରୀଭୂତ ହୋଇଛି ଏହି ଓ୍ବେଲମାର୍କ ଲୋପ୍ରେସର। ଆଜି ଅବପାତର ନେବ ରୂପ।ଉତ୍ତର-ପଶ୍ଚିମ ବଙ୍ଗୋପସାଗର ଏବଂ ଗାଙ୍ଗେୟ ପଶ୍ଚିମବଙ୍ଗ ଉପକୂଳରେ ସୃଷ୍ଟି ହେବ ଅବପାତ। ଏହାପରେ ପଶ୍ଚିମ-ଉତ୍ତର-ପଶ୍ଚିମ ଦିଗକୁ ଗତି କରିବ ଅବପାତ। ଗାଙ୍ଗେୟ ପଶ୍ଚିମବଙ୍ଗ, ଉତ୍ତର ଓଡ଼ିଶା, ଝାଡଖଣ୍ଡ ଦେଇ ଛତିଶଗଡ଼ ମୁହାଁ ହେବ। ପ୍ରଭାବରେ ୧୧ ତାରିଖ ପର୍ଯ୍ୟନ୍ତ ରାଜ୍ୟରେ ନିର୍ଧୁମ ବର୍ଷା ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର।
ଆଜି ପ୍ରବଳରୁ ଅତି ପ୍ରବଳ ବର୍ଷା ନେଇ ୫ ଜିଲ୍ଲାକୁ ଅରେଞ୍ଜ ଆଲର୍ଟ ଜାରି କରାଯାଇଛି। ମାଲକାନଗିରି, କୋରାପୁଟ, ରାୟଗଡ଼ା, ଗଜପତି ଓ ଗଞ୍ଜାମ ଜିଲ୍ଲାକୁ ସତର୍କତା ଜାରି କରାଯାଇଛି। ଏହି ଜିଲ୍ଲା ଗୁଡିକରେ ୭୦ ରୁ ୨୦୦ ମିଲିମିଟର ପର୍ଯ୍ୟନ୍ତ ବର୍ଷା ହୋଇପାରେ।ଏହା ସହ ୯ ଜିଲ୍ଲାକୁ ପ୍ରବଳ ବର୍ଷା ନେଇ ୟେଲୋ ଓ୍ବାର୍ଣ୍ଣିଂ ଜାରି କରାଯାଇଛି। ୯ ତାରିଖରେ ବଢିବ ବର୍ଷାର ପରିମାଣ । ଏଥିପାଇଁ ୯ ଜିଲ୍ଲାକୁ ପ୍ରବଳରୁ ଅତିପ୍ରବଳ ବର୍ଷା ନେଇ ଅରେଞ୍ଜ ଓ୍ବାର୍ଣ୍ଣିଂ ଜାରି ହୋଇଛି। କଳାହାଣ୍ଡି, କନ୍ଧମାଳ,ବୌଦ୍ଧ,ଗଜପତି,ଗଞ୍ଜାମ, ନୟାଗଡ଼,ଖୋର୍ଦ୍ଧା ପୁରୀ ,କଟକକୁ ସତର୍କତା ଜାରି କରାଯାଇଛି। ସେହିଭଳି ୧୬ ଜିଲ୍ଲାକୁ ୟେଲୋ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର।
୧୦ ତାରିଖ ପାଇଁ ୯ ଜିଲ୍ଲାକୁ ଆରେଞ୍ଜ ଆଲର୍ଟ ଜାରି କରାଯାଇଛି। କଳାହାଣ୍ଡି, କନ୍ଧମାଳ, ବୌଦ୍ଧ, ବଲାଙ୍ଗୀର , ସୋନପୁର,ବରଗଡ଼, ସମ୍ବଲପୁର, ଅନୁଗୁଳ ଓ ଢେଙ୍କାନାଳ। ପ୍ରବଳ ବର୍ଷା ସହ ଘଣ୍ଟାପ୍ରତି ୪୦ ରୁ ୫୦ କିଲୋମିଟର ବେଗରେ ବହିବ ପବନ। ଫଳରେ ସମୁଦ୍ର ଅଶାନ୍ତ ରହିବ। ଏଥିପାଇଁ ଆସନ୍ତାକାଲି ଠାରୁ ୧୦ ତାରିଖ ପର୍ଯ୍ୟନ୍ତ ମତ୍ସ୍ୟଜୀବୀଙ୍କୁ ସମୁଦ୍ର ନଯିବା ପାଇଁ ପରାମର୍ଶ ଦିଆଯାଇଛି। ଆଜି ସୁଦ୍ଧା ସମସ୍ତ ମତ୍ସ୍ୟଜୀବୀମାନେ ଫେରି ଆସିବା ପାଇଁ ନିର୍ଦ୍ଦେଶ ଦିଆଯାଇଛି। ୧୨ ତାରିଖ ପରଠୁ କମିବ ବର୍ଷାର ପରିମାଣ। ସେପଟେ ଦକ୍ଷିଣ ଚୀନ ସାଗରରେ ଅଶାନ୍ତ ହେଉଛି ସୁପର ଟାଇଫୁନ୍ ୟାଗି। ଲଘୁଚାପ ଏବଂ ସୁପର ଟାଇଫୁନ୍ ମଧ୍ୟରେ ଦୂରତା ରହିଛି ୨ ହଜାର କିମି। ନିକଟରେ ନଥିଲେ ବି ଉଭୟଙ୍କ ମଧ୍ୟରେ ପ୍ରତିକ୍ରିୟା ଦେଖାଦେଇଛି। ଫଳରେ ସମୁଦ୍ରରେ ଧିରେ ଧିରେ ଅଧିକ ବଳ ଗୋଟାଉଛି ଲଘୁଚାପ।