ଟିଟିଲାଗଡ : ଲୋକୋ ପାଇଲଟ ରଙ୍ଗ ବାହାଦୁର ସିଂଙ୍କ ମିଳିଲା ପତ୍ତା। ଅପହରଣ ହୋଇନଥିଲେ ରଙ୍ଗ ବାହାଦୁର। ମାନସିକ ଚାପ ଯୋଗୁଁ କାର୍ଯ୍ୟରେ ଯୋଗ ନଦେଇ ଚାଲିଯାଇଥିଲେ ହରିଦ୍ବାର । ଗତ ୪ ତାରିଖରେ କାର୍ଯ୍ୟରେ ଯୋଗ ଦେବାପାଇଁ ଟିଟିଲାଗଡ ରେଳ ଷ୍ଟେସନରୁ ଟ୍ରେନ ଯୋଗେ କଣ୍ଟାବାଞ୍ଜି ଯାଇଥିଲେ। ହେଲେ କାର୍ଯ୍ୟରେ ଯୋଗ ଦେଇନଥିଲେ। ବହୁ ଖୋଜାଖୋଜି ପରେ ପରିବାର ପକ୍ଷରୁ ଲୋକୋ ପାଇଲଟ ଅପହରଣ ନେଇ GRP ଥାନାରେ ଅଭିଯୋଗ ହୋଇଥିଲା। ଟିଟିଲାଗଡ GRP ୨ଟି ଟିମ ଗଠନ କରି ରଙ୍ଗ ବାହାଦୁରଙ୍କୁ ଖୋଜ ଖୋଜି କରିଥିଲେ । ତାଙ୍କ ଲାଷ୍ଟ ଲୋକେଶନ ହରିଦ୍ଵାର ଦେଖାଇବାରୁ ଏକ ଟିମ ହରିଦ୍ଵାରକୁ ଯାଇଥିଲେ। ପରେ ରଙ୍ଗ ବାହାଦୁର ନିଜ ଘରକୁ ଫେରିଆସିଛନ୍ତି। ପୋଲିସ ରଙ୍ଗ ବାହାଦୁରକୁ ନେଇ ତଦନ୍ତ ଜାରି ରଖିଥିବା ବେଳେ ପାରିବାରିକ ସମସ୍ଯା ଯୋଗୁଁ ଚାଲିଯାଇଥିବା ଓ ପରେ ନିଜେ ଫେରି ଆସିଥିବା ପୋଲିସ କହିଛି।
ଭିଜିଲାନ୍ସ ଜାଲରେ ଜଳ ସମ୍ପଦ ବିଭାଗ ସହକାରୀ ଯନ୍ତ୍ରୀ
ଭଞ୍ଜନଗର : ଭିଜିଲାନ୍ସ ଜାଲରେ ଜଳସମ୍ପଦ ବିଭାଗ ସହକାରୀ ଯନ୍ତ୍ରୀ। ଭଞ୍ଜନଗର ଜଳ ସମ୍ପଦ ବିଭାଗ ସହକାରୀ ଯନ୍ତ୍ରୀ ପ୍ରସନ୍ନ ସ୍ୱାଇଁଙ୍କ ବାଗଦେବୀ ରୋଡ଼ରେ ଥିବା ବାସଭବନରେ ଚଢ଼ାଉ କରିଛି ଭିଜିଲାନ୍ସ ଟିମ। ପ୍ରସନ୍ନ ସ୍ୱାଇଁ ଭଞ୍ଜନଗର ଜଳ ସମ୍ପଦ ବିଭାଗରେ ସହକାରୀ ଯନ୍ତ୍ରୀ ଭାବରେ କାର୍ଯ୍ୟ କରିବା ସହ କିଛି ଗୁରୁତ୍ୱପୂର୍ଣ୍ଣ ବିଭାଗରେ ଅତିରିକ୍ତ ଦାୟିତ୍ୱ ତୁଲାଇ ଆସିଛନ୍ତି । ତେଣୁ ତାଙ୍କ ନାମରେ ଦୀର୍ଘ ଦିନ ଧରି ଆୟ ବହିର୍ଭୁତ ସମ୍ପତି ଠୁଳ ଅଭିଯୋଗ ହୋଇ ଆସୁଥିଲା । ଆଜି ଭୋରରୁ ବ୍ରହ୍ମପୁର ଏବଂ ଫୁଲବାଣୀର ଭିଜିଲାନ୍ସ ଅଧିକାରୀ ବାଗଦେବୀ ରୋଡ ସ୍ଥିତ ବାସଭବନରେ ପହଂଚି ରେଡ କରୁଛନ୍ତି। ଏହାସହ ଅଫିସରେ ମଧ୍ୟ ଯାଞ୍ଚ କରିଛି ଭିଜିଲାନ୍ସ ଟିମ। କିଛି ଗୁରୁତ୍ୱପୂର୍ଣ୍ଣ କାଗଜପତ୍ର ମଧ୍ୟ ଯାଞ୍ଚ କରୁଛନ୍ତି ।
ହରିୟାଣା ବିଧାନସଭା ନିର୍ବାଚନ : ଆମ ଆଦମୀ ପାର୍ଟି ପକ୍ଷରୁ ୩ୟ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା
ଚଣ୍ଡିଗଡ଼ : ହରିୟାଣା ବିଧାନସଭା ନିର୍ବାଚନ। ଆମ ଆଦମୀ ପାର୍ଟି ପକ୍ଷରୁ ଜାରି ହେଲା ତୃତୀୟ ପର୍ଯ୍ୟାୟ ପ୍ରାର୍ଥୀ ତାଲିକା। ତୃତୀୟ ପ୍ରାର୍ଥୀ ତାଲିକାରେ ମୋଟ ୧୧ ଜଣଙ୍କ ନାଁ ସ୍ଥାନ ପାଇଛି। ଗତକାଲି ବିଳମ୍ବିତ ରାତ୍ରିରେ ଏହି ତାଲିକା ପ୍ରକାଶ କରିଥିଲା ଆମ ଆଦମୀ ପାର୍ଟି। ସେମାନଙ୍କ ମଧ୍ୟରେ ରହିଛନ୍ତି ପ୍ରବୀଣ ଗୁସାଖାନୀ। ଗଢି ସାମ୍ପଲା କିଲୋଇ ଆସନରୁ ପ୍ରାର୍ଥୀ ହୋଇଛନ୍ତି ପ୍ରବୀଣ। ପୂର୍ବତନ ମୁଖ୍ୟମନ୍ତ୍ରୀ ଭୂପେନ୍ଦ୍ର ସିଂହ ହୁଡ୍ଡାଙ୍କ ବିରୋଧରେ ପ୍ରବୀଣ ଘୁସକାନୀଙ୍କୁ ଟିକେଟ ଦେଇଛି ଆପ। ଭୂପେନ୍ଦ୍ର ସିଂ ହୁଡ୍ଡା ରୋହତକ ଜିଲ୍ଲାର ଏହି ଆସନରୁ ପ୍ରାର୍ଥୀ ହୋଇଛନ୍ତି। ପୂର୍ବରୁ ଆପ ଦୁଇଟି ପ୍ରାର୍ଥୀ ତାଲିକା ପ୍ରକାଶ କରି ସାରିଛି। ପ୍ରଥମ ପ୍ରାର୍ଥୀ ତାଲିକାରେ ୨୦ ଜଣଙ୍କ ନାଁ ପ୍ରକାଶ ପାଇଥିବାବେଳେ ଦ୍ଵିତୀୟ ପର୍ଯ୍ୟାୟ ପ୍ରାର୍ଥୀ ତାଲିକାରେ ୯ ଜଣଙ୍କ ନାଁ ପ୍ରକାଶ ପାଇଥିଲା।
୯/୧୧ ଆତଙ୍କବାଦୀ ଆକ୍ରମଣକୁ ୨୩ ବର୍ଷ ; ଥରିଥିଲା ପୁରା ବିଶ୍ବ
ନନ୍ଦିଘୋଷ ବ୍ୟୁରୋ : ୯/୧୧ ଆତଙ୍କବାଦୀ ଆକ୍ରମଣକୁ ୨୩ ବର୍ଷ । ୧୧ ସେପ୍ଟେମ୍ବର ୨୦୦୧ରେ ଘାତକ ହମଲା କରିଥିଲା ଅଲକାଏଦା । ଭୟଙ୍କର ଆତଙ୍କବାଦୀ ଆକ୍ରମଣରେ ଥରିଥିଲା ପୁରା ବିଶ୍ବ । ସବୁଠୁ ଶକ୍ତିଶାଳୀ ରାଷ୍ଟ୍ର ଉପରେ ଟେରର ଆଟାକ୍ ଯୋଗୁ ପ୍ରାୟ ୩ ହଜାର ଲୋକ ପ୍ରାଣ ହରାଇଥିବା ବେଳେ ହଜାର ହଜାର ଲୋକ ଆହତ ହୋଇଥିଲେ । ସେଦିନ ସକାଳୁ ସକାଳୁ ଆମେରିକାର ୪ଟି ବିମାନ ହାଇଜାକ୍ କରିନେଇଥିଲେ ଅଲକାଏଦା ଆତଙ୍କବାଦୀ । ନ୍ୟୁୟର୍କ ସିଟିରେ ଥିବା ଓ୍ବାଲଡ ଟ୍ରେଡ ସେଣ୍ଟର ବିଲ୍ଡିଂରେ ଧକ୍କା ହୋଇ ବ୍ଲାଷ୍ଟ କରିଥିଲା ଆମେରିକାନ ଏୟାରଲାଇନର ଫ୍ଲାଇଟ-୧୧ । ଏହାର ମାତ୍ର ୧୭ ମିନିଟ ପରେ ୟୁନାଇଟେଡ ଏୟାରଲାଇନ୍ସ -୧୭୫ ଓ୍ବାର୍ଲଡ୍ ଟ୍ରେଡ ସେଣ୍ଟରର ଦକ୍ଷିଣ ଟାଓ୍ବାରକୁ ଧକ୍କା ଦେଇଥିଲା ।
ଏହାପରେ ଆମେରିକାନ ଏୟାରଲାଇନ୍ସର ଆଉ ଏକ ବିମାନ ଓ୍ବାସିଂଟନସ୍ଥିତ ପେଣ୍ଟାଗନ ବିଲ୍ଡିଂକୁ ଧକ୍କା ଦେଇ କ୍ରାସ୍ ହୋଇଥିଲା । ଶେଷରେ ୟୁଏସ୍ କ୍ୟାପିଟାଲ ବିଲ୍ଡିଂରେ ବିମାନ ଧକ୍କା କରିବାକୁ ପ୍ଲାନ ଥିବା ବେଳେ ଆତଙ୍କବାଦୀଙ୍କ ହାତରୁ ବିମାନର ନିୟନ୍ତ୍ରଣ ଖସିଯାଇଥିଲା । ଫଳରେ ପେନସିଲଭିନିଆର ଏକ ଖାଲି ପଡ଼ିଆରେ ବିମାନଟି ଖସି ପଡ଼ିଥିଲା । ଆକ୍ରମଣରେ ମୋଟ ୨ ହଜାର ୯୭୭ ଲୋକଙ୍କ ମୃତ୍ୟୁ ହୋଇଥିବା ବେଳେ ସେମାନଙ୍କ ମଧ୍ୟରେ ୧୯ ଜଣ ଆତଙ୍କବାଦୀ ସାମିଲ ଥିଲେ । ୨୦୧୧ରେ ଆମେରିକାର ଅପରେସନ ନେପଚୁନ ସ୍ପିୟରରେ ପ୍ରାଣ ହରାଇଥିଲା ଟେରର ଆଟାକର ମାଷ୍ଟରମାଉଣ୍ଡ ଓସାମା ବିନ ଲାଡେନ । ଓ୍ବାଲଡ ଟ୍ରେଡ ସେଣ୍ଟର ଉପରେ ହମଲାର କିଛି ଦିନ ପରେ ସମାନ ଧରଣର ଆଉ ଏକ ଆଟାକ ପାଇଁ ଷଡ଼ଯନ୍ତ୍ର ରଚିଥିଲା ମାଷ୍ଟର ମାଇଣ୍ଡ ଓସାମା ବିନ୍ ଲାଡେନ । ଲାଡେନ ମୃତ୍ୟୁ ପରେ ତା’ ପାଖରୁ ମିଳିଥିବା ସିକ୍ରେଟ ଦସ୍ତାବିଜରୁ ଏହି ତଥ୍ୟ ମିଳିଥିଲା ।
ରାଜ୍ଯରେ ଆଜିଠୁ କମିବ ବର୍ଷା, ଧୀରେଧୀରେ ସ୍ବାଭାବିକ ସ୍ଥିତିକୁ ଫେରୁଛି ଦକ୍ଷିଣ ଓଡ଼ିଶା
ଭୁବନେଶ୍ୱର : ରାଜ୍ଯରେ ଆଜିଠୁ କମିବ ବର୍ଷା । ଗଭୀର ଅବପାତ ଦୁର୍ବଳ ହୋଇ ଓ୍ବେଲମାର୍କ ଲୋପ୍ରେସରରେ ପରିଣତ । ଏବେ ଏହା ପଶ୍ଚିମ ଉତ୍ତର ପଶ୍ଚିମ ଦିଗରେ ଗତି କରି ମଧ୍ୟପ୍ରଦେଶ ମୁହାଁ ହେଉଛି । ପ୍ରଭାବରେ ଆଭ୍ୟନ୍ତରୀଣ ଓଡ଼ିଶାର ଅଧିକାଂଶ ଜିଲ୍ଲାରେ ହାଲୁକାରୁ ମଧ୍ଯମଧରଣ ବର୍ଷା ହେଉଛି । ଆଜିଠୁ ବର୍ଷା କମିବା ନେଇ ପାଣିପାଗ କେନ୍ଦ୍ର ସୂଚନା ଦେଇଛି । ଲଗାଣ ଲଘୁଚାପ ବର୍ଷା ପରେ ଧୀରେଧୀରେ ସ୍ବାଭାବିକ ସ୍ଥିତିକୁ ଫେରୁଛି ଦକ୍ଷିଣ ଓଡ଼ିଶା । ମାଲକାନଗିରି ଓ କୋରାପୁଟ ଜିଲ୍ଲାରେ ବିଶେଷ କ୍ଷୟକ୍ଷତି ହୋଇଛି । ଏବେ ବି ବିଭିନ୍ନ ଅଞ୍ଚଳ ପାଣି ଘେରରେ ରହିଛି । ଲୋକମାନେ ଘର ପାଣି ବାହାର କରିବା ସହ ଜିନିଷପତ୍ର ପାଣିରୁ ଛାଣିଆଣୁଛନ୍ତି । ବ୍ଯାପକ ଜମିରେ ଫସଲ ଉଜୁଡ଼ିଯାଇଥିବାବେଳେ ରିଲିଫ ଯୋଗାଣ ତ୍ବରାନ୍ବିତ କରିବାକୁ ସରକାର ନିର୍ଦ୍ଦେଶ ଦେଇଛନ୍ତି । ଏପଟେ ଆସନ୍ତା ୧୭ ଓ ୧୮ ତାରିଖ ବେଳକୁ ପୁଣି ଆଉ ଏକ ଲଘୁଚାପ ସୃଷ୍ଟି ହେବାର ସମ୍ଭାବନା ରହିଛି।
ଗୋଷ୍ଠୀ ସଂଘର୍ଷରୁ ଯୁବକଙ୍କୁ ହତ୍ୟା, ଅଞ୍ଚଳରେ ଉତ୍ତେଜନା
ବଲାଙ୍ଗୀର: ବଲାଙ୍ଗୀର ଟାଉନ୍ ଥାନା ଅନ୍ତର୍ଗତ ମାଲଗୋଦାମ ପଡାରେ ଗତକାଲି ଗୋଷ୍ଠୀ ସଂଘର୍ଷରୁ ହତ୍ୟା । ୧୭ ନମ୍ବର ୱାର୍ଡରେ ଉତ୍ତେଜନା । ମୁଖ୍ୟ ଅଭିଯୁକ୍ତ ଦ୍ରୋଣ କୁମ୍ଭାର ଘରେ ପଡାବାସୀ ପଶି ଭଙ୍ଗାରୁଜା କରିବା ସହ ଟେକାପଥର ମାଡ କରିଛନ୍ତି । ହତ୍ୟାକାଣ୍ଡ ପରେ ଗାଁରେ ଉତ୍ତେଜନା ଦେଖା ଦେଇଥିବା ବେଳେ ଥମିବାର ନାଁ ନେଉନି ।
ଉତ୍ତ୍ୟକ୍ତ ଲୋକେ ଦୁଇଟି ବାଇକ୍ ଭାଙ୍ଗି ଦେଇଛନ୍ତି । ଏପରିକି ଉତ୍ତ୍ୟକ୍ତ ଲୋକେ ପୋଲିସକୁ ଠେଲାପେଲା ମଧ୍ୟ କରିଛନ୍ତି । ପରିସ୍ଥିତି ନିୟନ୍ତ୍ରଣ ନହେବାରୁ ଅତିରିକ୍ତ ଏସପି ହେମନ୍ତ ପାଢୀଙ୍କ ନେତୃତ୍ବରେ ୪ ଡିଏସପି, ୫ ଇନ୍ସପେକ୍ଟର, ୧୦ରୁ ଅଧିକ୍ ପୋଲିସ ଅଧିକାରୀଙ୍କ ସହ ୨ ପ୍ଲାଟୁନ୍ ଫୋର୍ସ ଘଟଣା ସ୍ଥଳରେ ମୁତୟନ କରାଯାଇଛି ।
ନିରୋଜ କୁମ୍ଭାର ହତ୍ୟା ଘଟଣାରେ ଅଭିଯୁକ୍ତ ଦ୍ରୋଣ କୁମ୍ଭାର, ତା’ର ଦୁଇ ପୁଅ ସମେତ ୪ ଜଣକୁ ପୋଲିସ ଗିରଫ କରି ପଚରାଉଚରା ଚଳାଇଛି । ବଲାଙ୍ଗୀର ଏସ୍ପି ରିଷିକେଶ ଖିଲାରୀ ଘଟଣାର ତଦାରଖ କରୁଛନ୍ତି ।
ଗତକାଲି ପୂର୍ବ ଶତ୍ରୁତାକୁ କେନ୍ଦ୍ର କରି ମାଲଗୋଦାମ ପଡାରେ ଖଣ୍ଡା ବୁଲିଥିଲା । ଦୁଇ ଗୋଷ୍ଠୀ ମୁହାଁମୁହିଁ ହୋଇଥିଲେ । ଏଥିରେ ଜଣଙ୍କ ମୃତ୍ୟୁ ଘଟିଥିବା ବେଳେ ଦୁଇ ଜଣ ଗୁରୁତର ଅବସ୍ଥାରେ ଚିକିତ୍ସାଧୀନ ଅଛନ୍ତି । ଆସନ୍ତାକାଲି ଗିରଫ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯିବ ବୋଲି ଜଣାପଡିଛି ।
ପାର୍ବଣ ପୂର୍ବରୁ ତଡ଼ିପାର ହେଲା ହାର୍ଡକୋର ଅପରାଧୀ ଆବୁରୁକୁ
ଭୁବନେଶ୍ବର: ପୂଜା ପୂର୍ବରୁ ହାର୍ଡକୋରକୁ ତଡିପାର । କୁଖ୍ୟାତ କ୍ରିମିନାଲ ଆର. ଉଦୟ କିରଣ ଓରଫ ଆବୁରୁକୁ ତଡିପାର କଲା କମିଶନରେଟ ପୋଲିସ । ଲକ୍ଷ୍ମୀସାଗର ଥାନା ମୋଚି ସାହିର ଆବୁରୁ ବିରୋଧରେ ଅପରାଧର ତାଲିକା ବେଶ ଲମ୍ବା ଥିଲା । ୨୦୨୩ ମସିହାରେ ଦଫା ୧୧୦ରେ ମଧ୍ୟ ଆବୁରୁକୁ ବୁକ୍ କରାଯାଇଥିଲା ।
୨୦୨୦ ମସିହାରୁ ନିଶା କାରବାର, ଡକାୟତି, ଗଣ୍ଡଗୋଳ, ହତ୍ୟା ଉଦ୍ୟମ, ଅପହରଣ, ଦାଦାବଟି ଭଳି ସଙ୍ଗୀନ ଅଭିଯୋଗରେ ଅଭିଯୁକ୍ତକୁ ଗିରଫ କରାଯାଇଥିଲା । ଏବର୍ଷ ମଧ୍ୟ ଷ୍ଟେସନ ବଜାର ଓ ଚିନ୍ତାମଣିଶ୍ବର ଅଞ୍ଚଳରେ ଅନେକ ଅପରାଧ ଘଟାଇ ଲୋକଙ୍କ ମନରେ ଭୟ ସୃଷ୍ଟି କରୁଥିବା ଏହି ହାର୍ଡକୋରକୁ ତଡିପାର କରାଯାଇଛି ।
କେବଳ ସେତିକି ନୁହେଁ, ପେସାଦାର ଅପରାଧୀଙ୍କ ଏକ ତାଲିକା ପ୍ରସ୍ତୁତ କରିଛି କମିଶନରେଟ ପୋଲିସ । ଦଶହରାକୁ ଆଖି ଆଗରେ ରହି ଖୁବଶୀଘ୍ର ଏହି ଅଭିଯୁକ୍ତଙ୍କୁ ଜେଲ ପଠାଯିବ ବୋଲି କହିଛନ୍ତି ପୋଲିସ କମିଶନର ।
ବଲାଙ୍ଗୀରରେ ହିଟ୍ ଆଣ୍ଡ ରନ୍ ମାମଲା; ତିନି ଯୁବତୀଙ୍କ ଉପରେ ମାଡ଼ିଗଲା କାର୍
ବଲାଙ୍ଗୀର: ଓଡ଼ିଶାରେ ହିଟ ଆଣ୍ଡ ରନ୍ ମାମଲା । ବଲାଙ୍ଗୀର ଜିଲ୍ଲା ବେଲପଡା ଥାନା ଅଞ୍ଚଳରେ ଘଟିଛି ଘଟଣା । ତିନି ଜଣ ଯୁବତୀଙ୍କ ଉପରେ ମାଡ଼ିଗଲା କାର୍ । ଦୁର୍ଘଟଣାରେ ଜଣଙ୍କର ମୃତ୍ଯୁ ଘଟିଥିବା ବେଳେ ଅନ୍ଯ ଦୁଇଜଣ ଗୁରୁତର ଆହତ ହୋଇ ମେଡିକାଲରେ ଭର୍ତ୍ତି ହୋଇଛନ୍ତି ।
ନୁନହାଡ ଗାଁ ବସଷ୍ଟାଣ୍ଡ ନିକଟରେ ତିନି ଯୁବତୀ ଠିଆ ହୋଇଥିବାବେଳେ ସେମାନଙ୍କ ଉପରେ କାର୍ ଚଢି ଯାଇଥିଲା । ଯୁବତୀଙ୍କୁ ଗୁରୁତର ଅବସ୍ଥାରେ ପ୍ରଥମେ ପାଟଣାଗଡ଼ ଓ ପରେ ଜିଲ୍ଲା ମୁଖ୍ଯ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ସେଠାରେ ଜଣଙ୍କୁ ଡାକ୍ତର ମୃତ ଘୋଷଣା କରିଛନ୍ତି । ମୃତକ ହେଲେ ଭୋଲେଶ୍ବରୀ ମାଝୀ । ପ୍ରତୀମା ଧରୁଆ ଏବଂ ଜେମନ୍ତୀ ମାଝୀ ଏବେ ବି ଚିକିତ୍ସିତ ହେଉଛନ୍ତି ।
ଅଭିଯୁକ୍ତ ଯୁବକ ସୁଶିଲ କୁମାର ସାହୁ ନିଶାଗ୍ରସ୍ତ ଅବସ୍ଥାରେ କାର୍ ଚଢାଇ ଦେଇଥିବା ଅଭିଯୋଗ ହୋଇଛି । ଦୁର୍ଘଟଣାସ୍ଥଳରେ ଉତ୍ତେଜନା ଦେଖାଦେଇଥିବାବେଳେ ପୋଲିସ ସମସ୍ତଙ୍କୁ ବୁଝାସୁଝା କରିଛି । ମଦ୍ଯପ କାର ଚାଳକକୁ ଅଟକ ରଖି ପୋଲିସ ତଦନ୍ତ ଜାରି ରଖିଛି ।
ଇତିହାସକୁ ବିକୃତ କଲେ କ୍ଷମା ଦେବେନି ରାଜ୍ୟବାସୀ: ନବୀନ
ଭୁବନେଶ୍ବର: ବ୍ୟାସକବି ଫକୀର ମୋହନ ସେନାପତିଙ୍କୁ ଅସମ୍ମାନ ପ୍ରସଙ୍ଗରେ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ଉଦବେଗ । ବ୍ଯାସକବିଙ୍କୁ ଅସମ୍ମାନ କରିବା ଓଡ଼ିଆ ଅସ୍ମିତା କି ବୋଲି ପ୍ରଶ୍ନ କରି ବର୍ଷିଛନ୍ତି ନବୀନ । ସୋସିଆଲ ମିଡିଆ ଏକ୍ସରେ ନବୀନ କହିଛନ୍ତି, ଇତିହାସକୁ ବିକୃତ କଲେ କ୍ଷମା ଦେବେନି ରାଜ୍ୟବାସୀ । ମହାପୁରୁଷଙ୍କ ପ୍ରତି ସମ୍ମାନ, କୃତଜ୍ଞ ରହିବା ଜାତିର ନୈତିକ ଦାୟିତ୍ୱ । ସେମାନଙ୍କ ତ୍ୟାଗ, ସାଧନା ଓ ଦୂର ଦୃଷ୍ଟି ଦ୍ୱାରା ଗଢ଼ି ଉଠିଥିବା ଉତ୍କର୍ଷ ଅନୁଷ୍ଠାନ ଏ ଜାତିର ଅକ୍ଷୟ କୀର୍ତ୍ତି । ଓଡ଼ିଆ ଭାଷା ଓ ସାହିତ୍ୟର ଉନ୍ନତିରେ ବ୍ୟାସକବି ଫକୀରମୋହନ ସେନାପତିଙ୍କ ଅତୁଳନୀୟ ଅବଦାନ ରହିଛି । ଓଡ଼ିଶାର ସାମଗ୍ରିକ ବିକାଶରେ ମୟୂରଭଞ୍ଜ ରାଜ ପରିବାରର ଅବଦାନ ସମସ୍ତେ ଜାଣନ୍ତି । ସାହିତ୍ୟ, ଶିକ୍ଷା, ସ୍ୱାସ୍ଥ୍ୟ, ସଂସ୍କୃତି ଆଦି ସବୁ କ୍ଷେତ୍ରରେ ସେମାନଙ୍କ ଅବଦାନ ଅସୀମ। ଇତିହାସକୁ ବିକୃତ କରିବା ପାଇଁ କିଛି ଲୋକ ଅପଚେଷ୍ଟା କରୁଛନ୍ତି। ଆଗାମୀ ପୀଢ଼ି ପାଇଁ ଏହା କି ବାର୍ତ୍ତା ବୋଲି ପ୍ରଶ୍ନ କରିଛନ୍ତି ନବୀନ ।
ନବୀନ ଆହୁରି କହିଛନ୍ତି, କଥାରେ କୋଣାର୍କ ହୁଏ ନାହିଁ । ଗୋଟିଏ ଅନୁଷ୍ଠାନଟିଏ ଗଢ଼ିବା ସହଜ ନୁହେଁ । ଏଥିପାଇଁ ଦରକାର ଅନେକ ତ୍ୟାଗ ଓ ତପସ୍ୟା । ସାମୟିକ ସଫଳତାର ଉଲ୍ଲାସରେ ମଦମତ୍ତ ନେତାମାନେ ଆଜି ନୂଆ ଇତିହାସ ଲେଖିବା ଆରମ୍ଭ କରିଛନ୍ତି । ସେମାନେ ମନେ ରଖିବା ଉଚିତ, ହିମାଳୟ ପରି ଉତ୍ତୁଙ୍ଗ ବରପୁତ୍ରଙ୍କ ବ୍ୟକ୍ତିତ୍ୱକୁ ମଳିନ କରିବାକୁ ଚେଷ୍ଟା କଲେ ନିଜର ଅସ୍ତିତ୍ୱ ହରାଇ ବସିବେ ।
ଓଡ଼ିଶାରେ ଚାଲିବ ୩ଟି ନୂଆ ବନ୍ଦେ ଭାରତ ଟ୍ରେନ
ଭୁବନେଶ୍ବର: ଓଡ଼ିଶାରେ ଚାଲିବ ୩ଟି ବନ୍ଦେ ଭାରତ ଟ୍ରେନ୍ । ବନ୍ଦେ ଭାରତ ଟ୍ରେନ ଶୁଭାରମ୍ଭ ସମାରୋହରେ ଯୋଗ ଦେବା ପାଇଁ ମୁଖ୍ଯମନ୍ତ୍ରୀଙ୍କୁ ନିମନ୍ତ୍ରଣ କରିଛନ୍ତି ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ । ଆସନ୍ତା ୧୦ ତାରିଖରେ ଦେଶରେ ୧୦ଟି ନୂତନ ବନ୍ଦେ ଭାରତ ଟ୍ରେନ ଚଳାଚଳର ଶୁଭାରମ୍ଭ ହେବ । ସେଥିରୁ ଓଡିଶା ମଧ୍ୟରେ ୩ଟି ଟ୍ରେନ ଚଳାଚଳ କରିବ ।
ଏହି ଟ୍ରେନ ଗୁଡିକ ହେଲା ଟାଟା-ବ୍ରହ୍ମପୁର ବନ୍ଦେ ଭାରତ, ରାଉରକେଲା-ହାୱଡା ବନ୍ଦେ ଭାରତ ଓ ଦୁର୍ଗ-ବିଶାଖାପାଟଣା ବନ୍ଦେ ଭାରତ । ବର୍ତ୍ତମାନ ଓଡିଶା ମଧ୍ୟରେ ୩ଟି ବନ୍ଦେ ଭାରତ ଟ୍ରେନ ଚଳାଚଳ କରୁଛି । ଚଳିତବର୍ଷ ବଜେଟରେ ଓଡିଶା ରେଳ ଭିତ୍ତିଭୂମିକୁ ସୁଦୃଢ କରିବା ପାଇଁ ରେକର୍ଡ ୧୦ ହଜାର ୫୮୬ କୋଟି ଟଙ୍କା କେନ୍ଦ୍ର ସରକାର ଯୋଗେଇ ଦେଇଛନ୍ତି । ବର୍ତ୍ତମାନ ରାଜ୍ୟରେ ୫୪ ହଜାର ୪୩୪ କୋଟି ଟଙ୍କାର ରେଳ ଭିତ୍ତିଭୂମି ନିର୍ମାଣ କାର୍ଯ୍ୟ ଜାରି ରହିଛି ।