ଭୁବନେଶ୍ୱର : ଭିଜିଲାନ୍ସ ଜାଲରେ ଆଉଜଣେ ବିଡିଓ । କଟକ ଆଠଗଡ଼ ବିଡିଓ ବିଡିଓ ପ୍ରଦୀପ କୁମାର ସାହୁଙ୍କ ଘରେ ରେଡ୍ କରିଛି ଭିଜିଲାନ୍ସ । ଏକକାଳୀନ ୮ଟି ସ୍ଥାନରେ ଚଢାଉ କରାଯାଉଛି । ଆୟବହୂର୍ଭୂତ ସମ୍ପତ୍ତି ଠୁଳ ଅଭିଯୋଗରେ ରେଡ୍ କରୁଛି ଭିଜିଲାନ୍ସ । ଭୁବନେଶ୍ୱର ଭିଜିଲାନ୍ସ ଡିଭିଜନ ପକ୍ଷରୁ ଭୁବନେଶ୍ୱର ଗୌତମ ନଗରରେ ଥିବା ଶ୍ରୀଇନକ୍ଲେଭ ଆପାର୍ଟମେଣ୍ଟର ଦ୍ବିତୀୟ ମହଲାରେ ଥିବା ଘର, ଖୋର୍ଦ୍ଧା ଭଲିଆବାଡ଼ିରେ ଥିବା ବିଲ୍ଡିଂ, ରାଜସୁନାଖଳାରେ ତିନି ମହଲା କୋଠା ଓ ପୈତୃକ ଘର, ଖୋର୍ଦ୍ଧା ପିଚୁକୁଳିରେ ସମ୍ପର୍କୀୟଙ୍କ ଘର, ଆଠଗଡ଼ରେ ଥିବା ଅଫିସ, କ୍ବାର୍ଟର୍ସ ଆଦି ସ୍ଥାନରେ ରେଡ୍ ଚାଲିଛି । ୬ ଜଣ ଡ଼ିଏସପିଙ୍କ ନେତୃତ୍ବରେ ୬ ଜଣ ଇନ୍ସପେକ୍ଟର, ୧୦ ଜଣ ଏଏସଆଇ ଓ ଅନ୍ୟ ଷ୍ଟାଫ ଚଢ଼ାଉ ଜାରି ରଖିଛନ୍ତି ।
ଭାରତ-ଶ୍ରୀଲଙ୍କା ଦିନିକିଆ ସିରିଜର ଆଜି ଶେଷ ମ୍ଯାଚ
ନୂଆଦିଲ୍ଲୀ : ଭାରତ-ଶ୍ରୀଲଙ୍କା ତିନିଟିକିଆ ଦିନିକିଆ ସିରିଜର ଆଜି ଶେଷ ମ୍ଯାଚ । ସିରିଜ ବଞ୍ଚାଇବା ଲକ୍ଷ୍ଯରେ ପଡ଼ିଆକୁ ଓହ୍ଲାଇବ ଟିମ୍ ଇଣ୍ଡିଆ । ପ୍ରଥମ ମ୍ଯାଚ ଟାଇ ହୋଇଥିବାବେଳେ ଦ୍ବିତୀୟ ମ୍ଯାଚ ଭାରତ ହାରିସାରିଛି । ଏଣୁ ଆଜିର ମ୍ଯାଚ ଜିତି ସିରିଜ ବଞ୍ଚାଇବାକୁ ଟିମ୍ ଇଣ୍ଡିଆ ଉଦ୍ଯମ କରିବ । ଭାରତ ମ୍ୟାଚ୍ ଜିତି ଶୃଙ୍ଖଳାକୁ ୧-୧ରେ ଶେଷ କରି ଆତ୍ମସମ୍ମାନ ବଞ୍ଚାଇବା ଲକ୍ଷ୍ୟରେ ରହିବ ।
ଆଜିର ମ୍ଯାଚ ହାରିଲେ ଭାରତ ଦୀର୍ଘ ୨୭ ବର୍ଷ ପରେ ଶ୍ରୀଲଙ୍କାଠାରୁ ଦ୍ବିପାକ୍ଷିକ ଶୃଙ୍ଖଳା ପରାଜିତ ହେବ । ଶେଷ ଥର ପାଇଁ ଭାରତ ୧୯୯୭ରେ ଦିନିକିଆ ଶୃଙ୍ଖଳା ହାରିଥିଲା । ପ୍ରଥମ ଦୁଇ ଦିନିକିଆରେ ବୋଲରମାନେ ଭଲ ପ୍ରଦର୍ଶନ କରିଥିଲେ ମଧ୍ୟ ବ୍ୟାଟର୍ ନିରାଶ କରିଛନ୍ତି। ଦ୍ବିତୀୟ ମ୍ୟାଚ୍ରେ ରୋହିତ ଶର୍ମା ଭଲ ଆରମ୍ଭ ଦେବା ସତ୍ତ୍ବେ କୋହଲି ଏହାକୁ ଆଗକୁ ନେଇପାରି ନଥିଲେ । ଉପଅଧିନାୟକ ଶୁବମନ ଗିଲଙ୍କ ସହିତ ଶିବମ ଦୁବେ ବି ଫାଇଦା ଉଠାଇ ପାରିନାହାନ୍ତି । କଲମ୍ବୋରେ ଆଜି ବର୍ଷାର ପୂର୍ବାନୁମାନ ରହିଥିଲେ ମଧ୍ୟ ମ୍ୟାଚ୍ ସମ୍ପୂର୍ଣ୍ଣ ଧୋଇଯିବା ଭଳି ପରିସ୍ଥିତି ଆସିବ ନାହିଁ ।
ଦୁଇଦିନ ଯାଏ ରାଜ୍ଯରେ ପ୍ରବଳ ବର୍ଷା; ୯ ଜିଲ୍ଲାକୁ ଅରେଞ୍ଜ ଆଲର୍ଟ
ଭୁବନେଶ୍ୱର : ରାଜ୍ଯରେ ପ୍ରବଳ ବର୍ଷା । ଗାଙ୍ଗେୟ ପଶ୍ଚିମବଙ୍ଗ ଓ ଆଖପାଖରେ ଘୂର୍ଣ୍ଣିବଳୟ ଓ ସକ୍ରିୟ ମୌସୁମୀ ନିମ୍ନ ଚାପରେଖା ପାଇଁ ଓଡ଼ିଶାରେ ହେଉଛି ନିର୍ଧୁମ ବର୍ଷା । ଆସନ୍ତା ଦୁଇଦିନ ଯାଏ ଏଭଳି ବର୍ଷା ଜାରି ରହିବ ବୋଲି ସତର୍କତା ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଏଥିପାଇଁ ୯ଟି ଜିଲ୍ଲାକୁ ଅରେଞ୍ଜ ଆଲର୍ଟ ଜାରି ହୋଇଛି । କଟକ, ନୟାଗଡ, ଅନୁଗୁଳ, ବୈାଦ୍ଧ, ସୁନ୍ଦରଗଡ, ଝାରସୁଗୁଡା, କୋରାପୁଟ, ନବରଙ୍ଗପୁର ଓ ମାଲକାନଗିରି ଜିଲ୍ଲାକୁ ସତର୍କତା ଜାରି କରାଯାଇଛି । ଏହିସବୁ ଜିଲ୍ଲାରେ ୭୦ରୁ ୨୦୦ମିଲିମିଟର ଯାଏଁ ବର୍ଷା ସମ୍ଭାବନା ରହିଛି ।
ବର୍ଷା ପ୍ରଭାବରେ କମିବ ଦୃଶ୍ୟମାନ ଦୂରତା, ସୃଷ୍ଟି ହେବ ଟ୍ରାଫିକ ସମସ୍ୟା । ଭାଙ୍ଗିବ କଚ୍ଚା ଘର, ପ୍ରଭାବିତ ହେବ କଚ୍ଚା ରାସ୍ତା । ତଳିଆ ଅଞ୍ଚଳରେ ସୃଷ୍ଟି ହେବ ଜଳବନ୍ଦୀ ସ୍ଥିତି । ପାହାଡିଆ ଅଞ୍ଚଳରେ ଭୂସ୍ଖଳର ପରିସ୍ଥିତି ଉପୁଜିପାରେ । ସେହିଭଳି ପ୍ରବଳ ବର୍ଷା ପାଇଁ ୮ଟି ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି । ସୁନ୍ଦରଗଡ଼, ଦେବଗଡ଼, ଝାରସୁଗୁଡ଼ା, ସମ୍ବଲପୁର,ବରଗଡ଼, ନବରଙ୍ଗପୁର, କୋରାପୁଟ, ମାଲକାନଗିରିରେ ପ୍ରବଳ ବର୍ଷା ସମ୍ଭାବନା ରହିଛି । ୯ ତାରିଖ ପର୍ଯ୍ୟନ୍ତ ରାଜ୍ୟରେ ଏଭଳି ବର୍ଷା ଲାଗି ରହିବ । ସେପଟେ ଜୁନ ମାସରୁ ଏବେ ସୁଦ୍ଧା ରାଜ୍ୟରେ ୧୧ ପ୍ରତିଶତ ନିଅଣ୍ଟିଆ ବର୍ଷା ରେକର୍ଡ ହୋଇଛି।
ଆଜିଠୁ ତିନିଦିନିଆ ନିବେଶକ ସମ୍ମିଳନୀ; ଇନଭେଷ୍ଟର୍ସଙ୍କ ସହ ହେବ ୱାନ ଟୁ ୱାନ
ଭୁବନେଶ୍ୱର : ଆଜିଠୁ ତିନିଦିନିଆ ନିବେଶକ ସମ୍ମିଳନୀ କରିବେ ରାଜ୍ଯ ସରକାର । ୯ ତାରିଖ ପର୍ଯ୍ୟନ୍ତ ପୁନେ ଓ ଅହମ୍ମଦାବାଦରେ ଆୟୋଜିତ ହେବ ଏହି ସମ୍ମିଳନୀ । ଏହା ହେବ ମୋହନ ସରକାରଙ୍କ ପ୍ରଥମ ନିବେଶକ ସମ୍ମିଳନୀ । ଅଟୋମୋବାଇଲ, ଫୁଡ ପ୍ରୋସେସିଂ, ଡାଉନ ଷ୍ଟ୍ରିମ ଇଣ୍ଡଷ୍ଟ୍ରି, ମେଟାଲ କ୍ଷେତ୍ରରେ ନିବେଶକଙ୍କ ସହ ୱାନ ଟୁ ୱାନ ଓ ଗୋଲ ଟେବୁଲ ବୈଠକ କରିବେ ଶିଳ୍ପ ବିଭାଗର ଅଧିକାରୀ। ସମ୍ମିଳନୀରେ ଶିଳ୍ପ ମନ୍ତ୍ରୀ ସମ୍ପଦ ସ୍ଵାଇଁ, ଶିଳ୍ପ ସଚିବ, ଏମଏସଏମଇ ମନ୍ତ୍ରୀଙ୍କ ସହ ଅନ୍ୟ ଅଧିକାରୀ ଏଥିରେ ଯୋଗଦେବେ । ୨୦୨୯ ସୁଦ୍ଧା ଅଢେଇ ଲକ୍ଷ କୋଟି ଟଙ୍କାରୁ ଅଧିକ ପୁଞ୍ଜି ନିବେଶ ଆଣିବାକୁ ଲକ୍ଷ୍ୟ ରଖିଛନ୍ତି ସରକାର । ଚଳିତ ବର୍ଷ ଉତ୍କଳ ଉତ୍କର୍ଷ ସମ୍ମିଳନୀ ଆୟୋଜନ କରି ଅଧିକ ପୁଞ୍ଜି ଆଣିବାକୁ ସରକାର ଲକ୍ଷ୍ୟ ରଖିଛନ୍ତି ।
ଆଜି ଶ୍ରୀଜିଉଙ୍କ ବନକଲାଗି, ଅପରାହ୍ମ ୫ଟାରୁ ରାତି ୯ ଯାଏଁ ଦର୍ଶନ ବନ୍ଦ
ପୁରୀ : ଆଜି ଶ୍ରାବଣ ଶୁକ୍ଲ ପକ୍ଷ ତୃତୀୟା ତିଥି । ଶ୍ରୀମନ୍ଦିରରେ ଅନୁଷ୍ଠିତ ହେବ ବନକଲାଗି ନୀତି । ଦତ୍ତ ମହାପାତ୍ର ସେବକମାନଙ୍କ ଦ୍ୱାରା ଏହି ଗୁପ୍ତ ନୀତି ସମ୍ପାଦନ କରାଯିବ। ପ୍ରାକୃତିକ ରଙ୍ଗରେ ଶ୍ରୀଜିଉଙ୍କ ଶ୍ରୀମୁଖ ଶୃଙ୍ଗାର କରାଯିବ।ଏଣୁ ଦ୍ୱିତୀୟ ଭୋଗମଣ୍ଡପ ଶେଷ ହେବା ପରେ ଆପାତତଃ ଅପରାହ୍ନ ୫ ଘଟିକାରୁ ରାତ୍ର ୯ ଘଟିକା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରହିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି।
ସ୍ବପ୍ନରେ ରହିଗଲା ଭାରତର ଅଲିମ୍ପିକ୍ସ ଫାଇନାଲ ସ୍ବପ୍ନ
ନୂଆଦିଲ୍ଲୀ : ପୁଣିଥରେ ହାତଛଡ଼ା ହୋଇଗଲା ସୁଯୋଗ । ଟୋକିଓ ଭଳି ପ୍ଯାରିସରେ ବି ଫାଇନାଲର ଗୋଟିଏ ପାଦ ଆଗରୁ ହାରିଗଲା ଟିମ୍ ଇଣ୍ଡିଆ । ପ୍ଯାରିସ ଅଲିମ୍ପିକ୍ସ ସେମିଫାଇନାଲ ମୁକାବିଲାରେ ଜର୍ମାନୀଠାରୁ ୩-୨ ଗୋଲରେ ହାରି ବ୍ରୋଞ୍ଜ ଲଢେଇ କରିବାକୁ ପ୍ରସ୍ତୁତ ହୋଇଛି ଭାରତ । ଗତକାଲି ଆୟୋଜିତ ସେମିଫାଇନାଲ ମୁକାବିଲାରେ ପ୍ରଥମ କ୍ବାର୍ଟରରୁ ହିଁ ଭାରତକୁ ଆକ୍ରମଣାତ୍ମକ ଢଙ୍ଗରେ ଖେଳୁଥିବା ଦେଖିବାକୁ ମିଳିଥିଲା ।
ଦ୍ବିତୀୟ ମିନିଟରେ ଭାରତ ପାଇଁ ପ୍ରଥମ ପେନାଲ୍ଟି କର୍ଣ୍ଣର ଅର୍ଜନ କରିଥିଲେ ହାର୍ଦ୍ଦିକ ସିଂହ। ସପ୍ତମ ମିନିଟ୍ରେ ହର୍ମନପ୍ରୀତ୍ ପ୍ରଥମ ଗୋଲ୍ ଦେଇଥିଲେ । ପ୍ରଥମ କ୍ବାର୍ଟରକୁ ଭାରତ ୧-୦ରେ ଶେଷ କରିଥିଲେ ମଧ୍ୟ ୧୮ ମିନିଟ୍ରେ ଗଞ୍ଜାଲୋ ପିଲାଟଙ୍କ ଶକ୍ତିଶାଳୀ ସଟ୍ ମ୍ଯାଚକୁ ବରାବର ସ୍ଥିତିକୁ ନେଇଯାଇଥିଲା । ୨୭ତମ ମିନିଟ୍ରେ ଭାରତ ୧-୨ରେ ପଛୁଆ ହୋଇ ଚାପରେ ପଡ଼ିଥିଲା ।
ତୃତୀୟ କ୍ବାର୍ଟର ପ୍ରାରମ୍ଭରୁ ଭାରତ ଏକାଧିକ ପେନାଲ୍ଟି କର୍ଣ୍ଣରକୁ ଗୋଲରେ ପରିଣତ କରିବାରେ ବିଫଳ ହୋଇଥିଲା । ୩୬ତମ ମିନିଟରେ ଅଭିଷେକ ଆଉ ଏକ ପିସି ଅର୍ଜନ କରିଥିଲେ। ହର୍ମନପ୍ରୀତଙ୍କ ହିଟ୍ ଫେରି ଆସୁଥିବାବେଳେ ସୁଖଜିତ୍ ସିଂହ ଏହାକୁ ଗୋଲରେ ପରିଣତ କରି ମ୍ୟାଚ୍କୁ ବରାବର ସ୍ତରକୁ ଆଣିଥିଲେ । ହେଲେ ୫୪ ମିନିଟ ସମୟରେ ଭାରତର ସ୍ବପ୍ନରୁ ଚୁରମାର କରିଦେଇଥିଲା ଜର୍ମାନୀ । ଅନ୍ଯପଟେ ନେଦରଲାଣ୍ଡସ ୨୦୧୨ ପରେ ପ୍ରଥମ ଥର ଫାଇନାଲ୍ରେ ପ୍ରବେଶ କରିଛି । ସ୍ବର୍ଣ୍ଣ ପଦକ ପାଇଁ ଜର୍ମାନୀ-ନେଦରଲାଣ୍ଡ୍ସ ଏବଂ କାଂସ୍ୟ ପାଇଁ ଭାରତ-ସ୍ପେନ୍ ମୁକାବିଲା ହେବ।
ରଣକ୍ଷେତ୍ର ପାଲଟିଲା ମାଷ୍ଟରକ୍ୟାଣ୍ଟିନ ଛକ, ମୋ ବସର ଡ୍ରାଇଭର ଓ କଣ୍ଡକ୍ଟରଙ୍କୁ ମାଡ଼
ନନ୍ଦିଘୋଷ ବ୍ୟୁରୋ: ଦୁର୍ଘଟଣାକୁ କେନ୍ଦ୍ରକରି ତୁମୁଳକାଣ୍ଡ । ରଣକ୍ଷେତ୍ର ପାଲଟିଲା ମାଷ୍ଟରକ୍ୟାଣ୍ଟିନ ଛକ । ନନ୍ଦିଘୋଷ ଟିଭି ହାତରେ ଲାଗିଛି Exclusive ଭିଜୁଆଲ। ମୋ ବସର ଡ୍ରାଇଭର ଓ କଣ୍ଡକ୍ଟରଙ୍କୁ ମାଡ଼ । ଏଭଳି ଘଟଣା ଘଟିଛି ମାଷ୍ଟର କ୍ୟାଣ୍ଟିନ ଛକ ନିକଟରେ। ରାତି ପ୍ରାୟ ୧୦ଟା ସମୟରେ ମୋ ବସ ଏକ କାରକୁ ଧକ୍କା ଦେବା ସହ ଜଣେ ମହିଳାଙ୍କ ଉପରେ ଚଢାଇ ଦେଇଥିଲା । ଯାହାକୁ ନେଇ ଆରମ୍ଭ ହୋଇଥିଲା ଗଣ୍ଡଗୋଳ। ଲୋକେ ଏକାଠି ହୋଇ ବସ ଭଙ୍ଗାରୁଜା କରିଛନ୍ତି । ୫ରୁ ଅଧିକ ମୋ ବସକୁ ଅଟକାଇ ରଖିବା ସହ ଭଙ୍ଗାରୁଜା କରିଛନ୍ତି। ପୋଲିସ ଉପସ୍ଥିତ ଥିଲେ ମଧ୍ୟ ଉତ୍ତ୍ୟକ୍ତ ଲୋକଙ୍କୁ ଶାନ୍ତ କରିପାରିଲା ନାହିଁ । କ୍ୟାପିଟାଲ ଥାନା ଓ ଖାରବେଳନଗର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରୁଛି ।
ଫାଇନାଲରେ ଭିନେଶ ଫୋଗଟ
ନନ୍ଦିଘୋଷ ବ୍ୟୁରୋ: କୁସ୍ତି ଫାଇନାଲରେ ଭିନେଶ ଫୋଗଟ । ପ୍ୟାରିସ ଅଲିମ୍ପିକ୍ସରେ ନିଜର ପଦକକୁ ପକ୍କା କରିଛନ୍ତି ଭିନେଶ । ୫୦ କେଜି ଫ୍ରିଷ୍ଟାଇଲରେ ଫାଇନାଲକୁ ଉତ୍ତୀନ୍ନ ହୋଇଛନ୍ତି । କ୍ଯୁବାର ଲୋପେଜଙ୍କୁ ୫-୦ରେ ହରାଇ ଫାଇନାଲରେ ପହଞ୍ଚିଛନ୍ତି ଭିନେଶ । ଏବେ ଫାଇନାଲରେ ଜିତିଲେ ଭିନେଶ ଫୋଗଟ ସ୍ବର୍ଣ୍ଣ ବିଜୟ ଲାଭ କରିବେ । ଯଦି ସେ ଫାଇନାଲରେ ପରାସ୍ତ ହୁଅନ୍ତି ତେବେ ରୌପ୍ଯ ପଦକ ଜିତିବେ ।
ଭୁବନେଶ୍ବରରେ ଉଦଘାଟିତ ହେଲା ଜାତୀୟ ସନ୍ତରଣ ପ୍ରତିଯୋଗିତା
ନନ୍ଦିଘୋଷ ବ୍ୟୁରୋ: ଭୁବନେଶ୍ବରରେ ଉଦଘାଟିତ ହୋଇଛି ଜାତୀୟ ସନ୍ତରଣ ପ୍ରତିଯୋଗିତା। ଭୁବନେଶ୍ବର କଳିଙ୍ଗ ଷ୍ଟାଡିୟମ ଠାରେ ଏହି ସନ୍ତରଣ ଆରମ୍ଭ ହୋଇଛି। ୫୦ ତମ ଜୁନିଅର ଓ ୪୦ ତମ ସବ ଜୁନିଅର ବିଭାଗରେ ଏହି ଜାତୀୟ ପ୍ରତିଯୋଗିତା କରାଯାଇଛି। ପ୍ରତିଯୋଗିତାରେ ମୁଖ୍ୟ ଅତିଥି ଭାବେ ରାଜସ୍ବ ମନ୍ତ୍ରୀ ସୁରେଶ ପୂଜାରୀ ପ୍ରତିଯୋଗିତାକୁ ଉଦଘାଟନ କରିଥିଲେ। ଆଜିଠାରୁ ଆରମ୍ଭ ହୋଇଥିବା ଏହି ପ୍ରତିଯୋଗିତା ଆସନ୍ତା ୧୧ ତାରିଖ ପର୍ଯ୍ୟନ୍ତ କରାଯିବାର ବ୍ୟବସ୍ଥା କରାଯାଇଛି। ଏଥିରେ ଦେଶର ବିଭିନ୍ନ ରାଜ୍ୟରୁ ୯ ସହରୁ ଉର୍ଦ୍ଧ ପ୍ରତିଯୋଗୀ ଭାଗ ନେଇଛନ୍ତି। ଏହି ପ୍ରତିଯୋଗିତା ଭାରତୀୟ ସନ୍ତରଣ ମହାସଂଘ, ଓଡ଼ିଶା ରାଜ୍ୟ ସନ୍ତରଣ ସଂଗଠନ , ଓଡ଼ିଶା ରାଜ୍ୟ କ୍ରୀଡା ଓ ଯୁବସେବା ବିଭାଗର ମିଳିତ ଆନୁକୂଲ୍ୟରେ ଆୟୋଜିତ ହୋଇଛି ।
ବିଜେପି ବିଧାୟକ ପଦ୍ମଲୋଚନ ପଣ୍ଡାଙ୍କ ଦବଙ୍ଗଗିରି
ନନ୍ଦିଘୋଷ ବ୍ୟୁରୋ: ବାଲେଶ୍ବର ଜିଲ୍ଲା ସିମୁଳିଆ ବିଜେପି ବିଧାୟକ ପଦ୍ମଲୋଚନ ପଣ୍ଡାଙ୍କ ଦବଙ୍ଗଗିରି । ଡ଼୍ୟୁଟିରେ ଥିବା ସିମୁଳିଆ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ମେଡ଼ିକାଲ ଅଫିସର ଡ଼ାକ୍ତର ସନ୍ତୋଷ କୁମାର ସାହୁଙ୍କୁ ଦୁର୍ବ୍ୟବହାର । ଘଟଣାକୁ ନିନ୍ଦା କଲା
ଓଡ଼ିଶା ମେଡ଼ିକାଲ ସର୍ଭିସ୍ ଏସୋସିଏସନ୍ । ଏନେଇ ଓମସା ତରଫରୁ ମୁଖ୍ୟମନ୍ତ୍ରୀ ଓ ସ୍ବାସ୍ଥ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ଚେତାବନୀ ଦିଆଯାଇଛି । ସେପଟେ ବିଧାୟକ ପଦ୍ମଲୋଚନ ପଣ୍ଡା ସମ୍ବାଦିକ ସମ୍ମିଳନୀ ଜରିଆରେ ଡ଼ାକ୍ତର ସନ୍ତୋଷ ସାହୁଙ୍କ ବିରୁଦ୍ଧରେ ପାଲଟା ଅଭିଯୋଗ ଆଣିଛନ୍ତି । ଜଣେ ନିର୍ବାଚିତ ବିଧାୟକଙ୍କୁ ସାମ୍ବାଦିକ ସମ୍ମିଳନୀରେ ମାନସିକ ରୋଗୀ ବୋଲି କହି ସିମୁଳିଆ-ଖଇରା ବାସୀଙ୍କ ଭାବାବେଗକୁ ଆଘାତ କରିଛନ୍ତି । ତେଣୁ ଆସନ୍ତାକାଲି ସ୍ଥାନୀୟ ବାସିନ୍ଦା ମେଡ଼ିକାଲ ସମ୍ମୁଖରେ ଧାରଣାରେ ବସିବେ ବୋଲି ଘୋଷଣା କରିଛନ୍ତି ବିଧାୟକ । ଗତ 3 ତାରିଖରେ ବିଧାୟକ ପଦ୍ମଲୋଚନ ପଣ୍ଡା ନିର୍ବାଚିତ ପ୍ରତିନିଧି ଓ ସମର୍ଥକଙ୍କ ସହିତ ଡ଼ାକ୍ତରଖାନା ପରିଦର୍ଶନରେ ଯାଇଥିଲେ ।