ଜୟପୁର : ଭିଜିଲାନ୍ସ ଜାଲରେ ଡାକ୍ତର ଓ ଫାର୍ମାସିଷ୍ଟ। କୋରାପୁଟ ଜିଲ୍ଲା ବୈପାରିଗୁଡ଼ା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଡ଼ାକ୍ତର ଓ ଫାର୍ମାସିଷ୍ଟ ଡଣେ ଠିକାଭିତ୍ତିକ ନର୍ମିଂ ଅଫିସରଙ୍କ ଠାରୁ ତାଙ୍କ ବକେୟା ଟଙ୍କା ରିଲିଜ କରିବାକୁ ୧୦ ପ୍ରତିଶତ ଲାଞ୍ଚ ମାଗୁଥିଲେ । ଏପିରିକି ଲାଞ୍ଚ ନଦେଲେ ନର୍ସିଂ ଅଫିସରଙ୍କୁ ଉପାନ୍ତ ଅଞ୍ଚଳକୁ ବଦଳି କରିଦେବାକୁ ଧମକ ଦେଉଥିଲେ । ଆଜି ଫାର୍ମାସିଷ୍ଟଙ୍କ ଜରିଆରେ ଲାଞ୍ଚ ନେବା ବେଳେ ବୈପାରିଗୁଡା ଗୋଷ୍ଠି ସ୍ବାସ୍ଥ୍ୟ କେନ୍ଦ୍ରର ଭାରପ୍ରାପ୍ତ ମେଡିକାଲ ଅଫିସର ବିଶ୍ବଜିତ ଭୂୟାଁ ଓ ଫାର୍ମାସିଷ୍ଟ ଉତ୍ତମ ମହାଙ୍କୁଡଙ୍କୁ ଗିରଫ କରିଛି ଭିଜିଲାନ୍ସ । ଅଭିଯୋଗକାରୀ ବୈପାରିଗୁଡା ଗୋଷ୍ଠି ସ୍ବାସ୍ଥ୍ୟ କେନ୍ଦ୍ରରେ ଠିକାଭିତ୍ତିକ ନର୍ସିଂ ଅଫିସର ଭାବରେ କାର୍ଯ୍ୟ କରୁଥିଲେ। ଗତ ଜୁଲାଇ ମାସରେ ସରକାର ତାଙ୍କ ଚାକିରି ନିୟମିତ କରିବା ସହ ତାଙ୍କ ବକେୟା ଦରମା ରିଲିଜ କରିସାରିଛନ୍ତି । ୨୦୨୨ ଅକ୍ଟୋବର ମାମରୁ ବକେୟା ବାବଦରେ ୪ ଲକ୍ଷ ୮୩ ହଜାର ୫୭୨ ଟଙ୍କା ସରକାର ରିଲିଜ କରିଛନ୍ତି । ଏହି ଟଙ୍କା କିନ୍ତୁ ପ୍ରଦାନ କରିବାକୁ ମେଡିକାଲ ଅଫିସର ଡାକ୍ତର ଭୂୟାଁ ୧୦ ପ୍ରତିଶତ ଅର୍ଥାତ ୪୦ ହଜାର ଟଙ୍କା ମାଗୁଥିଲେ । ବାରମ୍ବାର ଅନୁରୋଧ କରି ହତାସ ହେବା ପରେ ଅଭିଯୋଗକାରୀ ଭିଜିଲାନ୍ସରେ ଅଭିଯୋଗ କରିଥିଲେ ।
ନିର୍ମାଣ ହେବାକୁ ଯାଉଛି ୭୮୩ କିମି ବିଶିଷ୍ଟ ଏକ୍ସପ୍ରେସ ଓ୍ବେ
ଭୁବନେଶ୍ବର : ଓଡ଼ିଶା ପରିବହନ ଓ ଯୋଗାଯୋଗ କ୍ଷେତ୍ରରେ ଯୋଡି ହେବ ଆଉ ଏକ ମାଇଲ ଖୁଣ୍ଟ । ଖୁବ ଶୀଘ୍ର ନିର୍ମାଣ ହେବାକୁ ଯାଉଛି ୭୮୩ କିମି ବିଶିଷ୍ଟ ଏକ୍ସପ୍ରେସ ଓ୍ବେ । ଏହି ନୂଆ ଏକ୍ସପ୍ରେସ ଓ୍ବେ ଖଡଗପୁରରୁ ବିଶାଖାପାଟଣା ପର୍ଯ୍ୟନ୍ତ ନିର୍ମାଣ କରାଯିବ । ୪ ଲେନ ଓ ୬ ଲେନ ବିଶିଷ୍ଟ ଏହି ରାସ୍ତାର ଡିପିଆର ପ୍ରସ୍ତୁତି ପାଇଁ ଜାତୀୟ ରାଜପଥ କର୍ତ୍ତୃପକ୍ଷ ଟେଣ୍ଡର ଆହ୍ବାନ କରିଛନ୍ତି । ଖୁସିର କଥା ହେଲା ୧୮ଟି ସଂସ୍ଥା ଏଥିପାଇଁ ଆଗ୍ରହ ପ୍ରକାଶ କରିଛନ୍ତି । ଆସନ୍ତା ୨୦୨୬ ସୁଦ୍ଧା ଏହି ପ୍ରକଳ୍ପର ଡିପିଆର ପ୍ରସ୍ତୁତ ଶେଷ ହେବ ବୋଲି ଲକ୍ଷ୍ୟ ରଖାଯାଇଛି । ୭୮୩ ବିଶିଷ୍ଟ ଏହି ସୁଦୀର୍ଘ ରାସ୍ତା ୨ଟି ପ୍ୟାକେଜରେ ବିଭକ୍ତ କରାଯାଇଛି । ପ୍ୟାକେଜ ୧ ରେ ଖଡ଼ଗପୁରରୁ ଟାଙ୍ଗୀ ପର୍ଯ୍ୟନ୍ତ ୩୯୦ କମି ରାସ୍ତା ନିର୍ମାଣ ହେବାକୁ ଥିବା ବେଳେ ପ୍ୟାକେଜ ୨ ରେ ଟାଙ୍ଗୀରୁ ବିଶାଖାପାଟଣା ପର୍ଯ୍ୟନ୍ତ ୩୯୩ କିମି ରାସ୍ତା ନିର୍ମାଣ ହେବ । ଡିପିଆର ପ୍ରସ୍ତୁତି ପରେ ବିଭିନ୍ନ ଅନୁମିତି ପାଇଁ ଆବେଦନ କରାଯିବା । ୨୦୨୮ ସୁଦ୍ଧା ପ୍ରକଳ୍ପ କାମ ଆରମ୍ଭ ହେବାକୁ ଲକ୍ଷ୍ୟ ରଖାଯାଇଛି । ଏହି ଏକ୍ସପ୍ରେସ ଓ୍ବେ ନିର୍ମାଣ ହେଲେ ଖଡଗପୁରରୁ ବିଶାଖାପାଟଣାକୁ ଯାତ୍ରାର ସମୟ ହ୍ରାସ ପାଇବ । ଏହା ସହ ଯାନବାହାନ ଜନିତ ଭିଡ ନିୟନ୍ତ୍ରଣ ହେବ ବୋଲି କୁହାଯାଉଛି । ଭାରତମାଳା ଯୋଜନାରେ ନିର୍ମାଣ କରାଯିବାକୁ ଥିବା ଏହି ଏକ୍ସପ୍ରେସ ୱେ ଓଡିଶା, ଆନ୍ଧ୍ରପ୍ରଦେଶ ଓ ପଶ୍ଚିମବଙ୍ଗକୁ ଯୋଡିବ ।
ପୋଷ୍ଟ ଅଫିସରେ ଏନ୍ଏସ୍ଏସ୍ ଆକାଉଣ୍ଟ ବନ୍ଦ କଲେ ଦେବାକୁ ପଡ଼ିବ ଆୟକର
ଭୁବନେଶ୍ବର : ମୂଳ ନିଅ କି ସୁଧ ନିଅ । ଯେ କୌଣସି ହାଲରେ ଟିକସ ଦିଅ । ଟିକସ ନଦେଲେ ଟଙ୍କା ତୁମର ନୁହଁ । ଏ ହେଉଛି କେନ୍ଦ୍ର ସରକାରଙ୍କ ଜମାକାରୀ ମାରଣ ନୀତି । ଏଣିକି ବନ୍ଦ ହୋଇଥିବା ସ୍କିମର ଜମା ଟଙ୍କା ଉପରେ ଆୟକର ଦେବେ ଲୋକେ । ପୋଷ୍ଟ ଅଫିସରେ ନ୍ୟାସନାଲ ସେଭିଙ୍ଗ୍ସ ସ୍କିମ୍-ଏନ୍ଏସ୍ଏସ୍ ଆକାଉଣ୍ଟ ବନ୍ଦ କଲେ ଦେବାକୁ ପଡ଼ିବ ଆୟକର । ଅକ୍ଟୋବର ପହିଲାରୁ କେନ୍ଦ୍ର ସରକାର ଲାଗୁ କରିଛନ୍ତି ଏପରି ନୀତି । ମୂଳଜମା ଓ ସୁଧ ଉପରେ ଆୟକର ଦେବେ ଜମାକାରୀ । ମୂଳ ଉପରେ ପୂର୍ବରୁ କୌଣସି ଆୟକର ଦେବାକୁ ପଡ଼ୁନଥିଲା । ୧୯୮୭ରେ କେନ୍ଦ୍ର ସରକାର ଏନ୍ଏସ୍ଏସ୍ ସ୍କିମ୍ ଯୋଜନା ଆରମ୍ଭ କଲେ । ଯେଉଁଥିରେ ଜଣେ ବ୍ୟକ୍ତି ବର୍ଷକୁ ଦେଢ଼ ଲକ୍ଷ ଟଙ୍କା ପର୍ଯ୍ୟନ୍ତ ଜମା କରିପାରିବ । ଜମା ଉପରେ ବାର୍ଷିକ ୭.୫ ପ୍ରତିଶତ ହାରରେ ସୁଧ ବି ମିଳୁଥିଲା । ନୂଆ ନିୟମ ଅନୁଯାୟୀ ଚଳିତବର୍ଷ ସେପ୍ଟେମ୍ବର ୩୦ ତାରିଖ ପର୍ଯ୍ୟନ୍ତ ଏହି ସୁଧ ରାଶି ଜମାକାରୀଙ୍କ ଖାତାରେ ଜମା ହୋଇଯାଇଛି । ହେଲେ ଅକ୍ଟୋବର ପହିଲାରୁ ଆଉ ସେ ସ୍କିମରେ ସୁଧ ସୁବିଧାକୁ ହଟାଇ ଦେଇଛି କେନ୍ଦ୍ର ଅର୍ଥମନ୍ତ୍ରାଳୟ । ଏହାସହିତ ଏବେ ଏନ୍ଏସ୍ଏସ୍ ଜମାକାରୀ ଆକାଉଣ୍ଟ ବନ୍ଦ କରି ଟଙ୍କା ଉଠାଇଲେ ଉଭୟ ମୂଳ ଓ ସୁଧ ଉପରେ ୧୦ ପ୍ରତିଶତ ହାରରେ ଆୟକର ଗଣିବେ । କେନ୍ଦ୍ର ସରକାରଙ୍କ ଏପରି ନୀତି ସାଧାରଣରେ ଅସନ୍ତୋଷ ସୃଷ୍ଟି କରିଛି । ଲୋକଙ୍କ କଷ୍ଟାର୍ଜିତ ଜମା ଉପରେ ଟିକସ ବସାଇବା ଆଦୌ ଗ୍ରହଣୀୟ ନୁହେଁ । ଏହାଦ୍ବାରା ପେନସନଭୋଗୀ ବରିଷ୍ଠ ନାଗରିକଙ୍କ ଭିତରେ ଘୋର ଅସନ୍ତୋଷ ପ୍ରକାଶ ପାଇବ ।
୧୯୯୨ ମସିହାରେ କେନ୍ଦ୍ର ସରକାର ଏହି ପୋଷ୍ଟାଲ ଜମା ସ୍କିମଟିକୁ ବନ୍ଦ କରିଦେଲେ ସିନା ପୂର୍ବରୁ ଜମା କରିଥିବା ଜମାକାରୀଙ୍କ ଆକାଉଣ୍ଟ ସଚଳ ରହିବା ସହ ସୁଧ ବି ମିଳିଆସୁଥିଲା । ସେପଟେ ୨୪୦୦ ଟଙ୍କା ସୁଧ ଉପରେ କୌଣସି ଆୟକର ଦେବାକୁ ପଡ଼ୁନଥିଲା । ତାଠୁ ଅଧିକ ସୁଧ ଉପରେ ପୋଷ୍ଟ ଅଫିସ ଟିଡିଏସ୍ କାଟୁଥିଲେ । ପୋଷ୍ଟାଲ କର୍ତ୍ତୃପକ୍ଷଙ୍କ କହିବା କଥା ଯେହେତୁ ଏହି ଜମା ଯୋଜନାଟିକୁ ଦୀର୍ଘବର୍ଷରୁ କେନ୍ଦ୍ର ସରକାର ବନ୍ଦ କରି ଦେଇଛନ୍ତି । ସେହି ଆକାଉଣ୍ଟ ହୋଲଡରଙ୍କୁ ଆଉ କୌଣସି ସୁଧ ଅର୍ଥ ଦେବାକୁ ଚାହୁଁନାହାନ୍ତି । ଫଳରେ ଧୀରେ ଧୀରେ ଜମାକାରୀ ଏହି ଆକାଉଣ୍ଟ୍କୁ ବନ୍ଦ କରି ଟଙ୍କା ଉଠାଇବାକୁ ବାଧ୍ୟ ହେବେ । ଏନ୍ଏସ୍ଏସ୍ ଜମାକାରୀଙ୍କୁ ଏଥିପାଇଁ ମୁଖ୍ୟ ଡାକଘରକୁ ଆସି ଟଙ୍କା ଉଠାଇବାକୁ ପଡ଼ିବ । ଏପରି ଜମାକାରୀ ଆସିବାମାତ୍ରେ ସେମାନଙ୍କ ଆକାଉଣ୍ଟ୍ ବନ୍ଦ କରିବାକୁ ପୋଷ୍ଟ ଅଫିସ ପକ୍ଷରୁ ପରାମର୍ଶ ଦିଆଯାଉଛି ।
କେନ୍ଦ୍ର ସରକାରଙ୍କୁ ଘାରିଛି ଟିକସ ଚିନ୍ତା । ଚୁଡ଼ା, ମୁଢ଼ି ପ୍ୟାକେଟ୍ ଉପରେ ଜିଏସ୍ଟି ଛାଡ଼ିଲେନି । ଏବେ ଲୋକଙ୍କ ମୂଳ ଜମା ଉପରେ ଆୟକର ବସାଇ ସିଧା ସିଧା ପକେଟ୍ କାଟିବା ଯୋଜନା କରିଛନ୍ତି । କେନ୍ଦ୍ର ଅର୍ଥମନ୍ତ୍ରାଳୟର ଏପରି ନୀତି ଜନ କଲ୍ୟାଣକାରୀ ନା ଜନ ମାରଣ ନୀତି ତାକୁ ନେଇ ବୁଦ୍ଧିଜୀବୀ ପ୍ରଶ୍ନ ଉଠାଇଛନ୍ତି ।
ବିଜେପି ସହିପାରୁନି ବିଜେଡିର ଲୋକପ୍ରିୟତା : ବିଜେଡି
ଭୁବନେଶ୍ବର : ପଦଯାତ୍ରାକୁ ମିଳୁଛି ଅଭୂତପୂର୍ବ ସଫଳତା । ଟାର୍ଗେଟ ପୂରଣ କରିଛି ବିଜେଡିର ସଭ୍ୟ ସଂଗ୍ରହ ଅଭିଯାନ । ଲୋକେ ପୁଣି ଖୋଜିଲେଣି ନବୀନ ପଟ୍ଟନାୟକଙ୍କୁ । ବିଜେଡି କହିଲା ବିଜେପି ସହିପାରୁନି ବିଜେଡିର ଲୋକପ୍ରିୟତା । ଖାଦ୍ୟ ନପାଇ ଆଦିବାସୀଙ୍କ ଜୀବନ ଯାଉଛି । ରାଜ୍ୟରେ ବଢିଚାଲିଛି ଗଣଦୁର୍ଷମ। ବିପର୍ଯ୍ୟସ୍ତ ଆଇନ ଶୃଙ୍ଖଳା । ଧିମେଇଛି ବିକାଶ ଓ ଓଡ଼ିଶାର ହକ ପାଇଁ ଲଢେଇ। ୪ମାସରେ ମୋହନ ସରକାରଙ୍କ ବିଫଳତା ଜଳଜଳ କରି ଦିଶୁଛି ଓଡ଼ିଶାବାସୀଙ୍କ ଆଗରେ । ଅନ୍ୟପଟେ ବିଜେଡ଼ିର ପଦଯାତ୍ରାକୁ ଅଭୂତପୂର୍ବ ସଫଳତା ମିଳିବା ସହ ଦଳର ସଭ୍ୟ ସଂଗ୍ରହ ଟାର୍ଗେଟ ପୂରଣ ହେବାରେ ଲାଗିଛି। ଲୋକେ ଏହାକୁ ଦେଖି ୟୁଟର୍ଣ୍ଣ ମାରିଲେଣି। ପୁଣି ନିଜର ପ୍ରିୟନେତା ନବୀନ ପଟ୍ଟନାୟକଙ୍କୁ ଖୋଜିଲେନି ରାଜ୍ଯବାସୀ। ଏହାକୁ ସହିପାରୁନାହାନ୍ତି ସରକାରରେ ଥିବା ବ୍ୟକ୍ତି ଓ ବିଜେପି ନେତା । ନୂଆ ସରକାର ଶାସନ କଳକୁ ଠିକ ଚଳାଇ ନପାରି ବ୍ୟାକଫୁଟକୁ ଚାଲିଯାଇଛି। ବିଜେଡ଼ି ବିରୋଧରେ ଗୁଜବ ଓ ରାଜ୍ୟନୈତିକ ବୟାନବାଜି ରଖି ଓଡ଼ିଶାବାସୀଙ୍କୁ ବିଭ୍ରାନ୍ତ କରିବାକୁ ଲାଗିଛି ବିଜେପି। ବିଜେଡ଼ି ଆଜି ବି ରାଜ୍ୟରେ ସବୁଠୁ ଲୋକପ୍ରିୟ ଦଳ ଯାହା ପ୍ରକାଶ ପାଉଛି ପଦଯାତ୍ରାରୁ।
ଦୁଇଟି ପର୍ଯ୍ୟାୟରେ ପଦଯାତ୍ରା ଓ ସଭ୍ୟ ସଂଗ୍ରହ ଅଭିଯାନ କରି ସଫଳତା ସାଉଁଟିଛି ବିଜେଡି । ସୁପ୍ରିମୋ ନବୀନ ପଟ୍ଟନାୟକଙ୍କ ଆହ୍ବାନରେ ତୃଣମୂଳସ୍ତରରୁ ଅଧିକ ଶକ୍ତିଶାଳୀ ହେଉଛି ଦଳ । ରାଜନୈତିକ ସମୀକ୍ଷକଙ୍କ ଆକଳନ- ପ୍ରଥମଥର ଲାଗି ଓଡ଼ିଶାରେ ସଶକ୍ତ ବିରୋଧୀ ଦଳ ଭାବେ ବିଜେଡ଼ି ଭୂମିକା ତୁଲାଇଛି। ବିରୋଧୀ ଦଳ ସରକାରଙ୍କ ଦୋଷ ଦୁର୍ବଳତାକୁ ଯେତେ ସାମ୍ନାକୁ ଆଣିବ ତାହା ଗଣତାନ୍ତ୍ରିକ ଶାସନ ବ୍ୟବସ୍ଥାକୁ ଅଧିକ ମଜଭୁତ କରିବ। ବିଜେଡି ଭାଙ୍ଗିଯିବ ବୋଲି ଚାଲିଥିବା ବୟାନବାଜିର ପ୍ରଭାବ ଲୋକଙ୍କ ଉପରେ ପଡିବନି ବୋଲି କହିଛନ୍ତି ରାଜନୀତି ବିଶେଷଜ୍ଞ। ଏହି ପ୍ରସଙ୍ଗକୁ ନେଇ ମୁହାଁମୁହିଁ ହୋଇଛନ୍ତି ବିଜେଡି ଓ ବିଜେପି। ୨୫ ବର୍ଷ ଧରି ବିଜେଡି କ୍ଷମତାରେ ରହି ଓଡ଼ିଶାବାସୀଙ୍କ ସେବା କରିଛି । ଏବେ ବିରୋଧୀ ଦଳ ଭାବେ ବି ନିଜର ଭୂମିକା କରୁଛି ନିର୍ବାହ।
ଆମ୍ବ ଟାକୁଆ ଖାଇ ମୃତ୍ୟୁ ଘଟଣା : ଚପାଇ ଦେବା ଷଡ଼ଯନ୍ତ୍ରର ପୋଲ୍ ଖୋଲିଲେ ଜନସ୍ଵାସ୍ଥ୍ୟ ନିର୍ଦ୍ଦେଶକ
ଭୁବନେଶ୍ବର : ଆମ୍ବ ଟାକୁଆ ଖାଇ ମୃତ୍ୟୁ ଘଟଣାକୁ ଭିନ୍ନ ରୂପ ଦେଇ ଚପାଇ ଦେବାକୁ ଅପଚେଷ୍ଟା। ଗତକାଲି ଫରେନସିକ ରିପୋର୍ଟକୁ କେହି ଜଣେ ଭାଇରାଲ କରି ପାଣିରେ ହାଇଡ୍ରୋଜେନ ସଲଫାଇଡ୍ ଥିବା ଖବର ପ୍ରକାଶ କରାଯାଇଥିଲା। ପୋଷ୍ଟ ମର୍ଟମ ରିପୋର୍ଟ ନ ଆସୁଣୁ, ହାଇଡ୍ରୋଜେନ ସଲଫାଇଡ୍ ଯୋଗୁଁ ମୃତ୍ୟୁ ହୋଇଛି ବୋଲି କୁହାଗଲା। ହେଲେ ଆଜି ଜନସ୍ବାସ୍ଥ୍ୟ ନିର୍ଦ୍ଦେଶଙ୍କ ବୟାନ ପୁରା ଘଟଣାର ସତ ସାମ୍ନାକୁ ଆଣିଛି। ସେ କହିଛନ୍ତି, ହାଇଡ୍ରୋଜେନ ସଲଫାଇଡରେ ଏହି ମୃତ୍ୟୁ ହୋଇ ପାରିବ ନାହିଁ। କାରଣ ହାଇଡ୍ରୋଜେନ ସଲଫାଇଡ୍ ମିଶା ପାଣିରୁ ଝାଡ଼ା ବାନ୍ତିର ଲକ୍ଷଣ ଦେଖାଯାଏ। କିନ୍ତୁ କନ୍ଧମାଳର ଦୁଇ ମୃତକଙ୍କ ପାଖରେ ଏହା ଦେଖାଯାଇନି। ଯେଉଁ ରିପୋର୍ଟ ଭାଇରାଲ ହେଉଛି, ତାହା ଦ୍ଵନ୍ଦ୍ଵ ସୃଷ୍ଟି କରୁଥିବା ଜନସ୍ବାସ୍ଥ୍ୟ ନିର୍ଦ୍ଦେଶକ କହିବା ପରେ ଉଠିଛି ଅନେକ ପ୍ରଶ୍ନ। ଫରେନସିକ୍ ରିପୋର୍ଟ ଭାଇରାଲ ହେଲା କେମିତି ? ଆମ୍ଵ ଟାକୁଆ ଖାଇ ମୃତ୍ୟୁକୁ ଘୋଡ଼ାଇବାକୁ ଜାଣି ଶୁଣି ଭାଇରାଲ କଲେ କି ସରକାର ?
ମାଣ୍ଡିପଙ୍କା ଗାଁରେ ଠିକ୍ ସମୟରେ ଚାଉଳ ବଣ୍ଟା ଯାଇ ନଥିଲା। ଆମ୍ବ ଟାକୁଆ ଖାଇ ଦୁଇ ଜଣଙ୍କ ମୃତ୍ୟୁ ପରେ ତରବରିଆ ଭାବେ ଚାଉଳ ବଣ୍ଟା ଗଲା। ଲୋକଙ୍କୁ ଚାଉଳ ମିଳିଥିଲା ବୋଲି ଯୋଗାଣ ମନ୍ତ୍ରୀ କୃଷ୍ଣ ପାତ୍ର ବାରମ୍ବାର ମିଛ କହୁଛନ୍ତି। ଏହାକୁ କଡ଼ା ସମାଲୋଚନା କରିଛି ବିଜୁ ଜନତା ଦଳ। ଭୋକର ଭୂଗୋଳରୁ ଶସ୍ୟ ଶ୍ୟାମଳ ଓଡ଼ିଶା ଗଢିଥିଲେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ୨୦୨୨ ଖାଦ୍ୟ ଇଣ୍ଡେକ୍ସରେ ଓଡ଼ିଶା ଦେଶରେ ଏକ ନମ୍ବର ହୋଇଥିଲା। ଜାତିସଂଘ ବି ଓଡ଼ିଶାର ଖାଦ୍ୟ ଯୋଗାଣ କାର୍ଯ୍ୟକ୍ରମକୁ ପ୍ରଶଂସା କରିଥିଲା । ହେଲେ ମଣ୍ଡିପଙ୍କା ଆମ୍ଵ ଟାକୁଆ ମୃତ୍ୟୁ ଓଡ଼ିଶାର ସୁନାମରେ ଆଞ୍ଚ ଆଣିଛି। ଶସ୍ତା ମନ୍ତବ୍ୟରୁ ନିବୃତ ରହି ବାସ୍ତବବାଦୀ ହେବା ପାଇଁ ଯୋଗାଣ ମନ୍ତ୍ରୀଙ୍କୁ ପରାମର୍ଶ ଦେଇଛି ବିଜେଡି। କଂଗ୍ରେସ ବି ଏହି ଘଟଣାରେ ରାଜ୍ୟ ସରକାରଙ୍କ ପଳୟନପନ୍ଥୀ ନୀତିକୁ ନିନ୍ଦା କରିଛି।
ଯୋଗାଣ ମନ୍ତ୍ରୀ ଚାଉଳ ମିଳିଥିବାର ବାରମ୍ବାର ମିଛ କହୁଥିବାବେଳେ ମୁଖ୍ୟମନ୍ତ୍ରୀ କହିଲେ ଯେ ଚାଉଳ ମିଳିନି। ହୁଏତ ବିଭ୍ରାନ୍ତ କରିବାକୁ ମୃତ୍ୟୁ ଖବର ବି ଭାଇରାଲ କରାଯାଉଛି। ବଣ୍ଟନ ବ୍ୟବସ୍ଥାରେ ଜିଲ୍ଲାପାଳ ଓ ଆରଡିସି ସଂପୃକ୍ତ ଥିବାରୁ, ଆରଡିସସି ବଦଳରେ ବିଚାର ବିଭାଗୀୟ ତଦନ୍ତ ଦାବି କରିଛି ବିଜେଡି। ରାଜ୍ୟ ସରକାର କିନ୍ତୁ ଆରଡିସି ତଦନ୍ତ ପାଇଁ ଓକିଲାତି କରୁଥିବା ବେଳେ ଚାଉଳ ବଣ୍ଟନରେ ଅବହେଳା ପ୍ରସଙ୍ଗକୁ ଏଡ଼ାଇ ଦେବାକୁ ଚେଷ୍ଟା କରୁଛନ୍ତି। ମାସର ସରକାରରେ ଦୁଇ ଦୁଇଟି ବଡ଼ ଘଟଣା। ଗଂଜାମରେ ବିଷାକ୍ତ ମଦ ପିଇ ଲୋକ ମଲେ। କନ୍ଧମାଳରେ ଆମ୍ବ ଟାକୁଆ ଜାଉ ଖାଇ ଜୀବନ ଗଲା ଲୋକ ପଛେ ମରନ୍ତୁ, ସରକାର କିନ୍ତୁ ସତ ମାନୁ ନାହାନ୍ତି। ରାଜ୍ୟ ସରକାର ବ୍ୟାକଫୁଟରେ ଥିବାରୁ, କେବଳ ନିଜ ଇମେଜ ବିଲଡିଂରେ ମାତିଥିବାର ଚର୍ଚ୍ଚା ହେଉଛି।
ଭାରତ-ଦକ୍ଷିଣ ଆଫ୍ରିକା ମଧ୍ଯରେ ହେବ ଘମାଘୋଟ ଲଢେଇ
ଡରବନ : ଭାରତ- ଦକ୍ଷିଣ ଆଫ୍ରିକା ମଧ୍ଯରେ ଆଜି ହେବ ଘମାଘୋଟ ଲଢେଇ । ଭାରତ ଓ ଦକ୍ଷିଣ ଆଫ୍ରିକା ମଧ୍ଯରେ ଖେଳାଯିବାକୁ ଥିବା ୪ ମ୍ଯାଚ ବିଶିଷ୍ଟ ଟି-୨୦ ସିରିଜର ପ୍ରଥମ ମୁକାବିଲା ଡରବନରେ ଆଜି ଖେଳାଯିବ । ଭାରତୀୟ ସମୟ ରାତି ୮ ଟାରେ ପରସ୍ପର ମୁହାମୁହିଁ ହେବେ ଟିମ୍ ଇଣ୍ଡିଆ ଓ ଦକ୍ଷିଣ ଆଫ୍ରିକା ଦଳ । ମ୍ଯାଚ ପୂର୍ବରୁ ଟସ ପାଇଁ ଉଭୟ ଦଳର ଅଧିନାୟକ ଅଧାଘଣ୍ଟା ପୂର୍ବରୁ ପଡିଆରେ ଓହ୍ଲାଇବେ । ଉଭୟ ଦଳର ଅଧିନାୟକ ଟସ୍ ଜିତିବା ପାଇଁ ପ୍ରୟାସ କରିବେ । କାରଣ ଡରବନରେ ପାଣିପାଗ ଆଜି ଖରାପ ରହିବାର ଆଶଙ୍କା ରହିଛି । ଫଳରେ ଏହି ପ୍ରଥମ ଟି-୨୦ ମୁକାବିଲାରେ ଟସ ବେଶ୍ ଗୁରୁତ୍ତ୍ୱ ବହନ କରିପାରେ । ଯିଏ ଟସ ଜିତିବ ସେ ପ୍ରଥମେ ବ୍ଯାଟିଂ କରିବାର ନିଷ୍ପତ୍ତି ନେବା ଥୟ । କାରଣ ମ୍ଯାଚ ଯଦି ଡିଏଲଏସ ଆଡକୁ ଯାଏ, ତେବେ ଚେଜ କରୁଥିବା ଦଳକୁ ସ୍କୋର ଉପରେ ନଜର ରହିପାରିବ । ତଦନୁଯାୟୀ ଦଳ ଖେଳିପାରିବ । ଟି-୨୦ ବିଶ୍ୱକପ ଫାଇନାଲ ପରେ ଏହା ଭାରତ-ଦକ୍ଷିଣ ଆଫ୍ରିକା ମଧ୍ଯରେ ପ୍ରଥମ ଲଢେଇ ହେବ । ଟିମ୍ ଇଣ୍ଡିଆ ସାଉଥ ଆଫ୍ରିକାକୁ ହରାଇ ୧୭ ବର୍ଷ ପରେ ଟି-୨୦ ବିଶ୍ୱକପ ଉପରେ ନିଜର କବଜା ଜାହିର କରିଥିଲା । ଆଫ୍ରିକୀୟ ମାଟିରେ ସୂର୍ଯ୍ୟକୁମାର ଯାଦବଙ୍କ ଦଳ ପାଇଁ ଏହା କୌଣସି ବଡ ଆହ୍ୱାନଠୁ କମ୍ ହେବନି । ଡରବନ ହେଉଛି ସାଉଥ ଆଫ୍ରିକାର ସବୁଠୁ ଧିମା ପିଚ୍ । ଧିମା ହେବା ଫଳରେ ତାହାର ଉଦ୍ଦେଶ୍ଯ ଏହା ନୁହେଁ ଯେ, ଏହା ଉପମହାଦ୍ୱିପୀୟ ପିଚ ଭଳି ହେବ । ଡରବନ ପିଚରେ ବର୍ଷା ହେବାର ମଧ୍ଯ ଏକ ଦୁ୍ଃଖ ରହିଛି । ଯାହା ଉଭୟ ଦଳ ପାଇଁ କାଳ ସାଜି ପାରିବ । ଭାରତ- ଦକ୍ଷିଣ ଆଫ୍ରିକା ମଧ୍ଯରେ ଖେଳାଯିବାକୁ ଥିବା ଏହି ପ୍ରଥମ ଟି-୨୦ ମ୍ଯାଚରେ ଟସ ସବୁଠୁ ବେଶୀ ଗୁରୁତ୍ତ୍ୱ ରଖିବ । କାରଣ ଏଠାରେ ଆଜି ବର୍ଷା ହେବାର ସମ୍ଭାବନା ଅଧିକ । ପ୍ରଥମେ ବ୍ଯାଟିଂ କରୁଥିବା ଦଳ ପାଇଁ ଏଠାରେ ହାରାହାରି ସ୍କୋର ରହିଛି ମୋଟ ୧୩୬ ରନ । ଡରବନରେ ମୋଟ ୧୮ ଟି-୨୦ ମ୍ଯାଚ ଖେଳାଯାଇଛି । ଯେଉଁଥିରୁ ପ୍ରଥମେ ବ୍ଯାଟିଂ କରୁଥିବା ଦଳ ପ୍ରାୟ ୯ ଟି ( ୪୫ ପ୍ରତିଶତ ) ମ୍ଯାଚ ଜିତିଛି । ସେହିଭଳି ପ୍ରଥମେ ବୋଲିଂ କରୁଥିବା ଦଳ ଏଠାରେ ୮ ଟି ( ୪୦ ପ୍ରତିଶତ) ମ୍ଯାଚ ଜିତିଛି । ଟସ ହାରିଥିବା ଦଳ ଡରବନରେ ପ୍ରାୟ ୯ଟି ମ୍ଯାଚରେ ବିଜୟୀ ହୋଇଛି, ମାନେ ପ୍ରାୟ ୪୫ ପ୍ରତିଶତ ବିଜୟ ରହିଛି । ଡରବନ ପଡିଆରେ ଅଧିକତମ ସ୍କୋର ୨୨୬/୬ ଥିବାବେଳେ ନିମ୍ନତମ ସ୍କୋର ୭୩ ରହିଛି । ସେହିଭଳି ହାଇଏଷ୍ଟ ସ୍କୋର ଇନ ଚେଜ ରହିଛି ଏହି ପଡିଆରେ ୧୯୧/୫ ଓ ପ୍ରଥମେ ବ୍ଯାଟିଂ କରି ଏହି ପଡିଆରେ ହାରାହାରି ସ୍କୋର ୧୩୬ ଅଛି । ଭାରତ ଓ ଦକ୍ଷିଣ ଆଫ୍ରିକା ମଧ୍ଯରେ ୨୭ ଟି ଟି-୨୦ ମ୍ଯାଚ ଖେଳାଯାଇଛି । ଯେଉଁଥିରେ ଭାରତ ୧୫ ଟି ମ୍ଯାଚ ଜିତି ନିଜର ଦବଦବା ଜାହିର କରିଛି । ସେପଟେ ସାଉଥ ଆଫ୍ରିକା ୧୧ ଟି ମ୍ଯାଚରେ ବିଜୟୀ ହୋଇଛି । ଗୋଟିଏ ମ୍ଯାଚରେ କୌଣସି ଫଳାଫଳ ଆସି ପାରି ନାହିଁ ।
ଆମ୍ବ ଟାକୁଆ ଖାଇ ପ୍ରାଣ ହରାଇବା ଅତ୍ୟନ୍ତ ଦୁଃଖଦ କଥା : ନବୀନ ପଟ୍ଟନାୟକ
ଭୁବନେଶ୍ବର : ଆମ୍ବ ଟାକୁଆ ଖାଇ ଦୁଇଜଣ ଆଦିବାସୀ ମହିଳା ମୃତ୍ୟୁବରଣ କରିବା ଘଟଣାରେ ରାଜ୍ୟ ସରକାରଙ୍କୁ କଡ଼ା ସମାଲୋଚନା କରିଛନ୍ତି ବିରୋଧୀଦଳ ନେତା ନବୀନ ପଟ୍ଟନାୟକ । ରାଜ୍ୟ ସରକାରଙ୍କ ଅବହେଳା ଯୋଗୁ ଖାଦ୍ୟ ସୁରକ୍ଷାରେ ଏକ ନମ୍ବର ରାଜ୍ୟରେ ଏଭଳି ଅଭାବନୀୟ ଘଟଣା ଘଟୁଛି ବୋଲି ସେ ସୋସିଆଲ ମିଡ଼ିଆ ଏକ୍ସରେ କହିଛନ୍ତି । ସେ କହିଛନ୍ତି ଯେ ଆମ୍ବ ଟାକୁଆ ଖାଇ କନ୍ଧମାଳର ଦୁଇ ଆଦିବାସୀ ମହିଳା ପ୍ରାଣ ହରାଇବା ଅତ୍ୟନ୍ତ ଦୁଃଖଦ କଥା । ଏପରି ଘଟଣା ଦୁଇ ଦଶନ୍ଧି ତଳେ ଦେଖିବାକୁ ମିଳୁଥିଲା । ମାଣ୍ଡିପଙ୍କା ଗାଁର ନିରୀହ ଆଦିବାସୀ ଭାଇଭଉଣୀମାନଙ୍କର ଚାରି ମାସ ଧରି ରାସନ୍ ଚାଉଳ ବନ୍ଦ କାରଣରୁ ଆମ୍ବ ଟାକୁଆ ଖାଇବାକୁ ବାଧ୍ୟ ହୋଇଛନ୍ତି । ଯାହା ଅନ୍ୟନ୍ତ ଦୁଃଖଦାୟକ ବୋଲି କହିଛନ୍ତି ବିରୋଧୀ ଦଳ ନେତା । ବିଜେଡି ସରକାର ସମୟରେ ସମସ୍ତଙ୍କ ପାଇଁ ଖାଦ୍ୟ ସୁରକ୍ଷା ସୁନିଶ୍ଚିତ କରି ଏନଏଫଏସଏ କାର୍ଯ୍ୟକାରୀ କରାଯାଇଥିଲା । ଫଳରେ ଓଡ଼ିଶା ସାରା ଦେଶରେ ଏକ ନମ୍ବର୍ ରାଜ୍ୟ ହୋଇଥିଲା। ଏହାକୁ ଆହୁରି ବ୍ୟାପକ କରିବା ପାଇଁ ବିଜେଡି ସରକାର ସ୍ୱତନ୍ତ୍ର ଭାବେ ରାଜ୍ୟ ଖାଦ୍ୟ ସୁରକ୍ଷା ଯୋଜନା ଲାଗୁ କରିଥିଲା । ଏକ ନମ୍ବର୍ ରାଜ୍ୟ ଭାବେ କେନ୍ଦ୍ର ସରକାରଙ୍କଠାରୁ ସମ୍ମାନିତ ହେବାରୁ ଆସି ଆଜି ଏପରି ସ୍ଥିତିରେ ପହଞ୍ଚିବା ଅତ୍ୟନ୍ତ ଦୁଃଖଦ ଓ ଦୁର୍ଭାଗ୍ୟଜନକ ବୋଲି କହିଛନ୍ତି ନବୀନ ପଟ୍ଟନାୟକ ।
ଜନ୍ମଦିନ ପାଳିବାକୁ କ୍ଯାଫେକୁ ଡାକି ଅଶ୍ଳୀଳ ଭିଡିଓ ସୁଟ୍ ପରେ ବ୍ଲାକମେଲ
କଟକ : ସୈତାନ ସାଜିଲା ପୁରୁଷ ବନ୍ଧୁ । ବିଶ୍ବାସରେ ବିଷ ଦେଇ ଲୁଟିନେଲା ଇଜ୍ଜତ । ଭାଇଚାରାର ସହରରେ ଲଜ୍ଜା । ବନ୍ଧୁଙ୍କ ସହ ମିଶି ଗଣ ଦୁଷ୍କର୍ମ ପରେ ବ୍ଲାକମେଲ୍ । ସହପାଠୀଙ୍କ ସହ ୬ ଜଣଙ୍କୁ ବାନ୍ଧିଲା କଟକ ପୋଲିସ୍ । ସହପାଠୀ ଭାବି ଅଧିକ ବିଶ୍ବାସ କରୁଥିଲା । ଏହାର ଫାଇଦା ନେଇ କ୍ୟାଫେରେ ବାନ୍ଧବୀର ଜନ୍ମ ଦିନ ପାଳିବା ଆଳରେ ଡାକିଥିଲା । ପୂର୍ବ ଯୋଜନା ମୁତାବକ ଆପତ୍ତି ଜନକ ଚିତ୍ର କ୍ୟାଫେ ମାଲିକ ଉତ୍ତଳନ କରି ଛାତ୍ରୀଙ୍କୁ ମାସାଧିକ ସମୟ ଧରି ବ୍ଲାକ ମେଲ କରିଥିଲେ । ବାରଙ୍ଗ ଡକାଇ ତାଙ୍କ ସହିତ କଲେ ଗଣ ଦୁଷ୍କର୍ମ । ଘଟଣା ଏବେ କଟକରେ ଚାଞ୍ଚଲ୍ଯ ସୃଷ୍ଟି କରିଥିବାବେଳେ ବାଦାମବାଡ଼ି ଓ ପୁରୀଘାଟ ପୋଲିସ ମାମଲାରେ ୬ ଜଣଙ୍କୁ ଗିରଫ କରି କୋର୍ଟ ଚାଲାଳ କରିଛି । ଏପରି ଜଘନ୍ଯ ଘଟଣାକୁ କେବେ ବରଦାସ୍ତ କରାଯିବ ନାହିଁ ଓ ଖୁବଶୀଘ୍ର ମାମଲାର ଚାର୍ଜସିଟ୍ ଦାଖଲ କରାଯିବ ବୋଲି କହିଛନ୍ତି ଡିସିପି । ସେପଟେ ଘଟଣାକୁ ନିନ୍ଦା କରିବା ସହ ଏପରି ଘଟଣାରେ ବିହିତ ପଦକ୍ଷେପ ଆବଶ୍ଯକ ଥିବା କହିଛନ୍ତି ଆଇନଜୀବୀ ।
ସହରର କାଠଗଡା ସାହି ଅଞ୍ଚଳରେ ଥିବା ଏହି କ୍ଯାଫେକୁ ଆସନ୍ତି ଏକାଧିକ ଝିଅ । ମ୍ଯୁଜିକ ସାଙ୍ଗକୁ ହୁକା ଧୂଆଁ ଓ ଜମେ ମଦରର ଆସର । ଏପରିକି ଭିତରେ ଲୋକ ଥାଇ ବାହାରପଟୁ ଅନେକ ସମୟରେ ବନ୍ଦ ରହୁଥିବା କହନ୍ତି ପଡୋଶୀ । କଟକ ପରି ଭାଇଚାରାର ସହରରେ ଏପରି ଜଘନ୍ଯ ଘଟଣାକୁ ନିନ୍ଦା କରିବା ସହ ସହରରେ ଆଇନ ଶୃଙ୍ଖଳା ପରିସ୍ଥିତିକୁ ନେଇ ଚିନ୍ତାବ୍ଯକ୍ତ କରିଛନ୍ତି ବିଧାୟକ ଓ କଟକ ବାସୀ ।
ମାମଲାକୁ ଗୁରୁତର ସହ ନେଇଛନ୍ତି ରାଜ୍ୟ ସରକାର । କଟକରେ ଦୁର୍ଭାଗ୍ୟପୂର୍ଣ୍ଣ ସ୍ଥିତିରେ ଯେଉଁ ଘଟଣା ଘଟିଛି ସେହି ଘଟଣାରେ କଠୋର କାର୍ଯ୍ୟାନୁଷ୍ଠାନ ପାଇଁ କୁହାଯାଇଛି । କୌଣସି ଟାଳଟୁଳ ନୀତି ଗ୍ରହଣୀୟ ନୁହେଁ । ଦୋଷୀକୁ ଦଣ୍ଡିତ କରିବା ପାଇଁ ସବୁ ପଦକ୍ଷେପ ନିଆଯିବ ବୋଲି କହିଛନ୍ତି ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ପୀଡିତାଙ୍କ ବୟାନ ରେକର୍ଡ ହୋଇଥିବା ବେଳେ ଅଭିଯୁକ୍ତଙ୍କ ବିରୋଧରେ ବିଏନଏସ ଧାରା ଏବଂ ଏସସି ଏସଟି ଆକ୍ଟରେ ମାମଲା ରୁଜୁ ହୋଇଛି ।
ରାଜଧାନୀରେ ଲଭ ଜିହାଦ ନେଇ ସାଂଘାତିକ ଅଭିଯୋଗ : ମହିଳା ଥାନା ଜିମାରେ କାଶ୍ମୀରର ସମୀର ମନସୁର
ଭୁବନେଶ୍ବର : ଫ୍ରି ଫାୟାର ଗେମରୁ ପଡିଥିଲା ମିଛ ପ୍ରେମର ଫାଶ । ଅନ୍ତରଙ୍ଗ ମୁହୂର୍ତ୍ତର ଭିଡିଓ ଭାଇରାଲ କରି ବ୍ଲାକମେଲ । ପ୍ରେମ ପାଇଁ ଜାମ୍ମୁ କାଶ୍ମୀରରୁ ଜଗତସିଂହପୁର ଯାଏଁ ନାଟକ । ଟ୍ରେନରୁ ଯୁବକଙ୍କୁ କାବୁ କରିବା ପରେ ମହିଳା ଥାନା ଆଣିଲା ପୋଲିସ । SFSL ଯିବ ସମୀର ଠାରୁ ଜବତ ମୋବାଇଲ । ଅଜଣା ଯୁବକଙ୍କ ସହ ପ୍ରେମ ଯେ କେତେ ଭୟଙ୍କର ହୋଇପାରେ, ତାର ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଭୁବନେଶ୍ୱରରେ । ଯୁବକଙ୍କ ନାଁ ସମୀର ମନସୁର । ଘର ବିହାର କିନ୍ତୁ କାଶ୍ମୀରରେ ରୁହନ୍ତି । ୨୦୨୨ ମସିହାରେ ଏକ ଅନଲାଇନ ଗେମ ଜରିଆରେ ତାଙ୍କର ଜଗତସିଂହପୁର ସ୍ଥିତ ଜଣେ ଯୁବତୀଙ୍କ ସହ ହୁଏ ପରିଚୟ । ଟେଲିଫୋନ ନମ୍ବର ଏକ୍ସଚେଞ୍ଜ ପରେ ଦୁହିଁଙ୍କ ଭିତରେ ବଢେ ସମ୍ପର୍କ । ତା ପରେ ଯୁବତୀଙ୍କୁ ଦେଖା କରିବା ପାଇଁ ସମୀର ଆସି ପହଞ୍ଚନ୍ତି ଭୁବନେଶ୍ୱରରେ । ପୁରୀର ଏକ ହୋଟେଲରେ ଯୁବତୀଙ୍କ ସହ ରାତ୍ରିଯାପନ ମଧ୍ୟ କରି ବିବାହ ପାଇଁ କଥା ଦିଅନ୍ତି । କିନ୍ତୁ ଏସବୁ ପାଣି ଫୋଟକା ଭଳି ମିଳେଇ ଯାଏ, ଯେତବେଳେ ଯୁବକ ଜଣଙ୍କ ମୁସଲିମ ବୋଲି ଜଣାପଡେ ।
ଗୁରୁବାର ଦିନ ଯେତବେଳେ ପୁଣି ଭୁବନେଶ୍ୱରରେ ପହଁଚି ଯୁବକ ଜଣଙ୍କ ଯୁବତୀଙ୍କୁ କାଶ୍ମୀର ନେବାକୁ ଯୋଜନା କରୁଥିଲେ, ଠିକ ସେତେବେଳେ ଯୁବତୀଙ୍କୁ ଉଦ୍ଧାର କରିବା ସହ ଅଭିଯୁକ୍ତଙ୍କୁ ଅଟକ ରଖିଥିଲା ମହିଳା ଥାନା ପୋଲିସ । ପୀଡିତାଙ୍କ ବୟାନ ରେକର୍ଡ ବେଳେ ଅନେକ ଅନେକ ସାଙ୍ଘାତିକ ତଥ୍ୟ ପୋଲିସ ହାତରେ ଲାଗିଛି । ଶାରୀରିକ ସମ୍ପର୍କ ରଖିବା ବେଳେ ଅନ୍ତରଙ୍ଗ ମୁହୂର୍ତ୍ତର ଭିଡିଓ ଉତ୍ତୋଳନ କରିଥିଲା ଅଭିଯୁକ୍ତ । ଭିଡ଼ିଓକୁ ଇନଷ୍ଟାଗ୍ରାମରେ ପୋଷ୍ଟ ମଧ୍ୟ କରିଥିଲା । ପୀଡିତାଙ୍କ ବାପା ମାଆଙ୍କୁ ଏହି ଭିଡିଓ ପଠାଇ ୫ ଲକ୍ଷ ଟଙ୍କା ମାଗୁଥିଲା ଅଭିଯୁକ୍ତ । ତେବେ ପ୍ରକୃତ ପକ୍ଷେ ଏହି ଯୁବକର ଟ୍ରାକ ରେକର୍ଡ କଣ ? କେବଳ ଜଣେ ଯୁବତୀ ନାଁ ଅନ୍ୟ ଯୁବତୀଙ୍କ ସହ ସେ ଯୁବକ ଏଭଳି ପ୍ରତାରଣା କରିଛନ୍ତି , ସେ ନେଇ ଅଧିକ ଛାନଭିନ ଚଳାଇଛି ପୋଲିସ । ଭାଇରାଲ ଭିଡିଓ କରାଯାଇଥିବା ମୋବାଇଲକୁ SFSL ପଠାଇବ ପୋଲିସ । ସେପଟେ ପୁରା ଘଟଣା ଅନୁଧ୍ୟାନ କରିବା ପରେ 376/1, 386, 385, 66 E, 67, 67A, 294 ରେ କୋର୍ଟଚାଲାଣ କରିଛି ପୋଲିସ ।
ବିରଳ କଇଁଛଙ୍କ ସୁରକ୍ଷା ପାଇଁ ପ୍ରଶାସନର ପ୍ରସ୍ତୁତି
ପୁରୀ : ଆରମ୍ଭ ହୋଇଛି ଅଲିଭ ରିଡଲେଙ୍କ ଅଣ୍ଡାଦାନ ପ୍ରକ୍ରିୟା । ବିରଳ କଇଁଛଙ୍କ ସୁରକ୍ଷା ପାଇଁ ପ୍ରଶାସନର ପ୍ରସ୍ତୁତି । ନଭେମ୍ବର ୧ ରୁ ମେ ୩୧ ପର୍ଯ୍ୟନ୍ତ ସମୁଦ୍ରକୁ ଟ୍ରଲର ମନା । ୭ ମାସ ମାଛ ମାରିବାକୁ ଯିବେନି ମତ୍ସଜୀବୀ । ପୁରୀ ପ୍ରଶାସନ ପକ୍ଷରୁ ଯୋଗାଇ ଦିଆଗଲା କ୍ଷତିପୂରଣ । ସମୁଦ୍ର ଭିତରକୁ ୫ କିଲୋମିଟର ପର୍ଯ୍ୟନ୍ତ କେବଳ ଛୋଟ ଡ଼ଙ୍ଗା ରେ ମାଛ ମାରିବା ପାଇଁ ଅନୁମତି ରହିଥିବାବେଳେ କଇଁଛ ମାନଙ୍କର ଅଣ୍ଡାଦାନ ପକ୍ରିୟାକୁ ସୁରକ୍ଷିତ କରିବା ଲକ୍ଷ୍ଯ ଏପରି ପଦକ୍ଷେପ ନିଆଯାଇଛି l ଏହି ସମୟରେ ମସ୍ଚ୍ୟଜୀବୀ ମାନଙ୍କୁ ୧୫ ହଜାର ଟଙ୍କା କ୍ଷତିପୂରଣ ରାଶି ମଧ୍ୟ ପ୍ରଦାନ କରାଯିବା ସହ କଇଁଛ ସୁରକ୍ଷା ପାଇଁ ସହଯୋଗ ଲୋଡ଼ିଛି ପ୍ରଶାସନ ।
ଅଣ୍ଡାରୁ କଇଁଛ ବାହାରି ସମୁଦ୍ରକୁ ପ୍ରବେଶ କରିବା ପର୍ଯ୍ୟନ୍ତ ବନ ବିଭାଗ ପକ୍ଷରୁ କଡା ନଜର ରଖାଯାଇଛି l ମେରାଇନ ପୋଲିସ, ମତ୍ସ୍ଯବିଭାଗ ସହ ମିଳିତ ଭାବେ ବନ ବିଭାଗ ପକ୍ଷରୁ ସମୁଦ୍ର ଭିତରେ ପାଟ୍ରୋଲିଂ ଜାରି ରହିଛି l ତେବେ କିଛି ଅମାନିଆ ଟ୍ରଲର ସମୁଦ୍ର ଭିତରେ କଟକଣା ସତ୍ତ୍ବେ ବୁଲୁଥିବାକୁ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଥିବା ବିଭାଗୀୟ ଅଧିକାରୀ କହିଛନ୍ତି l ସେପଟେ ଦିଆଯାଉଥିବା ପ୍ରୋତ୍ସାହନ ରାଶି ବୃଦ୍ଧି କରିବାକୁ ମତ୍ସ୍ଯଜୀବୀ ସଙ୍ଘ ଦାବି କରିଛି l ବିଶେଷକରି ସରକାର କଇଁଛ ମାନଙ୍କ ସୁରକ୍ଷା ପାଇଁ ଯେଉଁଭଳି ଭାବେ ଯତ୍ନବାନ ହେଉଛନ୍ତି ସମାନ ଢଙ୍ଗରେ ମତ୍ସ୍ଯଜୀବୀ ମାନଙ୍କର କ୍ଷତିକୁ ନଜରରେ ରଖି ଅଧିକ ଆର୍ଥିକରାଶି ପ୍ରଦାନ କରିବା ପାଇଁ କୁହାଯାଇଛି l ପରିବେଶ ସୁରକ୍ଷା ଓ ସମୁଦ୍ର ରେ ସନ୍ତୁଳନ ରକ୍ଷା ଦିଗରେ ଏହି କଇଁଛମାନଙ୍କ ଗୁରୁତ୍ୱପୁର୍ଣ୍ଣ ଭୂମିକା ରହିଛି l