ଭୁବନେଶ୍ବର: ସେଲିବ୍ରିଟି ହେୟାର ଷ୍ଟାଇଲିଷ୍ଟଙ୍କ ବିରୋଧରେ ସାଙ୍ଘାତିକ ଅଭିଯୋଗ ଆଣିଲେ ପତ୍ନୀ I ହେୟାର ଷ୍ଟୁଡ଼ିଓ ମାଲିକଙ୍କ ନାଁରେ ଥାନାରେ ରୁଜୁ ହେଲା ମାମଲା I ମାନସିକ ଓ ଶାରୀରିକ ନିର୍ଯ୍ୟାତନା ଦେବା ସହ ମାଡ଼ ମାରୁଥିବା ନେଇ ଅଭିଯୋଗରେ ଉଲ୍ଲେଖ।
ସ୍ୱାମୀଙ୍କ ପରକୀୟା ପ୍ରୀତି ଧରା ପଡିବା ପରେ ପତ୍ନୀଙ୍କୁ ମାଡ଼ ମାରୁଥିବାର କଥା ସାମ୍ନାକୁ ଆସିଥିଲା I ପତ୍ନୀ ସାଇ ସଙ୍ଗୀତା ସ୍ବାଇଁ ଏଭଳି ଅଭିଯୋଗ ଆଣିଛନ୍ତି I ଗତ ଅଗଷ୍ଟ ୨୫ ତାରିଖରେ ପରକିୟା ପ୍ରିତି ଧରାପଡିବା ପରେ ପତ୍ନୀ ଥାନାର ଦ୍ବାରସ୍ଥ ହୋଇଛନ୍ତି।
ଭୁବନେଶ୍ବର: ରାଜଧାନୀର ପ୍ରଥମ ନାଗରିକଙ୍କୁ ଅପମାନ । ନିମନ୍ତ୍ରଣ କଲେ, ହେଲେ ମଞ୍ଚରେ ବସିବାକୁ ଦେଲେନି ଚେୟାର । ମେୟରଙ୍କୁ ନୁହେଁ ଭୁବନେଶ୍ବର ବାସିନ୍ଦାଙ୍କୁ ଅସମ୍ମାନ । କାର୍ଯ୍ଯକ୍ରମକୁ ବର୍ଜନ କଲେ ବିଜେଡି କର୍ପୋରେଟର । ଲୋକସେବା ଭବନର କନଭେନସନ ସେଣ୍ଟରରେ ପାଳିତ ହେଉଥିଲା ରାଜ୍ଯସ୍ତରୀୟ ସ୍ବାୟତ୍ତ ଶାସନ ଦିବସ । ବିଏମସିର ମେୟର ସୁଲୋଚନା ଦାସଙ୍କୁ ନିମନ୍ତ୍ରଣ କରିଥିଲେ ରାଜ୍ଯ ସରକାର । ଡାକିଲେ, ହେଲେ ମଞ୍ଚରେ ମେୟରଙ୍କ ପାଇଁ ବସିବାକୁ ଚେୟାର ନଥିଲା । ମେୟର ପଦବୀ କୌଣସି ଦଳର ନୁହେଁ । ମେୟରଙ୍କୁ ଲୋକେ ଭୋଟ ଦେଇ ବାଛିଛନ୍ତି । ଚେୟାର କୌଣସି ଦଳର ନୁହେଁ, ଚେୟାର ହେଉଛି ଲୋକଙ୍କର । ବିଜେପି ସରକାର କେବେ ବି ନିର୍ବାଚିତ ପ୍ରତିନିଧିଙ୍କୁ ସମ୍ମାନ ଦିଅନ୍ତି ନାହିଁ । ମେୟର ଓ କର୍ପୋରେଟରଙ୍କୁ ଅସମ୍ମାନ ଅର୍ଥ ପୁରା ଭୁବନେଶ୍ବର ବାସିନ୍ଦାକୁ ଅପମାନ ବୋଲି ହୋଇଛି ଅଭିଯୋଗ ।
ରାଜ୍ଯସ୍ତରୀୟ ସ୍ବାୟତ୍ତ ଶାସନ ଦିବସରେ ମେୟରଙ୍କୁ ଅସମ୍ମାନ ପରେ ସଂପୃକ୍ତ କାର୍ଯ୍ଯକ୍ରମକୁ ବର୍ଜନ କରିଛନ୍ତି ଏକାଧିକ ବିଜେଡି କର୍ପୋରେଟର । ରାଜ୍ଯ ସରକାର ମହିଳାଙ୍କ ସଶକ୍ତିକରଣ ଓ ନାରୀଙ୍କୁ ସମ୍ମାନର ନାରା ଦେଉଥିବା ବେଳେ ଏଠି ଜଣେ ମହିଳା ମେୟରଙ୍କୁ କିଭଳି ଅସମ୍ମାନ କଲେ ବୋଲି କର୍ପୋରେଟର ପ୍ରଶ୍ନ କରିଛନ୍ତି। କିନ୍ତୁ ସଂପୃକ୍ତ କାର୍ଯ୍ଯକ୍ରମରେ ଆଗ ଧାଡିରେ ବିଜେପି କର୍ପୋରେଟର ମାନଙ୍କୁ ବସିବା ପାଇଁ ଚେୟାର ଦିଆଯାଇଛି । ଭୁବନେଶ୍ବର ଲୋକଙ୍କ ପାଇଁ ଦିନରାତି କାର୍ଯ୍ଯ କରୁଛନ୍ତି ମେୟର । ହେଲେ ତାଙ୍କୁ ଏଭଳି ରାଜ୍ଯ ସରକାର ଅପମାନ କରିବା ନେଇ ସଭିଙ୍କ ମନରେ ଆଘାତ ଦେଇଛି । ସେପଟେ ଏ ପ୍ରସଙ୍ଗରେ ବିଭାଗୀୟ ଅଧିକାରୀଙ୍କ ସହିତ କଥା ହେବି ବୋଲି କହିଛନ୍ତି ନଗର ଉନ୍ନୟନ ମନ୍ତ୍ରୀ ।
ମେୟରଙ୍କୁ ଅସମ୍ମାନ ଦେବା ଅର୍ଥ ପୁରା ୬୭ ଜଣ କର୍ପୋରେଟର ଓ ଭୁବନେଶ୍ବର ବାସିନ୍ଦାଙ୍କୁ ରାଜ୍ଯ ସରକାର ଅପମାନ ଓ ଅସମ୍ମାନିତ କରିଛନ୍ତି ବୋଲି ସାଧାରଣରେ ଚର୍ଚ୍ଚା ଜୋର ଧରିଛି ।
ଭୁବନେଶ୍ବର: ଆସନ୍ତା ସେପ୍ଟେମ୍ବର ୧୭ ତାରିଖରେ ସୁଭଦ୍ରା ହିତାଧିକାରୀଙ୍କୁ ମିଳିବ ପ୍ରଥମ କିସ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୁଭଦ୍ରା ଯୋଜନାର ଲୋକାର୍ପଣ କରିବେ ପ୍ରଧାନମନ୍ତ୍ରୀ। ସେହି ଅବସରରେ ମିଳିବ ପ୍ରଥମ କିସ୍ତି ସହାୟତା। ବର୍ଷକୁ ଦୁଇ ଥର ମିଳିବ ସୁଭଦ୍ରା କିସ୍ତି। ମାର୍ଚ୍ଚ ଅନ୍ତର୍ଜାତିକ ମହିଳା ଦିବସ ଓ ରାଖୀ ପୂର୍ଣ୍ଣିମାରେ ମିଳିବ ୫ହଜାର ଟଙ୍କା ଲେଖାଏଁ କିସ୍ତି।
ଚଳିତ ବର୍ଷ ରାକ୍ଷୀ ପୂର୍ଣ୍ଣିମା ସରିଯାଇଥିବାରୁ ସେପ୍ଟେମ୍ବର ୧୭ ତାରିଖରେ ପ୍ରଥମ କିସ୍ତି ଦିଆଯିବ। ରାଜ୍ଯର ପ୍ରାଯ ୧ କୋଟି ୩୦ ଲକ୍ଷ ହିତାଧିକାରୀ ସୁଭଦ୍ରା ଯୋଜନାରେ ସାମିଲ ହେବେ ବୋଲି କହିଛନ୍ତି ମହିଳା ଓ ଶିଶୁ କଲ୍ଯାଣ ବିଭାଗ ଦାୟିତ୍ବରେ ଥିବା ଉପମୁଖମନ୍ତ୍ରୀ ପ୍ରଭାତୀ ପରିଡା। ସୁଭଦ୍ରା ଯୋଜନାକୁ ନେଇ ବାରମ୍ବାର ବିଭିନ୍ନ ପ୍ରଶ୍ନ ଓ ସନ୍ଦେହ ସୃଷ୍ଟି ହେବାରୁ ଆଜି ନିଜେ ଉପମୁଖ୍ୟମନ୍ତ୍ରୀ ଅନଲାଇନରେ ଲାଇଭ ବାର୍ତ୍ତା ଦେବାକୁ ବାଧ୍ୟ ହୋଇଛନ୍ତି ।
ଏପରିକି ଏହି ଯୋଜନାରେ ବିଧବା ଭତ୍ତା ପାଉଥିବା ମହିଳା ଓ ବୃତ୍ତି ପାଉଥିବା ଛାତ୍ରଛାତ୍ରୀ ବି ବାଦ ପଡିବାର ଆଶଙ୍କା ରହିଛି । ଏହାର ସ୍ପଷ୍ଟୀକରଣ ଦେଇ ସେ କହିଛନ୍ତି ଯେ, ସ୍ବଚ୍ଛଳ ବର୍ଗକୁ ଛାଡିଦେଲେ ୨୧ରୁ ୬୦ ବର୍ଷ ବୟସ ମଧ୍ୟରେ ସବୁ ଯୋଗ୍ୟ ମହିଳା ଏହି ଯୋଜନାରେ ସାମିଲ ହୋଇପାରିବେ । ଉଭୟ ଅନଲାଇନ ଓ ଅଫଲାଇନ ମୋଡରେ ଆବଦେନ ଗ୍ରହଣ କରାଯିବ ।
ବର୍ତ୍ତମାନ ସୁଦ୍ଧା ଏହି ଯୋଜନାରେ ସାମିଲ ହେବାକୁ ଆବେଦନପତ୍ର ଗ୍ରହଣର ସମୟସୀମା ଧାର୍ଯ୍ୟ କରାଯାଇନାହିଁ । ତେଣୁ ଫର୍ମ କିଣିବା ଓ ଦାଖଲ ପାଇଁ ଅକାରଣରେ ଭିଡ ନକରିବାକୁ ସେ ଅପିଲ କରିଛନ୍ତି । ଆଧାର କାର୍ଡ ନଥିଲେ ଯୋଗ୍ୟ ହିତାଧିକାରୀ ବି ଏହି ଯୋଜନାରେ ସାମିଲ ହୋଇପାରିବେ ନାହିଁ । ତେଣୁ ସୁଭଦ୍ରା ଯୋଜନାରେ ସାମିଲ ପାଇଁ ଆଗ୍ରହୀ ମହିଳା ଆଧାର କାର୍ଡ କରିବା ଉଚିତ ବୋଲି ସେ କହିଛନ୍ତି । ରାଜ୍ୟର ସବୁ ଅଙ୍ଗନୱାଡି କେନ୍ଦ୍ରରେ ସୁଭଦ୍ର ପାଇଁ ଫର୍ମ ଉପଲବ୍ଧ । ମହିଳାମାନଙ୍କୁ ଫର୍ମ ପୁରଣ ଓ ଦାଖଲରେ ଅଙ୍ଗନୱାଡି କର୍ମୀ, ସିଆରପି, ଏମବିସି, ବ୍ୟାଙ୍କ ମିତ୍ର, କୃଷିମିତ୍ରମାନେ ସହଯୋଗ କରିବେ।
ଭୁବନେଶ୍ବର: ରାଜ୍ଯର ଆଇନ ଶୃଙ୍ଖଳା ପରିସ୍ଥିତିକୁ ନେଇ ରାଜ୍ଯ ସରକାରଙ୍କୁ ଘେରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ। ଶାନ୍ତିପ୍ରିୟ ରାଜ୍ୟ ଓଡିଶାରେ ଏବେ ସାମ୍ପ୍ରଦାୟୀକ ଉତ୍ତେଜନା ଜୋର ଧରିଛି । ବାଲେଶ୍ବର ସମେତ ବିଭିନ୍ନ ସ୍ଥାନରେ ସାମ୍ପ୍ରଦାୟୀକ ଦଙ୍ଗା ହୋଇଛି । ଖୋର୍ଦ୍ଧାରେ ସାମ୍ପ୍ରଦାୟିକ ଦଙ୍ଗାରେ ଜଣଙ୍କ ଜୀବନ ଯାଇଛି ।
ରଥଯାତ୍ରାରେ ପରିଚାଳନାଗତ ତ୍ରୁଟି ପାଇଁ ବଳଭଦ୍ର ଚଳେ ପଡିଯାଇଥିଲେ । ଚାରମାଳରେ ବଳଭଦ୍ର ପଡିଯିବା ସବୁ ଜଗନ୍ନାଥ ପ୍ରେମୀଙ୍କୁ ଗଭୀର ଆଘାତ ଦେଇଛି । ଗଂଜାମ ଜିଲ୍ଲା ଚିକିଟିରେ ମଦମୃତ୍ୟୁରେ ୩ଜଣଙ୍କ ମୃତ୍ୟୁ ହୋଇଛି । ପୂର୍ବ ସରକାରରେ ବେଆଇନ ମଦ କାରବାର ଉପରେ ଅଙ୍କୁଶ ଲଗାଯାଇଥିଲା । ସେହିଭଳି ରଥଯାତ୍ରା ସମୟରେ ରାଜ୍ୟପାଳଙ୍କ ପୁଅ ଜଣେ କାର୍ଯ୍ୟରତ ସରକାରୀ କର୍ମଚାରୀଙ୍କୁ ମାଡ ମାରିଲେ । ରାଜ୍ୟପାଳଙ୍କ ପୁଅ ବୋଲି ତାଙ୍କୁ କଣ ଦଣ୍ଡ ମିଳିବ ନାହିଁ କି ବୋଲି ନବୀନ ପ୍ରଶ୍ନ କରିଥିଲେ । ରାଜ୍ୟପାଳଙ୍କ ପୁଅ ବୋଲି ସେ କଣ ଆଇନର ଉର୍ଦ୍ଧ୍ବରେ କି ବୋଲି ସେ ପ୍ରଶ୍ନ କରିଛନ୍ତି ।
ନବୀନ କହିଛନ୍ତି ଯେ, କିଛି ଲୋକ ଆଇନର ଉର୍ଦ୍ଧ୍ବରେ ବୋଲି ସରକାର ଘୋଷଣା କରନ୍ତୁ । ମୁଖ୍ୟମନ୍ତ୍ରୀ ନିଜେ ଗୃହ ବିଭାଗ ଦାୟିତ୍ବରେ । ତାଙ୍କୁ ସମସ୍ତ କଥା ନିଶ୍ଚିତ ଜଣାଥିବ । ନାବାଳିକା ଦୁଷ୍କର୍ମ ଘଟଣା ବି ମୁଖ୍ୟମନ୍ତ୍ରୀଙ୍କୁ ଜଣାଥିବ । ଗତ ସରକାରରେ ଏମିତି ହେଉନଥିଲା ବୋଲି କହିବା ସହ ରଜ୍ୟ ସରକାର ଏସବୁ ପ୍ରସଙ୍ଗରେ ସ୍ପଷ୍ଟୀକରଣ ଦେବା ଉଚିତ ବୋଲି ନବୀନ କହିଛନ୍ତି ।
ଶ୍ରୀନଗର: ଜମ୍ମୁ ଓ କାଶ୍ମୀର ବିଜେପିକୁ ବଡ଼ ଧରଣର ଧକ୍କା। ବିଧାନସଭା ନିର୍ବାଚନ ପୂର୍ବରୁ ସାମ୍ବା ଜିଲ୍ଲା ସଭାପତି ପଦରୁ ଇସ୍ତଫା ଦେଲେ କଶ୍ମୀରା ସିଂ। ନିଜର ଇସ୍ତଫା ପତ୍ରକୁ ସେ ଜାତୀୟ ସଭାପତି ଜେ.ପି. ନଡ୍ଡା ଓ ଜାମ୍ମୁ ଓ କାଶ୍ମୀର ବିଜେପି ସଭାପତି ରବିନ୍ଦର ରାଇନାଙ୍କ ନିକଟକୁ ପଠାଇଛନ୍ତି। ବିଧାନସଭା ନିର୍ବାଚନରେ ଟିକେଟ ବଣ୍ଟନକୁ ନେଇ ଅସନ୍ତୁଷ୍ଟ ଥିଲେ କଶ୍ମୀରା।
ସେ କହିଛନ୍ତି- ଗତ ୪୦-୪୨ ବର୍ଷ ଧରି ସେ ବିଜେପି ସହ ସଂଶ୍ଲିଷ୍ଟ ଥିଲେ। ଲୋକଙ୍କ ଲାଗି ସେ ନିରବଚ୍ଛିନ୍ନ ଭାବେ କାର୍ଯ୍ୟ କରୁଥିଲେ। ମାତ୍ର ବିଜେପି ପକ୍ଷରୁ ଟିକେଟ ବଣ୍ଟନରେ ତାଙ୍କୁ ଗୁରୁତ୍ବ ଦିଆଗଲା ନାହିଁ। ବାହାର ଲୋକଙ୍କୁ ଟିକେଟ ଦିଆଗଲା। ଯେଉଁମାନେ ଦଳକୁ ବିରୋଧ କରୁଥିଲେ ସେମାନଙ୍କୁ ଦଳ ଅଗ୍ରାଧିକାର ଦେଲା।
ସେ ଦଳର ସମସ୍ତ ପଦପଦବୀରୁ ଇସ୍ତଫା ଦେଇଛନ୍ତି। ସାମ୍ବାରୁ ବିଜେପିରୁ ସୁରଜିତ ସିଂ ସ୍ଲାଥିଆଙ୍କୁ ଟିକେଟ ଦିଆଯାଇଛି। ପୂର୍ବରୁ ସେ ନ୍ଯାସନାଲ କନଫରେନ୍ସରେ ଥିବା ସହ ମନ୍ତ୍ରୀ ଥିଲେ।
ନନ୍ଦିଘୋଷ ବ୍ୟୁରୋ: ବାସୁଦେବପୁର ବ୍ଲକ ଖରିଦା ବିନାୟକପୁର ପଞ୍ଚାୟତର ଆଙ୍କୁଡେଶ୍ବରୀ ଗାଁରେ ଥମୁନି ଭୌତିକ କାଣ୍ଡ। ଆପେ ଆପେ କଟି ଯାଉଛି ଲୁଗା । ଦୁଇ ଫାଳ ହେଉଛି ଟଙ୍କା ।କଟି ଯାଉଛି ବେଲା ଯାଇଥିବା ପରଟା । ଚାହୁଁ ଚାହୁଁ କଟି ଯାଉଛି ପିନ୍ଧା ଲୁଗା । ଦେହରେ ଲାଗୁଛି ବ୍ଲେଡ ଦାଗ । ବ୍ଲେଡ ଲାଗି କଟି ଯାଉଛି ଦେହର ବିଭିନ୍ନ ଅଙ୍ଗ । ଆଙ୍କୁଡେଶ୍ବରୀ ଗାଁରେ ଘଟୁଛି ଏଭଳି ଭୌତିକ କାଣ୍ଡ । ଯାହାକୁ ନେଇ ଆତଙ୍କିତ ଅବସ୍ଥାରେ ପରିବାର । ଅନାଚନକ ଭାବେ କଟୁଛି ଲୁଗା । ଗୋଟିଏ ନୁହଁ କି ଦୁଇଟା ନୁହଁ ୩୦ ରୁ ଉର୍ଦ୍ଧ୍ବ ଲୁଗା କଟା ଯାଉଛି । ଗାଁର ନରେନ୍ଦ୍ର ନାୟକଙ୍କ ପରିବାର ଏଭଳି କାଣ୍ଡକୁ ନେଇ ଅତିଷ୍ଠ ହୋଇପଡ଼ିଲେଣି । ଦଶ ଦିନ ଧରି ପୂଜା ପାଠ କରିବା ସହ ଗୁଣିଆଙ୍କୁ ବି ଡାକିସାରିଲେଣି। ହେଲେ କାମ ଦେଉନି ଗୁଣିଆଙ୍କ ଗୁଣି । ପଚିଶି ଦିନ ଧରି ଘଟୁଛି ଏମିତି ଭୌତିକ କାଣ୍ଡ । ଲୁଗା କଟା ପରେ ଚାରୋଟି ବ୍ଲେଡ ପାଇଥିଲେ । ଏହି ବ୍ଲେଡକୁ ପୋଡି ଦେଇ ଥିଲେ । କେହି ପରିବାର ମଧ୍ଯରେ କରୁଛନ୍ତି ବୋଲି ସନ୍ଦେହ କରି ସବୁ ଘର ଚାବି ପକାଇ ସପରିବାର ବାହାରେ ବସି ରହିଲେ । କିଛି ଘଣ୍ଟା ପରେ ଦେଖିବା ବେଳକୁ ପୁନଶ୍ଚ ଲୁଗା କଟା ଯାଇଛି । ଗୁଣିଆଙ୍କ କଥାରେ ୧୫ରୁ ଉର୍ଦ୍ଧ୍ବ କଟା ଲୁଗା ପୋଡି ସାରିଲେଣି । ଲୋକମାନଙ୍କ ମଧ୍ଯରେ ଭୌତିକ କାଣ୍ଡକୁ ନେଇ ଭୟର ବାତାବରଣ ସୃଷ୍ଟି ହୋଇଛି । ଏଭଳି ଘଟଣାକୁ ନେଇ ପଡୋଶୀ କହିଛନ୍ତି ଏମିତି ଭୌତିକ କାଣ୍ଡ ଆମେ କେବେ ଦେଖି ନଥିଲୁ କି ଶୁଣିନଥିଲୁ ।
ନନ୍ଦିଘୋଷ ବ୍ୟୁରୋ: ସସପେନ୍ସରେ ମହାକାଶଚାରିଣୀ ସୁନୀତା ଓ୍ବିଲିୟମସ ଓ ବଚ୍ ଓ୍ବିଲମୋରଙ୍କ ଭବିଷ୍ଯତ । ଦିନକୁ ଦିନ ଘୁଞ୍ଚୁଛି ସେମାନଙ୍କ ଫେରିବାର ସମୟ । ତେବେ ଅତୀତରେ ଦୁଇ ଦୁଇଟି ଦୁର୍ଘଟଣା ସତ୍ତ୍ବେ ଆମେରିକାର ମହାକାଶ ଗବେଷଣା ସଂସ୍ଥା ନାସାର କେତେକ ଭୁଲ୍ ଯୋଗୁ ଏହି ବିପଦ ସୃଷ୍ଟି ହୋଇଛି ବୋଲି କହିଛନ୍ତି- ସଂସ୍ଥାର ମୁଖ୍ଯ ବିଲ୍ ନେଲସନ । ସେ କହିଛନ୍ତି ୨୦୦୩ ଫେବୃଆରୀ ୧ରେ ସ୍ପେସ ସଟଲ କଲମ୍ବିଆ ଦୁର୍ଘଟଣାରେ ପ୍ରାଣ ହରାଇଥିଲେ ଭାରତୀୟ ଆମେରିକୀୟ ମହାକାଶଚାରିଣୀ କଳ୍ପନା ଚାଓ୍ବଲା ଓ ଅନ୍ଯ ୬ ଯାତ୍ରୀ । ସେହିପରି ୧୯୮୬ ଜାନୁଆରୀ ୨୮ରେ ସ୍ପେସ ସଟଲ ଚାଲେଞ୍ଜର ଦୁର୍ଘଟଣାଗ୍ରସ୍ତ ହେବାରୁ ପ୍ରାଣ ହରାଇଥିଲେ ୧୪ ଯାତ୍ରୀ ।
ଏହା ସତ୍ତ୍ବେ ନାସାର ବୁଦ୍ଧି ଉଦୟ ହେଲା ନାହିଁ । ଜଣେ ମହାକାଶଚାରୀ ହୋଇଥିବା ସହ ଅତୀତର ଦୁଇଟି ଦୁର୍ଘଟଣାର ତଦନ୍ତ କମିଟିର ସଦସ୍ଯ ଥିବା ନେଲସନ କହିଛନ୍ତି- ନାସାର ତ୍ରୁଟି ଯୋଗୁ ବୋଇଂ ଷ୍ଟାରଲାଇନରକୁ ଫେରାଇ ଆଣିବା ଲାଗି ସମସ୍ଯା ସୃଷ୍ଟି ହୋଇଛି । ଫ୍ଲାଇଟ ଇଞ୍ଜିନିୟରମାନଙ୍କ ଚେତାବନୀ ସତ୍ତ୍ବେ ବୋଇଂ ଷ୍ଟାର ଲାଇନରକୁ ପଠାଯାଇଥିଲା । ଷ୍ଟାର ଲାଇନରରେ ତ୍ରୁଟି ହେତୁ ଓ୍ବିଲିୟମସ ଓ ଓ୍ବିଲମୋରଙ୍କୁ ବର୍ତ୍ତମାନ ନ ଆଣି ଆସନ୍ତା ବର୍ଷ ଫେବୃଆରୀରେ ପୃଥିବୀକୁ ଫେରାଇଆଣିବା ଲାଗି ଯୋଜନା ରହିଛି । ସେମାନହ୍କୁ ଅନ୍ଯ ଏକ ସ୍ପେସକ୍ରାଫ୍ଟରେ ଆଣିବା ଲାଗି ନାସା ପକ୍ଷରୁ ଯେଉଁ ନିଷ୍ପତ୍ତି ନିଆଯାଇଛି ତାହା ସର୍ବସମ୍ମତ ନିଷ୍ପତ୍ତି । ଇଣ୍ଟରନ୍ଯାସନାଲ ସ୍ପେସ ଷ୍ଟେସନ ବା ଆଇଏସଏସରେ ସୁନୀତା ଓ ବଚଙ୍କୁ ରଖି ଷ୍ଟାରଲାଇନରକୁ ଫେରାଇଆଣିବା ଲାଗି ଯେଉଁ ନିଷ୍ପତ୍ତି ନିଆଯାଇଛି ତାହା ଉଭୟ ମହାକାଶଚାରୀଙ୍କ ନିରାପତ୍ତା ଦୃଷ୍ଟିରୁ କରାଯାଇଛି ବୋଲି କହିଛନ୍ତି ନେଲସନ ।
ଷ୍ଟାରଲାଇନରରେ ହିଲିୟମ ଲିକ୍ ନେଇ ସ୍ପେସ ଇଞ୍ଜିନିୟରମାନେ ଠାବ କରିବା ପରେ ଆରମ୍ଭ ହୋଇଥିଲା ସମସ୍ଯା । ଗତ ଜୁନ ୫ରେ ଷ୍ଟାରଲାଇନରକୁ ମହାକାଶକୁ ଛଡାଯାଇଥିଲା ଏବଂ ମାତ୍ର ୧୦ ଦିନ ମହାକାଶରେ ରହିବା ଲାଗି ସ୍ଥିରୀକୃତ ହୋଇଥିଲା । କିନ୍ତୁ ହିଲିୟମ ଲିକ୍ ଯୋଗୁ ଦିନକୁ ଦିନ ସମସ୍ୟା ଜଟିଳ ହେବାରେ ଲାଗିଛି । ଆସନ୍ତା ସେପ୍ଟେମ୍ବର 6ରେ ଦୁଇ ମହାକାଶଚାରୀଙ୍କୁ ଛାଡି ଷ୍ଟାରଲାଇନରକୁ ଫେରାଇ ଆଣିବା ଲାଗି ନାସା ଘୋଷଣା କରିଛି । ପୃଥିବୀ ପୃଷ୍ଠକୁ ଆସିବା ଲାଗି ଷ୍ଟାରଲାଇନରକୁ ଲାଗିବ ମାତ୍ର ଛଅ ଘଣ୍ଟା ।
ନନ୍ଦିଘୋଷ ବ୍ୟୁରୋ: ନିଶାମୁକ୍ତ ଓଡ଼ିଶା ଘଟଣାର ନାରା ଦେଇ ସରକାରକୁ ଆସିଥିଲା ବିଜେପି। ହେଲେ ଚିକିଟିରେ ଘଟିଲା ମଦମୃତ୍ଯୁ। ବିଷାକ୍ତ ମଦମୃତ୍ଯୁ ଘଟଣାରେ ଆଜି ଆଉ ଜଣେ ପ୍ରାଣ ହରାଇଛନ୍ତି। ଏହି ଅଘଟଣାରେ ଅବକାରୀ ମନ୍ତ୍ରୀ ନୈତିକତା ଦୃଷ୍ଟିରୁ ଇସ୍ତଫା ଦିଅନ୍ତୁ ବୋଲି ଦାବି କରିଛନ୍ତି ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ। ଶୂନ୍ୟକାଳରେ ଏହି ପ୍ରସଙ୍ଗ ଉଠାଇବା ସହ ସରକାର ଗୃହରେ ବିବୃତି ରଖନ୍ତୁ ବୋଲି ଦାବି କରିଛନ୍ତି ପ୍ରମିଳା। ସେ କହିଛନ୍ତି- ନୀତି ନୈତିକତା କଥା କହି ବିଜେପି ସରକାରକୁ ଆସିଛି। ମଦ ବନ୍ଦ କଥା କହି ଓଡ଼ିଶା ବାସୀଙ୍କୁ ଭୁଆଁ ବୁଲାଉଛନ୍ତି ସରକାର। ଚିକିଟି ମଦମୃତ୍ଯୁ ଘଟଣାରେ ଆଜି ଆଉ ଜଣଙ୍କ ଜୀବନ ଯାଇଛି। ଅନ୍ଯ ଅସୁସ୍ଥମାନେ ହସ୍ପିଟାଲରେ ଚିକିତ୍ସିତ ହେଉଛନ୍ତି। ଏହାକୁ ନେଇ ସରକାର ଚିନ୍ତିତ ନୁହନ୍ତି। ବିଜେଡି ପକ୍ଷରୁ ମନ୍ତ୍ରୀଙ୍କ ଇସ୍ତଫା ଦାବି କରାଯାଇଥିଲା। ଆଜିର ଘଟଣା ପରେ ନୀତି ଓ ନୈତିକତା ଦୃଷ୍ଟିରୁ ମନ୍ତ୍ରୀ ଇସ୍ତଫା ଦିଅନ୍ତୁ ବୋଲି ଦାବି କରିଛନ୍ତି ପ୍ରମିଳା।
ନନ୍ଦିଘୋଷ ବ୍ୟୁରୋ: ମାଲକାନଗିରି ଜିଲ୍ଲାରେ ଠାବ ହେଲା ବଡ ଧରଣର ମାଓ ଡମ୍ପ । କାଲିମେଳା ଥାନା ଭେଜାଙ୍ଗିୱାଡା ଜଙ୍ଗଲରେ କମ୍ବିଂ ଅପରେସନ ବେଳେ ଏହି ମାଓ ଡମ୍ପକୁ ଠାବ କରିଛନ୍ତି ୧୪୨ ବାଟାଲିଆନର ବିଏସଏଫ ଜବାନ । ଦୟାଳତୂଙ୍ଗ ଗାଁ ପାଖରେ ଥିବା ଏକ ଗୁମ୍ଫା ଭିତରେ ତଲାସୀ କରିବା ବେଳେ ମାଓବାଦୀଙ୍କ ଏକ ଡମ୍ପ ଜବାନଙ୍କ ହାତରେ ଲାଗିଥିଲା । ଡମ୍ପ ଭିତରେ ଦୁଇଟି ଲ୍ୟାଣ୍ଡମାଇନ, ୬୨ଟି ଜିଲୋଟିନ ଷ୍ଟିକ୍, ବେଟେରୀ, ବିଦ୍ୟୁତ ତାର, ସୋଲାର ପେନାଲ, ନକ୍ସଲ ପୋଷାକ ଓ ପ୍ରଚାର ପତ୍ର ରହିଥିଲା । ଲ୍ୟାଣ୍ଡମାଇନ ଉଦ୍ଧାର କରିବା ପରେ ଏହାକୁ ନିଷ୍କ୍ରିୟ କରିଛନ୍ତି ସୁରକ୍ଷା କର୍ମୀ । ମାଓବାଦୀ ମାନେ ଜବାନଙ୍କୁ ଟାର୍ଗେଟ କରିବା ଲାଗି ଏହି ସବୁ ବିସ୍ଫୋରକ ସାମଗ୍ରୀ ଏକାଠି କରିଥିବା ବିଏସଏଫ ବାହିନୀ ପକ୍ଷରୁ ସୂଚନା ଦିଆଯାଇଛି ।
ନନ୍ଦିଘୋଷ ବ୍ୟୁରୋ: ବିଧାନସଭାରେ ଉଠିଲା ଛତୁଆର ମାନ ପ୍ରସଙ୍ଗ। ଏହାର ନମୁନା ସଂଗ୍ରହ କରି ଯାଞ୍ଚ କରାଯିବ ବୋଲି କହିଛନ୍ତି ଉପମୁଖ୍ଯମନ୍ତ୍ରୀ ପ୍ରଭାତୀ ପରିଡା। ଏହି ପ୍ରସଙ୍ଗରେ ବାଚସ୍ପତି ସୁରମା ପାଢ଼ୀ ରୁଲିଂ ଦେବା ପରେ ଯାଞ୍ଚ ନେଇ ମତ ରଖିଛନ୍ତି ପ୍ରଭାତୀ। ଛତୁଆର ମାନ ନେଇ ବିଧାନସଭାରେ ପ୍ରଶ୍ନ କରିଥିଲେ ବିଜେପି ବିଧାୟକ ନିହାର ମହାନନ୍ଦ। ଗତ ପାଞ୍ଚ ବର୍ଷରେ କେତେ ଛତୁଆ ଏଜେନସି ଉପରେ ଯାଞ୍ଚ ହୋଇଛି ଓ ନିମ୍ନମାନର ଛତୁଆ ପ୍ରସ୍ତୁତକାରୀ ସଂସ୍ଥାଙ୍କ ଉପରେ କଣ କାର୍ଯ୍ୟାନୁଷ୍ଠାନ ନିଆଯାଇଛି ସେସମ୍ପର୍କରେ ଗୃହରେ ଜଣାଇବାକୁ ଉପମୁଖ୍ଯମନ୍ତ୍ରୀଙ୍କୁ ନିର୍ଦ୍ଦେଶ ଦେଇଥିଲେ ବାଚସ୍ପତି। ସେପଟେ ନିମ୍ନମାନର ଛତୁଆ ନେଇ ଉଦବେଗ ପ୍ରକାଶ କରିଥିଲେ ସିମୁଳିଆ ବିଧାୟକ ପଦ୍ମ ଲୋଚନ ପଣ୍ଡା | ସବୁ ଆଡେ ଛତୁଆ ନିମ୍ନ ମାନର | ମନ୍ତ୍ରୀ ଦୁଇ ମାସ ହେଲା ଆସିଛନ୍ତି | ସବୁ ଛତୁଆଵାଲା କାର ଧରି ବୁଲୁଛନ୍ତି| ସିମୁଳିଆ ଓ ଖଇରା ବ୍ଲକରେ ହେଲପର ନିଯୁକ୍ତି ନାମରେ ସିଡିପିଓ ୫୦ ହଜାର ଲେଖାଏ ଟଙ୍କା ଆଦାୟ କରିଛନ୍ତି। ସବୁ ପୁରୁଣା ଛତୁଆ ଏଜେନ୍ସଙ୍କୁ କାଟି ନୂଆ ଏଜେନ୍ସିକୁ ଦେବା ଲାଗି ଦାବି କରିଥିଲେ ପଦ୍ମଲୋଚନା।
