ନନ୍ଦିଘୋଷ ବ୍ୟୁରୋ: ଭୁବନେଶ୍ଵର ସାଲିଆ ସାହିରେ ବୁଲିଲା ବୁଲଡୋଜର। ଚୋରା ଦେଶୀ ମଦ ବେପାର କରୁଥିବା ମାଫିଆର ଘର ଉପରେ ବୁଲଡୋଜର ଚାଲିଲା। ଅବକାରୀ ବିଭାଗ ଓ ଇଡକୋର ମିଳିତ ଟିମ୍ ଏହି କାର୍ଯ୍ଯାନୁଷ୍ଠାନ ନେଇଛି। କିଛି ଦିନ ତଳେ ଏଠାରୁ ହଜାର ହଜାର ଦେଶୀ ମଦ , ପୋଚ ଜବତ କରିଥିଲା ଅବକାରୀ ବିଭାଗ। ଏହା ପରେ ଆଜି କଡ଼ା କାର୍ଯ୍ଯାନୁଷ୍ଠାନ ନିଆଯାଇଛି। ଚୋରା ଦେଶୀ ମଦ ବେପାର କଲେ ଛଡ଼ାଯିବ ନାହିଁ ବୋଲି ଏକ ପ୍ରକାର ସଂକେତ ଦେଇଛି ଦିଆଯାଇଛି।
ନନ୍ଦିଘୋଷ ବ୍ୟୁରୋ: ଘରେ ଶୋଇ ହେଉନି, ବାହାରେ ଶୋଇଲେ ଗଧିଆ ଭୟ । ୮ ଜଣଙ୍କୁ ଶିକାର କଲାଣି । ଆତଙ୍କିତ ଲୋକେ ଶାନ୍ତିରେ ଶୋଇ ପାରୁନାହାନ୍ତି । ଉତ୍ତରପ୍ରଦେଶର ବହରାଇଚ ଜିଲ୍ଲାର ମହସି ତହସିଲ ଅଞ୍ଚଳରେ ଏବେ ଏମିତି ଭୟର ବାର୍ତ୍ତା ବରଣ ଖେଳିଯାଇଛି । ୮ ଜଣଙ୍କୁ ଆକ୍ରମଣ କରିଥିବାବେଳେ ଏଥିରେ କେବଳ ୭ ଜଣ ଶିଶୁ ରହିଛନ୍ତି । ଯେଉଁ କାରଣରୁ ପିଲାଙ୍କୁ ଧରି ଲୋକେ କେମିତି ଚଳିବେ ତାକୁ ନେଇ ଚିନ୍ତାରେ ରହିଛନ୍ତି । ବାସ୍ତବରେ କହିବାକୁ ଗଲେ ଏଠାକାର ଲୋକେ ବହୁତ ଗରିବ । ଗାଁରେ ମାତ୍ର ହାତ ଗଣତି ଗୋଟିଏ କିମ୍ବା ୨ଟି ପକ୍କାଘର ରହିଛି । ବାକି ଲୋକେ କଚାଘରେ ରହିଥାନ୍ତି । ଏପରିକି ଅନେକ ଲୋକଙ୍କ ଘରର କବାଟ ନାହିଁ । ଘରେ ଲୋକେ ଗରମ କାରଣରୁ ମଧ୍ୟ ଶୋଇ ପାରୁନାହାନ୍ତି । ଯଦି ବି କେହି ଘରେ ଶୁଅନ୍ତି ତାହେଲେ କବାଟ ନଥିବାରୁ ଲୁଚି ରହିଥିବା ଗଧିଆ ପ୍ରଥମେ ପିଲାଙ୍କୁ ଟାର୍ଗେଟ କରିଥାଏ । ଆଉ ପରେ ଆକ୍ରମଣ କରିଥାଏ । ଯେଉଁ କାରଣରୁ ଲୋକେ ରାତିରେ ଶୋଇ ନଥାନ୍ତି । ଅନିଦ୍ରା ହୋଇ ଜଗି ରହିଥାନ୍ତି ।
ରାତି କଥା ଛାଡ଼ନ୍ତୁ ଦିନରେ ମଧ୍ୟ ଗାଁରେ ପଶି ଆକ୍ରମଣ କରୁଥିବାରୁ ଏବେ ଲୋକଙ୍କ ନିଦ ଏକପ୍ରକାର ହଜି ଯାଇଛି କହିଲେ ଚଳେ । ବନ ବିଭାଗ ପକ୍ଷରୁଗଧିଆ ଉପରେ ନଜର ରଖିବା ପାଇଁ ସିସିଟିଭ ଲଗାଯାଇଛି । ଆଉ ଜଙ୍ଗଲ ମନ୍ତ୍ରୀ ଗାଁକୁ ଯାଇ ସ୍ଥିତି ପରଖିଛନ୍ତି । ମାତ୍ର ସ୍ଥାନୀୟ ବାସିନ୍ଦା କହିଛନ୍ତି କି, ପାଖାପାଖି ୨୫ରୁ ୩୦ ଗଧିଆ ଏବେ ଆତଙ୍କ ଖେଳାଇଛନ୍ତି । ଏଣୁ ସୂର୍ଯ୍ୟସ୍ତ ହେବା ପରେ ସେମାନେ ଶାନ୍ତିରେ ରହିପାରୁନାହାନ୍ତି । ଡ୍ରୋନ କ୍ୟାମେରା ସାହାର୍ଯ୍ୟ ଗଧିଆଙ୍କ ଉପରେ ନଜର ରଖାଯାଇଥିବାବେଳେ ଶୀଘ୍ର ସେମାନଙ୍କୁ ଧରାଯିବ ବୋଲି ମନ୍ତ୍ରୀ କହିଛନ୍ତି । କିନ୍ତୁ ଲୋକେ ଏବେ ମଧ୍ୟ ଭୟରେ ରହୁଥିବା କହିଛନ୍ତି ।
ନନ୍ଦିଘୋଷ ବ୍ୟୁରୋ: ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଚମ୍ପାଇ ସୋରେନ ଜେଏମଏମ ଛାଡ଼ି ବିଜେପିରେ ଯୋଗ ଦେବାକୁ ଯାଉଛନ୍ତି । ସେ ବିଜେପିରେ ଯୋଗଦେବେ ବୋଲି ମଙ୍ଗଳବାର କହିଛନ୍ତି । ତେବେ ମୁଖ୍ୟମନ୍ତ୍ରୀ ପୂର୍ବରୁ ଦିଲ୍ଲୀରେ ଡେରା ପକାଇଥିଲେ ସୁଦ୍ଧା କୌଣସି ଗ୍ରୀନ ସିଗନାଲ ଦେଇନଥିଲା ବିଜେପି । ଯେଉଁ କାରଣରୁ ପରବର୍ତ୍ତୀ ସମୟରେ ସେ ନିଜେ ଏକ ନୂଆ ଦଳ ଗଠନ କରିବା ନେଇ ଘୋଷଣା କରିଥିଲେ । ମାତ୍ର ପୁଣିଥରେ ମତ ପରିବର୍ତ୍ତନ କରି ବିଜେପିରେ ଯୋଗ ଦେବେ ବୋଲି ସ୍ପଷ୍ଠ କରିଛନ୍ତି । ଯେଉଁ କାରଣରୁ ଏବେ ରାଜେନୖତିକ ମହଲରେ ଚର୍ଚ୍ଚା ହେଉଛି କି, କେଉଁ ସର୍ତ୍ତରେ ବିଜେପିରେ ଯୋଗ ଦେବାକୁ ଯାଉଛନ୍ତି ଚମ୍ପାଇ ।
କୁହାଯାଉଛି କି, ବିଜେପିର ମୁଖ୍ୟମନ୍ତ୍ରୀ ଚେହେରା ହୋଇ ପାରନ୍ତି ଚମ୍ପାଇ । କିନ୍ତୁ ଝାଡ଼ଖଣ୍ଡ ବିଜେପି ସଭାପତି ବାବୁଲାଲ ମାରାଣ୍ଡି ଏହାକୁ ନେଇ କ୍ଷୋଭ ପ୍ରକାଶ କରିଥିବା ଜଣା ପଡ଼ିଛି । ସେ ଦଳର ହାଇକମାଣ୍ଡଙ୍କ ସହ ଏସମ୍ପର୍କରେ ଆଲୋଚନା ମଧ୍ୟ କରିଥିବା ବିଶେଷ ସୂତ୍ରରୁ ଜଣାପଡ଼ିଛି । ସବୁଠାରୁ ଗୁରୁତ୍ବପୂର୍ଣ୍ଣ ସର୍ତ୍ତ ସମ୍ପର୍କରେ ଯଦି କହିବା ତାହେଲେ ଚମ୍ପାଇ ରାଜ୍ୟପାଳ ହେବାକୁ ମନ ବଳାଇଥିବା ଚର୍ଚ୍ଚା ହେଉଛି । ଯେଉଁ କାରଣରୁ ସେ ବିଜେପିରେ ଯୋଗ ଦେଇଛନ୍ତି । ଆଉ ଅନ୍ୟ ଏକ ସର୍ତ୍ତ ହେଉଛି କି, ତାଙ୍କ ପୁଅକୁ ବିଜେପି ଟିକେଟ ଦେବ । ଏଭଳି ସର୍ତ୍ତ ରଖି ସେ ବିଜେପିରେ ଯୋଗ ଦେଇଥିବା ଝାଡ଼ଖଣ୍ଡରେ ଚର୍ଚ୍ଚା ହୋଇଛି । ଗୃହମନ୍ତ୍ରୀ ଅମିତ ଶାହଙ୍କ ସହ ଆଲୋଚନା କରିବା ପରେ ବିଜେପିରେ ଯୋଗ ଦେବାକୁ ଯାଉଛନ୍ତି ଚମ୍ପାଇ ସୋରେନ । ମାତ୍ର ଉଭୟ କୌଣସି ଆଭିମୁଖ୍ୟ ସମ୍ପର୍କରେ ଗଣମାଧ୍ୟମରେ ଜଣାଇ ନାହାନ୍ତି ।
ଯଦି ଆମେ ଚମ୍ପାଇ ସୋରେନଙ୍କ ରାଜନୈତିକ କ୍ୟାରିୟର ସମ୍ପର୍କରେ କହିବା ତାହେଲେ ସେ ୧୯୯୧ ମସିହାରେ ଉପନିର୍ବାଚନରେ ସଢ଼େଇକେଲାରୁ ବିଜୟୀ ହୋଇଥିଲେ । ପରେ ୨୦୦୯ ମସିହାରେ ପ୍ରଥମଥର ପାଇଁ ହେମନ୍ତ ସୋରେନଙ୍କ ମନ୍ତ୍ରୀ ମଣ୍ଡଳରେ ସ୍ଥାନ ପାଇଥିଲେ । ୭ ଥର ବିଧାୟକ ହୋଇଥିବା ଚମ୍ପାଇ ସୋରେନ ୨୦୧୯ ସାଧାରଣ ନିର୍ବାଚନରେ ଜାମସେଦପୁର ଲୋକସଭା ଆସନରେ ପ୍ରତିଦ୍ବନ୍ଦିତା କରି ପରାଜୟ ବରଣ କରିଥିଲେ । ମାତ୍ର ୨୦୨୪ ମସିହାରେ ହେମନ୍ତ ସୋରେନ ଯେତେବେଳେ ଜେଲ ଯାଇଥିଲେ ସେତେବେଳେ ତାଙ୍କୁ ମୁଖ୍ୟମନ୍ତ୍ରୀ କରିଥିଲା ଦଳ । ମାତ୍ର ହେମନ୍ତ ସୋରେନ ଜେଲରୁ ଫେରିବା ପରେ ପଦ ଛାଡ଼ିଥିଲେ ଚମ୍ପାଇ । ଏହାପରେ ତାଙ୍କ ପ୍ରତି ଧୋକା ହୋଇଥିବା ନେଇ ପ୍ରତିବାଦ ଆରମ୍ଭ କରିଥିଲେ ଚମ୍ପାଇ । ଶେଷରେ ବିଜେପିରେ ଯୋଗ ଦେବାକୁ ଯାଇ ନିଜର ଏକ ନୂଆ କ୍ୟାରିୟର ଆରମ୍ଭ କରିବାକୁ ଯାଉଛନ୍ତି ଚମ୍ପାଇ ।
ନନ୍ଦିଘୋଷ ବ୍ୟୁରୋ: କେରଳ ଓ୍ବାୟନାଡ ବିଭୀଷିକାରେ କ୍ଷତିଗ୍ରସ୍ତ ୭୨୮ ପରିବାରଙ୍କୁ ରିଲିଫ ଶିବିରରୁ ଅସ୍ଥାୟୀ ଆବାସସ୍ଥଳୀକୁ ସ୍ଥାନାନ୍ତରିତ କରାଯାଇଛି । ସେପଟେ ବିପନ୍ନଙ୍କ ଥଇଥାନ ନେଇ ଆଜି ସର୍ବଦଳୀୟ ବୈଠକ ଡାକିଛନ୍ତି ମୁଖ୍ଯମନ୍ତ୍ରୀ ପିନରୟୀ ବିଜୟନ । ଏହି ବୈଠକରେ ମୁଖ୍ଯଶାସନ ସଚିବଙ୍କ ସମେତ ରାଜସ୍ବ, ଗୃହନିର୍ମାଣ, ଜଙ୍ଗଲ, ବିଦ୍ଯୁତ, ପରିବହନ, ଅର୍ଥ, ପୂର୍ତ୍ତ ବିଭାଗ ମନ୍ତ୍ରୀ ଯୋଗଦେବେ । ଓ୍ବାୟନାଡର ମୋତ ୨ ହଜାର ୫୬୯ଲୋକଙ୍କୁ ବିଭିନ୍ନ ସରକାରୀ ବଙ୍ଗଳା ଓ ଭଡା ସୂତ୍ରରେ ନିଆଯାଇଥିବା ଆବାସସ୍ଥଳୀକୁ ସ୍ଥାନାନ୍ତରିତ କରାଯାଇଛି । ଜୁଲାଇ ୩୦ରେ ଘଟିଥିବା ପ୍ରଳୟଙ୍କରୀ ଭୂସ୍ଖଳନରେ ମୃତ୍ୟୁ ସଂଖ୍ଯା ୪୧୩ ହୋଇଥିବାବେଳେ ବର୍ତ୍ତମାନ ବି ନିଖୋଜ ଅଛନ୍ତି ୧୫୨ ଜଣ । ୧୧୯ ମୃତଦେହ ଚିହ୍ନଟ ହୋଇପାରିନାହିଁ । ଏହି ଭୂସ୍ଖଳନରେ ଓ୍ବାୟନାଡର ୩ଟି ଗ୍ରାମ ଅର୍ଥାତ ମୁନ୍ଦାକାଇ, ଚୁରଲମାଲା ଓ ପୁଞ୍ଚିରିମ ସମ୍ପୂର୍ଣ୍ଣ ନିଶ୍ଚିହ୍ନ ହୋଇଯାଇଥିଲା ।
ନନ୍ଦିଘୋଷ ବ୍ୟୁରୋ: ସ୍ତ୍ରୀକୁ ଶାବଳରେ ଭୁସି ହତ୍ୟାକଲା ସ୍ବାମୀ । ଗଞ୍ଜାମ ଜିଲ୍ଲା ଦିଗପହଣ୍ଡି ସଦର ଥାନା ଅନ୍ତର୍ଗତ ରୋହିଗାଁରେ ଘଟିଛି ହତ୍ୟାକାଣ୍ଡ । ସ୍ତ୍ରୀ ଝୁନୁ ଜେନାଙ୍କ ମୃତ୍ୟୁ ଘଟିଛି। ସ୍ୱାମୀ ରାଜୁ ଜେନାକୁ ଅଟକ ରଖି ପୋଲିସ ତଦନ୍ତ ଚଳାଇଛି । ଘରେ କୌଣସି କଥାକୁ ନେଇ ସ୍ତ୍ରୀ ପେଟକୁ ଶାବଳ ଭୁଶି ଦେଇଥିଲା ରାଜୁ। ଗତକାଲି ବିଳମ୍ବିତ ରାତିରେ ଘଟିଛି ଏହି ଅଘଟଣ। ସାଇଣ୍ଟିଫିକ ଟିମ ଆଜି ତଦନ୍ତ କରିବା ପରେ ଶବ ବ୍ୟବଛେଦ କରାଯିବ ବୋଲି ସୂଚନା ରହିଛି ।
ନନ୍ଦିଘୋଷ ବ୍ୟୁରୋ: ଆଜି ବିଧାନସଭା ଦ୍ୱିତୀୟ ପର୍ଯ୍ୟାୟ ଅଧିବେଶନର ଅଷ୍ଟମ ଦିନ। ଗୃହରେ ଜଳ ସଂପଦ, ରାଜସ୍ୱ ବିପର୍ଯ୍ୟୟ ପରିଚାଳନା, ଇସ୍ପାତ ଓ ଖଣି, ଯୋଜନା ଓ ସଂଯୋଜନା, ବାଣିଜ୍ୟ, ସୂଚନା ଲୋକସମ୍ପର୍କ ଓ ପରିବହନ ବିଭାଗର ପ୍ରଶ୍ନକାଳ ରହିଛି। ଶୂନ୍ୟକାଳରେ ଜାତିଭିତ୍ତିକ ଗଣନା ଓ ସଂରକ୍ଷଣ ପରି ବହୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ଉଠାଇପାରନ୍ତି ବିରୋଧୀ। ବିରୋଧୀଙ୍କ ପକ୍ଷରୁ ମୁଲତବୀ ପ୍ରସ୍ତାବ ମଧ୍ୟ ଆସିପାରେ। ଅପରାହ୍ନରେ ବିଦ୍ୟାଳୟ ଓ ଗଣଶିକ୍ଷା, ଉଚ୍ଚଶିକ୍ଷା ବିଭାଗର ଖର୍ଚ୍ଚ ଦାବି ଉପରେ ଆଲୋଚନା ରହିଛି।
ନନ୍ଦିଘୋଷ ବ୍ୟୁରୋ: ଡିଆଇଜି ରାଜେଶ ପଣ୍ଡିତଙ୍କ ବିରୋଧରେ ଚାର୍ଜଫ୍ରେମ୍ କଲା ଗୃହ ବିଭାଗ । ଜଣେ ମହିଳା ଆଇଆଇସିଙ୍କ ଘରେ ପଶି ନିଜ ପଦର ଅପବ୍ୟବହାର କରିବା ସହ ତାଙ୍କ ପ୍ରତି ଓ ତାଙ୍କ ପରିବାର ଲୋକଙ୍କ ପ୍ରତି ଅଶୋଭନୀୟ ଆଚରଣ ରାଜେଶ ପଣ୍ଡିତ କରିଥିବା ନେଇ ତଥ୍ୟ ପ୍ରମାଣ ଦର୍ଶାଇଲା ଗୃହ ବିଭାଗ । ଯାହାକୁ ନେଇ ରଜେଶ ପଣ୍ଡିତଙ୍କୁ ନିଲମ୍ବିତ କରାଯାଇଛି । ଗୃହ ବିଭାଗରେ ତଥ୍ୟ ପ୍ରମାଣ ସହ ନିଜର ପକ୍ଷ ରଖିବାକୁ ରାଜେଶ ପଣ୍ଡିତଙ୍କୁ ଦିଆଯାଇଛି ସୁଯୋଗ । ୩୦ ଦିନ ମଧ୍ୟରେ ନିଜର ପକ୍ଷ ରଖି ପାରିବେ ରାଜେଶ । ତାଙ୍କ ବିରୋଧରେ ଆସିଥିବା ଅଭିଯୋଗ ଓ ପ୍ରମାଣ ନେଇ କୌଣସି ସନ୍ତୋଷ ଜନକ ଉତ୍ତର ରଖି ନପାରିଲେ ଭାରତୀୟ ପୋଲିସ ସେବା ନିୟମ ଅନୁସାରେ ନିଆଯିବ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ । ଗତ ମାସ ୨୭ ତାରିଖରେ ଘଟିଥିବା ଘଟଣାକୁ ନେଇ ଚାର୍ଜଫ୍ରେମ ହୋଇଛି। ଭୁବନେଶ୍ୱର ୟୁନିଟ୍-୧ରେ ରାଜେଶ ପଣ୍ଡିତ କରିଥିଲେ ହଙ୍ଗାମା। ଜଣେ ମହିଳା ସବଇନ୍ସପେକ୍ଟରଙ୍କ ଘରେ ପଶି ହଙ୍ଗାମା କରିଥିଲେ। ପିସିଆର ଟିମ୍ ପହଞ୍ଚି ରାଜେଶ ପଣ୍ଡିତଙ୍କୁ କରିଥିଲା କ୍ଷାନ୍ତ। ଘଟଣା ପରେ ରାଜେଶ ପଣ୍ଡିତଙ୍କୁ ନିଲମ୍ବିତ କରାଯାଇଛି। ଅଗ୍ନିଶମ ଓ ହୋମଗାର୍ଡ ବିଭାଗ ଡିଆଇଜି ଥିଲେ ରାଜେଶ ପଣ୍ଡିତ।
ନନ୍ଦିଘୋଷ ବ୍ୟୁରୋ: ଆପଣ ବ୍ୟବହାର କରୁଥିବା ସୋସିଆଲ ମିଡିଆ ସାଇଟ ଗୁଡିକୁ କେନ୍ଦ୍ର ସରକାରଙ୍କ ନୂଆ ଯୋଗାଯୋଗ ନିୟମ ଅନୁସାରେ ତଦାରଖ କରିପାରିବେ । ଭାରତରେ ଜିଓ, ଏୟାରଟେଲ,ବିଏସଏନଏଲ ସମେତ ଅନେକ ଟେଲିକମ କମ୍ପାନୀ ଅଛି | ଏହା ବ୍ୟତୀତ, ଅନେକ ସୋସିଆଲ୍ ମିଡିଆ ଆପ୍ ଅଛି, ଯାହା ସାହାଯ୍ୟରେ ଉପଭୋକ୍ତାମାନେ ପରସ୍ପର ସହିତ ସଂଯୋଗ ସ୍ଥାପନ କରିପାରୁଛନ୍ତି । ବର୍ତ୍ତମାନ କେନ୍ଦ୍ର ସରକାରଙ୍କ ନୂତନ ନିୟମ ଅନୁଯାୟୀ ଏହି ସମସ୍ତ ସୋସିଆଲ ମିଡିଆ ସାଇଟ ଗୁଡିକୁ ତଦାରଖ କରିପାରିବେ । ଏହାଦ୍ବାରା ଲୋକଙ୍କ ବ୍ୟକ୍ତିଗତ ଗୋପନୀୟତା ନଷ୍ଟ ହେବା ଆଶଙ୍କ କରାଯାଉଛି । କିନ୍ତୁ, PIB ବା ପ୍ରେସ୍ ଇନଫରମେସନ୍ ବ୍ୟୁରୋରୁ ସ୍ପଷ୍ଟ ହୋଇଛି ଯେ, ଏଭଳି କାର୍ଯ୍ୟ କେନ୍ଦ୍ର ସରକାର କରୁନାହାଁନ୍ତି । ନୂଆ ଯୋଗାଯୋଗ ଆଇନରେ ବି ଏଭଳି ବ୍ୟବସ୍ଥା ନାହିଁ ବୋଲି PIB ସୋସିଆଲ ମିଡିଆ Xରେ କହିଛି । ଏଭଳି ମେସେଜ ଫେକ୍ ହୋଇଥାଇପାରେ ବୋଲି PIB କହିଛି । ଯଦି ଏମିତି ହୁଏ ତେବେ ନିଶ୍ଚିତ ରୁପେ ବ୍ୟକ୍ତିଗତ ସ୍ବାଧିନତା ଉପରେ ପ୍ରହାର ବୋଲି କୁହାଯାଇପାରିବ ।
ନନ୍ଦିଘୋଷ ବ୍ୟୁରୋ: ନିର୍ବାଚନ ସରିବାର ୩ ମାସ ପୂରିନି। ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀଙ୍କୁ ବିରୋଧ କରିବା ପୁଣି ଆରମ୍ଭ ହୋଇଯାଇଛି । ବେଗୁନିଆ ବୋଲଗଡ ନିର୍ବାଚନ ମଣ୍ଡଳୀରେ ଆଜି ପୁଣି ପଶିପାରିନାହାଁନ୍ତି ଅପରାଜିତା । ଅଧାବାଟରୁ ଫେରିବାକୁ ବାଧ୍ଯ ହେଲେ ଅପରାଜିତା ଷଡ଼ଙ୍ଗୀ । ବେଗୁନିଆ ସିକୋ ହଜରେ ଏକ ଶୀତଳଭଣ୍ଡାର ଉଦଘାଟନ ପାଇଁ ସାଂସଦ ଅପରାଜିତା ଷଡ଼ଙ୍ଗୀ କାର୍ଯ୍ୟକ୍ରମ ଚୂଡାନ୍ତ କରିଥିଲେ। ଏବେ ବିଧାନସଭା ଚାଲୁଥିବାରୁ ବିଧାୟକ ଆସିବା ସମ୍ଭବ ନଥିଲା । ଏହା ସତ୍ତ୍ୱେ ପ୍ରଶାସନ ଉପରେ ଚାପ ପକାଇ ସାଂସଦ ଏକୁଟିଆ ଏହାକୁ ଉଦଘାଟନ କରିବାକୁ କାର୍ଯ୍ୟକ୍ରମ ଚୂଡାନ୍ତ କରିଥିଲେ। ହେଲେ ଏହାକୁ ବିରୋଧ କରିଥିଲେ ସ୍ଥାନୀୟ ବାସିନ୍ଦା ଓ ସ୍ଥାନୀୟ ଜନପ୍ରତିନିଧି । ଅପରାଜିତା ଆସିବା ଖବର ଶୁଣି ସ୍ଥାନୀୟ ସରପଞ୍ଚ, ଲୋକପ୍ରତିନିଧିଙ୍କ ସହ ଶହ ଶହ ସଂଖ୍ୟାରେ ପୁରୁଷ ମହିଳା ରାସ୍ତାରେ ବସି ପ୍ରତିବାଦ ଆରମ୍ଭ କରିଦେଇଥିଲେ । ଅପରାଜିତା ଡାଉନ୍ ଡାଉନ୍ ନାରାବାଜି କରିଥିଲେ । ଅପରାଜିତାଙ୍କ ସହ ବିଜେପି ସରକାର ବିରୋଧରେ ବି ସ୍ୱର ଉତ୍ତୋଳନ କରିଥିଲେ। ଖବର ପାଇ ଜଙ୍କିଆ ପୋଲିସ ୨ ସେକ୍ସନ ଫୋର୍ସ ସହ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାଇଥିଲେ। ହେଲେ ବି ଲୋକେ ଅପରାଜିତାଙ୍କ କାର୍ଯ୍ୟକ୍ରମକୁ ବିରୋଧ ଜାରି ରଖିଥିଲେ। ସାଂସଦଙ୍କ ପ୍ରତିନିଧି ତଥା ବେଗୁନିଆ ବୋଲଗଡ ବିଜେପି ବିଧାୟକ ପାର୍ଥୀ ପ୍ରକାଶ ରଣବିଜୁଳି ଲୋକଙ୍କୁ ବୁଝାଇ ଉଦଘାଟନ କରିବାକୁ ଚେଷ୍ଟା କରି ମଧ୍ୟ ବିଫଳ ହୋଇଥିଲେ। ଲୋକଙ୍କ ବିରୋଧ ଖବର ପାଇ ସାଂସଦ ଅଧା ବାଟରୁ ଫେରିବାକୁ ବାଧ୍ଯ ହୋଇଥିଲେ ।
ନନ୍ଦିଘୋଷ ବ୍ୟୁରୋ: ଭାରତ ରାଷ୍ଟ୍ର ସମିତି ନେତ୍ରୀ କେ. କବିତାଙ୍କୁ ହାଇଦ୍ରାବାଦରେ ବିପୁଳ ସମ୍ବର୍ଦ୍ଧନା। ହଜାର ହଜାର ସମର୍ଥକ ଶୋଭାଯାତ୍ରାରେ କବିତାଙ୍କୁ ପାଛୋଟି ନେଇଛନ୍ତି। ଗତକାଲି ତାଙ୍କ ଜାମିନକୁ ସୁପ୍ରିମକୋର୍ଟ ମଞ୍ଜୁର କରିବା ପରେ ତିହାର ଜେଲରୁ ସେ ପଦାକୁ ଆସିଥିଲା। ହାଇଦ୍ରାବାଦରେ ତାଙ୍କୁ ସ୍ବାଗତ କରିବା ଲାଗି ଉପସ୍ଥିତ ଥିଲେ ଭାଇ ତଥା ବିଆରଏସ କାର୍ଯ୍ୟକାରୀ ସଭାପତି କେ.ଟି. ରାମାରାଓ, ସ୍ବାମୀ ଡି. ଅନିଲ କୁମାର ଓ ପୁଅ ଆଦିତ୍ଯ। ବିମାନବନ୍ଦରଠାରୁ ତାଙ୍କ ବାସଭବନ ଯାଏ ଠୁଳ ହୋଇଥିଲେ ସମର୍ଥକ। ଶୋଭାଯାତ୍ରାବେଳେ ଜୟ ତେଲଙ୍ଗାନା ବୋଲି ନାରା ଦେଇଥିଲେ କବିତା। ଦିଲ୍ଲୀ ମଦନୀତି ମାମଲାରେ ଗତ ମାର୍ଚ୍ଚ ୧୫ରେ କବିତାଙ୍କୁ ଗିରଫ କରିଥିଲା ଇଡି। ପରମାସରେ ସେ ଜେଲରେ ଥିବାବେଳେ ତାଙ୍କୁ ଗିରଫ କରିଥିଲା ସିବିଆଇ। କବିତା କହିଛନ୍ତି ସେ ଆଇନଗତ ଭାବେ ଲଢେଇ କରିବେ। ରାଜନୈତିକ ଭାବେ ବି ଲଢେଇ ଜାରି ରହିବ। ତାଙ୍କୁ ବେଆଇନ ଭାବେ ଜେଲରେ ପୂରାଯାଇଥିଲା। ଗତକାଲି ଜାମିନ ପ୍ରଦାନ ବେଳେ ଦିଲ୍ଲୀ ହାଇକୋର୍ଟ, ସିବିଆଇ ଓ ଇଡି ଉପରେ ବର୍ଷିଥିଲେ ସୁପ୍ରିମକୋର୍ଟ। କବିତାଙ୍କୁ ଉଚ୍ଚଶିକ୍ଷିତ ମହିଳା କହି ଦିଲ୍ଲୀ ହାଇକୋର୍ଟ ଜାମିନ ଦେଇନଥିଲେ। ମହିଳା ଜଣକ ଉଚ୍ଚଶିକ୍ଷିତା ବୋଲି କାହିଁକି ଜାମିନ ଦିଆଯିବନି ବୋଲି ପ୍ରଶ୍ନ କରିଥିଲେ ସୁପ୍ରିମକୋର୍ଟ। ଦିଲ୍ଲୀ ମଦନୀତି ମାମଲାରେ ବର୍ତ୍ତମାନ କେଜରିୱାଲ ହିଁ ଏବେ ଜେଲରେ ଅଛନ୍ତି।
