ଭୁବନେଶ୍ୱର : ଖୋଲିବ ଓଡ଼ିଶାରୁ ବାହାର ରାଜ୍ୟକୁ ଗଞ୍ଜେଇ ଚୋରାଚାଲାଣର ଗୁମର । କୁଖ୍ୟାତ ଗଞ୍ଜେଇ ମାଫିଆ ନିଲୁ ପ୍ରଧାନକୁ ଓଡ଼ିଶାରୁ ଟ୍ରାଞ୍ଜିଟ ରିମାଣ୍ଡରେ ନେଇଛି ମୁମ୍ବାଇ ଏନସିବି । ଗତକାଲି ବିଳମ୍ବିତ ରାତିରେ ଗଞ୍ଜେଇ ମାଫିଆ ନିଲୁ ଗିରଫ ହୋଇଥିଲା । କ୍ୟାପିଟାଲ ହସ୍ପିଟାଲରେ ତାର ସ୍ଵାସ୍ଥ୍ୟ ପରୀକ୍ଷା ପରେ ତାକୁ କୋର୍ଟରେ ହାଜର କରାଯାଇଥିଲା । ପରେ ମୁମ୍ବାଇ ଏନସିବି ଆସି ନିଲୁକୁ ଟ୍ରାଞ୍ଜିଟ ରିମାଣ୍ଡରେ ନେଇଛି । ଅଭିଯୁକ୍ତର ଘର ଗଞ୍ଜାମ ଜିଲ୍ଲାରେ ହୋଇଥିବାବେଳେ ରାଜ୍ୟ ବାହାରକୁ ଗଞ୍ଜେଇ ଚାଲାଣରେ ତାର ସଂପୃକ୍ତି ରହିଛି । ମୁମ୍ବାଇ ସମେତ ଦିଲ୍ଲୀ ଓ ଅନ୍ୟ ରାଜ୍ୟକୁ ଗଞ୍ଜେଇ ଚାଲାଣରେ ସିଧାସଳଖ ନିଲୁର ସଂପୃକ୍ତି ରହିଛି । ତା ସହିତ ଆଉ କିଏ କିଏ ସଂପୃକ୍ତ ଅଛନ୍ତି ଏବଂ କିଭଳି ପୂରା ରାକେଟ କାମ କରୁଛି ସେନେଇ ଏନସିବି ଖୋଳତାଡ଼ ଜାରି ରଖିଛି ।
ଶବ ବ୍ୟବଚ୍ଛେଦ ପାଇଁ ଆଣିଥିବା ଆମ୍ବୁଲାନ୍ସକୁ ଛାଡ଼ିଲେନି ଘରୋଇ ଆମ୍ବୁଲାନ୍ସ କର୍ମଚାରୀ
ଭୁବନେଶ୍ୱର : କ୍ୟାପିଟାଲ ହସ୍ପିଟାଲରେ ଘରୋଇ ଆମ୍ବୁଲାନ୍ସ କର୍ମଚାରୀଙ୍କ ଦାଦାଗିରି । ବାହାରୁ ଶବ ବ୍ୟବଚ୍ଛେଦ ପାଇଁ ଆଣିଥିବା ଆମ୍ବୁଲାନ୍ସକୁ ଛାଡ଼ିଲେ ନାହିଁ । ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଉତ୍ତର ପ୍ରଦେଶର କମଲେଶ୍ ପାଣ୍ଡେଙ୍କ ମୃତ୍ୟୁ ହୋଇଥିଲା । ଶବ ବ୍ୟବଛେଦ ପାଇଁ ଆଜି ଆମ୍ବୁଲାନ୍ସରେ କ୍ୟାପିଟାଲ ହସ୍ପିଟାଲକୁ ଅଣାଯଇଥିଲା । ଶବ ବ୍ୟବଛେଦ ପରେ ଆମ୍ବୁଲାନ୍ସ ଛାଡ଼ିନଥିଲେ ଘରୋଇ ଆମ୍ବୁଲାନ୍ସ କର୍ମଚାରୀ । ବାହାରୁ ଆସିଥିବା ଆମ୍ବୁଲାନ୍ସ ଶବ ନେଇପାରିବ ନାହିଁ ବୋଲି ଜିଦରେ ଦୀର୍ଘ ୩ ଘଣ୍ଟା ପର୍ଯ୍ୟନ୍ତ ଶବ ସହ ପରିବାରଙ୍କୁ ଅଟକ ରଖିଥିଲେ । କେବଳ କ୍ୟାପିଟାଲ ହସ୍ପିଟାଲ ଆମ୍ବୁଲାନ୍ସ ଶବ ନେଇପାରିବ କହି ଘରୋଇ ଆମ୍ବୁଲାନ୍ସ କର୍ମଚାରୀ ଅଟକାଥିଲେ । ଗଣମାଧ୍ୟମ ହସ୍ତକ୍ଷେପ ପରେ ଆମ୍ବୁଲାନ୍ସକୁ ଛାଡ଼ିଥିଲେ । ମୃତଦେହ ସହ ପରିବାର ଲୋକଙ୍କୁ ନିର୍ଯାତନା ନେଇ ଅଭିଯୋଗ କରିଛନ୍ତି ମୃତକଙ୍କ ପରିବାର ଲୋକେ । ଏଭଳି ଘଟଣା ବାରମ୍ବାର ଘଟୁଛି । ପ୍ରତିକାର ପାଇଁ ପୋଲିସର ସଗଯୋଗ ନିଆଯିବ ବୋଲି କହିଛନ୍ତି କ୍ୟାପିଟାଲ ହସ୍ପିଟାଲ ନିର୍ଦ୍ଦେଶକ ।
ଫରେନସିକ ଲ୍ୟାବକୁ ଗଲା ମୃତ ଶୁଭଶ୍ରୀ ନାୟକଙ୍କ ଅର୍ଗାନ
ଭୁବନେଶ୍ବର : ଭୁବନେଶ୍ବରରେ ସ୍ତ୍ରୀକୁ ଆନେସ୍ଥେସିଆ ଇଞ୍ଜେକ୍ସନ ଦେଇ ହତ୍ୟା ଘଟଣା । ଫରେନସିକ ଲ୍ୟାବକୁ ଗଲା ମୃତ ଶୁଭଶ୍ରୀ ନାୟକଙ୍କ ଅର୍ଗାନ । କିଡନି, ହାର୍ଟ, ରକ୍ତ, ଲିଭର ଲ୍ୟାବକୁ ପଠାଯାଇଛି । ରସୁଲଗଡ ରାଜ୍ୟ ଫରେନସିକ ଲ୍ୟାବରେ ଏହାର ପରୀକ୍ଷା କରାଯିବ । ରିପୋର୍ଟ ଆସିବା ପରେ ମୃତ୍ଯୁର ପୂରା ଗୁମର ପଦାକୁ ଆସିବ ବୋଲି ପୋଲିସ ଆଶା କରୁଛି । ହତ୍ଯା ମାମଲାର ପ୍ରାଥମିକ ରିପୋର୍ଟ ଆସିସାରିଥିବାବେଳେ ଫାଇନାଲ ଭିସେରା ରିପୋର୍ଟ ଆସିଲେ ଏହାର ଆନାଲିସସ୍ କରାଯିବ । ଓଭରଡୋଜ ଆନେସ୍ଥେସିଆ ସହ କିଛି କେମିକାଲ ମିଶିଥିବା ସନ୍ଦେହ କରାଯାଉଛି ବୋଲି କ୍ୟାପିଟାଲ ହସ୍ପିଟାଲ ନିର୍ଦ୍ଦେଶକ ସୂଚନା ଦେଇଛନ୍ତି । ଅଭିଯୁକ୍ତ ସ୍ବାମୀ ପ୍ରଦ୍ୟୁମ୍ନ କୁମାରକୁ ୩ ଦିନିଆ ରିମାଣ୍ଡ ପାଇଁ ଆବେଦନ କରିଛି ଭରତପୁର ପୋଲିସ । ରିମାଣ୍ଡ ଅନୁମତି ମିଳିବା ପରେ ସିନ୍ ରିକ୍ରିଏସନ କରାଯିବ । ପୂର୍ବରୁ ରାଜ୍ୟ ଫରେନସିକ ଲ୍ୟାବକୁ ବ୍ୟବହୃତ ସିରିଞ୍ଜ ଓ ଆନାସ୍ଥେସିଆ ମେଡିସିନି ପଠାସରିଛି । ଅଭିଯୁକ୍ତର ମୋବାଇଲକୁ ବି ଫରେନସିକ ଲ୍ୟାବକୁ ପଠାଯାଇଛି । ଗତ ୨୮ ତାରିଖ ଅପରାହ୍ନରେ ଇଞ୍ଜେକ୍ସନ ଦେଇ ପତ୍ନୀ ଶୁଭଶ୍ରୀଙ୍କୁ ହତ୍ୟାକରିଥିଲା ସ୍ୱାମୀ ପ୍ରଦ୍ୟୁମ୍ନ । ହତ୍ୟାରେ ପ୍ରଦ୍ୟୁମ୍ନ ଙ୍କୁ ସହଯୋଗ କରିଥିଲେ ଦୁଇ ପ୍ରେମିକା । ହତ୍ୟା ପରେ ଆତ୍ମହତ୍ୟାର ରୁପ ଦେବାକୁ ମୃତଦେହକୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଥିଲେ ।
ମଦ ବନ୍ଦ ପାଇଁ ଅଭିନବ ଢଙ୍ଗରେ ପ୍ରତିବାଦ : ଖଇ ଉଡ଼ାଇ ଦେଲେ ଅଭିଶାପ
ତେଲକୋଇ : ମଦ ବନ୍ଦକୁ ନେଇ ମହିଳାମାନେ ଅଭିନବ ଡଙ୍ଗରେ ପ୍ରତିିବାଦ କରିଛନ୍ତି । ସଂଗୃହିତ ଧାନରେ ପ୍ରସ୍ତୁତ ଖଇକୁ ଉଡ଼ାଇ ଅଭିଶାପ ଦେଇଛନ୍ତି । କେନ୍ଦୁଝର ଜିଲ୍ଲା ତେଲକୋଇ ବ୍ଲକ ଅନ୍ତର୍ଗତ ପଡ଼ାଙ୍ଗ ଗାଁରେ ବେଆଇନ ମଦ କାରବାର ବିରୋଧରେ ମାସେ ହେଲାଣି ଆନ୍ଦୋଳନ ଜାରି ରଖିଛନ୍ତି ମହିଳା । ପୋଲିସ ପ୍ରଶାସନ କିଛି ପଦକ୍ଷେପ ନନେବାରୁ ଶେଷରେ ବାଧ୍ୟହୋଇ ଆଜି ପଡ଼ାଙ୍ଗ ପଞ୍ଚାୟତର ମହିଳାମାନେ ଏକତ୍ରିତ ହୋଇ ଅଭିନବ ଢଙ୍ଗରେ ପ୍ରତିବାଦ କରିଛନ୍ତି । ଗାଁ ଦେହୁରୀ ଓ ଜଗନ୍ନାଥ ମନ୍ଦିର ପୂଜକଙ୍କ ଦ୍ଵାରା ଲକ୍ଷ୍ମୀମଣ୍ଡପଠାରେ ଭାଗବତ ପୂଜା କରିଥିଲେ । ଗାଁରେ ମଦ ବିକ୍ରି ଓ ମଦ ପିଇବାକୁ ବାରଣ କରିବା ସହିତ ପ୍ରତି ଘରୁ ସଂଗୃହିତ ଧାନରେ ପ୍ରସ୍ତୁତ ଖଇକୁ ଉଡ଼ାଇଥିଲେ । ଯିଏ ଅମାନ୍ୟ କରିବ ତା’ର କ୍ଷତି ଓ ସର୍ବନାଶ ହେବ ବୋଲି ଖଇ ଉଡ଼ାଇ ଅଭିଶାପ ଦେଇଛନ୍ତି ମହିଳା । ତେଲକୋଇ ବ୍ଲକରେ ଗୋଟିଏ ସରକାରୀ ଠିପି ବନ୍ଦ ବିଦେଶୀ ମଦ ଦୋକାନ ଓ ୨ଟି ଦେଶୀ ମଦ ଭାଟି ରହିଛି । ଏହା ସହିତ ଗାଁ ଗଣ୍ଡାରେ ପ୍ରାୟ ୪୦ରୁ ଅଧିକ ଚୋରା ବିଦେଶୀ ମଦ ଦୋକାନ ଓ ୨୦୦ରୁ ଅଧିକ ଦେଶୀ ମଦ ଦୋକାନ ଖୋଲିଛି । ମଦ ଯୋଗୁଁ ପରିବାରରେ ଅଶାନ୍ତି ସହିତ ଲୋକଙ୍କ ଜୀବନ ଯାଉଛି । ଅବକାରୀ ଓ ପୋଲିସ ବିଭାଗକୁ ଲିଖିତ ଅଭିଯୋଗ କଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ । ତରନ୍ତ ଚୋରା ମଦକାର ବନ୍ଦ କରି ଏଥିରେ ସମ୍ପୃକ୍ତ ଦୋଷୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାନଗଲେ ଆଗକୁ ଆନ୍ଦୋଳନ ତୀବ୍ରତର କରାଯିବ ବୋଲି ଚେତାବନୀ ଦେଇଛନ୍ତି ମହିଳା।
‘ଆମ୍ବଟାକୁଆ ଖାଇ ମୃତ୍ୟୁ ଘଟଣାରେ ମୁଖ୍ୟମନ୍ତ୍ରୀ, ଯୋଗାଣ ମନ୍ତ୍ରୀ ଓ ଜିଲ୍ଲାପାଳଙ୍କୁ ଗିରଫ କରାଯାଉ’
ଭୁବନେଶ୍ୱର: କନ୍ଧମାଳ ଜିଲ୍ଲାର ଦାରିଙ୍ଗିବାଡ଼ି ବ୍ଲକ ଅନ୍ତର୍ଗତ ଗଦାପୁର ପଞ୍ଚାୟତର ମାଣ୍ଡିପଙ୍କା ଗାଁରେ ଆମ୍ବଟାକୁଆ ଖାଇ ୨ ମହିଳାଙ୍କ ମୃତ୍ୟୁ ଘଟଣା। ଶନିବାର ଉକ୍ତ ଗାଁକୁ ଗସ୍ତ କରି ଫେରିବା ପରେ ପ୍ରତିକ୍ରିୟା ରଖିଛନ୍ତି ବରିଷ୍ଠ କଂଗ୍ରେସ ନେତା ଶ୍ରୀକାନ୍ତ ଜେନା । ଆମ୍ବ ଟାକୁଆ ଖାଇ ମୃତ୍ୟୁ ସାଧାରଣ ଘଟଣା ନୁହେଁ। ଏହା ସରକାରଙ୍କ ଦ୍ୱାରା ରଚିତ ବିପର୍ଯ୍ୟୟ। ଘଟଣାରେ ମୁଖ୍ୟମନ୍ତ୍ରୀ, ଯୋଗାଣମନ୍ତ୍ରୀ, ଜିଲ୍ଲାପାଳଙ୍କ ବିରୋଧରେ ଅପରାଧିକ ମାମଲା ରୁଜୁ କରି ଗିରଫ କରିବା ଦରକାର ବୋଲି ଶ୍ରୀକାନ୍ତ ଜେନା କହିଛନ୍ତି।
ମନ୍ତ୍ରୀଙ୍କ ଆମ୍ଵ ଟାକୁଆ ଖାଇବା କଥାକୁ ସମାଲୋଚନା କରିଛନ୍ତି ଶ୍ରୀକାନ୍ତ ଜେନା । ଆହୁରି ମଧ୍ୟ କହିଛନ୍ତି, ଆମେ ଦେଖିଲୁ ଦେଢ଼ ମାସ ବିଳମ୍ବରେ ଶନିବାରେ ଅକ୍ଟୋବର ମାସର ଚାଉଳ ବଣ୍ଟାଯାଉଥିଲା । ଚାଉଳ ମିଳିବାରେ ବିଳମ୍ଵ ହେବାରୁ ଲୋକଙ୍କ ପାଖରେ ଖାଦ୍ୟାଭାବ ଦେଖାଦେଇଥିଲା । ବାଧ୍ୟହୋଇ ସେମାନେ ଆମ୍ବ ଟାକୁଆ ଖାଇଥିବା କହିଛନ୍ତି ଶ୍ରୀକାନ୍ତ ଜେନା । ଯୋଗାଣମନ୍ତ୍ରୀ ସେଠାକୁ ଯାଇ ଦେଖନ୍ତୁ ବଣ୍ଟନ ବ୍ୟବସ୍ଥା କିପରି ଚାଲିଛି । ୩୫ କିଲୋ ଚାଉଳ ଦେଉନାହାନ୍ତି । ତା ବଦଳରେ ପାଞ୍ଚ କିଲୋ ଚାଉଳ ବି ଠିକ୍ ସମୟରେ ଦିଆଯାଉନାହିଁ । ଉକ୍ତ ଅଞ୍ଚଳରେ ବିକାଶ ବହୁ ଦୂରରେ। ଏ ଯାଏଁ ମୁଖ୍ୟମନ୍ତ୍ରୀ କି ଜିଲ୍ଲାପାଳଙ୍କ ପାଖରେ ସମୟ ନାହିଁ ସେହି ଗାଁକୁ ଯିବାକୁ । ସଂରକ୍ଷିତ ଅଞ୍ଚଳ ବିକାଶ ଦାୟିତ୍ୱ ରାଜ୍ୟପାଳଙ୍କର। ହେଲେ ନିର୍ବାଚନ ପାଇଁ ଝାଡ଼ଖଣ୍ଡ ଯାଇଛନ୍ତି। ତେଣୁ ରାଜ୍ୟ ସରକାର ତୁରନ୍ତ ଦୃଷ୍ଟି ଦେବାକୁ ଦାବି କରିଛନ୍ତି ବରିଷ୍ଠ କଂଗ୍ରେସ ନେତା ଶ୍ରୀକାନ୍ତ ଜେନା।
ସେପଟେ ଆମ୍ଵଟାକୁଆ ଖାଇ ମହିଳାଙ୍କ ମୃତ୍ୟୁ ଘଟଣାରେ ସମାନ ପ୍ରତିକ୍ରିୟା ରଖିଛନ୍ତି କଂଗ୍ରେସ ବିଧାୟକ ତାରା ବାହିନୀପତି । ଏହା ଗଣତନ୍ତ୍ର ପାଇଁ କ୍ଷତିକାରକ। କେବେ ଭାଷଣ ମାରି ସରକାରକୁ ଆସିଲେ, ହେଲେ ଲୋକ ଆମ୍ବ ଟାକୁଆ ଖାଉଛନ୍ତି ବୋଲି ସମାଲୋଚନା କରିଛନ୍ତି ତାରା ବାହିନୀପତି।
ମହାମଦୀ ପ୍ରସଙ୍ଗ: ବିଜେଡିର ଦାବି, ସାର୍ବଜନୀନ ହେଉ ମୁଖ୍ୟମନ୍ତ୍ରୀଙ୍କ ଆଲୋଚନା
ଭୁବନେଶ୍ୱର: ମହାମଦୀ ପ୍ରସଙ୍ଗକୁ ନେଇ ରାଜ୍ୟ ସରକାରଙ୍କ ଉପରେ ବର୍ଷିଲା ବିଜେଡି। ଏ ସମ୍ପର୍କରେ ବିଜେଡି ନେତା ପ୍ରଶାନ୍ତ ମୁଦୁଲି କହିଛନ୍ତି ଯେ, ମହାନଦୀ ହେଉଛି ଓଡ଼ିଶାର ଅତୀତ, ବର୍ତ୍ତମାନ ଓ ଭବିଷ୍ୟତ। କେନ୍ଦ୍ର ସହଯୋଗ ନମିଳିବାରୁ ବଞ୍ଚିତ ହେଉଛି ଓଡ଼ିଶା। ରାଜ୍ୟ ପ୍ରତି ଅନ୍ୟାୟ କରିଚାଲିଛି ଛତିଶଗଡ଼। ଓଡ଼ିଶା ସ୍ବାର୍ଥ ପାଇଁ ବିଜେଡି ଲଢ଼େଇ କରିଆସୁଛି। ହେଲେ ମହାନଦୀ ସମସ୍ୟାର ସମାଧାନ କରିବାକୁ ଚାହୁଁନି ଛତିଶଗଡ଼। ଏବେ ଉଭୟ କେନ୍ଦ୍ର, ଛତିଶଗଡ଼ ଓ ରାଜ୍ୟରେ ବିଜେପି ସରକାର ଅଛନ୍ତି। ତେଣୁ ମହାନଦୀ ପ୍ରସଙ୍ଗରେ ଯେଉଁ ଦୁଇ ଥର ଆଲୋଚନା ହୋଇଛି ବୋଲି କହୁଛନ୍ତି ମୁଖ୍ୟମନ୍ତ୍ରୀ, ତାହାକୁ ସାର୍ବଜନୀନ କରାଯାଉ ବୋଲି ଦାବି କରିଛନ୍ତି ପ୍ରଶାନ୍ତ ମୁଦୁଲି।
ସେପଟେ ମହାନଦୀ ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି କଂଗ୍ରେସବିଧାୟକ ତାରା ବାହିନୀପତି । ଛତିଶଗଡ଼, ଓଡ଼ିଶା ଓ କେନ୍ଦ୍ରରେ ବିଜେପି ସରକାର ଅଛି । ଯଦି ଟ୍ରିପଲ ଇଞ୍ଜିନ ସରକାରରେ ମହାନଦୀ ପ୍ରସଙ୍ଗ ସମାଧାନ ହେବନି, ତାହାଲେ ସେ ବିଫଳ । ମୁଖ୍ୟମନ୍ତ୍ରୀ କହୁଛନ୍ତି ଯେ, ଏହି ପ୍ରସଙ୍ଗରେ ଦୁଇଥର କଥା ହୋଇଛନ୍ତି, ତାହା ସ୍ପଷ୍ଟ କରନ୍ତୁ କଣ ଆଲୋଚନା ହୋଇଛି ? ଲୋକ ଜାଣିବା ଦରକାର ବୋଲି କହିଛନ୍ତି ତାରା ବାହିନୀପତି ।
ନିଜ ମାଟିରେ ପ୍ରଥମ ଥର ହ୍ଵାଇଟ୍ ୱାସ ହେଲା ଭାରତ
ମୁମ୍ବାଇ: ଭାରତୀୟ କ୍ରିକେଟ ଇତିହାସରେ ସବୁଠୁ ବଡ଼ ଲଜ୍ଜା। ପ୍ରଥମ ଥର ପାଇଁ ନିଜ ମାଟିରେ ୩-୦ ରେ ଟେଷ୍ଟ ସିିରିଜ ହ୍ଵାଇଟ୍ ୱାସ ହୋଇଛି ଟିମ୍ ଇଣ୍ଡିଆ। ଭାରତ ଟେଷ୍ଟ ମ୍ୟାଚ ୧୯୩୩-୩୪ରେ ଟେଷ୍ଟ ମ୍ୟାଚ ଖେଳିବା ଦିନରୁ କେବେ ବି ଏପରି ହୋଇନଥିଲା। ନ୍ୟୁଜିଲାଣ୍ଡ ବି ପ୍ରଥମ ଥର ପାଇଁ ଭାରତକୁ ଭାରତ ମାଟିରେ ୩-୦ରେ ଟେଷ୍ଟ ସିରିଜରେ ପରାସ୍ତ କରିଛି।
ମୁମ୍ବାଇର ୱାନଖେଡ ଷ୍ଟାଡିୟମରେ ତୃତୀୟ ଟେଷ୍ଟରେ ହାରିଲା ଟିମ୍ ଇଣ୍ଡିଆ । ନ୍ୟୁଜିଲାଣ୍ଡ ୨୫ ରନରେ ଜିତିଛି।
ଭାରତ ଦ୍ଵିତୀୟ ଇନିଂସରେ ୧୨୧ ରନ୍ ରେ ଅଲଆଉଟ୍ ହୋଇଛି । ଟିମ୍ ଇଣ୍ଡିଆ ଟାର୍ଗେଟରେ ଥିଲା ୧୪୭ ରନ୍ । କେବଳ ପନ୍ତ ଭଲ ସ୍କୋର କରିଥିବା ବେଳେ ୮ ବ୍ୟାଟସମ୍ୟାନ ଦୁଇ ଅଙ୍କ ଛୁଇଁ ପାରିନଥିଲେ । ଭାରତ ନିଜ ମାଟିରେ ପ୍ରଥମ ଥର ହ୍ଵାଇଟ୍ ୱାସ ହୋଇଛି।
ନ୍ୟୁଜିଲାଣ୍ଡ ପ୍ରଥମ ଇନିଂସରେ ୨୩୫ ରନ୍ କରିଥିଲା । ଏବଂ ଦ୍ଵିତୀୟ ଇନିଂସ ୧୭୪ ରନ୍ କରିଛି । ଭାରତ ପ୍ରଥମ ଇନିଂସ ୨୬୩ ରନ୍ କରିଥିବା ବେଳେ ଦ୍ଵିତୀୟ ଇନିଂସ ୧୨୧ ରନ୍ କରିଛି । ଆଗରୁ ବେଙ୍ଗଲୁରୁ ଓ ପୁଣେ ଟେଷ୍ଟ ହାରିଥିଲା ଭାରତ । ନ୍ୟୁଜିଲାଣ୍ଡ ୩-୦ରେ ସିରିଜ ଜିତିଲା । ଭାରତ ଟେଷ୍ଟ ଚାମ୍ପିୟନ ଫାଇନାଲ ଖେଳିବା ଆଶା କ୍ଷୀଣ ।
ଯୋଗୀ ଆଦିତ୍ୟନାଥଙ୍କୁ ମିଳିଲା ହତ୍ୟା ଧମକ
ନୂଆଦିଲ୍ଲୀ: ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ହତ୍ୟା ଧମକ ମିଳିଛି । ଯୋଗୀ ଆଦିତ୍ୟନାଥଙ୍କ ନାଁରେ ମୁମ୍ବାଇ ପୁଲିସ୍ କଣ୍ଟ୍ରୋଲ ରୁମ୍କୁ ଆସିଛି ଧମକପୂର୍ଣ୍ଣ ମେସେଜ । ତାଙ୍କୁ ସିଏମ ପଦରୁ ୧୦ ଦିନ ଭିତରେ ଇସ୍ତଫା ଦେବାକୁ କୁହାଯାଇଛି। ଏନେଇ ମହାରାଷ୍ଟ୍ର ପୋଲିସ ୟୁପି ପୋଲିସକୁ ସୂଚନା ଦେଇଛି। ମାମଲାର ତଦନ୍ତ ଜାରି ରହିଛି। ସୂଚନା ମୁତାବକ,ନଭେମ୍ବର ୨୦ରେ ଅନୁଷ୍ଠିତ ହେବାକୁ ଥିବା ରାଜ୍ୟସଭା ନିର୍ବାଚନ ପ୍ରଚାର ପାଇଁ ଯୋଗୀ ମହାରାଷ୍ଟ୍ରକୁ ଯାଇପାରନ୍ତି । ଏନେଇ ପୋଲସ ସତର୍କ ରହିଛି। ଏହି ମାମଲାରେ ମୁମ୍ବାଇ ପୋଲିସ ୨୪ ବର୍ଷୀୟା ମହିଳାଙ୍କୁ ଗିରଫ କରିଛି।
ସୂଚନା ଅନୁଯାୟୀ, ମୁମ୍ବାଇ ପୁଲିସ୍ କଣ୍ଟ୍ରୋଲ ରୁମ୍କୁ ଏକ ଅଜଣା ନମ୍ୱରୁ ଯୋଗୀଙ୍କୁ ହତ୍ୟା ଧମକ ମିଳିଛି । ଯେଉଁଥିରେ କୁହାଯାଇଛି ଆସନ୍ତା ୧୦ ଦିନ ଭିତରେ ଯୋଗୀ ଇସ୍ତଫା ଦିଅ, ନଚେତ ବାବା ସିଦ୍ଦିକିଙ୍କ ପରି ତୁମର ଅବସ୍ଥା ବି ହେବ । ଏହାକୁ ନେଇ ତନାଘନା ଆରମ୍ଭ କରିଛି ପୁଲିସ୍।
ଆମ୍ୱଟାକୁଆ ଟ୍ରାଜେଡି ଘଟଣା: ‘ରାଜ୍ୟ ସରକାରଙ୍କ ଅବହେଳାରୁ ଲୋକଙ୍କ ମୃତ୍ୟୁ ହୋଇଥିବା କହିଲେ ମୁନା ଖାଁ
କନ୍ଧମାଳ: ଦାରିଙ୍ଗବାଡି ବ୍ଲକ ଗଦାପୁର ପଞ୍ଚାୟତ ମାଣ୍ଡିପଙ୍କା ଗାଁରେ ଟାକୁଆ ଟ୍ରାଜେଡି ଘଟଣା। ଆମ୍ବ ଟାକୁଆ ଖାଇ ମୃତ୍ଯୁ ପ୍ରସଙ୍ଗରେ ବିଜେଡି ସାଂସଦ ମୁନା ଖାଁ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ, ୨୪ ବର୍ଷ ତଳେ ଶୁଣିବାକୁ ପାଉଥିଲୁ ଲୋକ ଖାଦ୍ୟ ଅଭାବରୁ ଆମ୍ବ ଟାକୁଆ ଖାଉଥିଲେ ଓ ଜୀବନ ଯାଉଥିଲା। ହେଲେ ନବୀନ ସରକାର ସମୟରେ ଏହା ହେଉ ନଥିଲା। ଲୋକେ ଠିକ ଭାବେ ଚାଉଳ ପାଉଥିଲେ, ନବୀନ ପଟ୍ଟନାୟକ କୌଣସି ଅଭାବ ରଖି ନଥିଲେ ବୋଲି କହିଛନ୍ତି ମୁନା ଖାଁ।
ଆହୁରୀ ମଧ୍ୟ କହିଛନ୍ତି, ୨୪ ବର୍ଷ ପରେ ଏବେ ଅନାହାରରେ ମୃତ୍ୟୁ ହେଉଥିବା ଶୁଣିବାକୁ ମିଳୁଛି। ଚାଉଳ ଦେବାରେ ଅବହେଳା କରିଛନ୍ତି ରାଜ୍ୟ ସରକାର। ଯେଉଁଥି ପାଇଁ ଆମ୍ବ ଟାକୁଆ ଖାଇକି ଲୋକଙ୍କ ଜୀବନ ଗଲା ବୋଲି କହିଛନ୍ତି ସାଂସଦ ମୁନା ଖାଁ।
ଦିଲ୍ଲୀରେ ବାୟୁପ୍ରଦୂଷଣର ଭାଙ୍ଗିଲା ରେକର୍ଡ, ୫୦୦ ଟପିଲା ଏକ୍ୟୁଆଇ
ନୂଆଦିଲ୍ଲୀ: ଘାତକ ସାଜୁଛି ଦିଲ୍ଲୀ ବାୟୁ । ଦିଲ୍ଲୀରେ ବାୟୁପ୍ରଦୂଷଣର ଭାଙ୍ଗିଲା ରେକର୍ଡ । ବିଶ୍ବ ସ୍ବାସ୍ଥ୍ୟ ସଂଗଠନର ମାନଦଣ୍ଡକୁ ପାର କଲା ଦିଲ୍ଲୀ ପ୍ରଦୂଷଣ । ୫୦୦ ଟପିଗଲା ଦିଲ୍ଲୀରେ ଏକ୍ୟୁଆଇ। ଦିଲ୍ଲୀରେ ପୂର୍ବରୁ ଯେତିକି ବାୟୁ ପ୍ରଦୂଷଣ ଥିଲା, ଦୀପାବଳି ପାଳନ ପରେ ତାହା ଯଥେଷ୍ଟ ଅଧିକ ବଢ଼ିଯାଇଛି । ବାୟୁ ଗୁଣବତ୍ତା ଖରାପ ହେବା ପରେ ଦିଲ୍ଲୀ-ଏନସିଆରର ଅବସ୍ଥା ପୂରାପୂରି ବିଗିଡ଼ି ଯାଇଛି ।
ବିଶ୍ବ ସ୍ବାସ୍ଥ୍ୟ ସଂଗଠନ ଦ୍ବାରା ଧାର୍ଯ୍ୟ ମାନଦଣ୍ଡଠାରୁ ୬୫ ପ୍ରତିଶତ ଅଧିକ ରହିଛି ଦିଲ୍ଲୀର ପ୍ରଦୂଷଣ । ଏହି ବାୟୁ ପ୍ରଦୂଷଣ ଯୋଗୁ ଦିଲ୍ଲୀର ପ୍ରାୟ ୬୯ ପ୍ରତିଶତ ପରିବାର ଗଳା ଯନ୍ତ୍ରଣା, କାଶ ସମେତ ବିଭିନ୍ନ ପ୍ରଦୂଷଣ ଜନିତ ରୋଗରେ ପୀଡିତ ଅଛନ୍ତି।