ନନ୍ଦିଘୋଷ ବ୍ୟୁରୋ: ବହୁଚର୍ଚ୍ଚିତ କରୋନିଲ ବିବାଦ। ଆଜି ଯୋଗଗୁରୁ ବାବା ରାମଦେବଙ୍କ କରୋନିଲ ସମ୍ପର୍କରେ ରାୟ ଶୁଣାଇବେ ଦିଲ୍ଲୀ ହାଇକୋର୍ଟ। କରୋନିଲ ବିବାଦର ଶୁଣାଣି କରି ଗତ ମେ ୨୧ରେ ରାୟ ସଂରକ୍ଷିତ ରଖିଥିଲେ ଜଷ୍ଟିସ ଅନୂପ ଜୟରାମ ଭମ୍ଭାନି। ୨୦୨୧ରେ ମହାମାରୀ କୋଭିଡକୁ ଆରୋଗ୍ଯ କରିବାରେ କରୋନିଲ ସକ୍ଷମ ବୋଲି ବାବା ରାମଦେବ ଯୁକ୍ତି ଦର୍ଶାଉଥିଲେ। ଏହା ବିରୋଧରେ ବାବା ରାମଦେବଙ୍କ ବିରୋଧରେ ମାମଲା ଦାୟର କରିଥିଲା ଡାକ୍ତର ସଂଘ। ଏଥିରେ ବାବା ରାମଦେବ, ତାଙ୍କ ସହଯୋଗୀ ଆଚାର୍ଯ୍ୟ ବାଲକ୍ରିଷ୍ଣା ଓ ପତଞ୍ଜଳି ଆୟୁର୍ବେଦକୁ ପକ୍ଷଭୁକ୍ତ କରାଯାଇଥିଲା। ଡାକ୍ତର ସଂଘର ଅଭିଯୋଗ ଥିଲା- କରୋନିଲ ସମ୍ପର୍କରେ ବାବା ରାମଦେବ ଭ୍ରାନ୍ତ ଯୁକ୍ତିକରୁଛନ୍ତି। କରୋନିଲକୁ ଏକ ପ୍ରତିରୋଧକ ଶକ୍ତିବର୍ଦ୍ଧକ ଔଷଧ ଭାବେ ଲାଇସେନ୍ସ ମିଳିଥିଲେ ବି ଏହାକୁ କୋଭିଡର ଔଷଧ ବୋଲି ରାମଦେବ ଯୁକ୍ତି ଦର୍ଶାଇଥିଲେ। ଏହି ଧରଣର ମିଛ ପ୍ରଚାରରୁ ଦୂରେଇ ରହିବା ଲାଗି ଡାକ୍ତର ସଂଘ ପକ୍ଷରୁ ଦାବି କରାଯାଇଥିଲା। ଋଷିକେଶ, ପାଟନା ଓ ଭୁବନେଶ୍ବର ଏମସର ୩ଟି ଆବାସିକ ଡାକ୍ତର ସଂଘ ସମେତ ଚଣ୍ଡୀଗଡସ୍ଥି ପୋଷ୍ଟ ଗ୍ରାଜୁଏଟ ଇନଷ୍ଟିଚ୍ଯୁଟ ଅଭ ମେଡିକାଲ ଏଜୁକେସନ, ୟୁନିଅନ ଅଫ ରେସିଡେଣ୍ଟ ଡକ୍ଟର୍ସ ଅଫ ପଞ୍ଜାବ, ମିଟରସ୍ଥିତ ରେସିଡେଣ୍ଟ ଡକ୍ଟର୍ସ ଆସୋସିଏସନ, ତେଲଙ୍ଗାନା ଜୁନିଅର ଡକ୍ଟର୍ସ ଆସୋସିଏସନ ପକ୍ଷରୁ ରାମଦେବ ଓ ଅନ୍ଯମାନଙ୍କ ବିରୋଧରେ ଦିଲ୍ଲୀ ହାଇକୋର୍ଟରେ ମାମଲା ଦାୟର ହୋଇଥିଲା। ୨୦୨୧ ଅକ୍ଟୋବର ୨୭ରେ ରାମଦେବ ଓ ଅନ୍ଯମାନଙ୍କୁ ସମନ ଜାରି କରିଥିଲେ ହାଇକୋର୍ଟ।