ଭୁବନେଶ୍ବର : ୫୫ ଲକ୍ଷ ଭତ୍ତା ହିତାଧିକାରୀଙ୍କୁ ପ୍ରତାରିତ କରିଛି ବିଜେପି ସରକାର । ସରକାର ଗଢିବା ପରେ ପାଣିର ଗାର ପାଲଟିଯାଇଛି ୩ ହଜାର ଟଙ୍କାର ଭତ୍ତା ପ୍ରତିଶୃତି । ରାଜ୍ଯର ବରିଷ୍ଠ ନାଗରିକଙ୍କ ସହ ଭତ୍ତା ପ୍ରତାରଣା ବିରୋଧରେ ଆଜିଠୁ ବିଜେଡି ଆରମ୍ଭ କରୁଛି ଜନଜାଗରଣ କାର୍ଯ୍ୟକ୍ରମ । ବୟୋଜ୍ଯେଷ୍ଠ ଅଧିକାର ପାଇଁ ଆଗକୁ ଆସି ପ୍ରତି ପଞ୍ଚାୟତରେ ଲୋକଙ୍କୁ ସଚେତନ କରିବ ଦଳ । ପ୍ରତିଟି କର୍ମୀ ଓ ସଚେତନ ନାଗରିକ ଏଥିରେ ସାମିଲ ହୋଇ ଲୋକଙ୍କୁ ବିଜେପିର ପ୍ରତାରଣା ସମ୍ପର୍କରେ ସଚେତନ କରିବେ । ନିର୍ବାଚନ ପୂର୍ବରୁ ବିଜେପି ନିଜ ଘୋଷଣାପତ୍ରରେ ରାଜ୍ଯର ଭତ୍ତାଧାରୀଙ୍କୁ ମାସିକ ୩ ହଜାର ଓ ୩ ହଜାର ୫୦୦ ଟଙ୍କା ପ୍ରଦାନ କରିବ ବୋଲି ପ୍ରତିଶୃତି ଦେଇଥିଲା । ମାତ୍ର କ୍ଷମତାକୁ ଆସିବା ପରେ ଏଥିପାଇଁ ପଛଘୁଞ୍ଚା ଦେଇଛନ୍ତି । ବଜେଟରେ କେବଳ ୮୦ ବର୍ଷରୁ ଅଧିକ ଓ ୮୦ପ୍ରତିଶତ ଅକ୍ଷମଙ୍କୁ ୩ ହଜାର ୫୦୦ ଟଙ୍କା ଦେବାକୁ ବ୍ଯବସ୍ଥା କରିଛନ୍ତି । ଫଳରେ ରାଜ୍ଯର ୯୦ ପ୍ରତିଶତ ଅର୍ଥାତ ପ୍ରାୟ ୫୫ ଲକ୍ଷ ବୃଦ୍ଧବୃଦ୍ଧା, ଦିବ୍ଯାଙ୍ଗ, ବିଧବା ଓ ନିରାଶ୍ରୟ ବର୍ଦ୍ଧିତ ଭତ୍ତାରୁ ବଞ୍ଚିତ ହେବେ । ରାଜ୍ଯ ସରକାର ଚଳିତବର୍ଷ ୪୫ ହଜାର କୋଟି ଟଙ୍କା ଋଣ ନେବେ ବୋଲି ବୋଲି ବଜେଟରେ ପ୍ରକାଶ କରିଛନ୍ତି । ଏତେ ପରିମାଣର ଋଣ ନେଇ ବି ସରକାର ନିର୍ବାଚନୀ ପ୍ରତିଶୃତି ପୂରଣ କରିବାରେ ଅସମର୍ଥ । ଏଥିରୁ ବିଜେପିର ନିର୍ବାଚନୀ ପ୍ରତିଶୃତି ପାଣିର ଗାର ବୋଲି ସ୍ପଷ୍ଟ । ରାଜ୍ଯବାସୀଙ୍କ ସହ ବିଜେପିର ପ୍ରତାରଣାକୁ ବିଜେଡି ବରଦାସ୍ତ ନକରି ଜନଜାଗରଣ କାର୍ଯ୍ଯକ୍ରମ ଆରମ୍ଭ କରିଛି । ବୟୋଜ୍ୟେଷ୍ଠଙ୍କ ଅଧିକାର ପାଇଁ ଗାଁ ଗାଁରେ ଦଳ ଲଢ଼େଇ ଆରମ୍ଭ କରିଛି ।
ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣା: ମମତା କହିଲେ, ଦୋଷୀଙ୍କୁ ଫାଶୀ ଦିଅ
କୋଲକାତା: କୋଲକାତା ଡାକ୍ତରଙ୍କୁ ଦୁଷ୍କର୍ମ ଓ ହତ୍ଯାର ଦୋଷୀଙ୍କୁ ଫାଶୀ ଦିଆଯିବା ଉଚିତ ବୋଲି କହିଛନ୍ତି ପଶ୍ଚିମବଙ୍ଗର ମୁଖ୍ଯମନ୍ତ୍ରୀ ମମତା ବାନାର୍ଜୀ । ଏପରି କୁକର୍ମ କରୁଥିବା ଲୋକକୁ ଫାଶୀ ଦେଲେ ହିଁ ଉଚିତ ଶିକ୍ଷା ମିଳିବ ବୋଲି ସେ କହିଛନ୍ତି । ସିବିଆଇକୁ କୋଲକାତା ପୋଲିସ ପକ୍ଷରୁ ସବୁ ତଥ୍ଯ ଓ କାଗଜପତ୍ର ଦିଆଯାଇଛି । ପୀଡ଼ିତାଙ୍କ ସହିତ ସମସ୍ତେ ଅଛନ୍ତି ବୋଲି କହିଛନ୍ତି ମମତା ।
ସେପଟେ ଆଜି ସିବିଆଇର ଏକ ଟିମ୍ ପୀଡ଼ିତାଙ୍କ ଘରକୁ ଯାଇ ତାଙ୍କ ପରିବାର ଲୋକଙ୍କୁ ପଚରାଉଚରା କରିଛି । ବାପାମାଆଙ୍କ ବୟାନ ରେକର୍ଡ କରାଯାଇଛି । ତଦନ୍ତ ଚାଲିଥିବା କହିଛନ୍ତି ସିବିଆଇ ଅଧିକାରୀ । ଏହା ସହିତ ୫ ଜଣ ଡାକ୍ତରଙ୍କୁ ମଧ୍ଯ ସମନ୍ କରିଛି ତଦନ୍ତକାରୀ ସଂସ୍ଥା । ସେମାନଙ୍କୁ ପଚରାଉଚରା କରାଯିବ । ସ୍ଥାନୀୟ ଥାନାର ଅଧିକାରୀଙ୍କୁ ମଧ୍ଯ ସିବିଆଇ ଡାକିଛି । ସେ ପ୍ରଥମେ ଘଟଣାକୁ ଆତ୍ମହତ୍ଯା ବୋଲି କହିଥିବାର ଅଭିଯୋଗ ହୋଇଥିଲା ।
ସେପଟେ ଗତକାଲି ଆର୍ ଜି କର ମେଡିକାଲ କଲେଜ ଓ ହସ୍ପିଟାଲରେ ହୋଇଥିବା ହଙ୍ଗାମାର ତଦନ୍ତ ପାଇଁ ସେଠାରେ ପହଞ୍ଚିଛି ଫୋରେନସିକ୍ ଟିମ୍ । ଏହି ଘଟଣାରେ ଏପର୍ଯ୍ଯନ୍ତ ୯ ଜଣଙ୍କୁ ଗିରଫ କରାଯାଇଛି । ଗତରାତିରେ ଡାକ୍ତରମାନେ ଆନ୍ଦୋଳନ କରୁଥିବା ବେଳେ କିଛି ଲୋକ ହସ୍ପିଟାଲରେ ପ୍ରବେଶ କରି ଭଙ୍ଗାରୁଜା କରିଥିଲେ । ସେମାନଙ୍କ ଆକ୍ରମଣରୁ ବର୍ତ୍ତିବା ପାଇଁ ସିକ୍ଯୁରିଟି ଗାର୍ଡମାନଙ୍କୁ ବି ଲୁଚିବାକୁ ପଡ଼ିଥିଲା । ଆକ୍ରମଣରେ ୧୫ ଜଣ ପୋଲିସ ବି ଆହତ ହୋଇଥିଲେ
ଆଡ଼ପ ପହଣ୍ଡି ବେଳେ ବଳଭଦ୍ର ପଡ଼ିଯିବା ଘଟଣାର ଆସିଲା ରିପୋର୍ଟ
ପୁରୀ: ଆଡ଼ପ ମଣ୍ଡପ ପହଣ୍ଡି ବିଜେ ସମୟରେ ବଳଭଦ୍ର ପଡ଼ିଯିବା ଘଟଣାର ଆସିଛି ରିପୋର୍ଟ । ଏଥିରେ କ’ଣ ଅଛି, ଏଯାଏଁ ସ୍ପଷ୍ଟ ହୋଇନାହିଁ । ତିନି ଜଣିଆ ତଦନ୍ତ କମିଟି ଶ୍ରୀମନ୍ଦିର ମୁଖ୍ଯ ପ୍ରଶାସକଙ୍କୁ ରିପୋର୍ଟ ଦେଇଛନ୍ତି । ପରିଚାଳନା କମିଟି ଆଗରେ ଏହି ରିପୋର୍ଟ ଉପସ୍ଥାପନ କରାଯାଇ ଆଲୋଚନା କରାଯିବ । ତା’ପରେ ଯାହା କିଛି ନିଷ୍ପତ୍ତି ନିଆଯିବ ବୋଲି ଜିଲ୍ଲାପାଳ କହିଛନ୍ତି । ସେପଟେ ସେବାୟତ କହିଛନ୍ତି- ଦୋଷୀଙ୍କୁ ଦଣ୍ଡ ମିଳୁ । କିପରି ଏପରି ଘଟଣା ପୁନରାବୃତ୍ତି ନ ହେବ, ସେଥିପ୍ରତି ଧ୍ଯାନ ଦେବାକୁ ମଧ୍ଯ ମତ ପ୍ରକାଶ ପାଇଛି ।
ବଡ଼ ଠାକୁର ବଳଭଦ୍ର ମୁହଁ ମାଡ଼ି ପଡ଼ିଯିବା ଘଟଣାର ତଦନ୍ତ ଶେଷ ହୋଇଛି । ତିନି ଜଣିଆ କମିଟି ତଦନ୍ତ ଶେଷ କରି ଏହାର ରିପୋର୍ଟ ଶ୍ରୀମନ୍ଦିର ମୁଖ୍ଯ ପ୍ରଶାସକ ଅରବିନ୍ଦ ପାଢ଼ୀଙ୍କୁ ପ୍ରଦାନ କରିଛନ୍ତି । ଶ୍ରୀମନ୍ଦିର ମୁଖ୍ଯ ପ୍ରଶାସକ ନିଜେ ସୋସିଆଲ ମିଡିଆରେ ଏହି ସୂଚନା ଦେଇଥିଲେ । ଏଥିରେ ସେ ଉଲ୍ଲେଖ କରିଛନ୍ତି- ଏହି ରିପୋର୍ଟକୁ ଶ୍ରୀମନ୍ଦିର ପରିଚାଳନା କମିଟି ଆଗରେ ଉପସ୍ଥାପନ କରାଯାଇ ଆଲୋଚନା କରାଯିବ । ତା’ପରେ ଯାହା କିଛି ନିଷ୍ପତ୍ତି ନିଆଯିବ । ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ ମଧ୍ଯ କହିଛନ୍ତି, ପରିଚାଳନା କମିଟିର ଆସନ୍ତା ବୈଠକରେ ଏହି ରିପୋର୍ଟର ତର୍ଜମା କରାଯିବ ଓ ପରବର୍ତ୍ତୀ ନିଷ୍ପତ୍ତି ନିଆଯିବ ।
ଏବେ ଚର୍ଚ୍ଚା, ତଦନ୍ତ କମିଟିର ରିପୋର୍ଟରେ କ’ଣ ଅଛି ? ଏତେ ବଡ଼ ଅଘଟଣ ପାଇଁ ରିପୋର୍ଟରେ କାହାକୁ ଦାୟୀ କରାଯାଇଛି କି ? ଆଗକୁ ଯେମିତି ଏହାର ପୁନରାବୃତ୍ତି ନ ହୁଏ, ସେଥିପାଇଁ କ’ଣ କରାଯିବ ? ତଦନ୍ତ କମିଟି କିଛି ସୁପାରିଶ କରିଛି କି ? ଗତ ଜୁଲାଇ ୯ ତାରିଖରେ ହୋଇଥିଲା ଏହି ଅଭାବନୀୟ ଘଟଣା । ବଡ଼ ଠାକୁର ବଳଭଦ୍ରଙ୍କ ଆଡ଼ପ ମଣ୍ଡପ ବିଜେ ପାଇଁ ତାଙ୍କୁ ପହଣ୍ଡି କରାଯାଇ ରଥରୁ ଅଣାଯାଉଥିଲା । ହଠାତ୍ ଚାରମାଳ ଉପରେ ମୁହଁ ମାଡ଼ି ପଡ଼ିଯାଇଥିଲେ ବଡ଼ ଠାକୁର । ସ୍ତବ୍ଧ ହୋଇ ଯାଇଥିଲେ କୋଟି କୋଟି ଭକ୍ତ । ସମସ୍ତଙ୍କୁ ଏହା ଗଭୀର ଆଘାତ ଦେଇଥିଲା । ହୋଇଥିଲା ବଡ଼ ତମ୍ବିତୋଫାନ । କାହିଁକି ନା ଏପରି ଘଟଣା ଆଗରୁ କେବେ ବି ହୋଇ ନଥିଲା । ତଦନ୍ତ ପାଇଁ ଅତିରିକ୍ତ ଜିଲ୍ଲାପାଳ, ଶ୍ରୀମନ୍ଦିର ନୀତି ପ୍ରଶାସକ, ସିଟି ଡିଏସପିଙ୍କୁ ନେଇ ଗଠିତ ହୋଇଥିଲା ୩ ଜଣିଆ କମିଟି । ଭିଡିଓ ଫୁଟେଜ ଦେଖିବା ସହିତ ବଳଭଦ୍ରଙ୍କ ବାଡ଼ଗ୍ରାହୀ, ଅନ୍ୟ ସେବାୟତ, ଶ୍ରମନ୍ଦିର ପ୍ରଶାସନର କର୍ମଚାରୀ ଓ ଜେଟିପିଙ୍କୁ ତଦନ୍ତ କମିଟି ପଚରାଉଚରା କରିଥିଲା। ଭିଜୁଆଲ୍ ଓ ସମସ୍ତଙ୍କ ବୟାନକୁ ଆଧାର କରି ପ୍ରସ୍ତୁତ ହୋଇଛି ରିପୋର୍ଟ । ପ୍ରଥମେ ପରିଚାଳନା କମିଟି ଆଗରେ ରିପୋର୍ଟ ଉପସ୍ଥାପନ କରିବାକୁ ହୋଇଥିବା ନିଷ୍ପତ୍ତିକୁ ସ୍ବାଗତ କରାଯାଇଛି । ଦୋଷୀକୁ ଦଣ୍ଡ ମିଳୁ ବୋଲି କହିଛନ୍ତି ସେବାୟତ ।
ସେତେ ବେଳେ କୁହାଯାଇଥିଲା, ରଥରେ ଆବଶ୍ଯକଠାରୁ ଅଧିକ ସେବାୟତ ଥିଲେ । ବରିଷ୍ଠ ସେବାୟତମାନେ ନୂଆ ସେବାୟତଙ୍କ ଉପରେ ଦାୟିତ୍ଵ ଛାଡ଼ି ଦେବା ବି ଏକ କାରଣ ବୋଲି ଚର୍ଚ୍ଚା ହୋଇଥିଲା । ବଡ଼ ଠାକୁର ପଡ଼ିଯିବା ପରେ ଶ୍ରୀଜିଉଙ୍କ ନବଦିନାତ୍ମକ ଯାତ୍ରା ମଝିରେ ଶ୍ରୀମନ୍ଦିର ମୁଖ୍ଯ ପ୍ରଶାସକଙ୍କୁ ବଦଳାଇଥିଲେ ରାଜ୍ଯ ସରକାର । ବୀରବିକ୍ରମ ଯାଦବଙ୍କ ସ୍ଥାନାରେ ଅରିବନ୍ଦ ପାଢ଼ୀଙ୍କୁ ଏହି ଦାୟିତ୍ଵ ଦିଆଯାଇଥିଲା ।
ନୂଆ ବିଧାୟକଙ୍କ ଦିଗଦର୍ଶନ କାର୍ଯ୍ୟକ୍ରମକୁ ବିଜେଡିର ବର୍ଜନ
ଭୁବେନଶ୍ବର: ଓଡ଼ିଶା ବିଧାନସଭାର ନୂଆ ବିଧାୟକଙ୍କଚ ଦିଆଯିବାକୁ ଥିବା ଦିଗଦର୍ଶନ କାର୍ଯ୍ୟକ୍ରମକୁ ନେଇ ବଢ଼ିବାରେ ଲାଗିଛି ବିବାଦ । ଉଦଘାଟନୀ ଓ ଉଦଯାପନୀ କାର୍ଯ୍ୟକ୍ରମରେ ସାଂସଦଙ୍କୁ ମୁଖ୍ୟ ଅତିଥି କରାଯିବାକୁ ନେଇ ଆପତ୍ତି ଉଠାଇ କାର୍ଯ୍ୟକ୍ରମକୁ ବର୍ଜନ କରିଛି ବିଜେଡି ।
ବିଜେଡି ନୂଆ ବିଧାୟକଙ୍କ ଦିଗଦର୍ଶନ କାର୍ଯ୍ଯକ୍ରମରେ ଯୋଗ ଦେବନି ବୋଲି ସ୍ପଷ୍ଟ କରିଛି । ଏ ସମ୍ପର୍କରେ ବାଚସ୍ପତିଙ୍କୁ ଚିଠି ଲେଖି ଜଣାଇଛନ୍ତି ବିରୋଧୀ ଦଳ ମୁଖ୍ଯ ସଚେତକ ପ୍ରମିଳା ମଲ୍ଲିକ । ଚିଠିରେ ସେ ଉଲ୍ଲେଖ କରିଛନ୍ତି ଯେ, ବିଧାନସଭାରେ ହେଉଥିବା ସମସ୍ତ କାର୍ଯ୍ଯ ବିଧାନସଭାକୁ ନିର୍ବାଚିତ ହେଉଥିବା ସଭ୍ଯଙ୍କ ଦ୍ବାରା ସମ୍ପାଦିତ କରାଯିବାର ପରମ୍ପରା ରହିଛି । କିନ୍ତୁ ନୂଆ ବିଧାୟକଙ୍କୁ ଦିଗଦର୍ଶନ କାର୍ଯ୍ଯକ୍ରମର ଉଦଘାଟନ କେନ୍ଦ୍ରମନ୍ତ୍ରୀ କରିବା ଗୃହର ପରମ୍ପରା ଓ ମର୍ଯ୍ଯାଦାକୁ ଭଙ୍ଗ କରୁଛି ।
ଦ୍ଵିତୀୟରେ ମୁଖ୍ଯମନ୍ତ୍ରୀ ହେଉଛନ୍ତି ଗୃହର ନେତା । ସେ ସରକାରର ମୁଖ୍ଯ । ବିଧାନସଭା ପରିସରରେ ଏକ କାର୍ଯ୍ଯକ୍ରମରେ ସେ ସାଧାରଣ ବକ୍ତା ଭାବେ ଯୋଗ ଦେବା, ମୁଖ୍ଯମନ୍ତ୍ରୀ ପଦର ମର୍ଯ୍ଯାଦା ହାନୀ କରୁଛି । ସଂଘୀୟ ବ୍ଯବସ୍ଥା ଅନୁସାରେ କେନ୍ଦ୍ରମନ୍ତ୍ରୀଙ୍କ ପାହ୍ଯାର ଉପରେ ରହିଥାଏ ମୁଖ୍ଯମନ୍ତ୍ରୀଙ୍କ ପାହ୍ୟା । ଏହି କାର୍ଯ୍ଯକ୍ରମରେ କିନ୍ତୁ ମୁଖ୍ଯମନ୍ତ୍ରୀଙ୍କ ପଦ ମର୍ଯ୍ଯାଦା କେନ୍ଦ୍ରମନ୍ତ୍ରୀଙ୍କ ପରେ ରହିବା ପରି ହେଉଛି । ଏହାଦ୍ଵାରା ନିଜ ରାଜ୍ଯର ମୁଖ୍ଯମନ୍ତ୍ରୀଙ୍କ ପଦ ମର୍ଯ୍ଯାଦାକୁ କ୍ଷୂର୍ଣ୍ଣ କରିବ । ଏହା ଆମର ପ୍ରୋଟୋକଲକୁ ଉଲ୍ଲଂଘନ କରିବ । ଆମର ଦାୟିତ୍ଵ ହେଲା, ଆମେ ଓଡି଼ଶା ବିଧାନସଭା ଓ ମୁଖ୍ଯମନ୍ତ୍ରୀଙ୍କ ପଦ ମର୍ଯ୍ଯାଦାକୁ ଅକ୍ଷୂର୍ଣ୍ଣ ରଖିବା । ତେଣୁ ବିଜେଡି ଏହି କାର୍ଯ୍ଯକ୍ରମକୁ ବର୍ଜନ କରିବ ବୋଲି ଚିଠିରେ ଉଲ୍ଲେଖ କରିଛନ୍ତି ପ୍ରମିଳା ମଲ୍ଲିକ ।
ଓଡ଼ିଶା କଂଗ୍ରେସକୁ ନୂଆ ଦିଗ ଦେବ ୧୪ ଜଣିଆ ଷ୍ଟିଅରିଂ କମିଟି
ଭୁବନେଶ୍ବର: ମୁଁ ନୁହେଁ, ଆମେ । ଏହି ଢାଞ୍ଚାରେ ଓଡ଼ିଶା କଂଗ୍ରେସକୁ ଆଗକୁ ନେବାକୁ ରୋଡମ୍ୟାପ ପ୍ରସ୍ତୁତ କରିଛି ଏଆଇସିସି । ତେଣୁ ତରତର ହୋଇ ଜଣକୁ ମୁଖିଆ ନକରି ମିଳିତ ନେତୃତ୍ବକୁ ଫୋକସ କରିଛନ୍ତି ହାଇକମାଣ୍ଡ । ୧୪ ଜଣିଆ ଷ୍ଟିଅରିଂ କମିଟି ଗଠନ କରି ଓଡ଼ିଶା କଂଗ୍ରେସକୁ ଚଳଚଞ୍ଚଳ କରିବା ସହ ନୂଆ ଦିଗ ଦେବାକୁ ଉଦ୍ୟମ ଆରମ୍ଭ ହୋଇଛି । ପ୍ରଥମଥର ପାଇଁ ହାଇକମାଣ୍ଡଙ୍କ ଏପରି ନିଷ୍ପତ୍ତିକୁ ନେଇ ଦଳରେ ଭିନ୍ନ ଭିନ୍ନ ମତ ପ୍ରକାଶ ପାଇବା ସହ ଏହି କମିଟି ପରବର୍ତ୍ତୀ ପର୍ଯ୍ୟାୟରେ ନୂଆ ପିସିସି ସଭାପତିଙ୍କ ନାଁ ଘୋଷଣା କରିବ ବୋଲି କମିଟିର ସଦସ୍ୟମାନେ କହିଛନ୍ତି । ଆସନ୍ତା ୨୧ ତାରିଖରେ ବିନା ପିସିସି ସଭାପତିରେ ବସିବ ପ୍ରଥମ ବୈଠକ । ଏବେ ଏହି ୧୪ ଜଣ ମୋଡ଼ିବେ ଓଡ଼ିଶା ‘ହାତ’ର ଷ୍ଟିଅରିଂ । ତୃଣମୂଳସ୍ତରରୁ ପିସିସି ଯାଏଁ ହାତ ଶିବିରକୁ କରିବେ ଚଳଚଞ୍ଚଳ ।
ଆସନ୍ତା ୨୧ ତାରିଖରେ କମିଟିର ପ୍ରଥମ ବୈଠକ ବସିବାକୁ ଥିବାବେଳେ ବିନା ପିସିସି ସଭାପତିରେ ଚାଲିବ ରାଜ୍ୟ କଂଗ୍ରେସ । ସମସ୍ତଙ୍କ ମିଳିତ ନେତୃତ୍ବରେ ଆଗକୁ ଗଡ଼ିବ ଓଡ଼ିଶା କଂଗ୍ରେସ ରଥ । ଜୁଲାଇ ୨୧ ତାରିଖରେ ପିସିସିର ସବୁ କମିଟି ଭାଙ୍ଗି ଏଆଇସିସି ବହୁ ତର୍ଜମା କରି ୧୪ ଜଣିଆ ଷ୍ଟିଅରିଂ କମିଟି ଗଠନ କରିଛନ୍ତି । ଓଡ଼ିଶା କଂଗ୍ରେସ ପ୍ରଭାରୀ ଅଜୟ କୁମାର କମିଟି ଅଧ୍ୟକ୍ଷ ଥିବାବେଳେ ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା, କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ, ଜୟଦେବ ଜେନା, ସାଂସଦ ସପ୍ତଗିରି ଉଲାକା, ବରିଷ୍ଠ ନେତା ମହମ୍ମଦ ମୋକିମ, ଭକ୍ତ ଦାସ, ଦେବାଶିଷ ପଟ୍ଟନାୟକ, ବିଶ୍ବ ରଞ୍ଜନ ମହାନ୍ତି, ସସ୍ମିତା ବେହେରା, ଅନନ୍ତ ସେଠୀ, ବଳଭଦ୍ର ମାଝୀ ପ୍ରମୁଖ ଏହି କମିଟିରେ ସ୍ଥାନ ପାଇଛନ୍ତି । ବୈଠକରେ ଷ୍ଟିଅରିଂ କମିଟିର କାମ କ’ଣ ରହିବ ତାହା ସ୍ଥିର କରାଯାଇ ଆଗାମୀ ଦିନରେ ପରବର୍ତ୍ତୀ କାର୍ଯ୍ୟ ଖସଡ଼ା ପ୍ରସ୍ତୁତ କରାଯିବ ।
ଓଡ଼ିଶା କଂଗ୍ରେସ ଇତିହାସରେ ଏଆଇସିସି ପ୍ରଥମ ଥର ଲାଗି ଏପରି ବଡ଼ ନିଷ୍ପତ୍ତି ନେଇଛି । ସବୁ କମିଟି ଭାଙ୍ଗିବା ସହ ରାଜ୍ୟ କଂଗ୍ରେସକୁ ନୂଆ ରୂପ ଦିଆଯାଉଛି । ପ୍ରଥମେ ଛାତ୍ର ସଂଗଠନକୁ କ୍ରିୟାଶୀଳ କରିବା ପାଇଁ ଉଦିତ ନାରାୟଣ ପ୍ରଧାନଙ୍କୁ ଛାତ୍ର କଂଗ୍ରେସର ଦାୟିତ୍ବ ଦିଆଯିବା ସହ ଏବେ ଷ୍ଟିଅରିଂ କମିଟି ଗଠନ କରାଯାଇଛି । ତରବରିଆ ନୁହେଁ, ଆଗକୁ ପିସିସି ସହ ତୃଣମୂଳ କମିଟିଗୁଡିକୁ ସଂପୂର୍ଣ୍ଣ ବିଚାର ବିମର୍ଶ କରି ଗଠନ କରିବାକୁ ହାଇକମାଣ୍ଡ ନିଷ୍ପତ୍ତି ନେଇଥିବା ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି । ଏହାସହ ଆସନ୍ତା ୨୨ ତାରିଖରେ ୧୪ ଜଣିଆ ଷ୍ଟିଅରିଂ କମିଟି ଓଡ଼ିଶାରେ ଇଡି ଅଫିସ ଘେରାଉ କରି ପ୍ରଥମ ଶକ୍ତି ପ୍ରଦର୍ଶନ କରିବ ।
ଷ୍ଟିଅରିଂ କମିଟିରେ କିନ୍ତୁ ସ୍ଥାନ ପାଇନାହାନ୍ତି କଂଗ୍ରେସର ୩ ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ, ଶରତ ପଟ୍ଟନାୟକ ଏବଂ ପ୍ରସାଦ ହରିଚନ୍ଦନ । ସେହିପରି ତାଲିକାରେ ନାହାଁନ୍ତି ଚର୍ଚ୍ଚିତ ବରିଷ୍ଠ ବିଧାୟକ ତାରା ପ୍ରସାଦ ବାହିନୀପତି । ଯାହାକୁ ନେଇ କଂଗ୍ରେସରେ ନୂଆ ଚର୍ଚ୍ଚା ଆରମ୍ଭ ହୋଇଛି ।
କାଲିଠୁ ଜନ ଜାଗରଣ ଅଭିଯାନ ଜରିଆରେ ବିଜେପିର ମିଛ ପ୍ରତିଶ୍ରୁତିର ମୁଖା ଖୋଲିବ ବିଜେଡି
ଭୁବନେଶ୍ବର: କାଲିଠୁ ବିଜେଡି କରିବ ଜନ ଜାଗରଣ ଅଭିଯାନ। ପ୍ରତି ପଞ୍ଚାୟତରେ ବିଜେପି ସରକାରର ମିଛ ପ୍ରତିଶୃତି ବିରୋଧରେ ଜନସାଧାରଣଙ୍କୁ କରିବ ସଚେତନ । ୭ ଦିନ ଭିତରେ ରାଜ୍ୟର ସମସ୍ତ ପଞ୍ଚାୟତ ଓ ନିର୍ବାଚନ ମଣ୍ଡଳୀରେ କରାଯିବ କାର୍ଯ୍ୟକ୍ରମ । ଗାଁକୁ ଗାଁ ବୁଲି ବିଜେପିର ଅସଲ ମୁଖା ଖୋଲିବାକୁ ପୂରା ପ୍ରସ୍ତୁତ ବିଜେଡି । ଭତ୍ତାଧାରୀଙ୍କ ମାସିକ ଭତ୍ତାକୁ ୩ ହଜାର ଓ ୩ ହଜାର ୫ ଶହକୁ ବୃଦ୍ଧି କରିବାକୁ ପ୍ରତିଶୃତି ଦେଇଥିଲା ବିଜେପି । କିନ୍ତୁ ଏବେ ଏହାକୁ ପରିବର୍ତ୍ତନ କରି ପ୍ରହେଳିକା ସୃଷ୍ଟି କରିଛନ୍ତି ରାଜ୍ୟ ସରକାର । ବିଜେପି ଜୁମଲାକୁ ବିରୋଧ କରି ଏହି ରଣହୁଙ୍କାର ଦେଇଛି ବିଜେଡି ।
ପଦାରେ ପଡିଛି ବିଜେପିର ମିଛ ପ୍ରତିଶ୍ରୁତି । ନିର୍ବାଚନ ବେଳେ ଦଳ ଅନେକ ବଡ଼ ବଡ଼ ପ୍ରତିଶୃତି ଦେଇଥିଲା । ଏବେ ସବୁକୁ ଭୁଲିଗଲା ବିଜେପି ସରକାର । ଘୋଷଣାପତ୍ରରେ ଭତ୍ତାଧାରୀଙ୍କୁ ୩ ହଜାର ଓ ୩ ହଜାର ୫ ଶହ ଟଙ୍କା ଭତ୍ତା ଦେବ ବୋଲି କହିଥିଲା । ହେଲେ ବଜେଟରେ କେବଳ ୮୦ ବର୍ଷ ବୟସରୁ ଅଧିକ ବୟସ୍କ ଏବଂ ୮୦ ପ୍ରତିଶତ ଅକ୍ଷମତା ଥିବା ଦିବ୍ୟାଙ୍ଗ ଏହି ବର୍ଦ୍ଧିତ ଭତ୍ତା ପାଇବା ବ୍ୟବସ୍ଥା କରାଯାଇଛି । ଯାହାଦ୍ବାରା ୫୨ ଲକ୍ଷ ଭତ୍ତାଧାରୀ ବର୍ଦ୍ଧିତ ଭତ୍ତାରୁ ବଞ୍ଚିତ ହେବେ । ଭତ୍ତାଧାରୀ ବୟସ୍କ ତଥା ରାଜ୍ୟବାସୀଙ୍କ ସହ ପ୍ରତାରଣା କରିଛି ବିଜେପି ସରକାର । ବିଜେପିର ଏଭଳି ଚଞ୍ଚକତାକୁ ବିରୋଧ କରି ରଣହୁଙ୍କାର ଦେଇଛି ବିଜେଡି । ବୟୋଜ୍ୟେଷ୍ଠଙ୍କ ଅଧିକାର ପାଇଁ ଗାଁ ଗାଁରେ ଲଢ଼େଇ କରିବ ଦଳ । ଏଥିପାଇଁ ଆସନ୍ତାକାଲିଠାରୁ କରାଯିବ ଜନ ଜାଗରଣ ଅଭିଯାନ । ଏନେଇ ଆହ୍ବାନ ଦେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ସମସ୍ତ କର୍ମୀ ତଥା ସଚେତନ ନାଗରିକ ଏହି ଅଭିଯାନରେ ସାମିଲ ହୋଇ ବିଜେପିର ଧୋକାବାଜି ବିରୋଧରେ ଜନତାଙ୍କୁ କରିବେ ଜାଗ୍ରତ । ରାଜ୍ୟ ସରକାର ଭତ୍ତା ଭେଳିକି ବନ୍ଦ ନ କଲେ, ଆନ୍ଦୋଳନ ପାଇଁ ସଜ୍ଜବାଜ ହେବେ ନବୀନ ବ୍ରିଗେଡ୍ ।
ସଂସଦରୁ ବିଧାନସଭା ଯାଏଁ ବିଜେପିର ଜୁମଲା ଶାସନ ବିରୋଧରେ ସ୍ବର ଉଠାଇ ଚାଲିଛି ବିଜେଡି । ଅନେକ ନିର୍ବାଚନୀ ପ୍ରତିଶୃତି ଦେଇଛି ବିଜେପି । ହେଲେ ପୂରଣ କରିବା ସମୟରେ ତୁଣ୍ଡିରେ ତାଲା ପଡ଼ିଥିବା ଅଭିଯୋଗ କରିଛି ବିଜେଡି । ନା ମିଳିଛି ୩୦୦ ୟୁନିଟ ମାଗଣା ବିଜୁଳି ନା ଠିକ୍ ଭାବେ ବର୍ଦ୍ଧିତ ଭତ୍ତା ପାଇବେ ଯୋଗ୍ୟ ହିତାଧିକାରୀ । ନବୀନ ସରକାରଙ୍କ ଯୋଜନାକୁ କପି କରି କେବଳ ନାଁ ଓ ରଙ୍ଗ ପରିବର୍ତ୍ତନରେ ଲାଗିଛି ବିଜେପି । ଏବେ ନିର୍ବାଚନୀ ପ୍ରତିଶୃତି ପୂରଣ କରିବାକୁ ମୋହନ ସରକାରଙ୍କୁ ଆହ୍ବାନ ଦେଇଛି ବିଜେଡି ।
ଜନ ଜାଗରଣ ଅଭିଯାନକୁ ଅଧିକ ଶାଣିତ କରିବାକୁ ସମନ୍ବୟ କମିଟି ବୈଠକରେ କାର୍ଯ୍ୟ ଖସଡ଼ା ପ୍ରସ୍ତୁତ କରିଛି ବିଜେଡି । ଲୋକଙ୍କ ପାଖରେ ସଠିକ୍ ବାର୍ତ୍ତା ପହଞ୍ଚୁଛି ନା ନାହିଁ ତାର ତଦାରଖ କରିବେ ଦଳୀୟ ସଭାପତି ନବୀନ ପଟ୍ଟନାୟକ ।
କଂଗ୍ରେସ କହିଲା ବିଜେପି ପ୍ରଚାର ସର୍ବସ୍ବ ଦଳ
ଆସନ୍ତାକାଲି ଠାରୁ ବିଜେଡିର ଜନ ଜାଗରଣ ଯାତ୍ରାକୁ ନେଇ ପ୍ରତିକ୍ରିୟା ରଖିଛି କଂଗ୍ରେସ । ଦଳ ଦୃଷ୍ଟିରୁ ବିଜେଡି ତାଙ୍କ କର୍ତ୍ତବ୍ୟ କରୁଛନ୍ତି । କିନ୍ତୁ ବିଜେପି ଯେଉଁ ପ୍ରତିକ୍ରିୟା ରଖିଛି ତାକୁ ସମାଲୋଚନା କରିଛି କଂଗ୍ରେସ । କହିଛି, କେନ୍ଦ୍ର ହେଉ କି ରାଜ୍ଯ ବିଜେପି ଏହା ଏକ ପ୍ରଚାର ସର୍ବସ୍ୱ ଦଳ । ଶାସନ ସମୟରେ ସେମାନେ ସାଧାରଣ ଲୋକଙ୍କ ପ୍ରତି ଦୃଷ୍ଟି ଦିଅନ୍ତି ନାହିଁ । ଅସତ୍ୟ ବଖାଣିବାରେ କିଏ ଯଦି ଗୋଲଡ ମେଡାଲ ପାଇବେ ସେ ହେଉଛି ବିଜେପି ଦଳ । ନିର୍ବାଚନରେ ସଂଖ୍ୟା ଗରିଷ୍ଠତା କିଭଳି ପାଇଛନ୍ତି ସେମାନେ ନିଜେ ବି ଜାଣି ନାହାନ୍ତି ବୋଲି କଟାକ୍ଷ କରିଛି କଂଗ୍ରେସ । ଦଳ ପକ୍ଷରୁ କୁହାଯାଇଛି, ଲୋକ ସବୁ ଜାଣିସାରିଲେଣି । ଲୋକ ଏତେ ଶୀଘ୍ର ପରିବର୍ତ୍ତନର ଆଭାସ ଦିଅନ୍ତି ନାହିଁ ଯାହା ଏବେ ତୃଣମୂଳସ୍ତରରେ ଦେଖିବାକୁ ମିଳୁଛି । ବିଜେପି ଯେଉଁଠି ଯେଉଁ ରାଜ୍ୟରେ ରହିଛି ସବୁଆଡେ କେବଳ ପ୍ରଚାରରେ ବ୍ଯସ୍ତ ରହିଛି । ଶାସନ ଠିକ ଭାବେ କରନ୍ତି ନାହିଁ । ତଳସ୍ତରର ଲୋକଙ୍କ ଉନ୍ନତି ପାଇଁ ବିଜେପି କାମ କରେ ନାହିଁ । କେବଳ କିଛି ଶିଳ୍ପପତିଙ୍କ ପାଇଁ ବିଜେପି କାମ କରେ । ତେଣୁ ସେମାନେ ଯାହା କହିଲେ ବି ଲୋକେ ଆଉ ବିଶ୍ୱାସ କରିବେ ନାହିଁ ବୋଲି କହିଛନ୍ତି ବରିଷ୍ଠ କଂଗ୍ରେସ ନେତା ଅନନ୍ତ ପ୍ରସାଦ ସେଠୀ ।
ରାଜ୍ୟସ୍ତରୀୟ ପଦକ ପ୍ରଦାନ ଉତ୍ସବ, ୯୪ ଜଣ ସମ୍ମାନିତ
ଭୁବନେଶ୍ବର: ପାଳିତ ହୋଇଛି ରାଜ୍ୟସ୍ତରୀୟ ପଦକ ପ୍ରଦାନ ଉତ୍ସବ। ଉଲ୍ଲେଖନୀୟ, ବିଶିଷ୍ଟ ସେବା ଓ ସାହସିକତା ନିମନ୍ତେ ମୋଟ ୯୪ ଜଣଙ୍କୁ ପଦକ ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ପୋଲିସ ବିଭାଗରେ କିଛି ପରାକ୍ରମୀଙ୍କୁ ମରଣୋତ୍ତର ଭାବେ ସମ୍ମାନିତ କରାଯାଇଛି ।
ରାଜ୍ୟସ୍ତରୀୟ ପଦକ ପ୍ରଦାନ ଉତ୍ସବ ମହା ଆଡ଼ମ୍ବରରେ ଲୋକସଭା ଭବନର ସମ୍ମିଳନୀ କକ୍ଷରେ ଆୟୋଜିତ ହୋଇଯାଇଛି । ଏଥିରେ ୯୪ ଜଣଙ୍କୁ ପଦକ ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ରାଜ୍ୟ ପୋଲିସ ବିଭାଗ, ଅଗ୍ନିଶମ ସେବା, ଗୃହରକ୍ଷୀ ବାହିନୀ, ବେସାମରିକ ପ୍ରତିରକ୍ଷା ସେବା ଏବଂ କାରାଗାର ଓ ସଂସ୍କାର ସେବାର ୯୪ ଜଣ ଅଧିକାରୀ ଓ କର୍ମଚାରୀଙ୍କୁ ସେମାନଙ୍କ ଉଲ୍ଲେଖନୀୟ, ବିଶିଷ୍ଟ ସେବା ଓ ସାହସିକତା ନିମନ୍ତେ ରାଷ୍ଟ୍ରପତି, ରାଜ୍ୟପାଳ ଓ ସାହସିକତା ପଦକ ସହିତ ଅର୍ଥ ରାଶି ପୁରସ୍କାର ପ୍ରଦାନ କରାଯାଇଛି । ଲୋକସେବା ଭବନ କନଭେନସନ୍ ହଲରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀଙ୍କଠାରୁ ସମସ୍ତେ ପଦକ ଗ୍ରହଣ କରିଛନ୍ତି ।
ପୁରସ୍କୃତ ହେବା ବେଳେ ଜଣେ ମହିଳା କର୍ମଚାରୀଙ୍କୁ ପୁରସ୍କୃତ କରିବା ବେଳେ ଭାବବିହ୍ବଳ ହୋଇପଡ଼ିଥିଲେ ମୁଖ୍ୟମନ୍ତ୍ରୀ । କାରଣ ମହିଳାଙ୍କ କାହାଣୀ ଥିଲା କିଛି ଅଲଗା । ତାଙ୍କ ସ୍ବାମୀଙ୍କୁ ମରଣତୋର ସମ୍ମାନିତ କରାଯାଇଥିଲା । ସ୍ବର୍ଗତ ବନବାସୀ ମହାରଣା ଗୃହରକ୍ଷୀ ଭାବେ ମାଲକାନଗିରି ଜିଲ୍ଲାରେ କାର୍ଯ୍ୟରତ ଥିବା ବେଳେ ଏକ ଗଞ୍ଜେଇ ମାଫିଆଙ୍କ ସହିତ ଲଢେଇ କରି ସହିଦ ହୋଇଥିଲେ । ଦେଶ ମାଆ ପାଇଁ ତାଙ୍କର ତ୍ୟାଗ ଫଳରେ ଜୀବନ ଦେବାକୁ ପଡ଼ିବ ଜାଣି ବି ଗଞ୍ଜେଇ ବୋଝେଇ ଟ୍ରକକୁ ଅଟକାଇବା ସହ ୧୯୧୭ କେଜି ଗଞ୍ଜେଇ ଜବତ କରିବା ସହିତ 4୨ ଜଣ ଗଞ୍ଜେଇ ମାଫିଆଙ୍କୁ ଗିରଫ କରିଥିଲା ପୋଲିସ । ସେଥିପାଇଁ ସ୍ବର୍ଗତ ମହାରଣାକୁ ମହାମହିମ ରାଷ୍ଟ୍ରପତି ସାହସିକତା ପଦରେ ଅଳଙ୍କୃତ କରିଥିଲେ । ଏଭଳି ଜଣେ ବୀର ପୋଲିସର ଗାଥା ଶୁଣିବା ପରେ ଖୋଦ ମୁଖ୍ୟମନ୍ତ୍ରୀ ଭାବ ବିହ୍ବଳ ହୋଇପଡ଼ିଥିଲେ । ସେପଟେ ଏଭଳି ଜଣେ ବୀର୍ ସହିଦଙ୍କ ସ୍ତ୍ରୀ ବୋଲି ନିଜକୁ ଗର୍ବ କରନ୍ତି ବୋଲି କହିଛନ୍ତି ସ୍ୱର୍ଗତ ବନବାସୀ ମହାରଣାଙ୍କ ପତ୍ନୀ ଅନିତା ମହାରଣା ।
୯୪ ଜଣ ବରିଷ୍ଠ ପୋଲିସ ଅଧିକାରୀ ସମ୍ମାନିତ ହେବା ପରେ ପୋଲିସ ବିଭାଗରେ ଦୀର୍ଘ ବର୍ଷ ଧରି କାର୍ଯ୍ୟ କରିବାର ଫଳ ସେମାନଙ୍କୁ ମିଳିଛି ବୋଲି ମତ ପ୍ରକାଶ କରିଛନ୍ତି ଅନ୍ୟ ବରିଷ୍ଠ ପୋଲିସ ଅଧିକାରୀ । କାର୍ଯ୍ୟକ୍ରମରେ ମୁଖ୍ୟ ଶାସନ ସଚିବ ମନୋଜ ଆହୁଜା, ଗୃହ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଦେଓରଞ୍ଜନ କୁମାର ସିଂହ, ଡିଜିପି ଅରୁଣ କୁମାର ଷଡଙ୍ଗୀ, ଡିଜି- ଅଗ୍ନିଶମ, ହୋମଗାର୍ଡ ଓ ବେସାମରିକ ପ୍ରତିରକ୍ଷା ଡ. ସୁଧାଂଶୁ କୁମାର ଷଡଙ୍ଗୀ, ଅତିରିକ୍ତ ଡିଜି– କାରାଗାର ଓ ସଂସ୍କାର ସେବା ଅମିତାଭ ଠାକୁରଙ୍କ ସହ ଗୃହ ବିଭାଗର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।
୩ ବର୍ଷର ପୁଅକୁ ପୋଖରୀରେ ବୁଡ଼ାଇ ମାରି ଦେଲା ମାଆ !
ଜଳେଶ୍ବର: ପାରିବାରିକ କଳହର କରୁଣ ପରିଣତି । ଜନ୍ମ କଲା ପୁଅର ଜୀବନ ନେଇଗଲା ମାଆ । ପୋଖରୀରେ ବୁଡ଼ାଇ ନିଜ ପିଲାକୁ ମହିଳା ଜଣଙ୍କ ହତ୍ୟା କରିଥିବା ତାଙ୍କ ସ୍ବାମୀ କରିଛନ୍ତି ଅଭିଯୋଗ । ଘଟଣା ଘଟିଛି ଜଳେଶ୍ଵର ଥାନା ଆମ୍ବୁଳି ଅଠା ଗାଁରେ ।
ଅଭିଯୋଗ ଅନୁସାରେ, ସ୍ବାମୀ ସୁଜୟ ଓ ସ୍ତ୍ରୀ ଝିଲ୍ଲୀଙ୍କ ମଧ୍ଯରେ ପାରିବାରିକ କଳହ ଲାଗି ରହିଥିଲା । ୨ ମାସ ହେବ ଝିଲ୍ଲୀ ବାପ ଘରେ ରହୁଥିଲେ । ଆଜି ୩ ବର୍ଷର ପୁଅ ପୋଖରୀରେ ବୁଡ଼ିଯିବା ପରେ ଗୁରୁତର ଅବସ୍ଥାରେ ତାକୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ପୁଅକୁ ମୃତ ଘୋଷଣା କରିଥିଲେ । ତେବେ ମାଆ ପୁଅକୁ ପୋଖରୀରେ ବୁଡାଇ ମାରିଦେଇଥିବା ନେଇ ସାଂଘାତିକ ଅଭିଯୋଗ କରିଛନ୍ତି ତାଙ୍କ ସ୍ବାମୀ ସୁଜୟ । ପୋଲିସ ଉଭୟଙ୍କୁ ପଚରାଉଚରା କରିବା ସହ ତଦନ୍ତ ଚଲାଇଛି ।
ଅବହେଳିତ ପୁରୀ ଜିଲ୍ଲାର ଲବଣ ସତ୍ୟାଗ୍ରହ ସ୍ଥାନ, ଐତିହ୍ୟ ସ୍ଥଳ ମାନ୍ୟତା ଦାବି
ପୁରୀ: ପୁରୀ ଜିଲ୍ଲାରେ ସ୍ୱାଧୀନତା ଆନ୍ଦୋଳନକୁ ଆଗେଇ ନେଇଥିଲେ ପଣ୍ଡିତ ଗୋପବନ୍ଧୁ ଦାସ ଏବଂ ପଣ୍ଡିତ ନୀଳକଣ୍ଠ ଦାସ । ପୁରୀ ଅସ୍ତରଙ୍ଗର କୁହୁଡି, ଖଣ୍ଡାସାହି ଆଦି ସ୍ଥାନରେ ୧୯୩୦ ମସିହାରେ ଲବଣ ସତ୍ୟାଗ୍ରହ କରାଯାଇଥିଲା । ଅନେକ ଲୋକ ଏହି ଆନ୍ଦୋଳନରେ ସାମିଲ ହୋଇଥିଲେ । ଆଜି ସେହି ପୀଠ ଅବହେଳିତ ଅବସ୍ଥାରେ ପଡିଛି । ପୀଠର ଉନ୍ନତିକରଣ ହୋଇ ନଥିବାରୁ କ୍ଷୋଭ ପ୍ରକାଶ କରିଛନ୍ତି ଅଞ୍ଚଳବାସୀ ।
ଦେଶ ୭୮ତମ ସ୍ୱାଧୀନତା ଦିବସ ପାଳନ କରୁଛି । ସବୁଠି ଉତ୍ସାହ ଓ ଆନନ୍ଦ । ବିଦେଶୀ ଶାସନରୁ ମୁକ୍ତ ହୋଇଛି ଦେଶ । ଅନେକଙ୍କ ବଳିଦାନ ପାଇଁ ଦେଶ ପାଇଥିଲା ସ୍ବାଧିନତା । ପୁରୀ ଜିଲ୍ଲାରେ ସ୍ୱାଧୀନତା ଆନ୍ଦୋଳନକୁ ଆଗେଇ ନେଇଥିଲେ ପଣ୍ଡିତ ଗୋପବନ୍ଧୁ ଦାସ ଏବଂ ପଣ୍ଡିତ ନୀଳକଣ୍ଠ ଦାସ । ପୁରୀ ଜିଲ୍ଲାର ଅସ୍ତରଙ୍ଗର କୁହୁଡି, ଖଣ୍ଡାସାହି ଆଦି ସ୍ଥାନରେ ୧୯୩୦ ମସିହାରେ ଲବଣ ସତ୍ୟାଗ୍ରହ କରାଯାଇଥିଲା । ଆଜି ସେହି ପୀଠ ଅବହେଳିତ ହୋଇପଡିଛି । ଆଜି ପର୍ଯ୍ୟନ୍ତ ସ୍ଥାନକୁ ଐତିହସ୍ଥଳୀ କିମ୍ବା ପର୍ଯ୍ୟଟନ ସ୍ଥଳୀର ମାନ୍ଯତା ମିଳିନାହିଁ ।
ସ୍ବାଧୀନତା ସଂଗ୍ରାମରେ ଅନେକ ଗୁରୁତ୍ବ ରଖିଥିବା ଏହି ପୀଠର ଅବସ୍ଥା ଶୋଚନୀୟ ହୋଇପଡିଛି । ଘର କାନ୍ଥରୁ ରଙ୍ଗ ଛାଡି ଅଧା ଭାଙ୍ଗି ଯାଇଥିବା ବେଳେ ଆଖପାଖ ପରିବେଶ ଏକଦମ ଅପରିସ୍କାର ହୋଇ ପଡିରହିଛି । ଏହି ସ୍ଥାନର ରକ୍ଷଣାବେକ୍ଷଣ ସହ ଉନ୍ନତିକରଣ ପାଇଁ ସ୍ଥାନୀୟ ଲୋକେ ଦାବି କରିଛନ୍ତି । ସରକାରଙ୍କ ପକ୍ଷରୁ ଏହି ସ୍ଥାନକୁ ଐତିହ ପୀଠର ମାନ୍ଯତା ଦେବାକୁ ମଧ୍ଯ ସାଧାରଣରେ ଦାବି ହୋଇଛି । ସେପଟେ ଏହି ସ୍ଥାନରେ ଜମି ବିବାଦ ରହିଛି । ସେସବୁର ଶୀଘ୍ର ସମାଧାନ ହୋଇଗଲେ ପୀଠର ଉନ୍ନତିକରଣ କାର୍ଯ୍ୟ ମଧ୍ଯ ହେବ ବୋଲି କହିଛନ୍ତି ଅସ୍ତରଙ୍ଗ ତହସିଲଦାର ।
କେବଳ ଗୋଟିଏ ଛୋଟ କୋଠରୀରେ ମହାତ୍ମା ଗାନ୍ଧୀ ଏବଂ ଗୋପବନ୍ଧୁଙ୍କ ପ୍ରତିମୂର୍ତ୍ତି ଛଡା ପୀଠରେ ଆଉ କିଛି ନାହିଁ । କେବେ ମିଳିବ ଏହି ଐତିହାସିକ ପୀଠକୁ ମାନ୍ୟତା ତାକୁ ହିଁ ଅପେକ୍ଷା ।
ଏଠି ଗ୍ରାମ ଦେବତା ଭାବେ ପୂଜା ପାଇଥାନ୍ତି ସ୍ବାଧୀନତା ସଂଗ୍ରାମୀ ମିଟୁ କୁଆଁର
ଝାରସୁଗୁଡ଼ା: ଝାରସୁଗୁଡାର ଲଜକୁରାର ସହିଦ ମିଟୁ କୁଅଁର । ବ୍ରିଟିଶ ବିରୋଧରେ ଲଢେଇ କରି ୧୮୪୫ରେ ହୋଇଥିଲେ ସହିଦ । ମିଟୁ କୁଅଁରଙ୍କ ବଳିଦାନକୁ ମନେ ପକାଇ ତାଙ୍କୁ ଇଷ୍ଟ ଦେବ ଏବଂ ଗ୍ରାମ ଦେବତା ଭାବେ ପୂଜା କରୁଛନ୍ତି ଗାଁ ଲୋକେ । ବାର୍ଷିକ ଦୁଇଥର ଶ୍ରାବଣ ପୂର୍ଣ୍ଣିମା ଏବଂ ପୌଷ ପୂର୍ଣ୍ଣିମାରେ ଏଠାରେ ହୁଏ ବାବା ମିଟୁ କୁଅଁରଙ୍କର ସ୍ୱତନ୍ତ୍ର ପୂଜାର୍ଚ୍ଚନା ।
ମିଟୁ କୁଆଁର । ଇତିହାସରେ ହଜି ଯାଉଥିବା ଜଣେ ସହିଦ । ବୀର ସୁରେନ୍ଦ୍ର ସାଏଙ୍କ ସହିତ ମିଶି ବ୍ରିଟିଶ ସାମ୍ରାଜ୍ୟକୁ ବିସ୍ତାର ହେବାରେ ପ୍ରତିବନ୍ଧକ ସାଜିଥିଲେ ମିଟୁ କୁଅଁର । ବୀର ସୁରେନ୍ଦ୍ର ସାଏ ଜେଲ ଯିବା ପରେ ଲୋକଙ୍କୁ ଏକତ୍ରିତ କରି ବ୍ରିଟିଶ ବିରୋଧରେ ଲଢେଇ କରିଥିଲେ ଏବଂ ଶେଷରେ ୧୮୪୫ରେ ସହିଦ ହୋଇଥିଲେ । ନିଜ ଧନୁ ତୀର ସାହାଯ୍ୟରେ ଇଂରେଜଙ୍କ ଛାତି ଥରାଉଥିବା ମିଟୁ କୁଅଁରଙ୍କ ବଳିଦାନ ପାଇଁ ତାଙ୍କୁ ପୂଜା କରୁଛନ୍ତି ଗାଁ ଲୋକେ।
ବୀର ସୁରେନ୍ଦ୍ର ସାଏଙ୍କ ଉପରେ ଆଧାରିତ ଅନେକ ଇତିହାସ ପୃଷ୍ଠାରେ ସହିଦ ମିଟୁ କୁଅଁରଙ୍କ ନାଁ ଉଲ୍ଲେଖ ଥିବା ଦେଖିବାକୁ ମିଳେ । ଗାଁର ଅନେକ ଲୋକ ମିଟୁ କୁଅଁରଙ୍କୁ ଦେବତା ଭାବେ ପୂଜା କରୁଥିବା ବେଳେ ଆଜିର ଯୁବପିଢ଼ି ଏହି ମହାନ ସ୍ବାଧୀନତା ସଂଗ୍ରାମୀଙ୍କୁ ଧୀରେ ଧୀରେ ଭୁଲିବାରେ ଲାଗିଛନ୍ତି । ପ୍ରଶାସନ ଦ୍ବାରା ସହିଦ ମିଟୁ କୁଅଁରଙ୍କର ସ୍ମୃତି ରକ୍ଷା କରି କୌଣସି ସ୍ମୃତି ସଦନ କିମ୍ବା ପାଠ୍ୟକ୍ରମରେ ସାମିଲ କରାଗଲେ କିମ୍ବା କୌଣସି ଛକର ନାମକରଣ ସହିଦ ମିଟୁ କୁଅଁରଙ୍କ ନାମରେ ନାମିତ କଲେ ନିଶ୍ଚିତ ଭାବେ ଏହା ଜଣେ ସ୍ବାଧୀନତା ସଂଗ୍ରାମୀଙ୍କ ପାଇଁ ଉଚିତ ଶ୍ରଦ୍ଧାଞ୍ଜଳୀ ହୋଇପାରିବ ବୋଲି ଗାଁ ଲୋକେ କହିଛନ୍ତି ।