କଟକ: ଏସସିବିରେ ଅଘଟଣ । ସମ୍ପ୍ରସାରଣ କାମ ଚାଲିଥିବା ବେଳେ ଛିଡିଲା କ୍ରେନ୍ । ଦୁର୍ଘଟଣାରେ ୩ ଜଣ ଶ୍ରମିକ ଗୁରୁତର । ସମସ୍ତଙ୍କୁ ଏସସିବିରେ କରାଗଲା ଭର୍ତ୍ତି ।
ମିଳିଥିବା ସୂଚନା ଅନୁସାରେ, ଏସସିବିରେ ସମ୍ପ୍ରସାରଣ କାମ ଚାଲିଛି । ଆଜି ୧୦ ମହଲା ଉପରକୁ କ୍ରେନ ସାହାଯ୍ୟରେ ନିର୍ମାଣ ସାମଗ୍ରୀ ଉଠା ଯାଉଥିଲା । ଏହି ସମୟରେ କ୍ରେନଟି ଛିଡ଼ି ଯାଇଥିଲା । ଗୁରୁତ୍ବପୂର୍ଣ୍ଣ କଥା ହେଲା, କ୍ରେନ ଛିଡ଼ିବା ସ୍ଥାନରେ ପ୍ରାୟ ୫୦ ଜଣ ଶ୍ରମିକ କାମ କରୁଥିଲେ । କ୍ରେନଟି ତଳେ ପଡ଼ିବା ପରେ ୩ ଜଣ ଶ୍ରମିକ ଗୁରୁତର ଆହତ ହୋଇଥିବା ବେଳେ ଅନ୍ୟମାନେ ସୁରକ୍ଷିତ ଅଛନ୍ତି ।
ଭୁବନେଶ୍ବର: କ୍ରାନ୍ତି ଦିବସରେ ବିଜୁ ବାବୁଙ୍କୁ ଅପମାନ । ଭୁବନେଶର ସ୍ଵାଧୀନତା ସଂଗ୍ରାମୀ ପଡିଆରେ ଧୁମଧାମରେ କ୍ରାନ୍ତି ଦିବସ ପାଳନ ହେବା ଅବସରରେ ଫଟୋରେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କୁ ମିଳିଲାନି ସ୍ଥାନ । ମଞ୍ଚରେ ଓଡ଼ିଶାର ବରପୁତ୍ରମାନଙ୍କ ଫଟୋକୁ ସ୍ଥାନ ଦିଆଯାଇଥିବା ବେଳେ ବିଜୁ ବାବୁଙ୍କ ଫଟୋ ରଖା ଯାଇ ନଥିଲା । ପ୍ରତିବର୍ଷ ବିଜୁ ବାବୁଙ୍କ ଫଟୋ ରଖା ଯାଉଥିଲାବେଳେ ଆୟୋଜକଙ୍କ ପକ୍ଷରୁ ଚଳିତବର୍ଷ କେମିତି ଭୁଲ ହେଲା ତାକୁ ନେଇ ପ୍ରଶ୍ନ ଉଠିଛି ।
ସେପଟେ ବିଜେଡି ନେତା ଅମର ଶତପଥି ଏହି ପ୍ରସଙ୍ଗରେ ତୀବ୍ର ପ୍ରତିକ୍ରିୟା ରଖିଛନ୍ତି । କାହିଁକି ବିଜୁ ପଟ୍ଟନାୟକଙ୍କ ଫଟୋଚିତ୍ର ନାହିଁ ବୋଲି ସେ ପ୍ରଶ୍ନ କରିଛନ୍ତି । ସେ କହିଛନ୍ତି, ବିଜୁ ବାବୁ କେବଳ ଓଡ଼ିଶାରେ ନୁହେଁ, ଭାରତ ବର୍ଷରେ ଜଣେ ଅଗ୍ରଣୀ ସ୍ବାଧୀନତା ସଂଗ୍ରାମୀ । ବିଜୁ ପଟ୍ଟନାୟକଙ୍କ ବଳିଦାନ ଓଡ଼ିଶାବାସୀ ଜାଣିଛନ୍ତି । ଫଟୋ ନ ରହିବା ଯଦି ଉଦ୍ଦେଶ୍ୟମୂଳକ ନୁହେଁ, କେଉଁଠି ତ୍ରୁଟି ହୋଇଛି ତାକୁ ସୁଧାରିବା ଦରକାର ବୋଲି କହିଛନ୍ତି ଅମର ।
ଅନ୍ଯପଟେ ଏହାକୁ ନେଇ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ରାଜନୈତିକ ସଚିବ ସଂତୃପ୍ତ ମିଶ୍ର ରଖିଛନ୍ତି ବିସ୍ଫୋରକ ବୟାନ । ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ନାମକୁ ଲିଭାଇ ଦେବାର ଏହା ଏକ ଅପଚେଷ୍ଟା ବୋଲି ସେ କହିଛନ୍ତି ।
କେନ୍ଦ୍ରାପଡ଼ା: ଜଳୁଛି ବାଂଲାଦେଶ, ଓଡ଼ିଶାରେ ହାଇଆଲର୍ଟ । ସୀମାରେ ଅନୁପ୍ରବେଶକାରୀଙ୍କ ଉପରେ କଡ଼ା ନଜର ରଖିବାକୁ ସମସ୍ତ ସାମୁଦ୍ରିକ ଥାନାକୁ ଦିଆଯାଇଛି ନିର୍ଦ୍ଦେଶ । ହେଲେ କେନ୍ଦ୍ରାପଡ଼ା ତାଳଚୁଆ ସାମୁଦ୍ରିକ ଥାନା ଅଞ୍ଚଳରେ ତଟ ସୁରକ୍ଷା ନାଁରେ ଚାଲିଛି ପ୍ରହସନ । ନା ପୋଟ୍ରୋଲିଂ କରାଯାଉଛି ନା ଚେକିଂ। ରାତ୍ରିର ଅନ୍ଧକାରରେ ମେରାଇନ ପୋଲିସ କେତେ ସଜାଗ ରହିଛି ଗ୍ରାଉଣ୍ଡରେ ସ୍ଥିତି ପରଖିଛି ନନ୍ଦିଘୋଷ ଟିଭି ।
ଗତ ରାତିରେ ଭଦ୍ରକ କାରନାଳିରୁ ଯାତ୍ରୀଙ୍କୁ ନେଇ ମାଆ ମଙ୍ଗଳା ବୋଟ ପହଞ୍ଚିଥିଲା ତାଳଚୁଆ ଫେରି ଘାଟରେ । ବୋଟରେ ଥିଲେ ୫୦ରୁ ଅଧିକ ଯାତ୍ରୀ । କିନ୍ତୁ କାହାରି ଚେକିଂ ହୋଇ ନଥିଲା । ପୋଲିସର ତ ଦେଖା ନଥିଲା, ଚେକିଂ କରିବ କିଏ । ବୋଟ ଡ୍ରାଇଭର ନିଶାରେ ଚୁର । ଭରା ନଦୀରେ ଯାତ୍ରୀଙ୍କ ଜୀବନ ବାଜିରେ ଲାଗିଥିଲା ।
ରାତିରେ ବି ପୋଲିସର ପାଟ୍ରୋଲିଂ ଦେଖିବାକୁ ମିଳି ନଥିଲା । ତାଳଚୁଆ ବଜାରର ସବୁଆଡେ ଶୁନଶାନ୍ । ତାଳଚୁଆ ସାମୁଦ୍ରିକ ଥାନା ଗେଟ୍ ବନ୍ଦ ଥିବା ଆମ କ୍ୟାମେରା ଲେନ୍ସରେ କଏଦ ହୋଇଥିଲା । ଏପରି ସ୍ଥିତିରେ ରାଜ୍ଯର ଉପକୂଳ କେତେ ସୁରକ୍ଷିତ, ତାକୁ ନେଇ ପ୍ରଶ୍ନ ଉଠିଛି ।
କେନ୍ଦ୍ରାପଡ଼ା ରାଜନଗର ବ୍ଲକ ତାଳଚୁଆ ଅଞ୍ଚଳରେ ପ୍ରାୟ ୯୦ ପ୍ରତିଶତ ବଙ୍ଗୀୟ ଭାଷାଭାଷୀ ଲୋକ ଅଛନ୍ତି । ଅନେକ ବାଂଲାଦେଶୀ ଶରଣାର୍ଥୀ ବି ଅଛନ୍ତି । ପ୍ରତ୍ଯେକ ଦିନ ଏହି ଅଞ୍ଚଳରୁ ବହୁ ମାଛଧରା ଟ୍ରଲର ଓ ଯାତ୍ରୀବାହୀ ବୋଟ୍ ବାଣିଜ୍ଯ ପାଇଁ ପଶ୍ଚିମବଙ୍ଗ, ବାଂଲାଦେଶକୁ ଯାଇଥାନ୍ତି । ସମୁଦ୍ର ମଧ୍ୟରେ ଅପରାଧିକ କାର୍ଯ୍ୟକଳାପକୁ ରୋକିବା ପାଇଁ ସାମୁଦ୍ରିକ ଥାନା ପ୍ରତିଷ୍ଠା ହୋଇଥିଲେ ମଧ୍ୟ ତଟ ସୁରକ୍ଷା ଏବେ ପ୍ରହସନ ପାଲଟିଛି । ସମୁଦ୍ର ମଧ୍ୟରେ ପଇଁତରା ମାରିବା ପାଇଁ ନା ଅଛନ୍ତି ଆବଶ୍ୟକ ପରିମାଣରେ ପୋଲିସ୍ କର୍ମଚାରୀ ନା ଅଛି ପାଟ୍ରୋଲିଂ ବୋଟ୍ । ସରକାରଙ୍କ ହାଇ ଆଲର୍ଟ ତାଳଚୁଆ ସାମୁଦ୍ରିକ ଥାନା ପାଇଁ ନାମକୁ ମାତ୍ର । ଏପରି ସମ୍ବେଦନଶୀଳ ପରିସ୍ଥିତିରେ ସୁରକ୍ଷା ଲୋଡିଛନ୍ତି ସ୍ଥାନୀୟ ଲୋକ ।
ଗୋପ: ରାଜ୍ୟରେ ହୁ ହୁ ହୋଇ ବଢ଼ି ଚାଲିଛି ଆଳୁ ଦର । କେଉଁଠି ୫୦ ପାର ତ କେଉଁଠି ୭୦ ପାର । ସ୍ଥିତି ଏମିତି ବହୁ ଲୋକ ଆଳୁ କିଣିବା ବି ଛାଡି ଦେଲେଣି । ପ୍ରାୟ ୩ ସପ୍ତାହ ହେଲା ରାଜ୍ୟରେ ଆଳୁ ସଙ୍କଟ ଲାଗି ରହିଥିବା ବେଳେ ବିଜେପି ସରକାର ଏହାର ସମାଧନ କରିବାରେ ବିଫଳ ହୋଇଛି । ରାଜ୍ୟ ସରକାରଙ୍କ ଅପାରଗତାକୁ ବିରୋଧ କରି ଅଭିନଭ ପ୍ରତିବାଦ କରିଛି ବିଜୁ ଯୁବ ଜନତା ଦଳ । ଦଳ ପକ୍ଷରୁ ୨୦ ଟଙ୍କା କେଜିରେ ଲୋକଙ୍କୁ ଆଳୁ ଯୋଇ ଦିଆଯାଇଛି ।
ଗୋପ ବିଜୁ ଯୁବ ଜନତା ଦଳ ପକ୍ଷରୁ ଏପରି ପ୍ରତିବାଦ କରାଯାଇଛି । ଗୋପ ବ୍ଲକ ସମ୍ମୁଖରେ ବିଜୁ ଯୁବ ଜନତା ଦଳ ପକ୍ଷରୁ ୨୦ ଟଙ୍କାରେ କେଜିରେ ଆଳୁ ବିକ୍ରି କରାଯାଇଛି ।
ବିଜେଡି ଯୁବନେତା ଭାଗିରଥି ସେନାପତି ଓ ପୂର୍ବତନ ପଞ୍ଚାୟତ ସମିତି ଉପାଧ୍ୟକ୍ଷ ନିରଞ୍ଜନ ମହାପାତ୍ର ପ୍ରମୁଖ ଏହି ପ୍ରତିବାଦରେ ସାମିଲ ହୋଇଥିଲେ । ରାଜ୍ୟରେ ଆଳୁ ସଙ୍କଟକୁ ବିରୋଧ କରି ସରକାରଙ୍କ ଟାର୍ଗେଟ କରିଛି ଯୁବଛାତ୍ର ସଂଗଠନ । ଆଳୁ କିଲୋ ପିଛା ୨୦ ଟଙ୍କାରେ ବିକ୍ରି କରି ଏଭଳି ପ୍ରତିବାଦ କରାଯାଉଥିବା ବେଳେ ଶସ୍ତାରେ ଆଳୁ ବିକ୍ରି ହେଉଥିବା ଦେଖି ଲୋକ ମଧ୍ୟ ଭିଡ଼ ଜମାଇଥିଲେ । ସରକାର ଦର ନିୟନ୍ତ୍ରଣ କରିବାରେ ବିଫଳ ହୋଇଥିବା ଅଭିଯୋଗ କରିଛି ବିଜେଡି ।
ପୁରୀ: ରାଜ୍ୟରେ ତିନି ସପ୍ତାହ ହେଲା ଆଳୁ ସଙ୍କଟ ଲାଗି ରହିଛି । ରାଜ୍ୟ ସରକାର ଏହାର ସମାଧାନ କରିପାରିନାହାନ୍ତି । ନା ମାର୍କେଟରେ ପର୍ଯ୍ଯାପ୍ତ ଆଳୁ ମିଳୁଛି ନା ଠିକ୍ ରେଟରେ ମିଳୁଛି । କେଉଁ ଜିଲ୍ଲାରେ ଆଳୁ କିଲୋ ପିଛା ୫୦ ଟଙ୍କାରେ ବିକ୍ରି ହେଉଛି ତ କେଉଁଠି ଦର ୮୦ ପାର କରିଯାଇଛି । ଏହାର ସମାଧାନ ପାଇଁ ଅଣ୍ଟା ଭିଡିଛନ୍ତି ଶ୍ରୀଜଗନ୍ନାଥଙ୍କ ବାଡ଼ଗ୍ରାହୀ ଜଗନ୍ନାଥ ସ୍ବାଇଁ ମହାପାତ୍ର । ସେ ପଶ୍ଚିମବଙ୍ଗ ମୁଖ୍ଯମନ୍ତ୍ରୀ ମମତା ବାନାର୍ଜୀଙ୍କୁ ଭେଟି ଓଡ଼ିଶାକୁ ଆଳୁ ପଠାଇବା ନେଇ ଆଲୋଚନା କରିବେ ବୋଲି କହିଛନ୍ତି ।
ଜଗୁନି କହିଛନ୍ତି- ଖୁବ୍ ଶୀଘ୍ର ଆଳୁ ସଂକଟ ଦୂର ହେବ । ରାଜ୍ୟ ସରକାର ଓ ପଶ୍ଚିମବଙ୍ଗ ସରକାର ଭିତରେ ସମନ୍ବୟ ରଖି ବ୍ୟବସାୟ କରିବା ସହ ମନୋମାଳିନ୍ଯ ଦୂର କରି ପୁଣି କାରବାର କରିବାକୁ କଥା ହେବି । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଓଡ଼ିଶାକୁ ବହୁତ ଭଲ ପାଆନ୍ତି । ଖୁବ୍ ଶୀଘ୍ର ଚନ୍ଦ୍ରମୁଖୀ ଆଳୁ ଓଡ଼ିଶାରେ ପହଞ୍ଚିବ ।
ଭୁବନେଶ୍ବର: ରାଜ୍ଯରେ ଲଗାଣ ବର୍ଷା ସତ୍ତ୍ବେ ବନ୍ଯା ସ୍ଥିତି ଉପୁଜିନାହିଁ । ତେବେ ଉପର ମୁଣ୍ଡରେ ସେପରି ବର୍ଷା ନଥିବାରୁ ଜଳସ୍ତର ଯାହା ଅଛି ତାହା ଆହୁରି କମିବ ବୋଲି କହିଛନ୍ତି ଜଳ ସଂପଦ ବିଭାଗ ସର୍ବୋଚ୍ଚ ଯନ୍ତ୍ରୀ । ତଥାପି ସବୁଠି ବିଭାଗୀୟ ଅଫିସର ସଜାଗ ଅଛନ୍ତି ବୋଲି କହିଛନ୍ତି ଇଆଇସି ।
ଅନ୍ଯପଟେ ଦିନ ୧୧ ଟା ସୁଦ୍ଧା ହୀରାକୁଦରେ ଜଳସ୍ତର ୬୧୨.୫ ଫୁଟ ରହିଛି । ଏବେ ୨ ଲକ୍ଷ ୬୦ ହଜାର କ୍ୟୁସେକ ପ୍ରବାହିତ ହେଉଛି । ଏବେ ହୀରାକୁଦ ଜଳଭଣ୍ଡାରରେ ୧୪ଟି ଗେଟ୍ ଖୋଲା ଅଛି । ଏଥିରେ ୨ ଲକ୍ଷ ୫୦ ହଜାର କ୍ୟୁସେକ ନିଷ୍କାସିତ ହେଉଛି । ଖଇରାମାଳରେ ଦିନ ୧୧ ସୁଦ୍ଧା ୩ ଲକ୍ଷ କ୍ୟୁସେକ ଜଳ ପ୍ରବାହିତ ହେଉଛି । ଖଇରାମାଳରୁ ଏବେ ଜଳସ୍ତର କମୁଛି । ମୁଣ୍ଡଳୀରେ ସର୍ବାଧିକ ୫ ଲକ୍ଷ ୯୭ ହଜାର କ୍ୟୁସେକ ପାଣି ପ୍ରବାହିତ ହେଉଥିଲା । ଏବେ ୫ ଲକ୍ଷ ୫୦ ହଜାର କ୍ଯୁସେକ ପାଣି ପ୍ରବାହିତ ହେଉଛି ।
ଆଜି ରାତି ସୁଦ୍ଧା ମୁଣ୍ଡଳୀରୁ ପିକ ଅତିକ୍ରମ କରିବ। ଦୟା, ଭାର୍ଗବୀର ତଳ ଅଞ୍ଚଳକୁ ପାଣି ପଶିପାରେ । କଣାସ, ଧନୁଆ, ବାଙ୍କୀ ଅଞ୍ଚଳରେ ଜଳବନ୍ଦୀ ସମସ୍ୟା ଉପୁଜି ପାରେ । କେବଳ ବୈତରଣୀ ନଦୀ ଜଳସ୍ତର ବୃଦ୍ଧି ପାଉଛି । ଆଖୁଆପଦାରେ ବିପଦ ସଂକେତ ୧୮.୩୩ ଥିବାବେଳେ ଏବେ ଜଳସ୍ତର ୧୭.୩ ମିଟର ରହିଛି । ଏହା ମଧ୍ୟ କମିବ ବୋଲି କହିଛନ୍ତି ଜଳ ସଂପଦ ବିଭାଗ ସର୍ବୋଚ୍ଚ ଯନ୍ତ୍ରୀ । ସୁବର୍ଣ୍ଣରେଖା, ବୁଢ଼ାବଳଙ୍ଗ, ଜଳକା, ସବୁ ନଦୀରେ କମ ଜଳ ପ୍ରବାହିତ ହେଉଛି । ତାହା ଆହୁରି କମିବ ବୋଲି କହିଛନ୍ତି ଯନ୍ତ୍ରୀ ।
ସମ୍ଭାବ୍ୟ ବନ୍ୟା ସ୍ଥିତିକୁ ନଜରରେ ରଖି ସ୍ୱାସ୍ଥ୍ୟ ବିଭାଗ ସତର୍କ ଓ ସଜାଗ ରହିଛି । ବିଶୁଦ୍ଧ ପାନୀୟ ଜଳ ଉପରେ ଗୁରୁତ୍ୱ ଦେଇଛି ବିଭାଗ । ଯେଉଁ ଅଞ୍ଚଳରେ ବନ୍ୟା ହେଉଛି ବା ହେବାର ସମ୍ଭାବନା ଅଛି, ସେହି ସବୁ ଅଞ୍ଚଳରେ ବ୍ୟାପକ ମାତ୍ରାରେ ହାଲୋଜେନ ବଟିକା ଦିଆଯାଇଛି । ପାଣିର ମାତ୍ରା ନିୟମିତ ଭାବେ ପରୀକ୍ଷା କରାଯାଉଥିବା କହିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ ନୀଳକଣ୍ଠ ମିଶ୍ର । ରାଜ୍ୟର ସମସ୍ତ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ଓ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ୨୦ଟି ଲେଖାଏଁ ସାପ କାମୁଡା ଇଂଜେକସନ ମହଜୁଦ ରଖାଯାଇଛି । ସବୁ ଜାଗାରେ ସ୍ୱାସ୍ଥ୍ୟ ବିଭାଗର ଟିମକୁ ଆଲର୍ଟ ରଖାଯାଇଛି । ରାୟଗଡା ଝାଡ଼ାବାନ୍ତି ସ୍ଥିତି ନିୟନ୍ତ୍ରଣରେ ଅଛି । ଗତ ୨୪ ଘଣ୍ଟା ମଧ୍ୟରେ କୌଣସି ମୃତ୍ୟୁ ହୋଇନାହିଁ । ବର୍ଷା ଦିନେ ଝାଡ଼ାବାନ୍ତି ସାଧାରଣତଃ ସବୁଠି ହୋଇଥାଏ । ପିଇବା ପାଣି ଉପରେ ସମସ୍ତଙ୍କୁ ନଜର ରଖିବାକୁ ପଡିବ ସେ କହିଛନ୍ତି ।
ନୂଆଦିଲ୍ଲୀ: ରାଜ୍ୟସଭାରେ ସାଂସଦ ଜୟା ବଚ୍ଚନଙ୍କ ଉପରେ ତାତିଲେ ଅଧ୍ୟକ୍ଷ ଜଗଦୀପ ଧନକର । ଶୁକ୍ରବାର ରାଜ୍ୟସଭା ଚାଲିଥିବା ବେଳେ ସଭାପତି ଜଗଦୀପ ଧନକରଙ୍କ ଟୋନ ବା ସ୍ୱରକୁ ନେଇ ପ୍ରଶ୍ନ ଉଠାଇଥିଲେ ସମାଜବାଦୀ ପାଟିର ସାଂସଦ ଜୟା ବଚ୍ଚନ । ସେ ଟିପ୍ପଣୀ ଦେଇ କହିଥିଲେ କି, ମୁଁ ଜଣେ କଳାକାର। ମୁଁ ଆପଣଙ୍କ ହାବଭାବ ବୁଝିପାରୁଛି। ଆପଣଙ୍କ କହିବାର ଉଦ୍ଦେଶ୍ୟ ଠିକ୍ ଲାଗୁନାହିଁ। ରାଜ୍ୟ ସଭାରେ ଆମେ ସମସ୍ତେ ଏକାଠି ଅଛୁ।
ଜୟା ବଚ୍ଚନଙ୍କ ଏପରି ମନ୍ତବ୍ୟ ଶୁଣିବା ପରେ ରାଗି ଯାଇଥିଲେ ଅଧ୍ୟକ୍ଷ । ଆଉ କହିଥିଲେ , ନିର୍ଦ୍ଦେଶକଙ୍କ ବିନା ଅଭିନେତା କିଛି ନୁହନ୍ତି। ମୁଁ ଯାହାସବୁ ଦେଖିଆସିଛି ଆପଣ ସେସବୁ ଦେଖିନାହାନ୍ତି। ଆପଣ ଯେତେ ବଡ଼ ତାରକା ହୁଅନ୍ତୁ, ସଂସଦରେ ସେୟା ହେବ ଯାହା ନିୟମକାନୁନରେ ରହିଛି। ଅନ୍ୟପକ୍ଷେ ରାଜ୍ୟସଭାରେ ଏକ ବିରାଟ ଉତ୍ତେଜନା ଦେଖାଦେଇଥିଲା ଏବଂ ବିରୋଧୀମାନେ ବାହାରକୁ ପଳାଇ ଯାଇଥିଲେ।
କିଛିଦିନ ହେବ ରାଜ୍ୟ ସଭାରେ ଉପରାଷ୍ଟ୍ରପତି ତଥା ଗୃହର ଅଧ୍ୟକ୍ଷ ଜଗଦୀପ ଧନଖଡ଼ ଏବଂ ସମାଜବାଦୀ ପାର୍ଟି ସାଂସଦ ଜୟା ବଚ୍ଚନଙ୍କ ମଧ୍ୟରେ କଥା କଟାକଟି ଚାଲିଛି। ଏପରି କି ଅଭିତାଭ ବଚ୍ଚନଙ୍କ ନାଁ ଶୁଣିଲେ ଚିଡ଼ି ଯାଉଛନ୍ତି ଜୟା ବଚ୍ଚନ।
ରାଜ୍ୟ ସଭାରେ ଗୃହ କାର୍ଯ୍ୟ ସମୟରେ ଗୃହର ଅଧ୍ୟକ୍ଷ ସାଂସଦ ଜୟା ବଚ୍ଚନଙ୍କ ଜୟା ଅମିତାଭ ବଚ୍ଚନ ବୋଲି ସମ୍ବୋଧନ କରୁଛନ୍ତି। ଯାହାର ପ୍ରତିବାଦ କରୁଛନ୍ତି ଜୟା ବଚ୍ଚନ। ସେ କହୁଛନ୍ତି ତାଙ୍କ ପଛରେ ଅମିତାଭଙ୍କ ନାଁ କାହିଁକି ଯୋଡ଼ାଯାଉଛି। ତାଙ୍କୁ କେବଳ ଜୟା ବଚ୍ଚନ ହିଁ ଡକାଯାଉ। ଏହାକୁ ନେଇ ସେ ଧନଖଡ଼ଙ୍କ ସହିତ ଯୁକ୍ତି କରୁଥିବା ଦେଖିବାକୁ ମିଳୁଛି।
ଭୁବନେଶ୍ୱର : ପୁଣି ଆଦିବାସୀଙ୍କ ସ୍ବାର୍ଥରେ ବାହାରିଲେ ନବୀନ । ଶଙ୍ଖ ଭବନରେ ବିଶ୍ବ ଆଦିବାସୀ ଦିବସ ପାଳନ ଅବସରରେ ହୋ, ମୁଣ୍ଡାରୀ, ଭୂମିଜ, ସଉରା ପରି ଆଦିବାସୀ ଭାଷାକୁ ସମ୍ବିଧାନର ଅଷ୍ଟମ ଅନୁଚ୍ଛେଦରେ ମାନ୍ଯତା ମିଳୁ ବୋଲି ବିଜେଡି ସୁପ୍ରିମୋ ପୁଣି ଦାବି କରିଛନ୍ତି । କହିଛନ୍ତି, ଆଦିବାସୀଙ୍କ ଶିକ୍ଷା, ଜୀନ ଜୀବିକା ସଶକ୍ତ କରିବା ପାଇଁ ଏହା ନିହାତି ଜରୁରୀ । ସେହିପରି ୧୬୯ ଗୋଷୀଙ୍କୁ ମଧ୍ଯ ମାନ୍ଯତା ମିଳୁ ବୋଲି ନବୀନ ଦାବି ଦୋହରାଇଛନ୍ତି ।
ଓଡ଼ିଶାରେ ୬୪ ଆଦିବାସୀ ଜନଜାତି ଓ ୧୩ ଆଦିମ ଜନଜାତି ଅଛନ୍ତି । ବିଜେଡି ସରକାର ଅମଳରେ ଆଦିବାସୀଙ୍କ ପାଇଁ ଅନେକ ଯୋଜନା କରାଯାଇଥିଲା । ସ୍ବତନ୍ତ୍ର ବିକାଶ ପରିଷଦ ଗଠନ କରାଯାଇଥିଲା । ସେହିପରି ଆଦିବାସୀ ପୂଜ୍ଯପୂଜାଙ୍କୁ ସମ୍ମାନିତ କରାଯାଇଥିଲା । ତାର ଉଦାହରଣ ହେଉଛି କୋରାପୁଟ, କଳାହାଣ୍ଡି, ବାରିପଦା ମେଡିକାଲ କଲେଜର ନାମକରଣ । କୋରାପୁଟ ମେଡିକାଲ କଲେଜକୁ ସହିଦ ଲକ୍ଷ୍ମଣ ନାୟକଙ୍କ ନାମରେ ନାମିତ କରାଯାଇଥିଲାବେଳେ କଳାହାଣ୍ଡି ମେଡିକାଲ କଲେଜକୁ ସହିଜ ରେଣ୍ଡୋ ମାଝୀଙ୍କ ନାମରେ ନାମିତ କରାଯାଇଥିଲା ।
ସେହିପରି ବାରିପଦା ମେଡିକାଲ କଲେଜକୁ ପଣ୍ଡିତ ରଘୁନାଥ ମୁର୍ମୁଙ୍କ ନାମରେ ନାମିତ କରାଯାଇଥିଲା । ବିର୍ସା ମୁଣ୍ଡାଙ୍କ ନାମରେ ରାଉରକେଲାରେ ବିଶ୍ବର ସର୍ବବୃହତ ହକି ଷ୍ଟାଡିୟମ ନିର୍ମାଣ କରାଯାଇଛି । ଜଙ୍ଗଲ ଜମି ଅଧିକାର ହେଉ କିମ୍ବା ଶିକ୍ଷାର ପ୍ରସାର ସାନ୍ତାଳୀ ଭାଷାକୁ ସମ୍ବିଧାନର ଅଷ୍ଟମ ଅନୁଚ୍ଛେଦରେ ସାମିଲ କରିପାରିଥିଲା ବିଜେଡି । ତେଣୁ ଆଦିବାସୀ ଭାଇଭଉଣୀଙ୍କ ବିକାଶ ପାଇଁ ସରକାର ଆଗକୁ ମଧ୍ଯ ଯୋଜନା ଜାରି ରଖନ୍ତୁ । ଆଦିବାସୀଙ୍କ ସହ ବିଜେଡି ସବୁବେଳେ ରହିଆସିଛି ଓ ରହିବ ବୋଲି ବୋଲି କହିଛନ୍ତି ବିରୋଧୀ ଦଳ ନେତା ତଥା ବିଜେଡି ସଭାପତି ନବୀନ ପଟ୍ଟନାୟକ ।
ଭୁବନେଶ୍ୱର : ନଭେମ୍ବରରୁ ବିଭିନ୍ନ ଜିଲ୍ଲା ଗସ୍ତରେ ଯିବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ। ଏହି ସୂଚନା ଦେଇଛନ୍ତି ବିଜେଡି ସମନ୍ବୟ କମିଟିର ଅଧ୍ଯକ୍ଷ ଦେବୀପ୍ରସାଦ ମିଶ୍ର। ସେ କହିଛନ୍ତି, ନବୀନ ପଟ୍ଟନାୟକ ହେଉଛନ୍ତି ଲୋକଙ୍କ ନେତା। ତେଣୁ ଲୋକଙ୍କ ପାଖକୁ ଯାଇ ସୁବିଧା ଅସୁବିଧା ବୁଝିବେ। ଜନସାଧାରଣଙ୍କ ସାଥିରେ ଯୋଡି ହେବା ପାଇଁ ବିଭିନ୍ନ ଜିଲ୍ଲା ବୁଲିବେ। ସଂଗଠନ ଓ କର୍ମୀଙ୍କୁ ସକ୍ରିୟ କରିବାକୁ ପରାମର୍ଶ ଦେବେ। ନବୀନ ପଟ୍ଟନାୟକ ଲୋକଙ୍କ ହୃଦୟରେ ଅଛନ୍ତି। ନବୀନ ସବୁବେଳେ ଓଡିଶାର ବିକାଶ ପାଇଁ କାମ କରୁଛନ୍ତି l ତାଙ୍କର ଲକ୍ଷ୍ୟ ଓଡ଼ିଶାର ବିକାଶ ଆଉ ବିକାଶ ବୋଲି କହିଛନ୍ତି ଦେବୀ ପ୍ରସାଦ ମିଶ୍ର।
ନୂଆଦିଲ୍ଲୀ : ଦିଲ୍ଲୀର ପୂର୍ବତନ ଉପମୁଖ୍ଯମନ୍ତ୍ରୀ ତଥା ଆପ୍ ନେତା ମନୀଷ ସିସୋଦିଆଙ୍କୁ ଜାମିନ। ଆଜି ଜାମିନ ଦେଇଛନ୍ତି ସୁପ୍ରିମକୋର୍ଟ। ଦିଲ୍ଲୀ ମଦ ଦୁର୍ନୀତିରେ ସିସୋଦିଆଙ୍କୁ ସର୍ତ୍ତମୂଳକ ଜାମିନ ମିଳିଛି। ୧୭ ମାସ ହେଲା ସେ ଜେଲରେ ଥିଲେ। ସୁପ୍ରିମକୋର୍ଟ କହିଛନ୍ତି, ତ୍ଵରିତ ନ୍ୟାୟ ପାଇବାର ଅଧିକାର ସିସୋଦିଆଙ୍କର ଅଛି। ତାଙ୍କୁ ଟ୍ରାଏଲ କୋର୍ଟକୁ ପଠାଯିବା ସାପ ସିଡ଼ି ଖେଳ ହେ, ଯାହାକି ଅନ୍ୟାୟ। ସୁପ୍ରିମକୋର୍ଟ କହିଛନ୍ତି, ବିଚାର ପ୍ରକ୍ରିୟା ନ କରି ଅନିର୍ଦ୍ଦିଷ୍ଟ କାଳ ପର୍ଯ୍ଯନ୍ତ ସିସୋଦିଆଙ୍କୁ ଜେଲରେ ରଖିବା ତାଙ୍କ ମୌଳିକ ଅଧିକାରର ଉଲ୍ଲଂଘନ।
୧୮ ମାସ ହେଲାଣି ବିଚାର ପ୍ରକ୍ରିୟା ଆରମ୍ଭ ହୋଇ ନାହିଁ। ଅଭିଯୁକ୍ତକୁ ବେଲ୍ ମିଳିବା ଉଚିତ। ଜେଲ୍ ହେଉଛି ବ୍ଯତିକ୍ରମ। ସମାଜରେ ସିସୋଦିଆଙ୍କ ଏକ ସମ୍ମାନ ଅଛି। ଏହାକୁ ତଳ କୋର୍ଟ ଓ ହାଇକୋର୍ଟ ଧ୍ଯାନ ଦେବାର ଥିଲା। ଦଣ୍ଡ ହିସାବରେ ଜାମିନକୁ ଖାରଜ କରାଯାଇପାରିବ ନାହିଁ। ଦିଲ୍ଲୀ ମଦ ଦୁର୍ନୀତିରେ ସିବିଆଇ ୨୦୨୩ ଫେବୃଆରି ୨୬ ରେ ସିସୋଦିଆଙ୍କୁ ଗିରଫ କରିଥିଲା। ଦୁଇ ସପ୍ତାହ ପରେ ଇଡି ମଧ୍ଯ ତାଙ୍କୁ ଗିରଫ କରିଥିଲା। ଉଭୟ କେସରେ ସୁପ୍ରିମକୋର୍ଟ ତାଙ୍କୁ ଜାମିନ ଦେଇଛନ୍ତି ଏବଂ କହିଛନ୍ତି ଅନିର୍ଦ୍ଦିଷ୍ଟ କାଳ ପାଇଁ ସିସୋଦିଆଙ୍କୁ ଜେଲରେ ରଖାଯାଇପାରିବ ନାହିଁ। ତେବେ ସୁପ୍ରିମକୋର୍ଟ ସର୍ତ୍ତ ରଖିଛନ୍ତି ଯେ, ସିସୋଦିଆ ମୁଖ୍ଯମନ୍ତ୍ରୀ କେଜରିୱାଲଙ୍କ ଅଫିସକୁ ଯାଇପାରିବେ ନାହିଁ । ଏହା ସହିତ କୋର୍ଟରେ ପାସପୋର୍ଟ ଦାଖଲ କରିବେ।
