ନନ୍ଦିଘୋଷ ବ୍ୟୁରୋ: ଆଗାମୀ ୧୨ ଘଣ୍ଟାରେ ଅବପାତର ରୂପ ନେବ ଲଘୁଚାପ । ପରବର୍ତ୍ତୀ ସମୟରେ ଆହୁରି ଘନୀଭୂତ ହୋଇ ଗଭୀର ଅବପାତର ରୂପ ନେବା ସମ୍ଭାବନା । ସମ୍ଭାବ୍ୟ ଗଭୀର ଅବପାତ ପ୍ରଭାବରେ ଆସନ୍ତାକାଲି ସମେତ ୩ ତାରିଖ ଯାଏଁ ରାଜ୍ୟରେ ବଡ ବର୍ଷା ସହ ପବନ ବୋହିବ । ସୂଚନା ଦେଲା ଭାରତୀୟ ପାଣିପାଗ ବିଭାଗ । ବର୍ଷା ପ୍ରଭାବରେ ପୂଜା ତୋରଣ ସହ ପେଣ୍ଡାଲ ଗୁଡିକ ପ୍ରଭାବିତ ହେବା ନେଇ ସମ୍ଭାବନା ରହିଛି ।
ପ୍ରକାଶ ପାଇଲା ଭାରତର ଧନୀ ତାଲିକା, ପ୍ରଥମଥର କୋଟିପତି ତାଲିକାରେ ସାମିଲ ହେଲେ ଶାହାରୁଖ
ନନ୍ଦିଘୋଷ ବ୍ୟୁରୋ: ଭାରତରେ ବଢ଼ୁଛନ୍ତି କୋଟିପତି । ଏମ୩ଏମ ହୁରୁନ୍ ଇଣ୍ଡିଆ ପକ୍ଷରୁ ପ୍ରକାଶ ପାଇଛି ଭରତର ଧନୀ ତାଲିକା । ଏହି କୋଟିପତି ତାଲିକାରେ ପୁଣିଥରେ ଏକ ନମ୍ବରରେ ରହିଛନ୍ତି ମୁକେଶ ଅମ୍ବାନୀ । ପ୍ରଥମଥର ଲାଗି କୋଟିପତି କ୍ଲବରେ ସାମିଲ ହୋଇଛନ୍ତି ବଲିଉଡର କିଙ୍ଗ ଖାନ୍ ଶାହାରୁଖ ଖାନ । ଭାରତରେ ୩୫୦ରୁ ଅଧିକ ଆରବପତି ରହିଛନ୍ତି । ଗତ ୧୩ ବର୍ଷ ମଧ୍ୟରେ ଏହା ୬ ଗୁଣା ବୃଦ୍ଧି ପାଇଛି । ହୁରୁନ ଇଣ୍ଡିଆର ରିପୋର୍ଟକୁ ଯଦି ବିଶ୍ବାସ କରିବା ତାହେଲେ ମୁକେଶ ଅମ୍ବାନୀ ଏବଂ ତାଙ୍କ ପରିବାରର ସମୁଦାୟ ସମ୍ପତ୍ତି ଆନୁମାନିକ ୯.୫୫ ଲକ୍ଷ କୋଟି ଟଙ୍କା । ଦ୍ବିତୀୟ ସ୍ଥାନରେ ରହିଛନ୍ତି ଗୌତମ ଆଦାନୀ ତାଙ୍କ ସମ୍ପତ୍ତିର ମୂଲ୍ୟ ରହିଛି ୮.୧୫ ଲକ୍ଷ କୋଟି ଟଙ୍କା । ତେବେ ଏହି ତାଲିକାରେ ଶାହାରୁଖ ଖାନ ସ୍ଥାନ ପାଇଥିବାବେଳେ ତାଙ୍କ ସମୁଦାୟ ସମ୍ପତ୍ତିର ମୂଲ୍ୟ ରହିଛି ୧୨,୪୯୦ କୋଟି ଟଙ୍କା ।
ସରକାରୀ କର୍ମଚାରୀଙ୍କ ବଢ଼ିଲା ୩ ପ୍ରତିଶତ ମହଙ୍ଗା ଭତ୍ତା
ନନ୍ଦିଘୋଷ ବ୍ୟୁରୋ: ସରକାରୀ କର୍ମଚାରୀଙ୍କ ଲାଗି ଖୁସି ଖବର । ଦୀପାବଳି ପୂର୍ବରୁ ବଡ଼ ଘୋଷଣା କଲେ କେନ୍ଦ୍ର ସରକାର । କେନ୍ଦ୍ର ସରକାର କ୍ୟାବିନେଟ୍ ବୈଠକରେ କର୍ମଚାରୀ ଏବଂ ପେନସନଭୋଗୀଙ୍କ ପାଇଁ ମହଙ୍ଗା ଭତ୍ତା (DA) ବୃଦ୍ଧି କରିବାକୁ ନିଷ୍ପତ୍ତି ନେଇଛନ୍ତି । ମହଙ୍ଗା ଭତ୍ତା ୩ ପ୍ରତିଶତ ବୃଦ୍ଧି ପାଇଛି । ଏହି ବର୍ଦ୍ଧିତ DA ଜୁଲାଇ ୧ରୁ ପିଛିଲା ଭାବରେ କାର୍ଯ୍ୟକାରୀ ହେବ ।
ସମସ୍ତ କେନ୍ଦ୍ର ସରକାର କର୍ମଚାରୀଙ୍କୁ ଜୁଲାଇ, ଅଗଷ୍ଟ ଏବଂ ସେପ୍ଟେମ୍ବରର ବକେୟା ଅକ୍ଟୋବର ଦରମା ସହିତ ମିଳିବ । ସରକାର ଦୀପାବଳି ପୂର୍ବରୁ ଲକ୍ଷ ଲକ୍ଷ କର୍ମଚାରୀଙ୍କୁ ଏକ ଉପହାର ଦେଇଛନ୍ତି । ମହଙ୍ଗା ଭତ୍ତା ୩ ପ୍ରତିଶତ ବୃଦ୍ଧି ପାଇଛି । ୭ମ ବେତନ ଆୟୋଗ ମୁତାବକ, ସମସ୍ତ କେନ୍ଦ୍ର ସରକାର କର୍ମଚାରୀଙ୍କ ସହିତ ପେନସନଭୋଗୀଙ୍କ ପାଇଁ ଏହା ଲାଗୁ ହେବ ।
ସରକାର ପୂର୍ବରୁ ମହଙ୍ଗା ଭତ୍ତା (DA) ଏବଂ ମହଙ୍ଗା ରିଲିଫ୍ (DR) ୨% ବୃଦ୍ଧି କରିଥିଲେ । ଯାହା ଜାନୁଆରୀ ୧, ୨୦୨୫ ରୁ ଲାଗୁ ହୋଇଥିଲା । ଏହାଦ୍ବାରା ୧୧.୫ ନିୟୁତ କେନ୍ଦ୍ର ସରକାରୀ କର୍ମଚାରୀ ଏବଂ ପେନସନଭୋଗୀ ଉପକୃତ ହୋଇଥିଲେ । ଏହି ବୃଦ୍ଧି ପରେ ମହଙ୍ଗା ଭତ୍ତା ମୂଳ ଦରମାର ୫୩% ରୁ ୫୫% କୁ ବୃଦ୍ଧି ପାଇଲା । ଏବେ ୩ ପ୍ରତିଶତ ବଢିଲା ପରେ ମହଙ୍ଗା ଭତ୍ତା ମୂଳ ଦରମାର ୫୮%କୁ ବୃଦ୍ଧି ପାଇଛି ।
ଏହି ଖେଳାଳି ମାରିଲେ ଦ୍ରୁତତମ ଶତକ, ୧୦ ଛକା ମାରି…
ନନ୍ଦିଘୋଷ ବ୍ୟୁରୋ: ଆଇପିଏଲ ଢ଼ାଞ୍ଚାରେ ଏବେ ସବୁ ରାଜ୍ୟରେ ପ୍ରିମିୟର ଲିଗ୍ ଖେଳାଯାଉଛି । ଏବେ ଉତ୍ତରାଖଣ୍ଡରେ ଖେଳାଯାଉଥିବା ଉତ୍ତରାଖଣ୍ଡ ପ୍ରିମିୟର ଲିଗରେ ଏକ ବଡ଼ ରେକର୍ଡ ନଜର ଆସିଛି । ଦ୍ରୁତତମ ଶତକ ହାସଲ କରିଥିବା ନଜର ଆସିଛି । ମଙ୍ଗଳବାର usn Indians ଏବଂ RIF ମଧ୍ୟରେ ଖେଳାଯାଇଥିଲା ମ୍ୟାଚ୍ । ଏହି ମ୍ୟାରେ usn Indians ପ୍ରଥମେ ବ୍ୟାଟିଂ କରି ୨୩୦ ରନ କରିଥିଲା । ଦଳ ପକ୍ଷରୁ ବିଶାଲ କାଶ୍ୟପ ୧୧୬ ରନର ପାଳି ଖେଳିଥିଲେ । ୫୯ ବଲରେ ୮ ଛକା ଏବଂ ୧୧ ଚୌକା ମାରିଥିଲେ । ଦଳର ବିଜୟ ଏକପ୍ରକାର ସୁନିଶ୍ଚିତ ବୋଲି ସମସ୍ତେ କହିଥିଲେ ।
ମାତ୍ର ଦ୍ବିତୀୟ ପାଳିରେ ସବୁ କିଛି ଓଲଟ ପାଲଟ ହୋଇଯାଇଥିଲା । ରିଷିକେଶ ପକ୍ଷରୁ ଖେଳୁଥିବା ଆଲେନ ଚେତନ ଦ୍ରୁତତମ ଶତକ ହାସଲ କରି ସବୁ ଓଲଟ ପାଲଟ କରି ଦେଇଥିଲେ । ସେ ମାତ୍ର ୫୪ ବଲରେ ୧୧୬ ରନର ପାଳିଖେଳିଥିଲେ । ଯେଉଁଥିରେ ୧୦ ଛକା ଏବଂ ୭ ଚୌକା ରହିଛି । ତେବେ ମାତ୍ର ୪୪ ବଲରେ ସେ ଶତକ ହାସଲ କରି ରେକର୍ଡ କରିଛନ୍ତି । ଏହା ଉତ୍ତରାଖଣ୍ଡ ପ୍ରିମିୟର ଲିଗରେ ସବୁଠାରୁ ଦ୍ରୁତତମ ଶତକର ରେକର୍ଡ ହୋଇଛି ।
ଥମୁନି ଉତ୍ତରପ୍ରଦେଶ ବରେଲିରେ ଉତ୍ତେଜନା
ନନ୍ଦିଘୋଷ ବ୍ୟୁରୋ: ଥମୁନି ଉତ୍ତରପ୍ରଦେଶ ବରେଲିରେ ଉତ୍ତେଜନା। କଂଗ୍ରେସ ସାଂସଦ ଇମରାନ ମାସୁଦ ଓ ଡାନିସ ଅଲ୍ଲୀଙ୍କୁ ଗୃହବନ୍ଦୀ କରାଯାଇଛି। ଆଇ ଲଭ ମହମ୍ମଦ ବିବାଦକୁ ନେଇ ଗତ କିଛି ଦିନ ଧରି ବରେଲିରେ ଉତ୍ତେଜନା ଲାଗି ରହିଛି। ବରେଲି ଯିବା ବାଟରେ ଆଜି ଡାନିସଙ୍କୁ ଅମରୋହାରେ ପୋଲିସ ଅଟକ ରଖିବା ସହ ତାଙ୍କୁ ଗୃହବନ୍ଦୀ କରାଯାଇଛି। ବରେଲିର ଡିଆଇଜିଙ୍କୁ ଭେଟିବାକୁ ଯିବାବେଳେ ସାଂସଦ ମାସୁଦଙ୍କୁ ଶାହାହରନପୁରରେ ଅଟକ ରଖାଯାଇଛି। ତେବେ ଆଇନଶୃଙ୍ଖଳା କାରଣରୁ ସେମାନଙ୍କୁ ଅଟକ ରଖାଯାଇଛି ବୋଲି ପୋଲିସ କହିଛି। ଗତ ଶୁକ୍ରବାର ପ୍ରାର୍ଥନା ପରଠାରୁ ଆଇ ଲଭ ମହମ୍ମଦ ପ୍ରସଙ୍ଗକୁ ନେଇ ବରେଲିରେ ହିଂସା ତେଜିଥିଲା। ବରେଲିର ଇସଲାମିଆ ଗ୍ରାଉଣଅଡରେ ଏକ ହଜାରରୁ ଅଧିକ ଲୋକଙ୍କ ସମାଗମ ହୋଇଥିବାବେଳେ ସେଠାରେ ଆକସ୍ମିକ ଉତ୍ତେଜନା ପ୍ରକାଶ ପାଇଥିଲା। ଏହି ପ୍ରାର୍ଥନା ସଭାରେ ସାମିଲ ହୋଇଥିଲେ ଧର୍ମଗୁରୁ ମୌଲାନା ତାକିର ରାଜା ଖାଁ। ଆନ୍ଦୋଳନବେଳେ ଟେକାପଥରମାଡ ହେବା ସହ ଗାଡି ଭଙ୍ଗାରୁଜା ହୋଇଥିଲା। ଉତ୍ତେଜନା ପ୍ରଶମିତ କରିବା ଲାଗି ପୋଲିସ ପକ୍ଷରୁ ଫାଙ୍କା ଗୁଳିଚାଳନା କରାଯାଇଥିଲା।
ସିମେଣ୍ଟ ଫ୍ୟାକ୍ଟ୍ରିରେ ଅଗ୍ନିକାଣ୍ଡ, ଗ୍ୟାସ ସିଲିଣ୍ଡର ଫାଟିଯିବାରୁ…
ନନ୍ଦିଘୋଷ ବ୍ୟୁରୋ: ସିମେଣ୍ଟ ଫ୍ୟାକ୍ଟ୍ରିରେ ଅଗ୍ନିକାଣ୍ଡ । ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଳକ୍ ତିଛିଣି ଗ୍ରାମରେ ଥିବା ଟୁକୁନା ତରେଇଙ୍କର ସିମେଣ୍ଟ ବ୍ଲକ ଫ୍ୟାକ୍ଟ୍ରିରେ ଭୟାବହ ଅଗ୍ନିକାଣ୍ଡ । ରୋଷେଇ କଲାବେଳେ ଗ୍ଯାସ ସିଲିଣ୍ଡର ଫାଟିଯାଇ ନିଆଁ ଲାଗିଯାଇଥିଲା । ତିନିଟି ଟାଙ୍କି ଫାଟିବାରୁ ଅଗ୍ନିକାଣ୍ଡ ଘଟିଥିବାବେଳେ ଶ୍ରମିକ ମାନେ ବର୍ତ୍ତିଯାଇଛନ୍ତି । ଅଗ୍ନିକାଣ୍ଡରେ ଘରଟି ସଂପୂର୍ଣ୍ଣ ଜଳିଯାଇଥିବାବେଳେ ଲକ୍ଷାଧିକ ଟଙ୍କାର ସମ୍ପତ୍ତି ଜଳିପୋଡି ପାଉଁଶ ହୋଇଯାଇଛି । ଭୟଙ୍କର ଅଗ୍ନିକାଣ୍ଡ ଦେଖି ଗାଁ ଲୋକେ ସଂପୂର୍ଣ୍ଣ ଭୟଭୀତ ଅବସ୍ଥାରେ ଅଛନ୍ତି ।
ବିସିସିଆଇ ନିକଟରେ କ୍ଷମା ମାଗିଲେ ଏସିସି ଅଧ୍ୟକ୍ଷ ମହସିନ ନକଭି
ନନ୍ଦିଘୋଷ ବ୍ୟୁରୋ: ଶେଷରେ ବିସିସିଆଇ ନିକଟରେ କ୍ଷମା ମାଗିଲେ ଏସିସି ଅଧ୍ୟକ୍ଷ ମହସିନ ନକଭି। ଦୁବାଇ ଏସିସି ବୈଠକରେ କ୍ଷମା ମାଗିଛନ୍ତି ନକଭି। କହିଛନ୍ତି- ଏପରି ସ୍ଥିତି ଆସିବାର ନଥିଲା। ତେବେ ସେ ଟ୍ରଫି ଓ ମେଡାଲ ଫେରାଇବାକୁ ମନା କରିଛନ୍ତି। ପାକିସ୍ତାନ ବିରୋଧରେ ଭାରତର ବିଜୟ ପରେ ସେଲିବ୍ରେସନ ଲାଗି ଅନୁମତି ଦେଇ ନଥିଲେ ନକଭି। ରବିବାର ଫାଇନାଲରେ ନକଭିଙ୍କ ହାତରୁ ଟ୍ରଫି ଓ ମେଡାଲ ଗ୍ରହଣ କରିବାକୁ ମନା କରିଥିଲେ ଭାରତୀୟ ଖେଳାଳି। ଭାରତୀୟ ଖେଳାଳି ଟ୍ରଫି ଓ ମେଡାଲ ନେବାକୁ ମନା କରିବା ପରେ ଟ୍ରଫି ଓ ମେଡାଲ ନେଇଯିବାକୁ ଏସିସିକୁ ନିର୍ଦ୍ଦେଶ ଦେଇଥିଲେ ନକଭି। ଯଦି ଗଣମାଧ୍ୟମ ରିପୋର୍ଟକୁ ବିଶ୍ୱାସ କରାଯାଏ, ତେବେ ବିସିସିଆଇ ଅଧିକାରୀମାନେ ଟ୍ରଫି ଫେରାଇବା ପ୍ରଶ୍ନରେ ପିସିବି ମୁଖ୍ୟ କହିଛନ୍ତି ଯେ ସେମାନେ ଏହାକୁ ଫେରାଇ ଦେବେ କିନ୍ତୁ ଏହାକୁ ନେବା ପାଇଁ ଭାରତୀୟ ଦଳର ଅଧିନାୟକ ସୂର୍ଯ୍ୟକୁମାର ଯାଦବଙ୍କୁ ଏସୀୟ କ୍ରିକେଟ ପରିଷଦ କାର୍ଯ୍ୟାଳୟକୁ ଆସିବାକୁ ପଡିବ।
ଦୁବାଇ ପୋଲିସ ରୁଜୁ କରିପାରେ ଟ୍ରଫି ଚୋରି ମାମଲା!, ଜେଲ ଯାଇପାରନ୍ତି ନକଭି
ନନ୍ଦିଘୋଷ ବ୍ୟୁରୋ : ନିକଟରେ ସରିଛି ଏସିଆ କପ୍ । ପାକିସ୍ତାନକୁ ହରାଇ ଭାରତ ଚାମ୍ପିୟନ ହୋଇଛି । ତେବେ ବିନା ଟ୍ରଫିରେ ସେଲିବ୍ରେସନ କରିଥିଲା ଭାରତ । ଭାରତ ଏସିସି ମୁଖ୍ୟ ରହିଥିବା ନକଭିଙ୍କ ହାତରୁ ଟ୍ରଫି ନେବାକୁ ସିଧା ସିଧା ମନା କରି ଦେଇଥିଲା । ମାତ୍ର ଶେଷ ସମୟରେ ମେଡାଲ ଏବଂ ଟ୍ରଫି ଧରି ପଳାଇଥିଲେ ନକଭି । ଯାହାକୁ ନେଇ ବିଦାଦ ଲାଗି ରହିଛି । ଭାରତ ଟାଇଟଲ ଜିତିବାର ୭୨ ଘଣ୍ଟା ପୂରି ସାରିଛି । ମାତ୍ର ଏଯାବତ ଟ୍ରଫି ହସ୍ତାନ୍ତର କରି ନାହାଁନ୍ତି ନକଭି । କିମ୍ବା ଏସୀୟ କ୍ରିକେଟ ପରିଷଦକୁ ମଧ୍ୟ ପଠାଇ ନାହାନ୍ତି । ନିଜ ଜିଦରେ ଅଟଳ ରହିଥିବା ନକଭିଙ୍କୁ ନେଇ ଏବେ କଠୋର ହେବାକୁ ଯାଉଛି ବିସିସିଆଇ ।
ଟ୍ରଫି ଚୋରି କରିବା ଏବଂ ବଳପୂର୍ବକ ଟ୍ରଫି ହାତେଇବା ମାମଲାରେ ଦୁବାଇ ପୋଲିସ ନିକଟରେ ଅଭିଯୋଗ କରିବା ଲାଗି ଯୋଜନା କରୁଥିବା ଏକ ବିଶେଷ ସୂତ୍ରରୁ ଜଣା ପଡ଼ିଛି । ୭୨ ଘଣ୍ଟା ମଧ୍ୟରେ ଯଦି ଟ୍ରଫି ନଫେରାନ୍ତି ତାହେଲେ ଆଇନ ହିସାବରେ କାର୍ଯ୍ୟାନୁଷ୍ଠାନ ନିଆଯିବାକୁ କୁହାଯାଇଛି । ଯଦି ଏଭଳି କରାଯାଏ ତାହେଲେ ନକଭିଙ୍କୁ ଜେଲ ଯିବାକୁ ପଡ଼ିପାରେ । ଦୁବାଇରେ ଅପରାଧ କମ ରହିଥାଏ । କାରଣ ଏଠାରେ ଦଣ୍ଡବିଧାନ କଠୋର ହୋଇଥାଏ । ତେବେ ଯଦି ନକଭିଙ୍କ ବିରୋଧରେ ମାମଲା ରୁଜୁ ହୁଏ ତାହେଲେ ଅତି କମରେ ତାଙ୍କୁ ୫ ବର୍ଷ ଜେଲ ହୋଇପାରେ ।
ଏସଆଇ ପରୀକ୍ଷା ବିଭ୍ରାଟ, ଗର୍ଜିଲା ବିଜେଡି
ନନ୍ଦିଘୋଷ ବ୍ୟୁରୋ: ୧୬ ମାସରେ ୧୬ଟି ନିଯୁକ୍ତି ପରୀକ୍ଷାରେ ବିଭ୍ରାଟ ହେଲାଣି । ଗତକାଲି ବାତିଲ ପୋଲିସ ସବ ଇନିସପେକ୍ଟର ପରୀକ୍ଷାରେ କୋଟି କୋଟିର ଡିଲ ହୋଇଛି । କଥାକୁ ଚାପି ଦେବାକୁ ବସିଥିବାବେଳେ ସାମ୍ନାକୁ ଆସିଯିବାରୁ ସରକାର ଗୁଣିଆ ହୋଇ ଡାଆଣୀ ଛଡାଇବା କାମ କରୁଛନ୍ତି । ଏହି ଆନ୍ତଃରାଜ୍ୟ ରାକେଟରେ ବହୁ ବଡ଼ ପଣ୍ଡା ସାମିଲ ଅଛନ୍ତି । ସେମାନଙ୍କୁ ଘୋଡାଇବା ପାଇଁ ସରକାର କ୍ରାଇମବ୍ରାଞ୍ଚ ତଦନ୍ତ ନିର୍ଦ୍ଦେଶ ଦେଇଛନ୍ତି । ନିଜେ ସରକାର ଏଥିରେ ସାମିଲ ଥାଇ କିପରି କ୍ରାଇମବ୍ରାଞ୍ଚ ତଦନ୍ତରୁ ଫଳ ବାହାରିବ ବୋଲି ପ୍ରଶ୍ନ କରିଛି ବିଜୁ ଯୁବ ଜନତା ଦଳ । ବିଜୁ ଯୁବ ଜନତା ଦଳର ସଭାପତି ଚିନ୍ମୟ ସାହୁ ଏହାର ପ୍ରତିବାଦ କରି ସିବିଆଇ ତଦନ୍ତ ଦାବି କରିଛନ୍ତି । ଯେ ପର୍ଯ୍ୟନ୍ତ ଏଥିରେ ସାମିଲ ବଡ଼ ପଣ୍ଡା ମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନହେଲା ପର୍ଯ୍ୟନ୍ତ ବିଜେଡି ଚୁପ ବସିବନି । ସିବିଆଇ ତଦନ୍ତ ନିର୍ଦ୍ଦେଶ ନଦେଲେ ପୂଜା ପରେ ରାଜରାସ୍ତାକୁ ଓହ୍ଲାଇ ଜୋରଦାର ପ୍ରତିବାଦ ଓ ଆନ୍ଦୋଳନ କରିବ ବୋଲି ଚିନ୍ମୟ ଚେତାବନୀ ଦେଇଛନ୍ତି । ଓଡ଼ିଶାରେ ବିଜେପି ସରକାର ଆସିବା ପରେ ନୂଆ ସ୍ଲୋଗାନ ଆସିଛି ଟଙ୍କା ଦିଅ ଚାକିରି ନିଅ । ଟଙ୍କା ନେଇ ବିଜେପି ନେତା ଚାକିରି ବିକୁଛନ୍ତି । ଏହାଦ୍ବାରା ମେଧାବୀଙ୍କ ମାନସିକ ସ୍ଥିତି କଣ ଥିବ ବୋଲି ସେ ପ୍ରଶ୍ନ କରିଛନ୍ତି । କିପରି ଏକ କଳା ତାଲିକା ଭୁକ୍ତ ସଂସ୍ଥାକୁ ନିଯୁକ୍ତି ଲାଗି ଆଉଟସୋର୍ସିଂ କଲେ ବୋଲି ମଧ୍ୟ ସେ ପ୍ରଶ୍ନ କରିଛନ୍ତି ।
ଏସଆଇ ପରୀକ୍ଷାରେ ଜାଲିଆତି ମାମଲା : ତଦନ୍ତ କରିବ କ୍ରାଇମବ୍ରାଞ୍ଚ
ନନ୍ଦିଘୋଷ ବ୍ୟୁରୋ: ଏସଆଇ ପରୀକ୍ଷାରେ ଜାଲିଆତି ମାମଲାରେ ତନାଘନା। ମାମଲାର ତଦନ୍ତ କରିବ କ୍ରାଇମବ୍ରାଞ୍ଚ। ୧୧୭ ଜଣଙ୍କୁ ଗିରଫ କରାଯାଇଛି ବ୍ରହ୍ମପୁର ପୋଲିସ। ଗିରଫଙ୍କ ମଧ୍ୟରେ ୧୧୪ ଜଣ ପରୀକ୍ଷାର୍ଥୀ ଥିବା ବେଳେ, ୩ ଜଣ ଦଲାଲ ଅଛନ୍ତି। କୋଟି କୋଟି ଟଙ୍କାର ହୋଇଥିଲା ଡିଲ। ଆହୁରି ଅନେକ ଦଲାଲଙ୍କ ସମ୍ପୃକ୍ତି ଜଣାପଡ଼ିଛି। ପ୍ରତି ପ୍ରାର୍ଥୀଙ୍କ ଠାରୁ ୨୦ ରୁ ୨୫ ଲକ୍ଷ ଟଙ୍କାର ଡିଲ ହୋଇଥିବା ପ୍ରାଥମିକ ତଦନ୍ତରୁ ସ୍ପଷ୍ଟ ହୋଇଛି। ଏନେଇ କ୍ରାଇମବ୍ରାଞ୍ଚ ମୁଖ୍ୟାଳୟ ସୂତ୍ରରୁ ସୂଚନା ମିଳିଛି। ସୂଚନା ଅନୁସାରେ, ୧୧୪ ଜଣ ପ୍ରାର୍ଥୀ ବରମୁଣ୍ଡାରୁ ୩ଟି ବସରେ ଚଢ଼ିଥିଲେ। ୩ ଜଣ ଦଲାଲଙ୍କ ଦ୍ବାରା ବିଜୟନଗରମର ଏକ ଅଜ୍ଞାତ ସ୍ଥାନକୁ ଯାତ୍ରା କରୁଥିଲେ। ଗିରଫ ୩ ଜଣ ଦଲାଣ ଅନ୍ୟ ଏଜେଣ୍ଟଙ୍କ ପାଇଁ କାମ କରୁଥିଲେ। ସମସ୍ତେ ସବ ଇନ୍ସପେକ୍ଟର ପରୀକ୍ଷାକୁ ଭଣ୍ଡୁର କରିବା ପାଇଁ ସଙ୍ଗଠିତ ଅପରାଧରେ ଲିପ୍ତ ଅଛନ୍ତି। ଗତକାଲି ବ୍ରହ୍ମପୁର ପୋଲିସ ଶତାଧିକ ପରୀକ୍ଷାର୍ଥୀଙ୍କୁ ଅଟକ ରଖିଥିଲା।
ଆନ୍ଧ୍ର ପ୍ରଦେଶ ଶ୍ରୀକାକୁଲମରୁ ସମସ୍ତଙ୍କୁ ଧରିଥିଲା ପୋଲିସ। ବିଜୟନଗରମରେ ଗୋପନୀୟ ପ୍ରଶ୍ନପତ୍ର ପାଇବା ଏବଂ ତା’ପରେ ଭୁବନେଶ୍ୱର ଫେରି ପରୀକ୍ଷା ଦେବା ସେମାନଙ୍କର ଯୋଜନା ଥିଲା। ଏଥିପାଇଁ ପ୍ରାର୍ଥୀଙ୍କ ପିଛା ୨୫ ଲକ୍ଷ ଟଙ୍କାର ଡିଲ ହୋଇଥିଲା। ପ୍ରାଥମିକ ପର୍ଯ୍ୟାୟରେ ୧୦ ଲକ୍ଷ ଏବଂ ଚାକିରି ନିଶ୍ଚିତ ହେବା ପରେ ୧୫ ଲକ୍ଷ ଦେବାକୁ ରାଜି ହୋଇଥିଲେ। ଏହି ରାକେଯରେ ଆହୁରି ଅନେକ ଦଲାଲ ସାମିଲ ଥିବା ତଦନ୍ତରୁ ଜଣାପଡିଛି। ଘଟଣାରେ ଗୋଳନ୍ଥରା ଥାନାରେ ମାମଲା ରୁଜୁ ହୋଇଛି। ବିଏନଏସର ଧାରା ୩୧୯(୨), ୩୧୮(୪), ୩୩୮, ୩୩୬(୩), ୩୪୦(୨), ୧୧୧, ୬୧(୨), ୩(୫), ୧୧(୧) ଓ ୧୨(୧) ଧାରାରେ ମାମଲା ରୁଜୁ ହୋଇଛି। ସମସ୍ତ ୧୧୭ ଜଣଙ୍କୁ ଗିରଫ କରାଯାଇଛି। ଅନ୍ୟ ଅଭିଯୁକ୍ତ ଗିରଫ କରିବା ପାଇଁ ତଦନ୍ତ ଜାରି ରଖିଛି ପୋଲିସ। ଜାଲିଆତି ଖବର ଜଣାପଡ଼ିବା ପରେ ଆସନ୍ତା ୫ ଓ ୬ ତାରିଖରେ ହେବାକୁ ଥିବା ପରୀକ୍ଷାକୁ ସ୍ଥଗିତ ରଖିଛି ଓଡ଼ିଶା ପୋଲିସ ରିକ୍ରୁଟମେଣ୍ଟ ବୋର୍ଡ।