କଣାସ: ନଦୀ ଜଳରେ ଭାସୁଛି ମଲା ମାଛ। ପୁରୀ କଣାସ ବ୍ଲକ୍ ରାଜୁଆ ନଦୀ ଜଳ ଏବେ ବିଷାକ୍ତ ହେବା ଯୋଗୁଁ ମଲା ମାଛ ଭାସୁଥିବା ଦେଖିବାକୁ ମିଳୁଛି। ଯାହା ଫଳରେ ନଦୀ ଜଳ ଅଧିକ ଦୂଷିତ ହେବାରେ ଲାଗିଛି।
ଭୁବନେଶ୍ୱର କଟକରୁ ଡ୍ରେନରେ ଆସୁଥିବା ଅଳିଆ ଆବର୍ଜ୍ଜନା, ବର୍ଜ୍ୟବସ୍ତୁ ଗଙ୍ଗୁଆ ନାଳ ଦେଇ ସିଧାସଳଖ ଦୟା ନଦୀରେ ମିଶିଥାଏ। ଏହାର ଶାଖା ନଦୀ ରାଜୁଆ, ମଲାଗୁଣୀ , ମକରା ଆଦି ବିଭିନ୍ନ ନଦୀର ଜଳ ଦୂଷିତ ହେବା ସହ ବିଷାକ୍ତ ହେବାରେ ଲାଗିଛି । କଣାସ ବ୍ଲକର ପ୍ରାୟ ସମସ୍ତ ପଞ୍ଚାୟତର ଲୋକେ ଏହି ସବୁ ନଦୀ ଉପରେ ନିର୍ଭର କରି ଚଳୁଥିବା ବେଳେ ନଦୀର ବିଷାକ୍ତ ଜଳ ପାଇଁ ମାଛ ସହିତ ଅନେକ ଜଳଚର ମରି ଭାସୁଛନ୍ତି।
ଭୁବନେଶ୍ବର: ବିଶ୍ବ ପାଣିପାଗ ପାଇଁ ଖୁସି ଖବର। ଜୁଲାଇ ଦ୍ବିତୀୟ ସପ୍ତାହରେ ଆକ୍ଟିଭ ହେବ ଲାନିନା। ବଦଳିଯିବ ପାଣିପାଗର ମିଜାଜ। ସବୁ କ୍ଷେତ୍ରରେ ଅନୁକୂଳ ହେବ ବାତାବରଣ। ଓଡିଶା ଉପରେ ବି ପଡିବ ସାକାରାତ୍ମକ ପ୍ରଭାବ। ଆଉ ଆଗଭଳି ସନ୍ତୁଳନ ହରାଇବନି ପାଗ। ମୌସୁମୀ ବର୍ଷା ସହ ଶୀତ ଏବଂ ଖରାର ପ୍ରଭାବ ମଧ୍ୟ ସ୍ବାଭାବିକ ହେବ। ଏନେଇ ଆକଳନ କରିଛନ୍ତି ଅନ୍ତର୍ଜାତୀୟ ପାଣିପାଗ ବିଜ୍ଞାନୀ ଜାସନ ନିକୋଲ୍ସ।
ଗତ ବର୍ଷ ରହିଥିଲା ଏଲନିନୋର ପ୍ରଭାବ। ବିଗିଡି ଯାଇଥିଲା ପାଣିପାଗର ମିଜାଜ୍। ପ୍ରଭାବିତ ହୋଇଥିଲା ଖରା, ବର୍ଷା ଓ ଶୀତର ପ୍ରଭାବ। ଅନ୍ୟପଟେ ଆସନ୍ତାକାଲି ବଙ୍ଗୋପସାଗରରେ ସୃଷ୍ଟି ହେବ ଘୂର୍ଣ୍ଣିବଳୟ। ଏନେଇ ସୂଚନା ଦେଇଛି ଆଞ୍ଚଳିକ ପାଣିପାଗ କେନ୍ଦ୍ର । ପ୍ରଭାବରେ କାଲିଠୁ ବର୍ଷାର ପରିମାଣ ବୃଦ୍ଧି ପାଇବ । କିଛି ସ୍ଥାନରେ ପ୍ରବଳ ବର୍ଷା ନେଇ ଆଲର୍ଟ ଜାରି କରାଯାଇଛି । କାଲି ପାଇଁ ୯ ଜିଲ୍ଲା ଖୋର୍ଦ୍ଧା, ନୟାଗଡ଼, ବୌଦ୍ଧ, କନ୍ଧମାଳ, କଳାହାଣ୍ଡି, ରାୟଗଡା, ଗଞ୍ଜାମ, ଝାରସୁଗୁଡା ଓ ସୁନ୍ଦରଗଡକୁ ୟେଲୋ ଆଲର୍ଟ ଜାରି କରାଯାଇଛି । ସେହିପରି ୨୭ ତାରିଖରେ ପ୍ରବଳ ବର୍ଷା ନେଇ ୮ ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି ।
ଭୁବନେଶ୍ବର: ସରକାରୀ ବାସଭବନ ଭଙ୍ଗା ପ୍ରସଙ୍ଗରେ ପ୍ରତିକ୍ରିୟା ରଖିଲେ ବିଜେଡି ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ । କହିଲେ ବିଭ୍ରାନ୍ତିକର ଖବର ପ୍ରସାରଣ କରୁଛନ୍ତି କିଛି ଗଣମାଧ୍ୟମ । ବଙ୍କର କରାଯାଇଥିବା ନେଇ ଖବର ପ୍ରକାଶ ପାଉଛି । ଯାହା ସଂପୂର୍ଣ୍ଣ ଭାବେ ମିଥ୍ୟା ବୋଲି କହିଛନ୍ତି ପ୍ରଣବ।
ସେହିଭଳି କିଛି ଗଣମାଧ୍ୟମକୁ ସଦବୁଦ୍ଧି ମିଳୁ। ‘ମୋତେ କ୍ବାର୍ଟର ଛାଡ଼ିବା ପାଇଁ ୪ ତାରିଖ ପର୍ଯ୍ୟନ୍ତ ସମୟ ଦିଆଯାଇଛି ଓ ୧୫ ତାରିଖ ଯାଏଁ ହାତରେ ସମୟ ଅଛି । ସରକାରୀ କ୍ବାର୍ଟର ଯେଉଁଭଳି ନିଆଯାଇଥାଏ ସେଭଳି ଫେରାଯାଏ । ମୁଁ କିଛି ଅସ୍ଥାୟୀ ନିର୍ମାଣ କରିଥିଲି, ଲୋକଙ୍କ ଅଭିଯୋଗ ଶୁଣାଣି ଓ ସୁବିଧା ପାଇଁ ।’ ସେଗୁଡିକୁ ଭାଙ୍ଗିବାରେ କିଛି ଅସୁବିଧା ନାହିଁ ବୋଲି କହିଛନ୍ତି ପ୍ରଣବ ପ୍ରକାଶ ଦାସ ।
ରାୟପୁର: ଯବାନଙ୍କ ଗୁଳିରେ ମାଓବାଦୀ ମୃତ। ଅସ୍ତ୍ରଶସ୍ତ୍ର ସହିତ ବହୁ ପରିମାଣର ନକ୍ସଲ ବ୍ୟବହୃତ ସାମଗ୍ରୀ ଉଦ୍ଧାର। ଛତିଶଗଡର ଧମତରୀରେ ଯବାନଙ୍କ ଏନକାଉଣ୍ଟରରେ ଜଣେ ନକ୍ସଲଙ୍କର ମୃତ୍ଯୁ ହୋଇଛି। ଯବାନ ମାନେ ସେହି ସ୍ଥାନରୁ ଜଣେ ଅଜ୍ଞାତ ନକ୍ସଲଙ୍କ ମୃତଦେହ ଉଦ୍ଧାର କରିଛନ୍ତି। ଉଦ୍ଧାର ନକ୍ସଲ ହେଲେ ଅରୁଣ କୁମାର ମାଣ୍ଡାଭି। ସେ ସୀତାନଦୀ ଏରିଆ କମିଟିର କମାଣ୍ଡର ବୋଲି ଜଣାପଡିଛି।
ଘଟଣାସ୍ଥଳରୁ ଗୋଟିଏ SLR ବନ୍ଧୁକ ସହ ଅସ୍ତ୍ରଶସ୍ତ୍ର ଓ ମାଓ ସାମଗ୍ରୀ ଜବତ ହୋଇଛି। ଘଟଣାସ୍ଥଳରେ ଅନେକ ନକ୍ସଲଙ୍କ ଆହତ ହେବାର ସମ୍ଭାବନା ରହିଛି । ଧମତରୀ ଏସପି ଅଞ୍ଜାନେ ଭାଶନି ଏକ ସାମ୍ବାଦିକ ସମ୍ମିଳନୀରେ ଏନେଇ ସୂଚନା ଦେଇଛନ୍ତି।
ସେଣ୍ଟ ଲୁସିଆ: ଅଷ୍ଟ୍ରେଲିଆ ଉପରେ ଦିନିକିଆ ବିଶ୍ବକପ ଓ ଟେଷ୍ଟ ଚାମ୍ପିଅନସିପ ଫାଇନାଲ ପରାଜୟର ପ୍ରତିଶୋଧ ନେଇ ଟି-ଟ୍ବେଣ୍ଟି ବିଶ୍ବକପର ସେମିଫାଇନାଲରେ ପ୍ରବେଶ କରିଛି ଭାରତ। ସୁପର ଏଇଟ ମୁକାବିଲାରେ ଅଷ୍ଟ୍ରେଲିଆକୁ ୨୪ ରନରେ ପରାସ୍ତ କରିଛି ଟିମ୍ ଇଣ୍ଡିଆ। ରୋହିତ ଶର୍ମାଙ୍କ ଧୂଆଁଦାର ବ୍ୟାଟିଂ ପରେ ବୋଲରଙ୍କ ଜବରଦସ୍ତ ବୋଲିଂ ବଳରେ ବିଜୟୀ ହୋଇଛି ମେନ୍ ଇନ୍ ବ୍ଲୁ।
ପ୍ରଥମେ ବ୍ୟାଟିଂ କରିଥିବା ଭାରତ ନିର୍ଦ୍ଧାରିତ ଓଭରରେ ୫ ଓ୍ବିକେଟ ହରାଇ ୨୦୬ ରନ କରିଥିଲା। ଦଳ ପକ୍ଷରୁ ରୋହିତ ଶର୍ମା ଜବରଦସ୍ତ ବ୍ୟାଟିଂ କରିଥିଲେ। ମ୍ୟାଚ ଆରମ୍ଭରୁ ନିଜର ବ୍ୟାଟିଂର କମାଲ ଦେଖାଇଥିଲେ ରୋହିତ। ରୋହିତ ୪୧ ବଲରୁ ୯୨ ରନ ସଂଗ୍ରହ କରିଥିଲେ। ସେହିପରି ସୂର୍ଯ୍ୟକୁମାର ଯାଦବ ୩୧, ଶିବମ ଦୁବେ ୨୮, ହାର୍ଦ୍ଦିକ ପାଣ୍ଡ୍ୟା ୨୭ ରନ କରିଥିଲେ। ଜବାବରେ ୨୦୬ ରନର ବିଜୟ ଲକ୍ଷ୍ୟ ନେଇ ମଇଦାନକୁ ଓହ୍ଲାଇଥିଲା ଅଷ୍ଟ୍ରେଲିଆ।
୬ ରନରେ ଡେଭିଡ ଓ୍ବାର୍ଣ୍ଣର ଆଉଟ ହେବା ପରେ ଟ୍ରାଭିସ ହେଡ୍ ଓ ଅଧିନାୟକ ମିଚେଲ ମାର୍ସ ବ୍ୟାଟିଂ କରି ଦଳୀୟ ସ୍କୋରକୁ ଆଗକୁ ନେଇଥିଲେ। ଧମାକାଦାର ବ୍ୟାଟିଂ କରୁଥିବା ହେଡ୍ ୭୬ ରନରେ ଆଉଟ୍ ହୋଇଥିଲେ। ପରେ ପରେ ଅନ୍ୟ ବ୍ୟାଟସମ୍ୟାନ ବି ବଡ ରନ କରିପାରିନଥିଲେ। ଫଳରେ ଦଳ ୭ ଓ୍ବିକେଟ ହରାଇ ୧୮୧ ରନ କରିବାକୁ ସକ୍ଷମ ହୋଇଥିଲା। ଭାରତ ପକ୍ଷରୁ ଅର୍ଶଦୀପ ୩ ଓ୍ବିକେଟ ଅକ୍ତିଆର କରିଥିବା ବେଳେ, କୁଲଦୀପ ଯାଦବ ୨, ବୁମରା ଓ ଅକ୍ଷର ପଟେଲ ଗୋଟିଏ ଲେଖାଏଁ ଓ୍ବିକେଟ ହାସଲ କରିଥିଲେ।
କିଙ୍ଗସ୍ଟାଉନ: ଟି-ଟ୍ବେଣ୍ଟି ବିଶ୍ବକପ ସେମିଫାଇନାଲରେ ପହଞ୍ଚିଲା ଆଫଗାନିସ୍ତାନ। ବାଂଲାଦେଶକୁ ୮ ରନରେ ହରାଇ ସେମିରେ ପହଞ୍ଚିଛି ଆଫଗାନିସ୍ତାନ। ଆଫଗାନିସ୍ତାନର ବିଜୟ ପରେ ଧୂଳିସାତ ହୋଇଛି ଅଷ୍ଟ୍ରେଲିଆର ସେମି ସ୍ବପ୍ନ। ସେମିଫାଇନାଲରେ ଦକ୍ଷିଣ ଆଫ୍ରିକା ସହ ଆଫଗାନିସ୍ତାନର ହେବ ମୁକାବିଲା। ୨୭ ତାରିଖରେ ଦକ୍ଷିଣ ଆଫ୍ରିକା ସହ ଆଫଗାନିସ୍ତାନର ହେବ ଟକ୍କର।
ଆଜି ପ୍ରଥମେ ବ୍ୟାଟିଂ କରି ୧୧୫ ରନ କରିଥିଲା ଆଫଗାନିସ୍ତାନ। ଦଳ ପକ୍ଷରୁ ଗୁରବାଜ ୪୩ ରନ କରିଥିଲେ। ଜବାବରେ ୧୧୬ ରନର ବିଜୟ ଲକ୍ଷ୍ୟ ନେଇ ମଇଦାନକୁ ଓହ୍ଲାଇଥିଲା ବାଂଲାଦେଶ। ଲୋ ସ୍କୋରିଂ ମ୍ୟାଚରେ ହୋଇଥିଲା କଡ଼ା ମୁକାବିଲା। ବାଂଲାଦେଶର ଗୋଟିଏ ପରେ ଗୋଟିଏ ଓ୍ବିକେଟର ପତନ ହେଉଥିବା ବେଳେ, ଲିଟନ ଦାସ ଖେଳିଥିଲେ ଅର୍ଦ୍ଧଶତକୀୟ ଇନିଂସ। ବର୍ଷା ଯୋଗୁ ମ୍ୟାଚ ବାଧାପ୍ରାପ୍ତ ହୋଇଥିଲା।
ତେବେ ଡିଏଲଏସ ନିୟମ ଅନୁସାରେ ୧୯ ଓଭରରେ ୧୧୪ ରନର ଟାର୍ଗେଟ୍ ବାଂଲାଦୋକୁ ଦିଆଇଥିଲା। ହେଲେ ଆଫଗାନିସ୍ତାନ ବୋଲରଙ୍କ ଦମଦାର ବୋଲିଂରେ ଧରାଶାୟୀ ହୋଇଥିଲା ବାଂଲାଦେଶ। ଶେଷରେ ୧୦୫ ରନରେ ସମସ୍ତ ଓ୍ବିକେଟ ହରାଇ ପରାଜିତ ହୋଇଥିଲା ବାଂଲାଦେଶ। ଟ୍ବି-ଟ୍ବେଣ୍ଟି ବିଶ୍ବକପରେ ଆଫଗାନିସ୍ତାନ ପହଞ୍ଚିବା ପରେ ଅଷ୍ଟ୍ରେଲିଆ ବିଶ୍ବକପ ରେସରୁ ବିଦା ହୋଇଛି। ଗତକାଲି ଭାରତ ଠାରୁ ହାରିଥିଲା ଅଷ୍ଟ୍ରେଲିଆ।
ମୁମ୍ବାଇ: ଅନନ୍ତ ଅମ୍ବାନୀ ଓ ରାଧିକା ମର୍ଚାଣ୍ଟଙ୍କ ବିବାହ କାର୍ଡ ନେଇ କାଶୀ ବିଶ୍ବନାଥରେ ପହଞ୍ଚିଲେ ନୀତା ଅମ୍ବାନୀ । ପୁଅର ବିବାହ ପାଇଁ କାଶୀ ବିଶ୍ବନାଥଙ୍କୁ ନିମନ୍ତ୍ରଣ କରିବା ପାଇଁ ପହଞ୍ଚିଛନ୍ତି ନୀତା । ବାରଣାସୀରେ ପହଞ୍ଚି ପ୍ରଭୁଙ୍କ ଆଶୀର୍ବାଦ କାମନା କରିଛନ୍ତି ନୀତା । ପରିବାରର ମଙ୍ଗଳ ମନାସି ବାବାଙ୍କୁ ପ୍ରାର୍ଥନା କରିଛନ୍ତି ରିଲାଏନ୍ସ ଫାଉଣ୍ଡେସନର ଚେୟାରମ୍ୟାନ ନୀତା ।
୧୦ ବର୍ଷ ପରେ ବାରଣାସୀର କାଶୀ ବିଶ୍ବନାଥ ଆସିଥିବା କହିଛନ୍ତି ନୀତା । ୧୦ ବର୍ଷ ପରେ କାଶୀ ବିଶ୍ବନାଥରେ ହୋଇଥିବା ବିକାଶକୁ ସେ ପ୍ରଶଂସା କରିଛନ୍ତି । ସେହିପରି ସ୍ବଚ୍ଛତା ସାଙ୍ଗକୁ ସୌର ଶକ୍ତିର ବି ସେ ପ୍ରଶଂସା କରିଛନ୍ତି ।
ଆସନ୍ତା ଜୁଲାଇ ୧୨ରେ ରିଲାଏନ୍ସ ଇଣ୍ଡଷ୍ଟ୍ରିର ପ୍ରତିଷ୍ଠାତା ମୁକେଶ ଅମ୍ବାନୀଙ୍କ ସାନ ପୁଅ ଅନନ୍ତ ଅମ୍ବାନୀଙ୍କ ସହ ଶିଳ୍ପପତି ବୀରେନ ମର୍ଚାଣ୍ଟଙ୍କ ଝିଅ ରାଧିକାଙ୍କ ବିବାହ ହେବ ।
ନୂଆଦିଲ୍ଲୀ: ପ୍ରେମ ନଗର ଅଞ୍ଚଳରେ ନିଆଁ ଲାଗି ପରିବାରର ୪ ଜଣ ସଦସ୍ୟଙ୍କ ମୃତ୍ୟୁ । ମୃତକଙ୍କ ମଧ୍ୟରେ ପତି ପତ୍ନୀ ଓ ଦୁଇ ପୁଅ ଅଛନ୍ତି । ବିଳମ୍ବିତ ରାତି ସାଢେ ୩ଟାରେ ଘରେ ନିଆଁ ଲାଗିଯାଇଥିଲା । ଖବର ପାଇ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚିଥିଲା । ଦୁଇଟି ଦମକଳ ଅକ୍ଲାନ୍ତ ପରିଶ୍ରମ ପରେ ନିଆଁକୁ କାବୁ କରିଥିଲା ।
ମୃତକଙ୍କ ମଧ୍ୟରେ ହୀରା ସିଂ, ପତ୍ନୀ ନିତୁ ସିଂ, ଦୁଇ ପୁଅ ରବିନ (୨୨) ଓ ଲକ୍ଷ୍ୟ (୨୧) ସାମିଲ ଅଛନ୍ତି । ଏହି ଅଗ୍ନିକାଣ୍ଡରେ ସମସ୍ତଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା । କିନ୍ତୁ ଡାକ୍ତର ସେଠାରେ ସମସ୍ତଙ୍କୁ ମୃତ ଘୋଷଣା କରିଥିଲେ । ଅଣନିଶ୍ବାସୀ ହୋଇ ସମସ୍ତେ ପ୍ରାଣ ହରାଇଥିବା ଡାକ୍ତର କହିଛନ୍ତି । ଇନଭର୍ଟରରୁ ସର୍ଟସର୍କିଟ ହୋଇ ନିଆଁ ଲାଗିଥିବା ପ୍ରାଥମିକ ତଦନ୍ତରୁ ଜଣାପଡିଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି ।
ଅଗ୍ନିକାଣ୍ଡ ଏତେ ଭୟଙ୍କର ଥିଲା ଯେ ସମଗ୍ର ଅଞ୍ଚଳ ଧୂଆଁମୟ ହୋଇଯାଇଥିଲା । ପଡୋଶୀଙ୍କ କହିବା କଥା ଇନଭର୍ଟରରୁ ସର୍ଟସର୍କିଟ ହୋଇଛି । ଯେଉଁ ସ୍ଥାନରେ ଇନଭର୍ଟର ଥିଲା ସେଠାରେ ସୋଫା ରଖାଯାଇଥିଲା । ଇନଭର୍ଟରରୁ ନିଆଁ ବ୍ୟାପୀ ସୋଫା ଜଳିଯାଇଥିଲା । ସୋଫା କଭରରେ ନିଆଁ ଲାଗିବା ପରେ ସମଗ୍ର ଘର ଧୂଆଁମୟ ହୋଇଯାଇଥିଲା ।
ଜବଲପୁର: ମେହେନ୍ଦୀରେ ତିରୁପତି ବାଲାଜୀଙ୍କ ଚିତ୍ର ଆଙ୍କି ଗିନିଜ ବୁକ ରେକର୍ଡ କଲେ ମଧ୍ୟପ୍ରଦେଶ ଜବଲପୁରର ଦୀକ୍ଷା ଗୁପ୍ତା । ୯ ଫୁଟ ଉଚ୍ଚତା ବିଶିଷ୍ଟ ମେହେନ୍ଦୀ ପେଣ୍ଟିଂ ବି୍ଶ୍ବର ଉଚ୍ଚତମ ଚିତ୍ରକଳା ଭାବେ ରେକର୍ଡ କରିଛି । ଦୀକ୍ଷାଙ୍କ ଏହି ଉପଲବ୍ଧିକୁ ନେଇ ଖିୁସି ପ୍ରକାଶ କରିଛି ପରିବାର ।
ପ୍ରତିଦିନ ଘରେ ବସି ପେଣ୍ଟିଂ କରୁଥିଲେ ଦୀକ୍ଷା । ଏଥିପାଇଁ ଦିନକୁ ସେ ୫ରୁ ୬ ଘଣ୍ଟା ସମୟ ଦେଉଥିଲେ । ମାତ୍ର ୩ ମାସ ମଧ୍ୟରେ ଦୀକ୍ଷାଙ୍କ ପେଣ୍ଟିଂ ସମ୍ପୂର୍ଣ୍ଣ ଭାବେପ୍ରସ୍ତୁତ ହୋଇଥିଲା । ଏହି ସୂକ୍ଷ୍ମ କାରୁକାର୍ଯ୍ୟ ପାଇଁ ଦୀକ୍ଷା ୨ କିଲୋଗ୍ରାମ ମେହେନ୍ଦୀର ବ୍ୟବହାର କରିଥିଲେ ।
ସେ ୧୨ଟି ସିଟ୍କୁ ଯୋଡି ସେଥିରେ ମେହେନ୍ଦୀରେ ଚିତ୍ର ଆଙ୍କିଥିଲେ । ଗିନିଜ ବୁକ୍ରେ ତାଙ୍କ କଳାକୃତି ସବମିଟ୍ କରିବାର ବର୍ଷକ ପରେ ଦୀକ୍ଷାଙ୍କୁ ଏହି ସମ୍ମାନ ମିଳିଥିଲା ।
ପୁରୀ: ଆଜି ବସିବ ଶ୍ରୀମନ୍ଦିର ପରିଚାଳନା କମିଟି ବୈଠକ । ଛତିଶା ନିଯୋଗ ବୈଠକରେ ରଥଯାତ୍ରା ଠାରୁ ନୀଳାଦ୍ରି ବିଜେ ପର୍ଯ୍ୟନ୍ତ ହେବାକୁ ଥିବା ନୀତି ନିର୍ଘଣ୍ଟ କରାଯାଇଛି l ଆଜି ପରିଚାଳନା କମିଟି ବୈଠକରେ ଏହାକୁ ଉପସ୍ଥାପନ କରାଯିବ । ନୀଳାଦ୍ରି ଭକ୍ତ ନିବାସରେ ଦିନ ୧୧ ଟାରେ ଗଜପତି ମହାରାଜାଙ୍କ ଅଧ୍ଯକ୍ଷତାରେ ବସିବାକୁ ଥିବା ବୈଠକରେ ଶ୍ରୀମନ୍ଦିର ମୁଖ୍ୟ ପ୍ରଶାସକ, ଜିଲ୍ଲାପାଳ, ଏସପି ଓ ଶ୍ରୀମନ୍ଦିର ପରିଚାଳନା କମିଟିର ସେବାୟତ ପ୍ରତିନିଧି ଏବଂ ଅନ୍ୟ ସଦସ୍ୟ ଉପସ୍ଥିତ ରହିବେ l
ନୀତି ନିର୍ଘଣ୍ଟ ଅନୁସାରେ ଜୁଲାଇ ୬ ତାରିଖ ଦିନ ପଟି ଦିଅଁଙ୍କ ଠାରୁ ରଥ ଖଳାକୁ ଆଜ୍ଞାମାଳ ବିଜେ କରାଯିବ l ୬ ତାରିଖରେ ଅପରାହ୍ନ ୫ଟାରେ ରଥ ଆଜ୍ଞାମାଳ ବିଜେ ହେବ । ୬ ତାରିଖରେ ରାତି ଦୁଇଟାରେ ମଙ୍ଗଳ ଆଳତି, ରାତି ୨ଟା ୩୦ରେ ଅବକାଶ ନୀତି, ୭ ତାରିଖ ଭୋର ୩ଟାରେ ତାଟି ଫିଟା ନୀତି, ୭ ତାରିଖ ଭୋର ୪ଟାରେ ନେତ୍ରୋତ୍ସବ ବନ୍ଦାପନା ଓ ରୋଷ ହୋମ, ୪ଟା ୪୫ ମିନିଟରେ ଯାତ୍ରାଙ୍ଗୀ ମହାସ୍ନାନ, ୫ଟା ୧୦ରେ ହେବ ସୂର୍ଯ୍ୟପୂଜା, ୫ଟା ୨୫ରେ ଦ୍ବାରପାଳ ପୂଜା । ଭୋର ୫ଟା ୪୫ରେ ସରିବ ବେଶ । ସକାଳ ୬ଟାରୁ ୭ଟା ଗୋପାଳବଲ୍ଲବ ଓ ସକାଳ ଧୂପ ହେବାକୁ ନୀତି ନିର୍ଘଣ୍ଟ ହୋଇଥିବାବେଳେ ୭ଟା ୩୦ରୁ ୧୨ଟା ୩୦ ସେନାପଟା ଲାଗି ହୋଇ ଦିନ ୧୧ଟାରେ ରଥ ପ୍ରତିଷ୍ଠା କରାଯିବ ।
ଦିନ ଗୋଟାଏରେ ମଙ୍ଗଳାର୍ପଣ ହୋଇ ଦିନ ଗୋଟାଏ ୧୦ରେ ଆରମ୍ଭ ହେବ ପହଣ୍ଡି । ଦିନ ୨ଟା ୩୦ରେ ପହଣ୍ଡି ଶେଷ ହେବ । ଅପରାହ୍ନ ୩ଟାରେ ମଦନମୋହନ, ଶ୍ରୀରାମ ଓ ଶ୍ରୀକୃଷ୍ଣଙ୍କ ବିଜେ କରିବେ । ଅପରାହ୍ନ ୪ଟାରେ ଛେରାପହଁରା ହୋଇ ୪ଟା ୩୦ରେ ଚାରଫିଟା ଓ ଘୋଡ଼ାସାରଥି ଲାଗି ହେବ । ଏହାପରେ ଅପରାହ୍ନ ୫ଟାରୁ ରଥଟଣା ଆରମ୍ଭ ହେବ । ଚଳିତବର୍ଷ ରଥଯାତ୍ରା ଦିନ ନବଯୌବନ ଦର୍ଶନ, ନେତ୍ର ଉତ୍ସବ ନୀତି ପଡୁଛି । ତେଣୁ ୧୯୭୧ ମସିହା ରଥଯାତ୍ରା ଦିନର ନୀତି ନିର୍ଘଣ୍ଟ ଅନୁଯାୟୀ ଚଳିତବର୍ଷ ନୀତି ସ୍ଥିରିକୃତ କରାଯାଇଛି । ଏନେଇ ଆଜି ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ଅଧ୍ୟକ୍ଷତାରେ ବୈଠକରେ ପୁଙ୍ଖାନୁପୁଙ୍ଖ ଆଲୋଚନା କରାଯାଇଛି ।
