ନନ୍ଦିଘୋଷ ବ୍ୟୁରୋ: ଜମିରୁ କାମ କରିବାକୁ ଯାଇଥିବାବେଳେ ଚାଲିଗଲା ଜୀବନ । ବଜ୍ରାଘାତରେ ଦୁଇଜଣଙ୍କ ମୃତ୍ଯୁ ଓ ଜଣେ ଗୁରୁତର । ଏପରି ଅଘଟଣ ଘଟିଛି ସୋର ରାଇପିତାମ୍ବର ଗାଁରେ । ମୃତକ ହେଲେ ବସନ୍ତ ଦାସ ଓ ନରେନ୍ଦ୍ର ବିଶ୍ୱାଳ । ଗୁରୁତର ଅବସ୍ଥାରେ ସୁରେନ୍ଦ୍ର ସାହୁଙ୍କୁ ସୋର ଚିକିତ୍ସାଳୟରେ ଭର୍ତ୍ତି କରାଯାଇଛି । ଆଜି ଅପରାହ୍ଣରେ ବିଲକୁ କାମ କରିବାକୁ ଯାଇଥିବାବେଳେ ହଠାତ୍ ବଜ୍ରପାତ ହୋଇଥିଲା । ଫଳରେ ବସନ୍ତ, ନରେନ୍ଦ୍ର ଓ ସୁରେନ୍ଦ୍ର ଜମିରେ ପଡ଼ିଯାଇଥିଲେ । ସମସ୍ତଙ୍କୁ ଉଦ୍ଧାର କରି ପରିବାର ଲୋକ ସୋର ଡାକ୍ତରଖାନାକୁ ନେଇଥିବାବେଳେ ସେଠାରେ ବସନ୍ତ ଓ ନରେନ୍ଦ୍ରଙ୍କୁ ମୃତ ଘୋଷଣା କରିଥିଲେ ଡାକ୍ତର ।
ଚିର ସନ୍ଧାନ ପକ୍ଷରୁ ସ୍ବଭାବକବି ଗଙ୍ଗାଧର ମେହେରଙ୍କ ୧୬୩ତମ ଜୟନ୍ତୀ ପାଳିତ
ନନ୍ଦିଘୋଷ ବ୍ୟୁରୋ: ସ୍ବଭାବ କବି ଗଙ୍ଗାଧର ମେହେରଙ୍କ ୧୬୩ତମ ଜୟନ୍ତୀ ପାଳିତ । ଭୁବନେଶ୍ବରସ୍ଥିତ ବୁଦ୍ଧ ମନ୍ଦିର ପରିସରରେ ଚିର ସନ୍ଧାନ ପକ୍ଷରୁ ଗଙ୍ଗାଧର ମେହେରଙ୍କ ଜୟନ୍ତୀ ଏକ ବର୍ଣ୍ଣାଢ଼୍ୟ ପରିବେଶରେ ଅନୁଷ୍ଠିତ ହୋଇଯାଇଛି। ଡ.ପାର୍ଥସାରଥୀ ଅଜୟ ବାରିକଙ୍କ ସଭାପତିତ୍ବରେ ବୈଠକ ଅନୁଷ୍ଠିତ ହୋଇଥିଲା । ଏହି ଅବସରରେ ରାଜସ୍ବ ଓ ବିପର୍ଯ୍ୟୟ ପ୍ରଶମନ ମନ୍ତ୍ରୀ ସୁରେଶ ପୂଜାରୀ ସଭାକୁ ଉଦଘାଟନ କରିଥିଲେ । ବୈଠକରେ ଅଡଶପୁର ମହାବିଦ୍ୟାଳୟର ଅଧ୍ୟାପିକା ଡ.କବିତା ମିଶ୍ର, ସମାଜସେବୀ ସତ୍ୟବ୍ରତ ମହାନ୍ତି, ନନ୍ଦିଘୋଷ ଟିଭିର ମୁଖ୍ୟ ସମ୍ପାଦକ ଶିଶିର ଭଟ୍ଟମିଶ୍ର ପ୍ରମୁଖ ଅତିଥୀଭାବେ ଯୋଗ ଦେଇଥିଲେ ।
ଆଜି ବି ରହିଛି ସର୍କସର କ୍ରେଜ୍, ଲାଗୁଛି ଲୋକଙ୍କ ଭିଡ଼
ନନ୍ଦିଘୋଷ ବ୍ୟୁରୋ: ସର୍କସ୍ ନାଁ ଶୁଣିଲେ ପିଲାଙ୍କ ମନରେ କୌତୁହଳ ସୃଷ୍ଟି ହୋଇଥାଏ । ବାଘ, ହାତୀ ଖେଳ ସାଙ୍ଗକୁ ଜୋକରଙ୍କ ମଜା ମଜା ଅଭିନୟ ସମସ୍ତଙ୍କୁ ଆନନ୍ଦ ଦେଇଥାଏ । ହେଲେ ସୁପ୍ରିମ୍ କୋର୍ଟଙ୍କର ନିର୍ଦ୍ଦେଶ ପରେ ସର୍କସରୁ ପଶୁ ପକ୍ଷୀଙ୍କୁ ବାଦ୍ ଦିଆଯାଇଛି । ତଥାପି ଆଜି ବି ରହିଛି ସର୍କସର କ୍ରେଜ୍ । ଦୀର୍ଘ ବର୍ଷ ପରେ ବାଲେଶ୍ବରରେ ରୋଲେକ୍ସ ସର୍କସ ଗ୍ୟାଲେରୀକୁ ଦେଖିଲେ ଏହି କଥାକୁ ବୁଝି ହେଉଛି ।
ଦିବ୍ୟାଙ୍ଗଙ୍କ ଦେହରେ ରଙ୍ଗ ବେରଙ୍ଗର ପୋଷାକ। ମଥାରେ ଲମ୍ବା ଟୋପି ସାଙ୍ଗକୁ ମୁହଁରେ ଚିତ୍ର ଦେଖି ମନ ଭରି ଯାଉଛି । ଆଉ ତା ସାଙ୍ଗକୁ ମଜା ମଜା ଖେଳ ଦେଖାଇ ଦର୍ଶକଙ୍କ ମନ ମୋହୁଛନ୍ତି ରୋଲେକ୍ସ ସର୍କସ୍ର ଜୋକର୍ ଅନିମେଶ ଓ ଦୀପକ । ତାଙ୍କ ସହିତ ମଣିପୁର ଯୁବତୀଙ୍କ ଜିମ୍ନାଷ୍ଟିକ୍ ଖେଳ ଦର୍ଶକଙ୍କୁ ଚକିତ କରିଦେଉଛି । ଦୁଇ ରଙ୍ଗର ପାଣି ଗୋଟିଏ ଥରରେ ପିଇଦେଇ ଅଲଗା ଅଲଗା ମଗ୍ରେ ଅଲଗା ଅଲଗା ରଙ୍ଗର ପାଣି ବାହାର କରିବା, ଗ୍ଲୋବ୍ ଭିତରେ ମୋଟରସାଇକେଲ ଚଳାଇବା, ଦୋଳି ଝୁଲଣାରେ ଖେଳ ଦର୍ଶକଙ୍କ ମନ ମୋହୁଛି। ସର୍କସ୍ରେ ପଶୁ, ପକ୍ଷୀ ନାହାନ୍ତି ସତ। ହେଲେ ରୋଲେକ୍ସ ସର୍କସ୍ର ଗ୍ୟାଲେରୀରେ ଦର୍ଶକଙ୍କ ଭିଡ଼ ସର୍କସର କ୍ରେଜ୍କୁ ପ୍ରମାଣିତ କରିଛି ।
ବାଲେଶ୍ବରର ଆଇଟିଆଇ ପଡିଆରେ ଲୋଲେକ୍ସ ସର୍କସ ଡେରା ଜମାଇଛି । ୩୦ ଦିନ ପାଇଁ ଦର୍ଶକଙ୍କୁ ଭରପୁର ମନୋରଞ୍ଜ ଯୋଗାଇବ । ପ୍ରତିଦିନ ଅପରାହ୍ନ ଗୋଟାଏ, ୩ଟା ଓ ସଂନ୍ଧ୍ୟା ୭ ଟାରେ ଶୋ ଆରମ୍ଭ ହେଉଛି । ଦର୍ଶକଙ୍କ ପାଇଁ ଖେଳ ଦେଖିବାକୁ ଅଗ୍ରିମ ଟିକେଟ୍ ସାଙ୍ଗକୁ ତତ୍କାଳ ଟିକେଟ୍ ମଧ୍ୟ ମିଳି ପାରୁଛି । ସରକାରୀ କଟକଣା ଥାଇ ମଧ୍ୟ ସର୍କସ୍ରେ ରଙ୍ଗିନ୍ ପୋଷାକ ପିନ୍ଧି ଦର୍ଶକଙ୍କୁ ମନୋରଞ୍ଜନ ଦେଉଛନ୍ତି ପଡ଼ୋଶୀ ରଜ୍ୟର କଳାକାର । ଶୋମ୍ଯାନଙ୍କ ଚିତାକର୍ଶକ ଖେଳ ଯୋଗୁ ସର୍କସ କମ୍ପାନୀ ଭଲ ବ୍ୟବସାୟ କରିବ ବୋଲି ଆଶା ରଖିଛି।
ଆଳୁ ମଟର ତରକାରୀରୁ ଆଳୁ ଗାଏବ
ନନ୍ଦିଘୋଷ ବ୍ୟୁରୋ: ଜଳଖିଆ ଦୋକାନ ଉପରେ ପଡ଼ିଛି ଆଳୁ ଦରର ପ୍ରଭାବ। ଫଳରେ ବଢିଛି ଜଳଖିଆର ମୂଲ୍ୟ । ଆଳୁ ଚପ୍ ୭ ଟଙ୍କା ହୋଇଥିବାବେଳେ ଦହିବରା ପ୍ଲେଟରୁ କମୁଛି ଆଳୁ ପିସ୍। ଆଳୁଦମରେ ଆଳୁ ବଦଳରେ ମିଶୁଛି ସୋୟାବିନ ବଡ଼ି। ବ୍ୟବସାୟ ଦୃଷ୍ଟିରୁ କ୍ଷତି ହେଲେ ବି କମାଉ ନାହାନ୍ତି ପରିମାଣ, କିନ୍ତୁ କମୁଛି କ୍ବାଣ୍ଟିଟି। ଦରଦାମ ନିୟନ୍ତ୍ରଣ ନ ହେଲେ ଆଗକୁ ଜଳଖିଆ କରିବା ମୁସ୍କିଲ ହେବ ବୋଲି କହିଛନ୍ତି ବ୍ୟବସାୟୀ।
ଜଳଖିଆ ଦୋକାନରେ ଆଳୁ ଯନ୍ତ୍ରଣା । ଆଳୁ ମଟର ତରକାରୀରୁ ଆଳୁ ଗାଏବ। ଡାଲେମାରେ ୧୦ କିଲୋ ଜାଗାରେ ପଡୁଛି ୬ କିଲୋ । ଦୋସାରେ କମିଲା ଆଳୁ ମସଲା ପରିମାଣ । ଆଳୁଦମରେ ପଡିଲା ସୋୟାବିନ୍ ବଡ଼ି । ବେପାର ପାଇଁ କ୍ଷତିରେ ଦୋକନୀ । ଆଳୁ ସଙ୍କଟ ଓ ଦର ବୃଦ୍ଧି ସିଧା ସଳଖ ପ୍ରଭାବ ଜଳଖିଆ ଦୋକାନ ଉପରେ ପଡିଛି । ରାସ୍ତା କଡ ହେଉ କି ବଡ ଟିଫିନ ସେଣ୍ଟର । ଆଳୁ ମସଲା, ତରକାରୀ, ଆଳୁ ଚପ୍ ସିଙ୍ଗଡା, ବ୍ରେଡ ଚପ, ଆଳୁ କସା ସବୁଥିରେ ଆଳୁ ଆବଶ୍ଯକ । ତେବେ ଦରବୃଦ୍ଧି କାରଣରୁ କେଉଁଠି ଆଳୁ ଚପରୁ ମସଲା କମିଲାଣି ତ, ଆଉ କେଉଁଠି ବଢିଲାଣି ଦର । ସେହିଭଳି ଚକୁଳି ସାଙ୍ଗକୁ ଡାଲେମା ସ୍ବାଦ ବି ପାଣିଚିଆ ହେଲାଣି । କାରଣ ପୂର୍ବ ଭଳି ଡାଲେମାରେ ଆଳୁ ପଡୁନି । ପୂର୍ବରୁ ଆଳୁ ପ୍ଯାକେଟ ୮ଶହ ଟଙ୍କା ଦେଇ କିଣୁଥିବା ବେଳେ ଏବେ ଦୁଇ ହଜାର ହେଲାଣି । ପରିମାଣ କମାଇଲେ ବେପାର କମୁଛି । ଆଉ ଗ୍ରାହକ ମୁହଁ ନ ମୋଡିବେ ସେଥିପାଇଁ କ୍ଷତିରେ ହେଲେ ବି ଲୋକଙ୍କୁ ଦେଉଛନ୍ତି ଦୋକାନୀ ।
ରାଜଧାନୀ ବାସିନ୍ଦାଙ୍କ ପ୍ରଥମ ପସନ୍ଦ ହେଉଛି ଦହିବରା । ଏବେ ଦହିବରା ଆଳୁଦମ ବେପାର ଉପରେ ଆଳୁ ସଙ୍କଟର ପ୍ରଭାବ ପଡ଼ିଛି । ଆଳୁଦମରେ ଆଳୁ କମ ସୋୟାବିନ ବଡ଼ି ଅଧିକ ପଡୁଛି । ଏପଟେ ଗ୍ରାହକମାନେ ଦହିବରା ଖାଇବା ସମୟରେ ଦୁଇ ତିନିଥର ଆଳୁଦମ୍ ମାଗୁଛନ୍ତି । ଯେତେ ଝୋଳ ମାଗିଲେ ମିଳିବ କିନ୍ତୁ ଦୁଇଥର ଆଳୁ ମାଗିଲେ ମିଳୁଛି ସୋୟାବିନ୍ ବଡି ଦେବାକୁ ବାଧ୍ଯ ହେଉଛନ୍ତି ଦୋକାନୀ । ତେଣୁ ପ୍ଳେଟ ୨୦ ରୁ ୩୦ଟଙ୍କା ବିକୁଥିବା ବେଳେ ଜଣେ ଗ୍ରାହକଙ୍କୁ ୫ ରୁ ୬ ପିସ୍ ଆଳୁ ଦେଉଛନ୍ତି ବେପାରୀ । କିଛି ବ୍ଯବସାୟୀ ବେପାର ପାଇଁ କ୍ଷତି ସହିଲେ ବି ସମାନ ପରିମାଣର ଆଳୁଦମ ଦେଉଛନ୍ତି।
ରେଳ ପ୍ରକଳ୍ପ ନେଇ ବିଜେଡିର ସଂଗୀନ ଅଭିଯୋଗ
ନନ୍ଦିଘୋଷ ବ୍ୟୁରୋ: ଓଡି଼ଶା ପାଇଁ ରେଳ ପ୍ରକଳ୍ପ ଘୋଷଣା ପରେ କେନ୍ଦ୍ର ସରକାରଙ୍କୁ କଡ଼ା ସମାଲୋଚନା କରିଛନ୍ତି ବିଜେଡି ମୁଖପାତ୍ର ଲେନିନ ମହାନ୍ତି। ଯେଉଁ ପ୍ରକଳ୍ପ ଘୋଷଣା ହୋଇଛି, ସେଥି ମଧ୍ଯରୁ ମାତ୍ର ଗୋଟିଏ ଯାତ୍ରୀଙ୍କ ପାଇଁ, ବାକି ମାଲ୍ ପରିବହନ ପାଇଁ। ଏହାକୁ ନେଇ ବିଜେଡି ମୁଖପାତ୍ର ଲେନିନ ମହାନ୍ତି ପ୍ରଶ୍ନ କରିଛନ୍ତି-ରତ୍ନଗର୍ଭା ଓଡ଼ିଶାରୁ ପ୍ରାକୃତିକ ସଂପଦ ନେବା ପାଇଁ ଏହା ଷଡ଼ଯନ୍ତ୍ର ନୁହେଁ ତ । ମାଲପରିବହନ ପାଇଁ ଚିନ୍ତା ଅଛି, କିନ୍ତୁ ପ୍ଯାସେଞ୍ଜର ପାଇଁ କେନ୍ଦ୍ରର କିଛି ଚିନ୍ତା ନାହିଁ। ଖଣିଜ ସଂପଦ ଲୁଟ୍ ପାଇଁ ଏହି ଯୋଜନା କରାଯାଇଛି କି ବୋଲି ପ୍ରଶ୍ନ କରିଛନ୍ତି ଲେଲିନ ମହାନ୍ତି। ତା ଛଡ଼ା ନୂଆ ପ୍ରକଳ୍ପ ଗୋଟିଏ ବି ନାହିଁ। ଏବେ ଯେଉଁ ପ୍ରକଳ୍ପ ଘୋଷଣା ହୋଇଛି, ୭ ବର୍ଷ ତଳେ ବି ସେୟା ଘୋଷଣା ହୋଇଥିଲା। ଗୁଣୁପୁର – ଥେରୁବାଲି ରେଳ ପ୍ରକଳ୍ପ ପାଇଁ ୭ ବର୍ଷ ତଳେ ଅର୍ଥ ମଂଜୁର ହୋଇଥିଲା। ଏଥିପାଇଁ ନବୀନ ସରକାର ଜମି ବି ଦେଇଛନ୍ତି। ସେହି ୭ ବର୍ଷର ବଜେଟ ପ୍ରସ୍ତାବକୁ ଏବେ ନୂଆ ପ୍ରକଳ୍ପ କହି ଘୋଷଣା କରିଛନ୍ତି ମନ୍ତ୍ରୀ। ତା ଛଡ଼ା ଓଡ଼ିଶାକୁ କେତେ ଟଙ୍କା ଦିଆଯାଉଛି-ବିଭିନ୍ନ ମନ୍ତ୍ରୀ ବିଭିନ୍ନ ତଥ୍ଯ ଦେଉଛନ୍ତି। ଧର୍ମେନ୍ଦ୍ର ପ୍ରଧାନ କହିଲେ ୧୮ ଲକ୍ଷ କୋଟି, ଅମିତ ଶାହା କହିଲେ ୪ ଲକ୍ଷ ୮୦ ହଜାର କୋଟି, ମୋହନ ମାଝୀ କହୁଛନ୍ତି ୬ ଲକ୍ଷ କୋଟି। କାହା ତଥ୍ୟ ଠିକ୍ ବୋଲି ପ୍ରଶ୍ନ କରିଛନ୍ତି ଲେନିନ। କେନ୍ଦ୍ର ସରକାର ବାହାସ୍ଫୋଟ ମାରୁଛନ୍ତି, ଆମେ ଏତେ କୋଟି ଦେଲୁ। କିନ୍ତୁ ଓଡି଼ଶାରୁ କେତେ କୋଟି ନେଇଛ, ସେଇଟା କାହିଁକି କହୁନ ବୋଲି ପ୍ରଶ୍ନ କରିଛନ୍ତି ଲେନିନ ମହାନ୍ତି। ,ସେପଟେ କଂଗ୍ରେସ କହିଛି-କେନ୍ଦ୍ର ନେଉଛି ଅଧିକ, ଦେଉଛି କମ୍। ଏବେ ବି ବହୁ ଜିଲ୍ଲାରେ ରେଳ ସଂଯୋଗ ନାହିଁ। ୨୦ ହଜାର କୋଟିରୁ ଅଧିକ ରାଜସ୍ବ ଓଡି଼ଶାରୁ ନେଇ ଏହାର ଅଧା ବି ଦେଇନାହିଁ କେନ୍ଦ୍ର ସରକାର।
୬ ଟଙ୍କାରେ ମିଳୁଛି ଗୋଟିଏ ଗୁପଚୁପ
ନନ୍ଦିଘୋଷ ବ୍ୟୁରୋ: ବାଲେଶ୍ବରରେ ଆଳୁର ପ୍ରଭାବ । ୬ ଟଙ୍କାରେ ମିଳୁଛି ଗୋଟିଏ ଗୁପଚୁପ । ପୂର୍ବରୁ ଗୁପଚୁପ ଗୋଟାକୁ ୪ରୁ ୫ ଟଙ୍କା ଥିବାବେଳେ ଏବେ ୬ ଟଙ୍କାରେ ବିକ୍ରି ହେଉଛି ଗୁପଚୁପ । ଗୁପଚୁପରେ ଆଳୁର ପରିମାଣ କମିଯାଉଥିବାବେଳେ ଗୁପଚୁପ ଦର କିନ୍ତୁ ବଢିଯାଇଛି ।ଫଳରେ ଗ୍ରାହକଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଛି । ଏଥିସହିତ ଆଜି ବାଲେଶ୍ବର ଖୁଚୁରା ବଜାରରେ ଆଳୁ କିଲୋ ପ୍ରତି ୪୫ରୁ ୫୦ ଟଙ୍କା ବିକ୍ରି ହେଉଥିବାବେଳେ ୬ ଟଙ୍କାରେ ଗୋଟିଏ ଗୁପଚୁପ ଆଗାମୀ ଦିନରେ ଗୁପଚୁପ ବ୍ୟବସାୟୀ ବନ୍ଦ ହୋଇଯିବ ବୋଲି ବ୍ୟବସାୟୀମାନେ କହିଛନ୍ତି ।
ନୟାଗଡ଼ରେ ନିର୍ମାଣ ହେବାକୁ ଥିବା ବୃତ୍ତଙ୍ଗ ଜଳସେଚନା ପ୍ରକଳ୍ପକୁ ପରିବେଶ ମଞ୍ଜୁରୀ, ପୂରଣ ହେବ ୪ ଦଶନ୍ଧିର ସ୍ବପ୍ନ
ନନ୍ଦିଘୋଷ ବ୍ୟୁରୋ: ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକରେ ନିର୍ମାଣ ହେବାକୁ ଥିବା ବୃତ୍ତଙ୍ଗ ଜଳସେଚନ ପ୍ରକଳ୍ପକୁ ଦ୍ୱିତୀୟ ପର୍ଯ୍ୟାୟ ପରିବେଶ ମଞ୍ଜୁରୀ ମିଳିଛି । ଦୀର୍ଘ ୩୦ବର୍ଷରୁ ଅଧିକ ସମୟ ହେଲା ଏହି ବୃହତ ଜଳସେଚନ ପ୍ରକଳ୍ପ ଜଙ୍ଗଲ ଅନୁମତି ନପାଇ ପଡ଼ି ରହିଥିଲା। ଏବେ ପ୍ରକଳ୍ପକୁ ଅନୁମୋଦନ ମିଳିବା ପରେ ଜିଲ୍ଲାର କୃଷି ଓ କୃଷକଙ୍କ ପାଇଁ ଏହା ବରଦାନ ସାଜିବ ବୋଲି କୁହାଯାଉଛି ।
ନୟାଗଡ଼ ଜିଲ୍ଲାବାସୀଙ୍କ ୪ ଦଶନ୍ଧିର ସ୍ଵପ୍ନ ପୂରଣ ହେବାକୁ ଯାଉଛି। ବୃତ୍ତଙ୍ଗ ଜଳସେଚନ ପ୍ରକଳ୍ପକୁ ମିଳିଛି ଜଙ୍ଗଲ ବିଭାଗର ଅନୁମୋଦନ। ୧୫୨୪ ହେକ୍ଟର ଜଙ୍ଗଲ ଜମିରେ ଅଣ ଜଙ୍ଗଲ କାମ ପାଇଁ ଅନୁମତି ମିଳିଛି। ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ ମଞ୍ଜାରୀ ଗାଁରେ ହେବାକୁ ଥିବା ବହୁ ପ୍ରତୀକ୍ଷିତ ବୃତ୍ତଙ୍ଗ ଜଳସେଚନ ପ୍ରକଳ୍ପ ପାଇଁ କେନ୍ଦ୍ର ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ ଅନୁମତି ଦେଇଛି। ଜଙ୍ଗଲ ଜମିରେ ଅଣ ଜଙ୍ଗଲ କାର୍ଯ୍ୟ କରିବାକୁ ପାଇଁ ଚୂଡ଼ାନ୍ତ ମଞ୍ଜୁରୀ ମିଳିଛି। ଅବଶ୍ଯ ସମ ପରିମାଣରେ ଅଣଜଙ୍ଗଲ ଅଞ୍ଚଳରେ ବନୀକରଣ ସହିତ ନିର୍ଦ୍ଦେଶାବଳୀର ଅନୁପାଳନ କରିବାକୁ ରହିଛି ନିର୍ଦ୍ଦେଶ । ଏହି ପ୍ରକଳ୍ପ କାର୍ଯ୍ଯକ୍ଷମ ହେଲେ ୨୩ ହଜାର ହେକ୍ଟରରୁ ଅଧିକ ଚାଷଜମିକୁ ପାଣି ମାଡ଼ି ମାଡିବ। ଉପକୃତ ହେବେ ଚାଷୀ ।
ଚାଷୀଙ୍କ ଉନ୍ନତି ପାଇଁ ପୂର୍ବ ବିଜେଡି ସରକାର ବହୁ ଯୋଜନା କରିଛନ୍ତି। ସେଥି ମଧ୍ଯରୁ ବୃତଙ୍ଗ ଯୋଜନା ଅନ୍ୟତମ । ମଂଜାରି ଗାଁର ମାଈ ଓ ଢାବଲଦେଇ ପାହାଡ଼କୁ ସଂଯୋଗ କରି ଏହି ପ୍ରକଳ୍ପ ନିର୍ମାଣ କରାଯିବ। ପୂର୍ବର ବିଜେଡି ସରକାର ପ୍ରାଥମିକ ପର୍ଯ୍ୟାୟରେ ୧୭୦୦ କୋଟି ଟଙ୍କା ମଞ୍ଜୁର କରିଥିଲେ। ମଞ୍ଜାରୀ ଗାଁରେ ବୃତ୍ତଙ୍ଗ ଜଳସେଚନ ପ୍ରକଳ୍ପ କାର୍ଯ୍ୟକ୍ଷମ ହେଲେ ନୟାଗଡ଼ ଜିଲ୍ଲାର ୮ ବ୍ଲକ ସହିତ ପଡୋଶୀ ଖୋର୍ଦ୍ଧା ଜିଲ୍ଲାର ବହୁ ଚାଷଜମିକୁ ପାଣି ମାଡିପାରିବ । ଉପକୃତ ହେବେ ସଂଖ୍ୟାଧିକ ଚାଷୀ । ଦୂର ହେବ ମରୁଡି ସମସ୍ୟା । ତେଣୁ ଏଭଳି ପଦକ୍ଷେପ ପାଇଁ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇଛନ୍ତି ଅଂଚଳବାସୀ।
ପ୍ରଥମ ପର୍ଯ୍ଯାୟ ମଂଜୁରୀ ପରେ ରାସ୍ତା କାମ ସହ ପ୍ରକଳ୍ପ କାମ ଚାଲିଥିଲା। ଏବେ ଦ୍ୱିତୀୟ ପର୍ଯ୍ୟାୟ ଅନୁମୋଦନ ମିଳିବା ପରେ ନୟାଗଡ଼ ଜିଲ୍ଲାବାସୀଙ୍କ ଦୀର୍ଘ ଦିନର ସମସ୍ୟାର ଅନ୍ତ ଘଟିବ । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଲା ପ୍ରକଳ୍ପ ହେଲେ କିଛି ଅଞ୍ଚଳ ଜଳମଗ୍ନ ହେବାର ବି ଆଶଙ୍କା ଅଛି ।
ନିମ୍ନମାନର ଖାଦ୍ୟ ଦିଆଯାଉଥିବା ଅଭିଯୋଗ, ସ୍କୁଲ ଆଗରେ ଫୋପଡ଼ାଗଲା ମଧ୍ୟାହ୍ନ ଭୋଜନ
ନନ୍ଦିଘୋଷ ବ୍ୟୁରୋ: ମଧ୍ୟାହ୍ନ ଭୋଜନରେ ଖାଦ୍ୟ ପରିମାଣ କମ୍ ଓ ଆଳୁ କମ୍ ପଡୁଥିବାରୁ ପିଲା ଖାଦ୍ୟ ନ ଖାଇ ବିସ୍କୁଟ ଖାଇ ଫେରିଗଲେ ଛାତ୍ର ଛାତ୍ରୀ । ବାଲେଶ୍ଵର ରେମୁଣା ବ୍ଲକ ଶ୍ରୀଜଙ୍ଗ ବଞ୍ଚାନିଧି ସ୍କୁଲ୍ ଆଗରେ ଘଟିଛି ଏଭଳି ଅଭାବନିୟ ଘଟଣା। ଅଭିଭାବକ ଖାଦ୍ୟ ନିମ୍ନମାନର ଅଭିଯୋଗ କରି ପିଲାଙ୍କୁ ବିସ୍କୁଟ ପ୍ୟାକେଟ ଦେଇ ସ୍କୁଲ୍କୁ ଛୁଟି କରି ଦେଇଛନ୍ତି। ତେବେ ପିଲା ଫେରି ଯିବା ପରେ ତିଆରି ହୋଇଥିବା ଖାଦ୍ୟକୁ ଗେଟ୍ ସମ୍ମୁଖ ରେ ଧରି ବସି ରହିଲେ ଦାୟିତ୍ୱରେ ଥିବା ଏସ ଏଚ ଜି ମହିଳା। ଅଭିଭାବକ ନିମ୍ନ ମାନର ଅଭିଯୋଗ କରୁଥିବା ବେଳେ ଦାୟିତ୍ୱରେ ଥିବା ଏସ ଏଚ ଜି ମହିଳା କହିଛନ୍ତି ଖାଦ୍ୟ ସଠିକ୍ ପରିମାଣରେ ଦିଆ ଯାଉଛି ତଥାବି ଏସ ଏମ ସି କମିଟି ଓ ଅଭିଭାକ ମିଛରେ ଅଭିଯୋଗ କରୁଛନ୍ତି ବୋଲି କହୁଥିବା ବେଳେ। ପରେ ଅଭିଭାବକ ଓ ଦାୟିତ୍ୱରେ ଥିବା ଏସ ଏଚ ଜି ମହିଳାଙ୍କ ମଧ୍ୟରେ ଯୁକ୍ତି ବଢିଲା ପରେ ଖାଦ୍ୟକୁ ଗେଟ୍ ଆଗରେ ଫୋପାଡି ଥିଲେ।
ବିଜେପୁର ପାକ୍ସରେ ଫାର୍ମର ରେଜିଷ୍ଟ୍ରେସନ ନାଁରେ ଟଙ୍କା ଆଦାୟ ଘଟଣା, ଡିଆରସିଏସଙ୍କୁ ଭେଟିଲେ ଅଭିଯୋଗକାରୀ ଚାଷୀ
ନନ୍ଦିଘୋଷ ବ୍ୟୁରୋ: ଟିଟିଲାଗଡ଼ ବିଜେପୁର ପାକ୍ସରେ ଫାର୍ମର ରେଜିଷ୍ଟ୍ରେସନ ନାଁରେ ଶହେ ଟଙ୍କା ଆଦାୟ ଘଟଣା I ଡିଆରସିଏସଙ୍କୁ ଭେଟିଲେ ଅଭିଯୋଗକାରୀ ଚାଷୀ I କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଚାଷୀମାନେ ଲିଖିତ ଅଭିଯୋଗ ଦେଇଛନ୍ତି । ଫୋନ୍ ପେ’ରେ ମଧ୍ଯ ଚାଷୀଙ୍କ ଠାରୁ ପାକ୍ସ ସମ୍ପାଦକ ଓ ଡାଟା ଏଣ୍ଟ୍ରି ଅପରେଟର ଟଙ୍କା ନେଇଥିବା ଅଭିଯୋଗ ହୋଇଛି I ଚାଷୀଙ୍କ ଠାରୁ ଟଙ୍କା ଆଦାୟ ଅଡିଓ ନନ୍ଦିଘୋଷ ଟିଭିରେ ପ୍ରସାରଣ ପରେ ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି ଉପଜିଲ୍ଲାପାଳ I ଉପଜିଲ୍ଲାପାଳଙ୍କ ନିର୍ଦ୍ଦେଶରେ ଘଟଣାର ତଦନ୍ତ କରୁଛନ୍ତି ଡିଆରସିଏସ ଦମୟନ୍ତୀ ସିଂ । ରିପୋର୍ଟ ଆସିବା ପରେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରଶାସନ ପ୍ରତିଶ୍ରୁତି ଦେଇଛି ।
ସମସ୍ୟା ଘେରରେ ତାଳଚେରର କର୍ଣ୍ଣପୁର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ
ନନ୍ଦିଘୋଷ ବ୍ୟୁରୋ: ସମସ୍ୟା ଘେରରେ ତାଳଚେରର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ , କର୍ଣ୍ଣପୁର। ସ୍କୁଲ ଛାତ ଭାଙ୍ଗି ତଳେ ପଡୁଥିବା ବେଳେ କାନ୍ଥ ଫାଟି ଆଁ କଲାଣି । ବର୍ଷା ହେଲେ ବାହାରର ଡ୍ରେନ ପାଣି ସ୍କୁଲ ବାରଣ୍ଡାରେ ଲହଡ଼ି ମାରିବା ସହ କ୍ଲାସ ରୁମରେ ପ୍ରବେଶ କରୁଛି । ଏହାସହ ଶିକ୍ଷକ ଅଭାବ ମଧ୍ୟ ପ୍ରମୁଖ ସମସ୍ୟା ପାଲଟିଛି । ସ୍କୁଲରେ ପ୍ରଥମରୁ ସପ୍ତମ ସାତଟି କ୍ଲାସ ରହିଥିବା ବେଳେ ପାଠ ପଢାଉଛନ୍ତି ମାତ୍ର ପାଞ୍ଚ ଜଣ ଶିକ୍ଷକ । ଅନ୍ୟପଟେ ବିଦ୍ୟାଳୟ କାନ୍ଥକୁ ଲାଗି ମୁକୁଳା ଡ୍ରେନ ଓ ମୁକୁଳା ଟ୍ରାନ୍ସଫର୍ମର ରହିବା ପିଲାଙ୍କ ପାଇଁ ବିପଦ ସୃଷ୍ଟି କରୁଛି ।ଏନେଇ ବିଇଓ କହିଛନ୍ତି ସ୍କୁଲ ଘରର ଅବ୍ୟବସ୍ଥା ସମ୍ପର୍କରେ ବିଡିଓଙ୍କୁ ଅବଗତ କରାଯାଇଛି ।