ନନ୍ଦିଘୋଷ ବ୍ୟୁରୋ : ଇରାନ ସହିତ ଭାରତର ବଡ୍ ଡିଲ। ପାକିସ୍ତାନ ଓ ଚୀନକୁ ଲାଗିଛି ଜବରଦସ୍ତ ଝଟକା। ଭାରତ ଓ ଇରାନ ମଧ୍ୟରେ ଚବାହାର ବନ୍ଦରକୁ ନେଇ ବଡ଼ ଚୁକ୍ତି ସ୍ଵାକ୍ଷରିତ ହୋଇଛି। ଏହି ବୁଝାମଣା ଅନୁସାରେ ଆସନ୍ତା ୧୦ ବର୍ଷ ପର୍ଯ୍ୟନ୍ତ ଚବାହାର ପୋର୍ଟର ପରିଚାଳନା ଦାୟିତ୍ଵ ସମ୍ପାଦନ କରିବ ଭାରତ। ପ୍ରଥମଥର ଲାଗି ଭାରତ ବିଦେଶରେ କୌଣସି ବନ୍ଦରର ପରିଚାଳନା ଦାୟିତ୍ଵ ସମ୍ପାଦନ କରିବ। ଆସନ୍ତା ୧୦ ବର୍ଷ ପର୍ଯ୍ୟନ୍ତ ଭାରତ ଏହି ବନ୍ଦରର ଉନ୍ନତୀକରଣ ସହ ପରିଚାଳନା କରିବ। ଭାରତ-ଇରାନ ମଧ୍ୟରେ ସମ୍ପରରେ ଏହା ଏକ ଗୁରୁତ୍ଵପୂର୍ଣ୍ଣ ଚୁକ୍ତି ବୋଲି କୁହାଯାଉଛି।
ଭାରତ ଇରାନର ଏହି ଡିଲରେ ପଡୋଶୀ ଦେଶ ପାକିସ୍ତାନ ଓ ଚୀନକୁ ଲାଗିଛି ବଡ଼ ଝଟକା। ଚବାହାରରେ ଦୁଇଟି ବନ୍ଦର ରହିଛି। ସେଥିମଧ୍ୟରୁ ଶାହିଦ ବହିସ୍ତୀ ବନ୍ଦର ଦାୟିତ୍ଵ ବୁଝିବ ଭାରତ। ବର୍ତ୍ତମାନ ମଧ୍ୟ ଏହି ବନ୍ଦର ପରିଚାଳନା ଦାୟିତ୍ଵ ସମ୍ପାଦନ କରୁଛି ଭାରତ। ତେବେ ଏହା ସ୍ଵଳ୍ପକାଳୀନ ଚୁକ୍ତି ଥିଲା। ସମୟ ବ୍ୟବଧାନରେ ଏହାକୁ ନବୀନକରଣ କରିବାକୁ ପଡୁଥିଲା। ବର୍ତ୍ତମାନ ଆସନ୍ତା ୧୦ ବର୍ଷ ପର୍ଯ୍ୟନ୍ତ ଏହି ଦାୟିତ୍ଵ ଭାରତକୁ ମିଳିଛି। ଏହି ଚୁକ୍ତି ଜରିଆରେ ଭାରତ ଏହି ବନ୍ଦରରେ ୧୨ କୋଟି ଆମେରିକୀୟ ଡଲାର ନିବେଶ କରିବ। ଏହି ବନ୍ଦରର ଉନ୍ନତୀକରଣ କରୁଛି ଭାରତ। ଏହାଦ୍ବାରା ଆଫଗାନିସ୍ଥାନ, ଇରାନ ଏବଂ ମଧ୍ୟ ଏସୀୟ ରାଷ୍ଟ୍ରଗୁଡିକ ସହ ଭାରତର ବ୍ୟବସାୟିକ କାରବାରର ରାସ୍ତା ଖୋଲିବ।
