ନନ୍ଦିଘୋଷ ବ୍ୟୁରୋ: ପତ୍ନୀଙ୍କ ବିୟୋଗ ସହ୍ୟ କରିପାରିଲେନି। ଆତ୍ମହତ୍ଯା କଲେ ବରିଷ୍ଠ IPS ଅଧିକାରୀ ଶିଳାଦିତ୍ଯ ଚେଟିଆ। ପତ୍ନୀଙ୍କ ମୃତ୍ଯୁର ମାତ୍ର ୧୦ ମିନିଟ ମଧ୍ୟରେ ସର୍ଭିସ ରିଭଲଭରରୁ ନିଜକୁ ଗୁଳି କରି ଆତ୍ମହତ୍ଯା କରିଛନ୍ତି ବରିଷ୍ଠ ପୋଲିସ ଅଧିକାରୀ ଶିଳାଦିତ୍ୟ ଚେଟିଆ। କ୍ଯାନସରରେ ପୀଡ଼ିତ ହୋଇ ଚିକିତ୍ସାଧୀନ ଅବସ୍ଥାରେ ଶିଳାଦିତ୍ୟଙ୍କ ପତ୍ନୀ ଆଗମଣି ବାରବରୁଆଙ୍କ ଆଜି ପରଲୋକ ଘଟିଥିଲା। ସେତେବେଳେ ଆଇସିୟୁରେ ଥିଲେ ଶିଳାଦିତ୍ୟଙ୍କ ପତ୍ନୀ। ଏହାପରେ ସେହି ଆଇସିୟୁ ଭିତରେ ହିଁ ଶିଳାଦିତ୍ୟ ଆତ୍ମହତ୍ଯା କରିଥିଲେ। ପତ୍ନୀଙ୍କ ମୃତ୍ଯୁ ପରେ ପ୍ରାର୍ଥନା କରିବାକୁ କହି ଡାକ୍ତର ଏବଂ ଅନ୍ୟ ନର୍ସିଂ ଷ୍ଟାଫକୁ ବାହାରକୁ ଯିବାକୁ କହିଥିଲେ। ଏହାର ୧୦ ମିନିଟ ପରେ ଗୁଳି ଫୁଟିବା ଶବ୍ଦ ଶୁଭିଥିଲା। ଶିଳାଦିତ୍ୟ ଆତ୍ମହତ୍ଯା କରିଥିବା ଜଣାପଡିଥିଲା। ଦୀର୍ଘ ଦିନ ଧରି କ୍ଯାନସରରେ ପୀଡ଼ିତ ହୋଇ କଷ୍ଟ ପାଉଥିଲେ ଶିଳାଦିତ୍ୟଙ୍କ ପତ୍ନୀ। ପତ୍ନୀଙ୍କ ଚିକିତ୍ସା ଲାଗି ଗତ ୪ ମାସ ହେଲା ସେ ଛୁଟିରେ ଥିଲେ। ଗତ ଦୁଇ ମାସ ଧରି ଉଭୟ ହସ୍ପିଟାଲରେ ରହୁଥିଲେ। କିଛି ଦିନ ହେବ ଶିଳାଦିତ୍ୟଙ୍କ ପତ୍ନୀଙ୍କ ସ୍ଵାସ୍ଥାବସ୍ଥା ବିଗିଡି ଯାଇଥିଲା। ଆଜି ଅପରାହ୍ନ ସାଢେ ୪ଟାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ବର୍ତ୍ତମାନ ଆସାମ ଗୃହ ସଚିବ ଦାୟିତ୍ଵରେ ଥିଲେ ଶିଳାଦିତ୍ୟ ଚେଟିଆ। ୨୦୦୯ କ୍ଯାଡର ଆଇପିଏସ ହେଉଛନ୍ତି ଶିଳାଦିତ୍ୟ। ବରିଷ୍ଠ ଆଇପିଏସ ଶିଳାଦିତ୍ୟଙ୍କ ପରଲୋକରେ ବିଭିନ୍ନ ମହଲରୁ ଶୋକ ପ୍ରକାଶ ପାଇଛି।
ସାବଧାନ! ବଜାରରେ ମିଳୁଛି କଲର ଚୁଡ଼ା
ନନ୍ଦିଘୋଷ ବ୍ୟୁରୋ: ଘିଅ, ତେଲ, ମସଲା, ସସ ପରେ ଏବେ ଚୁଡ଼ାରେ ମଧ୍ୟ ଅପମିଶ୍ରଣ ଅଭିଯୋଗ। କଟକ ମାଲଗୋଦାମକୁ ଆସୁଥିବା ଧଳା ଓ ନାଲି ଚୁଡ଼ାରେ ନୀଳ ଓ ନାଲି ରଙ୍ଗ ମିଶାଯାଉଥିବା ଅଭିଯୋଗ। ମାଲଗୋଦାମ ଚୁଡା ବ୍ୟବସାୟୀଙ୍କ ଠାରୁ ଆରମ୍ଭ କରି ସଂଘ ସମ୍ପାଦକ ଅଭିଯୋଗକୁ ମାନିବା ସହିତ ଚୁଡା ଆସୁଥିବା ମିଲରେ ବିଧିବଦ୍ଧ ଯାଞ୍ଚ ପାଇଁ ଦାବି କାରିଛନ୍ତି। ସେପଟେ ଖାଉଟି ଏନେଇ ଅସନ୍ତୋଷ କରିଥିବା ବେଳେ ଖୁବଶୀଘ୍ର ଏନେଇ ପଦକ୍ଷେପ ନିଆଯିବ ବୋଲି କହିଛନ୍ତି ସିଏମସି ସ୍ୱାସ୍ଥ୍ୟ ଅଧିକାରୀ।
ଚୁଡ଼ାକୁ ବି ଛାଡ଼ିଲେନି। ଅପମିଶ୍ରଣ ତାଲିକାରେ ସାମିଲ। ମିଶାଯାଉଛି ହାନିକାରକ ରଙ୍ଗ । ପଦକ୍ଷେପ ନେଇ ସ୍ବାସ୍ଥ୍ଯ ଅଧିକାରୀଙ୍କ ସୂଚନା। ଘିଅ, ତେଲ ମସଲା, ଜର୍ଦ୍ଦା, ସସ୍ ପରେ ଏବେ ଚୁଡ଼ା ବି ବିଷ। ଆପଣ ଓପାସ, ବ୍ରତରେ ଚୁଡ଼ା ଖାଉଛନ୍ତି ତ ? ଟିକେ ଭଲ କରି ଦେଖନ୍ତୁ ଏହାକୁ। ଧଳାରେ ସବୁଜ ଓ ନାଲିରେ ସାମାନ୍ଯ ଫିକା ନାଲି ।
ଏଭଳି କଲର ଚୁଡ଼ା ଏବେ ବଜାରରେ ମିଳୁଛି। ଏଥିରେ ହାନିକାରକ ରଙ୍ଗ ମିଶାଇ ବଜାରକୁ ଆସୁଥିବା ଅଭିଯୋଗ ହୋଇଛି । ତେବେ କିଏ ଓ କାହିଁକି ଚୁଡା ଏ ରଙ୍ଗ ମିଶାଉଛନ୍ତି ? ଏହି ରଙ୍ଗ ମିଶାଇଲେ କ’ଣ ମିଳିବ ଲାଭ ? ଗ୍ରାଉଣ୍ଡ ଜିରୋରୁ ଖବର ନେବା ପରେ ଜଣା ପଡ଼ିଛି, ଏସବୁ ମିଲରୁ ଆସୁଛି । ଚୁଡା ଆଖିକୁ ଭଲ ଦେଖାଯିବା ପାଇଁ ମିଶାଯାଉଛି ରଙ୍ଗ। ଦୋକାନୀ ଓ ସଂଘ କତୃପକ୍ଷ ଏହାକୁ ମାନିଥିବା ବେଳେ ଏହାର ବିଧିବଦ୍ଧ ଯାଞ୍ଚ ପାଇଁ ଦାବି କରିଛନ୍ତି ।
ମାଲଗୋଦାମକୁ କଟକ ଜିଲ୍ଲାର ଆଖପାଖ ବିଶେଷକରି ପୁରୀ, ଖୋର୍ଦ୍ଧା, ଯାଜପୁର, ଢେଙ୍କାନାଳ, ଭୁବନ, ଭଦ୍ରକ, କେନ୍ଦ୍ରାପଡା ଆଦି ସ୍ଥାନରେ ଥିବା ମିଲରୁ ଆସୁଛି ଚୁଡା। ତେବେ କେଉଁଠୁ ଆସୁଛି ଏହି ଅପମିଶ୍ରିତ ଚୁଡା ? ଧଳା ଚୁଡା ୪୨ ଓ ନାଲି ଚୁଡା କିଲୋ ୪୫ ଟଙ୍କାରେ ବିକ୍ରି ହେଉଛି। ଖାଉଟି ଏନେଇ ଅସନ୍ତୋଷ ପ୍ରକାଶ କରିବା ସହିତ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ସେପଟେ ଖୁବଶୀଘ୍ର ପଦକ୍ଷେପ ନିଆଯିବ ବୋଲି କହିଛନ୍ତି ସିଏମସି ସ୍ବାସ୍ଥ୍ଯ ଅଧିକାରୀ ।
ଜନ୍ମ ଠାରୁ ବାର୍ଦ୍ଧକ୍ଯ ଯାଏଁ ସମସ୍ତଙ୍କ ଚୁଡା ଖାଇଥାନ୍ତି । ତେବେ କିଛି ଲାଭଖୋର ବ୍ଯବସାୟୀ ଏଥିରେ ଅପମିଶ୍ରଣ କରୁଥିବା ଅଭିଯୋଗ ହୋଇଛି। ତେଣୁ ଖାଦ୍ଯର ସଠିକତା ଯାଞ୍ଚ କରି ପଦକ୍ଷେପ ନେବାକୁ ଦାବି ହୋଇଛି ।
କଟକ ବାଙ୍କୀରେ ଅପରାଜିତା ଷଡ଼ଙ୍ଗୀଙ୍କୁ ବିରୋଧ
ନନ୍ଦିଘୋଷ ବ୍ୟୁରୋ: ଭୁବନେଶ୍ଵର ସାଂସଦ ଅପରାଜିତାଙ୍କୁ ବିରୋଧ। ବାଙ୍କୀରେ ଇଥାନାଲ କମ୍ପାନୀର ଉଦଘାଟନ କାର୍ଯ୍ୟରେ ଯୋଗ ଦେବାକୁ ଆସିଥିବା ବେଳେ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କୁ ମୁଣ୍ଡଳୀ ଗ୍ରାମ ପଞ୍ଚାୟତର ଲୋକେ ବିରୋଧ କରିଛନ୍ତି। ଶତାଧିକ ସଂଖ୍ୟାରେ ଲୋକେ ଗୋବିନ୍ଦପୁର ଛକରେ ବିରୋଧ ପ୍ରଦର୍ଶନ କରିଥିଲେ। ଅପରାଜିତାଙ୍କୁ ବିରୋଧ କରି ଗୋ ବ୍ୟାକ୍ ନାରା ଦେଇଥିଲେ। ଉଦଘାଟିତ ହେବାକୁ ଥିବା କମ୍ପାନୀରୁ ଧୂଆ ବାହାରି ଅଂଚଳ ପ୍ରଦୂଷିତ ହୋଇଥିବା ଅଭିଯୋଗ କରିଛନ୍ତି ଲୋକେ। ପ୍ରବଳ ଦୁର୍ଗନ୍ଧରୁ ଲୋକଙ୍କୁ ଘରେ ରହିବା ମୁସକିଲ ହୋଇପଡିଛି। ଯାହାକୁ ନେଇ ଅପରାଜିତାଙ୍କୁ ଜୋରଦାର ବିରୋଧ କରାଯାଇଛି।
ସରକାର ବଦଳିବା ପରେ ଚିନ୍ତାରେ ଆଦିବାସୀ
ନନ୍ଦିଘୋଷ ବ୍ୟୁରୋ: ଆଶା ଆଶଙ୍କାରେ ଆଦିବାସୀଙ୍କ ଜୀବନ ଜୀବିକା। ମହୁଲ ଫୁଲ ପରେ ମହୁଲ ଫଳ ବା ଟୋଲା ମଞ୍ଜି ସାଙ୍ଗକୁ ନାନାଦି ଜଙ୍ଗଲ ଜାତ ଦ୍ରବ୍ୟ ସଂଗ୍ରହ କରି ପେଟ ପାଟଣା କରିବା ଆଦିବାସୀଙ୍କ ଧର୍ମ। ହେଲେ ଏବେ ସରକାର ବଦଳିବା ପରେ ଜଙ୍ଗଲ ଜମି ଅଧିକାର ବଳରେ ଆଦିବାସୀ ଜଙ୍ଗଲି ଜଂଗଲୀ ଜାତ ଦ୍ରବ୍ଯ ସଂଗ୍ରହ କରିବା ଆଶା ଆଶଙ୍କାର ବିଷୟ ପାଲଟିଛି।
କଳାହାଣ୍ଡି ଜିଲ୍ଲା କୋକସରାରେ ୧୦ରୁ ଅଧିକ ଗାଁ। ଏହି ଉପାନ୍ତ ଅଞ୍ଚଳର ଆଦିବାସୀଙ୍କ ଜୀବନ ଜୀବିକା ହେଉଛି ମହୁଲ, ଟୋଲା ମଞ୍ଜି, କେନ୍ଦୁ ପତ୍ର ପରି ଜଙ୍ଗଲ ଜାତ ଦ୍ରବ୍ଯ ସଂଗ୍ରହ କରିବା । ଏସବୁ ଜିନିଷ ବିକ୍ରି କରି ରୋଜଗାର କରନ୍ତି ଆଦିବାସୀ। ଏବେ ସରକାର ବଦଳିବା ପରେ ଜଙ୍ଗଲ ଜମି ଅଧିକାରକୁ ନେଇ ଦ୍ବନ୍ଦ୍ବରେ ଆଦିବାସୀ। ଆଗକୁ ସେମାନଙ୍କ ଅଧିକାର କ୍ଷୁର୍ଣ୍ଣ କିମ୍ବା ପରିବର୍ତ୍ତନ ହୋଇଯିବନି ତ ସେଇ ଡର।
ରାଜ୍ୟ ସରକାରଙ୍କ ଜଙ୍ଗଲ ଜମି ଅଧକାର ୨୦୦୬ ବଳରେ ପ୍ରତି ବର୍ଷ ମାର୍ଚ୍ଚ, ଏପ୍ରିଲ, ମେ, ଜୁନ ୪ ମାସ ମହୁଲ , ଟୋଲା ମଞ୍ଜି, କେନ୍ଦୁ ପାତ୍ର ସଂଗ୍ରହ କରନ୍ତି ଆଦିବାସୀ। ଆଦିବାସୀ ଟୋଲା ମଞ୍ଜିକୁ ପେଡ଼ି ଖାଇବା ତେଲ ପ୍ରସ୍ତୁତ କରନ୍ତି । ଯେଉଁ ମାନଙ୍କ ସୁବିଧା ନ ଥାଏ ସେମାନେ ବିକ୍ରି କରି ତେଲ ଲୁଣର ସଂସାର କରନ୍ତି ହେଲେ ସରକାର ବଦଳିବା ପରେ ଆଦିବାସୀଙ୍କ ଚିନ୍ତା ବଢ଼ି ଯାଇଛି । ପ୍ରତି ବର୍ଷ ଆଦିବାସୀ ମାନେ ଜଙ୍ଗଲ ଜାତ ଦ୍ରବ୍ୟ ସଂଗ୍ରହ କରୁଥିବା ବେଳେ ଯଦି ଏମାନଙ୍କୁ ଅଧିକାର ନମିଳେ ତା’ହେଲେ ଜୀବନ ଜୀବିକା ପ୍ରଭାବିତ ହେବାର ଆଶଙ୍କା ଅଧିକ।
କ୍ଯାନସର ଅଜାଡି ଦେଲା ଦୁଃଖ, ଛଡାଇନେଲା ଶୈଶବ
ନନ୍ଦିଘୋଷ ବ୍ୟୁରୋ: ଗତ କିଛି ବର୍ଷ ପୂର୍ବରୁ ସବୁ କିଛି ଠିକଠାକ ଥିଲା। ହେଲେ ଭାଗ୍ୟ ଯେମିତି କଡ ଲେଉଟାଇଲା ସବୁକିଛି ଓଲଟପାଲଟ ହୋଇଗଲା। ୧୦ ବର୍ଷର ଝିଅକୁ କ୍ୟାନସର ରୋଗ ହେବା ପରେ ଚିକିତ୍ସା ପାଇଁ ହସ୍ପିଟାଲରୁ ହସ୍ପିଟାଲ ଦୌଡି ଦୌଡି ନୟାନ୍ତ ହେଲେଣି ପରିବାର। ଚାଷ କରି ତେଲ ଲୁଣ ସଂସାର ଚାଲୁଥିବା ପରିବାରରେ ଏବେ ଚିକିତ୍ସା ପାଇଁ ଅର୍ଥ ଚିନ୍ତା।
କ୍ଯାନସର ଅଜାଡି ଦେଲା ଦୁଃଖ, ଛଡାଇନେଲା ଶୈଶବ। ଗତ କିଛି ବର୍ଷ ପୂର୍ବରୁ ହସ ଖୁସିରେ ଦିନ କାଟୁଥିଲେ ମୁରିବାହାଲ ବ୍ଲକ ରଣାବନ୍ଧ ଗାଁର ରଣା ପରିବାର। ୨ ବର୍ଷ ପୂର୍ବେ ଝିଅ ମନୀଷା ଖେଳୁଥିବା ସମୟରେ ଆହତ ହୋଇଗଲା। ଚିକିତ୍ସା ପରେ ତାଙ୍କୁ କ୍ୟାନସର ହୋଇଥିବା ଜଣାପଡିଲା। ଗରିବ ପରିବାର ଏବଂ କ୍ଯାନସର ପରି ବ୍ୟୟ ବହୁଳ ଚିକିତ୍ସା ପାଇଁ ଚିନ୍ତାରେ ଥିଲେ ପରିବାର। ପ୍ରାୟ ୧ ବର୍ଷ ୨ ମାସ କ୍ୟାନସର ଚିକିତ୍ସା କରାଇବା ପରେ ବର୍ତ୍ତମାନ ମନୀଷାର ଏକ ହାତ କାଟିବାକୁ ପଡିଛି। ଦୀର୍ଘ ୨ ବର୍ଷ ହେଲା ମନୀଷାର ଚିକିତ୍ସା ଚାଲୁଥିବାରୁ ପାଠରେ ଡୋରୀ ବନ୍ଧା ହୋଇଛି ।
ମନୀଷାର ବାପା ଜଣେ ଚାଷୀ। ଝିଅର ଚିକିତ୍ସା ପାଇଁ ପାଇଁ ପିରବାର ଲୋକେ ଚେଷ୍ଟା ଜାରି ରଖିଛନ୍ତି। ବିଏସକେୱାଇ କାର୍ଡ ସାହାଯ୍ୟରେ କିଛି ମାତ୍ରାରେ ଚିକିତ୍ସା ଖର୍ଚ୍ଚ ଉଠିଛି। ଅନ୍ୟାନ୍ୟ ଖର୍ଚ୍ଚ ପାଇଁ ପରିବାର ଏବେ ଚିନ୍ତାରେ ପଡିଲେଣି। ଆର୍ଥିକ ସହଯୋଗ ପାଇଁ ପରିବାର ପକ୍ଷରୁ ନିବେଦନ ହୋଇଛି।
ଚାଷୀଙ୍କୁ ମିଳିଲା ପିଏମ କିଷାନ ନିଧିର ୧୭ତମ କିସ୍ତି
ନନ୍ଦିଘୋଷ ବ୍ୟୁରୋ: ଚାଷୀଙ୍କୁ ମିଳିଲା ପିଏମ କିଷାନ ନିଧିର ୧୭ତମ କିସ୍ତି। ବାରାଣସୀରୁ ଚାଷୀଙ୍କ ଖାତାକୁ ଅର୍ଥ ପ୍ରଦାନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ୯ କୋଟି ୨୬ ଲକ୍ଷରୁ ଅଧିକ ଚାଷୀଙ୍କ ଖାତାକୁ ଗଲା ୨୦ ହଜାର କୋଟିରୁ ଅଧିକ ଟଙ୍କା। ଏହି ଯୋଜନା ମାଧ୍ୟମରେ ପ୍ରତି ଚାଷୀଙ୍କ ଖାତାକୁ ୨ହଜାର ଟଙ୍କା ଲେଖାଏଁ ପ୍ରଦାନ କରାଯାଇଛି।ତୃତୀୟ ଥର ଲାଗି ପ୍ରଧାନମନ୍ତ୍ରୀ ଭାବେ ଶପଥ ନେବାପରେ କିଷାନ ସମ୍ମାନ ନିଧି ଫାଇଲରେ ପ୍ରଥମ ଦସ୍ତଖତ କରିଥିଲେ ପିଏମ ମୋଦି। ଏହି ପ୍ରତିଶ୍ରୁତି ଅନୁସାରେ ଆଜି ଚାଷୀଙ୍କ ଖାତାକୁ ଯାଇଛି କିଷାନ ସମ୍ମାନ ନିଧିର ସପ୍ତଦଶ କିସ୍ତି। ତୃତୀୟ ଥର ଲାଗି ପ୍ରଧାନମନ୍ତ୍ରୀ ଭାବେ ଶପଥଗ୍ରହଣ ପରେ ପିଏମ ମୋଦି ପ୍ରଥମଥର ଲାଗି ନିଜ ନିର୍ବାଚନମଣ୍ଡଳୀ ବାରାଣସୀ ଗସ୍ତ କରିଛନ୍ତି। ଡିବିଟି ଜରିଆରେ ଏହି କିସ୍ତି ଚାଷୀଙ୍କ ଖାତାକୁ ପ୍ରଦାନ କରାଯାଇଛି। ଏହି ଅବସରରେ ସାଧାରଣ ସଭାକୁ ସମ୍ବୋଧିତ କରି ବାରାଣସୀ ବାସୀଙ୍କ ପାଖରେ ଋଣୀ ବୋଲି କହିଥିଲେ ମୋଦି। ମା ଗଙ୍ଗା ମୋତେ କୋଳେଇ ନେଇଛନ୍ତି। ମୁଁ ଏଠାକାର ହୋଇଯାଇଛି ବୋଲି କହିଛନ୍ତି ପିଏମ ମୋଦି। ଏହି ଅବସରରେ ବରଗଡ଼ରେ ଆୟୋଜିତ କାର୍ଯ୍ୟକ୍ରମରେ ଯୋଗ ଦେଇଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।
ହୋଇପାରିନି ବିଦ୍ଯୁତ ସଂଯୋଗ, ଆଜି ଅନ୍ଧାରରେ ୧୧ ପରିବାର
ନନ୍ଦିଘୋଷ ବ୍ୟୁରୋ: ଘରେ ରହିଛି ସୁଇଚ ବୋର୍ଡ ଏବଂ ଫ୍ଯାନ। କିନ୍ତୁ ହୋଇପାରିନି ବିଦ୍ଯୁତ ସଂଯୋଗ। ଗଞ୍ଜାମ ଦିଗପହଣ୍ଡି ବ୍ଲକ ଭୁଷୁଣ୍ଡା ଗାଁରେ ଏବେବି ରାଜୁତି କରୁଛି ଅନ୍ଧକାର। ବିଦ୍ଯୁତ ସଂଯୋଗ ନଥିବାରୁ ଗ୍ରୀଷ୍ମ ଋତୁରେ ଚଳିବା କଷ୍ଟକର ହୋଇପଡୁଛି। ବାରମ୍ବାର ପ୍ରଶାସନକୁ ଏନେଇ ଅବଗତ କରାଇଥିଲେ ମଧ୍ଯ କୌଣସି ସମସ୍ଯାର ସମାଧାନ ହୋଇପାରିନଥିବା ଗାଁ ଲୋକେ ଅଭିଯୋଗ କରିଛନ୍ତି।
ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଲକ ପଦ୍ମନାଭପୁର ପଂଚାୟତର ଭୁଷୁଣ୍ଡା ଗାଁ । ଗାଁ ର ଶେଷ ମୁଣ୍ଡରେ ରହୁଛନ୍ତି ୧୧ ଟି ପରିବାର। ଘରେ ବିଦ୍ୟୁତ ଜାଳିବା ପାଇଁ ସୁଇଚ ବୋର୍ଡ ଲାଗିଛି, ଫ୍ୟାନ ଲାଗିଛି କିନ୍ତୁ ଦୁର୍ଭାଗ୍ୟର କଥା ଘରକୁ ବିଦ୍ୟୁତ ସଂଯୋଗ ହୋଇପାରିନାହିଁ । ବହୁବାର ସ୍ଥାନୀୟ ଲୋକ ବିଦ୍ୟୁତ କାର୍ଯ୍ୟାଳୟ ଏବଂ ବ୍ଲକ ପ୍ରଶାସନକୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିପାରିନଥିବା ଅଭିଯୋଗ ହୋଇଛି।
ବିଦ୍ୟୁତ ସଂଯୋଗ ନଥିବାରୁ ଖରା ଦିନେ ବଡ କଷ୍ଟରେ ଚଳୁଛନ୍ତି ଲୋକେ। ସଞ୍ଜ ହୋଇଗଲେ ଅନ୍ଧକାର ରାଜୁତି ଜୀବନକୁ ଅସ୍ତବ୍ୟସ୍ତ କରି ଦେଉଛି। ଅନ୍ଧାର ଭିତରେ ବିଭିନ୍ନ ଜନ୍ତୁର ଭୟ ତା ‘ ସାଙ୍ଗକୁ ଚୋର ଭୟ ଲାଗି ରହୁଛି । ଭୁଷୁଣ୍ଡା ଗାଁରେ ଶୀଘ୍ର ବିଦ୍ୟୁତ ସେବା ଯୋଗାଇ ଦିଆଯିବ ବୋଲି TPSODL ସହକାରୀ ଯନ୍ତ୍ରୀ କହିଛନ୍ତି।
ନଦୀରେ ଗାଧୋଇବା ହେଲା କାଳ, ଦେବୀ ନଦୀରେ ବୁଡି ୩ ନାବାଳକ ମୃତ
ନନ୍ଦିଘୋଷ ବ୍ୟୁରୋ: ନଦୀରେ ଗାଧୋଇବାବେଳେ ବୁଡି ୩ ନାବାଳକ ମୃତ। ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ ବାଲିଡିଆ ଗାଁ ନିକଟବର୍ତ୍ତୀ ଦେବୀ ନଦୀରେ ୩ ନାବାଳକ ଗାଧୋଇବାବେଳେ ବୁଡି ଯାଇ ମୃତ୍ଯୁ ହୋଇଛି। ବୁଡି ଯାଇଥିବା ଖବର ପାଇ ଗୁରୁତର ଅବସ୍ଥାରେ ୩ ନାବାଳକଙ୍କୁ ମୁମୁର୍ଷୁ ଅବସ୍ଥାରେ ଉଦ୍ଧାର କରିଥିଲେ ଅଗ୍ନିଶମବାହିନୀ ଟିମ। ତାଙ୍କୁ ତୁରନ୍ତ ଚିକିତ୍ସା ଲାଗି ଅସ୍ତରଙ୍ଗ ପରେ ଚାରିଛକ ମେଡିକାଲକୁ ସ୍ଥାନାନ୍ତର କରାଯାଇଥିଲା। ତେବେ ଡାକ୍ତର ସମସ୍ତ ୩ ନାବାଳକଙ୍କୁ ମୃତ ଘୋଷଣା କରିଛନ୍ତି। ୩ ନାବାଳକ ରୋହନ ବେହେରା , କାନ୍ହା ବେହେରା , ଓମ୍ ବେହେରା ବୋଲି ଜଣାପଡିଛି। ଦିନ ୧୧ଟା ସମୟରେ ଗାଧୋଇବାକୁ ଯାଇ ଆଉ ଘରକୁ ଫେରି ନଥିଲେ। ଘର ଲୋକ ଦେବୀ ନଦୀ ନିକଟରେ ଖୋଜାଖୋଜି କରିବା ପରେ ପାଇନଥିଲେ। ଏହାପରେ ଅଗ୍ନିଶମବାହିନୀକୁ ଖବର ଦେଇଥିଲେ। ଘଟଣାକୁ ନେଇ ଅସ୍ତରଙ୍ଗ ଅଂଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି।
ଡ୍ରେନରେ ଭାସି ଯାଇଥିବା ନାବାଳକ ମୃତ
ନନ୍ଦିଘୋଷ ବ୍ୟୁରୋ: ଆସିଲା ଦୁଃଖଦ ଖବର । ଡ୍ରେନରେ ଭାସି ଯାଇଥିବା ନାବାଳକ ମୃତ । କ୍ୟାପିଟାଲ ହସ୍ପିଟାଲରେ ମୃତ ଘୋଷଣା କଲେ ଡାକ୍ତର । ଭୁବନେଶ୍ବର ୟୁନିଟ୍ ୩ ଅଞ୍ଚଳରୁ ଭାସି ଯାଇଥିଲେ ନାବାଳକ । ବେଲୁନ ଡ୍ରେନରେ ଭାସି ଯାଉଥିବାବେଳେ ସେ ଏହାକୁ ଆଣିବାକୁ ଯାଇ ଭାସି ଯାଇଥିଲେ । ଲକ୍ଷ୍ମୀସାଗର ମେଳନ ପଡ଼ିଆ ଅଞ୍ଚଳରୁ ନାବାଳକଙ୍କୁ ଉଦ୍ଧାର କରାଯାଇ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଥିଲା । ଡାକ୍ତର ସେଠାରେ ମୃତ ଘୋଷଣା କରିଛନ୍ତି । ମୃତ ଘୋଷଣା କରିବା ପରେ ପରିବାରରେ ଖେଳି ଯାଇଛି ଶୋକର ଛାୟା ।
କେମିତି ହୋଇଥିଲା କାମ?, ଉଦଘାଟନ ପୂର୍ବରୁ ଭୁଶୁଡ଼ିଲା ପୋଲ
ନନ୍ଦିଘୋଷ ବ୍ୟୁରୋ: ବିହାରରୁ ପୁଣି ଆସିଲା ଏକ ଅଭାବନୀୟ ଘଟଣା । ଉଦଘାଟନ ପୂର୍ବରୁ ଭୁଶୁଡ଼ିଲା ପୋଲ । ବିହାରର ଅରରିଆ ଜିଲ୍ଲା ସିକଟିରେ ବକରା ନଦୀରେ ନିର୍ମାଣ ହୋଇଥିବା ବ୍ରିଜ୍ ଭୁଶୁଡ଼ି ଯାଇଛି । ୧୨ କୋଟି ଟଙ୍କା ବ୍ୟୟରେ ଏହି ପୋଲଟି ନିର୍ମାଣ ହୋଇଥିବାବେଳେ ଉଦଘାଟନ ପୂର୍ବରୁ ଭୁଶୁଡ଼ି ପଡ଼ିବାକୁ ନେଇ ସାଧାରଣରେ ଚର୍ଚ୍ଚା ଆରମ୍ଭ ହୋଇଛି । ୧୦୦ ମିଟର ଲମ୍ବା ବିଶିଷ୍ଟ ଏହି ବ୍ରିଜଟି ଭୁଶୁଡ଼ି ପଡ଼ିଛି । ତେବେ ବିହାରରେ ପୋଲ ଭୁଶୁଡ଼ିଥିବା ଘଟଣା କିଛି ନୂଆ ନୁହେଁ । ପୂର୍ବରୁ ମଧ୍ୟ ଏଭଳି ବ୍ରିଜ୍ ଭୁଶୁଡ଼ିବାର ଉଦାହରଣ ରହିଛି ।