ନନ୍ଦିଘୋଷ ବ୍ୟୁରୋ : ନନ୍ଦିଘୋଷ ବ୍ୟୁରୋ : ବଙ୍ଗୋପସାଗରରେ ସୃଷ୍ଟି ହୋଇଛି ଆଉ ଏକ ଲଘୁଚାପ। ପୂର୍ବ ଲଘୁଚାପ ଯୋଗୁଁ ରାଜ୍ୟରେ ପ୍ରବଳ ବର୍ଷା ଜାରି ରହିଥିବା ବେଳେ ଆଜି ଆଉ ଏକ ଲଘୁଚାପ ସୃଷ୍ଟି ହୋଇଛି। ପୂର୍ବର ଲଘୁଚାପ ଆଜି ଅବପାତରେ ପରିଣତ ହେବ। ଏହା ଆସନ୍ତାକାଲି ଦକ୍ଷିଣ ଓଡି଼ଶା ଓ ଉତ୍ତର ଆନ୍ଧ୍ର ଉପକୂଳ ଦେଇ ଅତିକ୍ରମ କରିବ। ଦୁଇଟି ଯାକ ଲଘୁଚାପର ପ୍ରଭାବରେ ରାଜ୍ୟରେ ବର୍ଷା ଜାରି ରହିଛି। ବିଶେଷ କରି ଦକ୍ଷିଣ ଓଡ଼ିଶାରେ ପ୍ରବଳ ବର୍ଷାର ଚେତାବନୀ ଦେଇଛି ପାଣିପାଗ ବିଭାଗ। ଆଜି ସକାଳୁ ରାଜଧାନୀ ଭୁବନେଶ୍ଵର ଓ ଏହାର ଆଖପାଖ ଅଞ୍ଚଳରେ ବର୍ଷା ଜାରି ରହିଛି। ସକାଳୁ କଳାହାଣ୍ଡିଆ ମେଘ ଦେଖାଦେଇଥିବା ବେଳେ ବୃଷ୍ଟିପାତ ଜାରି ରହିଛି। ଦୁଇଟି ଯାକ ଲଘୁଚାପର ପ୍ରଭାବରେ ରାଜ୍ୟରେ ଆହୁରି ୪ ଦିନ ଯାଏ ବର୍ଷା ହେବ ବୋଲି ପୂର୍ବାନୁମାନ କରାଯାଇଛି। ମାଲକାନଗିରିରେ ପ୍ରବଳରୁ ଅତି ପ୍ରବଳ ବର୍ଷା ନେଇ ଅରେଞ୍ଜ ଆଲର୍ଟ ଜାରି କରାଯାଇଥିବା ବେଳେ ରାୟଗଡ଼ା, କୋରାପୁଟ, ନବରଙ୍ଗପୁର ଗଜପତି ଜିଲ୍ଲାରେ ୟେଲୋ ୱାର୍ଣ୍ଣିଂ ଦିଆଯାଇଛି।
ଶକ୍ତିଶାଳୀ ହେବ ହାତ: ୩୫ ଜିଲ୍ଲା ସଭାପତିଙ୍କ ନାଁ ଚୂଡାନ୍ତ, ମାସ ଶେଷକୁ ଘୋଷଣା
ନନ୍ଦିଘୋଷ ବ୍ୟୁରୋ: ତୃଣମୂଳସ୍ତରର ସଂଗଠନକୁ ମଜଭୁତ କରିବାକୁ ଅଣ୍ଟା ଭିଡିଛି କଂଗ୍ରେସ । ବର୍ଷେବ୍ୟାପୀ ପଦଯାତ୍ରା କରି ଦଳ ସଂଗଠନକୁ ଚଳଚଞ୍ଚଳ କରିବାକୁ ପ୍ରସ୍ତୁତି ଆରମ୍ଭ କରିଛି । ସଂଗଠନ ସୃଜନ ଅଭିଯାନ ଜରିଆରେ ୩୫ଟି ସାଂଗଠନିକ ଜିଲ୍ଲାରେ ମୁଖିଆ ତାଲିକା ଚୂଡାନ୍ତ କରିବା ପରେ କେବଳ ନାଁ ଘୋଷଣାକୁ ଦଳ ଅପେକ୍ଷା କରିଛି । ମାସ ଶେଷକୁ ଜିଲ୍ଲା ସଭାପତିଙ୍କ ନାଁ ଘୋଷଣା କରି ଦଳ ବ୍ଲକ, ନଗର ସଭାପତି ପ୍ରକ୍ରିୟା ଆରମ୍ଭ କରିବ ବୋଲି କଂଗ୍ରେସ ବିଧାୟକ ଦଳ ନେତା କହିଛନ୍ତି ।
ଓଡିଶା କଂଗ୍ରେସକୁ ମଜଭୁତ କରିଛି ସଂଗଠନ ସୃଜନ । ଗୁଜରାଟ ଢାଞ୍ଚାରେ ଜିଲ୍ଲା ସଭାପତି ଚୟନ ପରେ ଦଳକୁ ଘାରିଛି ତୃଣମୂଳ ସଂଗଠନକୁ ଚଳଚଞ୍ଚଳ କରିବା ଚିନ୍ତା । ବର୍ଷେ ବ୍ୟାପୀ ପଦଯାତ୍ରା କରି ଦଳ ଓଡିଶାରେ କଂଗ୍ରେସ ସଂଗଠନକୁ କ୍ରୀୟାଶୀଳ କରିବାକୁ ଲମ୍ବା ରୋଡ ମ୍ୟାପ ପ୍ରସ୍ତୁତ କରିଛି । ଖୁବଶୀଘ୍ର ଏଆଇସିସି ୩୫ଟି ସାଂଗଠନିକ ଜିଲ୍ଲାର ମୁଖିଆଙ୍କ ନାଁ ଘୋଷଣା କରିବ ବୋଲି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ କହିଛନ୍ତି । ୩୦ ତାରିଖ ପରେ ବ୍ଲକ, ନଗର ସଭାପତି ଚୂଡାନ୍ତ କରିବ ଦଳ । ପଦଯାତ୍ରା ସମୟରେ ବିଜେପି ସରକାରଙ୍କ ବିଫଳତା ଓ ନିର୍ବାଚନୀ ପ୍ରତିଶ୍ରୁତି କିପରି ପାଣିର ଗାର ସାଜିଛି ତାହା ଲୋକଙ୍କୁ ବୁଝାଇବ ଦଳ । ୩୦୦ ୟୁନିଟ ମାଗଣା ବିଜୁଳି, ୨୪ ଘଣ୍ଟାରେ ଚିଟଫଣ୍ଡ କ୍ଷତିଗସ୍ତଙ୍କୁ ଟଙ୍କା ଫେରସ୍ତ ପରି ମାଳମାଳ ପ୍ରତିଶ୍ରୁତି କିପରି ମିଥ୍ୟା ପାଲଟିଛି ତାହା ଲୋକଙ୍କୁ ବୁଝାଇବ କଂଗ୍ରେସ ।
ବିଜେପି ସରକାର ବିରୋଧରେ ଗାଁ ଗାଁରେ ଲଢେଇ କରିବାକୁ କଂଗ୍ରେସ ନିଜକୁ ପ୍ରସ୍ତୁତ କରୁଥିବା କହିଛନ୍ତି ବରିଷ୍ଠ କଂଗ୍ରେସ ନେତା ସୁରେଶ ରାଉତରାୟ। ଏଥିଲାଗି ଏଆଇସିସି ସ୍ବତନ୍ତ୍ର ଦୃଷ୍ଟି ଦେଇଛି । ଜିଲ୍ଲା ସଭାପତିଙ୍କ ନାଁ ଘୋଷଣା ପରେ ପୂରା ଜୋଶରେ ତୃଣମୂଳ ସଂଗଠନ ଆଗେଇ ଚାଲିବ ବୋଲି ସେ ଯୁକ୍ତି ବାଢିଛନ୍ତି ।
୨୪ ବର୍ଷ ଧରି କଂଗ୍ରେସ କ୍ଷମତା ବାହାରେ ରହିଛି । କିପରି ଆଗାମୀ ସମୟରେ ପୁଣି ଜନତାଙ୍କ ଶ୍ରଦ୍ଧାଭାଜନ ହେବା ସହ ବିଶ୍ବାସ ଜିତିବ ସେଥିଲାଗି ପ୍ରତି ମୁହୂର୍ତ୍ତରେ ରଣନୀତି କରାଯାଉଛି । ଦୁର୍ବଳ ସଂଗଠନ ପାଇଁ ଦଳ ଲୋକଙ୍କ ଆସ୍ଥା ଓ ବିଶ୍ବାସ ଜିଣୁପାରୁ ନଥିବାରୁ ଏଆଇସିସି ଓଡିଶା କଂଗ୍ରେସ ସଂଗଠନକୁ ମଜଭୁତ କରିବାକୁ ଅଣ୍ଟା ଭିଡିଛି ।
ଆନ୍ଧ୍ରର ପୋଲାଭରମ ପ୍ରକଳ୍ପକୁ ବିରୋଧ କଲେଣି ଅନେକ ରାଜ୍ୟ, ହେଲେ ଓଡ଼ିଶା କେବେ ମୁହଁ ଖୋଲିବ
ନନ୍ଦିଘୋଷ ବ୍ୟୁରୋ: ପୋଲଭରମ ପ୍ରସଙ୍ଗରେ ଗୋଟିଏ ପରେ ଗୋଟିଏ ରାଜ୍ୟ ନିଜ ସ୍ୱାର୍ଥ ପାଇଁ ଲଢ଼େଇକୁ ଜୋରଦାର କରୁଛନ୍ତି । ତେଲେଙ୍ଗାନା ପରେ ଏବେ କର୍ଣ୍ଣାଟକ ପୋଲଭରମକୁ ନେଇ ନିଜ ସ୍ୱର ଶାଣିତ କରିଛି । କେନ୍ଦ୍ର ଜଳଶକ୍ତି ମନ୍ତ୍ରଣାଳୟ ନିକଟରେ ନିଜର ହକକୁ ଜାହିର କରିଛି କର୍ଣ୍ଣାଟକ । କିନ୍ତୁ ଏତେ ସବୁ ସତ୍ତ୍ୱେ ମଧ୍ୟ ଓଡିଶା ସରକାର ଗଭୀର ନିଦ୍ରାରେ ସୋଇଥିବା ଅଭିଯୋଗ ହୋଇଛି । ତୁରନ୍ତ ରାଜ୍ୟ ସରକାର ପୋଲଭରମକୁ ନେଇ ପାଟି ଖୋଲନ୍ତୁ ବୋଲି ଦାବି ହୋଇଛି ।
ପୋଲାଭରମ ପ୍ରକଳ୍ପକୁ ବିରୋଧ କଲେଣି ଅନେକ ରାଜ୍ୟ । ତେଲେଙ୍ଗାନା ପରେ କର୍ଣ୍ଣାଟକ ଆନ୍ଧ୍ରର ମନମାନି ବିରୋଧରେ ସ୍ୱରକୁ କରିଛି ଶାଣିତ । ହେଲେ ଓଡ଼ିଶା କେବେ ମୁହଁ ଖୋଲିବ ବୋଲି ଉଠିଛି ପ୍ରଶ୍ନ । ଆନ୍ଧ୍ରର ପୋଲାଭରମ ପ୍ରକଳ୍ପ ବିରୋଧରେ କେନ୍ଦ୍ର ଜଳଶକ୍ତି ମନ୍ତ୍ରଣାଳୟକୁ ଅବଗତ କରାଇଛି କର୍ଣ୍ଣାଟକ । ପୋଲାଭରମ ବନକଚେରଲା ଲିଙ୍କ ପ୍ରକଳ୍ପ ଦ୍ବାରା ଆନ୍ଧ୍ର ୨୪୩ ଟିଏମସି ଫୁଟ ଜଳ ପୋଲାଭରମରୁ ନେବ । ଆନ୍ଧ୍ର ଏହା କରିବାର ଏକଚାଟିଆ ଅଧିକାର ନଥିବା କେନ୍ଦ୍ର ନିକଟରେ ଦର୍ଶାଇଛି କର୍ଣ୍ଣାଟକ। ଅନ୍ତତଃ ରାଜ୍ୟ ଏଗ୍ରିମେଣ୍ଟ ଅନୁଯାୟୀ କର୍ଣ୍ଣାଟକ ୬୪.୭୫ ଟିଏମସି ଫୁଟ ଜଳ ଉପରେ ନିଜର ଅଧିକାର ଜାହିର କରିଛି । ହେଲେ ସବୁଠୁ କ୍ଷତିଗ୍ରସ୍ତ ହେବାକୁ ଥିବା ଓଡ଼ିଶା କାହିଁକି ଚୁପ ବୋଲି ପ୍ରଶ୍ନ କରିଛନ୍ତି କଂଗ୍ରେସ ଓ ବିଜେଡି । ପୋଲାଭରମ ପ୍ରକଳ୍ପ ସାରିବାକୁ ଆନ୍ଧ୍ର ସରକାର ଦିନରାତି ଏକ କରିଦେଇଥିବା ବେଳେ ୨୦୨୭ ସୁଦ୍ଧା ପ୍ରକଳ୍ପ କାର୍ଯ୍ୟକ୍ଷମ କରିବେ । କିନ୍ତୁ ଓଡିଶା ବୁଡିବାକୁ ଥିବାବେଳେ କାହିଁକି ଚୁପ ସରକାର ତାର ଉତ୍ତର ରଖିବାକୁ ଦାବି ହୋଇଛି ।
ସେପଟେ କିଛି ଦିନ ପୂର୍ବେ ଜାତୀୟ ମାନବାଧିକାର କମିଶନଙ୍କ ପକ୍ଷରୁ ପୋଲାଭରମ ପ୍ରକଳ୍ପ ପ୍ରଭାବିତ ପରିବାର ପାଇଁ କଣ ପଦକ୍ଷେପ ନିଆଯାଇଛି ବୋଲି ରିପୋର୍ଟ ତଲବ କରିଛନ୍ତି । କିନ୍ତୁ ଏହି ପ୍ରକଳ୍ପ ଯୋଗୁଁ ଓଡ଼ିଶାର ମାଲକାନଗିରି ଅଞ୍ଚଳରେ କେତେ କ୍ଷୟକ୍ଷତି ହେବ, କେତେ ଆଦିବାସୀ ଅଞ୍ଚଳ ବୁଡିବ ତଥା କେତେ ଲୋକ ଭିଟାମାଟି ହରାଇବେ ସେ ସମ୍ପର୍କରେ ତଥ୍ୟ ନଥିବା ଅଭିଯୋଗ ହୋଇଛି । ଯାହାକୁ ନେଇ କଡା ସମାଲୋଚନା କରାଯାଇଛି । ସେପଟେ ଶାସକ ଦଳର କହିବା କଥା ରାଜ୍ୟବାସୀଙ୍କ ସ୍ୱାର୍ଥ ରକ୍ଷା ପାଇଁ ପଦକ୍ଷେପ ନିଆଯାଉଛି ।
ପୋଲାଭରମ ପ୍ରସଙ୍ଗରେ ଲଗାତର ବିଜେଡି ଆନ୍ଦୋଳନ କରୁଥିବା ବେଳେ ଅନ୍ୟ ବିରୋଧୀ ଦଳ ଓ ସାମାଜିକ ସଂଗଠନ ମଧ୍ୟ ବିରୋଧ କରିଆସୁଛନ୍ତି । କିନ୍ତୁ ଏହାକୁ ନେଇ ସରକାରଙ୍କ ଆଭିମୁଖ୍ୟ କ’ଣ ତାହା ଏଯାଏଁ ସ୍ପଷ୍ଟ ହୋଇପାରିଲାନି ।
ସରକାରଙ୍କ ବିଫଳତାକୁ ନେଇ ଗାନ୍ଧୀ ଜୟନ୍ତୀରୁ ମାସେ ବ୍ୟାପୀ ବିଜେଡି କରିବ ଜନସମ୍ପର୍କ ପଦଯାତ୍ରା
ନନ୍ଦିଘୋଷ ବ୍ୟୁରୋ: ଜନସଂପର୍କ ପଦଯାତ୍ରା ପାଇଁ ଆଜି ଶଂଖ ଭବନରେ ବିଜୁ ଜନତା ଦଳ ପ୍ରାରମ୍ଭିକ ବୈଠକ ଅନୁଷ୍ଠିତ ହୋଇଯାଇଛି । ଦଳୀୟ ସୁପ୍ରିମୋଙ୍କ ନିର୍ଦ୍ଦେଶ ଅନୁସାରେ ଏଥର ମାସେ ବ୍ୟାପୀ ପଦଯାତ୍ରା କରିବାକୁ ବୈଠକରେ ନିଷ୍ପତ୍ତି ନିଆଯାଇଛି । ଯାହା ଅକ୍ଟୋବର ଦୁଇ ଗାନ୍ଧୀ ଜୟନ୍ତୀରୁ ନଭେମ୍ବର ଦୁଇ ଯାଏଁ ସମସ୍ତ ନିର୍ବାଚନ ମଣ୍ଡଳୀରେ ଅନୁଷ୍ଠିତ ହେବ ଏବଂ ସରକାରଙ୍କ ବିଫଳତା ନେଇ ରାଜ୍ୟବାସୀଙ୍କୁ ସଚେତନ କରାଯିବ । ପୂର୍ବରୁ ଅକ୍ଟୋବର ଦୁଇ ଗାନ୍ଧୀ ଜୟନ୍ତୀରୁ ଅକ୍ଟୋବର ୧୧ ଜୟପ୍ରକାଶ ନାରାୟଣ ଜୟନ୍ତୀ ଯାଏଁ ବିଜେଡି ପଦଯାତ୍ରା କରୁଥିଲା । ଆବଶ୍ୟକ ପଡ଼ିଲେ, ଏହାକୁ ଦ୍ବିତୀୟ ପର୍ଯ୍ୟାୟରେ ପରିବର୍ଦ୍ଧିତ ଜନସଂପର୍କ ପଦଯାତ୍ରାରେ ସଂପ୍ରସାରିତ କରୁଥିଲେ ବିଜୁ ଜନତା ଦଳ ।
ପ୍ରତିବର୍ଷ ପରି ଚଳିତବର୍ଷ ବି ଅକ୍ଟୋବର ଦୁଇ ଗାନ୍ଧୀ ଜୟନ୍ତୀରୁ ଆରମ୍ଭ ହେବ ବିଜେଡିର ଜନସଂପର୍କ ପଦଯାତ୍ରା । ହେଲେ ଏଥର ୯ ଦିନ ନୁହେଁ ଏହା ମାସେ ବ୍ୟାପୀ ଚାଲିବ । ରାଜ୍ୟର ସମସ୍ତ ନିର୍ବାଚନ ମଣ୍ଡଳୀରେ ଏହାକୁ ନଭେମ୍ବର ଦୁଇ ଯାଏଁ କରିବାକୁ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଆଜି ପଦଯାତ୍ରା ପ୍ରାରମ୍ଭିକ ବୈଠକରେ ନିର୍ଦ୍ଦେଶ ଦେଇଛନ୍ତି । ପୂର୍ବରୁ ଏହା ଅକ୍ଟୋବର ଦୁଇ ଗାନ୍ଧୀ ଜୟନ୍ତୀରୁ ଅକ୍ଟୋବର ୧୧ ଜୟପ୍ରକାଶ ନାରାୟଣ ଜୟନ୍ତୀ ଯାଏଁ ଚାଲୁଥିଲା । ତେବେ ବିଭିନ୍ନ ସମୟରେ ଲୋକଙ୍କ ଆଗ୍ରହ, ପର୍ବପର୍ବାଣୀ ବା ପ୍ରାକୃତିକ ବିପର୍ଯ୍ୟୟ ଯୋଗୁଁ ଏହାକୁ ପରିବର୍ଦ୍ଧିତ କରେ ବିଜୁ ଜନତା ଦଳ । ଚଳିତ ଥର ପ୍ରଥମରୁ ହିଁ ଏହାକୁ ମାସେ ବ୍ୟାପୀ କରିବାକୁ ନିଷ୍ପତ୍ତି ନିଆଯାଇଛି । କାରଣ ସରକାରଙ୍କ ବିରୋଧରେ ବିଭିନ୍ନ ପ୍ରସଙ୍ଗରେ ଜନଅସନ୍ତୋଷ ବଢିବାରେ ଲାଗିଛି । ଏହାକୁ ଲକ୍ଷ୍ୟ କରି ସରକାରଙ୍କ ବିଫଳତା ନେଇ ଅଧିକରୁ ଅଧିକ ଲୋକଙ୍କୁ ଜନସଂପର୍କ ପଦଯାତ୍ରା ମାଧ୍ୟମରେ ସଚେତନ କରିବ ବିଜେଡି ।
ବିଜେପି ସରକାର ବିରୋଧରେ ମାଳମାଳ ଅଭିଯୋଗ । ଗତ ୧୫ ମାସରେ ରାଜ୍ୟର ସାମ୍ପ୍ରତିକ ସ୍ଥିତି ଓ ଜନବିରୋଧୀ କାର୍ଯ୍ୟ ସରକାରଙ୍କ ଅସଲ ଚରିତ୍ରକୁ ପଦାରେ ପକାଇଥିବା ଅଭିଯୋଗ କରିଛି ବିଜୁ ଜନତା ଦଳ । ନବୀନ ମୁଖ୍ୟମନ୍ତ୍ରୀ ଥିବା ସମୟରେ ବାରମ୍ବାର କେନ୍ଦ୍ରକୁ ଓଡ଼ିଶାର ନ୍ୟାଯ୍ୟ ଅଧିକାର ପାଇଁ ଦାବି କରି ଆସୁଥିଲେ । ହେଲେ ରାଜ୍ୟରେ ଏବେ ବିଜେପି ସରକାର ଥିବା ସତ୍ତ୍ବେ ଓଡ଼ିଶାକୁ କେନ୍ଦ୍ର ଅବହେଳା କରୁଥିବାରୁ ପ୍ରଶ୍ନ କରିଛି ବିଜେଡି । ଏହା ବିରୋଧରେ ବିଜେଡି ଲଢେଇ ଜାରି ରଖିବାକୁ ନିର୍ଦ୍ଦେଶ ଦେଇଛନ୍ତି ଦଳୀୟ ସୁପ୍ରିମୋ ନବୀନ ପଟ୍ଟନାୟକ । ଲୋକଙ୍କ ପାଖକୁ ଯାଇ ରାଜ୍ୟବାସୀଙ୍କ ସ୍ବର ସାଜି ସମସ୍ତ ସମସ୍ୟାକୁ ନେଇ ବିଜେଡି ତୀବ୍ର ଲଢ଼େଇ କରିବାକୁ ସଜବାଜ ହେଉଛି ।
ଜନସଂପର୍କ ପଦଯାତ୍ରା ମାଧ୍ୟମରେ ଲୋକଙ୍କୁ ଯୋଡ଼ି ଚାଲିଛି ବିଜୁ ଜନତା ଦଳ । ସେବା, ସ୍ବାଭିମାନ ଓ ସଂଗ୍ରାମ ବିଜେଡିର ଆଦର୍ଶ । ବିରୋଧୀ ଦଳରେ ଥିବା ସତ୍ତ୍ବେ ଓଡ଼ିଶାବାସୀଙ୍କ ସେବା, ଓଡ଼ିଆ ଜାତିର ସ୍ବାଭିମାନର ସୁରକ୍ଷା ଓ ଓଡ଼ିଶାର ସ୍ବାର୍ଥ ପାଇଁ, ନବୀନ ପଟ୍ଟନାୟକ ସଂଗ୍ରାମ ଜାରି ରଖି ସମସ୍ତଙ୍କ ପାଇଁ ପ୍ରେରଣା ହୋଇ ପାରିଛନ୍ତି ।
ବିଧାନସଭାକୁ ଡରିଲେ ରାଜ୍ୟ ସରକାର: ଆଲୋଚନା ନ କରିବା ଲାଗି ଶାସକ ଦଳର ରଣନୀତି, ବିଜେଡି କହିଲା ବିତର୍କର ଆବଶ୍ୟକତା ରହିଛି
ନନ୍ଦିଘୋଷ ବ୍ୟୁରୋ: ବିଧାନସଭାକୁ ଡରୁଛନ୍ତି ରାଜ୍ୟ ସରକାର । ଗୃହରେ ଆଲୋଚନା ନକରିବା ଲାଗି ଶାସକ ଦଳ କରୁଛି ରଣନୀତି । ବିଜେପି ସରକାର ସୁଶାସନ ଦେବାରେ ବିଫଳ ହେବାରୁ ଆଲୋଚନା ଚାହୁଁନାହିଁ । ବିଧାନସଭାରେ ଆଲୋଚନା କାହିଁକି ହେଉନି ଏନେଇ ବିତର୍କର ଆବଶ୍ୟକ ଅଛି କହିଲା ବିଜେଡି । କଂଗ୍ରେସ କହିଛି ଶାସକ ଦଳ ନିଜ ଇଚ୍ଛାରେ ଗୃହ ଚଳାଉଛି । ବିରୋଧୀଙ୍କ ଅଭିଯୋଗକୁ ଖଣ୍ଡନ କରିଛି ବିଜେପି ।
ବିଧାନସଭା କିଏ ଚଳାଇ ଦେଲା ନାହିଁ ? କାହିଁକି ଗୃହରେ ହୋଇପାରିଲାନି ଆଲୋଚନା ? ଏଥିପାଇଁ ଦାୟୀ କିଏ ? ଶାସକ ନା ବିରୋଧୀ ? ସ୍ବଳ୍ପକାଳୀନ ମୌସୁମୀ ଅଧିବେଶନ ଦିନକୁ ପୂର୍ବରୁ ସରିବା ପରେ ଏପରି ରାଜନୈତିକ ପୋଷ୍ଟମର୍ଟମ ଆରମ୍ଭ ହୋଇଛି । ବରିଷ୍ଠ ବିଜେଡି ବିଧାୟକ ଅରୁଣ ସାହୁ କହିଛନ୍ତି ବିଧାନସଭାରେ ଓଡ଼ିଶାର ଜନ ସାଧାରଣଙ୍କ କଥା ଆଲୋଚନା ହେବା କଥା, ହେଲେ ତାହା ହେଲା ନାହିଁ । ଗୃହକୁ ଚଳେଇବା ଦାୟିତ୍ୱ ସରକାରୀ ଦଳର । ତେଣୁ ବିଧାନସଭା ନଚାଲିବା ପାଇଁ ଶାସକ ଦଳ ବେଶୀ ଦାୟୀ । ଆଲୋଚନା କାହିଁକି ହେଉନି ଏନେଇ ବିତର୍କର ଆବଶ୍ୟକତା ରହିଛି । ସାରା ଓଡ଼ିଶାରେ ବିଜେପି ସରକାର ବିରୋଧରେ ଅନାସ୍ଥା ଭାବ ବଢ଼ିଛି । ସାର କଥା ଆଲୋଚନା ହେଲାନି ବୋଲି ଆମେ ରାଜ୍ୟପାଳଙ୍କ ହସ୍ତକ୍ଷେପ ଚାହିଁଲୁ । ପଞ୍ଚାୟତ ପ୍ରତିନିଧିଙ୍କ କ୍ଷମତା ସଙ୍କୁଚିତ ନେଇ ବିଧାନସଭା ବାହାରେ ପ୍ରତିବାଦ କଲୁ । ହେଲେ ବିରୋଧୀଙ୍କ କୌଣସି କଥାକୁ ଗ୍ରହଣ କରୁନାହାନ୍ତି ସରକାର । କଂଗ୍ରେସ କହିଛି- ବିଧାନସଭାର ବିଧି ବଦଳରେ ଶାସକ ଦଳର କିଛି ଲୋକଙ୍କ କଥାରେ ବିଧାନସଭା ଚାଲୁଛି । କଂଗ୍ରେସକୁ ଅନାସ୍ଥାକୁ ଅଗ୍ରାହ୍ୟ କରି ଗଣତନ୍ତ୍ରକୁ ହତ୍ୟା କରାଯାଇଛି । ଏହା ବିରୋଧରେ କଂଗ୍ରେସ ରାଜ୍ୟପାଳଙ୍କ ହସ୍ତକ୍ଷେପ ଲୋଢିବ ।
ମୌସୁମୀ ଅଧିବେଶନ କାଳରେ ଗୃହରେ ୫ଦିନ ଧରି ଆଲୋଚନା, ପ୍ରଶ୍ନକାଳ, ଶୂନ୍ୟକାଳ ଓ ମୁଲତବୀ ପ୍ରସ୍ତାବ ହୋଇପାରିଲାନି । ଶାସକ ଦଳକୁ ଦୁଇ ବିରୋଧୀ ଦଳ ଟାର୍ଗେଟ କରିବା ପରେ ବରିଷ୍ଠ ବିଜେପି ବିଧାୟକ ପଦ୍ମଲୋଚନ ପଣ୍ଡା ଭିନ୍ନ ଯୁକ୍ତି ବାଢିଛନ୍ତି । କଂଗ୍ରେସ ଗଣତନ୍ତ୍ର ବ୍ୟବସ୍ଥା ନଜାଣି ଅନାସ୍ଥା ଆଣିବାରୁ ଗୃହକାର୍ଯ୍ୟ ବାଧାପ୍ରାପ୍ତ ହେଲା । ଶାସକ ଦଳ ଚାହୁଁଥିଲା ଅନାସ୍ଥା ପ୍ରସ୍ତାବ ଗୃହରେ ଆଲୋଚନା ହେଉ । ମୌସୁମୀ ଅଧିବେଶନ ଗୃହରେ ଶାସକ ଓ ବିରୋଧୀ ବିଭିନ୍ନ ପ୍ରସଙ୍ଗରେ ମୁହାମୁହିଁ ହେବା ପରେ ଗୃହ ବାହାରେ ଦୋଷ ଲଦାଲଦି ହୋଇଛନ୍ତି ।
ମହାନଦୀରେ ନାହିଁ ବନ୍ୟା ସ୍ଥିତି, ହେଲେ ବଢ଼ିବ ଜଳପ୍ରବାହ
ନନ୍ଦିଘୋଷ ବ୍ୟୁରୋ: ମହାନଦୀରେ ନାହିଁ ବନ୍ୟା ପରିସ୍ଥିତି । ମହାନଦୀରେ ବନ୍ୟା ପରିସ୍ଥିତି ନଥିଲେ ବି ବଢିବ ଜଳ ପ୍ରବାହ । ହୀରାକୁଦ ଓ ଖଇରମାଳ ଉପରେ ଗତକାଲି ବର୍ଷା ହୋଇନି । ଆଜି ମଧ୍ୟ ମୁଣ୍ଡଳିରେ ବର୍ଷାର ସମ୍ଭାବନା ନାହିଁ । ହେଲେ ଆସନ୍ତାକାଲି ସକାଳ ୮ ଟାରୁ ୧୦ ଟା ଭିତରେ ମୁଣ୍ଡଳିରେ ୬ ଲକ୍ଷ କ୍ୟୁସେକ ପାଣି ଆସିବ । ଯାହା ଦ୍ବାରା ଶାଖା ନଦୀର ଜଳସ୍ତର ବୃଦ୍ଧି ପାଇବ । ବର୍ତ୍ତମାନ ହୀରାକୁଦର ୨୦ଟି ଗେଟ ଖୋଲା ଅଛି । ହୀରାକୁଦ ଜଳସ୍ତର ବର୍ତ୍ତମାନ 629.06 ଫୁଟ୍ ଥିବାବେଳେ ଜଳ ଭଣ୍ଡାର ଭିତରକୁ ପ୍ରତି ସେକେଣ୍ଡରେ ପ୍ରବେଶ କରୁଛି ୨ ଲକ୍ଷ ୮୪ ହଜାର 1୨୭ ଘନଫୁଟ ବନ୍ୟାଜଳ । ୨୦ଟି ଗେଟ୍ ଦେଇ ନିଷ୍କାସିତ ହେଉଛି ୩ ଲକ୍ଷ ୬୦ ହଜାର 3୪୧ ଘନଫୁଟ ବନ୍ୟାଜଳ । ଅନ୍ୟପଟେ ରେଙ୍ଗାଲିର ଗୋଟିଏ ଗେଟ ଦେଇ ୨୨ ଶହ ୪୭ କ୍ୟୁସେକ ଜଳ ନିଷ୍କାସନ ହେଉଛି । ଏହା ଆଜି ସନ୍ଧ୍ୟା ସୁଦ୍ଧା ବଢିବ । ପ୍ରଭାବରେ ଆସନ୍ତାକାଲି ଦକ୍ଷିଣ ଓଡିଶାରେ ଆସିପାରେ ବନ୍ୟା । ଏନେଇ ସୂଚନା ଦେଇଛନ୍ତି ଜଳସେଚନ ବିଭାଗର ସର୍ବୋଚ୍ଚ ଯନ୍ତ୍ରୀ ଚନ୍ଦ୍ରଶେଖର ପାଢ଼ୀ ।
ସେପଟେ ଲଗୁଚାପ ବର୍ଷାକୁ ନେଇ ବି ସ୍ବତନ୍ତ୍ର ରିଲିଫ୍ କମିଶନର ଭିଡିଓ କନଫରେନିଂ ମାଧ୍ଯମରେ ନବରଙ୍ଗପୁର, କୋରାପୁଟ, ମାଲକାନଗିରି, ରାୟଗଡା, ଗଜପତି, କଳାହାଣ୍ଡି, କନ୍ଧମାଳ, ଗଞ୍ଜାମ, ନୟାଗଡ, ପୁରୀ, ଖୋର୍ଦ୍ଧା, ଜଗତସିଂହପୁର, କଟକ, କେନ୍ଦ୍ରାପଡା, ଯାଜପୁର, ଭଦ୍ରକ, ବାଲେଶ୍ବର ଏବଂ ନୂଆପଡାର ଜିଲ୍ଲାପାଳମାନଙ୍କ ସହିତ ସମ୍ଭାବ୍ୟ ପରିସ୍ଥିତିର ମୁକାବିଲା ପାଇଁ ପ୍ରସ୍ତୁତି ସମ୍ୱନ୍ଧରେ ଆଲୋଚନା କରିଛନ୍ତି । ବୈଠକରେ ଜଳ ସଂପଦ ବିଭାଗର ସର୍ବୋଚ୍ଚ ଯନ୍ତ୍ରୀ, ଭାରତ ପାଣିପାଗ ବିଭାଗର ନିର୍ଦ୍ଦେଶିକା, OSDMAର କାର୍ଯ୍ୟନିର୍ବାହୀ ନିର୍ଦ୍ଦେଶକ, ତଥା ସ୍ବତନ୍ତ୍ର ରିଲିଫ୍ କମିଶନରଙ୍କ କାର୍ଯ୍ୟାଳୟର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । ବିଶେଷ ଭାବରେ ପ୍ରଭାବିତ ହେବାକୁ ଥିବା ଜିଲ୍ଲା କୋରାପୁଟ ଓ ମାଲକାନାଗିରି ସହିତ ଅନ୍ୟାନ୍ୟ ଜିଲ୍ଲାଗୁଡିକର ଜିଲ୍ଲାପାଳମାନଙ୍କୁ ସଜାଗ ରହିବା ପାଇଁ ନିର୍ଦ୍ଦେଶ ଦେଇଛନ୍ତି ଜଳସେଚନ ବିଭାଗର ସର୍ବୋଚ୍ଚ ଯନ୍ତ୍ରୀ । ଆବଶ୍ୟକ ସ୍ଥଳେ ଅଗ୍ନିଶମ ବାହିନୀ ଓ ODRAF ଦଳଗୁଡ଼ିକୁ ନିୟୋଜିତ କରିବାକୁ ପରାମର୍ଶ ଦିଆଯାଇଛି ।
ମାଆ ରାମଚଣ୍ଡୀଙ୍କ ଷୋଡଶ ଉପଚାର ପୂଜା: ମାଆଙ୍କ ପ୍ରିୟ ପୋଡ଼ା ମାଛ
ନନ୍ଦିଘୋଷ ବ୍ୟୁରୋ: ପାର୍ବଣରେ ନିଆରା ପରମ୍ପରା । କୋଣାର୍କର ମାଆ ରାମଚଣ୍ଡୀଙ୍କ ପୀଠରେ ଚାଲିଛି ଷୋଡଶ ଉପଚାର ପୂଜା । ପୀଠରେ ମାଆଙ୍କୁ ସନ୍ତୁଷ୍ଟି ପାଇଁ ଦିଆଗଲା ପୋଡା ମାଛ ବଳି । ପ୍ରତିଦିନ ଦୁଇ ବେଳା ଚାଲିଛି ଚଣ୍ଡୀପାଠ । ମାଆ କେତେବେଳେ ବନଦୁର୍ଗା ବେଶରେ ତ କେତେବେଳେ ବଗଳାମୁଖୀ ବେଶରେ ଭକ୍ତଙ୍କୁ ଦେଉଛନ୍ତି ଦର୍ଶନ ।
ପାର୍ବଣରେ ଚଳଚଞ୍ଚଳ ପୁରୀ କୋଣାର୍କ ବେଳାମାର୍ଗ କୁଶଭଦ୍ରା ନଦୀ ମୁହାଣ ନିକଟରେ ଅବସ୍ଥିତ ମାଆ ରାମଚଣ୍ଡୀଙ୍କ ପୀଠ । ଲାଗୁଛି ଭକ୍ତଙ୍କ ଗହଳି । ଚଣ୍ଡୀପାଠ ସାଙ୍ଗକୁ ଘଣ୍ଟଘଣ୍ଟାରେ କମ୍ପୁଛି ପରିବେଶ । ରାମଚଣ୍ଡୀ ହେଉଛନ୍ତି ଦଶଭୁଜା ମହିଷାମର୍ଦ୍ଦିନୀ ମା’ ଦୁର୍ଗା । ମାଆଙ୍କ ନିକଟରେ ମୂଳାଷ୍ଟମୀଠାରୁ ମହାଷ୍ଟମୀ ପର୍ଯ୍ୟନ୍ତ ବିଶେଷ ପୂଜା ନୀତି ଅନୁଷ୍ଠିତ ହୋଇଥାଏ । ବର୍ତ୍ତମାନ ମାଆଙ୍କ ନିକଟରେ ପୋଡା ମାଛ ବଳି ସାଙ୍ଗକୁ ଦୁଇ ବେଳା ଚଣ୍ଡୀପାଠ ହେଉଛି । ଯାହା ଅନ୍ୟ କୌଣସି ଶକ୍ତିପୀଠରେ ହୋଇ ନଥାଏ ।
କୁହାଯାଏ କଳାପାହାଡ କୋଣାର୍କ ମନ୍ଦିର ଆକ୍ରମଣ କରିବା ବେଳେ ମାଆ ରାମଚଣ୍ଡୀ ମାଲୁଣୀ ବେଶରେ ମନ୍ଦିରରୁ ପାଣି ଆଣିବା ପାଇଁ କୁଶଭଦ୍ରା ନଦୀକୁ ଯାଇ ଅନ୍ତର୍ଦ୍ଧାନ ହୋଇ ଯାଇଥିଲେ । ପଣ୍ଡାମାନେ ସ୍ଵପ୍ନାଦେଶ ପାଇ କୁଶଭଦ୍ରା ନଦୀ କୂଳରେ ମାଆଙ୍କ ମନ୍ଦିର ପ୍ରତିଷ୍ଠା କରି ପୂଜା କରିଆସୁଛନ୍ତି । ମାଆଙ୍କ ପୀଠ ଏକ ପ୍ରସିଦ୍ଧ ତନ୍ତ୍ରପୀଠ ଭାବେ ଖ୍ୟାତି ଲାଭ କରିଛି । ମାଆଙ୍କୁ ବନଦୁର୍ଗା ମନ୍ତ୍ରରେ ପୂଜା କରାଯାଏ । ସକାଳ ମଙ୍ଗଳ ଆଳତୀ ଓ ରାତିରେ ବଡସିଂହାର ଧୂପ ଆଳତୀକୁ ମିଶାଇ ମାଆଙ୍କ ନିକଟରେ ୫ ଥର ଆଳତୀ ହୁଏ ।
ହକ ପାଇଁ ରାଜରାସ୍ତାରେ କମ୍ୟୁନିଟି ସପୋର୍ଟ ଷ୍ଟାଫ, ଚତୁର୍ଥ ଦିନରେ ପହଞ୍ଚିଲା ଆନ୍ଦୋଳନ
ନନ୍ଦିଘୋଷ ବ୍ୟୁରୋ: ସରକାର ଦରମା ଦେଉନାହାନ୍ତି କି ଶୁଣୁନାହାନ୍ତି । ହକ ପାଇଁ ଗର୍ଜୁଛନ୍ତି ଶତାଧିକ ମହିଳା । ଚତୁର୍ଥ ଦିନରେ ପହଞ୍ଚିଲା କମ୍ୟୁନିଟି ସପୋର୍ଟ ଷ୍ଟାଫଙ୍କ ଆନ୍ଦୋଳନ । ପୁରୀ ଜିଲ୍ଲା ଅସ୍ତରଙ୍ଗ ଓ କାକଟପୁର ବ୍ଲକ ପରିସରରେ ଶତାଧିକ ଜିପିଏଲଏଫ କର୍ମୀଙ୍କ ଧାରଣା । ନୂଆପଡା, ବିଞ୍ଝାରପୁର ସମେତ ଧରାକୋଟରେ ବି ବିକ୍ଷୋଭ ।
ପେଟରେ ଭୋକ, ମନରେ କୋହ ନେଇ ଗର୍ଜୁଛନ୍ତି ମହିଳା । ଚତୁର୍ଥ ଦିନରେ ପହଞ୍ଚିଲା ଆନ୍ଦୋଳନ । ପୁରୀ ଜିଲ୍ଲା ଅସ୍ତରଙ୍ଗ ଓ କାକଟପୁର ବ୍ଲକ ପରିସରରେ ଶତାଧିକ ଜିପିଏଲଏଫ କର୍ମୀଙ୍କ ଧାରଣା । MBK, CRP, ବ୍ୟାଙ୍କ ମିତ୍ର, କୃଷି ମିତ୍ର, ପ୍ରାଣୀ ମିତ୍ର, LSPର ସମସ୍ତ ୬ କମ୍ୟୁନିଟି ସପୋର୍ଟ ଷ୍ଟାଫଙ୍କୁ ଗତ ୬ ମାସ ହେଲା ଦରମା ମିଳିନି । ଶୁଣୁନାହାନ୍ତି ସରକାର । ଠିକ ସମୟରେ ଦରମା ସହ ଫିକ୍ସ ଦରମା ପ୍ରଦାନ ଦାବିରେ ବିଡ଼ିଓଙ୍କ ଅଫିସ ଆଗରେ ଗର୍ଜିଛନ୍ତି ମହିଳା । ସେପଟେ ୭ ଦଫା ଦାବି ନେଇ ଗଞ୍ଜାମ ଧରାକୋଟ ବ୍ଲକ ମୁଖ୍ୟ ଫାଟକ ଆଗରେ ଧାରଣା ଦେଇଛନ୍ତି ସିଆରପି, MBK ଓ ବ୍ୟାଙ୍କ ମିତ୍ର ।
ନୂଆପଡା ଜିଲ୍ଲାରେ ଗଣଧାରଣା ଦେଇଛନ୍ତି GPLF ସଂଘର ସଦସ୍ୟ । ମିଶନ ଶକ୍ତି କମ୍ୟୁନିଟି ସପୋର୍ଟ ଷ୍ଟାଫଙ୍କୁ ପ୍ରୋତ୍ସାହନ ରାଶି ପରିବର୍ତ୍ତେ ପାରିଶ୍ରମିକ ଦେବା ଦାବି କରି GPLF ସଂଘର ସଦସ୍ୟ ମାନେ ଧାରଣା ଦେଇଛନ୍ତି । ସେପଟେ ଯାଜପୁର ବିଞ୍ଝାରପୁର ପଞ୍ଚାୟତ ସମିତି କାର୍ଯ୍ୟାଳୟ ମୁଖ୍ୟ ଫାଟକରେ ତାଲା ପକାଇଲେ GPLF ମହିଳା ସଙ୍ଘ । ସରକାର ଦାବି ପୂରଣ ନକଲେ ଆଗକୁ ଆନ୍ଦୋଳନ ତୀବ୍ରତର ହେବ ବୋଲି ଚେତାବନୀ ଦେଇଛି ସଂଘ ।
ଟିମ୍ ଇଣ୍ଡିଆରୁ ୫ ଖେଳାଳି ଆଉଟ, ଜଣେ ଖେଳିବାକୁ କରିଦେଲେ ମନା
ନନ୍ଦିଘୋଷ ବ୍ୟୁରୋ: ଓ୍ବେଷ୍ଟଇଣ୍ଡିଜ ବିପକ୍ଷ ଟେଷ୍ଟ ସିରିଜ ପାଇଁ ଭାରତୀୟ ଟଇମ୍ ଘୋଷଣା ହୋଇଛି । ୧୫ ଖେଳାଳିଙ୍କ ଏହି ସ୍ବାର୍ଡର ଅଧିନାୟକ ଶୁବମନ ଗିଲ ରହିଥିବା ବେଳେ ରବୀନ୍ଦ୍ର ଜାଡେଜାଙ୍କୁ ଉପଅଧିନାୟକ କରାଯାଇଛି । ରିଷଭ ପନ୍ତ ଆଘାତ କାରଣରୁ ଟିମ୍ ଇଣ୍ଡିଆରେ ସ୍ଥାନ ପାଇ ନଥିବାରୁ ତାଙ୍କ ସ୍ଥାନରେ ଉପଅଧିନାୟକ ଦାୟିତ୍ବ ଜାଡେଜାଙ୍କୁ ମିଳିଛି । ତେବେ ଖେଳାଳିଙ୍କ ନାଁ ଘୋଷଣା ପରେ ୫ ଜଣ ଖେଳାଳିଙ୍କୁ ନିରାଶ ହେବାକୁ ପଡ଼ିଛି । କାରଣ ଓ୍ବେଷ୍ଟଇଣ୍ଡିଜ ସିରିଜ ପାଇଁ ଏମାନଙ୍କୁ ଟିମ୍ ଇଣ୍ଡିଆରେ ସ୍ଥାନ ମିଳିନି । ଏହାସହ ଆଉ ଜଣେ ଖେଳାଳି ଖେଳିବାକୁ ମନା କରିଦେଇଛନ୍ତି । ଆସନ୍ତୁ ଜାଣିବା, କାହାକୁ ଟିମରେ ସ୍ଥାନ ମିଳିନି ଓ କିଏ ଖେଳିବାକୁ କରିଦେଲେ ମନା ।
କରୁଣ ନାୟର
ଓ୍ବେଷ୍ଟଇଣ୍ଡିଜ ଟେଷ୍ଟ ସିରିଜରେ ବାଦ ପଡ଼ିଥିବା ପ୍ରଥମ ଖେଳାଳି ହେଲେ କରୁଣ ନାୟର । ଏହି ଡାହାଣହାତି ବ୍ୟାଟରଙ୍କୁ ଇଂଲଣ୍ଡ ଗସ୍ତରେ ସୁଯୋଗ ମିଳିଥିଲା । ୪ଟି ମ୍ୟାଚ ଖେଳି ନାୟର କେବଳ ଗୋଟିଏ ଅର୍ଦ୍ଧଶତକ ମାରିବାକୁ ସକ୍ଷମ ହୋଇଥିଲେ । ଆଉ ଏହାର ପରିଣାମ ଓ୍ବେଷ୍ଟଇଣ୍ଡିଜ ଗସ୍ତରୁ ଆଉଟ ହୋଇ ତାଙ୍କୁ ଭରିବାକୁ ପଡ଼ିଛି ।
ଅଭିମନ୍ୟୁ ଈଶ୍ବରନ୍
ଅଭିମନ୍ୟୁଙ୍କ ସହ ପୁଣି ସେଇଆ ହେଲା, ଯାହା ଆଗରୁ ହୋଇ ଆସୁଛି । ଏହି ଡାହାଣହାତି ବ୍ୟାଟର ଇଂଲଣ୍ଡ ଗସ୍ତରେ ଗୋଟିଏ ବି ମ୍ୟାଚ୍ ଖେଳିବାର ସୁଯୋଗ ପାଇଲେନି । ବେଞ୍ଚରେ ବସି ବସି ତାଙ୍କ ଗସ୍ତ ଶେଷ ହୋଇଗଲା । ଆଉ ଏବେ ଓ୍ବେଷ୍ଟଇଣ୍ଡିଜ ଗସ୍ତ ପାଇଁ ଟିମରୁ ହିଁ ତାଙ୍କୁ ବାହାର କରିଦିଆଗଲା । ମୁଖ୍ୟକୋଚ ଅଜିତ ଅଗରକରଙ୍କ କହିବା ଅନୁସାରେ, ଘରୋଇ ସିରିଜରେ ତୃତୀୟ ଓପ୍ନରଙ୍କ ସ୍ଥାନ ନାହିଁ । ତେଣୁ ଅଭିମନ୍ୟୁଙ୍କୁ ଟିମରେ ସ୍ଥାନ ମିଳିନି । ଯଦି ଆବଶ୍ୟକ ହୁଏ ତେବେ ଅଭିମନ୍ୟୁଙ୍କୁ ନିଶ୍ଚିତ ସୁଯୋଗ ମିଳିବ ।
ଆକାଶ ଦୀପ
ଆକାଶ ଦୀପଙ୍କ ମଧ୍ୟ ଓ୍ବେଷ୍ଟଇଣ୍ଡିଜ ସିରିଜ ପାଇଁ ଟିମରେ ସ୍ଥାନ ମିଳିନି । ଇଂଲଣ୍ଡ ସିରିଜ ଡ୍ର କରିବାରେ ଏହି ଖେଳାଳିଙ୍କ ବଡ଼ ଭୁମିକା ଥିଲା । ହେଲେ ଆକାଶଙ୍କ ସ୍ଥାନରେ ପ୍ରସିଦ୍ଧ କୃଷ୍ଣାଙ୍କୁ ସୁଯୋଗ ଦିଆଗଲା । ଆକାଶ ଦୀପ ଏବେ ଇରାନୀ ଟ୍ରଫିରେ ରେଷ୍ଟ ଅଫ୍ ଇଣ୍ଡିଆ ପାଇଁ ଖେଳିବେ ।
ଶାର୍ଦୁଲ ଠାକୁର
ଶାର୍ଦୁଲଙ୍କୁ ବି ଟେଷ୍ଟ ଟିମରେ ସ୍ଥାନ ମିଳିନି । ଇଂଲଣ୍ଡ ସିରିଜିରେ ତାଙ୍କୁ ଦୁଇଟି ମ୍ୟାଚ୍ ଖେଳିବାକୁ ସୁଯୋଗ ମିଳିଥିଲା । ଏଥିରେ ତାଙ୍କୁ ମାତ୍ର ୨୭ ଓଭର ଖେଳିବାକୁ ସୁଯୋଗ ମିଳିଥିଲା । ଆଉ ଏହି ୨୭ ଓଭରରେ ସେ ୨ଟି ଓ୍ବିକେଟ୍ ନେଇଥିଲେ । ସେହିପରି ବ୍ୟାଟିଂରେ ବି ସେ କିଛି କମାଲ ଦେଖାଇ ପାରି ନଥିଲେ । ଏହି କାରଣରୁ ଟିମ୍ ଇଣ୍ଡିଆରେ ତାଙ୍କୁ ସୁଯୋଗ ମିଳିନି ।
ଅଂଶୁଲ କମ୍ବୋଜ
ଧ୍ରୁତ ବୋଲର ଅଂଶୁଲ କମ୍ବୋଜ ମଞ୍ଚେଷ୍ଟର ଟେଷ୍ଟରେ ଡ୍ରବ୍ୟୁ କରିଥିଲେ । ଆଉ ଏହି ମ୍ୟାଚରେ ସେ ଗୋଟିଏ ଓ୍ବିକେଟ୍ ନେବାକୁ ସକ୍ଷମ ହୋଇଥିଲେ । ଆଉ ଏବେ ଅଂଶୁଲଙ୍କୁ ଟିମରୁ ବାହାର ରାସ୍ତା ଦେଖାଇ ଦିଆଯାଇଛି ।
ଜଣେ ଖେଳାଳି ଖେଳିବାକୁ କରିଦେଲେ ମନା
୫ ଜଣ ଖେଳାଳିଙ୍କୁ ଟିମ୍ ଇଣ୍ଡିଆରେ ସ୍ଥାନ ମିଳି ନଥିଲେ ବି ଜଣେ ଖେଳାଳି ପାଇଥିବା ସୁଯୋଗକୁ ଛାଡି ଦେଇଛନ୍ତି । ଆଉ ଏହି ଖେଳାଳି ହେଲେ ଶ୍ରେୟାସ ଆୟର । ଓ୍ବେଷ୍ଟଇଣ୍ଡିଜ ଟିଷ୍ଟ ସିରିଜ ପାଇଁ ଶ୍ରେୟାସଙ୍କୁ ଟିମରେ ନିଆଯିବାର ଥିଲା । ହେଲେ ଫିଟନେସ୍ କଥା କହି ଖେଳିବାକୁ ମନା କରିଦେଇଥିଲେ । ଅଜିତ ଅଗରକର କହିଛନ୍ତି ଯଦି ଆୟର ଫିଟ ଥାନ୍ତେ ତେବେ ତାଙ୍କୁ ଓ୍ବେଷ୍ଟଇଣ୍ଡିଜ ସିରିଜରେ ଖେଳିବାକୁ ସୁଯୋଗ ମିଳିଥାନ୍ତା ।
୬୨ ହଜାର କୋଟି ଟଙ୍କାର ଡିଲ: ବାୟୁସେନାକୁ ମିଳିବ ୯୭ ତେଜସ୍, ପାକିସ୍ତାନ ଓ ଚୀନ ଛାନିଆ
ନନ୍ଦିଘୋଷ ବ୍ୟୁରୋ: ଭାରତର ଆକାଶ ସୀମାକୁ ଅଭେଦ୍ୟ କରିବେ ସ୍ବଦେଶୀ ଜ୍ଞାନ କୌଶଳରେ ନିର୍ମିତ ଫାଇଟର ଜେଟ୍ ତେଜସ୍ । ଆଖି ପିଛୁଳାକେ ଉଡାଇ ଦେବେ ଶତ୍ରୁଙ୍କ ବିମାନ । କାରଣ ଭାରତୀୟ ବାୟୁସେନାକୁ ମିଳିବାକୁ ଯାଉଛି ୯୭ ତେଜସ୍ । ଏଥିପାଇଁ ୬୨ ହଜାର ୩୭୦ କୋଟି ଟଙ୍କାର ମେଗା ଡିଲ ଉପରେ ମୋହର ମାରିଛନ୍ତି ଭାରତ ସରକାର । ପ୍ରତିରକ୍ଷା ମନ୍ତ୍ରାଳୟ ହାଲ ସହ ୯୭ ତେଜସ୍ ଲାଇଟ କମ୍ବାକ୍ଟ ଏୟାରକ୍ରାଫ୍ଟ (LCA Mk-1A) କିଣିବାକୁ ଚୁକ୍ତି କରିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟ କମିଟି ଅନ୍ ସିକ୍ୟୁରିଟି (CCS)ରୁ ମଞ୍ଜୁରି ମିଳିବାର ଏକ ମାସ ପରେ ହୋଇଛି । ଏହା ପୂର୍ବରୁ ୨୦୨୧ରେ ସରକାର ୮୩ ତେଜସ୍ ପାଇଁ ୪୮ ହଜାର କୋଟି ଟଙ୍କାର ଚୁକ୍ତି କରିଥିଲେ ।
୮୩ ପରେ ୯୭ ତେଜସ୍ ଭାରତୀୟ ବାୟୁସେନାକୁ ମିଳିବାକୁ ଯାଉଥିବା ଖବର ପାଇବା ପରେ ପଡ଼ୋଶୀ ପାକିସ୍ତାନ ଓ ଚୀନ ପରି ଦେଶଙ୍କ ମନରେ ଛନକା ପଶିଯାଇଛି । କାରଣ ତେଜସର ଜଲଓ୍ବା ସାରା ବିଶ୍ବ ଦେଖି ସାରିଛି ଓ ବିଭିନ୍ନ ସାମରିକ ପ୍ରଦର୍ଶନୀରେ ତେଜସ୍ ନିଜର ପାରଦର୍ଶିତା ଦେଖାଇ ସମସ୍ତଙ୍କୁ ଚକିତ କରିଛି । ଆଉ ଏବେ ଭାରତୀୟ ବାୟୁସେନା ପାଇଁ ୯୭ ତେଜସ୍ ଆସୁଥିବା ଖବର ଶତ୍ରୁଙ୍କ ନିଦ ହଜାଇ ଦେଇଛି ।
ତେଜସ୍ ସମ୍ପୂର୍ଣ୍ଣ ଭାବେ ସ୍ବଦେଶୀ ମଲ୍ଲଯି ରୋଲ୍ ଫାଇଟର ଜେଟ୍ । ଯାହା ଯେକୌଣସି ପରିସ୍ଥିତିରେ ଉଡ଼ାଣ ଭରିବାକୁ ସକ୍ଷମ । ଏଥିରେ ଆଧୁନିକ ସ୍ବୟଂ ରକ୍ଷା କବଚ ସିଷ୍ଟମ ଓ ଅତ୍ୟାଧୁନିକ କଣ୍ଟ୍ରୋଲ ଆକ୍ଟୁଏଟର୍ସ ରହିବ । ଏହି ଭର୍ଜନରେ ୬୪ ପ୍ରତିଶତରୁ ଅଧିକ ଇଣ୍ଡିଜିନସ କଣ୍ଟେଟ ଓ ୬୭ ପ୍ରତିଶତ ଅତ୍ୟାଧୁନିକ ଟେକ୍ନୋଲଜି ସାମିଲ କରାଯାଉଛି । ତେଜସ୍ କେବଳ ଏୟାର ଡିଫେନ୍ସରେ ସିମିତ ରହିବନି ବରଂ ଏହା ମେରିଟାଇମ୍ସ ରିକୋନସେସ୍ ଓ ସଠିକ ଭାବେ ଆକ୍ରମଣ କରିବାକୁ ସକ୍ଷମ ।
ରିପୋର୍ଟ ଅନୁସାରେ ତେଜସ୍ Mk-1Aର ଡେଲିଭରି ୨୦୨୭-୨୮ରୁ ଆରମ୍ଭ ହେବ । ଏହି ସିଂଗିଲ ଇଞ୍ଜିନ ଜେଟ୍ ଭାରତୀୟ ବାୟୁସେନାରେ ପୁରୁଣା ହୋଇ ସାରିଥିବା MiG-21 ବେଡାର ସ୍ଥାନ ନେବ ।