କେନ୍ଦୁଝର: ନାମାଙ୍କନ ଭରିଲେ କେନ୍ଦୁଝର ବିଜେଡି ସାଂସଦ ପ୍ରାର୍ଥୀ ଧନୁର୍ଜୟ ସିଦ୍ଧୁ। ଜିଲ୍ଲାପାଳଙ୍କ ନିକଟ ପହଞ୍ଚି ନିଜର ପ୍ରାର୍ଥୀପତ୍ର ଦାଖଲ କରିଛନ୍ତି । ସ୍ଥାନୀୟ କାଳୀ ପଡିଆ ଠାରୁ ହଜାର ହଜାର ବିଜେଡି କର୍ମୀ ଓ ନିଜର ସମର୍ଥକ ଙ୍କ ସହ ଆଦିବାସୀ ନୃତ୍ୟ , ମାଦଳ , ଢୋଲ ବଜାଇ ନାଚ ଗୀତ ତାଳେ ତାଳେ ଏକ ବିରାଟ ଶୋଭାଯାତ୍ରାରେ ବାହାରିଥିଲେ। ଶୋଭାଯାତ୍ରାରେ ଆସି ଜିଲ୍ଲାପାଳଙ୍କ ନିକଟରେ କେନ୍ଦ୍ରୀୟ ପର୍ଯ୍ୟବେକ୍ଷକଙ୍କ ସମ୍ମୁଖରେ ନିଜର ପ୍ରାର୍ଥୀ ପତ୍ର ଦାଖଲ କରିଛନ୍ତି । ନାମାଙ୍କନ ଦାଖଲ ସମୟରେ ଘସିପୁରା ବିଧାୟକ ପ୍ରାର୍ଥୀ ବଦ୍ରିନାରାୟଣ ପାତ୍ର,ଚମ୍ପୁଆ ବିଧାୟକ ପ୍ରାର୍ଥୀ ସନାତନ ମହାକୁଡ଼, ତେଲକୋଇ ବିଧାୟକ ପ୍ରାର୍ଥୀ ମାଧବ ସର୍ଦାର, ଉପସ୍ଥିତ ଥିଲେ। ପାଟଣା ବିଧାୟକ ପ୍ରାର୍ଥୀ ଜଗନ୍ନାଥ ନାୟକ, କେନ୍ଦୁଝର ବିଧାୟକ ପ୍ରାର୍ଥୀନୀ ମୀନା ମାଝୀ, କରଞ୍ଜିଆ ବିଧାୟକ ପ୍ରାର୍ଥୀ ବାସନ୍ତୀ ହେମ୍ବ୍ରମ,ଜିଲ୍ଲା ବିଜେଡି ସଭାପତି କୁଶ ଆପଟ, ଯୁବ ବିଜେଡି ରାଜ୍ୟ ଉପସଭାପତି ସୌମ୍ୟ ଶଙ୍କର ଚକ୍ରଙ୍କ ସହିତ ହଜାର ହଜାର ବିଜେଡି ନେତା ଓ କର୍ମୀ ଉପସ୍ଥିତ ଥିଲେ। ପ୍ରାର୍ଥୀ ପତ୍ର ଦାଖଲ ପରେ ଜିଲ୍ଲାର ବିକାଶ ପାଇଁ କାମ କରିବି ବୋଲି କହିଛନ୍ତି ଧନୁର୍ଜୟ ସିଦ୍ଧୁ।
ଜନ୍ମଦିନରେ ଜାଣନ୍ତୁ ଆଶିଷ ନେହେରାଙ୍କ ପ୍ରେମ କାହାଣୀ
ନନ୍ଦିଘୋଷ ବ୍ୟୁରୋ: ଟିମ ଇଣ୍ଡିଆର ପୂର୍ବତନ କ୍ରିକେଟର ଆଶିଷ ନେହେରା । ଆଜି ହେଉଛି ଏହି ମହାନ ବୋଲରଙ୍କ ଜନ୍ମଦିନ । ୪୫ ବର୍ଷରେ ପାଦ ଥାପିଛନ୍ତି ନେହେରା । ତେବେ ନେହେରାଙ୍କ ଜନ୍ମଦିନରେ ଆସନ୍ତୁ ଜାଣିବା ତାଙ୍କ ପ୍ରେମ କାହାଣୀ ସମ୍ପର୍କରେ । ନେହେରା ଅଭିନେତ୍ରୀ ରୁଷମାଙ୍କୁ ବିବାହ କରିଛନ୍ତି । ତେବେ ସେମାନଙ୍କ ସାକ୍ଷାତ ପ୍ରଥମେ କ୍ରିକେଟ ଗ୍ରାଉଣ୍ଡରେ ହୋଇଥିଲା । ୨୦୦୨ରେ ଇଂଲଣ୍ଡ ବିପକ୍ଷ ଭାରତ ଓବାଲରେ ମ୍ୟାଚ ଖେଳୁଥିଲା । ଏହି ସମୟରେ ପ୍ରଥମେ ଉଭୟଙ୍କ ଭେଟ ହୋଇଥିଲା । ଏହାପରେ ଉଭୟଙ୍କ ସମ୍ପର୍କ ବଢ଼ିଥିଲା । ପ୍ରଥମେ ବନ୍ଧୁତା ଏବଂ ପରେ ପ୍ରେମ ହୋଇଥିଲା । ୭ ବର୍ଷ ଧରି ଉଭୟ ଡେଟ୍ କରିଥିଲେ । ପରେ ନେହେରା ତାଙ୍କୁ ବିବାହ କରିବା ପାଇଁ କହିଥିଲେ । ପ୍ରଥମେ ଏହାକୁ ବିଶ୍ବସ କରି ନଥିଲେ ରୁଷମା । ମାତ୍ର ପରଦିନ ପୁଣିଥରେ ବିବାହ କରିବା କଥା କହିଥିବାବେଳେ ସେ ଏହାକୁ ବିଶ୍ବାସ କରିଥିଲେ ।
ତେବେ ନେହେରା ଏକ ଇଣ୍ଟଭିୟ୍ୟୁରେ କହିଥିଲେ କି, ବିବାହ ପାଇଁ ଯୋଜନା ମାତ୍ର ୧୫ ମିନିଟରେ ସ୍ଥିର କରାଯାଇଥିଲା । ସାଙ୍ଗମାନଙ୍କ ସହ କଥା ହେବାବେଳେ ହଠାତ ଏଭଳି ଯୋଜନା କରିଥିଲେ । ଏପ୍ରିଲ ୨, ୨୦୦୯ରେ ଉଭୟ ବିବାହ ବନ୍ଧନରେ ବାନ୍ଧି ହୋଇଥିଲେ । କହି ରଖୁଛୁ କି, ୧୯୯୯ ମସିହାରେ ଶ୍ରୀଲଙ୍କା ବିପକ୍ଷରେ ଆନ୍ତର୍ଜାତୀୟ କ୍ରିକେଟରେ ଡେବ୍ୟୁ କରିଥିଲେ ନେହେରା । ସେ ଭାରତ ପାଇଁ ୧୭ଟି ଟେଷ୍ଟ, ୧୨୦ଟି ଦିନିକିଆ ଏବଂ ୨୭ଟି ଟି-୨୦ ଖେଳିଛନ୍ତି । ୨୦୦୩ ବିଶ୍ବକପରେ ଇଂଲଣ୍ଡ ବିପକ୍ଷରେ ମାତ୍ର ୨୩ ରନ ବିନିମୟରେ ୬ଟି ଓ୍ବିକେଟ ଅକ୍ତିଆର କରିଥିଲେ । ଯାହାକି ନେହେରାଙ୍କ ରେକର୍ଡ ମଧ୍ୟ ରହିଛି । ତେବେ ୨୦୧୧ ବିଶ୍ବକପରେ ଭାରତ ଚାମ୍ପିୟନ ଟିମରେ ନେହେରା ମଧ୍ୟ ଅଂଶ ଥିଲେ ।
ନୂଆ ଅବତାରରେ ଆସିବେ ନଜର, ’ରାକ୍ଷସ’ରେ ରଣବୀର
ନନ୍ଦିଘୋଷ ବ୍ୟୁରୋ: ରଣବୀର ସିଂଙ୍କ ଅଭିନୟ ସବୁବେଳେ ଚର୍ଚ୍ଚାରେ ରହିଥାଏ । ଏକ ମାଥୋଲୋଜିକାଲ ଫିଲ୍ମରେ ନଜର ଆସିବେ ରଣବୀର ସିଂ । ’ହନୁମାନ’ର ନିର୍ଦ୍ଦେଶକ ପ୍ରଶାନ୍ତ ବର୍ମାଙ୍କ ଦ୍ବାରା ଏହା ନିର୍ଦ୍ଦେଶନା ଦିଆଯିବ । ପ୍ରଥମ ବଲିଉଡ ଫିଲ୍ମରେ ନିର୍ଦ୍ଦେଶନା ଭାର ସମ୍ଭାଳିବେ ପ୍ରଶାନ୍ତ । ଏହା ଏକ ମେଗା ବଜେଟ ଫିଲ୍ମ ହେବ ବୋଲି ସୂଚନା ମିଳିଛି । ତେବେ ଏହି ଫିଲ୍ମର ପ୍ରଯୋଜନା ପାଇଁ ଏକ ପ୍ରଡକ୍ସନ ପାର୍ଟନର ମିଳିଯାଇଛି । ତେବେ ଏହି ଫିଲ୍ମର ସୁଟିଂ ଖୁବଶୀଘ୍ର ଆରମ୍ଭ ହେବାକୁ ଯାଉଛି । ଫିଲ୍ମକୁ ନେଇ ଏକ ବଡ଼ ଅପଡେଟ୍ ସମାନାକୁ ଆସିଛି । ଏହି ଫିଲ୍ମର ନାମ ରହିବ ’ରାକ୍ଷସ’ । ଯଦିଓ ଏନେଇ ପ୍ରଯୋଜନା ପକ୍ଷରୁ କୌଣସି ସୂଚନା ଦିଆଯାଇନାହିଁ କିନ୍ତୁ ରଣବୀର ସିଂଙ୍କ ଆଗାମୀ ଫିଲ୍ମର ନାମ ରହିଛି ରାକ୍ଷସ । ନକିଟରେ ହନୁମାନ ଜୟନ୍ତୀ ଅବସରରେ ଫିଲ୍ମର ସୁଟିଂ ପୂର୍ବରୁ ପୂଜାର୍ଚ୍ଚନା କରାଯାଇଛି ।
ବିଶାଳ ଶୋଭାଯାତ୍ରାରେ ଆସି ନାମାଙ୍କନ ଭରିଲେ ବାଲିଗୁଡ଼ା ବିଜେଡି ବିଧାୟକ ପ୍ରାର୍ଥୀ ଚକ୍ରମଣୀ କହଁର
ନନ୍ଦିଘୋଷ ବ୍ୟୁରୋ: କନ୍ଧମାଳ ଜିଲ୍ଲା ବାଲିଗୁଡ଼ାରେ ବିଜେଡ଼ିର ବିଶାଳ ଶୋଭାଯାତ୍ରା। ବିଶାଳ ଶୋଭାଯାତ୍ରାରେ ଆସି ନାମାଙ୍କନ ଭରିଲେ ବାଲିଗୁଡ଼ା ବିଧାୟକ ପ୍ରାର୍ଥୀ ଚକ୍ରମଣୀ କହଁର। ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ନାମାଙ୍କନପତ୍ର ଦାଖଲ କରିଛନ୍ତି। ଚକ୍ରମଣୀ କହଁରଙ୍କ ନାମାଙ୍କନ ପତ୍ର ଦାଖଲ ଅବସରରେ ଜନ ସମୁଦ୍ର ପାଲଟିଲା ବାଲିଗୁଡ଼ା ସହର। ସଂଯୋଜକ ଟୁନା ଦାସଙ୍କ ନେତୃତ୍ୱରେ ବାଲିଗୁଡ଼ା ନିର୍ବାଚନ ମଣ୍ଡଳୀର ଚାରୋଟି ବ୍ଲକର ପ୍ରାୟ ୩୦ ହଜାର ସମର୍ଥକଙ୍କ ସହ ବିଶାଳ ପଟୁଆରରେ ଆସିଥିଲେ ଚକ୍ରମଣୀ । କନ୍ଧମାଳ ସାଂସଦ ପ୍ରାର୍ଥୀ ଡ଼.ଅଚ୍ୟୁତ ସାମନ୍ତ, ଜିଲ୍ଲା ପର୍ଯ୍ୟବେକ୍ଷକ ବିଜୟ ନାୟକ, ବାଲିଗୁଡ଼ା ନିର୍ବାଚନ ମଣ୍ଡଳୀ ପର୍ଯ୍ୟବେକ୍ଷକ ଅଜୟ ମହାରଣା ଉପସ୍ଥିତ ଥିଲେ। ଜିଲ୍ଲା ପରିଷଦ ଅଧ୍ୟକ୍ଷାଙ୍କ ସମେତ ଚାରୋଟି ବ୍ଲକର ସଭାପତି, ବହୁ ନେତା ଓ ବରିଷ୍ଠ କର୍ମକର୍ତ୍ତା ସାମିଲ୍ ହୋଇଥିଲେ। ବିଜୁ ଜନତା ଦଳ ପ୍ରତି ସମସ୍ତଙ୍କର ଆଶୀର୍ବାଦ ରହିଛି। ବିପୁଳ ପରିମାଣରେ ଶଙ୍ଖ ଚିହ୍ନରେ ଭୋଟ୍ ଦେଇ ବିଜୟୀ କରାଇବା ପାଇଁ ଭୋଟରଙ୍କୁ ନିବେଦନ କରିଛନ୍ତି ଚକ୍ରମଣୀ କହଁର।
କଲବଲ କରୁଛି ଖରା, ତାତିରୁ ମିଳୁନି ନିସ୍ତାର
ଭୁବନେଶ୍ବର: ତାତିରୁ ନାହିଁ ନିସ୍ତାର । ସୋମବାର ଦିନ ସାଢେ ଦୁଇଟା ସୁଦ୍ଧା କେନ୍ଦୁଝର ହୋଇଛି ସବୁଠୁ ଉତ୍ତପ୍ତ । କେନ୍ଦୁଝରରେ ସର୍ବାଧିକ ୪୩ ଡିଗ୍ରୀ ତାପମାତ୍ରା ରେକର୍ଡ ହୋଇଛି । ଝାରସୁଗୁଡାରେ ୪୨.୮, ସମ୍ବଲପୁରରେ ୪୨.୬, ହୀରାକୁଦରେ ୪୧.୮, ରାଉରକେଲାରେ ୪୧.୮, ବାଲେଶ୍ୱରରେ ୪୧.୪ ଡିଗ୍ରୀ ତାପମାତ୍ରା ରେକର୍ଡ ହୋଇଛି । ଆଜି ରାଜଧାନୀ ଭୁବନେଶ୍ବରର ତାପମାତ୍ରା ରହିଛି ୪୧.୩ । ସେହିପରି ଚାନ୍ଦବାଲିରେ ୪୦.୭, ପୁରୀରେ ୩୪.୬, ଗୋପାଳପୁରରେ ୩୩.୨ ଓ ପାରାଦୀପରେ ୩୩.୧ ଡିଗ୍ରୀ ତାତି ରହିଛି । ଆହୁରି ୩ ଦିନ ପ୍ରବଳ ଗ୍ରୀଷ୍ମ ପ୍ରବାହ ଜାରି ରହିବ ବୋଲି ସତର୍କତା ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର। ଆସନ୍ତା ୨୪ ଘଣ୍ଟା ପାଇଁ ସିଭିୟର ହିଟ ୱେବ ଜାରି କରାଯାଇଛି ।
୧୦ଟି ଜିଲ୍ଲା ବାଲେଶ୍ୱର, ମୟୂରଭଞ୍ଜ, କେନ୍ଦୁଝର, ଢେଙ୍କାନାଳ, ବୌଦ୍ଧ, ଅନୁଗୁଳ,ନୟାଗଡ, ଖୋର୍ଦ୍ଧା, କଟକକୁ ରେଡ୍ ୱାର୍ଣ୍ଣିଂ ଜାରି ହୋଇଥିବାବେଳେ ଏହି ଜିଲ୍ଲା ଗୁଡ଼ିକରେ ୪୦ ଡିଗ୍ରୀ ଉପରେ ରହିବ ତାପମାତ୍ରା । ସେହିପରି ବଲାଙ୍ଗୀର, ସୋନପୁର, ଗଞ୍ଜାମ, ମାଲକାନଗିରି, ଭଦ୍ରକ, ଜୟପୁର, ଦେବଗଡ, ସମ୍ବଲପୁର, ନୂଆପଡା, ଝାରସୁଗୁଡା, ଗଜପତି, ସୁନ୍ଦରଗଡ ଜିଲ୍ଲାକୁ ଅରେଞ୍ଜ ଆଲର୍ଟ ଜାରି ହୋଇଛି । ରାଜ୍ୟରେ ଲଗାତାର ୧୪ ଦିନ ଧରି ହିଟୱେବ ଜାରି ରହିଛି । ଦିନ ୧୧ଟାରୁ ୩ଟା ମଧ୍ଯରେ ଖରାକୁ ନବାହାରିବାକୁ ପରାମର୍ଶ ଦିଆଯାଇଛି । ଉପକୂଳରେ ତାପମାତ୍ରା ୨ରୁ ୩ ଡିଗ୍ରୀ ଖସିବା ସହ ଆର୍ଦ୍ରତା ପ୍ରଭାବରେ ଲାଗି ରହିବ ଗୁଳୁଗୁଳି । ମାତ୍ର ଆଭ୍ୟନ୍ତରୀଣ ଓଡ଼ିଶାରେ ତାପମାତ୍ରାରେ ବିଶେଷ ପରିବର୍ତ୍ତନ ହେବନି । ସାମୁଦ୍ରିକ ଝଡ଼ର ପ୍ରଭାବ ରହିଲେବି ରାଜ୍ୟରେ ଉଷ୍ମ ଦିନ ଅନୁଭୂତ ହେବ । ୫ ତାରିଖ ବେଳକୁ କାଳବୈଶାଖୀ ହେବାର ସମ୍ଭାବନା ରହିଛି । ବଙ୍ଗୋପସାଗର ପବନ ବହିଲା ପରେ ସାମାନ୍ୟ ତାପମାତ୍ରା ହ୍ରାସ ପାଇବ ବୋଲି ଆକଳନ କରିଛି ପାଣିପାଗ ବିଭାଗ ।
ଅମିତ ଶାହଙ୍କ ଭିଡିଓ ଭାଇରାଲ ପ୍ରସଙ୍ଗ, ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡିଙ୍କୁ ସମନ
ନନ୍ଦିଘୋଷ ବ୍ୟୁରୋ: କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ଏକ ଫେକ୍ ଭିଡିଓ ଭାଇାଲ ମାମଲା । ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡିଙ୍କୁ ସମନ । ଦିଲ୍ଲୀ ପୋଲିସ ରେବନ୍ତଙ୍କ ପଚରା ଉଚରା କରିବା ପାଇଁ ସମନ ପଠାଇଛି । ତେବେ ଏହା ପୂର୍ବରୁ ଦିଲ୍ଲୀ ପୋଲିସର ସାଇବର ସ୍ପେଶାଲ ସେଲର ସାଇବର ୟୁନିଟ୍ IFSOର ଏକ ଟିମ ସୋମବାର ସକାଳୁ ତେଲେଙ୍ଗାନାରେ ପହଞ୍ଚି ମାମଲାର ତଦନ୍ତ ଆରମ୍ଭ କରିଛି । ଏହି ଘଟଣାରେ ୫ ଜଣଙ୍କୁ ଚିହ୍ନଟ କରାଯାଇଛି । ସେମାନଙ୍କୁ ପଚରା ଉଚରା କରାଯାଉଥିବାବେଳେ ଏହି ଘଟଣାରେ ରେବନ୍ତ ରେଡ୍ଡିଙ୍କୁ ସମନ କରାଯାଇଛି ।
କହି ରଖୁଛୁ କି, AI ଦ୍ବାରା ଏକ ଭିଡିଓ ପ୍ରସ୍ତୁତ କରାଯାଇ ଭାଇରାଲ ହେଉଛି । ଯେଉଁଥିରେ ସଂରକ୍ଷଣ ବ୍ୟବସ୍ଥାକୁ ନେଇ ଅମିତ ଶାହଙ୍କ ଏକ ବକ୍ତବ୍ୟ ଭାଇରାଲ ହେଉଛି । ବାସ୍ତବରେ ଏହା ଅମିତ ଶାହ କହିନଥିବା ସ୍ପଷ୍ଠ ହେବା ପରେ ଅଭିଯୋଗ କରାଯାଇଛି । ଏହି ଆଧାରରେ ସାଇବର ସେଲ ପକ୍ଷରୁ ତଦନ୍ତ ଆରମ୍ଭ କରାଯାଇଛି । ବିଜେପି ଆଇଟି ସେଲ ମୁଖ୍ୟ ଅମିତ ମାଲବିୟ କହିଛନ୍ତି କି, ଏହା ଏକ ଫେକ୍ ଭିଡିଓ । ଯାହାକୁ ନେଇ ରବିବାର ବିଜେପି ପକ୍ଷରୁ ଅଭିଯୋଗ କରାଯାଇଥିବାବେଳେ ଦିଲ୍ଲୀ ପୋଲିସ ପକ୍ଷରୁ ସୋମବାର ଯାଞ୍ଚ ଆରମ୍ଭ ହୋଇଛି ।
ଟି-୨୦ ବିଶ୍ବକପ ପାଇଁ ଭାରତରୁ ଯିବ ୨ଟି ଟିମ୍ !
ନନ୍ଦିଘୋଷ ବ୍ୟୁରୋ: ଜୁନ୍ ୧ରୁ ଆରମ୍ଭ ହେବାକୁ ଯାଉଛି ଟି-୨୦ ବିଶ୍ବକପ । ଏଯାବତ ଭାରତୀୟ ୧୫ ଜଣିଆ ଦଳ ଘୋଷଣା ହୋଇନାହିଁ । ଆଇପିଏଲ ଚାଲିଥିବାବେଳେ ପ୍ରଦର୍ଶନକୁ ଦେଖି ଖେଳାଳି ଟିମରେ ସ୍ଥାନ ପାଇବେ ବୋଲି କୁହାଯାଉଛି । ତେବେ ୨ ଭାଗରେ ୨ଟି ଟିମ ନ୍ୟୁୟର୍କ ଯାଇ ଅଭ୍ୟାସ କରିବେ ବୋଲି କୁହାଯାଉଛି । ୨୧ ମେ’ରେ ପ୍ରଥମ ଟିମ ଯାଇ ଅଭ୍ୟାସ ଆରମ୍ଭ କରିବ । ଆଇପିଏଲରେ ଯେଉଁ ଦଳ ପ୍ଲେଅଫରେ ନପହଞ୍ଚିବ ସେହି ଟିମର ସିଲେକ୍ସନ ଖେଳାଳି ଯାଇ କ୍ୟାମ୍ପରେ ଯୋଗଦେବେ । ଏହାପରେ ଦ୍ବିତୀୟ ଟିମ ଆଇପିଏଲ ସରିବା ପରେ ଯାଇ ଯୋଗଦେବେ । ଜୁନ ୧ରୁ ବିଶ୍ବକପ ଖେଳାଯିବାକୁ ଥିବାବେଳେ ଭାରତ ୭ ତାରିଖରେ ନିଜର ଅଭିଯାନ ଆରମ୍ଭ କରିବ । ମେ ୨୭ରେ ଦ୍ବିତୀୟ ଗୃପ ବାହାରିବ । ତେବେ ଦୁଇ ମାସ ଧରି ଆଇପିଏଲ ଖେଳିଥିବା ଖେଳାଳିମାନେ ବହୁ ଅଭିଜ୍ଞତା ଅର୍ଜନ କରିଥିବେ । ଏଣୁ ଏହା ଆଇପିଏଲରେ ଭାରତ ପାଇଁ ବେଶ ଗୁରୁତ୍ବ ବହନ କରିବ ।
କୋଟପାଡ଼ରେ କାର୍ତ୍ତିକ ପାଣ୍ଡିଆନଙ୍କ ଅପିଲ୍, ୯୫ ପ୍ରତିଶତରୁ ଅଧିକ ଭୋଟ ଦେଇ ବିଜେଡି ପ୍ରାର୍ଥୀଙ୍କୁ ଜିତାନ୍ତୁ
ନନ୍ଦିଘୋଷ ବ୍ୟୁରୋ: ଲୋକଙ୍କ ପାଖରେ ଉତ୍ତରଦାୟୀ ବିଜେଡି ସରକାର। ମୁଖ୍ୟମନ୍ତ୍ରୀ ଲୋକଙ୍କ ସବୁ ଆବେଦନକୁ ସମ୍ମାନର ସହ ଗ୍ରହଣ କରୁଛନ୍ତି ଆଉ ନିର୍ଦ୍ଧିଷ୍ଟ ସମୟ ସୀମା ମଧ୍ୟରେ ତାର ସମାଧାନ ମଧ୍ୟ ହେଉଛି । କେବଳ ସମାଧାନ ହେଉନି, ସବୁ ପ୍ରକଳ୍ପର ହିସାବ ଲୋକଙ୍କ ପାଖରେ ରଖୁଛନ୍ତି ମୁଖ୍ୟମନ୍ତ୍ରୀ । ଆଗକୁ ମଧ୍ୟ କୋଟପାଡରେ ବିକାଶ ଯାତ୍ରା ଜାରି ରଖିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହାତମୁଠାକୁ ଟାଣ କରିବାକୁ ପଡିବ । ୯୫ ପ୍ରତିଶତରୁ ଅଧିକ ଭୋଟ ଦେଇ ବିଜେଡି ପ୍ରାର୍ଥୀଙ୍କୁ ଜିତାଇବାକୁ ଅପିଲ କରିଛନ୍ତି ଦଳର ବରିଷ୍ଠ ନେତା କାର୍ତ୍ତିକ ପାଣ୍ଡିଆନ । ବର୍ଷେ ତଳେ କୋଟପାଡବାସୀ ଦେଇଥିବା ଆବେଦନ ଅନୁଯାୟୀ କୋଟପାଡ କଲେଜର ରୂପାନ୍ତରଣ ଶେଷ ହୋଇଛି । ଗୁପ୍ତେଶ୍ବର ମନ୍ଦିରର ବିକାଶ ପାଇଁ ୨୦ କୋଟି ଟଙ୍କା ମଂଜୁର କରିଛନ୍ତି ମୁଖ୍ୟମନ୍ତ୍ରୀ । ଦମୟନ୍ତି ସାଗର ପାଇଁ ୧୬ କୋଟି ୭୦ ଲକ୍ଷ ଟଙ୍କା ପ୍ରଦାନ କରାଯାଇଥିବା ବେଳେ ଦିୱାନମୁଣ୍ଡା ପୋଖରୀ ରୂପାନ୍ତରଣ ପାଇଁ ୨ କୋଟି ୬୦ ଲକ୍ଷ, କୋଲାବ ନଦୀ ଉପରେ ସେତୁ ପାଇଁ ୧୬ କୋଟି ୩୦ ଲକ୍ଷ, ସବରୀ ନଦୀ ଉପରେ ସେତୁ ପାଇଁ ୧୪ କୋଟି ୪୦, ରାମଗିରି ରାସ୍ତା ପାଇଁ ୧୦ କୋଟି, ବୋରିଗୁମା ଗ୍ରୀଡ ଷ୍ଟେସନ ପାଇଁ ୩୦ କୋଟି ଏବଂ ପାନୀୟ ଜଳ ସମସ୍ୟା ଦୂର କରିବାକୁ ୨୭୦ କୋଟି ଟଙ୍କାର ପ୍ରକଳ୍ପକୁ ମଂଜୁରୀ ଦେଇଛନ୍ତି ମୁଖ୍ୟମନ୍ତ୍ରୀ । ବିଏସକେୱାଇ ଯୋଜନାରେ କୋଟପାଡର ୫୦ ହଜାର ପରିବାର ଉପକୃତ ହେଉଛନ୍ତି । ମୁଖ୍ୟମନ୍ତ୍ରୀ ରାଜ୍ୟର ସାଢେ ଚାରି କୋଟି ଲୋକଙ୍କ ଖୁସି ପାଇଁ ସବୁବେଳେ କାମ କରୁଛନ୍ତି । ପାଞ୍ଚ ବର୍ଷ ପରେ ପୁଣି ଥରେ ସୁଯୋଗ ଆସିଛି ମୁଖ୍ୟମନ୍ତ୍ରୀଙ୍କୁ ସମ୍ମାନ ଦେବାକୁ କୋଟପାଡବାସୀଙ୍କୁ ଆହ୍ବାନ ଦେଇଛନ୍ତି କାର୍ତ୍ତିକ ପାଣ୍ଡିଆନ ।
ଅଭ୍ୟାସଗତ ଅପରାଧୀଙ୍କୁ ଦଳରେ ସାମିଲ କରୁଛି ବିଜେପି : ବିଜେଡି
ଭୁବନେଶ୍ବର: ଓଡ଼ିଆ ଭାଷା, ସଂସ୍କତି ଓ ପରମ୍ପରାର ସୁରକ୍ଷା ପ୍ରସଙ୍ଗ ନେଇ ଓଡ଼ିଶା ବିଜେପିକୁ ବିଜୁ ଜନତା ଦଳର କଡ଼ା ସମାଲୋଚନା। ପ୍ରେସମିଟ କରି ତୀବ୍ର ଭାବେ ବର୍ଷିଛି ରାଜ୍ଯ ବିଜେଡି। କହିଛି, ଓଡ଼ିଆ ଭାଷା, ସଂସ୍କୃତିକୁ ଆଜି ପର୍ଯ୍ୟନ୍ତ ଦୃଢତାର ସହ ସୁରକ୍ଷା ଦେଇ ଆସିଛି ବିଜେଡି। ଓଡ଼ିଆ ଭାଷା ଓ ସଂସ୍କୃତି ଓ ପରମ୍ପରାକୁ ଗଭୀର ଭଲପାଇବା ସହ ପ୍ରତିବଦ୍ଧତା ସହ ସମୃଦ୍ଧ କରିଆସିଛି। ଭାଷା ଓ ସଂସ୍କୃତିକୁ ସୁରକ୍ଷା ଦେବାକୁ ବିଜେପିର ଆବଶ୍ୟକତା ନାହିଁ। ଓଡ଼ିଆ ଭାଷା, ସଂସ୍କୃତି ଓ ପରମ୍ପରା ଯେକୌଣସି ରାଜନୈତିକ ଦଳଠାରୁ ବହୁ ଉର୍ଦ୍ଧ୍ଵରେ। ଅଭ୍ୟାସଗତ ଅପରାଧୀଙ୍କୁ ସମାଗମ କରି ଫୁଲମାଳ ପକାଇ ନିଜ ଦଳକୁ ଆଣି ଟିକେଟ ଦେବା ହେଉଛି ଓଡିଶା ବିଜେପିର ସଂସ୍କୃତି ଓ ପରମ୍ପରା। ଏଥିଲାଗି ଅପରାଧିକ ମାମଲା ଥିବା ବ୍ୟକ୍ତିଙ୍କୁ ନିଜ ଦଳରେ ମିଶାଇବାକୁ ଖୋଜୁଛି ରାଜ୍ୟ ବିଜେପି। ବିଜେପି ଯୁବମୋର୍ଚ୍ଚା ସଭାପତି ଇରାଶିଷ ଆଚାର୍ଯ୍ୟ, ଖୋର୍ଦ୍ଧା ବିଧାନସଭା ପ୍ରାର୍ଥୀ ପ୍ରଶାନ୍ତ ଜଗଦ୍ଦେବ ଏବଂ ବ୍ରହ୍ମପୁର ଲୋକସଭା ପ୍ରାର୍ଥୀ ପ୍ରଦୀପ ପାଣିଗ୍ରାହୀଙ୍କ ନେଇ ଓଡ଼ିଶା ବିଜେପିକୁ ଟାର୍ଗେଟ କରିଛି ବିଜେଡି। କହିଛି, ଯେଉଁ ନେତା ନିଜ ଦଳର ପ୍ରାର୍ଥୀଙ୍କ ଉପରେ ଗାଡ଼ି ମଡାଇ ମାରିବାକୁ ଚେଷ୍ଟା କଲା, ଯିଏ ନିଜ ନିର୍ବାଚନମଣ୍ଡଳୀର ଲୋକଙ୍କୁ ଚାକିରୀ ଦେବାକୁ କହି ଲୋକଙ୍କୁ ଲକ୍ଷାଧିକ ଟଙ୍କା ଠକିନେଲା ତାକୁ ପ୍ରାର୍ଥୀ କରିଛି ବିଜେପି। ଯେଉଁ ଯୁବନେତାଙ୍କୁ ଯୁବଗୋଷ୍ଠୀ ଆଦର୍ଶଭାବେ ଗ୍ରହଣ କରିଥାନ୍ତି ଅପରାଧିକ ପୃଷ୍ଠଭୂମି ଥିବା ନେତାଙ୍କୁ ନିଜ ଦଳର ନେତା ଭାବେ ବାଛିଛି ଓଡ଼ିଶା ବିଜେପି। ଅପରାଧୀଙ୍କୁ ନେଇ ଦଳରେ ସମାଗମ କରିଛନ୍ତି । ଏଇଟା ବିଜେପିର ଅସଲ ଚେହେରା ବୋଲି କହିଛି ବିଜେଡି। ଅପରାଧିକ ଚିନ୍ତାଧାରା ଓ ମାନସିକକା ରଖୁଥିବା ନେତା ଓଡ଼ିଶା ବିଜେପିର ସଂସ୍କୃତି ଓ ପରମ୍ପରା। ଓଡ଼ିଶାବାସୀଙ୍କ ନୁହେ ବୋଲି କହିଛନ୍ତି ବିଜେଡି ମୁଖପାତ୍ର ସ୍ଵୟଂପ୍ରକାଶ ମହାପାତ୍ର ଓ ଇପସିତା ସାହୁ। ଆଗାମୀ ଦିନରେ ଓଡ଼ିଶାବାସୀ ଏହାର କଡ଼ା ଯବାବ ଦେବେ ବୋଲି କହିଛି ବିଜେଡି।
ଚିତ୍ରକୋଣ୍ଡାରେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ, ଜନତାଙ୍କୁ ଦେଲେ ବିକାଶର ହିସାବ…
ଚିତ୍ରକୋଣ୍ଡା: ମାଲକାନିଗିରିବାସୀଙ୍କ ସବୁ ଆବଶ୍ୟକତାକୁ ମୁଖ୍ୟମନ୍ତ୍ରୀ ପୂରଣ କରୁଛନ୍ତି। ବିଜେଡିର ନବରଙ୍ଗପୁର ସାଂସଦ ପ୍ରାର୍ଥୀ ପ୍ରଦୀପ ମାଝୀ ଓ ବିଧାୟକ ପ୍ରାର୍ଥୀ ଲକ୍ଷ୍ମୀପ୍ରିୟା ନାୟକ ସବୁବେଳେ ଆପଣଙ୍କ ସହ ରହିବେ। ଅନ୍ୟ ନେତାଙ୍କ ଭଳି କେବଳ ନିର୍ବାଚନ ବେଳେ ଆସି ବଡ ବଡ ଭାଷଣ ଦେଇ ଚାଲିଯିବେନି। ଏହି ଦୁଇ ନେତା ହେଉଛନ୍ତି ଚିତ୍ରକୋଣ୍ଡାର ଦୁଇଟି ଇଂଜିନ । ଏହି ଦୁଇ ଇଂଜିନ ପଛରେ ରହିଛି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଇଂଜିନ । ଯେଉଁ ଇଂଜିନ କେବେ ଫେଲ ହେବନି । ତେଣୁ ଚିତ୍ରକୋଣ୍ଡାର ବିକାଶ ପାଇଁ ବିଜେଡି ପ୍ରାର୍ଥୀଙ୍କୁ ୯୫ ପ୍ରତିଶତରୁ ଅଧିକ ଭୋଟ ଦେଇ ଜିତାଇବାକୁ ଅପିଲ କରିଛନ୍ତି କାର୍ତ୍ତିକ ପାଣ୍ଡିଆନ।
ବିରୋଧୀ ଦଳ ବିଏସକେୱାଇ ଓ ମିଶନ ଶକ୍ତିକୁ ବନ୍ଦ କରିବାକୁ ଚକ୍ରାନ୍ତ କରୁଛନ୍ତି। ସେମାନଙ୍କୁ ଚିହ୍ନି ରଖିବାକୁ ପାଣ୍ଡିଆନ ଚେତାଇ ଦେଇଛନ୍ତି। ଚିତ୍ରକୋଣ୍ଡାବାସୀଙ୍କ ଅନୁରୋଧ କ୍ରମେ ଚିତ୍ରକୋଣ୍ଡାରେ ଚଳିତ ବର୍ଷ ଡିଗ୍ରୀ କଲେଜ କାର୍ଯ୍ୟକ୍ଷମ ହେବ। ନଗରବେଡା ଠାରେ ଥିବା ହାଇସ୍କୁଲକୁ ଯୁକ୍ତ ଦୁଇ କଲେଜ ଭାବେ ଉନ୍ନିତ କରାଯାଇଛି। ଗୋବିନ୍ଦପାଲ୍ଲୀ ଜଗନ୍ନାଥ ମନ୍ଦିର ପାଇଁ ମୁଖ୍ୟମନ୍ତ୍ରୀ ୬୦ ଲକ୍ଷ ଟଙ୍କା ମଂଜୁର କରିଥିବା ବେଳେ ଡମାଲଦେଇ ମନ୍ଦିର ପାଇଁ ୩୦ ଲକ୍ଷ, ଅଲେଖ ମହିମା ଆଶ୍ରମ ପାଇଁ ୮୦ ଲକ୍ଷ, ନକମାମୁଣ୍ଡିରେ ଥିବା ଶିବ ମନ୍ଦିରର ରପାନ୍ତରଣ ପାଇଁ ୨୦ ଲକ୍ଷ ଟଙ୍କା, ଆଦିବାସୀ ଭବନ ପାଇଁ ୫୦ ଲକ୍ଷ ଟଙ୍କା ମଂଜୁର କରିଛନ୍ତି ମୁଖ୍ୟମନ୍ତ୍ରୀ।
ମାଥିଲି ଓ ଚିତ୍ରକୋଣ୍ଡା ଚିକିତ୍ସାଳୟରେ ଶଯ୍ୟା ସଂଖ୍ୟା ୧୦୦କୁ ବୃଦ୍ଧି କରିବା ପାଇଁ ୫୦ କୋଟି ଟଙ୍କା ଲେଖାଏଁ ସହାୟତା ପ୍ରଦାନ କରାଯାଇଛି। ମାଛକୁଣ୍ଡ ଉପରେ ସେତୁ ପାଇଁ ୩୫ କୋଟି, ମାଥିଲି ଶିବ ସାଗରର ଉନ୍ନତିକରଣ ପାଇଁ ୫ କୋଟି ୫୦ ଲକ୍ଷ ଟଙ୍କା, ସୀତାକୁଣ୍ଡର ବିକାଶ ପାଇଁ ୫୦ ଲକ୍ଷ ଟଙ୍କା ଏବଂ ପିଇବା ପାଣି ସମସ୍ୟାର ସମାଧାନ ପାଇଁ ୩୪୦ କୋଟି ଟଙ୍କାର ପ୍ରକଳ୍ପକୁ ମୁଖ୍ୟମନ୍ତ୍ରୀ ମଂଜୁର କରିଥିବା କହିଛନ୍ତି 5T ଅଧ୍ୟକ୍ଷ।